1. Samu na yinki beto lenda kompare Satan na chasseur?

DIKANISI ya chasseur ke vandá kaka mosi: kukanga kibulu yina yandi ke na sosá to kufwa yandi. Faso Biblia ke zonzak’ yawu, Satan ke sadilá bakalite mingi ya bapieje. (Yobi 18:8-10) Wa’ faso chasseur lenda nata kibulu na kukota na kati ya pieje ya yandi? Yandi ke longoka kuzaba mbote-mbote kibulu yango. Yandi lenda yufula: Wa’ kote yandi ke kwendá? Yinki yandi ke zolá? Wapi pieje ya kulutila mbote mu lenda sadila? Satan ke salá nete chasseur yayi. Yandi ke longoká kuzaba beto mbote-mbote. Yandi ke talá baplase yina beto ke kwendá mpe babima yina beto ke zolá. Na manima, yandi ke sadila pieje yina yandi zaba ti ya ke kanga beto ntangu beto ke na vingilá ve yawu. Kasi, Biblia ke zonzá na beto ti ata yandi me kanga deja beto, beto lenda basika na kati ya pieje ya yandi. Ya ke lakisá mpe beto faso ya kusala samu na kubwa ve na kati ya bapieje ya yandi.

2. Wapi yina ke zole ya bapieje ya Satan yina ke simbá mingi?

² Zole ya bapieje ya Satan yina ke simbá mingi ke ni lulendo na nsatu ya kuzwa ya kulutila. * Na kati ya bamvula mingi, Satan me lenda kubwisa bantu mingi na kati ya bifu ya yimbi yayi. Faso muntu yina ke simbá bandeke, Satan ke natá beto na kubwa na kati ya pieje ya yandi to ke kangá beto na filet. (Nku. 91:3) Kasi beto lenda sala ti beto kubwa ve na kati ya pieje ya Satan. Samu na yinki beto me zonza yawu? Samu Yehova me lakisa beto bima yina Satan ke sadilá.—2 Ko. 2:11.

3. Samu na yinki Yehova tulá na kati ya Biblia ba-ekzample ya bantu yina kumá na lulendo mpe nsatu ya kuzwa ya kulutila?

³ Yehova ke lakisá beto faso lulendo mpe nsatu ya kuzwa ya kulutila  ke yimbi samu na kimpeve ya beto. Na yawu, yandi ke zonzilá beto bamambu yina kuminá bisadi ya yandi ya nkaka yina kubwá na kati ya bapieje yayi. Beto ke tala faso Satan lendá kukanga na bapieje yayi bisadi ya Nzambi ya nkaka yina vandá sadila Nzambi depuis bamvula mingi. Ya zola zonza kwandi ti beto ke kubwa kaka na bapieje ya Satan? Ve. Yehova tulá ba-ekzample yina na Biblia samu “na kukebisa beto.” (1 Ko. 10:11) Yandi zaba ti ba-ekzample yayi ke sadisa beto na kuzaba faso ya kukima to ya kubasika na kati ya bapieje ya Satan.

4. Yinki lenda kumina beto si beto kuma na lulendo?

⁴ Satan zola ti beto kuma na lulendo. Yandi zaba ti, si beto bika lulendo kula na kati ya bantima ya beto, beto ke kuma faso yandi mpe beto ke kuzwa ve luzingu ya ntangu nyonso. (Bin. 16:18) Na yawu, apotre Paul zonzá ti muntu lenda ‘fuluka na lulendo mpe kubwa na kati ya jujement yina ba salá samu na Diable.’ (1 Tim. 3:6, 7) Bamambu yayi lenda kumina beto nyonso ata beto me zaba laverite ntama mingi ve, to beto me sadila Yehova depuis bamvula mingi.

5. Faso ke zonzá Longi 7:16, 20, wa’ faso muntu lenda lakisa ti yandi ke na lulendo?

⁵ Muntu yina ke na lulendo ke kanisá kaka na ba-interet ya yandi mosi. Satan ke sosá kunata beto na kukanisa ntete na beto mosi avant na kukanisa na Yehova, surtout lere beto ke lutisá bantangu ya mpasi. Na kifwani, ba me vuniná deja nge bamambu? To muntu me salá deja nge mambu ya yimbi? Satan ke vanda na vrai kilengi si nge dasukila Yehova to bampangi ya nge. Mpe Satan ke na nsatu nge kanisa ti faso ya kulutila mbote ya kuyidika bamambu, ni ya kusadila mayela ya nge mosi kasi na kulanda ve misiku yina Yehova me pesa nge na kati ya Biblia.—Tanga Longi 7:16, 20.

6. Yinki beto lenda longoka na ekzample ya mpangi mosi ya kento yina ke vandá na Hollande?

⁶ Beto zonzila ekzample ya mpangi mosi ya kento yina ke vandá na Hollande, yina dasuká mingi samu na bamambu yina bampangi ya nkaka vandá salá. Yandi baká desizion ya kulutisa dyaka ve ntangu na bampangi yina. Yandi me zonza:  “Mu vandá tala ti mu vandá vrai izole mpe mu vandá lenda ve na kulemvokila bawu. Mu zonzá na bakala ya munu ti beto kwenda ya beto na kimvuka ya nkaka.” Kasi yandi talá emision ya JW télédiffusion ya Mars 2016. Emision yango lakisá yinki beto lenda sala ntangu bampangi ke salá ba-erer. Yandi me bwela: “Mu talá ti mu zolá vanda ya kukuluka mpe kukanisa ntete na ba-erer ya munu mosi, kasi kulutisa ve ntangu na kutalá kaka ba-erer ya bampangi. Emision yina sadisá munu na kutala kaka Yehova, mpe yina yandi zola beto sala.” Wapi leson samu na beto? Ntangu nge ke kutaná na bamambu ya mpasi, kontinye na kutala kaka Yehova. Na priere, zonza na yandi sadisa nge na kutala bampangi faso yandi ke talá bawu. Papa ya nge ya zulu ke talá ba-erer ya bawu, kasi na ntima mosi, yandi ke lemvokilá bawu. Yandi zola nge sala faso yandi.—1 Yoa. 4:20.

7. Yinki kuminá mfumu Ozias?

⁷ Samu Ozias mfumu ya Juda kumá na lulendo, yandi kuwá ve konseye yina ba vanda pesa yandi mpe salá kima yina yandi vandá ve na droit ya kusala. Ozias salá babima mingi ya mbote. Yandi ganyeke ba-guerre mingi, tungá ba-ville ya nene, mpe salá bilanga ya nene. ‘Nzambi salá ti luzingu ya yandi bonga.’ (2 Ns. 26:3-7, 10) Biblia ke zonzá: ‘Kasi, ntangu yandi kumá muntu ya nene, ntima ya yandi kumá na lulendo ni yina bwisá yandi’. Yehova pesá musiku ti kaka bapretre zolá yoka encens na temple. Kasi, Ozias kotá na temple samu na kuyoka encens, kima yina yandi zolá sala ve. Yehova sepelá ve mpe pesá yandi lepre. Lepre ya Ozias manisá ve tii lufwa ya yandi.—2 Ns. 26:16-21.

8. Wa’ faso kusadila 1 Bakorinto 4:6, 7 lenda sadisa beto na kuvanda ve na lulendo?

⁸ Beto mpe lenda kuma na lulendo mpe kusala disumu faso Ozias? Beto zonzila ekzample ya José. Yandi vandá na mbongo mingi mpe bima yina yandi vandá sala vandá simbá. Yandi vandá mpe kuluntu yina ba vandá pesá buzitu na kati ya kimvuka. Yandi vandá salá badiskur na balukutakanu ya nene, mpe bantwadisi ya sirkonskripsion vandá sosá bakonseye na kote ya yandi. Yandi me zonza: “Mu vandá sala konfianse kaka na ngolo mpe mayela ya munu mosi, kasi na Yehova ve. Samu mu vandá tala ti mu vandá na mayela, mu vandá wá dyaka ve bakonseye mpe malongi ya Yehova.” José salá disumu ya nene mpe ba basisak’ yandi na kimvuka. Bubu yayi, yandi me vutuká na kati ya kimvuka. Yandi me zonza: “Yehova me longa munu ti kima yina me lutila important ke ve kuvanda na titre ya  nene, kasi kusala bamambu yina yandi ke zonzá na beto.” Beto zimbana ve ti mayela yina beto ke na yawu mpe baresponsabilite yina beto ke zwa na kati ya kimvuka ke katuká na Yehova. (Tanga 1 Bakorinto 4:6, 7.) Si beto ke na lulendo, Yehova lenda sadila ve beto.

9. Nsatu ya kuzwa ya kulutila natá Satan na Eve na kusala yinki?

⁹ Kifu ya kusosa kuzwa ya kulutila ke rapeleke beto Satan. Samu yandi vandá mosi ya ba-ange ya Yehova, Satan vandá ntangu ya nkaka na baresponsabilite mingi. Kasi yandi vandá na nsatu ya kuzwa ya kulutila. Yandi vandá na nsatu ya kuzwa kima yina kaka Yehova me lunga kuzwa: bantu sambila yandi. Satan zola beto kuma faso yandi. Na yawu, yandi ke sosá kunata beto na kusepela ve na yina beto ke deja na yawu. Mbala ya ntete yina yandi salak’ yawu ni ntangu yandi sololá na Eve. Na luzolo nyonso, Yehova pesá na Eve mpe na bakala ya yandi bima mingi ya kudya: ‘bambuma ya bayinti nyonso na kati ya jardin.’ Yandi niminá bawu kaka bambuma ya yinti mosi. (Kub. 2:16) Kasi, Satan vuná Eve mpe natak’ yandi na kukanisa ti yandi vandá na nsatu ya kudya bambuma ya yinti yina. Eve sepelá ve na yina vandá na yandi mpe kumá na nsatu ya kuzwa ya kulutila. Beto zaba yinki salamá na manima. Eve salá disumu mpe yandi kufwá.—Kub. 3:6, 19.

10. Wa’ faso nsatu ya kuzwa ya kulutila kumá pieje samu na mfumu David?

¹⁰ Nsatu ya kuzwa ya kulutila natá mfumu David na kuzimbana bima nyonso yina Yehova pesak’ yandi: mbongo ya mingi, otorite, mpe ngolo ya kufwa ba-enemi ya yandi. David ndimá ti Yehova pesak’ yandi bima mingi ‘yina yandi ke lenda ve kuzonzila nyonso!’ (Nku. 40:5) Kasi na okazion mosi, David zimbaná nyonso yina Yehova pesak’ yandi. Yandi vandá sepela dyaka ve na yina vandá na yandi, yandi kumá na nsatu ya kuzwa ya kulutila. Ata David vandá na bakento mingi, yandi kumá na nsatu ya kubasika na kento ya ngana. Kento yango vandá Bethsabée, mpe bakala ya yandi vandá Urie. David kanisá kaka na yandi mosi mpe yandi vukisá nzutu na Bethsabée. Na manima, Bethsabée kuzwá kivumu. David salá disumu ya nene, kasi yandi suká ve kaka kuna. Yandi salá mpe nyonso samu ba kufwa Urie! (2 Sa. 11:2-15) David vandá kanisa kwandi ti Yehova vandá tala ve yandi? Ata David sadilá Yehova depuis ntama, yandi kumá na nsatu ya kuzwa ya kulutila mpe ya natiná yandi bamambu mingi ya mpasi. Na manima,  David ndimá disumu yina yandi salá mpe nyongak’ yawu. Yandi vandá na vrai kilengi ya kuzaba ti Yehova lemvokilak’ yandi!—2 Sa. 12:7-13.

11. Faso Baefeze 5:3, 4 ke zonzak’ yawu, yinki lenda sadisa beto na kunwana na kifu ya kusosá kuzwa ya kulutila?

¹¹ Yinki ekzample ya David ke na longá beto? Ya ke na longá beto ti, beto lenda nwana na kifu ya kusosa kuzwa ya kulutila si ntangu nyonso beto ke sepelá na nyonso yina Yehova ke pesá beto. (Tanga Baefeze 5:3, 4.) Beto zolá vanda na kilengi na babima yina ke na beto. Ntangu beto ke bandá kulongoka Biblia na bantu, beto lenda nata bawu na kukanisa na kima mosi ya mbote yina Yehova me pesá deja bawu mpe na kuvutula yandi matondo. Si muntu sala yawu bilumbu nyonso, ya ke sala ti na kati ya semaine mosi, yandi vanda na bima 7 ya kuzonzila Yehova na kati ya priere. (1 Tes. 5:18) Nge ke salá mpe faso yayi? Si nge baka ntangu ya kukanisa mbote-mbote na nyonso yina Yehova me salá deja samu na nge, ya ke sadisa nge na kuvanda na kifu ya kuvutulá matondo. Si nge ke na kifu yayi, nge ke sepela na yina ke na nge, mpe nge ke sosa ve kuzwa bima yina nge ke ve na yawu.

12. Yinki nsatu ya kuzwa ya kulutila natá Judas na kusala?

¹² Nsatu ya kuzwa ya kulutila natá Judas na kusala kima ya vrai yimbi: kutekisa Yesu. Kasi avant, Judas vandá ve muntu ya yimbi. Yesu solá yandi faso apotre. (Luke 6:13, 16) Yesu vandá sala Judas konfianse, ni na yawu, yandi pesak’ yandi responsabilite ya kubumba caisse ya mbongo. Yesu na ba-apotre vandá sadila mbongo yina samu na kusumba bima yina ba vandá na yawu nsatu na kisalu ya predikasion. Si ya vandá bubu yayi, ya zolá vanda faso ba-ofrande bantu ke pesá samu na kisalu ya predikasion. Kasi na manima, Judas bandá kuyiba mbongo, ata yandi vandá kuwa bambala mingi Yesu kukebisa bantu na kuvanda ve na nsatu ya kuzwa ya kulutila. (Mrk. 7:22, 23; Luke 11:39; 12:15) Judas kipeke ve bamambu yina Yesu vandá zonzá.

13. Na wapi ntangu nsatu ya Judas ya kuzwa ya kulutila talaná?

¹³ Nsatu ya Judas ya kuzwa ya kulutila talaná ntama mingi ve avant lufwa ya Yesu. Kilumbu mosi, bakala mosi na nkumbu ya Simon yambá na yinzo ya yandi Yesu, badisiple ya yandi na Marthe mpe Marie. Ntangu ba vandá kudya, Marie telamá mpe tulá na yintu ya Yesu mafuta mosi ya sunga ya vrai kitoko yina ba ke tekisá na mbongo mingi. Judas na badisiple ya nkaka kumá na vrai kolere. Badisiple vandá kanisa ntangu ya nkaka ti faso ya mbote ya kusadila mbongo yina, zolá vanda ni na kisalu ya predikasion. Kasi Judas dasuká samu na rezon ya nkaka. Yandi ‘vandá muyibi,’ na yawu, yandi vandá na dikanisi ya kuyiba mbongo yina ba zolá tula na kati ya caisse. Mpe samu nsatu ya kuzwa ya kulutila vandá ngolo na ntima ya Judas, yandi eziteke ve na kutekisa Yesu.—Yoa. 12:2-6; Mat. 26:6-16; Luke 22:3-6.

14. Wa’ faso kuple mosi sadilá Luke 16:13?

¹⁴ Yesu rapeleke na badisiple ya yandi verite yayi: ‘Beno lenda sadila ve mbala mosi Nzambi mpe Mbongo.’ (Tanga Luke 16:13.) Mambu yayi ke mpe vrai bubu yayi. Beto tala faso kuple mosi ya Roumanie sadilá bamambu yina Yesu zonzá. Ba kuzwá kisalu mosi yina zolá dure kaka mwa bangonda na bwala mosi kote luzingu ke kitoko. Ba me zonza: “Na kubanda, beto talá ti kisalu yayi vandá benediksion yina katuká na Yehova, samu beto vandá defa mbongo mingi na banque.” Kasi, ya vandá na pieje. Si ba ndimá kisalu yango, ba zolá vanda dyaka ve na ntangu mingi ya kusadila Yehova. Na manima ya kutanga artikle “Demeurons fidèles, le coeur unifié” na Yinzo ya Kengidi ya 15 Août 2008 (na Français), ba baká desizion ya bawu. Ba me zonza: “Si beto kwenda sala na bwala ya nkaka samu na kuzwa mbongo mingi, bwala yina beto zaba ti ya ke vanda mpasi na kusadila Yehova, beto ke lakisa ti  kikamarade ya beto na Yehova ke ve kima yina ke baká plase ya ntete na luzingu ya beto. Beto zabá ti kimpeve ya beto zolá beba.” Na yawu, ba mangá kisalu yina. Yinki salamá na manima? Bakala kuzwá kisalu mosi na bwala ya bawu. Ya sadisá bawu na kuzwa mbongo yina ba vandá na yawu nsatu. Kento me zonza: “Diboko ya Yehova ke ve nkufi.” Kuple yayi ke na kilengi yina ba tulá Yehova na plase ya ntete kasi mbongo ve.

15. Wa’ faso beto zaba ti beto lenda basika na bapieje ya Satan?

¹⁵ Yinki beto lenda sala si beto ke na talá ti beto me kuma na lulendo to na nsatu ya kuzwa ya kulutila? Beto lenda chanje! Paul zonzá ti ba yina Satan ‘kangá moyo’ na pieje ya yandi lenda basika. (2 Tim. 2:26) Ni yina mpe David lendá kusala. Ntangu Nathan vutulak’ yandi na nzila, David kuwak’ yandi, katulá na ntima ya yandi nsatu ya kuzwa ya kulutila mpe vutulá kikamarade ya yandi na Yehova. Beto zimbana ve, Yehova lutila Satan na ngolo. Na yawu, si beto ndima Yehova sadisa beto, beto lenda basika na pieje ni pieje ya Satan.

16. Yinki lenda sadisa beto na kubwa ve na kati ya bapieje ya Satan?

¹⁶ Ya vrai, au lieu na kusosa kubasika na bapieje ya Satan, beto zolá sala nyonso samu na kubwa ve na kati ya yawu. Beto lenda sala yawu kaka si Nzambi sadisa beto. Kasi, beto zolá kanisa ata fioti ve ti beto lenda kubwa ve na lulendo to nsatu ya kuzwa ya kulutila. Ya ke na bisadi ya Yehova yina sadilá yandi bamvula mingi, yina kubwá na bapieje yayi. Na yawu, sambila Yehova bilumbu nyonso samu yandi sadisa nge na kutala faso ke makanisi ya nge mpe komportement ya nge. (Nku. 139:23, 24) Sala nyonso samu na kukuma ve na lulendo mpe na kusosa ve kuzwa ya kulutila!

17. Na bilumbu yina ke kwiza, yinki ke kumina enemi ya beto Satan?

¹⁷ Depuis bamvula mingi, Satan ke salá bamambu faso chasseur. Kasi, ntangu me bikana kaka fioti samu ba kanga yandi mpe ba kufwa yandi. (Luz. 20:1-3, 10) Beto ke na nsatu kilumbu yina kwiza deja. Avant ya kuma, kontinye na kusala keba na bapieje ya Satan. Sala bangolo samu na kukuma ve na lulendo mpe kusosa ve kuzwa ya kulutila. Baka desizion ya ‘kumanga Satan, mpe yandi ke kima ntama na nge.’—Zaki. 4:7.