1. Saˍtanˍ va htaw paˍ htaꞈ hkʼaˬ hkʼe te shuˍ ve le?

 Va htaw paˍ lehˬ dawˇ law kuiˬ cawˬ ve yoˬ. Shaˍ teꞈ˗a ve maˇ heˆ leh suh˗a ve kaꞈ gʼa tuˬ ve htaꞈ tiˉ yawˇ dawˇ law ve yoˬ. Liꞈ hpu hkʼaw kʼoˆ jaw ve hkʼe yawˇ va laiˉ ceuˬ htaꞈ yehˇ ve yoˬ. (Yawˇbaˆ 18:8-10) Yaꞈ hkʼaˇ, shaˍ yawˇ ve va htaꞈ yaw tuˬ hkʼaˬ hkʼe te ve le? Yawˇ hkʼaˬ kaˬ lo kʼai ve, aˬ htoꞈ ma htaꞈ dawˇ cawˇ ve, leh yawˇ maˇ shiˍ ve hkʼaw va hkʼaˬ ve teˇ maˬ htaw gʼa tuˬ chaˬ nyi ve yoˬ. Saˍtanˍ kaꞈ va htaw paˍ htaꞈ shuˍ ve yoˬ. Ngaˬ hui hkʼaˬ kaˬ lo kʼai ve leh aˬ htoꞈ ma htaꞈ dawˇ cawˇ ve yawˇ chaˬ nyi taˍ ve yoˬ. Ngaˬ hui maˇ shiˍ ve hkʼaw beˬ gʼa tuˬ ve awˬ hkʼaˇ htaꞈ yawˇ yehˇ ve yoˬ. Yaꞈ hkʼaˇ, Liꞈ hpu hkʼaw ngaˬ hui htaꞈ kʼoˆ laˇ ve, ngaˬ hui va htaꞈ yaw ve htawˇ jaw hpaw˗e gʼa leh yawˇ ve va htaꞈ maˇ gʼa yaw tuˬ, ngaˬ hui hkʼaˬ hkʼe gʼa te cawˇ ve kaꞈ maˍ laˇ ve yoˬ.

2. Saˍtanˍ yehˇ leh awˬ bon gʼa jaˇ ve va 2 ceuˬ aˬ htoꞈ ma le?

² Saˍtanˍ yehˇ ve awˬ bon gʼa jaˇ ve va 2 ceuˬ lehˬ uiˍ muiˬ caˆ muiˬ ve leh lawˇ hpaꞈ uiˍ ve yoˬ. * Va chi 2 ceuˬ yawˇ yehˇ ve laiˉ hinˉ hkʼawꞈ gaˬ˗oˬ. Ngaˆ htaw paˍ lehˬ pehˍ htaꞈ ngaˆ yaw tuˬ awˬ hkʼaˇ yehˇ ve hkʼe, Saˍtanˍ kaꞈ chi ve htaꞈ shuˍ ve yoˬ. (Chiˇ mvuh ve 91:3) Yawˇ cheuˬ jaˇ ve htawˇ, ngaˬ hui yawˇ ve va htaꞈ jaw hpaw˗e gʼa ve yoˬ. Aˬ htoꞈ ma pa taw le? Yaˬhoˉvaˬ lehˬ ngaˬ hui Saˍtanˍ ve awˬ hkʼaˇ htaꞈ shiˍ tuˬ ga laˇ ve pa taw yoˬ.—2 Kawˇrenˍhtuˆ 2:11.

3. Uiˍ muiˬ caˆ muiˬ ve leh lawˇ hpaꞈ uiˍ ve chaw ve awˬ lawn aˬ htoꞈ ma te Yaˬhoˉvaˬ Liꞈ hpu hkʼaw cawˬ tcuh ve le?

³ Uiˍ muiˬ caˆ muiˬ leh lawˇ hpaꞈ uiˍ ve htaꞈ ngaˬ hui shaˍ tiꞈ te tuˬ chaw teˇ hpaˍ ve awˬ lawn Yaˬhoˉvaˬ Liꞈ hpu hkʼaw cawˬ tcuh ve yoˬ. Laiˉ gʼaˇ Gʼuiˬ sha ve kanˉ te maw jaˇ˗oˬ ve htawˇ, Saˍtanˍ ve va htaꞈ yaw tuˬ yawˇ te piˇ gʼa ve tehꞈ awˬ lawn chi ve hkʼaw ngaˬ hui mawˬ tuˬ yoˬ. Yaꞈ hkʼaˇ, chi ve lehˬ ngaˬ hui yawˇ ve va htaꞈ jaw hpaw˗e maˇ gʼa˗oˬ ve tehꞈ kʼoˆ gaˇ ve laˇ? Maˇ heˆ. Awˬ tehˬ kʼo, awˬ lawn chi ve teˇ hpaˍ lehˬ  Yaˬhoˉvaˬ ngaˬ hui htaꞈ shaˍ tiꞈ peꞈ laˇ tuˬ awˬ pon yoˬ. (1 Kawˇrenˍhtuˆ 10:11) Ngaˬ hui awˬ lawn chi ve teˇ hpaˍ htaꞈ henˇ ve kʼo, Saˍtanˍ ve va htaꞈ maˇ gʼa yaw tuˬ Yaˬhoˉvaˬ shiˍ ve yoˬ. Ngaˬ hui Saˍtanˍ ve va htaꞈ yaw˗oˬ ve kʼo, ngaˬ hui tawˆ˗e gʼa tuˬ yoˬ.

4. Ngaˬ hui uiˍ muiˬ caˆ muiˬ ve chaw hpehꞈ ve kʼo, aˬ htoꞈ ma hpehꞈ la tuˬ le?

⁴ Saˍtanˍ lehˬ ngaˬ hui uiˍ muiˬ caˆ muiˬ ve chaw hpehꞈ tcuh gaˇ ve yoˬ. Ngaˬ hui uiˍ muiˬ caˆ muiˬ ve chaw hpehꞈ ve kʼo, yawˇ hkʼa shuˍ hpehꞈ leh co co taiˍ taiˍ a shaꞈ maˇ gʼa tuˬ yoˬ tehꞈ yawˇ shiˍ ve yoˬ. (Tawˇ naˉ ve 16:18) Uiˍ muiˬ caˆ muiˬ ve chaw maˇ gʼa hpehꞈ leh, “nyi ma uiˍ la mvuh la leh neˇ haiˬ ve ciˍ yanˍ kuiˬ lo” maˇ gʼa ce loꞈ˗e tuˬ, tcuh yaˇ Pawˇluꞈ shaˍ tiꞈ peꞈ laˇ ve yoˬ. (1 Tiˆmoˉseˍ 3:6, 7) Ngaˬ hui awˬ tehˬ ve hkʼaw chehˇ la gehˇ sheˍ ve maˇ heˆ leh awˬ tehˬ ve hkʼaw chehˇ maw jaˇ˗oˬ ve htawˇ, awˬ lawn chi teˇ gʼaˇ le le htaꞈ hpehꞈ la gʼa ve yoˬ.

5. Cuˇ yiˍ piˇ ve liꞈ 7:16, 20 hkʼaw uiˍ muiˬ caˆ muiˬ ve chaw hkʼaˬ hkʼe hpehꞈ ve le?

⁵ Uiˍ muiˬ caˆ muiˬ ve chaw lehˬ a shu yawˇ awˬ pon tiˉ dawˇ nyi ve yoˬ. Ngaˬ hui shoꞈ shaꞈ ve awˬ lawn gʼa hpuˇ htaˇ, Yaˬhoˉvaˬ htaꞈ dawˇ nyi ve aꞈ kehˉ ngaˬ hui a shu yawˇ awˬ pon dawˇ nyi tuˬ Saˍtanˍ te laˇ ve yoˬ. Tawˇ pa haˉ te kʼo, she pfuhˍ laˇ ve maˇ heˆ leh maˇ hteˇ maˇ cawˇ ve nawˬ gʼa hpuˇ jaw˗aw laˇ? Oˇ ve teˇ yanˇ lehˬ, nawˬ Yaˬhoˉvaˬ maˇ heˆ leh awˬ viˉ awˬ nyi htaꞈ venˇ baˆ ca tuˬ, Saˍtanˍ te tcuh gaˇ ve yoˬ. Liꞈ hpu hkʼaw Gʼuiˬ sha beˆ maˍ laˇ taˍ ve htaꞈ maˇ cuˇ leh shoꞈ shaꞈ ve htaꞈ nawˬ hkʼaˇ nawˬ gu gʼa ve tehꞈ Saˍtanˍ nawˬ htaꞈ dawˇ tcuh gaˇ ve yoˬ.—Cuˇ yiˍ piˇ ve 7:16, 20 gʼaw sheˍ.

6. Nehˬtaˬlehˬ mvuhˇ miˬ lo chehˇ ve awˬ viˉ awˬ nyi yaˇ miˇ ve awˬ lawn htaꞈ nawˬ aˬ htoꞈ ma henˇ yuˬ gʼa ve le?

⁶ Nehˬtaˬlehˬ mvuhˇ miˬ lo chehˇ ve awˬ viˉ awˬ nyi yaˇ miˇ ve awˬ lawn htaꞈ teˇ geh nyi sheˍ. Yawˇ awˬ nu ve awˬ viˉ awˬ nyi ve te hkʼaˇ dawˇ hkʼaˇ htaꞈ maˇ dawˇ cawˇ ve yoˬ. Yawˇ teˇ gʼaˇ geh kaꞈ tawˇ maˇ yaw gaˇ leh yeunˇ hkanˍ maˇ gaˇ˗oˬ tehꞈ dawˇ ve yoˬ. “Oˇ ve teˇ yanˇ ngaˬ teˇ gʼaˇ tiˉ chehˇ ve tehꞈ dawˇ leh yawˇ hui ve te hkʼaˇ dawˇ hkʼaˇ htaꞈ ngaˬ venˇ baˆ hpehˇ piˇ maˇ gʼa taˬ tehꞈ dawˇ ve yoˬ. Hkʼe te leh, Hkriꞈ yaˇ awˬ moˍ teˇ kaˬ lo ca chehˇ˗e cawˇ ve tehꞈ ngaˬ ve awˬ hpawˇ htaꞈ kʼoˆ piˇ ve yoˬ.” JW awˬ han tawˆ kuiˬ Ha pa 3 maˬ 2016 hkʼawꞈ hkʼaw ve awˬ han nyi ve yoˬ. Choˬ kaˬ lo kʼoˆ ve, awˬ nu ve chaw maˇ biˇ ve htaꞈ hkʼaˬ hkʼe te haꞈ yuˬ gʼa tuˬ le beˆ maˍ laˇ taˍ ve  yoˬ. Yawˇ kʼawꞈ kʼoˆ sheˍ ve, “awˬ nu ve awˬ viˉ awˬ nyi htaꞈ pa tcuh ve aꞈ kehˉ ngaˬ nyi ma nuˇ nehˬ leh ka tiꞈ gʼa yeˬ ve tehꞈ shiˍ ve yoˬ. Ngaˬ aˬ htoꞈ ma te yaꞈ ve leh ngaˬ awˬ to ngaˬ gʼa pa cawˇ ve tehꞈ gʼa dawˇ nyi ve yoˬ. Oˇ ve teˇ ha pa hkʼaw ve awˬ han Yaˬhoˉvaˬ leh yawˇ uˉ peunˍ ve htaꞈ ngaˬ dawˇ nyi tuˬ ga laˇ ve yoˬ.” Awˬ lawn chi a yeˇ uiˍ ve htaꞈ nawˬ mawˬ˗aw laˇ? Nawˬ shoꞈ shaꞈ ve gʼa hpuˇ htaˇ, Yaˬhoˉvaˬ htaꞈ dawˇ nyi leh yawˇ shu htaꞈ nyi ve hkʼe, nawˬ kaꞈ nyi gʼa tuˬ ga laˇ tuˬ lawˬ sheˍ. Awˬ viˉ awˬ nyi te yaꞈ ve htaꞈ Yaˬhoˉvaˬ mawˬ leh yawˇ yawˇ hui htaꞈ venˇ baˆ hpehˇ piˇ ve yoˬ. Gʼuiˬ sha nawˬ htaꞈ kaꞈ chi hkʼe te tcuh gaˇ ve yoˬ.—1 Yoˇhanˬ 4:20.

7. Jawˇmawˇ Awˇziˆ htaꞈ aˬ htoꞈ ma hpehꞈ la ve le?

⁷ Yuˇdaꞈ chaw ve jawˇ mawˇ Awˇziˆ uiˍ muiˬ caˆ muiˬ ve pa taw, beˆ maˍ piˇ ve htaꞈ maˇ na leh yawˇ te tuˬ a hkaw˗anˬ maˇ cawˬ ve htaꞈ te ve yoˬ. Awˬ tehˬ kʼo, Awˇziˆ lehˬ cheuˬ jaˇ ve chaw hpehꞈ ve yoˬ. Yawˇ maꞈ bawˆ ve laiˉ pawˆ gʼaˇ ve, venˇ laiˉ venˇ htaꞈ te ve, leh muiˬ caˇ ve hpawˇ kaꞈ cheuˬ jaˇ ve yoˬ. Liꞈ hpu hkʼaw kʼoˆ ve, “Gʼuiˬ sha yawˇ htaꞈ awˬ bon naꞈ piˇ ve yoˬ.” (2 Raˍsaˍvanˍ 26:3-7, 10) “Jawˇmawˇ Awˇziˆ lehˬ, awˬ gʼaˇ uiˍ la ve pa taw, nyi ma htawˇ uiˍ la ve yoˬ. Yawˇ chi hkʼe hpehꞈ la ve pa taw, gʼa luˬ gʼa sheˆ ve yoˬ.” Sha hawnˉ tuˉ tanˇ gʼa ve chaw lehˬ, paw hkuˇ ceh tiˉ hpehꞈ ve tehꞈ Yaˬhoˉvaˬ kʼoˆ piˇ˗oˬ ve yoˬ. Awˇziˆ chi hkʼe shiˍ ve htawˇ, yawˇ hawnˉ yehˬ hkʼaw loꞈ˗e leh sha hawnˉ tuˉ tanˇ ve yoˬ. Yaˬhoˉvaˬ nyi hkʼaˇ maˇ suh leh yawˇ suh htaˇ hkʼa gaˬ hkiˬ tuꞈ a naˍ keuˆ ve yoˬ.—2 Raˍsaˍvanˍ 26:16-21.

8. 1 Kawˇrenˍhtuˆ liꞈ 4:6, 7 hkʼaw ngaˬ hui uiˍ muiˬ caˆ muiˬ ve chaw maˇ hpehꞈ tuˬ hkʼaˬ hkʼe gʼa te cawˇ ve le?

⁸ Uiˍ muiˬ caˆ muiˬ ve chi ngaˬ hui Awˇziˆ hkʼe hpehꞈ tuˬ te laˇ gʼa˗aw laˇ? Ho˗sheˍ ve awˬ lawn htaꞈ teˇ geh nyi sheˍ. Yawˇ tanˇ kaˬ te ve hpawˇ cheuˬ jaˇ leh, yawˇ nyi haꞈ shaˉ paˍ hpehꞈ leh, a shu teˇ gʼaˇ kaꞈ yawˇ htaꞈ yawˆ yan ve yoˬ. Yawˇ hpawnˬ daꞈ lonˉ hkʼaw bon laiˉ pawˆ gʼa maˍ leh, toˇ nyi shehˍ hpaˇ laiˉ gʼaˇ kaꞈ yawˇ htaꞈ nyi ma cawˇ leh, beˆ maˍ laˇ tuˬ lawˬ ve yoˬ. Yawˇ kʼoˆ ve, “ngaˬ ngaˬ awˬ to htaꞈ gʼaˇ va ve yoˬ. Ngaˬ cheuˬ leh hpehꞈ laˬ jaw ve awˬ lawn cawˬ maˇ ve tehꞈ dawˇ ve yoˬ. Hkʼe te leh, ngaˬ Yaˬhoˉvaˬ htaꞈ gʼaˇ maˇ va. Ngaˬ awˬ to yonˍ yeˬ leh Gʼuiˬ sha shaˍ tiꞈ peꞈ laˇ leh beˆ maˍ laˇ ve htaꞈ maˇ na ve tehꞈ ngaˬ dawˇ ve yoˬ.” Ho˗sheˍ venˇ baˆ uiˍ jaˇ ve htaꞈ te yaꞈ leh, Hkriꞈ yaˇ awˬ moˍ hkʼaw tawˆ cheˆ piˇ ve yoˬ. Ponˬ laˬ ve hkʼaˬ nyiˇ hkʼawꞈ maˇ gaˬ sheˍ yawˇ Hkriꞈ yaˇ awˬ moˍ hkʼaw kʼawꞈ kʼawꞈ la ve yoˬ. Oˇ ve teˇ yanˇ yawˇ kʼoˆ ve, “a yeˇ uiˍ jaˇ ve lehˬ aˉ yaˇ cawˬ ve htaꞈ maˇ heˆ tehꞈ Yaˬhoˉvaˬ ngaˬ htaꞈ maˍ laˇ ve yoˬ. Yaꞈ hkʼaˇ, Gʼuiˬ sha kʼoˆ laˇ ve gʼaꞈ te ve htaꞈ cawˬ ve yoˬ.” Ngaˬ hui puiˉ ve hpehꞈ ve leh, Yaˬhoˉvaˬ geh gʼa ve daꞈ jaˇ ve awˬ ceuˬ teˇ ceuˬ le le htaꞈ cawˬ ve tehꞈ tawnˇ taˍ sheˍ. (1 Kawˇrenˍhtuˆ  4:6, 7 gʼaw sheˍ.) Ngaˬ hui uiˍ muiˬ caˆ muiˬ ve kʼo, Yaˬhoˉvaˬ maˇ yehˇ taˬ.

9. Lawˇ hpaꞈ uiˍ ve lehˬ Saˍtanˍ leh Eˇvaꞈ aˬ htoꞈ ma te tuˬ te piˇ ve le?

⁹ Ngaˬ hui lawˇ hpaꞈ uiˍ ve htaꞈ dawˇ nyi htaˇ, Saˍtanˍ htaꞈ laꞈ haˉ dawˇ mawˬ ve yoˬ. Saˍtanˍ lehˬ Yaˬhoˉvaˬ ve mvuhˇ naw ma tcuh yaˇ hpehꞈ leh yawˇ daꞈ ve awˬ vuiˬ laiˉ ceuˬ cawˬ ve yoˬ hehˉ. Yaꞈ hkʼaˇ, yawˇ cawˬ taˍ ve htaꞈ nyi hkʼaˇ maˇ suh sheˍ. Oˉ kʼoˍ pui ve Yaˬhoˉvaˬ teˇ gʼaˇ ceh tiˉ gʼa keunˍ ve htaꞈ, yawˇ heuˆ gaˇ ve yoˬ. Saˍtanˍ ngaˬ hui htaꞈ yawˇ hkʼe hpehꞈ tcuh gaˇ ve yoˬ. Hkʼe te leh, ngaˬ hui cawˬ taˍ ve awˬ ceuˬ htaꞈ nyi hkʼaˇ maˇ suh tuˬ, yawˇ coˇ caˇ leh te laˇ ve yoˬ. Yawˇ chi hkʼe te ve awˉ lawˉ teˇ pawˆ lehˬ, Eˇvaꞈ htaꞈ tawˇ yaw piˇ htaˇ yoˬ. Awˬ tehˬ kʼo, Yaˬhoˉvaˬ Eˇvaꞈ leh Aˍdanˍ htaꞈ haꞈ jaˇ. Gʼuiˬ sha lehˬ yawˇ huiˉ maˬ htaꞈ mehˬ jaˇ ve caˇ tuˬ laiˉ ceuˬ piˇ leh ‘hko chi hkʼaw cawˬ ve iˉ shiˍ hkʼa peu˗eˬ’ htaꞈ nawˬ hui caˇ hpehꞈ ve yoˬ. Yaꞈ hkʼaˇ, daꞈ ve leh maˇ daꞈ ve htaꞈ shiˍ puiˉ ve suhˆ cehˬ oˇ ve teˇ cehˬ ve awˬ shiˍ htaꞈ nawˬ hui taˇ caˇ. (Awˬ hkuiˉ puiˍ 2:16) Maˇ caˇ tcuh laˇ taˍ ve suhˆ cehˬ oˇ ve teˇ cehˬ ve awˬ shiˍ htaꞈ Eˇvaꞈ gʼa caˇ cawˇ ve tehꞈ dawˇ tuˬ Saˍtanˍ te piˇ ve yoˬ. Eˇvaꞈ yawˇ cawˬ taˍ ve htaꞈ nyi hkʼaˇ maˇ suh ve yoˬ. Yawˇ chi aꞈ kehˉ kʼawꞈ heuˆ gaˇ ve yoˬ. Peuˬ hkʼawꞈ nawˉ, hkʼaˬ hkʼe kʼawꞈ hpehꞈ la ve ngaˬ hui shiˍ ve yoˬ. Eˇvaꞈ venˇ baˆ te yaꞈ leh gʼa suh˗e ve yoˬ.—Awˬ hkuiˉ puiˍ 3:6, 19.

10. Daˍviˆ lawˇ hpaꞈ uiˍ ve chaw hkʼaˬ hkʼe te hpehꞈ la gʼa ve le?

¹⁰ Lawˇ hpaꞈ uiˍ ve lehˬ Daˍviˆ Yaˬhoˉvaˬ yawˇ htaꞈ aˬ htoꞈ ma peꞈ laˇ ve leunˇ tuˬ te piˇ ve yoˬ. Yaˬhoˉvaˬ Daˍviˆ htaꞈ paw sha ve, awˬ meh bvuhˬ ve, leh canˇ paˍ htaꞈ laiˉ pawˆ gʼaˇ tuˬ ga piˇ ve yoˬ. Daˍviˆ Yaˬhoˉvaˬ piˇ ve awˬ ceuˬ teˇ hpaˍ htaꞈ awˬ hpfuhˇ shiˍ leh kʼoˆ ve, “oˇ ve hkʼa peu˗eˬ htaꞈ ngaˬ ca kʼoˆ ve hkʼe kʼo, ca kʼoˆ maˇ peuˬ.” (Chiˇ mvuh ve 40:5) Awˬ yanˇ ponˬ kʼai htaˇ Daˍviˆ Yaˬhoˉvaˬ yawˇ htaꞈ aˬ htoꞈ ma peꞈ laˇ ve leunˇ kʼai ve yoˬ. Yawˇ cawˬ taˍ ve htaꞈ nyi hkʼaˇ maˇ suh leh awˬ leuˉ kʼawꞈ heuˆ gaˇ ve yoˬ. Daˍviˆ awˬ miˇ ma laiˉ gʼaˇ cawˬ˗oˬ ve kaꞈ, yaꞈ ve tehꞈ shiˍ ve htawˇ, shu ve awˬ miˇ ma htaꞈ heuˆ sheˍ ve yoˬ. Yaˇ miˇ oˇ ve lehˬ Baˍtaˍsheˍbaˆ meh leh yawˇ ve awˬ hpawˇ lehˬ Hiˇtiˆ chaw Uˇriˇyaꞈ meh ve yoˬ. Daˍviˆ yawˇ awˬ pon tiˉ dawˇ nyi ve yoˬ. Yawˇ Baˍtaˍsheˍbaˆ geh zuhꞈ leh Baˍtaˍsheˍbaˆ yaˇ hu ve yoˬ. Yaꞈ hkʼaˇ, chi hkʼe ceh maˇ heˆ. Yawˇ Uˇriˇyaꞈ htaꞈ kaꞈ tiˇ pehˍ tuˬ awˬ hkʼaˇ ca ve yoˬ. (2 Saˍmo˗eˍlaˆ 11:2-15) Daˍviˆ chi ve hkʼaˬ hkʼe te te haˆ ve le? Daˍviˆ aˬ htoꞈ ma dawˇ chehˇ ve le? Yawˇ te ve awˬ ceuˬ Yaˬhoˉvaˬ maˇ mawˬ tehꞈ yawˇ dawˇ˗aw laˇ? Daˍviˆ Yaˬhoˉvaˬ htaꞈ ka tiꞈ yeˬ ve laiˉ hkʼawꞈ gaˬ˗oˬ ve htawˇ, yawˇ lawˇ hpaꞈ uiˍ ve chaw hpehꞈ leh yawˇ te taˍ ve awˬ vuiˬ htaꞈ gʼa hkanˍ ve yoˬ. Daˍviˆ yawˇ te yaꞈ ve awˬ ceuˬ htaꞈ haꞈ yuˬ leh venˇ baˆ  dawˇ hpfuhˆ ve ha lehˬ jaˇ. Yaˬhoˉvaˬ haꞈ ve chaw teˇ pawˆ gʼa kʼawꞈ hpehꞈ ve yawˇ ha lehˬ jaˇ ve yoˬ hehˉ.—2 Saˍmo˗eˍlaˆ 12:7-13.

11. Eˇfeˇsuꞈ liꞈ 5:3, 4 hkʼaw ngaˬ hui lawˇ hpaꞈ uiˍ ve htaꞈ tawˍ daꞈ gʼaˇ tuˬ aˬ htoꞈ ma ga laˇ ve le?

¹¹ Daˍviˆ ve awˬ lawn htaꞈ ngaˬ hui hkʼaˬ hkʼe henˇ yuˬ gʼa ve le? Yaˬhoˉvaˬ ngaˬ hui awˬ pon te laˇ ve awˬ ceuˬ htaꞈ awˬ hpfuhˇ shiˍ leh awˬ bon uiˍ hkawˇ shiˍ ve kʼo, ngaˬ hui lawˇ hpaꞈ uiˍ ve htaꞈ tawˍ daꞈ gʼaˇ tuˬ yoˬ tehꞈ gʼa shiˍ ve yoˬ. (Eˇfeˇsuꞈ 5:3, 4 gʼaw sheˍ.) Ngaˬ hui cawˬ taˍ ve awˬ ceuˬ htaꞈ nyi hkʼaˇ suh ve yoˬ. Liꞈ hpu henˇ ve chaw htaꞈ ngaˬ hui maˍ piˇ htaˇ, Yaˬhoˉvaˬ geh yawˇ gʼa ve daꞈ ve teˇ ceuˬ ceuˬ htaꞈ dawˇ nyi tuˬ kʼoˆ piˇ leh, awˬ ceuˬ oˇ ve Yaˬhoˉvaˬ yawˇ htaꞈ peꞈ laˇ ve bon lawˬ htaˇ, awˬ bon uiˍ jaˇ kʼoˆ piˇ sheˍ. Yawˇ teˇ nyi le le chi hkʼe te ve kʼo, teˇ shinˉ ve hkʼaw bon lawˬ htaˇ 7 lawn lawˬ ve htawˇ maˇ shuˍ daꞈ tuˬ yoˬ. (1 Hteˇsaˍlawˇniˆ 5:18) Nawˬ chi hkʼe ve te gʼa˗aw laˇ? Yaˬhoˉvaˬ nawˬ awˬ pon te laˇ ve teˇ ceuˬ le le htaꞈ hkʼa dehꞈ dawˇ nyi htaˇ, nawˬ yawˇ htaꞈ awˬ bon uiˍ jaˇ tuˬ yoˬ. Nawˬ yawˇ htaꞈ awˬ bon uiˍ jaˇ tehꞈ dawˇ htaˇ, nawˬ cawˬ ve awˬ ceuˬ htaꞈ nyi hkʼaˇ suh tuˬ yoˬ. Nawˬ cawˬ ve awˬ ceuˬ htaꞈ nyi hkʼaˇ suh htaˇ, lawˇ hpaꞈ uiˍ ve chaw maˇ hpehꞈ.

12. Lawˇ hpaꞈ uiˍ ve lehˬ Yuˇdaꞈ Iˉsaˍkaˍriˍoˆ aˬ htoꞈ ma te tuˬ te piˇ ve le?

¹² Lawˇ hpaꞈ uiˍ ve lehˬ, Yuˇdaꞈ Iˉsaˍkaˍriˍoˆ hpfuhˆ ve chaw hpehꞈ tuˬ te piˇ leh haiˬ jaˇ ve awˬ ceuˬ htaꞈ te ve yoˬ. Awˉ lawˉ htaˇ yawˇ chi hkʼe hpehꞈ ve maˇ heˆ. (Luˉkaꞈ 6:13, 16) Yawˇ tcuh yaˇ hpehꞈ tuˬ Yeˍsuˆ leuˆ taˍ ve yoˬ. Yuˇdaꞈ lehˬ hpu haꞈ shaˉ shehˍ hpaˇ hpehꞈ ve pa taw, yawˇ laiˉ ceuˬ te puiˉ leh yonˍ gʼa ve chaw hpehꞈ ve yoˬ. Yeˍsuˆ leh tcuh yaˇ hui Gʼuiˬ sha ve kanˉ te htaˇ, hpu chi htaꞈ yehˇ ve yoˬ. Hpu chi ve kaꞈ chi beuꞈ teˇ co˗e miˬ guiˬ hkʼoˆ teˇ kaˬ le le te ve kanˉ htaꞈ yehˇ tuˬ ngaˬ hui hpu tanˇ tanˇ ve htaꞈ shuˍ ve yoˬ. Maˇ maw ve awˬ yanˇ Yuˇdaꞈ hpu hkʼawˇ ve yoˬ. Lawˇ hpaꞈ uiˍ ve awˬ lawn Yeˍsuˆ laiˉ pawˆ shaˍ tiꞈ piˇ˗oˬ ve htawˇ, Yuˇdaꞈ a yeˇ maˇ yuˬ.—Maˍkuˆ 7:22, 23; Luˉkaꞈ 11:39; 12:15.

13. Yuˇdaꞈ lawˇ hpaꞈ uiˍ ve chaw hpehꞈ la ve hkʼaˬ hkʼe htaˇ le?

¹³ Yeˍsuˆ htaꞈ shu tiˇ pehˍ piˇ tuˬ maˇ maw ve awˬ yanˇ htaˇ, Yuˇdaꞈ lawˇ hpaꞈ uiˍ ve chaw hpehꞈ ve tehꞈ gʼa mawˬ ve yoˬ. Hkiˬ tuꞈ keuˆ jaw ve Siˉmonˍ lehˬ Yeˍsuˆ, awˬ laꞈ gʼawˇ hui, leh Maˍriˆ leh Maˍhtaˆ kaꞈ yawˇ ve aˉ hkʼaw lo laˬ tuˬ jehˬ piˇ ve yoˬ. Awˍ caˇ chehˇ htaˇ, naˍ manˇ hawnˉ awˬ hpfuhˇ hkʼaˆ jaˇ ve Maˍriˆ lehˬ Yeˍsuˆ ve oˉ kʼoˍ htaꞈ ngeuˍ pfuhˍ ve yoˬ. Yuˇdaꞈ leh awˬ laꞈ gʼawˇ hui chi hkʼe gʼa mawˬ htaˇ maˇ dawˇ cawˇ. Awˬ laꞈ gʼawˇ hui dawˇ ve, naˍ manˇ hawnˉ chi hawˇ leh, hpu haˍ yaˇ gʼawˇ yaˇ htaꞈ pehˬ piˇ ve kʼo daꞈ ve yoˬ. Yaꞈ hkʼaˇ, Yuˇdaꞈ chi hkʼe maˇ dawˇ. Yawˇ lehˬ, “chaw hkʼawˇ hpehꞈ ve” yoˬ. Yawˇ chi hkʼe kʼoˆ ve lehˬ, hpu tanˇ shaw gʼa taˍ ve htaꞈ hkʼawˇ gaˇ jaˇ ve yoˬ. Lawˇ hpaꞈ uiˍ ve lehˬ Yuˇdaꞈ Yeˍsuˆ htaꞈ hpfuhˆ tuˬ te piˇ leh, awˬ ceˬ teˇ gʼaˇ hawˇ ve hkʼe ceh Yeˍsuˆ htaꞈ hawˇ ve yoˬ.—Yoˇhanˬ 12:2-6; Maꞈhtehˍ 26:6-16; Luˉkaꞈ 22:3-6.

14. Awˬ hpawˇ awˬ miˇ ma teˇ ca Luˉkaꞈ liꞈ 16:13 hkʼaw ve hkʼaˬ hkʼe gʼaꞈ te ve le?

¹⁴ Yeˍsuˆ yawˇ ve awˬ laꞈ gʼawˇ a yeˇ uiˍ ve teˇ ceuˬ htaꞈ dawˇ nyi tuˬ shaˍ tiꞈ piˇ ve yoˬ. Choˬ kaˬ lo kʼoˆ ve, “nawˬ hui lehˬ, Gʼuiˬ sha ve awˬ ceˬ kaꞈ, hpu shi mawˇ jeˬ ve awˬ ceˬ kaꞈ, teˇ pawˆ tiˉ te maˇ gʼa taˬ.” (Luˉkaꞈ 16:13 gʼaw sheˍ.) Awˬ lawn chi ve chi beuꞈ teˇ co˗e hkʼa gaˬ awˬ tehˬ hpehꞈ chehˇ sheˍ ve yoˬ. Roˬmaˇniˇ˗aˇ mvuhˇ miˬ lo chehˇ ve awˬ hpawˇ awˬ miˇ ma teˇ ca Yeˍsuˆ kʼoˆ piˇ ve awˬ lawn htaꞈ hkʼaˬ hkʼe gʼaꞈ te ve teˇ geh nyi sheˍ. Shu mvuhˇ miˬ lo teˇ tcuhˉ teˇ yanˇ kanˉ ca te tuˬ shu kʼoˆ piˇ ve yoˬ. Yawˇ hui kʼoˆ ve, “ngaˬ hui shu jeˬ cha maˇ jaˇ ve yoˬ. Kanˉ chi gʼa ve awˉ lawˉ htaˇ lehˬ, Yaˬhoˉvaˬ awˬ bon naꞈ laˇ ve tehꞈ dawˇ ve yoˬ.” Yaꞈ hkʼaˇ, yawˇ hui kanˉ chi ve te ve kʼo, Yaˬhoˉvaˬ ve kanˉ hkʼa dehꞈ te maˇ gʼa taˬ. Shaw nyi kuiˬ Taꞈ yehˬ Ha pa 8 maˬ 2008 hkʼawꞈ Liꞈ mehˆ hpfuhˇ 15 hkʼaw “Nyi ma teˇ shiˍ tiˉ te ve hkʼaw ka tiꞈ yeˬ ve” awˬ lawn chi htaꞈ gʼaw peuˬ hkʼawꞈ nawˉ, yawˇ hui dawˇ cheˆ gʼa ve yoˬ. Yawˇ hui kʼoˆ ve, “ngaˬ hui hpu gʼa maˇ gaˇ ve pa taw shu mvuhˇ miˬ lo kanˉ te ve kʼo, ngaˬ hui a shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ ve tehꞈ maˇ shawˍ. Ngaˬ hui chi hkʼe te ve kʼo, ngaˬ hui Yaˬhoˉvaˬ geh meuˆ daꞈ ve kaꞈ luˬ kʼai tuˬ yoˬ tehꞈ dawˇ ve yoˬ.” Hkʼe te leh, yawˇ hui kanˉ chi ve htaꞈ maˇ te. Peuˬ hkʼawꞈ  nawˉ hkʼaˬ hkʼe hpehꞈ la ve le? Awˬ leh meuˇ htaˇ, shu mvuhˇ miˬ lo maˇ kʼai ve kaꞈ awˬ hpawˇ kanˉ gʼa leh yawˇ hui vuiˬ tuˬ teˇ hpaˍ hpu lawꞈ ve yoˬ. Awˬ miˇ ma kʼoˆ ve, “Yaˬhoˉvaˬ yawˇ ve kanˉ te ve chaw htaꞈ ga piˇ tuˬ yawˇ ve laꞈ sheh ngeh ve maˇ heˆ.” Yaˬhoˉvaˬ yawˇ hui ve awˬ shehˍ hpaˇ hpehꞈ ve ha lehˬ jaˇ. Hpu maˇ heˆ.

15. Ngaˬ hui Saˍtanˍ ve va htaꞈ jaw hpaw˗e gʼa tuˬ yoˬ tehꞈ hkʼaˬ hkʼe te yonˍ gʼa ve le?

¹⁵ Ngaˬ hui uiˍ muiˬ caˆ muiˬ ve maˇ heˆ leh lawˇ hpaꞈ uiˍ ve cawˬ ve tehꞈ mawˬ htaˇ hkʼaˬ hkʼe te cawˇ ve le? Ngaˬ hui pa gʼa ve yoˬ! Pawˇluꞈ kʼoˆ ve, Saˍtanˍ ve ‘va htaꞈ yaw ve’ chaw kaꞈ yawˇ ve va htaꞈ ponˬ gʼa ve yoˬ. (2 Tiˆmoˉseˍ 2:26) Awˬ lawn chi hkʼe ve Daˍviˆ ve awˬ lawn htaꞈ mawˬ jaw ve yoˬ. Naˍtanˍ Daˍviˆ htaꞈ kʼoˆ piˇ htaˇ, yawˇ na ve, venˇ baˆ dawˇ hpfuhˆ ve, leh Yaˬhoˉvaˬ geh kʼawꞈ meuˆ daꞈ tuˬ coˇ caˇ ve yoˬ. Yaˬhoˉvaˬ lehˬ Saˍtanˍ aꞈ kehˉ kanˇ paˆ uiˍ jaˇ ve tehꞈ taˇ leunˇ sheˍ. Ngaˬ hui Gʼuiˬ sha htaꞈ ga laˇ tcuh ve kʼo, ngaˬ hui Saˍtanˍ ve va htaꞈ jaw hpaw˗e gʼa tuˬ yoˬ.

16. Ngaˬ hui Saˍtanˍ ve va htaꞈ maˇ gʼa yaw tuˬ aˬ htoꞈ ma ga laˇ gʼa ve le?

¹⁶ Saˍtanˍ ve va htaꞈ jaw hpaw˗e ve aꞈ kehˉ awˉ lawˉ htaˇ kaꞈ yawˇ ve va htaꞈ maˇ yaw ve kʼo daꞈ jaˇ ve yoˬ. Ngaˬ hui Yaˬhoˉvaˬ htaꞈ ga laˇ tcuh ve kʼo, te gʼa tuˬ yoˬ. Yaꞈ hkʼaˇ, ngaˬ hui shaˍ tiꞈ gʼa te cawˇ ve yoˬ. Awˬ lawn kʼo, Yaˬhoˉvaˬ ve kanˉ te maw jaˇ˗oˬ ve laiˉ gʼaˇ kaꞈ uiˍ muiˬ caˆ muiˬ leh lawˇ hpaꞈ uiˍ ve chaw hpehꞈ gʼa ve yoˬ. Nawˬ teˇ nyi le le Yaˬhoˉvaˬ geh bon gʼa lawˬ cawˇ leh, nawˬ ve dawˇ hkʼaˇ leh te ve awˬ ceuˬ maˇ daꞈ ve htaꞈ mawˬ tuˬ, Yaˬhoˉvaˬ ga laˇ tcuh sheˍ. (Chiˇ mvuh ve 139:23, 24) Nawˬ uiˍ muiˬ caˆ muiˬ ve leh lawˇ hpaꞈ uiˍ ve chaw taˇ hpehꞈ tcuh.

17. Maˇ maw ve awˬ yanˇ ngaˬ hui ve canˇ paˍ neˇ haiˬ Saˍtanˍ htaꞈ aˬ htoꞈ ma hpehꞈ la tuˬ le?

¹⁷ Saˍtanˍ lehˬ va htaw shehˍ hpaˇ hpehꞈ ve laiˉ hinˉ hkʼawꞈ gaˬ˗oˬ. Maˇ maw ve awˬ yanˇ yawˇ htaꞈ hpeh tiˍ leh te luˬ piˇ tuˬ yoˬ. (Hpeuꞈ maˍ ve 20:1-3, 10) Ngaˬ hui lehˬ awˬ nyi oˇ ve haˆ haˆ gaˬ la tcuh gaˇ ve yoˬ. Yaꞈ hkʼaˇ, awˬ nyi oˇ ve maˇ gaˬ la sheˍ htaˇ, ngaˬ hui Saˍtanˍ ve va htaꞈ maˇ gʼa yaw tuˬ shaˍ tiꞈ gʼa te ve yoˬ. Nawˬ uiˍ muiˬ caˆ muiˬ leh lawˇ hpaꞈ uiˍ ve chaw maˇ gʼa hpehꞈ tuˬ coˇ caˇ sheˍ. Coˇ caˇ leh “neˇ haiˬ htaꞈ tawˍ taˍ˗oꞈ. Nawˬ hui lo yawˇ hpaw tawˆ˗e tuˬ yoˬ.”—Yaˍkoˆ 4:7.