1. Muloñadi chitunateli kumwesekejela Satana nachibinda?

CHUMA chafwilañayi chibinda hikulawula kanyama hela kumujaha. Nateli kuzatisha nyihetu yashiyashana ninyihetu yashimwiniyi wumu wahadi amabwambu jaYoba akutwamba. (Yoba 18:8-10) Chibinda nateli kukokola ñahi kanyama kulonda yafwi mumuhetu windi? Welukaña chidiyi kanyama nakudihula nindi, wayaña kudihi? Yumanyi yakeñayi? Muhetu wamuchidinyi wunatela kuzatisha? Satana niyena wudi neyi iwu chibinda. Watwiluka chiwahi. Wamonaña kutwayaña niyuma yitwasweja kukeña. Kuhiñahu wataña muhetu wunelukiyi nindi nateli kutulawula nachu chakadi kwiluka. Hela chochu, Bayibolu yatulejaña nawu neyi anatulawuli, tunateli kusopokamu. Yatudizishaña cheñi chitunateli kutondolwela iyi nyihetu yejima.

2. Tufutanyi tuyedi twazatishañayi Satana?

² Nyihetu yavula kuzatishayi Satana hikudivwimba nilwisu. * Hadi yaaka yayivulu, Satana nazatishi iyi yilwilu yiyedi. Wudi neyi chibinda chawatujila, wayikokwelaña mumwonji windi hela mukaleñi kindi. (Mas. 91:3) Ilaña Satana hatela kutulawulaku. Muloñadi? Muloña Yehova natuleji tufuta twazatishañayi Satana.—2 Kor. 2:11.

3. Muloñadi Yehova chasonekeleliyi muBayibolu yakutalilahu yawantu adivwimbili niadiña nalwisu?

³ Yehova watulejaña kutama kwekala mukudivwimba nilwisu kuhitila mukutuleja yuma yamwekeneni ambuñindi amakwawu kulonda ninetu tubuli kukoña chiluwa chochimu. Muyakutalilahu yitukushinshikahu, tukumona netu Satana walawili niambuña aYehova ashinshika. Komana chumichi  chinatalishi mukwila nawu tunateli kukañanya kutondolwela kwikala adivwimba nikwikala nalwisu? Inehi. Yehova wasonekeli yakutalilahu muBayibolu kulonda yikali yakutusoñamisha etu. (1 Kor. 10:11) Weluka nindi tunateli kudizila kuyakutalilahu yakusoñamisha nawa nindi tunateli kutondolwela nyihetu yaDiyabolu.

4. Chumanyi chikufumamu neyi tudinkaña wanta?

⁴ Satana wakeñaña nindi tudivwimbeña. Weluka nindi neyi twikala adivwimba, tukwikala neyi yena nawa tukatambwila wumi wahaya nyaaka wanyi. (Yish. 16:18) Kapostolu Pawulu watusoñamishili nindi muntu nateli kwikala ‘wadinka wanta nakumusompesha neyi chamusompeshawu Diyabolu.’ (1 Tim. 3:6, 7) Chumichi chinateli kutumwekena wejima wetu, hela chakwila tudi amaha muchalala hela tunamukalakeli Yehova hadi yaaka yayivulu.

5. Neyi chinamwekeshiwu haMukwakutañisha 7:16, 20, muntu nateli ñahi kumwekesha kudivwimba?

⁵ Antu adivwimba adikeña aweni. Satana wakeñaña nindi tutoñojokeña hadi etu aweni chatela tutoñojokeña hadi Yehova, sweje-e neyi tunamoni kukala. Chakutalilahu, ayitwambilahu dehi? Indi kwiji Ayilahu dehi chatama? Satana wakeñaña nindi tumwinkeña Yehova nyiloña hela anakwetu. Nawa Diyabolu wakeñaña mutoñojokeña nindi njila yimu hohu mumunateli kumanishila kukala, hikwila chimunakukeña chatela mulondeleña nshimbi jaYehova.—Tañenu Mukwakutañisha 7:16, 20.

6. Chumanyi chimukudizila kuyuma yamumwekeneni muhela wakuNetherlands?

⁶ Talenu chuma chamumwekeneni muhela wakuNetherlands wahililileña akwawu muloña wakubula kuwanina. Wafukwilihu nindi wukudikundaña nawu wanyi hadi mpinji yayilehi. Wahosheli nindi: “Natiyileña wuudi nawa nakañenyi kuhimpa yilwilu yami. Nayilejeli amwanta wami nami tubuukili muchipompelu  chikwawu. Nkumininaku natalili JW Broadcasting^® yaMarch 2016. Iyi progilamu yankwashili kwiluka chakwila eyi muntu naneñeshi.” Wahosheli cheñi nindi: “Namweni nami nateli kwikala wadizoza nikutoñojoka hayiluwa yami, chatela nikeñeña nami amanakwetu muchipompelu ekali neyi ami. Iyi progilamu yankwashili kusha muchima hadi Yehova nihawuswa wukwetiyi.” Chumanyi chitunakudizilaku? Neyi munamoni kukala mushindamenenu Yehova. Mulombenu kulonda yayikwashi mumoneña amanakwenu neyi chayimonañayi. Tata yenu wamwiwulu wamonaña yiluwa yawu ilaña wayanakenaña. Nakukeña nindi ninenu mwileña chochimu.—1 Yow. 4:20.

7. Chumanyi chamumwekeneni Mwanta Uziya?

⁷ Kudinka wanta kwamuletesheli Mwanta Uziya wakuYuda kukaana kufumba nikwila yuma munjila yakudivwimba. Uziya welili yuma yayivulu yayiwahi. Washindili njita jajivulu, watuñili nyisumba yayivulu nawa wadiña namaha amavulu. “Nzambi wamushakamishili chachiwahi mafuku ejima amukeñakeñeliyi.” (2 Kushi. 26:3-7, 10) Bayibolu yahosha nawu: “Ilaña chakwatiliyi ñovu hakudivwimba mumuchima windi hakwila nichakudikisañana.” Yehova wahanini nshimbi nindi atupristu hohu diwu atela kwocha insensi hatembeli. Ilaña Mwanta Uziya wadivwimbili nakwiñila mutembeli nakwocha insensi. Yehova watiyili kutama chakwila wamweteli iwu iyala wadivwimba nambumba. Watwalekelihu kwikala nambumba sampu nichafwiliyi.—2 Kushi. 26:16-21.

8. Kwesekeja na 1 AKorinda 4:6, 7, tunateli kutondolwela ñahi kudivwimba?

⁸ Komana kudivwimba kunateli kutuletesha kufwa mumuhetu neyi mwafwiliyi Uziya? Talenu chakutalilahu chaJosé. Wadiña mukwakulanda nakulandulula waya mpuhu nawa wadiña mukulumpi alemeshawu muchipompelu. Wahanineña jimpanji hakupompa kwanyanya nihakupompa kwamaneni, nawa ankoñi añinza amwihwileña kulonda yayikwashiku. Ilaña wahosheli nindi: “Nashindameneni muñovu jami niyuma yineluka. Namushindameneni Yehova wanyi. Natoñojokeleña nami nadiña nakola, namudiwili Yehova nikufumba kwindi.” José wakoñeli nshidi nawa amuhañili muchipompelu. Chimwahitili yaaka amufuntishili. Ichi wahoshaña nindi: “Yehova  nandizishi nindi chuma chalema hikwikala nejinaku, ilaña kwovwahila mwatulejañayi.” Twatela kwanukaña etu yawana yitukweti ninyidimu yatwinkañawu muchipompelu yafumaña kudi Yehova. (Tañenu 1 AKorinda 4:6, 7.) Neyi twadinka wanta Yehova wukutuzatishaña wanyi.

9. Lwisu lwamuletesheli Satana niEva kwiladi?

⁹ Neyi tunakutoñojoka halwisu, Satana Diyabolu diyi wenzaña muyitoñojoka yetu. Chineli wadiña kañelu, Satana watela wadiña nanyidimu yayiwahi yayivulu. Ilaña wakeñeleleñahu yikwawu. Wakeñeleña nindi antu adifukuleña kudi yena, chuma chamutelela hohu Yehova. Satana wakeñaña twikali neyi yena, wafwilaña kutuluwañesha tubuleña kumona yuma yitukweti netu yinawanini. Mpinji yatachi yeliliyi mwenimu, himpinji yahosheliyi naEva. Yehova wamwinkeli Eva ninfumwindi yakuda yayivulu, “nyitondu yamwitempa yejima” kufumishahu hohu wumu. (Kutach. 2:16) Hela chochu, Satana wamudimbili Eva kutoñojoka nindi watela kuda kumutondu wayikaanishiliwu. Eva hamweni yuma yayinkeliwu nindi yinashikiliku; wakeñeleleñahu yikwawu. Tweluka chuma chafuminimu. Wavulumwini nawa nkumininaku wafwili.—Kutach. 3:6, 19.

10. Chumanyi chamwekeni chelili Mwanta Davidi yekali nalwisu?

¹⁰ Lwisu lwamuletesheli Mwanta Davidi kuvulamena yuma yamwinkeliwu kudi Yehova, maheta, mpuhu nichashindiliyi ayilumbu jindi amavulu. Davidi welukili nindi yawaana yaNzambi ‘yasweja kuvula, kutwesha kuyichinda nehi.’ (Mas. 40:5) Ilaña mpinji yimu, Davidi wavulameneni yuma yamwinkeliyi Yehova. Hela chakwila Davidi wadiña nawambanda amavulu, wetejeli kufwila kwatama kumukojeji kufwila ñoda mukwawu. Iwu mumbanda wadiña Batisheba nawa nfumwindi wadiña Uriya kaHiti. Dichi Davidi welili wuvumbi naBatisheba, nawa wamwinkeli ivumu. Chuma cheliliyi Davidi chadiña chatama, ilaña wabombelelihu nichuma chikwawu chasweja kutama, wakwatili kafuta kakumujahilamu Uriya. (2 Sam. 11:2-15) Chumanyi chatoñojokeleñayi Davidi? Komana watoñojokeleña nindi Yehova wukumumona wanyi? Kambuña aYehova wadiña washinshika wekalili nalwisu,  nawa lwamuleteleli kukala. Nkumininaku, Davidi wetejeli nshidi jindi nawa wabalumukili. Watiyili kuwaha chamwanakeneniwu kudi Yehova.—2 Sam. 12:7-13.

11. Kwesekeja naAEfwesesa 5:3, 4, chumanyi chinateli kutukwasha kubula kwikala nalwisu?

¹¹ Yumanyi yitwadizilaña kudi Davidi? Twadizilañaku netu, tunateli kushinda lwisu neyi chakwila tumwekeshaña kusakilila hayuma yejima yatwinkañayi Yehova. (Tañenu AEfwesesa 5:3, 4.) Twatela kumonaña yuma yitukweti netu yinashikili. Neyi tunatachiki kudiza Bayibolu nawantu, twatela kuyidizisha kutoñojoka hachuma chachiwahi chinayinkiyi Yehova nikumusakilila. Neyi muntu yelaña mwenimu ifuku dejima mumulungu, chikumwekesha nawu nalombi hanyitu yashiyashana 7. (1 Tes. 5:18) Komana ninenu dichimwelaña? Neyi mutoñojokaña hayuma yejima yinayililiyi Yehova, mukumusakililaña. Nawa neyi musakililaña mukumonaña yuma yimukweti nenu yinashikili. Neyi mumonaña yuma yimukweti nenu yinashikili, himukwikalaña nalwisuku.

12. Lwisu lwamuletesheli Yudasi Isakaroti kwiladi?

¹² Lwisu lwamuletesheli Yudasi Isakaroti kwila chuma chatama nawa wamufukejeleli Yesu. Dichadiñayi hakusambila wanyi. (Luka 6:13, 16) Yesu wamutondeli kwikala kapostolu. Wamukuhweleleli muloña diyi wadiña nakuhemba mali. Yesu niapostolu indi azatishileña awa mali kulonda adikwashi nachu mumudimu wakushimwina. Munjila yikwawu, awa mali adiña neyi yawaana yamudimu wamukaayi kejima yahanañawu makonu. Ilaña mpinji yimu, Yudasi watachikili kwiya, hela chakwila watiyili Yesu chadiña nakuyisoñamishayi halwisu. (Maku 7:22, 23; Luka 11:39; 12:15) Yudasi wadiwili iku kusoñamisha.

13. Mpinjinyi yamwekesheliyi Yudasi nindi wadiña nalwisu?

¹³ Hashimbwili wanyi henohu Yesu kanda amujahi, Yudasi wamwekesheli nindi wadiña nalwisu. Yesu niatumbanji twindi, Mariya nimuhelindi Mata adiña enyi mwitala daShimona mukwambumba. Hampinji yadiileñawu, Mariya wanyamukili nakumuhuñunwina Yesu manji evumba dadiwahi alema wuseya hamutu. Yudasi niatumbanji amakwawu atiyili kutama. Atumbanji amakwawu atoñojokeli nawu chadi kuwaha kuyizatisha awa mali mumudimu wakushimwina. Ilaña Yudasi wadiña nayitoñojoka yambukaku. Wadiña “ikombi” nawa wakeñeleña kwiya mali muchikasha. Chimwahitili mpinji, lwisu lwamuletesheli Yudasi kumufukejela Yesu namali asiliva.—Yow. 12:2-6; Mat. 26:6-16; Luka 22:3-6.

14. Chisaka chimu chazatishili ñahi mazu ekala haLuka 16:13?

¹⁴ Yesu wayanukishili akwakumulondela chikuma chalema nindi: “Himunateli kukalakela Nzambi hampinji yoyimu niMahetaku.” (Tañenu Luka 16:13.) Ichi chuma dimu. Talenu adisumbula amu akuRomania chazatishiliwu mazu ahosheli Yesu. Ayinkeli mudimu wakampinji kantesha mwituña mwekala mali nankashi. Ahosheli nawu: “Twatambwili mali amavulu kunyambawulu itwateleleli kufuntisha, nawa hakusambila twamweni netu Yehova diyi watwinkeli iwu mudimu.” Hela chochu, hadiña kukala. Neyi etejeli iwu mudimu adi kwikala nampinji yantesha yakumukalakela Yehova. Chatañiliwu chibaaba chahosheleña nawu, “Twalekenuhu Kwikala Ajila Namuchima Wumu,” chekala muKaposhi Kakutalila kaAugust 1, 2008, afuukwilihu. Ahosheli nawu: “Neyi twayili kwituña dacheñi kulonda tutambuleña mali amavulu, chadi kutukalila kumukalakela Yehova, chadi kumwekesha  nawu wubwambu wetu naYehova hiwadiña walema muchihandilu chetuku. Chadi kutukalila kumukalakela Yehova chiwahi.” Dichi akaanini mudimu. Chumanyi chamwekeni? Iyala wawanini mudimu mwituña dawu, wayikwashileña muyuma yakankilileñawu. Mumbanda wahosheli nindi: “Yehova wakamenaña ambuñindi mpinji yejima.” Ichi chisaka chidi namuzañalu muloña amwilisha Yehova kwikala Mwanta wawu kubadika mali.

15. Tuneluki ñahi chikupu netu tunateli kusopoka munyihetu yaSatana?

¹⁵ Chumanyi chitwatela kwila neyi tumona netu tunatachiki kudivwimba hela kwikala nalwisu? Tunateli kusopokamu! Pawulu wahosheli nindi: Antu ‘anakwatiwu amomi kudi’ Diyabolu anateli kusopoka mumuhetu. (2 Tim. 2:26) Dichuma cheliliyi Davidi, watiyilili mwamufumbiliwu kudi Natani, walekeli lwisu nawa wakolesheli wubwambu windi naYehova. Mwatela kwanukaña nenu, Yehova wamubadika ñovu Satana. Dichi neyi twitejaña wukwashu waYehova tunateli kusopoka munyihetu hela mutukosi twaDiyabolu.

16. Chumanyi chinateli kutukwasha kutondolwela nyihetu yaSatana?

¹⁶ Hela chochu, chatela tusopokeña munyihetu hela mutukosi twaSatana, twatela kututondolwela twejima. Nzambi hohu diyi wunateli kutukwasha. Ilaña bayi tutoñojokaña netu ami nakola, hinateli kwikala wadivwimba hela nalwisuku! Niambuña aYehova anamukalakeli hadi yaaka yayivulu adinkahu dehi wanta nikwikala nalwisu. Mulombenuña Yehova mpinji yejima kulonda yayikwashi kushinshika yitoñojoka yenu niyilwilu yenu. (Mas. 139:23, 24) Dichi zatenuña nañovu kulonda mubuli kwikala adinka wanta hela nalwisu!

17. Chumanyi chikumumwekena chilumbu chetu Diyabolu katataka?

¹⁷ Hadi yaaka yayivulu, Satana nekali chibinda. Katataka amukasi nawa nkumininaku akumujilumuna. (Chim. 20:1-3, 10) Tunakutalila idi ifuku. Dichi, twalekenuhu kwikala asoñama nanyihetu yaSatana. Zatenuña nañovu kulonda mubuli kwikala adivwimba hela nalwisu. Fwilenuña kudikaña “naDiyabolu, niyena wukuyitemuka.”—Yak. 4:7.