1. Le yɛɛ naŋ tuu yɛ Setana a doosunɔɔ?

SABU doosunɔɔ kua doosuleŋ ndo cho le visioo biyɔɔ ɔɔ mbo dii ndu ni. Le hei, mbo soliŋ yaŋɔɔla yɛ yɛlaŋ kpeku. Mi chaaŋaa lachoowaa kuɛ Choobu kɔllo dɛɛniaa wa opilɛ suaa a hei okɔɔ. (Choobu 18:​8-10) Yɛɛ doosunɔɔ tosa yɛ le halikpeŋ mbo bii visioo? O pɛɛku fɛŋ a visi koŋ okɔɔ, mbo sina naa o kua wa, nyɛ o hɛnaŋ ndo, nduyɛ a yaŋɔɔle bɛnda le ndu leŋ. Setana cho ko maa doosunɔ koŋ. Mbo pɛɛku le sinaa a naa okɔɔ, naa naŋ kua wa a nyɛm naŋ nɔ yeemɛi leniŋ ndoŋ. Okoŋ mbo kɛsul naa niko yaŋɔɔle o sina maa le cho naa biyɔɔ leŋ. Kɛ Baabuiyo dimi maa o yɔŋ bɛɛ mi yaŋɔɔle ndɔleŋ le bii naa, ŋ tiuba miŋ hɛluŋ. Nduyɛ o pɛɛku naa vɛlɛ mɛɛ naŋ tiuba miŋ hɛli hɛliŋ yaŋɔɔla Setana laŋ yɛ.

2. Ɔɔ yaŋɔɔla tiɔɔŋ nda Setana soliŋ kpeku mbo sɔla batiuwaa tau laŋ?

² Yaŋɔɔla tiɔɔŋ nda Setana soliŋ kpeku mbo sɔla batiuwaa tau laŋ la cho kaa heelɔŋndo a yeemɛi le nyɛm faŋga faŋga ni. * Setana cho niŋ yaŋɔɔlaŋ ndaŋ soliŋndo kpeku le wɔsilaŋ waalaŋ o waalaŋ niŋ. Nduyɛ o sɔla niŋ batiuwaa tau. Setana cho vɛlɛ ko maa wana yaŋ yaŋɔɔlaŋ le youwa wo. Mi wana koŋ soliŋ nɛila yɛ yɛlaŋ kpeku le halikpeŋ mi youwo huŋ del o yaŋɔɔle ndɔleŋ niŋ. (Chɛlui. 5:​26) Kɛ ŋ tiuba miŋ hɛli hɛliŋ yaŋɔɔla Setanalaŋ kanifuule, Chɛhowa chɔm naa nɛila kaŋgalaala o soliŋ kpekulaŋ.—2 Kɔliŋ. 2:​11.

3. Le yɛɛ Chɛhowa tosa yɛ ma poonyiaa taamaseliilaŋ lapum o Baabuiyo niŋ?

³ Nɛiyo opilɛ o Chɛhowa pɛɛku naa le miŋ fafaŋ kaa heelaŋndo a yeemɛi le nyɛm faŋga faŋga wo, cho naa chɔmndo taamaseliilaŋ lapum a buɛiyaa nduaa okɔɔ ni. Ŋ tofaŋndɔ mɛɛ Setana soliŋ yaŋɔɔlaŋ ndaŋ kpeku le wanaa ndaa piɛi niŋ Chɛhowa le wɔsila bɔɔbɔɔ wa tiuwo ba yɛ. Kɛ mi che bɛɛ mbo tiu waŋnda haa ba,  baa hei chɔm ni maa ŋ tiuba miŋ hɛli hɛliŋ yaŋɔɔla ndɔlaŋ ndaŋ te? Sako, ŋ tiuba. Mi Chɛhowa tosa ma poonyiaa taamaseliila lapum o Baabuiyo niŋ le mi la wa “maa sila le naa.” (1 Kɔliŋ. 10:​11) O sina maa ŋ tiuba miŋ pɛɛku o taamaseliila ndaŋ niŋ, le halikpeŋ miŋ hɛli hɛliŋ yaŋɔɔla Setanalaŋ ɔɔ miŋ hɛluŋ ndaŋ.

4. Yɛɛ yɔŋnuŋ yɛ te ŋ nɔ pɛ kaa heelaŋndo?

⁴ Setana yeema naa miŋ nɔ kaa heelaŋndo. O sina maa te ŋ nɔ pɛ kaa hoo, ŋ cho wa maa ndu. Nduyɛ mi dikeŋnaŋ naŋ nɔ le yoomu fafɛɛŋndo sɔlaa wo hɛluŋ naa. (Pulɔ. 16:​18) Le hei, mi kiilanɔɔ Pɔɔl poonyiaa maa, Mɛlɛka cho wana heelaŋndo “yamɛi kilul mbo tusi ndu nyɛ palaa choo, mɛɛ i yɔŋnuŋ a Masa Nyinaa Wɔɔŋnda yɛ.” (1 Timo. 3:​6, 7) Hei tiuba mii yɔŋnuŋ wana o wana, o yɔŋ bɛɛ maa ŋ laŋga huŋ o tonyaa niŋ ɔɔ ŋ cho niŋ Chɛhowa piɛiyo le wɔsiŋ bɔɔbɔɔ.

5. A mɛɛ Ikilisiaatii 7:​16, 20 dimi yɛ, vɛɛ waŋndo chɔm yɛ maa o nɔ kaa heelaŋndo?

⁵ Wana ikaayioo wana heelaŋndo cho ni. Mi Setana kindiŋ le tosaa miŋ handu kɔllo o naapila choo mbo hiou Chɛhowa, taama taama te simullo komal naa pɛ. Le taamaseliiyo, baa waŋndo nyiinduu num niŋ pa choolaŋ choo? Ɔɔ, baa waŋndo tosal num niŋ pa kafalaŋ? Mi Setana naŋ kɔl tau, te a bii pɛ Chɛhowa ɔɔ puaapiliaa numnda tɔɔyaŋ le sɔɔŋ waa naa. Nduyɛ o yeema naa miŋ tol nɛi chɔmaa Chɛhowa yɔŋgu sanaa o Diom ndɔɔ niŋndo kɔɔli le. Kɛ o yeema naa miŋ tosa mɛɛ naŋ yiyaŋ yɛ.—Nuawɔ Ikilisiaatii 7:​16, 20.

6. Yɛɛ ŋ pɛɛku yɛ o suɛi yɔŋnaŋii ndepilɛnɔ cho o lɛŋnde Nɛdalaŋ ndeŋ niŋndo niŋ?

⁶ Ŋ tofaŋndɔ suɛi yɔŋnaŋii ndepilɛnɔ pilɛ cho o lɛŋnde Nɛdalaŋ ndeŋ niŋndo. Mi ndepilɛnɔɔ hoo ndoo tuulu kɔl tau, te waŋnda ndaa tosal ndu pɛ sɔɔŋ tɛɛmbuu ndu kɔllo woŋ. Nduyɛ mbo kɛɛsiaa maa kposoŋ bɛɛ o chue lɛ niŋ teleŋndo latulu a wanaa kaŋ te. Mbo dimi aa: “I ve lɛ hɛnɛkɛ o kunda koŋ niŋ te. Nduyɛ yaa yeema puaapiliaa a ndepiliaa kaŋ malɔɔ haki le. Le hei, mi dimul pɔnɔ nuu le miŋ kuɛŋnuŋ o kunda cheleŋ niŋ.” Kɛ mi ndepilɛnɔɔ hoo siŋga yiyaŋ ndɔɔ mɛɛ o tofa Tɛlivisiɔŋ Seiyaa  Chɛhowaa le Fuoo, 2016. Mi Tɛlivisiɔŋndo hoo yɔŋgu kɛɛsiaala mala naa miŋ biunuŋ ndo, o yɔŋ bɛɛ mi puaapiliaa naa pilaŋ naa tana. Mi ndepilɛnɔɔ hoo dimi aa: “Yaa nɔ mi tusiŋ nduyɛ mi yiyaŋ a biondɔŋnda nilaŋ okɔɔ, mbo hiau kɔllo handɔɔ o biondɔŋnda puaapiliaa a ndepiliaa tosalaŋ choo. Mi Tɛlivisiɔŋ koŋ mala ya mi handu kɔllo o Chɛhowa choo a kpuluŋgumayɛi nduɛi.” Yɛɛ hei pɛɛku yɛ naa? I pɛɛku naa maa te suɛi tɛɛmbuu naa kɔllo ve komal naa pɛ, ŋ nɔ miŋ handu kɔl naa kpou o Chɛhowa choo. Nyɔɔlu ndu le mbo mala num ma che acheleŋnda mɛɛ o che nda yɛ. Mi Finya naa o choo choo niŋ che biondɔŋnda puaapiliaa a ndepiliaa naa tosalaŋ. Kɛ a koŋ kpou, mbo mal nda haki. Nduyɛ o yeema naa miŋ tosa nyɛ pilɛ koŋ kpe.—1 Chɔŋ 4:​20.

7. Yɛɛ ndoo yɔŋnuŋ yɛ a Masaa Yusaya?

⁷ Mi kaa heelaŋndo tosa mi Masaa Yusaya o Chuda niŋ kɛɛ sila nda ke ndu wo, nduyɛ mbo tosa nyɛ ndoo nɔ di le tosa le wo. Mi Yusaya tosa sɔɔŋ kɛndɛŋ bɔɔbɔɔ. Mi ndoo sɔla batiuwaa o chɔuwo, nduyɛ mbo taŋgul chieeŋ bɔɔbɔɔ. Mi ndoo sɔla vɛlɛ batiuwaa tau o wali yondoo niŋ. ‘Mi Mɛlɛka duau ndu sala’ o Masale ndɔleŋ niŋ. (2 Kolo. 26:​3-7, 10) Kɛ Baabuiyo dimi aa: “Mɛɛ Masaa Yusaya o simnuŋ masa kpaaya bɛndu, mbo luɛi yoŋgaa. Nduyɛ mi yoŋga ndɔ koŋ o tɛɛmbuu ndu.” Wanaa soliaa lasalaa kinɛi Chɛhowa ndoo ke dioo ni le salalaŋ solioo o maaŋndo niŋ. Kɛ mi kaa heelaŋndo tosa mi Masaa Yusaya kua o maaŋndo niŋ le salaa solioo. Le hei, mi Chɛhowa tambu kɔl tau a ndu. Nduyɛ, mbo duau ndu naa ŋlɛlɔɔ choo. Naa koŋ lo ndu lekɔɔ haaa mbo sɔla piɔmndo.—2 Kolo. 26:​16-21.

8. A mɛɛ Kɔliŋtiaŋ Tasoo 4:​6, 7 dimi yɛ, vɛɛ naŋ fafaŋ yɛ kaa heelaŋndo?

⁸ Baa kaa heelaŋndo nɔla pa mbo tosa mi nyɛ yɔŋnuŋ Masaa Yusaya wo yɔŋnuŋ naa? Ŋ tofaŋndɔ taamaselii puaapilɛnɔ pilɛ diolaŋ Choose. Yulaleŋ puaapilɛnɔɔ hoo ndoo tosa ni, nduyɛ mi ndoo sɔla batiuwaa tau. O faŋaŋ okoŋ kɔɔli, bɛndu kunda waŋnda ndaa ke bɛɛleŋ tau wo o wa ni. Mi ndoo yɔŋgu sɔɔŋ o bɔŋaŋnda ibuŋgalaŋ a la bɛŋndaŋ. Nduyɛ mi buɛiyaa ibuŋgaa ndaa nyuna ndu pɛŋ le silaa. Kɛ mbo dimi aa: “Mi kandu tiindaŋndo dɔwɔɔ o taasi nuu niŋ, okoŋ mi mal tiindaŋndo dɔwɔɔ o Chɛhowa niŋ. Mi yiyaŋ maa I nɔ taasioo tau. Le hei, yaa yeŋ ndɛ silala Chɛhowalaŋ nilaŋ te.” Mi puaapilɛnɔɔ hoo tosa haki wɔɔŋ wɔɔŋndo nduyɛ mbo sɔla solioo. Mɛɛ wɔsilaŋ latiŋ la hiou, mbo sɔla miŋgioo o kundaa niŋ. Nduyɛ mbo dimi aa:  “Nyɛ yɔŋnuŋ ya hoo wo pɛɛku ya maa, nyɛ cho o sɔvɛ Chɛhowa o hɔllo cho hɛnaŋ ndɔɔ tosaa ni. O cho dikeŋnaŋ naŋ nɔ wo le.” Naa kpou nɔ miŋ loonuŋ maa, taasi naŋ nɔ wo vɛlɛ a dilakeŋnaŋnda kɛ kɛ naŋ nɔ, Chɛhowa ke naa ni. (Nuawɔ Kɔliŋtiaŋ Tasoo 4:​6, 7.) Lelaŋ te ŋ nɔ pɛ kaa heelaŋndo, Chɛhowa soliŋ naa kpeku le.

9. Yɛɛ yeemɛi le nyɛm faŋga faŋga nyindu yɛ Setana nda Ifi le tosaa?

⁹ Te ŋ yiyaŋ pɛ a wanaa nɔ yeemɛi le nyɛm faŋga faŋgaŋ nda okɔɔ, mi kɔllo del naa o Setana Masa Nyinaa Wɔɔŋnda lo. Setana wa maalikɛinɔɔ opilɛ o maalikɛiyaa Chɛhowa toosiaa wa tɛɛŋ. Nduyɛ naapum, ndoo nɔ dilakeŋnaŋnda kɛndɛ kɛndɛlaŋ. Kɛ ndoo hini kɔl a laŋ te. Ndoo yeema mi waŋchieeya wa ndu piɛiyo, mi che bɛɛ Chɛhowa kinɛi naŋ nɔ ni miŋ piɛi. Setana yeema miŋ wa maa ndu. O yeema miŋ hini kɔl a nyɛ naŋ nɔ wo le. Teleŋ tase o tosa heiyo wa teleŋ o soo o Ifi lo wo ni. Mi Chɛhowa ke Ifi nda pɔnɔ ndɔ nyɛm kɛndɛ kɛndɔŋ tau. Nduyɛ mbo dimul nda maa, ‘yɔm o yɔm cho o kpeloo niŋ a dia,’ mɛɛ yɔmndo ndu pilɛ kpe. (Chɛ. 2:​16) Mi Setana hui Ifi. Mbo tosa mi Ifi yiyaŋ maa o nɔ mbo de yɔm Chɛhowa kuuna nda le dioo wo. Mi Ifi kɛɛ le balika melaa chɔmndo le nyɛm kɛndɛŋ Chɛhowa ndoo ke nda woŋ. Ndoo yeema mbo chɔɔlu muŋ sɔla. Naa kpou sina nyɛ yɔŋnuŋ okoŋ kɔɔli wo. Mbo tosa hakioo. Okoŋ kɔɔli, mbo sɔla piɔmndo.—Chɛ. 3:​6, 19.

10. Vɛɛ yeemɛi Deeve ndoo nɔ le lanɔ pilaa ve simnuŋ yɛ yaŋɔɔleŋ le ndu?

¹⁰ Mi Chɛhowa tosal Deeve sɔɔŋ kɛndɛŋ bɔɔbɔɔ. Mbo tosa mi Deeve sul, mbo fula tɔɔ, nduyɛ mbo sɔla batiuwaa o chɔula bɔɔbɔɔ niŋ. Mbo dimi pɛŋ maa, sɔɔŋ Chɛhowa wa ndu tosallo woŋ, muŋ “chuu chɔm te.” (Sam 40:​5) Kɛ a teleŋ pilɛ, mi yeemɛi Deeve ndoo nɔ le lanɔ pilaa ve tosa mbo puɛɛnuŋ sɔɔŋ Chɛhowa ndoo tosal ndu woŋ. O ve lɛ a kɔl hiniaa le. Mi che bɛɛ ndoo nɔ laanduaa tau, kɛ mbo chɛl mi yeemɛi wɔɔŋnde luɛi ndu o kɔl le Baasiɛba, lanɔɔ Yulaya. Mbo suunda a chuaa hoo, nduyɛ mi Baasiɛba chua folioo. I hiou lewɔu ve, mbo tosa kɛɛsiaa le ma dii Yulaya o chɔuwo le halikpeŋ mbo veŋ haki ndɔɔ. (2 Saam. 11:​2-15) Baa Deeve ndoo yiyaŋ maa Chɛhowa ve ndu chɔ le? Mi che bɛɛ Deeve ndoo piɛi niŋ Chɛhowa o laalaŋndo choo le wɔsiŋ bɔɔbɔɔ, kɛ mi yeemɛi ndoo nɔ le lanɔ pilaa ve tosa mbo tosa hakioo. Nduyɛ  mbo saŋga tau le haki koŋ. Okoŋ kɔɔli, mi Deeve chɔɔmuu haki ndɔɔ, nduyɛ mbo mulul ndu kɔɔ. Le hei, mi Chɛhowa mal ndu haki. Yiyaŋndɔ mɛɛ o wa a kɔl kɛndɛ yɛ!—2 Saam. 12:​7-13.

11. A mɛɛ Ɛfisiaŋnda 5:​3, 4 dimi yɛ, yɛɛ mala yɛ naa miŋ chɔulaba yeemɛi le nyɛm faŋga faŋga?

¹¹ Yɛɛ taamasi Deeve wo pɛɛku yɛ naa? Ŋ pɛɛku maa, ŋ tiuba miŋ chɔulaba yeemɛi le nyɛm faŋga faŋga, te ŋ nɔ pɛ balika melaa le sɔɔŋ Chɛhowa cho naa tosallo woŋ. (Nuawɔ Ɛfisiaŋnda 5:​3, 4.) Ŋ nɔ miŋ hini kɔl a nyɛ naŋ nɔ wo. Te ŋ wa pɛ waŋndo Baabuiyo pɛɛkoo, ŋ nɔ miŋ mala ndu mbo yiyaŋ a nyɛ kpeekpei Chɛhowa tosal ndu wo okɔɔ, okoŋ mbo mel ndu balikaa le ndu. Te o wa pɛ hei tosaa lepaa o lepaa, mɛɛ o cho Chɛhowa balikaa mel le sɔɔŋ ŋɔmmɛu o lɔɔ bɛŋgu. (1 Tɛsa. 5:​18) Baa num bɛɛ tiu pa ba ma tosa hei? Te a yiyaŋ pɛ a sɔɔŋ Chɛhowa tosal num niŋ ndoŋ okɔɔ kpou, keŋ cho num mala ma nɔ balikaa melaa. Nduyɛ te a nɔ pɛ balika melaa, keŋ cho tosa ma nɔ kɔl hiniaa. Te a nɔ yɛ pɛ kɔl hiniaa, keŋ cho tosa ma fafaŋ yeemɛi le nyɛm faŋga faŋga.

12. Yɛɛ yeemɛi le nyɛm faŋga faŋga nyindu yɛ Chuda le tosaa?

¹² Mi yeemɛi le nyɛm faŋga faŋga tosa mi Chuda Isikaliɔɔ simnuŋ wana wɔɔŋ, nduyɛ mbo pisi Chiisu. Kɛ o ve wana wɔɔŋ o tasela ndɔ le. (Luku 6:​13, 16) Teleŋ Chiisu hɛli Chuda le mbo wa o buɛiyaa nduaa tɛɛŋndo, Chuda wa wana wana tiindaŋ. Le hei, ndu wa wana ndoo kɛsi nyɛsɔlaa wo ni. Mi Chiisu nda buɛiyaa nduaa ndaa soliŋ nyɛsɔlaa koŋ kpeku le wali dimiaa yooŋgu kɛndɔɔ tosaa. O dimi niŋ, toolula waŋnda yɔŋgu hau chieeŋndo balɔɔ silɔ le wali dimiaa yooŋgu kɛndɔɔ wo la wa laŋ ndu o ba ni. Kɛ a teleŋ pilɛ, mi Chuda kandu nyɛsɔlaa koŋ chiimbuuwo, mi che bɛɛ teleŋnda bɔɔbɔɔ mi Chiisu ndoo yɔŋgu silaa a yeemɛi le nyɛm faŋgaŋ okɔɔ. (Maki 7:​22, 23; Luku 11:​39; 12:​15) Kɛ Chuda chue sila koŋ o sɔvɛ le.

13. A teleŋ kuɛɛ yeemɛi Chuda ndoo nɔ le nyɛm faŋga faŋga ve chɔmnuŋ yɛ kpendekele?

¹³ Teleŋ biŋgi tuupa mi Chiisu sɔla piɔmndo, mi yeemɛi Chuda ndoo nɔ le nyɛm faŋga faŋga ve chɔmnuŋ kpendekele. Mi Chiisu, buɛiyaa nduaa, Meele a Mata kua o Simɔŋ ndo, o ndoo nɔ naa ŋlɛlɔɔ paandu wo. Mɛɛ nda wa nyɛdiaa dioo, mi Meele tala Chiisu siɛndiima baa kala kalaŋ o lebol. Kɛ mi Chuda a buɛiya a piliaa tambu kɔl tau le nyɛ Meele ndoo tosa koŋ ndo. Buɛiya a piliaa ndaa yiyaŋ maa ndaa tiuba ma pisi siɛndiima maŋ, okoŋ ma soliŋ nyɛsɔlaa koŋ kpeku le wanaa bala fonduaa malaa. Kɛ Chuda ndu wa yiyaŋndo a nyɛ cheleŋ okɔɔ. “Viinɔɔ o wa ni.” Ndoo yeema ma pisi siɛndiima maŋ, okoŋ ma wou nyɛsɔlaa koŋ o kɔfoo niŋ le mbo chiimbuu ndu. O faŋaŋ okoŋ kɔɔli, mi yeemɛi Chuda ndoo nɔ le nyɛm faŋga faŋga ve nyindu ndu le Chiisu pisioo.—Chɔŋ 12:​2-6; Maa. 26:​6-16; Luku 22:​3-6.

14. Vɛɛ pɔnɔɔ a lanɔ pilɛ dɔu yɛ nyɛ dimiŋ o Luku 16:​13 niŋndo o wali niŋ?

¹⁴ Mi Chiisu loonuŋ buɛiyaa nduaa a tonya sɔvɛ sɔviɔɔ hoo. Ndu cho ni: “Wana lenduŋ kɔl o nyɛ sɔlaa ma nɔla Mɛlɛka saaŋgial te.” (Nuawɔ Luku 16:​13.) Tonya kpeekpei hei cho ni. Tofawɔ mɛɛ pɔnɔɔ a lanɔ pilɛ o Luomaaniaa niŋ dɔu sila Chiisu wo hoo o wali niŋ yɛ. Mi pɔnɔɔ a lanɔɔ hoo sɔla wali nda wa nda ke kanioŋ tau wo o lɛŋnde cheleŋ niŋ. Ma dimi aa: “A teleŋ koŋ, naŋ nɔ kuoo tau le paawaa. Le hei, miŋ yiyaŋ maa Chɛhowa wa naa salaa dɔwɔɔ ni.” Kɛ o kpeekpei niŋ, yaŋɔɔleŋ hei wa le pɔnɔɔ a lanɔɔ hoo ni. Wali koŋ wa nda paaliaŋ tau o Chɛhowa piɛiyo niŋ. Lelaŋ, mɛɛ nda veelu diomndaŋ o Bandu Mɛŋgɛlaa niŋ le Naandɔɔ 15, 2008 o buŋgɛi hei niŋ, “Maintain Loyalty With a Unified Heart,” ma dimi aa: “Te o yɔŋ pɛ maa le kanioŋ nuuviaa naŋ cho laŋ wallo tosaa o lɛŋnde cheleŋ niŋ ni, mɛɛ ŋ cho chaŋyɛi naŋ nɔ a Chɛhowa ve kɛsioo nyɛ diiŋ ndɔɔ. Miŋ sina kɛsɛ maa keŋ cho chaŋyɛi naŋ nɔ a Chɛhowa ve  paaliaŋ.” Le hei, ma kɛɛsiaa le wali koŋ kiɔɔ. Yɛɛ yɔŋnuŋ yɛ okoŋ kɔɔli? Mi pɔnɔɔ sɔla wallo o lɛŋnde ndaleŋ niŋ. Nduyɛ mi wali koŋ wa nda malaa le nyɛm nda hauba woŋ sɔlaa. Mi lanɔɔ dimi aa: “Le teleŋ o teleŋ, Chɛhowa mel buɛiyaa nduaa le.” Pɔnɔɔ a lanɔɔ hoo cho a kɔl kɛndɛ tau le mɛɛ nda handu Chɛhowa wana tasoo o yoomu ndaa niŋ yɛ.

15. Le yɛɛ naŋ dimi yɛ maa ŋ tiuba miŋ hɛli hɛliŋ yaŋɔɔla Setanalaŋ?

¹⁵ Yɛɛ naŋ nɔ yɛ miŋ tosa te ŋ sina pɛ maa ŋ nɔ kaa heelaŋndo ɔɔ ŋ nɔ yeemɛi le nyɛm faŋga faŋga sɔlaa? Ŋ tiuba miŋ chɔulaba yaŋɔɔlaŋ ndaŋ! Mi Pɔɔl poonyiaa maa, o yɔŋ bɛɛ mi ‘yaŋɔɔle Masa Nyinaa wɔɔŋnda le bii naa,’ ŋ tiuba miŋ hɛluŋ ndeŋ. (2 Timo. 2:​26) Mi che bɛɛ mi Deeve tosa haki wɔɔŋ wɔɔŋndo, kɛ mɛɛ Netaŋ miŋgi ndu o nɛi, mbo chɛl sila koŋ. Nduyɛ mbo wookuŋ, okoŋ mbo miiŋgu o chaŋyɛi kpɛɛluŋnde niŋ a Chɛhowa. Fɛɛŋ bɛɛ ŋ nɔ miŋ puɛɛnuŋ te, Chɛhowa nɔ kpaayaa mbo hiau Setana. Lelaŋ te ŋ chɛl pɛ mala Chɛhowaa, ŋ tiuba miŋ hɛli hɛliŋ yaŋɔɔla Setanalaŋ.

16. Yɛɛ mala yɛ naa ŋ del o yaŋɔɔla Setanalaŋ niŋ te?

¹⁶ O kpeekpei niŋ, ŋ nɔ miŋ del fɛŋ o yaŋɔɔle Setana leŋ niŋ, okoŋ miŋ nuuviaa niko nɛilaŋ le hiɔlɔŋndo le. Ŋ nɔ miŋ fafaŋ ndaŋ. Kɛ a mala Mɛlɛkaa kinɛi naŋ tiuba le hei tosaa ni. Ŋ nɔ miŋ tiindaŋ taasi naa le. Wanaa ndaa viou niŋ Chɛhowa piɛiyo o laalaŋndo choo wa bɛɛ del niŋ o yaŋɔɔleŋ niŋ le kaa heelaŋndo nɔɔ, ɔɔ yeemɛi le nyɛm faŋga faŋga. Lelaŋ, nyɔɔlu Chɛhowa lepaa o lepaa le mbo mala num ma sina te sɔɔŋ muŋ kandu num pɛ luɛiyɔɔ o kɔl. (Sam 139:​23, 24) Fɛɛŋ bɛɛ chɛl ma del o yaŋɔɔla Setanalaŋ niŋ te!

17. Yɛɛ cho yɛ suŋ yɔŋnɔŋ a Setana, Masa Nyinaa Wɔɔŋnda?

¹⁷ Setana cho niŋ doosuleŋ tosaa le wɔsilaŋ waalaŋ o waalaŋ niŋ. Kɛ a cho ndu suŋ hunɔɔ biyɔɔ ma wou ndu o sooŋ yiŋgilɛiyo niŋ, nduyɛ o mɛɛlulaŋ kpɔŋ, mbo sɔla tambei. (Sɔɔŋ. 20:​1-3, 10) Ŋ nɔ yeemɛi kpeekpei le mi teleŋ koŋ fuuluu. Kɛ haaa mi teleŋ koŋ fuuluu, wa yekeŋ yɔŋii ŋ del o yaŋɔɔla Setanalaŋ niŋ. Tosa wallo kalaŋ le halikpeŋ ma fafaŋ kaa heelaŋndo a yeemɛi le nyɛm faŋga faŋga. Kɛɛsiaŋ o kɔl le ma ‘simul Masa Nyinaa Wɔɔŋnda. Te a simul ndu pɛ, o nyaanuŋ num.’—Chemi. 4:​7.