1. Mwahaya bwaddi nigamuliganiha Saddana ni namasaya?

NAMASAYA asayaga ohukanna yoluba — omwihidda mwanenyama aamagiliye obe ompa. Wihina erena ndo oliye onolabihedha murako dhohiyana-iyana, ninga mukwaye Jo mmodha ohuroromeleya awogiliye. (Jó 18:8-10) Namasaya anera ddi wihina amutotele mwanenyama vamurakoni vaye? Oliye anarajhiha omweddelela mwanenyama ole. Onona muleka munaviresiye, dhithu anajhiye, ni ethu baani yamukavihere omuhidda mwanenyama ole. Saddana ali ninga namasaya yola, oliye anoneddelela. Emodhave, oliye anarajhiha onona muneddihu ni dhithu dhinanidhivela. Vano amala onona, onoreya murakwaye wihina animage morurumusa. Podive dhigarive ndo, Bibliya ononroromeliha wi, naari nimagiwe ni murako mmodha wa Saddana iyo podi oxituwa. Ohiya eyo, oliye ononihudhiha makalelo orabela murako ndha.

2. Murako baani minli dha Saddana dhihinavonyiha?

² Saddana ohukanna murako minli dhihinavonyiha: withukula ni nrima. * Obajha kale Saddana anolabihedha dhikalelo ndha dhabure. Saddana ari ninga muthu anabanda balame, anatota wihina dhamorele volimboni vaye. (Sal. 91:3) Mbwenye iyo kanahowela omagiwa ni Saddana. Mwaha waddi? Mwaha wi Yehova ohuwoga makalelo Saddana anareyiye murako ndha. — 2 Cor. 2:11.

3. Mwahaya bwaddi Yehova adhe apwehege dhotajhiha dhipadduwile mBibliyani?

³ Yehova ononihudhiha makalelo ohimorela mmurakoni mwawithukula obe mwanrima. Makalelo mamodha ananihudhihiye fulabihedha dhotajhiha dhipadduwile. Muwari mwa yohudhera ela nnere woona dhotajhiha dhimodha. We onere  wonelamo wi Saddana ohuwedha wamaga athu yamulabela Yehova yaka dhowinjhivadhene. Eyo enatonyihedha wi iyo kanande ogonjhiha murako ndha? Kahi yeyo. Yehova ohupweha dhopadduwa ndha mBibliyani wihina dhinikavihere ohumorela mmurakoni muna wi ‘dhinaddele iyo’. (1 Cor. 10:11) Oliye ohunona wi dhopadduwa ndha podi onikavihera oxituwa obe newene ohumorelamo mmurakoni mwa Ddiyabo.

4. Nakala athu owithukula enanipadduwele ddi?

⁴ Saddana anafuna wi nikanne withukula wabure. Oliye ohunona wihina nagonjhihiwa ni withukula, nnere okala ninga oliye ni nnere oyelela ofuru wokanna egumi yohimala. (Pro. 16:18) Bumwahaya murumiwi Pawulo adhe asorihege wi withukula ethu yowopiha, ohiya eyo podi omuthukulela muthu ‘otorihiwa ninga makalelo atorihiwe Ddiyabo’. (1 Tim. 3:6, 7) Eyo podi ompadduwela muthu di muthu, naari akala niromile omulabela Yehova kale obe ovanene.

5. Mowiwanana ni Eclesiastes 7:16, 20, muthu onihe avi wi onowithukula?

⁵ Withukula ekalelo yowidhivela muthu yeka. Saddana onowaaja makalelo wihina nidhivelege yekihu. Oliye anafuna wi iyo nithuwathuwelege yekihu ohiya omuthuwathuwela Yehova, thabwathabwa naafwanyiwaga makathamiho. Motajhiha, onorajhihaga winkedhiwa ethu waheriliwena? Obe oheddihiwa ni makalelo ohogowa? Saddana ere ohagalala ahuwoone omwinkedhaga Yehova obe wawinkedhaga addibila. Ddiyabo anafuna we woonege wi kawo makalelo mamodha omariha muladdu ola yahili omaruwela wekawo ohiya ohara dholaga Yehova apwehiliye mBibliyani.— Omwileri Eclesiastes 7:16, 20.

6. Yopadduwa ya murogola anakala elabo yoHolanda yuhudhihe ddi?

⁶ Osugwe epadduwe ni murogola anakala elabo yo Holanda. Oliye ahinyanyuwa mwaha dhoviriganiha dha addibila ammulogoni. Vano oliye othoma wi ginafuna gisasanyedhe meeka. Oliye onosoriha egi: “Miyo giwoona ninga gili meeka ni kaganda osaddula  mubuwelo waaga. Miyo owoga nimamunaga wihina ntamele mulogo mmodha.” Ehinatame, oliye omwasistir porogarama a Broadcasting^® a Março a 2016. Va porogaramani vale oliye ohudhera monelo wapama wovilelana dhoviriganiha dha addibila. Murogola ole onosoriha egi: “Miyo wonelamo wi gohowela okala owiyeviha, ohiya osayelaga makalelo osaddula mubuwelo waddibila ammulogoni, yohoweleya gikanne monelo wapama ni dhoviriganiha dhaaga. Porogarama ola a Broadcasting ogikavihera weka mburo wobajha onamathonga wa Yehova.” Muhona ethu baani nnafunihu ohudhera ni yopadduwa ela? Wafwanyiwaga makathamiho, ompwehe Yehova mburo wobajha. Omulobe wihina wawoonege addibila ninga oliye anawoneliye. Naarive oliye agali odhulu, onowoona dhoviriganiha dhaathu atene; podive dhigarive ndo oliye onoolevelela. Oliye anafuna wi we werena emodhave.— 1 João 4:20.

7. Mwene Uziya yampadduwele ddi?

⁷ Mwaha wowithukula, mwene Uziya ooJuda ahifiyedha werana ethu ahaniyena ofuru, mwaha ohifuna ovuruwana dhoolaga. Uziya ali muthu athotho. Oliye ahinona pamadhene owana koddo, omaga nyumba ni olima. ‘Mulugu eebaribari oomureeliha’. (2 Cró. 26:3-7, 10) Mbwenye Bibliya onihina: ‘Vano omwenaye nuwunnuwa, oliye wambela withukula, wula erega witotela makathamiho.’ Yehova avahaga malamulo ahiwoga wihina anamakutha baahi binna oneti wopaha insensu mutempulu. Oliye ahikanna empereza ni aali namaholela mulogo arihiwa ni addibila Mbwenye mwene Uziya obuwelaga wi nuliyeya ahikanna oneti ole, oliye ovolowa mutempulu ni opaha insensu. Yehova otakaleliwa vanlubale ofiyedha onvaha maranya. Uziya ofiyedha okwa abulelagana oredda wa maranya. — 2 Cró. 26:16-21.

8. Mowiwanana ni 1 Coríntios 4:6, 7, enaanikavihere ohukala athu owithukula ddi?

⁸ Withukula podi okala murako mwigumini mwehu ninga yereye ni mwene Uziya? Kasugwa yampadduwele Juze. Oliye ahikanna empereza ni aali namaholela mulogo arihiwa ni naathu atene. Ni owoga mwaha dha vathaddo vamusonkanoni wa malabo mararu ni wa nlabo nimodha, teto malabo mamodha nameeddela mulogo onveda wihina anvahe dholaga. Mbwenye Juze onosoriha egi: “Miyo gothabwa ororomela thotho dhaaga ni  dhithu ganonilimi. Miyo omusukuma Yehova. Miyo gubuwela wi athabwile okanna thotho dimiyo, bumwahaya kagavuruwana dholaga dha Yehova.” Juze werana yothega yunlubale ofiyera otxosiwa. Nuuvira yakadhene, oliye owelihedhiwa mmulogoni. Peeno Juze onowonelamo wihina: “Yehova kanahowela ovuwa wa muthu, mbwenye werana ele ananilobiye.” Nihidduwale wi thotho dhehu dhatedhene ni mutholo ninnihuna mmulogoni nvaho wa Yehova. (Omwileri 1 Coríntios 4:6, 7.) Nakala owithukula, newene Yehova kanadha anilabihedha.

9. Nrima nahimuthukulela Saddana ni Eva wera ddi?

⁹ Nawogaga wodhela nrima, podi wera muthu nnamubuwelihu di Saddana, Ddiyabo. Podi wera oliye ahikanna mutholo dhowinjhivadhene dhathima. Eyo nihinona mwaha oliye aali mungero a Yehova. Mbwenye Saddana ofunave. Ethu afunesiye waali webedhiwa naarive aganonne wihina anafwanelela webedhiwa di Yehova. Saddana anafuna wi nikale ninga oliye, bumwahaya aganitujelaga ni mubuwelo wihina dhithu ninnihuna kadhinaakwana. Dila yobajha Saddana olabihedha mubuwelo ola bumudhidhi yole athapanyiliye ni Eva. Yehova ahinvaha Eva ni mamune dhoojha dhowinjhiva ni dhodhiva. Aliwa yahivahiwa ofuru woojha dhowima ‘dhatedhene dha mujardi’ — mbwenye yaakoddihiwe dhowima dhamuthanko mmodha. (Gén. 2:16) Podive dhigarive ndo, Saddana omutuja, Eva wihina ajhe dhowima dha muthanko ole yakoddihiwiwa. Eva kavahile thima ndhe avahiwiye; oliye ofunave. Iyo kananganyedha yapadduwile osogolowa. Eva ojha yowima ele vasogolova okwa. — Gén. 3:6, 19.

10. Mwene Davidi ahile addi nrima omugonjhiha?

¹⁰ Mwaha wa nrima, mwene Davidi oddiwala dhithu dhatedhene anvahile Yehova: orela, ovuwa teto makalelo aagonjhihiye mukoddoni. Davidi ahinona wi nvaho dha Mulugu ‘dhahithabwa winjhiva wihina asorihege’ teto oliye ootamalela! (Sal. 40:5) Mbwenye mudhidhi mmodha, Davidi oddiwala ndhe akenliye wa Yehova. Nvaho ndhe kadhamwakwana; ofunave dhimodha. Podi aganna ahiyana owinjhiva, Davidi wambela omukalela nrima muhiyana a mwinnya. Muhiyanaya ali Bate-Seba teto mulobwanaya ali Uriya, muEtita. Mwaha wa nrima, Davidi omugoniha Bate-Seba oliye okanna  wari. Ninga Bibliyani anawogiye numugoniha mwadha mwinnya, Davidi waaja makalelo wihina mamuneya apiwe okoddoni! (2 Sam. 11:2-15) Davidi obuwela ddi? Oliye obuwela wi Yehova kanona ndhe eeriyena? Mudhaari ole oororomeleya ohiya nrima ni widhivela yeka omugonjhiha, mwaha wa yeyo witotela makathamiho manlubale. Mbwenye mudhidhi nuuvira Davidi othwaruwa ni oleveleliwa. Oliye ahihagalala mwaha oleveleliwa ni Yehova!— 2 Sam. 12:7-13.

11. Mowiwanana ni Efésios 5:3, 4, enaanikavihere ddi ohenya nrima onigonjhiha?

¹¹ Nnahudhera ddi ni yotajhiha ya mwene Davidi? Makalelo ohenya nrima onigonjhiha futamalela dhatedhene Yehova anivahiliye. (Omwileri Efésios 5:3, 4.) Nihagalalege ni dhithu anivahile Yehova. Namuhudhihaga muthu, iyo nnomukongomedha namahudherihu wihina ubuwele kadda labo dhithu anvahile Yehova, ni amutamalele mwaha wa dhithu dhendha Yehova anvahiliye. Namahudhera ole erana yeyo omagomihero wa sumana, oliye anere wanda otamalela dhithu tanu anvahile Yehova. (1 Tes. 5:18) Ononamo avi we werana emodhave? Wubuwela dhatedhene Yehova anuwereliye, winere wukavihera okala muthu otamalela. Wakala muthu otamalela, we onere ohagalala ni dhithu onniwena. We wahagalalaga ni dhithu onniwena, nrima kannadha nugonjhiha.

12. Nrima namuthukulele Judasi wera ddi?

¹² Nrima nahimuthukulela Judasi Iskariyoti omuguliha Yesu. Mbwenye omabajho oliye aali muthu apama. (Luc. 6:13, 16) Yesu amusakule wihina akale murumiwaye. Podi wera Judasi aali muthu ofwanelela ni ororomeleya, bumwahaya athomeliwiye osamalela korowa. Yesu ni anamaharaye yalabihedha korowa dhendha wihina yijhihena mmabasani ewa oolaleya. Korowa dhasamalelesa Judasi, peeno dhinoligana ni dhovelela dhehu nnerihuna wihina nikaviherena mabasa enapariwa elabo yatene. Mbwenye wahifiya mudhidhi, Judasi wambela wiiya korowa ndhe, naari amwiwaga Yesu dila dhowinjhivadhene awogaga wodhela woopiha wa nrima. (Mar. 7:22, 23; Luc. 11:39; 12:15) Judasi newene kaapwatha mubuwelo wa Yesu.

13. Mudhidhi baani Judasi onihiye wi muliba nrima?

¹³ Nrima na Judasi nahikumelela mudhidhi Yesu ahinathi okwa. Yesu ni anamaharaye, Mariya ni ddibile, Marta, yere withaniwa wihina edhowe vaade va Simawu, anna maranya. Mudhidhi ejhaga, Mariya ovenya wihina awithele makura vamuru va Yesu yakwa korowa dhowinjhiva. Judasi ni anamahara amodha aliwa onyanyuwa. Anamahara amodha yahikanna mubuwelo wi korowa ndhe nahalabihedhena mmabasani oolaleya. Mbwenye Judasi mubuwelo waye kuwaali oyene. Oliye “ali mbava” afuna iye korowa akoyiye. Mudhidhi nuuvira, mwaha wa nrima Judasi omuguliha Yesu ni korowa dhaguliwana mudhaari.— João 12:2-6; Mat. 26:6-16; Luc. 22:3-6.

14. Anamatelana ala evirihemo addi yolaga enafwanyeya va Lucas 16:13?

¹⁴ Yesu kakuwilena anamaharaye ebaribari enlubale: ‘Nyu kamukale adhaari a Mulugu ni adhaari a dhoorela.’ (Omwileri Lucas 16:13.) Ebaribari ela kisadduwile peeno. Kasugwa yotajhiha ya anamatelana oRomeniya yavirihiwamo yolaga ela ya Yesu. Aliwa yahithaniwa wihina edhowe elabo emodha yoreela wihina yalabe mudhidhi vang’no aliwa enosoriha yegi: “Iyo nahikanna mangawu manlubale obanko, omambelelo iyo wonaga wi mabasa ala mareeliho a Yehova.” Mbwenye wahikalavo muladdu, mabasa ala yere ovunganyedha omwebedha wehu Yehova. Anamatelana ala omwileri A Sentinela a 15 a Agosto a 2008 ohudhera wawoga “Mantenha a lealdade com um  coração unificado.” Eyo yahakavihera othoma ethu yafuniwa werana. Anamatelana ala enosoriha yegi: “Efunelo yehu yolaba elabo emodha yaakale okanna korowa dhowinjhiva, eyo yere otonyihedha wihina omulabela wehu Yehova kuwaali mburo wobajha. Iyo nahikanna ebaribari wi omulabela wehu Yehova were ovunganyedheya.” Vano aliwa okoodda nvaho ole. Yapadduwile ddi? Mamune ofwanya mabasa yavaha korowa yahoweliwa. Muhiyana onosoriha egi: ‘Nlada na Yehova kathabwile okwiiva.’ Anamatelana ale enohagalala mwaha omusakula Yehova ohiya olabela korowa.

15. Mwaha bwaddi nikanna ebaribari wi enowedheya oxituwa namagiwa ni murako wa Saddana?

¹⁵ Ki nona wi nihimorela mmurakoni mowithukula ni mwanrima nere ddi? Iyo podi oxituwamo! Pawulo ohuwoga egi: ‘enere woobowa mmurakoni mwa Ddiyabo.’ (2 Tim. 2:26) Siyeyo yapadduwile ni Davidi. Osumululiwa ni Natani, oliye othwaruwa mwaha wa nrima anniyena ni ohogolowela wandana anniyena ni Yehova. Kuddiwale: Yehova ohukanna kopolo omukwaranya Saddana. Narumedha nikavihero na Yehova, kavo murako anareye Saddana ononimaga nihiwedha oxituwamo.

16. Ethu baani enaanikavihere ohumorela mmurakoni mwa Saddana?

¹⁶ Ethu yathimaya ohiya waabiha omagiwa namala iyo oxituwamo mmurakoni mwa Saddana, yapamaya yakale ohumorelamowene. Nnande ohumorela mmurakoni muna nakanna nikavihero na Mulugu. Mbwenye kanaakune mada! Mwaha bowi athu yambele omulabela Yehova kale yahimorela mmurakoni muna mowithukula ni mwanrima. Bumwahaya, malabo amatene omulobege Yehova wihina ukavihere woona akala dhowera dhawo ni dhowubuwela dhawo dhinovoloweliwa ni dhikalelo ndha dhabure. (Sal. 139:23, 24) Kuhiye wihina omorele mmurakoni muna mowithukula ni mwanrima!

17. Ethu baani enaapadduwele mwiddanihu, Ddiyabo?

¹⁷ Dhinovira yaka dhowinjhivadhene Saddana agali ninga namasaya. Mbwenye mohilegela, oliye dinamagiwe vano apiwe. (Apo. 20:1-3, 10) Nnoluba ofiya nlabo nna. Mbwenye ofiyedha nlabo nna ofiya, wikome wihina ohumorele mmurakoni mwa Saddana. Wilibihedhe wihina withukula obe nrima nnadha nuugonjhihe. Wikome wihina ‘omukake Saddana, oliye onere wuthawa.’ — Tia. 4:7.