1. ¿Keyej Satanás kemej yeskia se tatokakej?

KEMAN se tatokakej kitemoua se tapial, kineki kimiktis oso kikitskis. Onkak miak taman tein uelis kitekitiltis, kemej seki tein moijtoua itech Biblia (Job 18:8-10). ¿Keniuj kimati keniuj uelis kikitskis se tapial? Achto kiita kanikauin nentinemi, toni kiuelita uan toni amo kimouilia. Satanás no ijkon kichiua. Kiita kani tinentinemij uan toni tikuelitaj. Ompa, kitekitiltia teisa tein ika kitemoua techuetsiltis kemej amo tikmattoskej. Maski ijkon, Biblia techiluia toni moneki tikchiuaskej tein techpaleuis maj Satanás amo techuetsilti, uan komo techuetsiltijya keniuj uelis tikcholuiskej.

2. ¿Toni ome taman tein kitekitiltia Satanás kinuetsiltiani miakej?

² Satanás miakej kinuetsiltiani ika nejin ome taman: kichiuani maj moueyimatikan oso maj kinejnekikan kipiaskej okachi. * Miak xiujmejya kitekitiltiani nejon. Satanás kemej yeskia se taltikpaknenkej akin kinkitskia totomej, akin kintalilia teisa tein kichiuas maj motokikan kampa uelis kinkitskis (Sal. 91:3). Sayoj ke amo moneki techkajkayauas, porin Jiova techmatiltijya keniuj kitemoua techuetsiltis (2 Cor. 2:11).

3. ¿Keyej Jiova kichiuak maj moijkuilouani itech Biblia ininneskayo seki itekitikauan akin moueyimatkej oso kinejnekkej kipiaskej okachi?

³ Jiova techpaleuia maj tikmatikan toni uelis panos komo peua timoueyimatij oso komo peua tiknejnekij tikpiaskej okachi ika tein kinpanouani seki itekitikauan. Itech nejin tamachtilis  ininka titajtoskej sekin, uan tikitaskej ke sekin akin Satanás kinuetsiltij miak xiujmejya kitekitilijtoyaj Jiova. Nejon amo kijtosneki ke tejuan amo uelis tikixtopeuaskej Satanás. Jiova kichiuak maj nejon neskayomej moijkuilouanij itech Biblia “para technejmachtis” (1 Cor. 10:11). Kimati ke ininneskayo nejon itekitikauan uelis techmachtis miak taman tein techpaleuis maj Satanás amo techuetsilti, oso komo techuetsiltijya maj ueli tikcholuikan.

4. ¿Toni uelis techpanos komo timoueyimatij?

⁴ Satanás kineki maj timoueyimatikan porin kimati ke komo timoueyimatij tiyeskij kemej yejua uan amo tinemiskejok nochipaya (Prov. 16:18). Yejua ika, tatitanil Pablo tanejmachtij ke komo se tokniuj moueyimati “Dios kitatsakuiltis, ijkon keme Dios kitatsakuiltij ya in amokuali Satanás” (1 Tim. 3:6, 7). Tinochin uelis peuas timoueyimatiskej maski uejkaujya tiktekitilijtokej Jiova oso yankuixtokok.

5. Kemej kijtoua Eclesiastés 7:16, 20, ¿toni kichiua akin moueyimati?

⁵ Akin moueyimati sayoj itech tanemilia uan sayoj kitayekanaltia itanejnekilis. Satanás kineki maj tiktayekanaltikan tein tejuan tiknekij uan amo tein Jiova kineki, okachiok keman tikpiaj kuejmolmej. Kemej neskayot, ¿kemansa techpantianij teisa tein amo tikchiujkej oso techchiuilianij teisa tein amo kuali? Satanás kiuelitaskia maj tikualanikan iuan Jiova oso iniuan tokniuan. Uan no, kineki maj tiknemilikan ke sayoj uelis tikyektaliskej nejon kuejmol komo tikchiuaj tein tejuan tiknemiliaj uan amo tein Jiova kijtoua itech iTajtol (xikonixtajtolti Eclesiastés 7:16, 20).

6. ¿Toni techmachtia tein kipanok se tokniuj siuat kayot Países Bajos?

⁶ Maj tikitakan tein kipanok se tokniuj siuat kayot Países Bajos akin semi kikualantiaya tein tokniuan amo kiyekchiuayaj. Hasta amo kinekiaok iniuan yetos. Yejua kijtoua: “Nikmachiliaya ke noselti nietoya uan amo uelia nikpataya kemej nikinitaya tokniuan. Yejua ika nikiluij nonamik maj tianij okse  nechikol”. Sayoj ke kiitak Broadcasting^® tein kisak metsti marzo xiuit 2016. Ompa motayolmajxitiaya toni techpaleuis maj amo tikitakan ininnepololuan oksekin. Tokniuj kijtoua: “Nikajsikamatik ke monekia yeski niyolyemanik uan amo niktemos nikinpatas tokniuan, ta ke monekia nikitas nejua nonepololuan. Broadcasting^® nechpaleuij maj niktayekanaltiani tein Jiova kineki uan maj nikitani ke yejuatsin kinamiki techiluis toni moneki tikchiuaskej”. Amo ouij tikajsikamatiskej toni moneki tikchiuaskej: keman tikpiaskej se ouijkayot maj amo tikelkauakan Jiova, ta maj tiktataujtikan maj techpaleui maj tikinitakan tokniuan kemej yejuatsin kinita. Maski toTajtsin Jiova kiita ininnepololuan kintapojpoluia, uan kineki maj tejuan no ijkon tikchiuakan (1 Juan 4:20).

7. ¿Toni kipanok tekiuaj Uzías?

⁷ Uzías, semej akin tekiuajtik Judá, moueyimatik uan yejua ika amo kikakik tein kiyolmajxitijkej uan kinekik kichiuas tein amo yejua kinamikia. Achto kichiujka miak taman tein kuali. Tatanik itech miak neteuilismej, kinchijchiuak miak xolalmej uan tatokak itech miak talmej. “Dios akin melauak kichiuak maj kuali kiyani” (2 Crón. 26:3-7, 10). Sayoj ke Biblia kijtoua ke “niman keman kipiak chikaualis, peuak moueyimati uan nejon kiualkuilij tein amo kuali”. Jiova kijtojka ke sayoj tiopixkamej ueliskia kichichinoskej kopal itech templo. Sayoj ke yejua nejon tein kinekik kichiuas Uzías. Yejua ika Jiova kichiuak maj kikuini lepra. Uzías kipiak lepra hasta keman momikilij (2 Crón. 26:16-21).

8. ¿Keniuj techpaleuia 1 Corintios 4:6, 7 maj amo timoueyimatikan?

⁸ Tejuan no uelis timoueyimatiskej kemej Uzías uan nejon uelis kichiuas maj titajtakolchiuakan. Maj tikitakan tein kipanok José, se tokniuj akin kipiaya se kuali tekit uan katka tayekankej itech nechikol akin tokniuan kuali ika tajtouayaj. Kitemakaya tanojnotsmej itech uejueyi nechikolmej uan tokniuan takalpanouanij kitajtaniayaj nepaleuil. Sayoj ke kijtoua: “Amo niktemouayaok inepaleuil Jiova. Kemej uejkaujya nikchiuaya tataman tekimej itech inechikol Jiova niknemiliaya ke nikmatiaya keniuj nikchiuas. Niknemiliaya ke amo teyi nechpanoskia, yejua ika amo nikakik tein Jiova tayolmajxitia”. Satepan José tajtakolchiuak uan kikalankixtijkej itech nechikol. Seki xiujmej achto oksepa mochiuak itaixpantijkauj  Jiova. José kijtoua: “Jiova nechmachtiani ke amo tayekantok tekit tein se kipia itech inechikol, ta maj se kichiua tein yejuatsin tanauatia”. Maj nochipa tikelnamikikan ke tein ueli tikchiuaj uan tekimej tein tikpiaj Jiova techmakatok (xikonixtajtolti 1 Corintios 4:6, 7). Komo timoueyimatij, Jiova amo techmakas tekimej.

9. ¿Toni kichiujkej Satanás uan Eva porin kinekiaj kipiaskej okachi?

⁹ Keman Satanás katka se iángel Jiova xa kipiaya uejueyi tekimej, sayoj ke kinekia kipias okachi. Kinekia maj yejua kiueyichiuakan maski sayoj Jiova kinamiki maj se kiueyichiua. Satanás kineki maj tikchiuakan kemej yejua, uan yejua ika kineki maj tiknejnekikan tikpiaskej okachi. Yekinika kitemoj kichiuas nejon iuan Eva. Ika netasojtalis, Jiova kikaujka maj Eva uan inamik kikuanij nochi koujtakilomej tein onkayaj itech xochital, sayoj se kinnauatij maj amo kikuanij (Gén. 2:16). Sayoj ke Satanás kikajkayauak Eva uan kichiuak maj kinemili ke monekia kikuas nejon koujtakilot. Eva amo kitasojkamatik tein kipiaya, ta kinekia okachi. Uan tikmatij toni panok: tajtakoj uan satepan momikilij (Gén. 3:6, 19).

10. ¿Toni kichiuak David keman kinejnekik kipias okachi?

¹⁰ Maj tikitakan tein kichiuak tekiuaj David. Jiova kimakaka miak taman, kemej tomin, tanauatil uan kichiujka maj kintanini miakej akin kitauelitayaj. David semi kitasojkamatia tein Jiova kimakaka uan kijtoj ke nion uelia kipouaya (Sal. 40:5). Sayoj ke peuak kinejneki kipias okachi uan kielkauak nochi tein Jiova kimakaka. Maski kinpiayaya miakej siuamej, peuak kinejneki inamik okse takat, se taman tein Jiova kijtoua ke amo kuali yetok. Siuat monotsaya Bat-Seba uan inamik katka se hitita akin monotsaya Urías. David sayoj kitemoj itanejnekilis, yejua ika auilnemik iuan Bat-Seba uan satepan kimatik ke Bat-Seba kipiaskia se konetsin. Uan amo sayoj kichiuak nejon, ta no kitemoj maj kimiktianij Urías (2 Sam. 11:2-15). ¿Kinemilij David ke Jiova amo kiitstoya? Maski miak xiujmejya kitekitilijtoya Jiova, kitemoj itanejnekilis uan kinejnekik kipias okachi uan nejon kiualkuilij miak tajyouilis. Sayoj ke satepan kijtoj ke tajtakolchiuak uan moyolnonotsak. ¡Uan semi kitasojkamatik maj Jiova kitapojpoluiani! (2 Sam. 12:7-13).

11. Kemej kijtoua Efesios 5:3, 4, ¿toni techpaleuis maj amo tiknejnekikan tikpiaskej okachi?

 ¹¹ ¿Toni techmachtia tein kipanok David? Ke komo tiktasojkamatij nochi tein Jiova techmaka amo tiknejnekiskej okachi (xikonixtajtolti Efesios 5:3, 4). Moneki tiyolpakiskej ika tein tikpiaj. Keman titamachtiaj ika Biblia, tiknextilijtiouij akin tikmachtiaj maj itech tanemili teisa tein Jiova kimakani uan maj kitasojkamatili. Komo mojmostaj kitasojkamatilia Jiova se taman keman kitataujtia, itamian semana chikome tamanya kitasojkamatilij (1 Tes. 5:18). ¿No tikchiuaj nejin? Komo itech titanemiliaj nochi tein Jiova toka kichiuani, okachi timotasojkamatiskej uan tiyolpakiskej ika tein tikpiaj. Nejin techpaleuis maj amo tiknejnekikan tikpiaskej okachi.

12. ¿Toni kichiuak Judas Iscariote porin peuak kinejneki kipias okachi?

¹² Axkan maj ika titajtokan Judas Iscariote. Kemej peuak kinejneki kipias okachi, kitemaktij Jesús. Sayoj ke achto katka yolkuali (Luc. 6:13, 16). Tikmatij nejon porin Jesús kiixpejpenak maj yeskia semej itatitaniluan uan moita ke iuan takuaujtamatia porin yejua kipiaya tomin tein kisentilijtiayaj, tein kikuiaj itech tanojnotsalis. Ueliskia tikijtoskej ke katka kemej tomin tein axkan ika titapaleuiaj maj moteixmatilti iTajtol Dios itech nochi taltikpak. Judas kinejnekik kipias okachi maski miakpa kikakka Jesús keman kinnejmachtij taltikpakneminij maj amo kinejnekinij okachi taman (Mar. 7:22, 23; Luc. 11:39; 12:15). Sayoj ke Judas amo kikakik tein Jesús tanejmachtij, uan satepan peuak tachteki.

13. ¿Kemanian kinextij Judas ke peujka kinejneki kipias okachi?

¹³ Tepitsin achto ke kimiktiskiaj Jesús, Judas kinextij ke kitemouaya kipias okachi. Se tonal, Jesús uan imomachtijkauan, kampa no moajsiaj María uan iikniuj Marta, takuatoj ichan Simón akin achto kipiaka lepra. Keman takuajtoyaj, María kiajsito Jesús uan kikuatekilij se aceite tein semi ajuiyak katka uan semi patiyoj. Judas kualanik uan okseki imomachtijkauan Jesús no kualankej, xa porin kinemiliayaj ke nejon tomin ueliskia kikuiskej itech tanojnotsalis. Sayoj ke Judas amo yejua ika kualanik, ta kemej katka “tachtekke” kinekia kiichtekis tomin tein kisentilijtiayaj. Judas peujka kinejneki kipias okachi, uan tepitsin satepan kitemaktij Jesús porin kitaxtauijkej (Juan 12:2-6; Mat. 26:6-16; Luc. 22:3-6).

14. Ika tein kijtoua Lucas 16:13, ¿toni kichiujkej se tokniuj takat uan inamik?

¹⁴ Jesús kinelnamiktij imomachtijkauan nejin tajtolmej tein hasta axkan semi melaujkej: “Amo uelis nankitekitilijtinemiske Totajtsin Dios uan in ricojyot sepan san” (xikonixtajtolti Lucas 16:13). Ika nejin tein kijtoj Jesús, maj tikitakan toni kichiujkej se tokniuj takat uan inamik akin kayomej Rumania keman kiniluijkej ox kinekiaj kiseliskej se tekit itech se altepet kampa kuali motatani uan kampa sayoj tekitiskiaj seki tonalmej. Yejuan kijtouaj: “Titauikayaj miak tomin itech banco. Yejua ika yekinika tikitakej nejon tekit kemej se tatiochiualis tein Jiova techmakatoya”. Sayoj ke komo kiseliayaj amo semi ueliskiaok kitekitiliskej Jiova. Yejuan kiixtalijkej toni kichiuaskej satepan ke kiixtajtoltijkej tamachtilis “Mantengámonos leales con un corazón unificado”, tein kisak itech amaix La Atalaya 15 de agosto de 2008. Yejuan kijtouaj: “Komo tiknekiaj titekititiuij okse altepet porin tiknekiaj tiktaniskej okachi tomin amo tiktayekanaltijtoskiaj tokuali uikalis iuan Jiova. Tikmatiaj ke ueliskia tikpoloskej nejon kuali uikalis”. Yejua ika amo kiselijkej nejon tekit. Satepan tokniuj takat kiajsik se tekit itech ialtepeuj kampa kitaxtauiayaj tein uelia ika moixpanoltiayaj. Tokniuj siuat kijtoua: “Jiova nochipa  kinpaleuia itekitikauan”. Yejuan semi yolpakij porin Jiova kinixyekana uan amo tomin.

15. ¿Keniuj tikmatij ke uelisok tikcholuiskej Satanás?

¹⁵ Uan komo tikitaj ke timoueyimatij oso ke tiknejnekij tikpiaskej okachi, ¿uelisok timopataskej? Kemaj, porin Pablo kijtoj ke akin Satanás kinuetsiltijya uelisok kicholuiskej (2 Tim. 2:26). Yejua nejon kichiuak David. Keman Natán kiyolmajxitij kikakik, moyolnonotsak uan oksepa kuali mouikak iuan Jiova. Maj nochipa tikelnamikikan ke Jiova kipia okachi chikaualis ke Satanás. Komo tikseliaj inepaleuil, uelis tikcholuiskej Satanás.

16. ¿Toni techpaleuis maj Satanás amo techuetsilti?

¹⁶ Sayoj ke okachi kuali komo amo tikauaj maj Satanás techuetsilti, ta komo senkis tikixtopeuaj tein kitekitiltia. Uelis tikchiuaskej nejin sayoj komo Dios techpaleuia. Sayoj ke maj amo keman tiknemilikan ke Satanás amo techuetsiltis, porin hasta seki itekitikauan Jiova akin uejkaujya kitekitilianij peuani moueyimatij oso peuani kinejnekij kipiaskej okachi. Yejua ika maj mojmostaj tiktataujtikan Jiova maj techpaleui maj tikitakan ox timoueyimatij oso tiknejnekij tikpiaskej okachi (Sal. 139:23, 24). Maj amo keman tikauakan maj Satanás techuetsilti.

17. ¿Toni kipanos Satanás amo uejkaua?

¹⁷ Satanás miak xiujmejya kitemouani kinuetsiltis taltikpakneminij kemej yeskia se tatokakej. Sayoj ke amo uejkaua yejua kiuetsiltiskej, kiilpiskej uan satepan kiixpoloskej (Apoc. 20:1-3, 10). ¡Tiknekijya maj ejko nejon tonal! Sayoj ke hasta maj ejko, moneki tiksentokaskej timoyekpiaskej porin Satanás kisentokas kitemos techuetsiltis. Maj tikchiuakan tein techpaleuis maj amo timoueyimatikan nion maj tiknejnekikan tikpiaskej okachi. Yejua ika, maj tiktakamatikan nejin tayolmajxitilis: “Xikixtopeuakan in amokuali Satanás uan ijkon yejua namechtapatauilis” (Sant. 4:7).