1. ¿Tleka tikijtouaj ika Satanás yeskia ken yakaj akin kimajsi yolkamej?

AKIN kimajsi yolkamej, kineki kimiktis noso san kajsis. Yejua ika, kintekitiltia miyek trampas, ken tlen okinteneuj se xkuajli iamigo Job (Job 18:8-10). Niman, ¿kenon kichiua para on yolki mauetsi ipan trampa? Kuajli kixmati, kita kanon ika papanoua, tlenon kuelita noso tlenon kuelilia niman kenon uelis san ichtaka kajsis. Satanás noijki ijkon kichiua. Kuajli techita niman ijkon kimatis tlenon tikchiuaj niman tlenon tikuelitaj. Sakin, techtlalilia se trampa tlen uelis ika techkajkayauas noso techajsis. San ika, Biblia techpaleuiya pampa techijlia tlenon noneki tikchiuaskej niman ijkon xtechajsis Satanás. Niman tla tiuetsij ipan se trampa Biblia techijlia kenon uelis timakisaskej.

2. ¿Tlenon kineki matikchiuakan Satanás?

² Satanás kineki matoueyimatikan niman matiknekikan tikpiyaskej miyek tlemach. * Youejkauj ijkon kuajchiujtiuj niman miyekej yokinkajkayauj. Satanás yeskia ken akin kimajsi totomej, kichia ika akin kineki kajsis mauetsi ipan itrampa (Sal. 91:3). San ika, uelis totlajpiyaskej niman ijkon xtiuetsiskej ipan itrampas Satanás pampa Jehová yotechijli katlejua kinkui (2 Cor. 2:11).

3. ¿Tleka ipan Biblia onoijkuilo intech akin onoueyimatkej niman akin okinejkej kipiyaskej miyek tlemach?

³ ¿Kenon techpaleuiya Jehová para maka toueyimatiskej niman maka tiknekiskej tikpiyaskej miyek tlemach? Yejua okichiuj ika ipan Biblia manoijkuilo tlen inpan onochiuj sekimej itekipanojkauan niman intech matiuelikan. Amantsin tikitaskej kenon Satanás okinkajkayauj sekimej itekipanojkauan toTajtsin akin chikaujtoya intlaneltokil. ¿Kijtosneki ika xitlaj uelis tikchiuaskej  para maka matechkajkayaua Satanás? Ka, xyejon tlen kijtosneki. Jehová okichiuj manoijkuilokan ipan Biblia “para maka no ijki tikchiuaskej” (1 Cor. 10:11). Techpaleuis maka matiuetsikan ipan itlakajkayaualisuan Satanás niman noijki techpaleuis matikintlalkauikan.

4. ¿Tlenon uelis topan nochiuas tla toueyimatij?

⁴ Satanás kineki matoueyimatikan. Yejua kimatstika ika tla toueyimatij, tiyeskej ken yejua niman xtikpiyaskej nemilistli tlen xkeman tlamis (Prov. 16:18). Yejua ika, apóstol Pablo okijto ika tla yakaj noueyimati “Dios kitlajtlakolmakas niman kicastigaros ken okichiuilij on diablo” (1 Tim. 3:6, 7). Tla xtotlajpiyaj, Satanás uelis kichiuas matoueyimatikan maski tla yotiuejkaujkej noso xitiuejkauij ika tiktekichiuiliaj Jehová.

5. Ken kijtoua Eclesiastés 7:16, 20, ¿tlenon kichiua akin noueyimati?

⁵ Akin noueyimati san itech tlanemilia. Satanás kineki nochipa san totech matitlanemilikan niman maka matitlanemilikan itech Jehová, más ijkuak tikixnamikij tlen ouijtika. San matikonnemilikan, ¿tlenon tikchiuaskiaj tla yakaj techtlajtolchijchiuilia noso tla texchiuiliaj itlaj tlen xkinamiki? Satanás kuelitaskia matiktlajtlakoltikan Jehová noso tokniuan. Noijki kineki matiknemilikan ika san no tejuamej uelis tikyektlaliskej se tlauejli niman ika xnoneki toyekanaskej ika iTlajtol toTajtsin (xpoua Eclesiastés 7:16, 20).

6. ¿Tlenon techmachtia tlen ipan onochiuj se tokniuj akin chanti ipan Países Bajos?

⁶ Matikitakan tlen ipan onochiuj se tokniuj siuatl akin chanti ipan Países Bajos, yejua nochipa san kitstoya tlen xkuajli kichiuayaj oksekimej, hasta xok kinekiya kimitas yejon tokniuan. Yejua kijtoua: “San noselti ninomachiliaya, san nochipa nikitstoya kenon nopopolouaj tokniuan, yejua ika, onikijli noueuentsin matiuiyan ipan okse tlanechikojli”. Kuakon okitak JW Broadcasting^® tlen okis ipan marzo de 2016, kampa kijtouaya tlenon nonekiya tikchiuaskej niman ijkon maka  san tikitstoskej kenon nopopolouaj oksekimej. Tokniuj oksejpa kijtoua: “Onikitak ika nonekiya niyolyemanki yes, niman nikasikamatis ika nejua noijki ninopopoloua, niman ika xueliskia nikinpatlas tokniuan akin nemij ipan tlanechikojli. Broadcasting onechpaleui manitlanemili itech Jehová niman itech tlen yejua yotechijli matikchiuakan”. Kuakon, ijkuak tikixnamikiskej itlaj tlen ouijtika, matitlanemilikan itech Jehová niman matiktlajtlanilikan matechpaleui matikimitakan tokniuan ijkon ken yejua kimita. Maski toTajtsin kita ika nopopolouaj, yejua kintlapopoluiya niman kineki ika tejuamej noijki ijkon matikchiuakan (1 Juan 4:20).

7. ¿Tlenon ipan onochiuj tekiuaj Uzías?

⁷ Uzías, akin tekiuaj katka ne Judá, onoueyimat, yejua ika, xokinokauili makimelajkatlalikan niman hasta okichiuj tlen xkinamikiya kichiuas. Yejua miyek ueliya kichiuaya. Yejua iuan isoldados miyekpa otetlankej ipan guerra, okinchijchiuj miyek kalpamej niman kinpiaya miyek tlaltin kampa tokaya. “Dios okichiu para nochi kuajli ma kisa” (2 Crón. 26:3-7, 10). San ika, Biblia kijtoua ika “ijkuak okipix miyek poder, sanoyej onoueyimat niman okichiu tlajmach yejuan okiteititij ika xok kineltokaya toTEKO”. Jehová yokijtoka ika san teopixkej nonekiya kitlatiskej tlen ajuiyak ipan teopan. San ika, pampa Uzías onoueyimat okinek kichiuas tlen san teopixkej nonekiya kichiuaskej. Kuakon, Jehová okichiuj makajsi lepra. Uzías xkeman opajtik (2 Crón. 26:16-21).

8. ¿Kenon 1 Corintios 4:6, 7 techpaleuiya maka matoueyimatikan?

⁸ ¿Noijki ueliskia toueyimatiskej ijkon ken Uzías niman tikchiuaskej se ueyi tlajtlakojli? Matikitakan tlen ipan onochiuj tokniuj José. Yejua kipiaya se kuajli tekitl, niman noijki tlayekanketl katka, tokniuan melak kitlakaitayaj. Yejua kinpanoltiaya tlamachtiltin ipan uejueyi tlanechikoltin niman kinpaleuiaya tlayekankej ipan circuito, san ika, yejua kijtoua: “Pampa yoniuejkaujka niktekichiuilia toTajtsin niman miyek niueliya nikchiuaya, san notech nitlaneltokaya niman xok ninokauiliaya Jehová manechyekana. Niknemiliaya ika chikauak nikpiaya notlaneltokil niman xonitlakak ijkuak kinekiyaj nechmelajkatlaliskej”. Sakin, José okichiuj se ueyi tlajtlakojli niman okikixtijkej itech tlanechikojli. Ikipiya seki xiujtin ika tokniuj oksejpa onokuep, yejua kijtoua: “Jehová onechititi ika melak noneki matiktlakamatikan tlen yejua techtlajtlanilia. Noijki, onechititi ika xmás ueyi kijtosneki tekitl tlen tikpiyaj  ipan ikalpan, yejua más kipatiojkaita ijkuak tiktlakamatij”. Nochipa matikilnamikikan ika tlen ueli tikchiuaj niman tekitl tlen tikpiyaj ipan tlanechikojli ualeua itech toTajtsin (xpoua 1 Corintios 4:6, 7). Tla toueyimatij, Jehová xtechtekitiltis.

9. ¿Tlenon okichiujkej Satanás niman Eva pampa kinekiyaj kipiyaskej okseki tlemach?

⁹ Satanás yejua akin kachtopa okinek kipiyas miyek tlemach. Ijkuak nemiya ken iángel Jehová, tikmatstokej ika kipiaya se kuajli tekitl, san ika, yejua xsan yejon kinekiya, noijki kinekiya makiueyichiuakan ijkon ken Jehová. Satanás kineki matikchiuakan ijkon ken yejua, ika yejon, xkineki matiyolpakikan san ika tlen tikpiyaj. Ijkon opeuj kichiua iuan Eva. Pampa Jehová kintlasojtlaya Adán iuan Eva, okinkauili makikuakan nochi tlakilyomej tlen onkatkaj ipan xochitlalpan niman okimijli ika san se kojtli xueliskia kikualiskej itlakilyo (Gén. 2:16). San ika, Satanás okikajkayauj Eva niman okitlaneltokilti ika nonekiya kikuas on tlakilyotl tlen yokijlikaj ika xnonekiya kikuas. Yejua xokitlasojkamat tlen kipiaya, okseki kinekiya. Niman tikmatij kenon nochi otlamito: otlajtlako niman omik (Gén. 3:6, 19).

10. ¿Kenon David okiteititi ika kinekiya kipiyas okseki tlemach?

¹⁰ Aman matitlajtokan itech tekiuaj David. Jehová yokimakaka David miyek tlemach, yokimakaka tomin, yokichiujka makiueyikaitakan niman yokipaleuijka makintlani itlauelikniuan. David melak kitlasojkamatiya nochi tlen Jehová yokichiujka ipampa, niman okijto ika melak yokiteochiujka (Sal. 40:5). San ika, oajsik se tonajli ijkuak David xok kiyolpaktiaya tlen kipiaya niman okilkauj nochi tlen Jehová yokimakaka. Yejua kinekiya kipiyas okseki tlemach. David okichiuj itlaj tlen Jehová melak kitlauelita, maski kinpiaya miyekej isiuauan, okikuili isiuauj se tlakatl. On siuatl itoka katka Bat-Seba niman iueuentsin katka se hitita akin itoka katka Urías. David san itech otlanemili, oauilnen iuan Bat-Seba niman okikoneuajti, niman xsan yejon okichiuj, sakin otlanauati makimiktikan Urías (2 Sam. 11:2-15). ¿Tlenon kinemilijtoya? ¿Okinemili ika Jehová xkitstoya? Maski yejua youejkaujka ika kitekichiuilijtoya Jehová, san itech otlanemili niman okinek kipiyas okseki tlemach, niman melak xkuajli ken okisato.  Maski ijkon, sakin okijli Jehová tlen xkuajli okichiujka niman onoyolkuep. ¡Niman melak okitlasojkamat pampa Jehová okitlapopolui! (2 Sam. 12:7-13).

11. Ken kijtoua Efesios 5:3, 4, ¿tlenon noneki tikchiuaskej tla xtiknekij tikpiyaskej miyek tlemach?

¹¹ ¿Tlenon techmachtia tlen ipan onochiuj tekiuaj David? Noneki nochipa tiktlasojkamachiliskej Jehová tlen yotechmakak niman ijkon xtiknekiskej tikpiyaskej okseki tlemach (xpoua Efesios 5:3, 4). Noneki tiyolpakiskej san ika tlen tikpiyaj. Akin tikinmachtiaj Biblia tikimijliaj matlanemilikan itech nochi tlen kualtsin yokinmakak Jehová, niman tikimijliaj makitlasojkamachilikan ipampa yejon. Tla ijkon kichiuaj, ipan se semana kitlasojkamachiliskej Jehová ipampa chikome tlemach tlen yejua yokinmakak (1 Tes. 5:18). ¿Tejuamej noijki ijkon tikchiuaj? Tla titlanemiliaj itech nochi tlen Jehová yotechmakak, más tiktlasojkamachiliskej niman tiyolpakiskej san ika tlen tikpiyaj. Yejon techpaleuis maka matiknekikan tikpiyaskej miyek tlemach.

12. ¿Tlenon opeuj kichiua Judas Iscariote?

¹² Aman matitlajtokan itech Judas Iscariote. Yejua kichiuaya tlen kuajli, san ika, sakin okinemakak Jesús (Luc. 6:13, 16). Pampa kuajli tlen kichiuaya, Jesús okitlapejpeni ken iapóstol. Kuajli nesi ika Jesús itech tlaneltokaya, yejua ika, okinauati makejyeua tomin tlen kikuiyaj ijkuak tenojnotsayaj. Uelis tikijtoskej ika katka ken on tomin tlen aman tikontlaliaj ipan cajita. Jesús miyekpa yokimijlika inomachtijkauan manotlajpiyakan para maka kinekiskej kipiyaskej miyek tlemach (Mar. 7:22, 23; Luc. 11:39; 12:15). San ika, Judas xokikakisnek niman sakin opeuj tlachteki.

13. ¿Kemanon opeuj kiteititia Judas ika kinekiya kipiyas más tomin?

¹³ Ijkuak sa achijtsin poliuiya ika mikis Jesús, Judas yokiteititijka ika kinekiya kipiyas miyek tlemach. Simón, akin kipiaya lepra, okinnots ichan Jesús niman inomachtijkauan niman ompa noijki nemiya María niman ikniuj, Marta. Ijkuak tlakuajtoyaj, María onokuiteuj niman okitekili ipan itsontekon Jesús on “ajuiyalistli yejuan sanoyej patioj”. Judas niman oksekimej inomachtijkauan Jesús xokuelitakej tlen okichiuj María. Inomachtijkauan Jesús kanaj kinemiliayaj ika on tomin ueliskia kitekitiltiskiaj ijkuak ontenojnotsaskiaj. San ika, Judas okualan pampa xueliskia kichtekis on tomin. Sakin, pampa Judas okinek kipiyas más tomin, okinemakak Jesús san ika “treinta tomin de plata” (Juan 12:2-6; Mat. 26:6-16; Luc. 22:3-6).

14. ¿Kenon sekimej tokniuan okichiujkej tlen kijtoua Lucas 16:13?

¹⁴ Jesús okimilnamikti inomachtijkauan ika se “xuelis kitekipanos Dios niman no kinotekimakas tomin” (xpoua Lucas 16:13). Yejuin tlen okijto, hasta aman techpaleuiya. Matikitakan kenon ijkon okichiujkej sekimej tokniuan akin chantij Rumania, ijkuak okimijlikej tla ueliskiaj ontekitiskiaj ipan okse país kampa kitlaniskiaj miyek tomin, yejuamej kijtouaj: “Ueyi tomin tikteuikiliayaj ipan banco. Ijkuak otechtekiuiltijkej yejon tekitl, otikmachilijkej kentla Jehová techpaleuijtoya”. San ika, okitakej ika tla kiseliskiaj yejon tekitl, xok ueliskiaj kuajli kitekichiuiliskiaj Jehová. Sakin ika okipoujkej tlamachtijli “Mantengámonos leales con un corazón unificado”, tlen okis ipan La Atalaya del 15 de agosto de 2008, ouel okitlapejpenijkej tlen kichiuaskiaj. Yejuamej kijtouaj: “Tla tikseliskiaj yejon tekitl san pampa tiknekiskiaj melak totomintiskiaj, kanaj xok ueliskia touikaskiaj iuan Jehová. Kuajli tikmatstokej ika xok ueliskia tikchikauaskiaj totlaneltokil”. Yejua ika, xokiselijkej yejon tekitl. Niman, ¿tlenon opanok sakin? Tokniuj tlakatl okinexti se tekitl ipan ipaís tlen okinpaleui makipiyakan  tlen noneki. Isiuauj kijtoua: “Jehová nochipa techpaleuiya”. Tokniuan melak yolpakij, pampa kitekichiuilijtokej Jehová niman xsan notomintisnekij.

15. ¿Tleka kuajli tikmatstokej ika uelis tikintlalkauiskej itlakajkayaualisuan Diablo?

¹⁵ ¿Niman tla tikitaj ika yopeuj toueyimatij noso tiknekij tikpiyaskej miyek tlemach? ¿Uelis tijkajkauaskej? Kema, pampa Pablo okijto ika akin yokinmajsik Diablo, uelis kintlalkauiskej itlakajkayaualisuan (2 Tim. 2:26, TNM). Yejon tlen okichiuj tekiuaj David, okikak teotlajtoketl Natán ijkuak okimelajkatlali, onoyolkuep niman oksejpa opeuj nouika iuan Jehová. Maka matikilkauakan ika Jehová más kojtik xijkon ken Satanás. Tla tokauiliaj Jehová matechpaleui, uelis tikintlalkauiskej itlakajkayaualisuan Diablo.

16. ¿Tlenon uelis techpaleuis maka matechkajkayaua Satanás?

¹⁶ Melak noneki matotlajpiyakan niman ijkon maka tiuetsiskej ipan itlakajkayaualisuan Satanás. Uelis ijkon tikchiuaskej san tla toTajtsin techpaleuiya. Noijki, maka matiknemilikan ika Satanás xuelis techkajkayauas, pampa sekimej itekipanojkauan Jehová akin youejkaujkej kitekichiuiliaj onoueyimatkej niman okinejkej kipiyaskej miyek tlemach. Yejua ika, mojmostla matiktlajtlanilikan Jehová matechpaleui matikitakan tla yopeuj tiknemiliaj noso tikchiuaj tlen yejua xkuelita (Sal. 139:23, 24). Maka keman matokauilikan matechkajkayaua Satanás.

17. ¿Tlenon ipan nochiuas Satanás?

¹⁷ Satanás melak youejkauj ika miyekej kinuajkajkayaujtiuj, san ika, sa achijtsin poliui para kajsiskej niman kipopoloskej (Apoc. 20:1-3, 10). ¡Sa tikchiatokej mayejko yejon tonajli! San ika, pampa xiyejko yejon tonajli, matotlajpiyakan niman ijkon Satanás xtechkajkayauas. Matokojtilikan niman ijkon xtoueyimatiskej nion xtiknekiskej tikpiyaskej miyek tlemach. Nochipa matikchiuakan tlen kijtoua Santiago 4:7: “Xkixnamikikan on diablo, niman ijkon yejua mechtlalkauis”.