1. Mwomwo ika tunahase kufwanyishila Satana kuli chinyanga?

CHINYANGA afwila kukwata tunyama chipwe kuvajiha. Eji kuzachisanga miheto yakulisezaseza ngana muze vavuluka muMbimbiliya. (Yopa 18:8-10) Vyuma muka eji kulinganga chinyanga numba kanyama afwenga mumuheto nate? Eji kukekesanga kanawa uze kanyama, nakumona kuchihela eji kuyanga, navyuma eji kulyanga. Eji kukekesanga nawa muyachi wamuheto atela kuta numba ozenga kanyama kana. Omu mukiko eji kulinganga naSatana. Eji kuvangila kututachikiza kanawa nakumona kuze tweji kuyanga navyuma vize twazanga. Ngocho, eji kutanga muheto uze natachikiza ngwenyi natufwamo. Chipwe ngocho, Mbimbiliya yatulweza ngwayo kachi nge tunafu mumuheto waSatana tunahase kutusunukamo. Yatunangula nawa mwakulihendela kumiheto kana.

2. Miheto muka yivali eji kuzachisanga chikuma Satana?

² Miheto yivali yize eji kuzachisanga chikuma Satana shina, kulivwimba nachipululu. * Satana nazachisanga miheto kaneyi hamyaka yayivulu. Apwa nawa nge muka-kuta tujila, uze eji kwozanga tujila kuzachisa muheto chipwe lyoji. (Samu 91:3) Oloze etu katwatela kufwa mumiheto yaSatanako, mwomwo Yehova atulweza tufuta eji kuzachisanga Satana.—Koli. 2, 2:11.

3. Mwomwo ika Yehova asonekela muMbimbiliya mijimbu yavangamba jenyi vaze vapwile vakulivwimba nachipululu?

³ Yehova atulweza ponde yasolokele kuli vangamba jenyi vamwe vaze vapwile nachipululu, namuchima wakulivwimba, mangana  atukafwe tulihende kuponde kana. Tutalenu omu Satana ahungumwishile vangamba jaKalunga vamwe vaze vazachililile Yehova hamyaka yayivulu. Kutala chinahase kupwa chachikalu kuli etu kulihenda kumuchima wachipululu nou wakulivwimba tahi? Chiku. Yehova asonekele vyakutalilaho kanevi muMbimbiliya mangana ‘vituhuhumune etu.’ (Koli. 1, 10:11) Yehova atachikiza ngwenyi, tunahase kulinangulako vyuma vimwe kuli vangamba jenyi nakulihenda kumiheto yaLiyavolo chipwe kutusunukamo.

4. Vyuma muka vinahase kusoloka kachi nge natulivwimba?

⁴ Satana asaka tupwenga vakulivwimba, mwomwo atachikiza ngwenyi, nge natulivwimba kaha natupwa ngana mwaikiye nakuhona kukapwa nakuyoya chahaya myaka yosena. (Vishi. 16:18) Kaposetolo Paulu ahanjikile ngwenyi, mutu nahase kulivwimba “nakwingila mukusopesa chize vasopesa Liyavolo.” (Chimo. 1, 3:6, 7) Chuma kana chinahase kusoloka kuli etu tuvosena, numba tunashimbula mumuchano chipwe chiku.

5. Kweseka namukanda waMuka-kwambulula 7:16, 20, uno mutu nahase kusolola ngachilihi ngwenyi apwa wakulivwimba?

⁵ Mutu wakulivwimba atwama namuchima wakulizanga ivene. Satana asaka tupwenga namuchima wakulizanga etu vavene muchishishisa chakuhaka vyuma asaka Yehova kulutwe, chikumanyi nge tuli muukalu. Chakutalilaho, kutala vamivangijikilaho lyehi chipwe kumilinga mwamupi tahi? Satana asaka muhanenga mulonga Yehova chipwe vandumbwenu. Kaha nawa asaka mupendaminenga hachinyingi chenu hakukumisa ukalu wenu muchishishisa chakupendamina hajindongi jaYehova jize jatwama muMbimbiliya.—Tangenu Muka-kwambulula 7:16, 20.

6. Vyuma muka munalinangula kuli ndumbwetu wapwevo wamuNetherlands?

⁶ Tutalenu hachakutalilaho chandumbwetu wapwevo wamuNetherlands uze apihililile mwomwo yatutenga twavandumbwenyi. Echi chamulingishile echenga kulihanjikisa navo. Ou ndumbwetu ambile ngwenyi: “Ngwevwilenga lika kupihya hatutenga twavandumbwetu, ngocho kangwavakonekeleleko. Ngwalwezele lunga lyami twalukile kuchikungulwilo cheka.” Oloze omu  atalile JW Broadcasting^® yaMarch 2016, yamukafwile awane mwakulipikila natutenga twavandumbwenyi. Ou ndumbwetu ambile ngwenyi: “Ngwamwene jino ngwami, ngwatelelele kulinyisa nakutala hatutenga twami muchishishisa chakutokomenya hatutenga twavandumbwami. Broadcasting kana yangukafwile ngupendamine hali Yehova nakukundwiza wata wenyi.” Vyuma muka namulinangula kuli ou ndumbwetu? Kachi nge muli muukalu, mwatela kupendaminanga hali Yehova. Mulombenu amikafwe mumone vandumbwenu ngana muze avamona ikiye. Tachikizenu ngwenu, Senu wamwilu atachikiza tutenga twavandumbwenu, kaha afwila kuvakonekela, shikaho asaka nayenu muvakonekelenga.—Yowa. 1, 4:20.

7. Vyuma muka vyasolokele kuli Mwangana Ujiya?

⁷ Kulivwimba chalingishile Ujiya Mwangana waYuta ahone kwivwilila kumazu vamuhuhumwine vakwavo nakulinga vyuma vize katelele kulingako. Ujiya alingilenga vyuma mukulonga. Afungulwilenga vaka-kole jenyi kujita, nakutunga jinganda jajivulu, kaha nawa apwile namande amavulu. Vyuma vyosena evi aviteselengamo, mwomwo “Kalunga wamuchano amulingishile afukile.” (Miji. 2, 26:3-7, 10) Oloze Mbimbiliya yamba ngwayo, “omu Ujila alingile nakwate lyehi ngolo, aputukile kulivwimba, ngocho ahichikishilemo mwono wenyi.” Yehova ahanjikilile chimweza ngwenyi, vapilishitu kaha vakiko vatela kulumba vyuma vyalivumba lyamwaza mutembele. Oloze mwomwo yakulivwimba, Mwangana Ujiya ayile nakulumba vyuma vyalivumba lyamwaza mutembele. Ngocho Yehova apihililile chikuma, kaha amuvetele namusongo wambumba. Ujiya apwile lika namusongo wambumba swi nakukufwa chenyi.—Miji. 2, 26:16-21.

8. Uno chisoneka chaWavaka-Kolinde 1, 4:6, 7, nachitukafwa ngachilihi tuhone kulivwimba?

⁸ Uno nayetu tunahase kulivwimba ngana muze alivwimbile Ujiya tahi? Tutalenu chakutalilaho chandumbwetu José. Ou ndumbwetu apwile nakufukila mukusekasana chenyi, kaha nawa apwile kalama wakulindunuka muchikungulwilo. Ahanyinenga vihande hakukunguluka chachihanda nachangalila. Kaha nawa tulama vakujinguluka vamuhulishilenga avakafweko muvyuma vimwe. Ambile ngwenyi: “Oloze ngwapendaminyinenga hauhashi wami nahachinyingi chami, nakuhona kupendamina hamazu aYehova akunguhuhumuna. Mwomwo ngwamwene ngwami kangweshi kuhasa kulimbenjako.” Chaluvinda ndumbwetu José alingile shili yayinene, ngocho vamufumishile muchikungulwilo. Kahomu mwahichile myaka vamukindulwishile cheka muchikungulwilo. Ou ndumbwetu ambile ngwenyi: “Chuma chapwa  chachilemu kuli Yehova shina kulinga vyuma vize mwatulweza, keshi kupwa nachihela muchikungulwiloko.” Twatela kutachikiza ngwetu, kala uhashi natupwa nawo, chipwe milimo natuzata muchikungulwilo vyeji kufumanga kuli Yehova. (Tangenu Wavaka-Kolinde 1, 4:6, 7.) Shikaho, nge natulivwimba, kaha Yehova keshi kutuzachisako.

9. Uno chipululu chalingishile Satana naEve valinge vyuma muka?

⁹ Kachi nge natwivwa lizu chipululu, mutu watete eji kwizanga muvishinganyeka shina Satana Liyavolo. Twafwelela ngwetu, shimbu kanda Satana alikange atela apwile namilimo yayivulu hakuwana nge apwile kangelo kaYehova. Oloze asakile vyuma vyeka nawa. Asakile vamulemese muchishishisa chakulemesa kaha Yehova. Satana asaka tupwenga ngana mwaikiye. Ngocho, eji kutukunyulanga tuhone kusuuluka navyuma tuli navyo. Lwola lwatete akunywile vatu vahone kusuuluka navyuma vali navyo, shina haze ongele Eve. Yehova etavishile Alama naEve ‘kulya kumitondo yosena yapwile muMilemba’ kufumisako kaha umwe. (Kupu. 2:16) Oloze Satana ahungumwishile Eve ashinganyeke ngwenyi atelele kulya nakumutondo uze vavakashile. Eve kasuulukile navyuma apwile navyoko, asakile navyuma vyeka nawa. Ngocho Eve alingile shili, kaha kutwala muze afwile.—Kupu. 3:6, 19.

10. Chipululu chalingishile Mwangana Ndavichi alinge vyuma muka?

¹⁰ Chipululu chalingishile Mwangana Ndavichi avulyame vyuma vyosena vize amulingililile Yehova. Vyuma kana shina, luheto, naulemu, nakumukafwa afungulule vaka-kole jenyi. Ngocho ahanjikile hatoma ngwenyi, vyuma vize amuhanyine Yehova ‘vyapwile vyavivulu chikuma.’ (Samu 40:5) Oloze mukuhita chalwola, Ndavichi avulyamine vyuma vyosena vize amulingilile Yehova. Echi chamulingishile ahone kusuuluka navyuma vize apwile navyo nakufwila vyuma vyeka. Numba tuhu Ndavichi apwile namapwevo vavavulu, oloze aputukile kuminyina maleji pwevo lyamukwavo. Ou pwevo apwile ikiye Mbate-sheva, kaha lunga lyenyi Uliya kaHete. Ndavichi alisavalile naMbate-sheva, kaha kufumaho Mbate-sheva emichile. Kaha nawa Ndavichi awahishile vyuma mangana vajihe Uliya lunga lyaMbate-sheva. (Samwe. 2, 11:2-15) Uno vyuma muka apwile nakushinganyeka Ndavichi? Uno ashinganyekele ngwenyi Yehova kapwile nakumumonako tahi? Numba tuhu Ndavichi azachililile Yehova hamyaka yayivulu, oloze ejile nakupwa nachipululu. Ngocho amwene ukalu.  Kutwala muze, Ndavichi alitavilile mulonga wenyi nakupihilila nakwalumuka. Awahililile chikuma omu Yehova amukonekelele.—Samwe. 2, 12:7-13.

11. Kweseka namazu atwama hali Wavaka-Efwesu 5:3, 4, chuma muka nachitukafwa tuhonese muchima wachipululu?

¹¹ Vyuma muka natulinangula kuli Ndavichi? Tunahase kulihenda kumuchima wachipululu, nge natusakwililanga Yehova havyuma natulingila. (Tangenu Wavaka-Efwesu 5:3, 4.) Twatela kusuuluka navyuma tuli navyo. Twatela kulwezanga vilongesa vyetu vashinganyekenga hachuma chimwe chize navalingila Yehova halikumbi nakumusakwilila. Nge chilongesa chetu mwalinga ngocho hakumbi hakumbi, kaha kusongo yachalumingo nachilumbununa nge navuluka vyuma 7 vyakulihandununa handununa mukulomba chenyi. (Teso. 1, 5:18) Uno nayenu mukiko mweji kulinganga tahi? Kachi nge namushinganyekanga havyuma vize namilingila Yehova, kaha nachimikafwa mumusakwililenga. Echi nachimikafwa musuulukenga navyuma muli navyo. Kusuuluka navyuma muli navyo, nachimikafwa muhone kupwa nachipululu.

12. Uno muchima wachipululu wazondwele Yuta Isakalyote alinge vyuma muka?

¹² Muchima wachipululu walingishile Yuta Isakalyote asolole Yesu kuli vaka-kole. Hakavanga kapwile namuchima kanako. (Luka 6:13, 16) Yesu amusakwile kupwa kaposetolo kenyi. Yesu afwelele chikuma Yuta, echi chikiko chamulingishile amuhane namulimo wakulama chikasha chajimbongo. Jimbongo kana jakafwilenga Yesu navaposetolo jenyi mumulimo wakwambulula. Jimbongo kana jinafwane nge jize tuli nakuhananga makumbi ano tukundwize mulimo wamukaye kosena. Chaluvinda, Yuta aputukile kwiva jimbongo, numba tuhu evwilenga Yesu mwahuhumuna vatu valihende kumuchima wachipululu. (Mako 7:22, 23; Luka 11:39; 12:15) Chikupu vene, Yuta ahombwanyishile vyuma vize Yesu ahuhumwinenga vatu.

13. Lwola muka muchima wachipululu apwile nawo Yuta wasolokele hatoma?

¹³ Muchima wachipululu apwile nawo Yuta wasolokele hatoma omu kwasalile makumbi amandende nakufwa chaYesu. Likumbi limwe, Yesu natumbaji twenyi kuhakilako Maliya naMalita, vapwile muzuvo yaShimona muka-mbumba. Omu vapwile nakulya, Maliya ambachile maji alivumba lyamwaza andando yayinene chikuma nakuwahingunwina hamutwe waYesu. Echi chalingishile Yuta natumbaji vakwavo vapihilile chikuma. Tumbaji vakwavo pamo vashinganyekele ngwavo, maji kana kachi vanawalanjisa jimbongo jajivulu nakujihana kuli vaka-kuhutwa. Oloze Yuta apwile navishinganyeka vyeka. Hakuwana nge “apwile mwiji,” ngocho asakile valanjise aze maji mangana evenga jimbongo muchikasha. Kufumaho, muchima wachipululu walingishile Yuta asolole Yesu mangana vamuhane jimbongo.—Yowa. 12:2-6; Mateu 26:6-16; Luka 22:3-6.

14. Uno valunga napwevo vamuRomania vakavangijile ngachilihi mazu atwama hali Luka 16:13?

¹⁴ Yesu alwezele vaka-kumukavangiza ngwenyi: “Kamweshi kuhasa kuzachila Kalunga naLuheto hamweko.” (Tangenu Luka 16:13.) Mazu kana apwa amuchano. Achitalenu omu lunga napuwenyi vamuRomania vakavangijile awa mazu ahanjikile Yesu. Ava valunga napwevo vawanyine mulimo wakuzata hakashimbu kakandende mulifuchi lyeka. Vambile ngwavo: “Twapwile namukuli waunene kunyambaulu uze twatelele kufweta, ngocho omu twawanyine mulimo kana twamwene nge hijila yimwe Yehova natukafwilamo mangana tufwete mukuli wetu. Oloze nge vetavilile mulimo kana kachi kavapwile nalwola lwaluvulu lwakuzachila Yehovako. Hanyima yakutanga chihande chapwile muKaposhi Kakutalila kaAugust 15, 2008, chapwile namutwe wakwamba ngwavo, “Pwenunga Vakulyononona naMuchima Wenu Wosena,” vasakwile jino vyakulinga. Vambile ngwavo: “Kachi nge twayile nakuzachila mulifuchi lyeka ngwetu mangana tupwenga najimbongo jajivulu, kachi katwamwene usoko wetu naYehova kupwa waulemu  chikuma mukuyoya chetuko. Kahechi nawa kachi chatuzeyesele kushipilitu.” Echi chalingishile ava valunga napwevo vakane mulimo kana. Uno chuma muka chasolokele? Lunga awanyine mulimo mulifuchi lyavo uze wavakafwilenga vawane vyuma vyasakiwilenga mukuyoya chavo. Puwenyi ambile ngwenyi: “Yehova eji kukafwanga vangamba jenyi.” Ava valunga napwevo vapwa vakuwahilila mwomwo vahakile Yehova kulutwe mukuyoya chavo kuhambakana jimbongo.

15. Mwomwo ika natwambila ngwetu, tunahase kutusunuka mumiheto yaSatana?

¹⁵ Chuma muka twatela kulinga kachi nge tunamono ngwetu tunaputuka kulivwimba chipwe kupwa namuchima wachipululu? Twatela kuzachilaho. Paulu ambile ngwenyi, vatu vaze ‘vanozo vavatonyi’ mumuheto waLiyavolo vanahase kutusunukamo. (Chimo. 2, 2:26) Omu mukiko alingile naNdavichi. Evwililile mazu akuhuhumuna vamulwezele kuli Natane, nakumbila muchima wachipululu, nakupwa cheka nausoko wakukola naYehova. Tachikizenu ngwenu, Yehova atwama nangolo chikuma kuhambakana Satana. Shikaho, nge natwitavila kutukafwa kuli Yehova, kaha natutusunuka mumiheto yaLiyavolo.

16. Vyuma muka twatela kulinga mangana tulihende kumiheto yaSatana?

¹⁶ Chinahase kupwa chamwaza nge natulihenda kukulivwimba nakukupwa namuchima wachipululu. Yehova kaha ikiye nahase kutukafwa tulinge ngocho. Oloze chasakiwa kukilikita numba tulihende kumiheto kana. Navatu vaze vanazachilanga Yehova hamyaka yayivulu vanalivwimbinga chipwe kupwa nachipululu. Shikaho, hakumbi hakumbi lombenunga Yehova mangana amikafwe mulikekese mumone numba nge muli navilinga kanevi vyavipi nyi chiku. (Samu 139:23, 24) Zatenu nangolo mangana muhone kupwa navilinga kanevi.

17. Vyuma muka navisoloka kalinwomu kuli Liyavolo?

¹⁷ Hamyaka yayivulu, Satana nozonga vatu mumiheto yenyi. Oloze kalinwomu vamukase nakumunongesa. (Kuso. 20:1-3, 10) Tuli nakutalilila kulwola kana. Shimbu kanda lwola kana luhete, tutwalenuho lika kuvanguluka kumiheto yaSatana. Zatenu nangolo mangana mulihende kumuchima wakulivwimba nachipululu. Shikaho, twalenuho lika ‘kwimanyina Liyavolo nakole kaha mwamichina.’—Yako. 4:7.