1. Ke ka baka la’ng re ka re Sathane o swana le motsomi?

NAGANA ka motsomi. Selo se segolo seo a nyakago go se dira ke go tanya phoofolo goba go e bolaya. A ka diriša mekgwa e fapafapanego go dira seo, go no swana le ge yo mongwe wa bahomotši ba maaka ba Jobo a ile a bolela ka taba yeo. (Jobo 18:8-10) Motsomi o dira’ng gore a tanye phoofolo? O lebelela mesepelo ya phoofolo yeo, gore e ya kae, e rata eng le gore a ka dira eng gore a e tanye. Sathane o swana le motsomi yoo. O lebelela mesepelo ya rena, gore re ya kae le gore re rata eng. Ge a šetše a bone dilo tšeo, o re beela selo seo a ka re tanyago ka sona re sa itebetše. Eupša Beibele e re botša gore le ge Sathane a ka re swara, re ka kgona go phonyokga. Le gona e re ruta gore re ka dira eng gore a se ke a re tanya.

2. Ke dilo dife tše pedi tšeo Sathane a di dirišago kudu go re tanya?

² Dilo tše pedi tšeo Sathane a di dirišago kudu go re tanya ke boikgogomošo le go ba le megabaru. * Ke go tloga kgale a tanya batho a diriša dilo tše tše pedi. O swana le motanyi wa dinonyana yoo a di goketšago ka se sengwe gore a di tanye. (Ps. 91:3) Eupša go ka se be bonolo gore Sathane a re tanye. Ka baka la’ng? Ka gobane Jehofa o re boditše maano ao Sathane a a dirišago go re tanya.—2 Bakor. 2:11.

3. Ke ka baka la’ng Jehofa a dirišitše mehlala ya batho bao go bolelwago ka bona ka Beibeleng go re lemoša?

³ Jehofa o re lemoša gore go ba le boikgogomošo le megabaru go ka re wetša mathateng. O dira seo ka go re botša diphošo tšeo bahlanka ba gagwe ba kilego ba di dira. Mehlaleng yeo e lego sehlogong se, re tlo kwa kamoo Sathane a ilego a tanya batho bao  e bego e le kgale ba hlankela Jehofa. Na se se ra gore ga go kgonege gore re se ke ra ikgogomoša le go ba le megabaru? Aowa. Jehofa o dirišitše mehlala ya batho ba ka Beibeleng e le gore ‘a re lemoše.’ (1 Bakor. 10:11) Le gona o a tseba gore re ka ithuta mo gontši go yona le gore e ka re thuša gore Sathane a se ke a re tanya.

4. Go ka direga’ng ka rena ge e ba re na le boikgogomošo?

⁴ Sathane o nyaka gore re be le boikgogomošo. O a tseba gore ge e ba re ka ba le boikgogomošo re tlo swana le yena gomme ra se ke ra hwetša bophelo bjo bo sa felego. (Die. 16:18) Ka gona, moapostola Paulo o lemošitše gore ge motho a ka ‘ikgogomoša a ka tla a ahlolwa kamoo Diabolo a ahlotšwego ka gona.’ (1 Tim. 3:6, 7) Se se ka diragalela le ge e le mang wa rena, go sa šetšwe gore re sa tšwa go thoma go hlankela Jehofa goba ke kgale re mo hlankela.

5. Go ya ka Mmoledi 7:16, 20, motho a ka bontšha bjang gore o a ikgogomoša?

⁵ Batho ba go ikgogomoša ba nagana ka bona feela. Sathane o nyaka gore re nagane ka rena feela go e na le gore re nagane ka Jehofa, kudukudu ge re na le mathata. Ka mohlala, na go na le motho yo a kilego a bolela maaka ka wena goba yo a kilego a go swara gampe? Sathane a ka thaba ge a ka bona o bea Jehofa molato goba bana beno. Le gona Sathane o nyaka gore o nagane gore tsela e nnoši yeo o ka rarollago mathata ka yona, ke ka go dira dilo ka tsela ya gago go e na le go latela tlhahlo yeo Jehofa a re fago yona ka Beibeleng.—Bala Mmoledi 7:16, 20.

6. O ithuta’ng mohlaleng wa kgaetšedi wa kua Netherlands?

⁶ Ekwa seo se ilego sa diragalela kgaetšedi yoo a dulago Netherlands, yoo a ilego a thoma go tenwa ke mafokodi a batho ba bangwe. O ile a ipotša gore ga a sa nyaka go ba kgauswi le batho bao. O re: “Ke be ke ikwa ke lewa ke bodutu e bile ke sa kgone le go fetoša tsela yeo ke bego ke ikwa ka yona. Ke ile ka kgopela monna wa ka gore re thothele phuthegong e nngwe.” Kgaetšedi yoo o ile a bogela Kgašo ya JW ya March 2016. Kgašong yeo, go ile gwa bolelwa ka dilo  tšeo di ka re thušago gore re kwešiše mafokodi a batho ba bangwe. Kgaetšedi yoo o ile a re: “Ke ile ka bona gore ke swanetše go ikokobetša le go lemoga gore le nna ke na le mafokodi, go e na le gore ke leke go fetoša bana babo rena le dikgaetšedi ka phuthegong. Kgašo yeo e ile ya nthuša gore ke dule ke naganne ka Jehofa le gore o na le tshwanelo ya go re botša gore re dire eng.” Se se ra go re’ng? Se ra gore ge o bona gore o na le bothata bjo itšego, dula o nagana ka Jehofa. Mo kgopele gore a go thuše go lebelela batho ba bangwe ka tsela yeo yena a ba lebelelago ka yona. Tatago rena wa legodimong o a bona gore ba dira diphošo, eupša o ikemišeditše go ba lebalela. O nyaka gore le wena o ba lebalele.—1 Joh. 4:20.

7. Go ile gwa direga’ng ka Kgoši Usia?

⁷ Boikgogomošo bo ile bja dira gore Kgoši Usia wa kua Juda a gane keletšo gomme a dire dilo tšeo a bego a sa swanela go di dira. Usia e be e le monna yo a nago le bokgoni. O ile a fenya dintweng tše dintši, a aga metse e mentši e bile o be a na le mašemo a mantši. ‘Modimo wa therešo o ile a dira gore a atlege.’ (2 Dikor. 26:3-7, 10) Beibele e re: “Eupša gateetee ge a matlafetše, pelo ya gagwe e ile ya ikgogomoša go fihlela a bile a ipakela bošula.” Jehofa o be a laetše gore baperisita e be bona feela ba fišago diorelo tempeleng. Eupša Kgoši Usia o ile a no ya ka tempeleng a fiša diorelo le ge a be a sa swanela. Jehofa o ile a se thabele seo gomme a mo otla ka lephera. Usia o ile a dula e le molephera go fihlela a ehwa.—2 Dikor. 26:16-21.

8. Go ya ka Bakorinthe ba Pele 4:6, 7, re ka dira’ng gore re se ke ra ikgogomoša?

⁸ Na re ka ikgogomoša gomme ra dira sebe go swana le Kgoši Usia? Ee. Ka mohlala, José e be e le rakgwebo yo a tumilego e bile e le mogolo yo a hlomphegago ka phuthegong. O be a nea dipolelo dikopanong tša tikologo le tša selete gomme balebeledi ba tikologo ba be ba eya go yena go mo kgopela gore a ba eletše. O re: “Ke be ke ithekgile ka bokgoni bja ka e bile ke ipotša gore ke tseba kudu, go e na le gore ke ithekge ka Jehofa. Ke be ke nagana gore nka se we. Ka gona ke ile ka se theetše ge Jehofa a ntemoša le go nnea keletšo.” José o ile a dira sebe se segolo gomme a kgaolwa. Ga bjale go šetše go fetile mengwaga e mentšinyana a bušeditšwe. O re: “Jehofa o nthutile gore selo se bohlokwa ga se go ba le ditokelo, eupša ke go dira seo a re kgopelago gore re se dire.” Re swanetše go gopola gore bokgoni bjo re nago le bjona le ditokelo tšeo re nago le tšona ka phuthegong di tšwa go Jehofa. (Bala 1 Bakorinthe 4:6, 7.) Ge e ba re ikgogomoša Jehofa a ka se re diriše.

9. Go ba le megabaru go dirile gore Sathane le Efa ba dire’ng?

⁹ Ge go bolelwa ka go ba le megabaru, ka moka ga rena re nagana ka Sathane Diabolo. Ka ge Sathane e be e le yo mongwe wa barongwa ba Jehofa, go ka direga gore Jehofa o be a mo file ditokelo tše dintši tše dibotse. Eupša o be a nyaka ditokelo tša go feta tšeo a bego a na le tšona. O be a nyaka gore batho ba rapele yena go e na le gore ba rapele Jehofa feela. Ka ge Sathane a nyaka gore re swane le yena, o dira gore re se kgotsofalele dilo tšeo re nago le tšona. O thomile go dira se nakong ya ge a be a bolela le Efa. Jehofa o ile a fa Efa le monna wa gagwe dienywa tša ‘sehlare se sengwe le se sengwe seo se bego se le ka serapeng’ gore ba je ba kgotsofale, ntle le dienywa tša sehlareng se setee feela. (Gen. 2:16) Eupša Sathane o ile a fora Efa gore a je dienywa tša sehlare seo Jehofa a bego a laetše gore a se di je. Efa o ile a bontšha gore ga a kgotsofalele dilo tšeo a bego a na le tšona. Ka moka re a tseba gore seo se ile sa mo dira gore a wele sebeng, gomme mafelelong a hwa.—Gen. 3:6, 19.

10. Go ile gwa direga’ng ka Kgoši Dafida ge a be a thoma go ba le megabaru?

¹⁰ Go ba le megabaru go ile gwa dira gore Kgoši Dafida a lebale dilo tšeo Jehofa a bego a mo file tšona, go akaretša mahumo, go tuma le go fenya manaba a gagwe a mantši. Dafida o be a kile a bolela gore dilo tšeo Modimo a mo neilego tšona e be e le ‘tše dintši kudu moo a bego a palelwa ke go di bala!’ (Ps. 40:5) Eupša nakong e nngwe Dafida o ile a lebala dilo tšeo Modimo a bego a mo file tšona. O be a se sa kgotsofaletše dilo tšeo a bego a na le tšona. Ka gona o be a na le megabaru. Le ge Dafida a be a na le basadi ba mmalwa, o ile a thoma go kganyoga mosadi wa monna yo mongwe. Mosadi yoo e be e le Batseba gomme monna wa gagwe e le Uria wa Mohethe. Dafida o ile a robala le Batseba gomme Batseba a ima. O be a dirile sebe ka go robala le Batseba, eupša o ile a dira sebe le go feta ka go laela gore Uria a bolawe. (2 Sam. 11:2-15) Dafida o be a nagana’ng? Na o be a ipotša gore Jehofa ga a bone seo se diregago? Le ge Dafida a be a hlanketše Jehofa ka mengwaga e mentši, o ile a thoma go ba le megabaru gomme seo sa mmakela mathata a mantši. Eupša se se kgahlišago ke gore mafelelong Dafida o ile a ipona molato gomme a itshola. O ile a leboga kudu gore Jehofa o ile a mo lebalela!—2 Sam. 12:7-13.

11. Go ya ka Baefeso 5:3, 4, ke’ng seo se ka re thušago gore re se ke ra ba le megabaru?

¹¹ Re ithuta’ng mohlaleng wa Dafida? Re ithuta  gore re ka kgona go lwantšhana le go ba le megabaru. Ge e ba re dula re leboga dilo ka moka tšeo Jehofa a re filego tšona, re tla kgotsofalela seo re nago le sona. (Bala Baefeso 5:3, 4.) Ge re thoma go ithuta Beibele le batho ba bangwe, re swanetše go ba ruta gore letšatši le lengwe le le lengwe ba nagane ka selo se sebotse seo Jehofa a ba diretšego sona ke moka ba mo leboge. Ge beke e šala e fela, seo se tla be se bolela gore ba lebogile dilo tše šupa tšeo di sa swanego. (1 Bathes. 5:18) Na o dira seo se swanago? Ge e ba o naganišiša ka dilo ka moka tšeo Jehofa a go diretšego tšona o tlo kgona go mo leboga. Le gona ge o mo leboga o tlo kgotsofalela dilo tšeo o nago le tšona e bile o ka se be le megabaru.

12. Go ba le megabaru go ile gwa dira gore Judase Isikariote a dire’ng?

¹² Go ba le megabaru go ile gwa dira gore Judase Isikariote a dire selo se sebe ka gore a eke Jesu. Eupša mathomong Judase e be e se motho yo mobe. (Luka 6:13, 16) Ke ka baka leo Jesu a ilego a mo kgetha gore e be moapostola wa gagwe. Le gona Jesu o be a mo tshepa ka gobane o ile a mo kgetha gore e be yena a swarago tšhelete. Jesu le baapostola ba gagwe ba be ba diriša tšhelete yeo go reka dilo tšeo ba di hlokago ge ba be ba bolela ditaba tše dibotse. Re ka re tšhelete yeo e be e swana le meneelo yeo bana babo rena lefaseng ka moka ba e ntšhago lehono. Eupša ge nako e dutše e eya Judase o ile a thoma go utswa tšhelete yeo, le ge a be a dula a ekwa Jesu a lemoša batho gore ba se ke ba ba le megabaru. (Mar. 7:22, 23; Luka 11:39; 12:15) Judase o be a se na taba le ditemošo tšeo.

13. Judase o ile a thoma go bontšha neng gore o be a na le megabaru?

¹³ Judase o be a thomile go bontšha gore o na le megabaru nakong e nngwe pejana ga ge Jesu a ka bolawa. Nakong yeo, Jesu le barutiwa ba gagwe gotee le Maria le Mareta ba be ba etetše Simone wa molephera. Ge ba dutše ba eja, Maria o ile a emelela gomme a tšea makhura a monkgo o mobose a theko e kgolo a a tšhela hlogong ya Jesu. Judase le barutiwa ba bangwe ba ile ba galefa kudu. Barutiwa ba bangwe ba ka ba ba ile ba nagana gore makhura ao a ka rekišwa gomme tšhelete ya gona ya ba thuša ge ba be ba bolela ditaba tše dibotse. Eupša Judase yena o be a sa nagane go swana le bona. “E be e le lehodu,” gomme a naganne go tlo utswa tšhelete yeo. Ka morago, go ba le megabaru go ile gwa dira gore Judase a eke Jesu gore a hwetše tšhelete.—Joh. 12:2-6; Mat. 26:6-16; Luka 22:3-6.

14. Banyalani ba bangwe ba ile ba diriša bjang keletšo yeo e lego go Luka 16:13?

¹⁴ Jesu o ile a gopotša balatedi ba gagwe ka taba e nngwe e bohlokwa ge a be a re: “Le ka se be bahlanka ba Modimo le ba mahumo.” (Bala Luka 16:13.) Taba ye e sa le bohlokwa le lehono. Ka mohlala, a re kweng kamoo banyalani ba kua Romania ba dirišitšego seo Jesu a se boletšego. Ba ile ba hwetša mošomo wa nakwana nageng e nngwe yeo e humilego kudu. Ba re: “Re be re na le sekoloto se segolo seo re bego re swanetše go se patela pankeng. Ka baka leo, mathomong re be re nagana gore mošomo woo e be e le mpho yeo re e neilwego ke Jehofa.” Eupša go be go na le bothata. Ge ba be ba ka amogela mošomo woo ba be ba ka se be le nako ya go hlankela Jehofa. Ba ile ba dira phetho ka morago ga gore ba bale sehlogo seo se rego “Dula o Botega ka Pelo ka Moka” ka go Morokami wa August 15, 2008. Ba re: “Ge nkabe re ile nageng e nngwe gore re kgone go ba le tšhelete e ntši, seo se be se tla be se bontšha gore segwera sa rena le Jehofa ga se bohlokwa kudu maphelong a rena. Re be re tseba gore segwera sa rena le Jehofa se be se tlo fokola.” Ka baka leo, ba ile ba gana mošomo woo. Ke eng seo se ilego sa direga? Monna yoo o ile a hwetša mošomo nageng ya gabo bona. Mošomo woo o be o tlo ba thuša go patela dikoloto tša bona. Mosadi wa gagwe o re: “Jehofa o tlo dula a thuša bahlanka ba gagwe.” Banyalani bao ba thabile ka gobane ba ile  ba kgetha go hlankela Jehofa go e na le gore tšhelete e tle pele maphelong a bona.

15. Ke ka baka la’ng re ka re go a kgonega gore Sathane a se ke a re tanya?

¹⁵ Re tla dira’ng ge e ba re ka lemoga gore re na le boikgogomošo goba megabaru? Re ka fetoga kapelapela! Paulo o boletše gore bao Diabolo a ba ‘tantšego ba phela,’ ba ka kgona go phonyoga. (2 Tim. 2:26) Se ke seo se ilego sa diragalela Dafida. Ka morago ga gore a theetše keletšo yeo e tšwago go Nathane, o ile a bontšha gore o a itshola ka gore a tlogele go ba le megabaru gomme a lokiša segwera sa gagwe le Jehofa. Ga se ra swanela go lebala gore Jehofa o na le matla ao a fetago a Sathane. Le gona ge e ba re dumelela Jehofa gore a re thuše, Sathane a ka se kgone go re tanya.

16. Ke’ng seo se tlago go re thuša gore Sathane a se ke a re tanya?

¹⁶ Re swanetše go leka ka thata gore Sathane a se ke a re tanya a diriša boikgogomošo goba megabaru, go e na le gore re tle re leke go phonyokga ge a šetše a re tantše. Re ka kgona go dira seo ge feela Modimo a re thuša. Eupša ga se ra swanela go itshepa kudu moo re naganago gore re ka se tsoge ra ba le boikgogomošo goba megabaru. Gaešita le batho bao e bego e le kgale ba hlankela Jehofa ba ile ba thoma go ba le boikgogomošo goba megabaru. Ka baka leo, letšatši le lengwe le le lengwe kgopela Jehofa gore a go thuše go bona ge e ba tsela yeo o naganago ka yona le yeo o dirago dilo ka yona e bontšha gore o na le dika tšeo. (Ps. 139:23, 24) Le ka mohla o se ke wa dumelela Sathane a diriša dilo tšeo go go tanya!

17. Ke’ng seo se tlago go direga kgauswinyane ka lenaba la rena Sathane?

¹⁷ Sathane o bile motsomi ka mengwaga e mentši kudu. Eupša kgauswinyane o tlo tlengwa ke moka ka morago a fedišwa. (Kut. 20:1-3, 10) Re fela pelo ya gore letšatši leo le fihle. Ge o sa dutše o letile, hlokomela gore Sathane a se ke a go tanya. Šoma ka thata gore o se ke wa ikgogomoša goba wa ba le megabaru. Ikemišetše go ‘ganetša Diabolo, gomme yena o tla go tšhaba.’—Jak. 4:7.