1. Sotwani ni namalupattha anlikanaca cani?

NAMALUPATTHA rina itthu imoca mmuru—uvariha awula wiiva itthu inlupatthaawe. Wiira akhitiri, uyo naavarela nteko khula itapha, khampa mpatthani mmoca oohinamaana a Jó cenryaawe. (Jó 18:8-10) Isiyani namalupattha impankaawe wiira ankakhelele mwannama nipuro niryaaya itapha? Uyo nopacera ucuwela tokooni ilema yo mwannama. Nipuroni ninrweesaya? Isiyani intepaaya uncivela? Ni isiyani inhala unvariha intutuseraka? Sotwani ri toko uyo namalupatthooyo. Uyo naatotha toko unicuwela ilema cihu. Naatotha unoona nipuro ninrweehu ni itthu intepa unicivela. Vano, naarya ntapha ni uweherera unoona nikelaka nineetthaalale. Masi Ibiiblya inaanikhuluveliha wiira hataa nivariyaka niitapha cinryaawe, hiiva ninaahala ukhitiri ukuluphuwa. Uhiya commo, iyo ciicammo inaaniitthuciha mananna hiiva oonyema ayo mataphaayo.

2. Mataphani meeli Sotwani antepaawe uvarela nteko?

² Ahaavo matapha meeli antepa uncivela uvarela nteko Sotwani: wiicoona ni ikhwilu. * Sotwani nnovarela nteko ala makhalelo meelyaaya myaakha cene uttuli. Uyo ri khampa namalupattha nokakhelela itthu inlupatthaawe muntthavini awula muntaphani. (Isaa. 91:3) Hataa ukhalaka commo, hi khaninlamuliya uhiya nivarihiyaka ni Sotwani.—2 Akor. 2:11.

3. Yehova helenleni mbiiblyani matakihero o khalayi?

³ Yehova naaniitthuciha mananna hiiva oohivarihiya nlattu wo wiicoona ni wookhalana ikhwilu. Wiira anikavihere upanka commo, uyo naanihimyera matakihero okhalayi. Nhina ula mwahoola ninaahala woona matakiheroni. Nyuuva nnaahala woona wiira Sotwani ahokhitiri waavariha mmatthavini wawe atthu yanswalenle Yehova myaakha cinci. Wiirannya waya iyo, maanaaya wiira hiiva khaninhala ukhitiri unyema ayo mataphaayo? Mena. Yehova hohela mbiiblyani ayo matakiherwaayo wiira anikavihere ucuwela itthu atthunaka Sotwani inhalaawe  unipanka ni ukhitiri unyema. (1 Akor. 10:11) Yehova naacuwela wiira ayo matakihero o khalayaayo anaahala unikavihera hiiva ukuluphuwa mmataphani anryaawe Sotwani ni hataa uhivuluwela thanku nhina ayo mataphaayo.

4. Isiyani inhala ukhumelela nakhalaka atthu owiicoona?

⁴ Sotwani naapheela cinene unoona niicoonaka venci cinene. Uyo naacuwela wiira nahiyaka ipahuwa yo wiicoona inihoolelaka muukumini wihu, hiiva ninaahala ukhala toko uyova ni uhaleela ukumi woohimala. (Miru. 16:18) Phimaana apostolu Paulu hohimyaca wiira ntthu ootepa wiicoona unawoopiha uhukhumwiya khampa cinhalaawe uhukhumwiya Sotwani. (1 Tim. 3:6, 7) Iyo itthwiiyo pooti umwiirannyeela khula ntthu wariihu, hataa ukhalaka wiira ninaapaceriha wiitthuca ikhweeli ca Nluku awula nihoviriha myaakha cinci ninswalelaka Yehova.

5. Khampa cinthoonyeraaya Eklesyaste 7:16, 20, ntthu nthoonyera cani wiicoona?

⁵ Wiicoona akhanle mananna o wiihooleliha. Sotwani nopheela wiira hiiva nihiye umwiiwelela Yehova, utepa yanikhumelelaka masakha. Wootakihera, nhotoko wootherihiya itthu ihipankileenyu? Awula nhotoko utafitiya pusya? Sotwani wanhala uncivela uwiiwani nyuuva mmootherihaka Yehova ni mayamunna upanka citthu cihipankilyaaya. Ciicammo, Sotwani nopheela nyuuva mpanke citthu cotheene toko cinoocivelaayani, kahi uttharihelela moolumo a Yehova.—Nsome Eklesyaste 7:16, 20.  *

6. Isiyani ineetthuceenyu niitthu yaawiirannyenle anuunweehu o Holanda?

⁶ Moone itthu iwiirannyenle anuunwiihu o Holanda. Ayo yaanaarusiya cinene yoonaka ilema co mayamunna o wanlokoni. Phimaana, yaholakela wanrimani uhivilela-tho. Ayo aneera: “Mi keecoonaka ukhala veekha ni akaakhitiri urukunusa nrimaaka. Mi kahowiirela awanuwaka wiira nithamele nloko nikiina.” Nuuwakatyaaya, ayo yahoona iporokaraama yo JW Broadcasting^® yo Março yo 2016. Iyo iporokaraameeyo yahoopela mwaha mananna oovilela ilema co mayamunneehu. Anuunwaaayo anawaakulela wuuluma yeeraka: “Kahocuwelela wiira kahaana kiiyevihaka. Uhiya  umananiha urukunusa makhalelo o mayamunneehu wanlokoni, miiva thi mi kaalamuliya urehererya makhalelwaaka. Iporokaraama yo Broadcasting ihokikavihera unttharihelela Yehova ni ucuwelaca wawe.” Nhoona itthu ineetthuceehu va? Narikarikiyaka, nihaana ninttharihelelaka Yehova. Munlepele wuukaviherani uwoona mayamunneenyu toko uyova cinwoonaawe. Nari wiirimu, Yehova nawoona uvonya wihu wotheene. Hataa ukhalaka commo, uyova naapheela unilevelela. Ni iyo phi itthu impheelaawe wiira nyuuva mpanke.—1 Jo. 4:20.

7. Isiyani yaamwiirannyenle mwene Usiya?

⁷ Nlattu wo wiicoona, mwene Usiya, o Yuta kheewelenle ikano ni ahopanka itthu yahaalamuliyaawe upanka. Mwene Usiya aari nlopwana oocuwelaca, caanaamweettela saana citthu cotheene caapankaawe—miteko ceenatoropa ni coolimalimaca. “Nluku eekhweeli aanampankiha uttitthima.” (2 Ikor. 26:3-7, 10) Masi Ibiiblya ineera co: “Vano ukhulupalyaawe waalipalyaaya, nrimaawe wahanca umuunuwa wiira eephwanyihe masakha.” Yehova ahohimya nankhalayiiru wiira anankuttho paahi phaalamuliya umpaka lumpani ntempulu. Masi mwene Usiya nlattu wo wiicoona, aheevahacera uvara uyo ntekooyo. Ahokela ntempuluni ni umpaha lumpani. Yehova ahorusiya venci cinene nuuyo nlopwana owiicoonooyo ni ahonttarusa nimakuttula. Mwene Usiya ahokhala nimakuttula mpaka waakhwilyaawe.—2 Ikor. 26:16-21.

8. Toko cineeraaya 1 Akorintu 4:6, 7, isiyani inhala unikavihera uhikhala atthu owiicoona?

⁸ Niireke wiicoona ikhanle itapha inhala univariha toko canvarihalyaaya mwene Usiya? Moone ntakihero na José. Uyo aari patarawu muulupale ni aahisimiya naatthu otheene. Uyo aanaataphulela myaha mmamithukumanoni cosirikwiitu ni mmakonkereesuni, ni hataa mootoli osirikwiitu aananlepelesaka ikano. Masi José neera: “Mi kankhuluvela cinene ucuwelaca waka ni myaakha cinci civinre kivaraka nnyo citthunnyo ni kahonhiya Yehova. Miiva keecoona ukhala ntthu oolipa, phimaana akeewelela ikano ca Yehova.” José ahovara matampi moolupale ni ahohakhiya wanlokoni. Uvira waya myaakha, uyo ahohokoleela wanlokoni. Ilelo, José neera: “Yehova hokiitthuciha wiira itthu yootepa ureera cinene khunakhala ureeya mirintti wanlokoni, masi upanka ile uyova innilepelaawe.” Khaninlamuliya uliyala wiira ucuwelaca urineehu ni itthuvo cirineehu, cotheene cinkhuma wa Yehova. (Nsome 1 Akorintu 4:6, 7. *) Nakhalaka atthu owiicoona, Yehova khanhala unilepela uvara miteko cawe.

9. Isiyani Sotwani ni Hawa yaapankilyaaya nlattu wokhwilu?

⁹ Noolumaka ikhwilu, ntthu nopacereehu umuupuwela khanle Sotwani. Uyo atthunaka ahaana miteko cinci cuulupale, ukhala wiira aari nlayikha na Yehova. Masi citthu caarinaawe Sotwani khacantosile ni aanaapheela-tho. Uyo aapheela itthu inomphwanela Yehova paasi: uswaleliya. Sotwani nopheela wiira hiiva otheene nikhale toko uyova. Phimaana, naamananiha unikhaliha atthu oohisukhurweela citthu cirineehu. Ikwaha yoopacera Sotwani yaavarenlyaawe nteko iyo itapheeyo waari ukati waamuulumannyaawe Hawa. Yehova ahonvaha Hawa naawannyawe icoolya cinci coociva. Ayo yaheereliya wiira “miri cotheene co wanlavani pooti ulya niiraati”—masi khayaalamuliya ulya nhokorokho wo mwiri mmoca paasi. (Upha. 2:16) Hataa ukhalaka commo, Sotwani ahokhitiri unkupaliha Hawa wiira ahaana alyaaka mwiri waakhottihiye. Hawa khacantosile ni khaasukhurwenle citthu caarinaawe; uyo ihaavo yaapheelaawe-tho. Ni hiiva ninaacuwela isiyani yaakhumelenle nlattu wo iyo. Hawa ahovara matampi ni nlattu wo iyo, ahokhwa.—Upha. 3:6, 19.

10. Isiyani yaapankilyaawe Davidi nlattu wookhalana ikhwilu?

¹⁰ Nlattu wokhwilu, mwene Davidi aholiyala citthu cotheene caavahiyaawe ni Yehova: mihakhu, ukhulupale ni utthema ikhotto cinci. Davidi ancuwela wiira citthu caavahiyaawe ni Yehova caari cinci mpaka ‘khaahala umaliha uttonka cotheene!’ (Isaa. 40:5) Masi wahoolo, Davidi aholiyala citthu cotheene caavahiyaawe ni Yehova. Uyo ahothoonyera uhintosa citthu caarinaawe ni ampheela-tho. Unookhalaru wiira Davidi ahaana asaarawe enci, uyo ahanca wanrimani wawe waapheela athiyana a nlopwana nkhwaawe. Ayo athiyanaayo yeehaniya Pate-Sepa ni awannyaya yeehaniya Uriyasi. Nlattu Davidi wooholelihera itthu yaapheelaawe, uyo ahomweettana uluva Pate-Sepa ni ahonrupaliha. Ni Davidi kheemelenle vaava. Uyo ahomwiiviiha Uriyasi, awannyaya ayo athiyanaayo! (2 Sam. 11:2-15) Isiyani yaamwiiriha Davidi upanka citthu cotheenennyo? Niireke uyo oopuwela wiira Yehova khoona citthu caapankaawe? Uyo aapankile nnyo citthunnyo nlattu wokhwilu ni nlattu woohoolelihera citthu cancivela wanrimani wawe. Ni nlattu woopanka cole, Davidi aheephwanyiha masakha menci. Masi wootteeliha nrima, Davidi ahaamini wiira ahottheka ni ahottharuwa. Davidi khweeliini ahosukhuru cinene nlattu wooleveleliya ni Yehova!—2 Sam. 12:7-13.

11. Toko cinhimiyaaya nhina Efesu 5:3, 4, isiyani inhala unikavihera uhikhala ntthu okhwilu?

¹¹ Ntakihero na mwene Davidi ninniitthuciha isiyani? Itthu imoca inhala unikavihera uhikhala atthu okhwilu ukhanle uhihiyerera usukhurweela citthu cotheene Yehova cinivahilyaawe.  (Nsome Efesu 5:3, 4. *) Nihaana nisukhurweelaka citthu cirineehu ni uhitotha upheela-tho. Nanceraka unsomiha ntthu Ibiiblya, hiiva ninankurumicaka wuupuwela khula nihuku iparakha imoca ivahiyaawe ni Yehova ni ulompa ansukhuruku Yehova nlattu wo iyo iparakheeyo. Uyo ntthuuyo apankaka commo khula nihuku, maanaaya wiira nhina wosumana imoca, uyo naahala ukhitiri ulompa asukhurweelaka citthu 7. (1 Atesal. 5:18) Nnoonela cani nyuuva ciicammo upanka iyo itthwiiyo? Wuupuwela citthu cotheene Yehova cinoopankelannyaawe, unaahala wuukaviherani ukhala ntthu oosukhuru. Mwakhalaka ntthu oosukhuru, nyuuva nnaahala utteeliya nrima nicitthu cirineehu. Ni mwakhalaka ootteeliya nicitthu cirineenyu, khannohala ukhala ntthu okhwilu.

12. Isiyani Judas Iscariotes yaapankilyaawe nlattu wokhwilu?

¹² Ikhwilu phi itthu yaamwiirihile Judas Iscariotes ukhala namakhuce. Wiipaceroni, uyo aari ntthu ooreera nrima. (Luka 6:13, 16) Hataa phimaana waathanliyaawe ni Yesu wiira akhale apostolu. Judas atthunaka aari nlopwana owiikurumica ni ookhuluvelya; phimaana waavahaceriyaawe uwacera nsurukhu. Uyo waari nsukhuru Yesu ni maapostolu waavarelaaya nteko wiira athumele citthu co waakavihera mapuro yaaviraaya yalalyeeraka. Pooti waneereehu wiira uyo nsurukhuuyo wanlikanaca ni micako ilelo cinvaheehu wiira nikavihere nteko woolalyeera ntuninyani motheene. Masi nuukatyaaya, Judas ahancera wiinnya ule nsurukhuule, hataa ukhalaka wiira ikwaha cinci ahomwiiwa Yesu eetthucihaka wiira ikhwilu woopiha. (Mark. 7:22, 23; Luka 11:39; 12:15) Judas khaaphenle wiiwelela iyo mena vakaani.

13. Ukatini woonannyaalyaaya ikhwilu ca Judas Iscariotes?

¹³ Ikhwilu ca Judas Iscariotes coonannyeele unaattamenle ukati Yesu waahalaawe wiiviya. Yesu, maapostolwaawe, Mariya wamoca ni mwaamunnawe eehaniya Marta yaholattuliya uwanuwawe nlopwana mmoca eehaniya Simawu, namakuttula. Ukati waalyaaya, Mariya ahonwa ni ahomwiitthela Yesu wanru makhura oonukhela ni onsurukhu mwinci. Judas ni maapostolu akiinaayo yahorusiya cinene. Maapostolu akiinaayo yoopuwela wiira ule unsurukhuule waalamuliya uvareliya nteko wuulalyeerani. Masi Judas Iscariotes oopuwela itthu ikhwaawe. Uyo “aari latarawu” ni aapheela winnya uyo nsurukhuuyo. Wahoolo, ikhwilu cawe cahomwiiriha untumiha Yesu niiperesu yaatumihiya ipottha.—Joau 12:2-6; Mat. 26:6-16; Luka 22:3-6.

14. Mananna munna mmoca naamwaarawe yeettenlyaaya ikano iri nhina Luka 16:13?

¹⁴ Yesu ahowuupusera attharyaawe ila ikhweeli yuulupaleela: “Nyuuva khannolamuliya ukhala wonkwaha mmoca ipottha ca Nluku ni ipottha co Mihakhu.” (Nsome Luka 16:13. *) Mpaka mahukwaala, iyo nanlelo ikhanle ikhweeli. Moone mananna munna mmoca naamwaarawe yeettenlyaaya ikano ya Yesu. Ayo yaholattuliya uviriha ukati yavaraka nteko ilapo ikiina yoothaciriya cinene. Ayo aneera: “Hi naanaalokihiya nsurukhu mwinci upanku, phimaana wiipaceroni nahoopuwela wiira uyo ntekooyo yaari iparakha ya Yehova.” Masi ihaavo itthu inlamuliyeehu wuupuwela: uyo ntekooyo wanhala waarikarikiha unswalela saana Yehova. Phimaana ayo yahosoma nkhayi mwaha uri nhina nrevistani Ukhalenla 15 yo Agosto yo 2008, uneera: “Munvaresese Nluku ninrima woohikawanihiya.” Uyo mwahooyo wahaakavihera ulakela upanka itthu yomaana. Ayo aneera: “Itthu yaahala unirweeha iyo ilapweeyo waari uvara nteko wiira niphwanye nsurukhu mwinci. Iyo yaahala uthoonyera wiira upatthaniihu ni Yehova khayaari itthu yaahoolelihereehu muukumini wihu. Hi nancuwela wiira ninarweele, upatthaniihu ni Yehova wanhala uvolola.” Phimaana, ayo yaholakela ukhotte ule ntekoole. Isiyani  yaakhumelenle? Munnooyo ahokhitiri uphwanya nteko ilapo yaakhalaaya ni waari nteko waahalaawe upokhera nsurukhu wootosera wiira alive iteeni yaarinaaya upanku. Amwaarawe munnooyo aneera: “Ntata na Yehova khaninakhala nookhuvya wahinkhitiryaawe unikavihera.” Uyo munnooyo naamwaarawe anaakhala ootteeliya nlattu wonhoolelihera Yehova muukumini waya, kahi nsurukhu.

15. Nlattuni ninlamuliyeehu ukupali wiira ninaahala ukhitiri ukuluphuwa ntaphani ca Sotwani?

¹⁵ Vano wakhalaka wiira Sotwan hovarela nteko wiicoona awula ikhwilu wiira anivarihe khampa mataphaawe, niireke hiiva pooti ukuluphuwa? Iyee! Apostolu Paulu heera wiira ale avarihiye ni Sotwani pooti ukhitiri ukuluphuwa ntaphani cawe. (2 Tim. 2:26) Iyo phi itthu yankhumelenle mwene Davidi. Uyo khaakhottile ulakiya ni porofeeta Nataa, ahottharuwa ni ahoturuwela ukhalana upatthani womaana ni Yehova. Nhiliyale: Yehova phi muulupale unvikana Sotwani. Phimaana, natthunaka ukaviheriya ni Yehova, ninaahala ukhitiri unyema khula itapha Sotwani inhalaawe unipheelihera wiira nirawule.

16. Isiyani inhala unikavihera wiira itapha ca Sotwani cihinivarihe?

¹⁶ Yooreera cinene uvikana ukuluphuwa ntaphani ca Sotwani ukhanle uhivarihiya ni nnyo itaphannyo. Ni ninhala ukhitiri iyo nakaviheriyaka ni Nluku. Masi khaninlamuliya wiitthaala! Atthu apacenre khalayi unswalela Yehova pooti waakela wanrimani wiicoona ni ikhwilu. Phimaana, nkhanyerere unlepela Yehova khula nihuku wuukavihereni woona wakhala wiira citthu cinoopuweleenyu ni cinlakeleenyu upanka cineettiheriya naayo makhalelo oohinamaanaayo. (Isaa. 139:23, 24) Nhihiye cikelaka wanrimani winyu wiicoona ni ikhwiilu!

17. Isiyani inhala umwiirannyeela nlupatthiihu Sotwani?

¹⁷ Mpaka ilelo, cihovira myaakha cene Sotwani aalupatthaka apinaatamu. Masi woohipica, uyo naahala utthukiya ni wahoolo naahala utankanyiya. (Apoka. 20:1-3, 10) Khweeliini, ninaahala utteeliya cinene waphiyaka uyo ukatyuuyo. Nna va uhinaphiyaaya uyo ukatyuuyo, nhiitthaale wiira nhivarihiye ntaphani ca Sotwani. Mwiikurumice wiira wiicoona ni ikhwilu cihuukhaleni wanrimani. Nlakele ‘unkhotta Sotwani, ni uyo naahala wuutthawani.’—Tiya. 4:7.