1. Ngenyi tingaezanisa Sathana no munyangi?

MUNYANGI ano cinangwa cimwe basi paanoita basa rake, kubata cinyama kana kuciuraya. Iyena anoshandisa murau jakasiyana-siyana. Pikija umwe muembezeri wo kunyepa wa Jobe wakakwanisa kuzvivona izvi. (Jobe 18:8-10) Munyangi anoitisa kudini kuti cinyama ciende pa murau wake? Iyena anotanga kujija mukhaindi wo cinyameco. Ngokwapi kwaciri kwenda? Ngozvapi zvacinodakarira? Cinyama ici cingakwevehwa ngenyi kuti ciwire pa murau uwu? Sathana wakadari inga munyangi uwu. Iyena anoamba ngo kutijija kuti itusu tiri vandhu vo mushovonyi. Iyena anosota kuti ngokwapi kwatiri kwenda i ngozvapi zvatinodakarira. Perapo, iyena anozoshandisa murau waanoziva kuti unozotibata kamare. Asi Bhaibheri rinotingwaja kuti kudari tikangwarira tinozokwanisa kutiza murau jake. I rinotijijisazve manera atingakwanisa kutiza murau iji.

2. Murau japi muviri jinoshandiswa ndi Sathana jinonasa kubudirira?

² Sathana anoshandisa murau muviri jinonasa kubudirira, kujikuja no makaro. * Ko zviuru zvo makore akapera, Sathana wakabudirira ngo kushandisa murau iji jakashata. Iyena wakadari inga mubati wo shiri, uwo anoita kuti shiri iyende pa ngodha yake kuti akwanise kuibata. (Nduyo 91:3) Asi itusu atidikani kubatwa ndi Sathana. Ngenyi? Ngokuti Jehovha wakapera kutivhunja kare mazano aanoshandisa.—2 VaKorinte 2:11.

3. Ngenyi Jehovha wakaita kuti mu Bhaibheri mutahwe muezaniso jo vandhu vaijikuja no vano makaro?

³ Jehovha anotijijisa kuti kujikuja no makaro i zviro zvakashata maningi, ngo kutivhunja zviro zvakaitika no vashandiri vake vakagondeka vo kare. I anodavo kuti itusu titame kuwira mu kuposa kwakadaro. Pa muezaniso jatinodari kuvona, tinozovona  kuti Sathana anokwanisa kucengeja vashandiri va Jehovha vaano makore akawanda mu cokwadi. Izvi zvinoreva kuti azvikwanisiki kuva vandhu vacikajikuji no vacina makaro here? Haiwa. Jehovha wakaita kuti muezaniso iji jitahwe mu Bhaibheri kuti jikwanise ‘kutingwaja.’ (1 VaKorinte 10:11) Iyena anozviziva kuti itusu tingakwanisa kujija ngo muezaniso iji, perapo tokwanisa kutiza murau ja Sathana.

4. Zvicinyi zvinozoitika kudari tikajikuja?

⁴ Sathana anoda kuti itusu tijikuje. Iyena anozviziva kuti kudari tikajikuja, tinozova inga ndiyena i toruza mukana wo kupona kwenda no kwenda. (Mazwi Akangwara 16:18) Ngokudaro, mupostori Pauro wakapa ngwajo yo kuti mundhu “acadojikuja, wozowira munyara ja Sathana.” (1 Timoti 3:6, 7) Izvi zvingaitika kuno ari wese wedu, azvinenyi dangani tanghwina wari mu cokwadi kana taano makore akawanda tecishandira Jehovha.

5. Inga zvanangwa pana Mucumaeri 7:16, 20, mundhu angakhombijisa kudini kujikuja?

⁵ Mundhu anojikuja, anojida maningi pacake. Sathana anoda kuti itusu tibatikane maningi pa zviro zvedu kusiyapo kubatikana maningi ndi Jehovha, maningi-ningi patinosongana no zvineso. Inga muezaniso, makambopumbhwa kuita ciro camucikazivi kuita here? Kana makamboshaisha kutajwa here? Sathana anoda kuti itusu tinyangajwire Jehovha pomwe no hama jedu. Anodazve kuti itusu tirangarire kuti tinokwanisa kutonga zvineso zvedu toga, kusiyapo kuzwira ndhungamiriro ja Jehovha jinovha mu Soko rake.—Verenganyi Mucumaeri 7:16, 20.

6. Ngozvapi zvatinojija no zvakaitika no hambzaji inogara ku Oranda?

⁶ Ngativone zvakaitika no imwe hambzaji inogara ku Oranda iyona yainyangajwa ngo zviro zvaitwa ngo vamweni. Iyona yakatema civaringo co kugara yakanyagajwa no vandhu ava. Iyona yakati: “inini ndajizwa ndiri ndoga i andicaikwanisa kuregerera hama no hambzaji iji.” Ndakavhunja mwamunangu kuti “tinodikana kucinja ungano kuti tipinde ku ungano imweni.” Perapo iyona yakavona urongwa wo JW Broadcasting^® wa Março wo  2016. Urongwa uu wakapa mazano ngo manera otingahwisana no zviro zvakashata zvinoitwa ngo vamweni. Hambzaji iyi yakaenderera mberi yeciti: “Ndaidikana kujidodokesa ndosotesesa zviya zvandaiposa kuciripi kuda kucinja zviro zvaitwa ngo hama no hambzaji mu ungano. Urongwa uu wakandibesera kuti ndisotesese Jehovha no ukuru-kuru hwake.” Tinojijenyi apa? Patinosongana no zvineso, tinodikana kusotesesa Jehovha. Deketeranyi kuti Jehovha amubesere kuvona hama inga manera aanovavona. Baba wenyu vo mu gore vanovona kuposa kwavo, asi anovaregerera. Ivona vanoda kuti imwimwi muitevo zvondhozvo.—1 Johani 4:20.

7. Zvicinyi zvakaitika na Mambo Uziya?

⁷ Kuzvikuja kwakaita kuti Mambo Uziya wo Kujudha arambe mbhangiro yo vamweni i izvi zvakaita kuti iyena aite zviro zvokuti acaitendehwa kuzviita. Uziya wakaita zviro zvizinji zvaushoni. Iyena wakawina hondo jakawanda, wakavaka nyumba jakawanda i waingazve no minda jakawanda, “Mwari wakamukomborera.” (2 Kronike 26:3-7, 10) Bhaibheri rinoti: “Naaita mukuru, mwoyo wake wakazara ngo kujikuja, uku kwakamuuraisa.” Jehovha wakananga kuti vapiri ndivona basi vanodikana kupisa rubani mu themberi. Asi Uziya wakaita zviro zvaicaitendehwa kuzviita, wakanghwina mu themberi wopisa rubani. Jehovha aazivi kudakara ndizvona i wakaita kuti Uziya azare ngo mapere. Iyena wakagara no mapere mbhera njiku yo kufa kwake.—2 Kronike 26:16-21.

8. Mukuzwirana na 1 VaKorinte 4:6, 7, zvicinyi zvingatibesera kuti titame kuva vandhu vanozvikuja?

⁸ Kureva kuti tingagumavo pakuzvikuja, toshaisha inga zvakaitikaro na Mambo Uziya? Ngatende tivone muezaniso wo hama Jose. Ivona vaibudirira maningi pa nyagoso, mu ungano vaireremejwa maningi inga mukuru. Ivona vaiita maningi hurukuro pa magungano i muvonereri wo ndharaundha waivadakarira maningi kuvakumbira mbhangiro. Asi ivona vakananga kudari: “ndakatanga maningi kujithemba kamare, andicaithembazve Jehovha. Ndairangarira kuti ndakavanga maningi andicaidazve kupurukira mbhangiro jese jandaipuwa ndi Jehovha.” Hama Jose vakaguma pakuita cishaishi cikuru vojingwa. Pa makore manganani akaperari, ivona vakahwirijwazve. Wari ivona vakati: “Jehovha wakandijijisa kuti ciro cinosisira maningi, asipi kugara no nduma asi ikuita zviro zvaanotivhunja.” Tinodikana kuceuja kuti zvatinokwanisa kuita no mutoro  jese jatinajo mu ungano, tinojipuwa ndi Jehovha. (Verenganyi 1 VaKorinte 4:6, 7.) Kudari tikazvikuja Jehovha aazotishandisi.

9. Kudisisa maningi zviro zvakawanda kwakaita kuti Sathana na Evha vaitenyi?

⁹ Patinorangarira ngo pamusoro po kudisisa zviro zvakawanda, ngokukasika tinotanga tarangarira Sathana Dhiyabhu. Inga imwe ngirozi ya Jehovha, Sathana wainga no zviro zvakawanda zvaushoni asi iyena waida zviro zvizinji. Iyena waida kunamatwavo kuveni ikona kunofanera Jehovha basi. Sathana anoda kuti itusu tive inga ndiyena, tova vandhu vacikadakari ngo zviro zvatinazvo. Vhaza yokutanga paakaita zvondhozvo, ndi paya paakabhuya na Evha. Jehovha ngo rudo hwese wakapekeja zviro zvakawanda maningi kuna Adhamu na Evha kubatanijavo no “mucero yo miti yese yo mumunda” kusiyapo muti umwe basi. (Genesi 2:16) Pikija zvakadaro, Sathana wakacengeja Evha ngo murangariro wo kuti iyena waidikana kuha mucero wo muti wakarambiswaya. Evha aicaidakarepi ngo zviro zviya zvainga nazvo iyena waida zvizinji. Tinozviziva kuti ngozvapi zvakaitika. Evha wakashaisha, pakufamba ko nguva wofa.—Genesi 3:6, 19.

10. Zvicinyi zvakaitika na Mambo Dhavhidhi ngo kudisisa zviro zvakawanda?

¹⁰ Ngo ndava yo kudisisa zviro zvakawanda, zvakaita kuti Mambo Dhavhidhi vakanganwe zvese zvavakapuwa ndi Jehovha, zvakadari inga upfumi, kuva kwake mundhu waizivika maningi no kunyisa vavengi vakawanda. Dhavhidhi waibongesera maningi kamare, wakananga kuti zvipuwo zvese zva Mwari azvicaiverengeka. (Nduyo 40:6) Asi pa kufamba ko nguva, iyena wakakanganwa zvese zvaakapuwa ndi Jehovha. Iyena aicaidakarazve ngo zviya zvainga nazvo, waida zvakawanda. Pikija kuti Dhavhidhi wainga no vakaji vakawanda, iyena wakatendera kuti cido cakashata cimuite kuti ade mukaji wo umweni. Mwanakaji uu wainga Bhatishebha, mukaji wa Uriya Muitita. Dhavhidhi wakaita zvo vatano na Bhatishebha, inga muviyo iyena wakava no mimba. Zvakaitari Dhavhidhi zvainga zvakashata maningi, asi iyena wakaitazve zviro zvakashatisisa kamare kuuraya Uriya. (2 Samueli 11:2-15) Asi Dhavhidhi wainga acirangarirenyi? Kunanga kuti iyena wairangarira kuti Jehovha aripi kumuvona? Pikija kuti Dhavhidhi wakashandira Jehovha ko makore akawanda iyena wakaguma pakuva no cido co kuva no zviro zvakawanda.  Inga muviyo, iyena wakatambujika maningi. Zvinodakajisa ngo zvokuti iyena wakatendera kuposa kwake, wokhauya. Iyena wakadakara ngo kuregerehwa ndi Jehovha.—2 Samueli 12:7-13.

11. Mukuzwirana na Vaefeso 5:3, 4, zvicinyi zvingatibesera kunyisa murau wokudisisa zviro zvakawanda?

¹¹ Ngozvapi zvatinojija ngo muezaniso wa Mambo Dhavhidhi? Tinojija kuti itusu tingakwanisa kunyisa murau wo kudisisa zviro zvakawanda ngo kubongesera zvese zvatinopuwa ndi Jehovha. (Verenganyi Vaefeso 5:3, 4.) Tinodikana kudakara ngo zviya zvatinazvo. Patinotanga kujija Bhaibheri no mundhu tinomujijisa kuti iyena anodikana kurangarira ngo pamusoro po ciro cimwe caanopuwa ndi Jehovha. Kudari iyena akaita zvondhozvo izvi njiku jese, zvinozoreva kuti pa sumana wakumbira zviro zvinomwe zvakasiyana. (1 Vatesaronika 5:18) Mungaitavo zviro zvakafanana? Kudari mukarangarijisisa ngo pamusoro po zvese zvakamuiitira Jehovha imwimwi munozobongesera. Izvi zvinozomubesera kuti muve mundhu anobongesera. Pamunova mundhu anobongesera munozodakara ngo zvamunazvo, i pamunodakara ngo zviro zvamunazvo, amuzobathwi ngo murau wo kuda zviro zvakawanda.

12. Zvicinyi zvakaitisa kuti Judha Iskariote agume pakudisisa zviro zvakawanda?

¹² Zvecivoneka kuti Judha Iskariote wakaguma pa kudisisa zviro zvakawanda iyena wakaguma pa kuva mucengeji. Judha asipi mukuvo wese wainga mundhu wakashata. (Ruka 6:13, 16) Jesu wakamusana inga umwe wo vapostori vake. Judha wainga mundhu anothembeka ngo iyo ndava wakasanwa kuti avige mare. Jesu no Vapostori vake vaishandisa mare iyi kuitira kubesera basa ro kucumaera. Iyona yaidari inga mupiro jirikuithwari nyamasi uno kuitira kubesera basa ro nyika yese. Pokufamba ko nguva Judha wakaguma pa kuba pikija iyena wainga wakazwa kazinji mbhangiro ngo pamusoro pokuva no zviro zvakawanda. (Marko 7:22, 23; Ruka 11:39; 12:15) Judha aazivi kupurukira ngwajo iji.

13. Kudisisa zviro zvakawanda kwakatanga kuvoneka rini kuna Judha?

¹³ Kudisisa kwaita Judha zviro zvakawanda kwakanasa kuvoneka mukuvo mushomanani Jesu acito afa. Jesu no Vajiji vake kubatanijavo Maria na Marta vainga varendo pamuzi pa Simoni nyamapere. Povainga veciha Maria wakazoja Jesu ngo mafuta anonuhira aidhura maningi. Judha no vajiji vamweni vakanyangajwa maningi. Vajiji vaivona kuti zvainga zviri nane kuti mare yondhoyo ishandiswe pakubesera basa ro kucumaera. Asi Judha wainga no thangwe rakasiyana. Iyena “wainga mbava” iyena waida kuba mare yainga mubhokiso. Pakufamba ko nguva kudisisa zviro zvakawanda zvakaita kuti Judha atengese Jesu ngo mare yaitengeswa ndiyona muranda.—Johani 12:2-6; Mateu 26:6-16; Ruka 22:3-6.

14. Zvicinyi zvakaitwa ngo varovorani vamweni kuti vazwire ndhungamiriro iri pana Ruka 16:13?

¹⁴ Jesu wakaceukija vajiji vake cokwadi ici cinosisira: “Imwimwi amukwanisi kubatira Mwari pamwepo no Upfumi.” (Verenganyi Ruka 16:13.) Ici icokwadi kamare. Inga muezaniso vonanyi manera o varovorani vamweni vo ku Romania vakashandisa magama aya a Jesu. Ivona vakawana basa ro nguva shomani munyika imweni yakakhupuka. Ivona vakati: “Zvecivoneka kuti tainga no mare yo kupagari ku bhanko, takavona basa iri inga makomborero a Jehovha.” Asi ici cainga cineso. Basa iri raizophingaija kushandira kwavo Jehovha. Pasure po kuverenga Murindiri wa 15 wa Agosto wo 2008 wainga no musoro unoti: “Isa Mwoyo Wako pa Cindhu Cimwe cete kuti Urambe Wakavimbika,” ivona vakatema civaringo. Ivona vakati: “Kudari tikathuta kwenda kunyika imweni kuno mare yakawanda izvona zvinozotibarira  cineso pakushandira kwedu Jehovha. Ushamwari hwedu na Jehovha auzovi unosisira maningi mu upenyu hwedu. Tainga no cokwadi cokuti ushamwari hwedu na Jehovha waizova pa ngozi.” Ngokudaro vakaramba basa riya. Zvicinyi zvakaitika? Mwamuna ava vakawana basa rimweni rovaida munyika yo vaigararo. Mukajiwo wakati: “Jehovha nguva jese anobesera vashandiri vake.” Varovorani ava vakadakara ngo kuti vakadakajisa Jehovha kuciripi kubatisisa mare.

15. Tingava kudini no cokwadi co kuti zvingakwanisika kutiza murau ja Sathana?

¹⁵ Zvicinyi zvatinodikana kuita tikavona kuti tiri kutanga kuzvikuja no kudisisa maningi zviro zvakawanda? Tinodikana kucinja. Pauro wakananga kuti vaya “vakaithwa varanda” ndi Sathana vangakwanisa kutiza murau jake. (2 Timoti 2:26) Izvi ndizvona zvakaitika na Dhavhidhi, iyena wakapurukira ngwajo yaakapuwa ndi Natani wonasirira ushamwari hwake na Jehovha. Mucakanganwa kuti Jehovha ano simba maningi kupinda Sathana. Kudari tikatendera besero ra Jehovha, itusu tinozotiza murau jatinokhandirihwa ndi Sathana.

16. Zvicinyi zvinozotibesera kuti titize muejo ja Sathana?

¹⁶ Zvokadi kamare, zvaushoni maningi kutama kuva vandhu vanozvikuja no kudisisa zviro zvakawanda. Tingakwanisa zvondhozvo basi, ngo besero ra Mwari. Asi ticarangarira kuti narini andizozvikuji no kudisisa zviro zvakawanda, pikija vamweni vano makore akawanda vecishandira Jehovha asi vakazoguma pa kuzvikuja no kudisisa zviro zvakawanda. Itanyi mukumbiro kuna Jehovha kuti amubesere kupopora murangariro no zviito zvenyu. (Nduyo 139:23, 24) Narini mucatendera kuva mundhu anozvikuja no anoda zviro zvakawanda.

17. Zvicinyi zvinozoitika sambiri pano no muvengi wedu Sathana?

¹⁷ Pazviuru zvo makore, Sathana arikushanda inga munyangi asi sambiri pano iyena anozosungwa perapo oparajwa. (Apokaripsi 20:1-3, 10) Tinocidaka-daka kuti njiku iyi igume. Mbhera njiku iyi igume, tinodikana kungwarira muejo ja Sathana. Shandanyi ngo simba kuti murege kuva vandhu vanozvikuja no kudisisa zviro zvakawanda. Vanganyi kurhwa na “Dhiyabhu, iyena anozomutiza.”—Jakobo 4:7.