1. Morwasinke natu hetakanesera Satana komusani?

MUSANI kwa kara nositambo simwe tupu, sokukwata ndi sokudipaga sikorama. Age kuruganesa nonkedi dokulisiga-siga ndi yiraha yokulisiga-siga. Pasihonena, simwe kuna kara esi ga tumbwire kaume kaJoba goyipempa. (Joba 18:8-10) Ngapi musani a ninkisa sikorama dogoro a ka si dipage? Age kusinomena nawa-nawa. Age kutara oku sina kuza, neyi sa hara ntani noku diva nkedi zongwa zokusikwata. Satana kwa kara ngwendi musani ogo. Age kutunomena nawa-nawa. Age kunomena oku atu zi ntani neyi twa hara kurugana. Makura age kuruganesa siraha esi a gazara asi kuvhura si tu kwate twa hana kuyidivira. Nye Bibeli kututantera asi kuvhura tu henduke nampili kuna tu kwata siraha. Azo hena kuturonga omu natu nyokera po yiraha yokulisiga-siga eyi a ruganesa Satana.

2. Yiraha musinke yivali yoyinene a ruganesa Satana?

² Yiraha yivali yoyinene eyi a ruganesa Satana kuna kara elinenepeko ntani edowo lyokudowokera yininke. * Age kwa mu tompoka kuruganesa yiraha oyo nomvhura dononzi. Age kwa fana ngwendi mukwati goyidira ogu a ruganesa yiraha ndi notjipa yipo a yi kwate. (Epis. 91:3) Nye twa ha pulisira Satana a tu pukise. Morwasinke? Morwa Jehova ga tu likida nonkedi edi a ruganesa Satana.—2 Kol. 2:11.

3. Morwasinke Jehova ga tulira moBibeli yihonena yavamwe ava va likidire elinenepeko nokudowokera yininke?

³ Nkedi zimwe omu Jehova a tu rondora kuhamena elinenepeko ntani nokudowokera yininke, kuna kara kupitira moyihonena yovakareli vendi vamwe ava va tumbura moBibeli. Natu ka dimburura omu Satana ga pukisire vamwe ava va karerere  Jehova siruwo sosire. Eyi ngesi kutanta nye asi kapi tayi vhuru kututompoka kunyokera po elinenepeko nedowo lyokudowokera yininke ndi? Hawe! Jehova kwa tura yihonena eyi moBibeli yipo “yi kare erondoro lyetu.” (1 Kol. 10:11) Jehova ga yi diva asi ose kuvhura tu lirongere ko koyihonena oyo yipo tu nyokere po yiraha yoMuzonaguli.

4. Yisinke ngayi horoka nsene tu kara nelinenepeko?

⁴ Satana kuna hara tu linenepeke. Age gayi diva asi nsene tu kara nelinenepe ko, ngatu mu fana ntani kapi ngatu ka gwana mwenyo gwanarunye. (Yis. 16:18) Mupositoli Paurusa kwa rondwere asi muntu kuvhura a ‘litumbe ntani nokugwana mpanguro zokuliza nezi zaSatana.’ (1 Tim. 3:6, 7) Eyi kuvhura kutuhorokera natuvenye, yi kare asi nare twa gusa kukarera Jehova ndi ntani tupu katutambwire usili.

5. Kuliza naMuudisi 7:16, 20, ngapi muntu na vhura kulikida elinenepeko?

⁵ Elinenepeko kutanta asi kuligazara tupu nyamoge. Satana kuhetekera ko kutuninkisa tu ligazare unene nyamwetu kupitakana Jehova, unene po apa atu ligwanekere nomaudigu. Pasihonena, ga ku rundira gumwe ndi? Ndi va ku tekura rumwe momudona ndi? Satana ana hara o pe Jehova usima ndi vanavazinyetu. Satana kuna hara o gazare asi kurugana yininke monkedi omu ono yi harere kupitakana omu va yi tjanga moBibeli, kuna kara nkedi zelike zokukohonona po maudigu.—Resa Muudisi 7:16, 20.

6. Yisinke ono lirongere ko kosihonena samunazinyetu gomukadi gomoHoranda?

⁶ Tu konakoneni sihonena samunazinyetu gomukadi gomoHoranda, ogu ga handukire apa ga mwene mapuko govakwawo. Age kwa tokwere mokudira kukara kumwe nawo. Age kwa tanta asi: “Ame ngani lizuvhu mukuma ntani ya digoperere nge kutjindja monkedi omu ngani tara vanavazinyetu owo. Yipo na tanterere mugara gwange tu dirukire kombungakriste zapeke.” Makura munazinyetu ogo gomukadi yipo ga tarerere elikwamo lyoJW Broadcasting^® lyokwedi kwaNsinano 2016. Melikwamo lyoBroadcasting kwa geve mo magano omu no  vhura kulididimikira mapuko govakweni. Munazinyetu ogo gomukadi kwa tanta asi: “Ame nayi dimbwilire asi na hepere kulinunupika nokurugana ko yuma komapuko ganyamwange, mevango tupu lyokudemenena komapuko govanavazinyetu. Elikwamo olyo kwa vaterange ni demenene kwaJehova nokoupangeli wendi.” Yisinke tuna kulirongera ko? Nsene ono kara noudigu, wa hepa kudemenena kwaJehova. Mupura a ku vatere yipo o tare vanavazinyetu ngwendi moomu Jehova ava tara. Guhyetu gemeguru Jehova kumona mapuko gawo, nye age kuvagusira po. Jehova ana hara nove o rugane yokulifana.—1 Joh. 4:20.

7. Yisinke ya horokerere hompa Usiya?

⁷ Elinenepeko kwa ninkisire hompa Usiya goVajuda a dire kutambura mapukururo govakwawo ntani a rugane yininke eyi va dilire kumupulisira. Usiya nga rugana yininke yoyiwa yoyinzi. Yikando yoyinzi, age nga fundu nkenye apa moyita nokutunga yitata ntani ga kere nonofarama dononzi. ‘Karunga kwa mu tungikire.’ (2 Hist. 26:3-7, 10) Bibeli kutanta asi: “Ano hompa Usiya apa ga ya kere munankondo, makura ta litumbu. Ano ayo tayi mu twaredesa kokugwa.” Jehova kwa geve mpangera asi vapristeli yiwo velike wokuvhura kuswakerera manganganga gedumba lyewa montembeli. Nye hompa Usiya kwa linenepekere nokuza a ka swakerere manganganga getutumikidiso montembeli. Ayo kapi ya hafesere Jehova, makura yipo ga mu zugumine uvera woyingondwe. Usiya kwa kere nouvera ou woyingondwe eparu lyendi nalinye.—2 Hist. 26:16-21.

8. Ngapi etjangwa lyomo-1 Vakolinte 4:6, 7 nali tu vatera tu nyokere po elinenepeko?

⁸ Elinenepeko kuvhura li tu ninkise nose tu ture nzo ngwendi Usiya ndi? Tu tareni sihonena samunazinyetu gomugara José. Age kwa kere munangesefa gomunene ntani mukuronambunga. Age nga gava yiuyungwa poyigongi ntani vatareli wonombunga ngava mupura ko magano. Age kwa tanta asi: “Nye ame kwa lihuguvarere tupu nyamwange, kapi na huguvarere mwaJehova. Ame kapi ngani purakene komarondoro gaJehova nomapukururo gendi morwa ame kwa gazarere asi na diva yoyinzi ndi na kura pampepo.” Ano konyima, José kwa tulire nzo zonene ntani nokumugusa mombunga. Nye ka va mu tengwidilire mombunga nomvhura dongandi dina kapita. Age ngesi kwa tanta asi: “Jehova ga ronga nge asi sininke somulyo po kapisi sokukara noyitumbukira, nye pokurugana eyi ana tu harere.”  Tu diworokeni asi nkenye udivi ndi yitumbukira eyi atu gwana mombungakriste kutunda kwaJehova. (Resa 1 Vakolinte 4:6, 7.) Jehova kapi ngatu ruganesa nsene tu linenepeka.

9. Yisinke ga rugene Satana naEva morwa kukara nelinenepeko?

⁹ Apa atu gazadara ko nkango edowo, eyi kutudiworokesa Satana Muzonaguli. Mokumona asi age kwa kere muengeli gumwe gwaJehova, Satana nampo ga kere noyitumbukira yoyinzi, nye kapi ya mu gwanenene po. Age kwa here vantu va mu karere ngwendi moomu ava karere Jehova. Satana ana hara tu rugane ngwendi eyi ga rugene. Yipo nye, age kuhetekera ko kutuninkisa tu lizuvhe asi kapi ya tu gwanena po eyi twa kara nayo. Sikando sokuhova ga yi rugene eyi kuna kara apa ga uyungisire Eva. Jehova kwa geve nondya dononzi kwaAdamu naEva yipo va lye, kugusa ko sitji simwe tupu. (Gen. 2:16) Nye Satana kwa pukisire Eva yipo a lye kositji esi va silikire. Eva kapi ya mu gwanenene po eyi ga kere nayo, age simpe kwa here yoyinzi. Twa yi diva asi kupi ya twaredesere oyo. Age kwa tulire nzo, ano konyima ga ya fire.—Gen. 3:6, 19.

10. Yisinke ya horokere apa hompa Ndafita ga kere nelinenepeko?

¹⁰ Jehova kwa pere Ndafita yininke yoyinzi kukwatera mo ungawo, uhompa ntani ga mu vaterere a funde moyita. Ndafita ga kere norupandu ntani gayi dimbwilire asi yininke eyi ga mu ruganena Jehova, “nokuvhura si kuyinongauka.” (Epis. 40:5) Nye Ndafita ga ya tamekere kulinenepeka, age kapi ya mu gwanenene po ntani kwa here yoyinzi. Nampili ngomu Ndafita ga kere novakadi wovanzi, age kwa tamekere kudovaukira mukadi govantu. Mukadi ogu ga dovaukilire kuna kara Bateseba, mukada Uliya goMuheti. Ndafita kwa honderere naBateseba, ano konyima ta kara nezimo. Eyi ga rugene Ndafita kwa kere epuko. Nye koyili hena yimwe eyi ga rugene kupitakana oyo. Age kwa tulire po mawapayiko va ka dipage Uliya. (2 Sam. 11:2-15) Yisinke ga gazarere Ndafita? Age ngoso kwa gazarere asi Jehova kapi na yi diva ndi? Nampili ngomu Ndafita ga karerere Jehova nomvhura dononzi, age ga ya tamekere kulinenepeka ano eyi ga rugene kwa mu reterere kukora kokunene. Nye konyima, Ndafita ga litezwilire kononzo dendi. Jehova kwa mu gusilire po nonzo dendi, ano eyi kwa mu hafesere.—2 Sam. 12:7-13.

11. Kuliza noVaefeso 5:3, 4, yisinke nayi tu vatera tu dire kudowokera yininke?

 ¹¹ Yisinke twa lirongere ko kosihonena saNdafita? Tuna lirongere ko asi ose kuvhura yi tu tompoke kunyokera po edowo lyokudowokera yininke nsene tu kara norupandu koyininke eyi ga tu pa Jehova. (Resa Vaefeso 5:3, 4.) Ngano yi tu gwanene po eyi twa kara nayo. Varongwa woBibeli wovape kuvakorangeda va gazadare ko sininke simwe sosiwa, esi nava vhura kupandwira Jehova. Nsene muntu ayi rugana oyo nkenye ezuva ure wosivike, eyi ngayi likida asi age kuna kanderere kwaJehova yininke ntambali yokulisiga-siga. (1 Tes. 5:18) Nove kurugana yokulifana ndi? Nsene o teda ko kwanayinye eyi ga ku ruganena Jehova, ngayi kuvatera o kare norupandu ano nsene o kara norupandu, ayo ngayi ku gwanena po eyi wa kara nayo. Nsene yi kugwanena po eyi wa kara nayo, ove kapi ngo dowokera hena yininke.

12. Yisinke ga rugene Judasa apa ga kere nedowo lyemona?

¹² Edowo kwa ninkisire Judasa a rugane yininke yoyidona nokuhorora Jesus. Nye pomuhowo, Judasa kwa kere muntu gomuwa. (Ruk. 6:13, 16) Jesus kwa horowere Judasa a kare mupositoli. Judasa kwa kere muntu ogu va huguvarere. Age kwa mu pere situmbukira sokutakamesa sikesa soyimaliwa. Jesus novapositoli vendi kwa ruganesere yimaliwa oyo mokuvavatera noyihepwa yawo mokuzuvhisa. Yimaliwa oyo, kwa fene ngwendi yigava eyi ava gava neina mokukwatesa ko sirugana souzuni mudima. Nye konyima zosiruwo, Judasa kwa tamekere kuvaka yimaliwa oyo nampili ngomu Jesus ngava rondora poyiruwo noyiruwo kuhamena edowo lyemona. (Mar. 7:22, 23; Ruk. 11:39; 12:15) Judasa kapi ga purakenene marondoro ogo.

13. Siruwo musinke Judasa gayi likidire nawa-nawa moyitarameho yovantu asi ga kere nedowo lyemona?

¹³ Judasa gayi likidire moyitarameho yovantu asi ga kere nedowo lyemona, komeho tupu Jesus va ka mudipage. Jesus novarongwa vendi kukwatera mo Mariya namumbyendi Malita kwa kere vagenda membo lyaSimoni goyingondwe. Apa va lire, makura Mariya ta gusa magadi gondiro nokugatjira komutwe gwaJesus. Apa Judasa novarongwa vakwawo va yi mwene, kwa va guvisire. Varongwa vamwe kwa gazarere asi ngano hansa magadi ogo va ga randese, yipo va ka ruganese yimaliwa oyo mokuzuvhisa. Nye Judasa kwa kere nomagano gapeke. Age kwa “kere muwidi” ntani kwa here kuvaka yimaliwa yomosikesa. Ano konyima, edowo lyokudowokera yimaliwa kwa ninkisire Judasa a horore Jesus.—Joh. 12:2-6; Mat. 26:6-16; Ruk. 22:3-6.

14. Ngapi omu valikwali vamwe va tulire pasirugana epukururo eli lya kara mwaRukasa 16:13?

¹⁴ Jesus kwa tanterere varongwa vendi nonkango edi asi: “Nokuvhura si kukerera Karunga nomamona.” (Resa Rukasa 16:13.) Nonkango edi usili. Tu tareni omu valikwali womoRomania va tulire pasirugana nonkango daJesus. Awo kwa va pere yirugana yoposiruwogona mosirongo simwe soungawo. Awo kwa tanta asi: “Pomuhowo ose kwa gazarere asi sirugana esi kwa kere etungiko lyokutunda kwaJehova morwa twa kere nomakongo kombanga aga twa hepere kufuta.” Nye nampili ngoso, pwa kere udigu. Ngano asi va tambwire sirugana oso, eyi ngano ya va ninkisire va dire kugwana siruwo sosinzi mokukarera Jehova. Konyima zapa va resere sirongwa “Maintain Loyalty With a Unified Heart” moRuhungu romo-15 Siwogedi 2008, awo kwa tulire po etokoro. Awo kwa tanta asi: “Ngano asi twa dirukilire kosirongo sapeke yipo tu ka gwane yimaliwa yoyinzi, ose ngano twa tulire elikwatakano  lyetu naJehova mevango lyauvali. Ose twa yi divire nawa-nawa asi elikwatakano lyetu naJehova ngali kara mosiponga.” Makura yipo va nyokere kutambura yirugana oyo. Yisinke ya horokere konyima zoyo? Mugara ga gwene yirugana mosirongo sawo, eyi ya va vaterere va sikise mo yihepwa yawo. Mukadi kwa tanta asi: “Jehova nga vatera vakareli vendi nkenye apa.” Valikwali owo vana hafa morwa awo kwa tulire Jehova a kare muhowo meparu lyawo, mevango lyokutura yimaliwa muhowo.

15. Morwasinke natu yi pulira asi kuvhura yi tu tompoke kunyokera po yiraha yaSatana?

¹⁵ Yisinke natu rugana nsene tu dimburura asi tuna kara nelinenepeko ndi edowo lyokudowokera yininke? Kuvhura tu ture po malitjindjo. Paurusa kwa tente asi ava va gwira “mosiraha” soMuzonaguli, kuvhura simpe va pweke mo. (2 Tim. 2:26) Eyi yiyo ya horokerere Ndafita. Age kwa purakenene komapukururo gaNatana nokulitezurura ntani ga tengwidilire po elikwatakano lyendi naJehova. Tu diworokeni asi Jehova ga kara nononkondo dononene kupitakana Satana. Yipo nye, nsene tu tambura evatero lyokutunda kwaJehova, ose ngatu nyokera po nkenye yiraha yaSatana.

16. Yisinke nayi tu vatera tu nyokere po yiraha yaSatana?

¹⁶ Yosili, ayo ya kara nomulyo tu dire kulinenepeka nokunyokera po kudowokera yininke. Ayo kuvhura kututompoka nevatero lyaJehova. Nye kapisi tu gazare asi ose kapi ngatu linenepeka ndi tu dowokere yininke. Nampili vakareli vaJehova womosiruwo sanare, nawo va tamekere kulinenepeka nokudowokera yininke. Yipo nye, kanderera kwaJehova a ku vatere o nyokere po yikara yoyidona. (Epis. 139:23, 24) Hetekera ko paapa wa hulira yipo o nyokere po elinenepeko nedowo lyokudowokera yininke!

17. Yisinke ngayi horokera ntaantani nkore zetu Satana?

¹⁷ Satana kwa kara ngwendi musani nomvhura dononzi. Ntaantani tupu ngava mu ture monomango ntani noku kamuzonagura po narunye. (Ehor. 20:1-3, 10) Ose kwa ku ndindira nononkondo ezuva olyo. Ano ngesi, tu likungeni koyiraha yaSatana. Rugana paapa wa hulira yipo o nyokere po elinenepeko nedowo lyokudowokera yininke. Tokora ‘kunyokera po Muzonaguli, makura age nga ku suwurukwa.’—Jak. 4:7.