CIPANDE CA KUSAMBILILAMO 24
Mungafuma Uku Viteyo Vyakwe Satana
‘Fumini ku citeyo cakwe Ciwa.’—2 TIM. 2:26, NWT.
LWIMBO NA. 36 Twasunga Sana Umwenzo Witu
VINO TUMASAMBILILAPO *
1. U mulandu ci uno tungakolanyizizya Satana kuli kalunga?
CINO kalunga akalondesya u kulema inyama nanti ukuikoma. Angaomvya inzila nanti imicenjelo ipusanepusane, wakwe imwi iyalumbulwa muli Baibo. (Yobo 18:8-10) Uzye kalunga akacita uli pakuti inyama ilemye muli vino watateya? Akaezya ukumanya ningo inyama. Uzye inyama iyo ikaya kwi? I vyani vino inyama iyo yatemwa? U mucenjelo ci uno angaomvya pakuti aileme? Satana waya kwati a kalunga wii. Akaezya ukutumanya ningo. Akalola kuno tukaya nu kumanya vino twatemwa. Lyene akaomvya umucenjelo uno akulola ukuti ungaomba pakuti atuleme. Nomba Baibo ikatunena ukuti, tungafumamo ndi cakuti twalemwa ni viteyo vyakwe Satana. Ikatunena na vino tungacita pakuti tutalemwa uku viteyo kwene vivyo.
Icilumba na ukaitemwe ali viteyo vino Satana akaomvya sana ukonona ucuza witu na Leza (Lolini palaglafu 2) *
2. I viteyo ci viili vino Satana akaomvya sana?
2 Iviteyo viili vino Satana akaomvya sana i cilumba alino na ukaitemwe. * Pa myaka iingi sana, Satana akaomvya iviteyo kwene vii. Waya kwati a kalema wa vyunyi aakaomvya inzila izipusanepusane pa kulema ivyunyi. (Masa. 91:3) Nomba tutalinzile ukulemwa ni viteyo vyakwe Satana. U mulandu ci? A pa mulandu wakuti Yeova watulanga viteyo vino Satana akaomvya.—2 Kol. 2:11.
Tungasambilila ku yantu aalembwa muli Baibo pali vino tungataluka uku viteyo vyakwe Ciwa (Lolini palaglafu 3) *
3. U mulandu ci uno Yeova walenzile ivyacitikile antu aali ni cilumba na ukaitemwe ukulembwa muli Baibo?
3 Inzila yonga ino Yeova akatusambilizizyamo vino caipa ukuya ni cilumba na ukaitemwe ukutukomelezya ukusambilila pali vino vyacitikile aomvi yakwe uku cisila. Tumalola vino Satana watunsile na antu aombile Yeova pa myaka iingi. Uzye cikupiliula ukuti tungafilwa ukukana itunko lya kuya ni cilumba na ukaitemwe? Awe foo. Yeova walenzile ivyayacitikile ukulembwa muli Baibo pakuti “viye vyakutusambilizya.” (1 Kol. 10:11) Wamanya ukuti tungasambililako kuli vino vyayacitikile, na cii cingalenga tukane nanti ukufuma uku viteyo vyakwe Ciwa.
UKUYA NI CILUMBA I CITEYO
Lolini palaglafu 4
4. I vyani vingatucitikila ndi cakuti tuli ni cilumba?
4 Satana akalonda ukuti twaya ni cilumba. Wamanya ukuti nga twaya ni cilumba, tungaya wakwe aliwe nupya tungapanya isyuko lya kuya nu umi wa manda pe. (Mapi. 16:18) Umutumwa Paulo watucelwile ukuti umuntu angaya ni cilumba “nu kupingulwa upinguzi uli umwi na Ciwa.” (1 Tim. 3:6, 7, NWT.) Ica musango uu cingatucitikila swensi kwene, nampo nga alino twatandike ukuombela Yeova nanti twamuombela pa myaka ingi.
5. Ukulingana na Kasambilizya 7:16, 20, uzye umuntu angaya uli ni cilumba?
5 Antu acilumba yakaya na ukaitemwe. Satana akalonda twaelenganya sana pali sweineco ukucila ukulaelenganya pali Yeova, sana sana nga twakwata intazi. Uzye yatala yamibepezyapo? Nanti uzye yatala yamifyengapo? Satana angatemwa musokele Yeova nanti aina na ya nkazi. Nupya Ciwa akalonda mwaelenganya ukuti inzila yonga sile ino mungamalilamo intazi iyo u kucita sile vino mukulonda kucila ukulalondela utunguluzi wakwe Yeova uwaya umwi Izwi Lyakwe.—Belengini Kasambilizya 7:16, 20.
6. I vyani vino mungasambilila kuli vino vyacitikile nkazi uwa ku Netherlands?
6 Elenganyini pali vino vyacitikile nkazi aakaikala uku Netherlands uwasosile sana pa viipe vino yauze yacitanga. Wapingwilepo ukuta ukuya pamwi na antu yayo nupya. Watiile: “Nafizilwe ukweleela aina na ya nkazi. Nanenyile ya wane ukuti tufwile ukukuukila uku cilongano cuze.” Lyene wizile atamba puloglamu ikayako cila mwezi pa mulabasa wa JW iya mu Maaci 2016. Puloglamu iya yalanzile pali vino mungacita ndi cakuti yamwi yamicitila ivintu iviipe. Nkazi walanzile nu kuti: “Naweni ukuti nalondekwanga ukuicefya nu kwelenganya pali vino naluvyanga ukucila ukulonda ukusenula aina na ya nkazi umu cilongano. Puloglamu ii yangazwa sana ukwika mano kuli Yeova nu kumanya ukuti wakwata amaka akutunena ivya kucita.” Uzye imulola icisinka icikulandwapo? Nga mwakwata intazi, mwatwalilila ukwelenganya pali Yeova. Mwamulenga ukuti amwazwa ukulalola yauze wakwe vino akayalola. Tata winu uwa kwi yulu akalola vino ya kaluvyanya nomba waitemwelwa ukuyelela. Akalonda ukuti namwe kwene mwaelela yauze.—1 Yoa. 4:20.
Lolini palaglafu 7
7. I vyani ivyacitikile Umwene Uziya?
7 Pa mulandu wakuti Umwene wa Ayuda Uziya wizile aya ni cilumba, wakanyile ukuvwa lino yamucelwile nu kucita vino atalinzile ukucita. Uziya wacisile ivintu ivingi ivisuma. Wacimvizye inkondo izingi, wakuuzile imisumba iingi, nupya wakweti ivyalo ivingi. “Leza wa cumi wamulenzile ukutunguluka.” (2 Mila. 26:3-7, 10, NWT.) Baibo ikalanda ukuti: “Lelo lino Uziya waya na maka wakwe cimwi, atandika kuvwa icilumba nga cico icamupulumwisye.” Mpiti Yeova wapeezile isunde lyakuti ya simapepo sile ayano yazumiliziwe ukoca ivinunkile api tempele. Nomba Umwene Uziya wacisile ivintu vino ataali nu kucita nupya waile umwi tempele nu koca ivinunkile. Yeova wasosile sana nu kumulwalika tembwe. Uziya wakweti tembwe ukufika na pa wanda wa kufwa kwakwe.—2 Mila. 26:16-21.
8. Uzye ukuvwila amazwi aya pali 1 Kolinto 4:6, 7 kungatwazwa uli ukukanaya ni cilumba?
8 Uzye tungaya ni cilumba nu kucita uluyembu wakwe vino Uziya wacisile? Elenganyini pali vino vyacitikile ya José. Yacitanga uculuzi nupya yali a eluda yano antu yacindike umu cilongano. Yalandanga malyasi pa maukongano nupya angalizi ya viputulwa yayanga kuli aliyo kuti yayapandeko mano. Yalanzile ukuti: “Nomba nataile amano yane na vino namanyile. Ntataile Yeova. Nelenganyanga ukuti nakweti amaka, fwandi ntakutikanga kuli vino Yeova wancelulanga.” Ya José yacisile uluyembu ulwipisye nupya yazinzilwe. Lino papisile imyaka izile iyaweziwa. Ndakai yakalanda ukuti: “Yeova wansambilizya ukuti icintu icicindame sana, asi kukwata icifulo, lelo u kucita vino watunena ukucita.” Lekini twaiusya ukuti vyonsi vino twamanya ni milimo yonsi ino twakwata umu cilongano vyafuma kuli Yeova. (Belengini 1 Kolinto 4:6, 7.) Ndi cakuti tuli ni cilumba Yeova atange atuomvye.
UKUYA NA UKAITEMWE I CITEYO
Lolini palaglafu 9
9. I vyani vino Satana na Eva yacisile pa mulandu na ukaitemwe?
9 Nga twelenganya pali ukaitemwe, tukaiusya vino Satana Ciwa wacisile. Vino wali umungeli wakwe Yeova, Satana afwile wakweti imilimo iingi isuma. Nomba walondesyanga ukukwata ivingi. Walondanga ukulapepwa wakwe vino Yeova wenga sile akapepwa. Satana akalonda tuye wakwe aliwe, fwandi akaezya na maka ukutulenga ukulondesya ivingi ukucila pali vino twakwata. Umuku wa kutandikilpo lino wacisile vii alino walanzile na Eva. Yeova wapeezile Eva na iya ivyakulya ivingi sana kuli kuti “iviseekwa vyaku miti yonsi yamu calo” ukufumyako sile onga. (Utan. 2:16) Lelo, Satana wabefile Eva nu kumulenga aelenganya ukuti walinzile ukulya nu ku muti uno yayalesizye. Eva atataizyanga pali vino wakweti, walondesyanga ukutwata na vyuze. Twamanya ivyacitike pa cisila. Eva wayembwike nupya umukuya kwa nsita wizile afwa.—Utan. 3:6, 19.
Lolini palaglafu 10
10. I vyani ivyacitike lino Davidi wizile aya na ukaitemwe?
10 Ukaitemwe walenzile ukuti Umwene Davidi ailile vyonsi vino Yeova wamupeezile, ivyuma, ucindami, na vino wacimvizye alwani yakwe aingi. Davidi wataizyanga nupya wamanyile ukuti ivintu vino Yeova wamucitiile vyali ivingi wakwe cimwi. (Masa. 40:5) Nomba pa nsita imwi, Davidi wilile vyonsi vino Yeova wamupeezile. Watiile ukuteeka umwenzo kuli vino wakweti nu kutandika ukulondesya ukukwata ivingi. Nanti cakuti Davidi wakweti aci aingi, watandike ukulonda ukuya pamwi nu mwanaci wino wakweti iya nanti cakuti Yeova watiile ukucita vivyo cali iciipe. Umwanaci wali a Batisyeba, na iya wali a Uliya umwina Hiti. Davidi wacisile ucende na Batisyeba nupya wizile akwata inda. Vino Davidi wacisile vyali iviipe, nomba wacisile na vyuze ivipisye, wapekanyizye ukuti Uliya yakamukome. (2 Sam. 11:2-15) I vyani vino Davidi welenginye? Uzye welenganyanga ukuti Yeova asikulola? Nanti icakuti Davidi waombiile Yeova pa myaka iingi, wizile aya na ukaitemwe na cii calenzile acuule sana. Pa cisila, Davidi wizile azumila ukuti wayembwike, nupya walapiile. Wataizye pali vino Yeova wamwelezile.—2 Sam. 12:7-13.
11. Ukulingana na Efeso 5:3, 4, i cani cingatwazwa ukukanaya na ukaitemwe?
11 I vyani vino tukusambilila kuli vino vyacitikile Davidi? Tukusambililako ukuti tungata ukuya na ukaitemwe ndi cakuti tukutaizya pali vino Yeova watupeela. (Belengini Efeso 5:3, 4.) Tulinzile ukuteeka umwenzo kuli vino twakwata. Lino tukusambilizya antu Baibo, tungayasambilizya ukwelenganya pa cintu cimwi icisuma cino Yeova wayapeela nu kulamutaizizyapo. Ndi cakuti umwi akucita vivyo cila wanda pa mulungu onga, alazana ukuti wapepela pa vintu 7 ivipusanepusane. (1 Tesa. 5:18) Uzye namwe mukacitako vii? Ndi cakuti mukwelenganya pali vyonsi vino Yeova wamucitila, mulaamutaizya. Nupya nga mukutaizya, mulaateka umwenzo kuli vino mukweti. Nga mukuteeka umwenzo kuli vino mukweti, mutalaya na ukaitemwe.
Lolini palaglafu 12
12. I vyani vino Yuda Iskalyoti wacisile pa mulandu wakuti wali na ukaitemwe?
12 Pa mulandu wakuti Yuda Iskalyoti wizile aya na ukaitemwe, wacisile ivintu iviipe nupya wafutwike Yesu. Nomba Yuda ataali umuntu mwipe lyonsi. (Luka 6:13, 16) Yesu wamusoolwile ukuya umutumwa. Yesu wataile Yuda pano uwalolekesyanga pa kambokosi ka mpiya. Yesu na atumwa yaomvyanga impiya zizi ukukalila vino yalondekwanga lino yakusimikila. Impiya zizi tungazikolanya uku musangulo wa mu nsi yonsi ndakai. Nomba lino papisile insita Yuda watandike ukwiya, nanti cakuti uvwanga kuno Yesu wacelulanga antu pa nsita izingi ukuti yatalinzile ukuya na ukaitemwe. (Mako 7:22, 23; Luka 11:39; 12:15) Yuda atuvwilile ukucelula kuu.
13. A lilaci lino Yuda walangilile ukuti wali na ukaitemwe?
13 Yuda walangilile ukuti wali na ukaitemwe ala kwasyala sile panono ukuti Yesu yamukome. Yesu na asambi yakwe, ukwikako sile na Maliya na kaci wakwe Mata, yaile umu kutandalila Simoni uwalwile tembwe. Lino yalyanga icakulya, Maliya wakatwike nu kwitulwila amafuta pa mutwe wakwe Yesu ali anunkile nupya amutengo sana. Yuda na asambi yauze yasosile sana. Asambi yauze yafwile yayuvwile ukuti ulupiya lulu nga lwaomviwe ukukwazwa alondekwanga uwazwilizyo. Nomba cico asi icalenzile ukuti Yuda asoke. Wali “umwivi,” nupya walondanga ukwiya impiya ukufuma mu kambokosi. Lino papisile insita, ukaitemwe walenzile Yuda akane Yesu pa mulandu ni mpiya.—Yoa. 12:2-6; Mate. 26:6-16; Luka 22:3-6.
14. Uzye atwalane yamwi yaomvizye uli ukusunda ukwaya pali Luka 16:13?
14 Yesu wiwisyeko alondezi yakwe icisinka cii icicindame: “Mutangaombela Leza ni vyuma.” (Belengini Luka 16:13.) Amazwi yaa yacili yakaomba. Lolini vino atwalane yamwi aku Romania yacisile vino Yesu walanzile. Yayanenyile ukulaomba incito iya pa nsita inono umu mpanga umwaya sana ulupiya. Yalanzile ukuti: “Twakweti inkongole izingi uku banki, fwandi pa kutandika twaweni ukuti incito ii wali u wila ukufuma kuli Yeova.” Nomba kwali intazi imwi. Ndi cakuti iyazumila incito iya, nga yakwatanga sile insita inono iya kuombela Yeova. Pa cisila ca kubelenga icipande cakuti “Mwatwalilila Ukuya na Ucisinka nu Mwenzo Onsi” icali umu Lupungu Lwa Mulinzi lwakwe Ogasiti 15, 2008 yapingwilepo ivyakucita. Yalanzile nu kuti: “Ndi cakuti twakuukiile uku mpanga yuze pakuti tukakwata impiya izingi, nga catutalile ukuombela Yeova, nupya nga twalangilile ukuti ucuza witu na Yeova utacindime umu umi witu. Twamanyile ukuti ucuza witu na Yeova ulononeka.” Fwandi yakanyile incito iya. I vyani ivyacitike? Ya iya yazanyile incito umu mpanga ya kumwao iyali nu kulenga yakwata vyonsi vino yalondekwanga. Aci yalanzile ukuti: “Yeova alatwalilila ukwazwa aomvi yakwe.” Atwalane yaa yaya ni nsansa pano yakolezya Yeova ukucila impiya.
MWATALUKA IVITEYO VYAKWE SATANA
15. U mulandu ci uno tungasininkizizya ukuti tungataluka uku viteyo vyonsi vyakwe Satana?
15 I vyani vino tulinzile ukucita ndi cakuti twalola ukuti itutandika ukuya ni cilumba nanti na ukaitemwe? Tungasenuka. Paulo walanzile ukuti yayo yano Ciwa walema “apuma” yangafuma umu citeyo cico. (2 Tim. 2:26) Vikwene ivyacitikile Davidi, uvwilile lino Natani wamusunzile, walapiile nu kuta ukuya na ukaitemwe, nupya wazifizye na ucuza wakwe na Yeova. Mutailila ukuti Yeova wakwatisya amaka ukucila Satana. Fwandi nga twazumila ukwazwa kwakwe Yeova, tulataluka uku viteyo vyonsi vyakwe Ciwa.
16. I cani icilatwazwa ukutaluka uku viteyo vyakwe Satana?
16 Kwene, cingazipisya sile ukukanaya ni cilumba nanti na ukaitemwe. Tungacita sile vivyo ndi cakuti Leza watwazwa. Nomba tutalinzile ukulaenganya ukuti twakoma tutange tuye ni cilumba nanti na ukaitemwe. Nanti sile antu aombela Yeova pa myaka iingi yakaya ni cilumba nanti na ukaitemwe. Fwandi mwapepa kuli Yeova cila wanda pakuti amwazwa ukuiceceta amelenganyo inu ni vicitwa vinu. (Masa. 139:23, 24) Mwaezya na maka pakuti mutaya ni cilumba nanti na ukaitemwe.
17. I vyani vino vyasya vice vicitikile umulwani witu Ciwa?
17 Pa myaka iingi sana, Satana waya kwati a kalunga. Nomba likwene sile alanyepwa nupya alononwa. (Kuso. 20:1-3, 10) Tukalondesya sana ukuti insita iyo ikafike. Lino insita iyo itatala yafika, tulinzile ukuya acenjele uku viteyo vyakwe Satana. Mwaombesya pakuti mutaya ni cilumba nanti na ukaitemwe. Lyonsi “mwakana Ciwa, nawe alutuka ukufuma kuli mwemwe”—Yako. 4:7.
LWIMBO NA. 127 Vino Ndinzile Ukuya
^ pala. 5 Satana waya kwati a kalunga wa nyama uwamanyikisya ukukoma inyama. Akaezya ukututuunka asi mulandu ni myaka ino twaombela Yeova. Mu cipande cii, tumasambilila pali vino Satana aakaomvya icilumba na ukaitemwe ukonona ucuza witu na Leza. Tumasambilila na pali vino yamwi izile iyaya ni cilumba na ukaitemwe, nupya tumalola vino tungataluka uku miyele kwene ii.
^ pala. 2 MAZWI AATIYALONDOLOLWA: Mu cipande cii tumalanda sana pa cilumba, kuli kuti ukuilola ukuti mwacila yauze, na pali ukaitemwe, kuli kuti ukulondesya ukukwata impiya, utunguluzi, ukuya na ukaitemwa pa kupanga icupo, nanti ivintu vyuze.
^ pala. 53 ULONDOLOZI WA CIKOPE: Mwina walanga ukuti ali ni cilumba lino wakana vino ya kumusunda. Nkazi ali ni vintu ivingi akulondesya ukukwata na vyuze.
^ pala. 55 ULONDOLOZI WA CIKOPE: Nanti sile umungeli wizile aya ni cilumba, nupya vikwene avino nu Mwene Uziya wizile aya ni cilumba. Ukaitemwe walenzile Eva ukulya uku cimuti cino yayalesizye, Davidi ukucita ucende na Batisyeba, na Yuda ukwiya impiya.
