1. Ino nciinshi nceenga twaambila ayi Satana ali anga ngu mupalu?

 MUPALU ncaasuni bunene nkucatisha na kucaya nyama. Alimwi kweelana a Baibo mboitondesha, inga wasebensesha toose tupusenepusene. (Jobo 18:8-10) Ino nshiinshi mupalu nsheenga wacita kwaamba ayi acatishe nyama? Alataanguna kwiilangilisha cakubikila maano kwaamba ayi ashibe nkoitooya, shintu nsheisuni alimwi akoose keelete nkweenga wasebensesha kwaamba ayi aicatishe. Satana alakwe ali anga ngu mupalu. Alatulangilisha cakubikila maano kwaamba ayi ashibe nkotuya alimwi ashintu nshetusuni. Lyalo alasala koose nkaabona ayi inga twacatwaamo cakuteengashila. Nacibi boobo, Baibo ilatulwiita ayi na twacatwa mukoose kakwe Satana inga twacikonsha kusupukaamo. Alimwi ilatwiisha ansheenga twaciita kwaamba ayi tuleye kucatwa mutoose utu.

2. Ino ntoose nshi tobilo Satana ntwasebensesha bunene?

² Toose tobilo Satana ntwasebensesha bunene nkulisumpula alunkumbwa. * Satana wasebensesha mibo iyi itabete kabotu kwamyaaka iinji. Ali anga ngu shikuteya tuyuni mbwaacita kwaamba ayi acatishe tuyuni. (Jele. 5:26) Nacibi boobo, tatweelete kucatwa mutoose twakwe Satana. Ino nceebonshi? Mukwiinga Yehova alatutondesha toose Satana ntwasebensesha kwaamba ayi acatishe bantu.​—2 Koli. 2:11.

3. Ino nceebonshi Yehova wakeelikaamo shakubonenaako shimwi mu Baibo?

³ Nshila yomwi Yehova mbwaatucenjesha pamakani akulisumpula alunkumbwa nkwiinda mukutwiisha shakacitikila basebenshi bakwe. Mushakubonenaako nsheshi twiiye tutoobona Satana mbwaakacatisha  mutoose basebenshi bakwe Yehova basebensa kwaciindi cilaamfu. Ano sa ici cilaamba ayi inga twaalilwa kuleya mubo wakulisumpula alunkumbwa? Sobwe napaceyi. Yehova wakeelikaamo shakubonenaako ishi mu Baibo kwaamba ayi shibe ‘shakutucenjesha.’ (1 Koli. 10:11) Yehova alicishi kwaamba ayi shakubonenaako ishi inga shatucafwa kushiba mbweenga twaleya na kusupuka mutoose twakwe Satana.

4. Ino nshiinshi sheenga shatucitikila na twaba amubo wakulisumpula?

⁴ Satana alisuni kwaamba ayi tube amubo wakulisumpula. Alicishi kwaamba ayi na twaba amubo uyu teshi tukabe acoolwe cakutambula buumi butamaani. (Tus. 16:18) Aboobo nceceeco mutumwi Paulo ncaakaambila ayi muntu “inga walisumpula akupekwa mulandu mbuli Satana.” (1 Timo. 3:6, 7) Uli woonse wandiswe ishi inga shamucitikila, inga caba ayi tuli bapya mucancine na abo basebensela Yehova kwamyaaka iinji.

5. Kweelana alilembo lya Shikushimikila 7:16, 20, ino nshiinshi sheenga shatondesha ayi muntu alalisumpula?

⁵ Bantu balisumpula mbantu balisuni. Satana aleelesha kutupa kwaamba ayi tunoyeeya bunene palindiswe sobeene kwiinda kuyeeya pali Yehova bunene bunene ndyetutokwiinda mumapensho. Kucakubonenaako, sa mwakabekeshekwaawo na kulyatililwaawo? Satana inga wasuna ayi munoopa Yehova mulandu na bamakwesu. Alimwi alisuni kwaamba ayi munooyeeya ayi nshila yomwibo mbweenga mwamanishilaamo mapensho, nkucita shintu kweelana ambuli mbomutoyeeya muciindi cakukonkela butanjilishi bwamu Maswi akwe Lesa.​—Amubelenge Shikushimikila 7:16, 20.

6. Ino nshiinshi nsheenga mweeya kushakacitikila nankashi waku Netherlands?

⁶ Amuyeeye shakacitika kuli nankashi waku Netherlands uyo wakakalashikwa ceebo ca shilubo shabamwi. Taakalinga kusuniiwo kunoocanika pomwi abaabo bakamukalasha. Wakaamba ayi: “Ndakalinyumfwa kuba neenka alimwi ndakaalilwa kubalekelela. Alimwi ndakalwiita beebangu ayi tulyeelete kulongela kulibungano limwi.” Lyalo wakeebela pulogilamu JW Bulodikasiti^® yamu March 2016 iyo yakalinga kwaamba nsheenga twaciita na bamwi batukalasha. Nankashi uyu wakatolelela akwaamba ayi: “Ndakalinga kweelete kuliceesha akuyeeya pashilubo shangu  muciindi cakubikila maano kushilubo sha bamakwesu abenankashi mulibungano. Pulogilamu iyi yakancafwa kubikila maano kuli Yehova alimwi akushiba kwaamba ayi ngoocite nkusu shakutulwiita shakucita.” Ino nshiinshi nsheenga mweeyawo? Na mwacana lipenshi, amutolelele kuyeeya pali Yehova. Amumuseenge kwaamba ayi amucaafwe kunoobona bamwi bweenka mbwababona. Mbuli Ishiwesu wakwiculu alashibona shilubo shabo; nacibi boobo, alabalekelela. Alisuni kwaamba ayi amwebo munoocita bweenka ubo.​—1 Joni 4:20.

7. Ino nshiinshi shakacitika ku Mwaami Usiya?

⁷ Ceebo cakulisumpula, Usiya Mwaami wabene Juda wakakaka kunyumfwila bamwi ndyebakamululika alimwi wakacita cintu cimwi ncatakalinga kweelete kucita. Usiya wakacita shintu shiinji shibotu. Wakaswitilila munkondo, muncito shakuyaka alimwi ashabulimi. “Lesa wancine wakamulengesha kuswitilila.” (2 Maka. 26:3-7, 10) Nacibi boobo, Baibo ilaamba ayi: “Mwaami Usiya ndyaakaba ankusu abulemu, wakatalika kulisumpula, ico cakalengesha bwaami bakwe kuboola panshi.” Yehova wakapa mulawo wakwaamba ayi bapailishi beenkabo mbobakalinga kweelete kutenta tununkila kabotu pa tempele. Nacibi boobo, Mwaami Usiya wakacita cintu ncatakalinga kweelete kucita kwiinda mukuya mukutenta tununkila kabotu mu tempele. Yehova taakwe kukondwa anshaakacita musankwa uyu ulisumpula, aboobo wakapa kwaamba ayi aciswe bulwashi bwa manata. Kuswawaawo Usiya wakaciswa manata kushikila bushiku ndyaakafwa.​—2 Maka. 26:16-21.

8. Ino kukonkela shaambwa palilembo lya 1 Bene Kolinto 4:6, 7, inga kwatucafwa buyani kuleya kulisumpula?

⁸ Sa aswebo inga twacatwa mukoose ka kulisumpula bweenka mbuli Usiya? Amuyeeye cakubonenaako ca mukwesu waliina lya José. Wakalinga muntu ucishi kabotu bisinesi alimwi munene ulemekwa mulibungano. Wakalinga kucite coolwe cakwaamba makani pakubungana kwalubasu alimwi akubungana kunene, alimwi bamatanjilili balubasu bakalinga kumwiipushako pamakani amwi. Nacibi boobo, wakaamba ayi: “Ndakalinga kushoma munkusu shangu alimwi alushibo ndondakalinga kucite. Nshindakalinga kucinkawo manungo muli Yehova. Ndakalinga kuyeeya ayi ndimuyumu lwakumushimu, aboobo nshikwe kunyumfwila kucenjesha alimwi akululika kwakwe Yehova.” Ba José bakacita cilubo cinene aboobo bakakushikwa mulibungano. Pesule lya myaaka iinji bakabooshekwa alimwi mulibungano. Aboobo bakaamba ayi: “Yehova wakanjiisha ayi cintu ciyandika abuumbi teshi kuba amukuli sombi nkucita nshaasuni.” Mutaluubi kwaamba  ayi Yehova ngootupa lushibo alimwi amikuli njeenga twapekwa mulibungano. (Amubelenge 1 Bene Kolinto 4:6, 7.) Aboobo na twalisumpula Yehova inga taatusebenseshiiwo.

9. Ino lunkumbwa lwakalengesha Satana a Efa kucita nshi?

⁹ Na twayeeya pamubo walunkumbwa mpashi tulebaluka nshaakacita Satana. Mbuli munjelo womwi pa banjelo bakwe Yehova, cilyeelete Satana wakalinga kucite mikuli iinji ibotu. Sombi wakalinga kusuni shiinji. Wakalinga kusuni ayi bantu banoopaila nguwe muciindi cakupaila Yehova. Satana alisuni ayi tube mbuli nguwe, aboobo aleelesha kutupa kulinyumfwa kutakwana ashintu nshetucite. Ciindi cakutaanguna ndyakeelesha kucita boobo nciindi ndyakaamba a Efa. Mulusuno, Yehova wakapa Efa alimwi a ibaye shakulya shiinji shibotu kuswa kushisepo sha “cisamu cili coonse mumuunda,” kukushakobo cisamu comwi. (Mata. 2:16) Nacibi boobo, Satana wakacenjeeka Efa akumupa kutalika kuyeeya ayi wakalinga kuyandika kulya cisepo ca kucisamu ncobakakashikwa. Efa taakwe kulumba pasheesho nshaakalinga kucite; wakalinga kusuni shiinji. Shakaswaamo nshakwaamba ayi Efa wakabisha alimwi mukuya kwaciindi wakafwa.​—Mata. 3:6, 19.

10. Ino nshiinshi shakacitika ku Mwaami Defedi ndyaakacatwa mukoose kalunkumbwa?

¹⁰ Lunkumbwa lwakapa Mwaami Defedi kulubaako shintu Yehova nshaakamupa mbuli buboni, kupuka alimwi akumucafwa kukoma balwani baanji. Defedi wakalumba alimwi wakaamba ayi shipo Lesa nshaakamupa “nshiinji abuumbi!” (Kulu. 40:5) Nacibi boobo, Defedi wakaba alunkumbwa akusuna kuba ashintu shiinji kwiinda pasheesho Yehova nshaakamupa. Nabi kwaamba ayi Defedi wakalinga kucite banakashi baanji, wakatalika kukumbwa muka mwiine. Mwanakashi uyo wakalinga Batisheba mukaakwe Uliya mwiine Iti. Ceebo cakulisuna, Defedi wakakumana a Batisheba aboobo Batisheba wakamita. Defedi nshaakacita shakalinga shibiibi abuumbi. Nacibi boobo, wakeelikawo acimwi cibiibi kwiindaawo. Wakabika bubaambo bwakwaamba ayi Uliya acaikwe! (2 Samwe. 11:2-15) Ano ino wakalinga kuyeeya nshi ndyaakacita sheeshi? Sa wakalinga kuyeeya ayi Yehova inga tabooni nshaacita? Nabi kwaamba ayi Defedi wakasebensela Yehova kwaciindi cilaamfu, wakaba alunkumbwa alimwi ici cakamunjisha mumapensho aanji. Nacibi boobo, mukuya kwaciindi Defedi wakasumina cilubo ncaakacita alimwi wakaana. Wakalumba abuumbi kwaamba ayi Yehova wakamulekelela!​—2 Samwe. 12:7-13.

11. Kweelana a Bene Efeso 5:3, 4, ino nciinshi ceenga catucafwa kuleya lunkumbwa?

 ¹¹ Ino nshiinshi nsheenga tweeya kuswa kucakubonenaako cakwe Defedi? Inga twaleya lunkumbwa na twatolelela kulumba pashintu Yehova nshaatupa. (Amubelenge Bene Efeso 5:3, 4.) Tulyeelete kukwana ashintu nshetucite. Na twatalika kwiisha muntu Baibo, inga twamuyuminisha kuyeeya akulumba Yehova pacintu comwi cibotu ncaamupa. Na kaacita boobo bushiku abushiku kwa nsondo, nkokwaamba ayi wapailila pashintu shili 7 shipusenepusene. (1 Tesa. 5:18) Sa amwebo mbomucita ubo? Na kamukutumana akuyeeya pashintu shoonse Yehova nshaamucitila, cilaakumucafwa kutondesha kulumba. Alimwi kucita boobo kulaakumucafwa kukwana ashintu nshemucite. Lyalo teshi mukacatwe mukoose kalunkumbwa.

12. Ino Judasi wakacita buyani ceebo calunkumbwa?

¹² Ceebo calunkumbwa, Judasi Isikalyoti wakacita cintu cibiibi abuumbi akwaaba Yesu. Nacibi boobo, ici tacaambi ayi Judasi wakalinga muntu mubiibi kuswabo kumatalikilo. (Luka 6:13, 16) Yesu wakamusala kuba mutumwi wakwe. Cilyeelete kwaamba ayi Judasi wakalinga muntu ushomeka mukwiinga ngwakapekwa mukuli wakulama maali, ayo Yesu a batumwi ngobakalinga kusebensesha kuula shiyandika ndyebatosebensa ncito yakushimikila. Munshila imwi inga twaamba ayi maali aya akalinga bweenka mbuli maali apekwa mukuliyandila munshiku shino akucafwilisha ncito icitwa nsengwe yoonse. Nabi kwaamba ayi Judasi wakanyumfwa Yesu ndyaakacenjesha bantu pamakani akutaba alunkumbwa, paciindi cimwi wakatalika kwiipa maali. (Maako 7:22, 23; Luka 11:39; 12:15) Judasi wakasuula kucenjesha uku.

13. Ino ndilili ndyecakabonekela patuba kwaamba ayi Judasi wakaba alunkumbwa?

¹³ Shakacitika ndyekwakacaala paniini kwaamba ayi Yesu acaikwe shakatondesha patuba kwaamba ayi Judasi wakaba alunkumbwa. Yesu alimwi abashikwiiya bakwe, kwiilikaawo a Maliya a nankashi yakwe Malita bakafwakashila Simoni shimanata. Ndyebakalinga kulya, Maliya wakanyamuka akupuumwita mafuta anunkila kabotu pamutwi wakwe Yesu ayo akalinga kudulite abuumbi. Judasi abashikwiiya bamwi bakakalala abuumbi. Bashikwiiya bamwi mpashi bakayeeya ayi maali ayo naakwiinga akasebenseshekwa muncito yakushimikila. Nacibi boobo, mukwiinga Judasi wakalinga mwiipi ishi teshi nshaakalinga kuyeeya. Wakalinga kusuni kwiipa maali. Alimwi mukwiinga Judasi wakaba alunkumbwa wakaaba Yesu ceebo cakusuna maali.​—Joni 12:2-6; Mate. 26:6-16; Luka 22:3-6.

14. Ino nshiinshi beebene bamwi nshebakacita ceebo cakukonkela kululika nkotucana palilembo lya Luka 16:13?

¹⁴ Yesu wakebalusha bashikwiiya bakwe cancine cakwaamba ayi: “Tamukoonshi kusebensela Lesa abuboni.” (Amubelenge Luka 16:13.) Alimwi cancine ici mbocibete amunshiku shino. Kucakubonenaako, amubone beebene bamwi baku Romania mbobakakonkela shakaamba Yesu. Bakacana ncito yapakaciindi kucishi kuli maali abuumbi. Bakaamba ayi: “Twakalinga kucite nkongole inene abuumbi ku banki, aboobo pakutaanguna twakayeeya ayi incito iyi ncoolwe cinene abuumbi kuswa kuli Yehova.” Nacibi boobo, pakalinga lipenshi. Incito iyi naakwiinga yakabapa kutaba aciindi cikwene kabotu cakusebensela Yehova. Pesule lyakubelenga mutwi wakalinga kwaamba ayi “Amutolelele Kushomeka Camoyo Woonse” mu Njashi Yamulindilishi ya August 15, 2008, bakasalawo shakucita. Bakaamba ayi: “Naakwiinga twakasalawo kulongela kucishi cimwi kwaamba ayi tucane maali aanji sombi katwaalilwa kusebensela Yehova, nkokwaamba ayi bushicibusa bwesu anguwe teshi ncocakalinga cintu ciyandika abuumbi mubuumi bwesu. Twakalinga kushomete cakutatoonsha kwaamba ayi kucita boobo inga kwatupilinganya lwakumushimu.” Aboobo bakaikaka incito iyi. Ino nciinshi cakacitika? Basankwa bakacana ncito mucishi cinemishaabo yakabacafwa kucana maali akuula shiyandika. Banakashi bakaamba ayi: “Yehova  ulacafwa basebenshi bakwe lyoonse.” Mukwiinga bakasalawo kusebensela Yehova muciindi ca buboni, beebene aba balisangalete.

15. Ino nceebonshi nceenga twashomena cakutatoonsha ayi inga twacikonsha kusupuka mutoose twakwe Satana?

¹⁵ Ino nshiinshi nshotweelete kucita na twaboona kwaamba ayi twacatwa mukoose kakulisumpula na lunkumbwa? Inga twasupukaamo! Paulo wakaamba ayi abo bakacatwa ‘kabali boomi’ mukoose kakwe Satana inga bacikonsha kusupukaamo. (2 Timo. 2:26) Ishi nsheshakacitika kuli Defedi. Natani ndyaakamululika wakanyumfwila akucileka kuba alunkumbwa alimwi wakaboosha bushicibusa bwakwe a Yehova. Mutaluubi kwaamba ayi Yehova alicite nkusu kwiinda Satana. Aboobo na twasumina lucafwo lwakwe inga twacikonsha kusupuka mutoose Satana tweenga wateya.

16. Ino nshiinshi sheenga shatucafwa kuleya toose twakwe Satana?

¹⁶ Ncakwiila kwaamba ayi cintu cibotu nceenga twaciita, nkuleya kulisumpula na lunkumbwa. Inga twacikonsha kucita boobo kwiinda mulucafwo lwakwe Lesa. Nacibi boobo, tatweelete kuyeeya ayi tuli bayumu lwakumushimu aboobo inga tatucatwiiwo mukoose kakulisumpula na lunkumbwa. Mukwiinga nabibo baabo basebensela Yehova kwamyaaka iinji bakacatwaawo mukoose kakulisumpula na lunkumbwa. Aboobo amupaile kuli Yehova bushiku abushiku kwaamba ayi amucaafwe kubona na mibo ibiibi iyi yatalika kwaalula miyeeyo alimwi ambomucita shintu. (Kulu. 139:23, 24) Amucite shoonse nsheenga mwacikonsha kwaamba ayi mutabi amubo wakulisumpula na lunkumbwa!

17. Ino nshiinshi sheshi shikacitike coonono kumulwani wesu Satana?

¹⁷ Satana waba mupalu kwamyaaka iinji. Sombi conoonobo ulaakwaangwa, lyalo mukuya kwaciindi ulaakunyonyoolwa. (Ciyu. 20:1-3, 10) Tutolangila ciindi ico ndyeshi cikashiike. Kushikila ciindi ico cikashiike amutolelele kucenjela atoose twakwe Satana. Amusebense cankusu kwaamba ayi mutabi amubo wakulisumpula na lunkumbwa. Amube bashinishite kupikisha “Mubiibi lyalo ulaakumutalamuka.”​—Jemu. 4:7.