1. Tae-i ǃaroma da ǁgâuaba ǃau-aob ǀkha a ǀgopeǀnō ǁkhā?

ǃAU-AOB ge ǀgui ǃaromas ǀguisa ūhâ. ǁNās ge îb xamari-e ǃkhō tamas ka io ǃkham. ǁÎb ge ǂgui ǃnûide a sîsenū ǁkhā. Jobi di ama tama ǀhōsagu hîna ge ǁîba gere ǁgaeǂgaogu khami. (Job. 18:8-10) Matib ǃau-aoba ǃnûide a sîsenū ǁkhā, îb xamanina ǃkhō? ǁÎb ge xamanina ǀgūse ra kō. Mapa i ra ī? Tae-i xa i a ǃgâibahes? Mā ǃgâi ǃnûisa a sîsenūhe ǁkhā? ǁGâuab ge ǁnā ǃau-aob khami i. ǁÎb ge sida xa ra ǁkhāǁkhāsen. ǁÎb ge ra mû mapa da ra isa. Tsî tae-i xa da a ǃgâibahesa. Tsîb ge ǁîba ǃnûide ra sîsenū îb ǀūǃgâse da hâ hîna ǃkhō da. Xawe Elobmîs ge ra mîba da. ǁNā ǃnûidi xa da ga ǃkhōhe xawes tsîna da ge a ǃnora ǁkhā. Tsî ra ǁkhāǁkhā da mati da ǁnā ǃnûide hoase a ǁkhae ǁkhāsa.

2. Mā ǀgam ǃnûi rab ǁGâuaba ra sîsenū?

² ǀGam ǀgaisa ǃnûi ra hînab ǁGâuaba ra sîsenū ra ge. ǀGapiǂâixasib  tsî xūǃgunuxasib tsîna. * ǁGâuab ge nē ǀgam xūna ǀoadisi kurina sîsenū hâ. ǁÎb ge ani ǃkhō-ao i khami i hîna ra ǃnûide mâiba îb ǁîna ǃkhō. (Psa. 91:3) ǂKhabasa tama i ge hâ ǁgâuab xa ǃkhōhesa. Tae-i ǃaroma? Jehovab ge ǁGâuab ra sîsenū. ǃNûide ǁgau da hâ khoenab ra ǃkhō-ū de.—2Kor. 2:11.

3. Tae-i ǃaromab ge Jehovaba nē ǁnamade Elobmîs ǃnâ ge xoamâi kai?

³ ǀGui ǀgaub hîna Jehovaba ǀgapiǂâixasib tsî xūǃgunuxasib xa ra ǁkhāǁkhā dab ge .Îda ǀnai ge hâ i Xristeǁîn di dīsade xu ǁkhāǁkhāsen. Mû da ge nî matib ge ǁGâuaba. Jehovaba ge ǂgui kurina ǃoaba hâ i khoena a ǃnûi ǀgausa. Os nēsa ra ǂâibasen sida a ǀgapiǂâixa tsî xūǃgunuxa ǁoa di? Hî î. Jehovab ge nē aiǁgaude ǁîb di mîs ǃnâ ge xoamâi sida ‘ǁnamas’ ǃaroma. (1Kor. 10:11) ǁÎb ge ǂan sida nē aiǁgaude xu nî  ǁkhāǁkhāsensa. Îda ǁnāpaxu ǂan mati da ǁGâuab di ǃnûide xu nî ǃnorasa.

4. Tae-e sida ǀkha a īǁkha ǀgapiǂâixa da ga o?

⁴ ǁGâuaba ge ra ǂhâba îda ǀgapiǂâixa ǀgauba ūhâ. ǁÎb ge a ǂan ǀgapiǂâixa da ga o. O da ǁîb khami nî isa. Tsî da ge ǀamose ûi tidesa. (ǂKhm. 16:18) ǁNā-amagab ge apostel Pauluba ǁnama tsî ge mî. ‘Îda tā khūkhūsen. Tsî tā ǁgâuab di ǀgoraǃgâs ǃnâ ǁnā.’ (1Tim. 3:6, 7) ǁNā î ge mā khoe-i hoa-i ǀkha a īǁkhā. Nēsi da ga ǀasase amab ǃnâ hâs. Tamas ka io Jehovaba ǂgui kurina ǃoaba xawes tsîna.

5. Aoǁnâ-aob 7:16, 20 ǃnâ ra ǂoaxa khami, i mati khoe-e ǀgapiǂâixasiba a ǁgau ǁkhā?

⁵ ǀGapiǂâixa khoen ge ǁîn xa ǀgui ra ǂâi. ǁGâuab ge ra ǂhâba îda ǀguriǂâixa. Tsî ǁnās ǀkha sida ai ǀgui ǂâisa ǂnûi. Tsî Jehovab ais ose. Tsî ǃnāsase ǃgomsina da ga hōǃâ o. Aiǁgause khoe-e sado dī tama du hâ xū-i ai ge ǂkhari-am hâ i? Tamas ka io i ge khoe-e sado ǃgâi tama ǀgaub ǃnâ hâ-ū hâ i? ǁGâuab ge nî ǂkhî sadu ga Jehovab. Tamas ka io sadu di ǃgâsana ga ra ǂkhari-am o. Tsî ǁGâuab ge ra ǂhâba îdu ǂâi sadu ǃgomsina ǀamsa hō kais ǃaroma du. Aitsâma ǁnāsa nî dīsa. Tsî tā Jehovab ǁîb di mîs ǃnâ mā hâ daoǁgaude nî saosa.—Khomai re Aoǁnâ-aob 7:16, 20 sa.

6. Tae-e du Neterlandi ǃnâ hâ ǃgâsas di aiǁgausa xu ra ǁkhāǁkhāsen?

⁶ Kō re ǂansa ūhâ ǃgâsas hîna Neterlandi ǃnâ ra hâsa. ǁÎs ge nau khoen di dīsadi xa ge ǃgâibahe tama hâ i. ǁÎs ge ge mîǁgui is tā ǁkhawa ǁnāti i khoen ǀkha hâ. “ǀGuri tsâsen ta ge gere tsî ta ge ǁîna ge ǀûba ǁoa i.” Dis ge ra mî. “Ti aoba ta ge ge mîba îm ǀnî hâ ǀhaohâba ǃoa doe.” Tsîs ge ǁnāpaxu Maarti 2016ǁî kurib JW Broadcastingsa ge kō. ǁNā Broadcastings ǃnâ i ge ǀapemāna gere māhe. Mati da ǀoasa kurusa ūhâ tama khoen ǀkha nî hâ ǀgausa. ǃGâsas ge ra mî: “Tita ge ge mû amabes ǃnâ ta nî ǃgamǃgamsenxa sa. Tsî ta ti dīsana aitsâma nî mûsa.” Î ta tā ǃgâsan hîna ǀhaohâb ǃnâ hâna dawa ǂgao. Nē Broadcastings di  programmi ge ge hui te î ta Jehovab ai ǂâisa ǂnûi. Tsî ǁîb di ǂhanub ais tsîna.” ǁNāpa ra ǂoaxa ǂâisa hō i du ra? ǃGomsina du ga hōǃâ o, aiǃgû re Jehovab xa ǂâisa. ǀKhomma re Jehovaba îb hui du. Îdu ǁîb ra nau khoena mû khami mû. Sadu di ǀhomsi pab ge ǁîn di dīsade ra mû. Xaweb ge māsenxase ǁîna ra ǀûba. Tsîb ge ra ǂhâba îdu sadu tsîna ǁkhā xū-e dī.—1 Johaneb 4:20.

7. Tae-e Gao-aob Usiab ǀkha ge ī?

⁷ Gao-aob Usiab ge ǀgapiǂâixa i ǃkhais ǃaromab ge. ǁNāmadi hînab ge nau khoena xu gere hō de ge ūǃoa tama hâ i. Tsî ǁnās ǀkha mā-amhe tamab hâ xū-e ge dī. Usiab ge kaise ǂgui ǃgâi xūna ge dī. ǁÎb ge kaise ǂgui toroga ge dan hâ i. Tsî ǂgui ǃkhaide ge om hâ i. Tsîb ge ǁîb tsîna ǂgui ǃāde ge ūhâ i. “Elob ge ǁîba ge ǃgâiǃgâ kai.” (2Kro. 26:3-7, 10) “Tsî ǀgaib ge ǃnubaib ge ǂgaob âba ge ǀgapi, kāǁōs kōse.” Dis ge Elobmîsa ra mî. Jehovab ge ǀnai ge mî hâ i. Pristergu ǀguigu mā-amhe hâsa. Îgu ǀanǀanǁguibasa tempeli tawa mā. Gao-aob Usiab ge mā-amhe tamab hâ hîna tempeli ǃnâ ǂgâ tsî. ǀAnǀanǁguibasa mā-amhe tamab hâ hîna ge dī. Jehovab ge ge ǁaixa tsî ǁnā ǀgapiǂâixa khoeba. Khōb di ǀaeb ǀkha ge ǁkhara. Usiab ge ǁnā khōb di ǀaeb ǀkha. ǁÎb di ûib di ǀams kōse ge hâ.—2Kro. 26:16-21.

8. Matis 1 Korinteǁîn 4:6, 7 sa nî hui da îda tā ǀgapiǂâixa?

⁸ Sida tsîna ǀgapiǂâixa tsî Gao-aob Usiab khami a ǁore ǁkhā? José di ǀon hâ ǃgâsab di aiǁgausa kō re. ǁÎb ge kaise ge ǃgâi ǁamaxu ǃkhaib di ǂgaeǂgui-ao i. Hîna ge ǀhaohâb ǃûi-aob ase gere ǃoababa. ǁÎb ge ǂharis di ǀhaodi tsî ǀkharib di kai ǀhaodi tawa ǃhoade gere mā. Tsîgu ge ǃnarimâra mûǂam-aogu tsîna ǁîba ǃoa gere ī ǀapemādi ǃaroma. “Xawe ta ge tita ti ǂans ai ge ǂgomaiǂnûi hâ i.” Dib ge ra mî. “Tsî ta ge Jehovab ai ge ǂgomaiǂûi tama hâ i. ǀGaisa ta a di ta ge ge ǂâi hâ i. Tsî ta ge Jehovab di ǁnāmadi. Tsî ǀapemādi tsîna ge ǃgâ tama hâ i.” Josi ge ǁgai ǁoreba dī tsî ge ǂnûiǂuihe. Tsîb ge ǁnāpaxu kurin khaoǃgâ ge oaǀkhī. ǁÎb ge nēsisa ra mî: “Jehovab ge kaise ǂhâǂhâsa xū-e ge ǁkhāǁkhā te. ǁNās ge ǂgai ǀon-e ūhâ tamasa. Xawe ǂhâǂhâsa i ge îda Jehovab ra mîba da e dī.” Ada ǂâihō re ǂans hîna da ūhâs. Tsî aiǂhanugu hîna da ǀhaohâb ǃnâ ra. ǃKhōǃoagu ge Jehovaba xu ra ǀkhī. (Khomai re 1 Korinteǁîn 4:6, 7 sa.) ǀGapiǂâixa da ga o. Ob ge Jehovaba sîsenū da tide.

9. Xūǃgunuxasiba ǁGâuab tsî Evas tsîna tae-e ge dī kai?

⁹ Xūǃgunuxasib xa da ga ǂâi o. O da ge ǁGaûab xa ra ǂâihō. Jehovab di ǀhomǃāb aseb ge ǀnîsi. ǁGaûaba kaise ǂgui ǃgâi aiǂhanuga ge ūhâ i. Xaweb ge ǁîba ǃnāsase gere ǂhâba. ǁÎb ge Jehovab ǀguib anū hâ ǃoabasa gere ǂhâba. ǁGaûab ge ra ǂhâba îda ǁîb khami i. Tsîb ge ra ǂhâba îda ǀnai da ūhâs xa ǃnāsase ǂhâba. ǂGuro ǃnās hînab ge nēsa dītsâs ge Evas ǀkhab ge ǃhoa o. Jehovab ge Evas tsî ǁîs di aob tsîna. ǂGui ǂûna ge mā hâ i î ra ǂû. “Mâ hai-i ǃhanab di-i hoa-i”xa ǂû xawe ǀguis ose. (Gen. 2:16) Xaweb ge ǁGâuaba Evasa ge kāxaǃnâ. Is ǂâi tsî ǁnā ǂkhāsa haisa xu ǂû. Evas ge ūs ge hâ i, i ǀkha ge ǂâu tama hâ i. Noxobas ge ǃnāsase gere ǂhâba. ǂAn da ge a tae-i ge sao rase a ī sa. Evas ge ǁoreb ǃnâ ge māǁnâsen tsî ǁnāpaxu ge ǁō.—Gen. 3:6, 19.

10. Tae-e ge i Gao-aob Davib ge xūǃgunuxa kai o?

¹⁰ Xūǃgunuxasib ge Gao-aob Daviba ge ǀūru kai. Jehovab ge ǁîba a mâ-e. ǃKhūsib, ǂguin xa ǂanhes tsî ǂgui dandi khākhoega xus. Xaweb ge ǁîb tsîna ǂanǃgâ tsî ge mî. Elob di ǀkhaeb ‘ǃhoab nîs ǂamai a ǂguisa.’ (Psa. 40:5) Xaweb ge ǀgui ǃnās ai ge ǀūru. Jehovab ge ǁîba mâ hâ i e. ǁÎb ge ūb ge hâ i xūn ǀkha ge ǂâu tama hâ i. Tsî ǁnās ǀkha ǃnāsase gere ǂhâba. Davib ge ǂgui tarade ūhâ i xaweb ge ǃgâi tama turaba. ǀNî hâ khoeb di khoesa ge omkhâiba ǁîb di ǂgaob ǃnâ. Nē taras di ǀons ge ge Batseba i. ǁÎs di aob di ǀons ge ge Uria i Hetiǁîba. Davib ge ǁîb xa ǀgui gere ǂâi. Tsî Batsebas ǀkha sorosise ge ǂharugu. Tsîs ge ǁîsa ge ǀgamǀā. Davib ge dī i ge kaise ge ǁgai i. Xaweb ge ǁnā i xa kaise kai xū-e ge dī. ǁNās ge Uriaba ǃkham kaisa. (2Sam. 11:2-15) Daviba tae-e gere ǂâi? ǁÎba ge ǂâi hâ i Jehovab mûbi tama hâ di? Davib ge Jehovaba ǂgomǂgomsase ǃoaba hâ i. Xaweb ge ge xūǃgunuxa tsoatsoa. Tsî nēs ge ǂgui ǃgomsina ge ǃaroma. Xaweb ge ega Daviba ǁîb di ǁorena ge ǁguiǁnâ tsî ge ǃhōbasen. ǁÎb ge kaise ge ǃgâiaǂgao hâ i Jehovab ge ǀûbabi o.—2Sam. 12:7-13.

11. Efeseǁîn 5:3, 4 ǃoagu i tae-e a hui da ǁkha îda xūǃgunuxasiba ǃkhamǃoa?

¹¹ Tae-e da Gao-aob Davib di aiǁgausa xu ra ǁkhāǁkhāsen? ǁKhāǁkhāsen da ge go xūǃgunuxasiba. Da a ǃkhamǃoa ǁkhā ǃkhaisa. Ganganxa da ga o Jehovab mâda hâ  xūn xa. (Khomai re Efeseǁîn 5:3, 4 sa.) ǂKhî ǂâixa da ge nî ūda hân ǀkha. Elobmîs ǁkhāǁkhāsa da ga khoe-i ǀkha ga ra tsoatsoa o. O da ge ǁnā khoe-e nî ǁkhāǁkhā i ǀgui ǃgâi xū-i Jehovab ǁîna dība hâ-i xa ǂâi. ǁNā khoe-i ga mā wekheb hoaba ǁnāsa dī o. Os ge ǁnāsa nî ǂâibasen. ǁÎ-i go hû ǃkharagagu xūn xa ǀgore hâ isa. (1Tes. 5:18) Sadu tsîna ǁnāti i xū-e ra dī? ǂÂiǃgâ du ga o ǂgui xūn hînab Jehovaba sado dība hân xa. Os ge ǁnāsa nî hui du îdu ganganxa. Tsîts ga ganganxa o, ots ge a ǂkhî. Tsî du ga ǂkhî o. O du ge xūǃgunuxasiba xu a ǃnora ǁkhā.

12. Tae-eb ge Judaba dī xūǃgunuxab ge i ǃkhais ǃaroma?

¹² Juda Iskariob ge a xūǃgunuxa tsoatsoa. Amagab ge ǁgai xū-e ge dī tsî Jesuba ge ǀapexu. Xawe Judab ge ǁnāti i ǁgai ǀgauba ge ūhâ tama hâ i, tsoatsoas ai. (Luk. 6:13, 16) Jesub ge ǁîba aposteli ase ge ǁhûiǂuibi. Judab ge amabes ǃnâ ǂgomǃgâhe ǁkha ge i khoeba. ǁNās ǃaromab ge marin ra hâǃnâ boksisa gere tani kaihe. Jesub tsî apostelgu tsîn ge ǁnā marisa. Aoǁnâ sîsen-i ǃnâ gu nî sîsenū xūna gere ǁama-ū. ǀNî mîdi ǃnâ da ge a mî ǁkhā. ǁNā marin ge nētsē da ǃhūbaib ǂhawase da ra mâ marin khami i isa. Xawe ǁaeroba ǃkharu tsîb ge Judaba ge ǃnâri tsoatsoa. ǂGui ǃnādeb ge Jesuba xu xūǃgunuxasib xa ǁnâu hâ i xawe. (Mrk. 7:22, 23; Luk. 11:39; 12:15) Judab ge ǁnā ǁnamadi ai ǂâisa ge ǂnûi tama hâ i.

13. Mā ǁaeb aib ge Judaba ǁgau ǁîb a xūǃgunuxa ǃkhaisa?

¹³ Judab matikōse xūǃgunuxa ǀgaub ge ge ǂoaxa. Jesub nî ǁōs aiǃâ. Jesub tsî ǁîb di ǁkhāǁkhāsabegu tsî Marias tsî ǁîs di ǃgâs Martas. Hân ge Simonni hîna ǀaesen hâb oms ai ge sari hâ i. Xawe ǂûn ra hînas ge Mariasa khâi tsî. Mâ tsî Jesub di danas ai ǃgâihamxūba ge a ǁkhō. Judab tsî ǀnî ǁkhāǁkhāsabegu tsîn ge kaise ge ǁaixa hâ i. Nau ǁkhāǁkhāsabegu ge ǀnîsi gere tsâ. Nē maris ga sîsenūhe hâsa. Î aoǁnâ sîsen-e ǂkhâǃnâhe. Xawe Judab ge ǀnî hâ xū-i ǃaroma ge ǁaixa hâ i. ǁÎb ge ge ‘ǃnari-ao-i’. Tsîb ge ǃnāsase ǁnā marin di boksisa xu gere ǂhâba. Tsî egab ge Judaba xūǃgunuxa i ǃkhais ǃaromab ge. Jesuba mari-eb ǀnam ǃkhais ǃaroma ge ǀapexu.—Jhn. 12:2-6; Mat. 26:6-16; Luk. 22:3-6.

14. Mati ra ge ǀnî ǃgamme hâ khoe ra Lukab 16:13 ǃnâ hâ mîde sîsenū?

¹⁴ Jesub ge hoaǁae ǁîb di saosabena ra ǂâiǂâiǃnâ. Nē ǂhâǂhâsa amab xa: “Elob tsî ǃkhūsib tsîkha du ge a ǃoaba ǁoa.” (Khomai re Lukab 16:13 sa.) Tsî ǁnās ge nētsēs tsîna noxoba a ama. Hāre da kō ǃgamme hâ khoera. Hîna Romaniab ǃnâ ra hâ ra ge. Mati Jesub di mîde a sîsenūsa. ǁÎra ge ǁaerob di sîsen-e ǀnî hâ ǃgâi ǃhūb ǃnâ ge a hō. “Banks aim ge kaise ǂgui mari-e ge surude hâ i. Mātare-oam nî-e. Tsîm ge ǁnā-amaga ǂgurose ge ǂâi. Nē sîsen-i a ǀkhae Jehovaba xu di.” Di ra ge ǁîra ra mî. Xawe i ge ǃgomsiba ge hâ i. ǁÎra ga ǁnā sîsen-e ga ra ūǃoa o. O ra ge ǀoro ǁaeba nî ūhâ Jehovaba ǃoabas ǃnâ. “ǂGomǂgomsase hâ re ǀguiǃnâxa ǂgaob ǀkha” di hâ The Watchtower ǂkhanib. Augustub 15, 2008ǁî kurib diba ra ge khomai. Toas khaoǃgâ ra ge mîǁguiba ge dī. ǁÎra ge ge mî: “Sim ga ǂgui mari-e hōs. Tsî ǀnî hâ ǃhūb ǃnâ si sîsens. Ai sim di ǂâisa ǂnûi hâ o. Om ge sim di ǀhōsagus Jehovab ǀkham ūhâsa. ǀGamǁîse ga mâi hâ sim ûib ǃnâ. Mûǂanam ge ge Jehovab ǀkham ūhâ ǀhōsagus nî ǃgomsiba ūhâsa.” Tsîm ge ǁnā sîsen-e ge ū tama hâ i. Xawe tae-e ge i? ǁÎs di aob ge hâ ra ra ǃhūb ǃnâ sîsen-e ge hō. Tsî ǁnās ge sim di ǂhâsiga gere hui. Taras ge ra mî: “Jehovab di ǃommi  ge tātsēs tsîna ǃnūbu tama hâ. ǁÎb ge hoaǁae ǁîb di ǃoaba-aona nî hui.” Nē ǃgamme hâ khoera ge kaise a ǂkhî. ǁÎra ge Jehovaba ǂgurose mâi. Tsî mari-e mâi tama hâ i ǃkhais ǃaroma.

15. Tae-i ǃaroma da ǂgomǃgâsiba ūhâ ǁGâuab di ǃnûide xu da a ǃnora ǁkhāsa?

¹⁵ Tae-e da a dī ǁkha ǀgapiǂâixa tsî da a xūǃgunuxasa da ga mû o? ǀKharaǀkharasen ǁkha da ge a. Paulub ge ge mî ‘ǁnān ǁGâuab xa ǃkhōhe.’ Hân noxoba ǁnā ǃnûide xu a ǃnora ǁkha ǃkhaisa. (2Tim. 2:26) Tsî ǁnā i ge Davib ǀkha ge i e. ǁÎb ge Natanna ge ǃgâ. ǁNama-eb ge o ǁîb di xūǃgunuxasib ǃaroma. Tsîb ge ǁîb di ǀhōsagusis Jehovab ǀkhab ge ūhâ isa ge ǀgaiǀgai ǁkhawa. Tā ǀūru re Jehovab ǁGâuab xa a ǀgaisa sa. O da ge hâ ga ǃnûi-i hoa-e xu a ǃnora ǁkha. ǁGâuab ra sida mâiba de.

16. Tae-e nî hui da îda ǁGâuab di ǃnûide xu ǁgaesen?

¹⁶ Kaise a ǂhâǂhâsas ge îda tā ǀgapiǂâixa tsî xūǃgunuxa ǂgao. ǁNāsa da ge Jehovab di huib ǀkha ǀgui a dīhō ǁkhā. Xawe da ge tā nî ǂâi sida kaise a ǀgaisa di. Tsî da tātsēs tsîna ǀgapiǂâixa tsî xūǃgunuxa tide di. ǃKharu ge ǁaeb ǃnâ ge Jehovaba gere ǃoaba khoen. Tsîn ge ge ǀgapiǂâixa tsî xūǃgunuxa kai. ǁNā-amaga tsēs hoasa Jehovaba ǃoa ǀgore re. Tsî ǁîba ǀkhomma re îb hui du. Îdu nē ǁgai ǂâiǀgauga sadu di ǂgaoga xu ūbe. (Psa. 139:23, 24) Sadu ǁkhāsib hoab ǀkha dītsâ re. Îdu tā ǀgapiǂâixa tsî xūǃgunuxa.

17. Tae-e sida mâǃoa-aob ǁGâuab ǀkha ǀgū ǁae nî i?

¹⁷ ǀOadisi kurigab ge ǁGâuab a ǃau-ao. Xaweb ge ǀgūǁae nî ǃkhōhe tsî ǁnāpaxu nî dīkakahe. (J.ǂHa. 20:1-3, 10) ǁNā tsēsa ǃoa da ge ra mûǂui. ǁNā ǁaeb kōse toxoba ǂanbasen re ǁGâuab di ǃnûide. ǁKhā du a ǀgaub hoab ai dītsâ re. Îdu tā ǀgapiǂâixa tsî xūǃgunuxa. Dītsâ re îdu ‘ǁGâuaba mâǃoa, ob ge nî bē xu du’—Jak. 4:7.