1. Omolwashike tatu vulu okuyelekanitha Satana nomukongo?

OMUKONGO oha kala owala e na elalakano limwe, ano okuyula nenge okudhipaga oshinamwenyo shoka a hala. Otashi vulika a longithe oomwigo dha yoolokathana, ngaashi sha popilwe kugumwe gwomaahekeleki yaJob aafundja. (Job 18:8-10) Omukongo otashi vulika a longithe shike, opo a yule oshinamwenyo? Tango oha kala te shi konenene kutya openi hashi yi, oshi hole unene okulya shike nosho wo kutya omwigo guni unene tagu vulu oku shi yula. Satana naye okwa fa omukongo ngoka. Oha kala te tu konakona. Oha kala ta konenene mpoka tu hole okuya naashoka tu hole unene. Opo nduno oha hogolola omwigo ngoka ha kala e na einekelo kutya otagu ke tu yula inaatu shi nongela. Nonando ongawo, Ombiimbeli oye tu shilipaleka kutya ngele otwa yulwa komwigo gwontumba, natango otatu vulu okuza mo mugwo. Ombiimbeli otayi tu longo wo nkene tatu vulu okuyanda oomwigo ndhoka.

2. Oomwigo mbali dhini unene Satana ha longitha nohadhi shi pondola?

² Oomwigo mbali ndhoka Satana ha longitha unene nohadhi shi pondola, odho uuntsa nolwiho. * Uule womimvo odhindji, Satana okwa kala ta longitha oomwigo ndhoka mbali nomupondo. Okwa fa omutegi gwuudhila ngoka ha heke uudhila nuukulya, opo e wu yule. (Eps. 91:3) Ihe tse otatu vulu okuyanda okuyulwa kuSatana. Omolwashike tatu tile ngawo? Omolwaashoka Jehova okwe tu hololela oomwigo ndhoka Satana ha longitha. — 2 Kor. 2:11.

3. Omolwashike Jehova a nyolitha iiholelwa tayi londodha mOmbiimbeli?

³ Jehova ohe tu longo kombinga yankene uuntsa nolwiho ya nika oshiponga, moku tu lombwela okupitila mOohapu dhe kombinga yaashoka sha li sha ningilwa aapiya ye yamwe yonale, opo tu yande okuninga omapuko ga fa ngoka ya li ya ningi. Moshitopolwa shika otatu ka mona wo nkene Satana a li a vulu okuyula nokuli naapiya yaJehova mboka ya kala noku mu longela oomvula odhindji. Mbela  shoka osha hala okutya itatu vulu okuyanda uuntsa nolwiho? Hasho. Jehova iiholelwa mbyoka okwe yi nyolitha mOmbiimbeli, opo “yi tu londodhe.” (1 Kor. 10:11) Jehova oku shi kutya iiholelwa mbyoka otayi vulu oku tu kwathela tu yande oomwigo dhOndiyapoli.

4. Oshike tashi vulu oku tu ningilwa ngele otwa kala tu na uuntsa?

⁴ Satana okwa hala tu kale tu na uuntsa. Oku shi kutya ngele otwi iyetha tu kale tu na uuntsa wa pitilila, otatu ka kala twe mu fa, shoka tashi ke tu ningitha kaatu ka mone omwenyo gwaaluhe. (Omayel. 16:18) Omuyapostoli Paulus okwe tu londodha nokuli kutya omuntu otashi vulika ‘i inenepeke, e ta geelwa ngaashi omuhindadhi a ningwa.’ (1 Tim. 3:6, 7) Shoka otashi vulu okuningilwa kehe gumwe gwomutse kutya nduno moshili otwa ninga mo oomvula odhindji nenge opo twe ya mo.

5. Ngaashi sha popiwa mOmuuvithi 7:16, 20, omuntu otashi vulika u ulike ngiini kutya oku na uuntsa?

⁵ Aantu mboka ye na uuntsa ohaya kala yi ihole unene yo yene. Satana oha kambadhala oku tu ningitha tu kale tatu gandja unene eitulomo kutse yene pehala lyoku li gandja kuJehova, unene tuu uuna twa taalelwa komaupyakadhi. Pashiholelwa, mbela owa lundilwa kugumwe nenge owu ungaungiwa nangoye kaashi li pauyuuki? Satana ota ka kala e shi panda ngele owa kala to pe Jehova uusama nenge omumwaho omolwoshinima shoka. Okwa hala wo wu dhiladhile kutya oto vulu okukandula po uupyakadhi mboka kungoye mwene, kaapu na okulandula ewiliko ndyoka Jehova e tu pa mOohapu dhe. — Lesha Omuuvithi 7:16, 20.

6. Oshike to vulu okwiilonga moshimoniwa shomumwameme gwokoHolanda?

⁶ Natu taleni koshimoniwa shomumwameme gumwe gwokoHolanda, ngoka a li ha kala u uvite ta ningilwa nayi kokwaagwanenena kwayalwe. Konima yethimbo okwa tokola kutya ita vulu we oku shi idhidhimikila. Okwa ti: “Shoka osha ningitha ndje ndi kale ndu uvite uuwike nokanda li tandi vulu okulundulula etaloko lyandje kombinga yaamwatate naamwameme mboka. Onda lombwele omusamane gwandje kutya otwa pumbwa okutembukila kegongalo lilwe.” Konima yaashono okwa tala Opolohalama yotiivii JW^® yaMaalitsa 2016. Opolohalama yomwedhi ngoka oya li yi na omaetopo gamwe gankene tu na okuungaunga nokwaagwanenena kwayalwe. Omumwameme ngoka okwa ti: “Konima sho nda tala opolohalama ndjoka, onda mono kutya ondi na okwiifupipika nokutala komapuko ngoka ngame mwene handi ningi, pehala lyokukala nda hala aamwatate naamwameme megongalo ya lundulule iikala yawo. Opolohalama ndjoka oya kwathele ndje wo ndi gandje eitulomo kuJehova nokuunamapangelo we.” Moshimoniwa shoka otatu ilongo mo shike? Uuna wa taalelwa kemakelo lyontumba, kala ho gandja eitulomo kuJehova. Mu pula e ku kwathele wu kale ho tala ko yalwe ngaashi ye he ya tala ko. Tate gwoye gwomegulu oha kala e wete omapuko gawo, ihe ohe ya dhimine po. Okwa hala nangoye wu kale ho ningi sha faathana. — 1 Joh. 4:20.

7. Oshike sha li sha ningilwa omukwaniilwa Ussia?

⁷ Uuntsa owa li wa ningitha omukwaniilwa gwaJuda, Ussia, kaa taambe ko omayele ngoka a li ta pewa kuyalwe noku ninge oshinima shoka a li kee na uuthemba woku shi ninga. Ussia okwa li e shi pondola miinima oyindji, ngaashi miita, mokutunga omatungo nosho wo muunamapya. Ombiimbeli otayi ti kutya ‘Kalunga okwa li e mu yambeke.’ (2 Ondjal. 26:3-7, 10) Oya ti wo kutya “sho a ningi omunankondo, okwa tumbu pombanda, naashika oshe mu fala mepunduko.” Jehova okwa adhika a gandja elombwelo kutya aayambi oyo owala ya pitikwa oku Mu fikila iitsinino motempeli. Ihe molwaashoka omukwaniilwa Ussia okwa li e na uuntsa, okwa yi motempeli e ta fikile Jehova iitsinino. Jehova ka li a panda oshinima shoka a ningi nokwe mu geele noshilundu, shoka a kala nasho onkalamwenyo ye ayihe. — 2 Ondjal. 26:16-21.

8. Metsokumwe nAakorinto yotango 4:6, 7, ongiini tatu vulu okuyanda okukala tu na uuntsa?

⁸ Mbela natse ngele otwa kala tu na uuntsa, otatu vulu okuyona ngaashi Ussia a li a ningi? Natu taleni koshiholelwa shaJosé. Okwa li omulumentu he shi enditha nawa muunangeshefa nokwa li omukuluntugongalo a simanekwa. Okwa li ha gandja iipopiwa kiigongi iinene niishona, naatonatelishikandjo oya li haya pula omayele kuye. Okwa ti: “Onda li ndi inekela mokuvula kwandje nomontseyo yandje mwene. Kanda li ndi ikolelela muJehova. Onda li handi dhiladhila kutya ondi na eitaalo lya kola, onkene kanda li handi pulakene komalondodho nokomayele gaJehova.” Konima yaashono José okwa yono eyono lya kwata miiti, e ta kondwa. Oomvula oonshona dha ka pita, okwa li a galulilwa megongalo. Ngashingeyi ota ti: “Jehova okwa longa ndje kutya shoka sha simana kashi shi uuthembahenda mboka tu na,  ihe okuninga shoka Jehova a hala tu ninge.” Inatu dhimbwa nando kutya oshipewa nenge uuthembahenda kehe tu na megongalo, otwe wu pewa kuJehova. (Lesha 1 Aakorinto 4: 6, 7.) Ngele otwa kala tu na uuntsa, Jehova ite ke tu longitha.

9. Olwiho olwa ningitha Satana nosho wo Eva ya ninge shike?

⁹ Uuna taku popiwa olwiho, otashi vulika tu dhiladhile kombinga yaSatana Ondiyapoli. Sho a li gumwe gwomaayengeli yaJehova, Satana otashi vulika a li e na omauthembahenda ogendji. Ihe okwa li a hala oshindji shi vulithe pwaashoka. Okwa li a hala okulongelwa, oshinima shoka shi na owala okuningilwa Jehova. Satana okwa hala tu kale twe mu fa, onkene oha kambadhala oku tu ningitha tu kale tu uvite inaatu gwanenwa kwaashoka tu na. Oshikando shotango a ningi oshinima sha fa mpoka, oosho a popi naEva. Jehova okwa li a lombwele Adam naEva ‘ya lye komuti kehe meyana,’ kakele owala komuti gumwe awike. (Gen. 2:16) Nonando ongawo, Satana okwa kotokele Eva, e te mu ningitha a dhiladhile kutya okwa pumbwa okulya komuti ngoka ya lombwelwa kaaya lye. Eva ka li a gwanenwa kwaashoka a li e na, shoka she mu ningitha a kale a hala oshindji. Otu shi kutya oshike sha ka landula ko. Eva okwa yono nolwanima okwa si. — Gen. 3:6, 19.

10. Oshike sha ningwa po sho David i iyetha a kale e na olwiho?

¹⁰ Olwiho olwa ningitha omukwaniilwa David a dhimbwe shoka Jehova e mu pa, mwa kwatelwa uuyamba, esimano noku sinde aatondi ye oyendji. David okwa li a zimine kutya omagano nenge uuwanawa mboka a ningilwa kuKalunga “owundji unene!” (Eps. 40:5) Ihe pompito yimwe, David okwa li a dhimbwa ashihe shoka Jehova e mu ningila. Shoka oshe mu ningitha a kale inaa gwanenwa we kwaashoka e na, e ta kala a hala oshindji shi vulithe pwaashoka Jehova e mu pa. Nonando David okwa li e na aakulukadhi ya konda pugumwe, okwa tameke okukala a hala omukulukadhi gwomulumentu gulwe. Omukulukadhi ngoka oBatseba, nomulumentu gwe okwa li Uria, Omuheti. David okwa yi momilalo naBatseba, e ta ningi etegelelo. Shoka David a ningi osha li oshiwinayi, ihe okwa ningi oshinima shilwe oshiwinayi shi vulithe mpoka sho a dhipagitha Uria. (2 Sam. 11:2-15) Mbela David okwa li ta dhiladhila shike? Mbela okwa li ta dhiladhila kutya Jehova ke mu wete? Nonando David okwa kala nokulongela Jehova uule womimvo odhindji, okwe etha okwiihola  mwene nolwiho ku mu ningithe a yone, shoka she ke eta iilanduliko iiwinayi. Shinyanyudha, mokweendela ko kwethimbo David okwa zimine kutya okwa yona, e ti iyele ombedhi. Ka li tuu a pandula sho Jehova e mu dhimine po! — 2 Sam. 12:7-13.

11. Shi ikolelela kAaefeso 5:3, 4, oshike tashi vulu oku tu kwathela tu yande okukala tu na olwiho?

¹¹ Oshike tatu ilongo moshiholelwa shaDavid? Otatu ilongo kutya otatu vulu okuyanda okukala tu na olwiho, ngele otwa kala tu na olupandu omolwiinima ayihe mbyoka Jehova e tu ningila. (Lesha Aaefeso 5:3, 4.) Otwa pumbwa okukala twa gwanenwa kwaashoka tu na. Uuna tatu konakona naantu, otashi vulika tu ya longe ya kale haya pandula Jehova omolwoshinima shontumba shoka e ya ningila. Ngele omukonakoni ngoka okwa kala te shi ningi uule woshiwike, kungawo ota ka kala a galikana kombinga yiinima iheyali ya yoolokathana. (1 Tes. 5:18) Mbela ngoye osho ho ningi? Ngele owa kala ho tedhatedha kombinga yiinima ayihe mbyoka Jehova e ku ningila, otashi ke ku kwathela wu kale wu na olupandu. Nongele owu na olupandu, oho kala wa gwanenwa. Ngele owa gwanenwa, ito ka kala wu na olwiho.

12. Olwiho olwa ningitha Judas Iskariot a ninge shike?

¹² Olwiho olwa ningitha Judas Iskariot a gwaaleke Jesus. Petameko Judas okwa li omulumentu omudhiginini. (Luk. 6:13, 16) Jesus okwa li nokuli e mu hogolola a kale omuyapostoli. Osha yela kutya Judas okwa li e shi okwiinekelwa, oshoka Jesus oye a li a pa oshinakugwanithwa shokukala nokandjato kiimaliwa. Jesus naayapostoli ye oya li haya longitha iimaliwa mbyoka ya lande iipumbiwa yawo sho tayu uvitha. Iimaliwa mbyoka oya li owala ya fa omayambidhidho giilonga yomuuyuni awuhe kunena. Ihe konima yethimbo, Judas okwa tameke okuyaka po iimaliwa mbyoka, nonando okwa li u uvu Jesus lwiikando ta londodha aantu kombinga yolwiho. (Mark. 7:22, 23; Luk. 11:39; 12:15) Judas okwa li i ipwililikile omalondodho ngoka.

13. Uunake Judas a tameke okuulika kutya oku na olwiho?

¹³ Manga nokuli Jesus inaa dhipagwa, Judas okwa li a tameke nale okuulika kutya oku na olwiho. Jesus naalongwa ye, mwa kwatelwa Maria nomumwayina, Marta, oya li aayenda maandja Simon omunashilundu. Manga taya li, Maria okwa thikama, e ta tile omugwayo gwa nika nawa gwondilo komutse gwaJesus. Judas naayapostoli yalwe oya li ye shi geyela noonkondo. Aayapostoli yalwe otashi vulika ya li taya dhiladhila kutya iimaliwa mbyoka ya li tayi ka za momugwayo ngoka ngele ogwa landithwa po, otayi vulu okulongithwa miilonga yokuuvitha. Ihe Judas hasho a li ta dhiladhila ngawo. Okwa li “omufuthi,” nokwa li a hala iimaliwa mbyoka e ke yi yake mo mokandjato. Konima yethimbo, olwiho olwe ke mu ningitha a gwaaleke Jesus, opo a pewe iimaliwa. — Joh. 12:2-6; Mat. 26:6-16; Luk. 22:3-6.

14. Aaihokani yamwe oya tula ngiini miilonga omayele ngoka taga adhika muLukas 16:13?

¹⁴ Jesus okwa li a dhimbulukitha aalanduli ye kombinga yoshili ndjika: “Kamu vulu okulongela Kalunga pamwe nemona.” (Lesha Lukas 16:13.) Elondodho ndyoka otali longo nokunena. Natu taleni nkene aaihokani yamwe yokoRomania ya tula miilonga oohapu ndhoka dhaJesus. Oya li ya mono iilonga yopokathimbo moshilongo shimwe oshiyamba. Oya zimine ya ti: “Otwa li tu na oongunga odhindji kombaanga ndhoka twa li tu na okufuta, onkene petameko otwa li tatu dhiladhila kutya iilonga mbyoka twa mono oyi li eyambeko lya za kuJehova.” Ihe opwa li uupyakadhi wontumba. Iilonga mbyoka oya li tayi ka ya moshipala okulongela kwawo Jehova. Konima sho ya lesha oshitopolwa “Maintain Loyalty With a Unified Heart” (Kala omudhiginini nomutima aguhe), mOshungolangelo yo 15 Auguste 2008, oya ningi etokolo. Oya ti: “Ngele elalakano lyetu lyokutembukila koshilongo shoka oku ka mona iimaliwa oyindji, kungawo iimaliwa oyo twa pititha komeho gaJehova. Otwa li twa tompwa kutya ngele otwa ningi etokolo ndyoka,  mokweendela ko kwethimbo ekwatathano lyetu naJehova otali ka teka po.” Onkee ano, oya tokola kaaya tembukile koshilongo shoka. Mbela oshike sha li sha ningwa po shi na ko nasha nonkalo yawo? Omusamane okwa mono iilonga moshilongo shawo mbyoka tayi opalele. Omukulukadhi gwe okwa ti: “Jehova aluhe oha ambidhidha aapiya ye.” Aaihokani mboka oya nyanyukwa sho ya pititha Jehova komeho, pehala lyiimaliwa.

15. Omolwashike tatu vulu okukala nuushili kutya otatu vulu okumanguluka mo moomwigo dhaSatana?

¹⁵ Oshike tu na okuninga ngele otwa ndhindhilike kutya otu na uuntsa nenge olwiho? Otatu vulu okuninga omalunduluko! Paulus okwa ti kutya mboka ya “mangwa” komwigo gwOndiyapoli otaya vulu natango okumanguluka mo. (2 Tim. 2:26) David okwa li a pulakene kepukululo lyaNatan, e ti iyele ombedhi, e ta kala ishewe e na ekwatathano ewanawa naJehova. Ino dhimbwa nando kutya Jehova oku na oonkondo e vule Satana. Ngele otwa taamba ko ekwatho lyaJehova, otatu ka vula okumanguluka mo momwigo kehe gwOndiyapoli.

16. Oshike tashi ke tu kwathela tu yande oomwigo dhaSatana?

¹⁶ Odhoshili kutya okuyanda oomwigo dhaSatana oku li hwepo ku vule okumanguluka mo mudho. Otatu vulu owala oku dhi yanda kekwatho lyaKalunga. Ihe katu na okudhiladhila nando kutya molwaashoka otwa kola pambepo, katu na siku tu ka kwatwe kuuntsa nenge kolwiho. Nokuli naapiya yamwe yaJehova mboka ya kala noku mu longela uule wethimbo oya li ya kwatwa kuuntsa nenge kolwiho. Onkee ano, kala ho pula Jehova esiku kehe e ku kwathele wu mone ngele mungoye otamu iyakele iikala mbyoka. (Eps. 139:23, 24) Ninga ngaashi to vulu wu yande okukala wu na uuntsa nenge olwiho!

17. Masiku oshike tashi ka ningilwa omutondi gwetu, Ondiyapoli?

¹⁷ Satana okwa kala uule womimvo ta tegele aantu oomwigo. Ihe masiku ota ka mangwa po, lwanima e ta hanagulwa po. (Eh. 20:1-3, 10) Otwa halelela esiku ndyoka li thike. Manga esiku ndyoka tali ya, kala wa kotokela oomwigo dhaSatana. Longa nuudhiginini, opo kuu kwatwe kuuntsa nenge kolwiho. Kala wa tokola toko ‘okukondjitha Satana, note ku yi ontuku.’  — Jak. 4:7.