TLAMACHTIL 24
Amo ma tikchiuakan tlen Satanás kineki
“Makimatikah kenijki momakixtiskeh de imak n diablo” (2 TIM. 2:26).
TLAKUIKALI 36 Ma tikmaluikan toyolo
XIKILNAMIKTO *
1. ¿Tleka Satanás ijkon ken akin kinkitskia yolkamej?
IJKUAK ikaj kinpaktia kinkitskis yolkamej, kinmiktiaj noso kinkauaj ma yoltokan. Para uelis kinkitskis kitekitiltia seki tlamantli tlen onka ijkon ken okijto se tlakatl tlen amo melauak okatka iyolikni Job (Job 18:8-10). Akin kinkitskia yolkamej, ¿ken kinkajkayaua para ma uetsitij kanin ye kineki? Achto kita tlen kinpaktia, ken katej uan ken uelis kinkitskis. Satanás noijki ijkon kichiua. Kita tlen tikchiuaj, tlen techpaktia uan kichiua itlaj para san niman techkajkayauas. Pero Biblia techiluia tlen moneki tikchiuaskej para amo ma techkajkayaua. Noijki techiluia tlen moneki tikchiuaskej tla imak yotiuetskej.
Satanás kineki ma tiuetsikan imak: ma timoueyinekikan uan ma titlaixnekikan. (Xikita párrafo 2). *
2. ¿Tlen ome tlamantli kitekitiltia Satanás para imak ma tiuetsikan?
2 Satanás kitekitiltia ome tlamantli: kitemoua ma timoueyinekikan uan ma titlaixnekikan. * Yikipia miak xiuitl miakej kichijtokej ijkon ken ye kineki. Ye ken akin kinkitskia totomej kitemoua ma kalakikan kanin ye kineki. (Sal. 91:3). Pero amo imak ma tiuetsikan porque Jehová techititia tlen tlamantli kitekitiltia para tlakajkayauas (2 Cor. 2:11).
Tlen yiuejkika okinpanok sekimej technejmachtia amo ma timoueyinekikan nion ma titlaixnekikan. (Xikita párrafo 3). *
3. ¿Tleka Jehová okichi ma moijkuilo itech Biblia akinmej omoueyinekej uan otlaixnejkej?
3 Jehová technejmachtia amo ma timoueyinekikan nion ma titlaixnekikan. Techyoleua ma timomachtikan tlen yiuejkika okinpanok sekimej uan ijkuilitok itech Biblia. Tikitaskej miakej tlen kuali okitekichiuiliayaj Jehová okichijkej tlen Satanás kineki. ¿Kijtosneki tejuan ijkon techpanos? Amo. Jehová okichi ma “omoijkuilo itech tiotlajkuíloli para matikilnamiktokah iwa amo ijkó matikchiwakah” (1 Cor. 10:11). Ye kimati non uelis techpaleuis para amo ma tikchiuakan tlen Satanás kipaktia.
AMO MA TIMOUEYINEKIKAN
Xikita párrafo 4.
4. ¿Tlen uelis techpanos tla timoueyinekij?
4 Satanás kineki ma timoueyinekikan. Ye kimatij tla timoueyinekij ijkon ken ye, amo tiyoltoskej nochipa (Prov. 16:18). Ik non, apóstol Pablo okijto akin moueyineki kitlajtlakoltiskej ijkon ken Diablo (1 Tim. 3:6, 7, TNM). Ijkon uelis techpanos maski yimiak xiuitl tiktekichiuilijtokej Jehová noso amo.
5. ¿Ken kiteititia Eclesiastés 7:16, 20 tlen kichiua akin moueyineki?
5 Akin moueyineki san itech motekipachoua. Satanás kineki san ma timokuayejyekokan tlen tejuan tiknekij, amo tlen kineki Jehová uan okachi ijkuak titlajyouiaj. Ximokuayejyeko xamo se tonal ikaj okijto itlaj otikchi pero non amo melauak noso ikaj itlaj omitschiuili. Ijkuak ijkon panoua Satanás yolpakis tla tiktlajtlakoltiaj Jehová noso tokniuan. Noijki ye kinekij ma timokuayejyekokan tejuan tikmatij ken tikyektlaliskej tlen techpanotok uan amo moneki tikkauiliskej ma techyekana tlen kijtoua iTlajtol Jehová (xiktlajtolti Eclesiastés 7:16, 20).
6. ¿Tlen techmachtia tlen okipanok se tokni tlen chanti ompa Países Bajos?
6 Ma tikitakan tlen okipanok se tokni tlen chanti ompa Países Bajos. Okualaniaya iuan oksekimej tokniuan porque amo okipaktiaya tlen okichiuayaj uan ayakmo okinekiaya inmiuan yetos. Ye okijto: “Onimomachiliaya noselti. Amo ueli onikintlapojpoluiaya. Ik non, onikilui nonamik omonekiaya oksekan timonechikoskej”. Ijkuakon okitak JW Broadcasting® tlen okiski itech marzo 2016, ompa kijtoua tlen uelis tikchiuaskej tla amo techpaktia tlen kichiuaj oksekimej. Tokni okijto: “Onikajsikamatki omonekiaya niyetos niyolyamanki uan omonekiaya nikajsikamatis ne noijki nimotlapololtia uan amo san nimokuayejyekojtos tlen kichiuaj tokniuan. Tlen onikitak itech Broadcasting onechpaleui okachi ma nikpatioita nikueyichiuas Jehová”. Non techititia ijkuak tikixnamikiskej se ouijkayotl amo ma tikilkauakan Jehová; ma tiktlatlaujtikan uan ma tikinmitakan tokniuan ijkon ken ye kinmita. Ye kita ijkuak motlapololtiaj pero kineki kintlapojpoluis uan kineki noijki ma tikintlapojpoluikan (1 Juan 4:20).
Xikita párrafo 7.
7. ¿Tlen okipanok tekiua Uzías?
7 Se tekiua tlen otlanauatiaya Judá uan omotokayotiaya Uzías omoueyineki uan amo okitekauili ma kiyektlalikan. Ye okichi miak tlamantli. Otlatlanki itech guerras, okinchijchi miakej altepemej uan okinpixki miak yolkamej. Ijkon okipanok porque toTajtsin Dios okiteochi (2 Crón. 26:3-7, 10). Pero Biblia kijtoua: “Ijkuak opejki mochiua okachi ueyititok, iyolo opejki moueyineki hasta okichi tlen amo kuali”. Jehová okijto san teopixkej uelis kimaniliskiaj tlen ajuiak itech teokali. Pero tekiua Uzías noijki okinekiaya ijkon kichiuas. Ik non, Jehová okitlajyouilti ika lepra uan nochipa ijkon okatka hasta ijkuak oixpoliuik (2 Crón. 26:16-21).
8. ¿Ken techpaleuia 1 Corintios 4:6, 7 amo ma timoueyinekikan?
8 ¿Kox techpanos ken Uzías, timoueyinekiskej uan titlajtlakolchiuaskej? Ma tikitakan tlen okipanok se tokni tlen itoka José. Ye okimatiaya tlanemakas uan okatka tlayekanki. Itech uejueyij nechikolmej okintemakaya tlapoualismej uan tlayekankej itech circuito okitlajtlaniayaj tlen omonekiaya. Ye okijto: “Onikneltokaya ne nochi onikmatiaya, amo onikneltokak Jehová onechpaleuiaya. Onimokuayejyeko amitlaj nechpanoskia uan amo onikak tlen Jehová onechnejmachtiaya”. José otlajtlakolchi uan okikixtijkej itech tlanechikol. Opanok miak xiuitl uan oksepa omochi iTlaixpantijka Jehová, ye okijto: “Jehová yonechititi okachi miak ipati ma tikchiuakan tlen ye techiluia”. Nochipa ma tikilnamikikan Jehová techpaleuia ma tikchiuakan nochi tlen tikmatij tikchiuaj uan ye techkauilia ma tikpiakan tekitl itech tlanechikol (xiktlajtolti 1 Corintios 4:6, 7). Jehová amo techkauilis ma tikchiuakan seki tlamantli para ma tikueyichiuakan tla timoueyinekij.
AMO MA TITLAIXNEKIKAN
Xikita párrafo 9.
9. ¿Tlen okinpanok Satanás uan Eva porque otlaixnekej?
9 Ijkuak titlajtouaj ikaj tlaixneki xamo timokuayejyekouaj itech Satanás. Ijkuak okatka se ángel yolkuali Jehová okitekitilti para ma kichiua miak tlamantli kuali. Pero ye okachi okinekiaya; opejki kineki ma kiueyichiuakan ijkon ken kiueyichiuaj Jehová. Satanás kineki ma tikchiuakan ken ye uan amo kineki ma tiyolpakikan. Achto ijkon okinek kichiuas ika Eva. Jehová okinkauili ye uan Adán ma kikuakan nochi tlakilotl tlen okatka itech xochitlali hasta oixuiskiaj pero amo omonekiaya kikuaskej tlakilotl tlen ye okinmilui amo ma kikuakan (Gén. 2:16). Satanás okikajkaya Eva uan okichi ma kineltoka omonekiaya kikuas tlakilotl tlen Jehová okijto amo. Ye amo okitlasojkamatki tlen okimakak Jehová uan okachi okinekiaya. Yitikmatij tlen okipanok; ye otlajtlakolchi uan satepan oixpoliuik (Gén. 3:6, 19).
Xikita párrafo 10.
10. ¿Tlen okipanok tekiua David porque otlaixnek?
10 Ma tikitakan tlen okipanok David. Jehová okimakak miak tlamantli; tomin, miakej okixmatiayaj uan otlatlanki itech guerras. David okitlasojkamatili Jehová porque sapanoua miak tlen okimakak (Sal. 40:5). Pero otlaixnek uan okilka tlen Jehová okimakak. Okachi okinekiaya kipias. Uan otlajtlakolchi ixpan Jehová, maski okinpiaya isiuauan, okixneki tesiua. Omomekati iuan Bat-Seba uan okichi ma kipia ikone. Noijki okichi ma kimiktikan inamik tlen omotokayotiaya Urías (2 Sam. 11:2-15). Omokuayejyeko Jehová amo okitlatoka. Maski miak xiuitl okitekichiuilijtoka Jehová otlaixnek uan amo kuali okipanok. Pero satepan okijto tlen okichi uan omoyolkopki. ¡Sapanoua omotlasojkamatili David porque Jehová okitlapojpolui! (2 Sam. 12:7-13).
11. Ijkon ken kijtoua Efesios 5:3, 4, ¿tlen moneki tikchiuaskej para amo titlaixnekiskej?
11 ¿Tlen techmachtia tlen okipanok David? Ma tiktlasojkamatilikan Jehová porque ye nochipa techmaka miak tlamantli (xiktlajtolti Efesios 5:3, 4). Ma tiyolpakikan ika tlen tikpiaj. Akinmej tikinmachtiaj tikinmiluiaj ma mokuayejyekokan ken Jehová kinmaka miak tlamantli kuali uan ma kitlasojkamatilikan. Tla ijkon kichiuaj itech sejse tonal, kiluiskej Jehová chikome tlamantli (1 Tes. 5:18). ¿Ijkon tikchiuaj tejuan? Tla timokuayejyekouaj ken Jehová nochipa techpaleuia, okachi tiktlasojkamatiskej uan tiyolpakiskej ika tlen tikpiaj uan ijkon amo titlaixnekiskej.
Xikita párrafo 12.
12. ¿Tlen okichi Judas porque opejki tlaixneki?
12 Axkan ma timotlapouikan itech Judas Iscariote. Ye otlaixneki uan okinemakak Jesús. Pero achto ye okatka yolkuali (Luc. 6:13, 16). Jesús okipejpenki para ma yeto iapóstol. Ye okineltokaya okatka yolkuali porque okikauili ye ma kipia tomin tlen okitekitiltiayaj ijkuak otetlapouiayaj. Non yetoskia ken tomin tlen axkan motekitiltia para tokniuan ma tetlapouikan itech nochi tlaltikpak. Jesús miak uelta okijto amikaj ma tlaixneki (Mar. 7:22, 23; Luc. 11:39; 12:15). Judas amo okitlakamatki Jesús uan opejki tlachteki.
13. ¿Keman yomotaya Judas otlaixnekiaya?
13 Ijkuak ayamo okimiktiayaj Jesús, Judas yomotaya otlaixnekiaya. Simón tlen okipiaya lepra, okinyole inkalijtik Jesús uan imachtijkauan. Ompa okatka María uan Marta. Ijkuak otlakuajtokaj, María okitlalili se aceite ajuiak ipan itsonteko Jesús. Judas uan oksekimej imachtijkauan Jesús okualankej. Xamo imachtijkauan omokuayejyekojkej tomin uelis kitekitiltiskiaj ijkuak tetlapouiskiaj pero Judas okualanki porque okinekiaya kichtekis tomin. Satepan opejki okachi tlaixneki, ik non, okinemakak Jesús ken se tlakeuali (Juan 12:2-6; Mat. 26:6-16; Luc. 22:3-6).
14. ¿Ken okichi se tokni uan isiua tlen kijtoua Lucas 16:13?
14 Jesús okinmilui imachtijkauan: “Mach weletis nonkiyolpixtoskeh Dios tla nomechyoltilana n tomi” (xiktlajtolti Lucas 16:13). Non melauak. Ma tikitakan ken okichijkej tlen okijto Jesús se tokni uan isiua tlen chantij Rumania. Okinmiluijkej ma tekipanotij itech se altepetl kanin uelis okachi kitlaniskiaj tomin. Yejuan okijtojkej: “Omonekiaya tikkopaskej tlen otikteuikiliayaj itech banco. Ik non, otimokuayejyekojkej Jehová otechteochi ika non tekitl tlen otechmakayaj”. Pero non kichiuaskia ayakmo okachi ma kitekichiuilikan Jehová. Ijkuak okitlajtoltijkej tlamachtil “Mantengámonos leales con un corazón unificado”, tlen kajki itech revista Akin Tetlapouijtok tlen okiski itech 15 de agosto 2008, yejuan okijtojkej: “Tla tiaskiaj okse altepetl para okachi tiktlaniskej tomin, ayakmo okachi tiktekichiuiliskiaj Jehová uan tikteititiskiaj amo tikpatioitaj iuan timouikaskej. Otikitakej ayakmo tikpiaskiaj chikauak totlaneltokilis”. Ik non, amo okiselijkej yaskej. Tokni okajsik se tekitl para ma kipiakan tlen ika mopanoltiskiaj. Tokni siuatl okijto: “Jehová nochipa techpaleuia”. Ome yolpakij porque kitekichiuiliaj Jehová uan amo kitemouaj kipiaskej miak tomin.
AMO MA TIKCHIUAKAN TLEN SATANÁS KINEKI
15. ¿Tlen moneki tikchiuaskej tla tikitaj timoueyinekij uan titlaixnekij?
15 ¿Tlen moneki tikchiuaskej tla tikitaj timoueyinekij uan titlaixnekij? Apóstol Pablo okijto akinmej katej inmak Diablo uelis momakixtiskej (2 Tim. 2:26). Ijkon okichi David: okikak ijkuak Natán okiyektlali, omoyolkopki, ayakmo otlaixnek uan oksepa omouikak iuan Jehová. Nochipa ma tikilnamiktokan Jehová okachi chikauak uan amo Satanás. Tla tikkauiliaj Jehová ma techpaleui, uelis ticholoskej imak Diablo.
16. ¿Tlen techpaleuis para amo ma timoueyinekikan nion ma titlaixnekikan?
16 Okachi kuali amo ma timoueyinekikan nion ma titlaixnekikan. San Jehová uelis techpaleuis para amo ijkon ma tikchiuakan. Noijki ma tikilnamikikan sekimej itekipanojkauan Jehová tlen okitekichiuilijkej miak xiuitl opejkej moueyinekij uan otlaixnekej. Ik non, mojmostla ma tiktlatlaujtikan Jehová para ma tikitakan kox ijkon tikchiuaj (Sal. 139:23, 24). Ma timochijchikauakan para amo keman ma timoueyinekikan nion ma titlaixnekikan.
17. ¿Tlen kipanos Diablo?
17 Yikipia miak xiuitl Satanás yetoskia ken akin kinkitskia yolkamej. Pero ayakmo poliui miak para ayakmo ijkon kichiuas uan satepan kipojpoloskej (Apoc. 20:1-3, 10). Tikchixtokej ijkon ma pano. Ma timochijchikauakan para amo timoueyinekiskej nion titlaixnekiskej. Ma tikchiuakan tlen kijtoua Biblia: “Ximochijchikawakah para amo manomechtlani n amokualitlakatl [Diablo], iwa ye nomechcholilis” (Sant. 4:7).
TLAKUIKALI 127 ¿Tlen moneki nikchiuas?
^ párr. 5 Maski yimiak xiuitl tiktekichiuilijtokej Jehová, Satanás uelis kichiuas ma tikchiuakan tlen ye kineki. Itech nin tlamachtil tikitaskej ye kineki ma timoueyinekikan uan ma titlaixnekikan uan ijkon ayakmo ma timouikakan iuan Jehová. Noijki tikitaskej ken yiuejkika sekimej omoueyinekej uan otlaixnekej. Noijki tikitaskej tlen techpaleuis amo ijkon ma tikchiuakan.
^ párr. 2 TLEN OKACHI IPATI: Itech nin tlamachtil tikitaskej amo kuali ma timoueyinekikan, kijtosneki amo ma timokuayejyekokan tejuan okachi tikmatij uan oksekimej amo. Uan amo kuali ma titlaixnekikan, kijtosneki amo ma tiknekikan tikpiaskej okachi tomin, ma tiauilnemikan noso okseki tlamantli.
^ párr. 53 FOTO: Se tokni kiteititia moueyineki porque amo kineki kikakis tlen kinejmachtiaj. Se tokni tlen yikipia miak tlamantli ok kineki kikouas okseki tlamantli.
^ párr. 55 FOTO: Se tlen okatka iángel Jehová uan tekiua Uzías omoueyinekej. Eva otlaixnek, ik non, okikua tlakilotl tlen Jehová okijto amikaj ma kikua. David otlaixnek, ik non, omomekati iuan Bat-Seba. Judas otlaixnek, ik non, otlachteki.
