1. Ahabw’enki Sitaane naagyeragyeranisibwa n’omuhiigi?

EKIGYENDERERWA ky’omuhiigi n’okukwata eki ahiigire nari kukiita. Naabaasa kukoresa emitego etari emwe n’emwe, nk’oku omwe aha bahuumuriza ba Yobu babi yaagizire. (Yob. 18:8-10) Omuhiigi naabaasa kubeihabeiha ata enyamaishwa kugwa omu mutego? Naayetegyereza entwaza yaayo. Neekira kuza nkahi? Neekunda ki? Ni mutego ki ogurikubaasa kugikwata etakimanyire? Sitaane ari nk’omuhiigi ogwo. Naayetegyereza entwaza yaitu. Naareeba ei turikukira kuza n’ebi turikukunda. Reero bwanyima naatega omutego ogu arikumanya ngu nigwija kutukwata tutakimanyire. Kwonka, Baibuli neetuhamiza ngu twakwatwa nabwo nitubaasa kutoroka tuhungye. Kandi nabwo neetwegyesa oku turikubaasa kwetantarira kimwe emitego egyo.

2. Ni mitego ki ya Sitaane erikukira kumukorera gye?

² Emwe aha mitego ya Sitaane erikukora gye n’omwetunguuro n’omururu. * Kumara enkumi n’enkumi z’emyaka, Sitaane abaasize kuba omusinguzi omu kukoresa emitwarize mibi egi. Ari nk’omutegi w’ebinyonyi orikubireetera kugwa omu mutego nari kubibeihabeiha kugwa omu katiimba. (Zab. 91:3) Kwonka titwine kugwa omu mitego ya Sitaane. Ahabw’enki? Ahakuba Yehova atumanyiise obukoryo obu Sitaane arikukoresa.​—2 Kor. 2:11.

3. Ahabw’enki Yehova yaataire eby’okureeberaho bimwe bibi omu Baibuli?

³ Omuringo gumwe ogu Yehova ariturabura aha bikwatiraine  n’omwetunguuro n’omururu, n’okutuhiga kwegyera aha byahikire aha bandi. Yetegyereze ngu omu by’okureeberaho ebi turikuza kureeba, Sitaane akabaasa kutega n’abaheereza ba Yehova abakuzire omu by’omwoyo. Mbwenu shi eki nikimanyisa ngu titurikubaasa kusingura omwetunguuro n’omururu? Ngaaha buzima. Yehova akata eby’okureeberaho ebyo omu Baibuli “kutuhuguura” nari kuturabura. (1 Kor. 10:11) Naamanya ngu nitubaasa kwegyera aha by’okureeberaho bibi, reero kituhwere kwetantara emitego y’Omuregi.

4. Omwetunguuro nigubaasa kutureetera kukora ki?

⁴ Sitaane naayenda ngu tugire amaryo agarengire. Naamanya ngu twagira omwetunguuro, nitwija kuba nkawe tufeerwe omugisha gw’okutunga amagara agatahwaho. (Enf. 16:18) N’ahabw’ekyo, entumwa Paulo akarabura ngu omuntu naabaasa ‘kwetunguura, agwe acwerwe orubanja nk’oru Sitaane yaacwereirwe.’ (1 Tim. 3:6, 7) Eki nikibaasa kuhika ahari buri omwe ahariitwe, yaaba turi basya omu mazima nari tutwire nituheereza Yehova kumara emyaka mingi.

5. Kurugiirira aha Omubuurizi 7:16, 20, omuntu naabaasa kworeka ata ngu aine omwetunguuro?

⁵ Omwetunguuro n’omuze mubi gw’okweyendeza. Sitaane naaba naayenda kutureetera kweyendeza turikwetaho omutima omu mwanya gw’okuguta ahari Yehova, na munonga twatunga oburemeezi. Nk’eky’okureeberaho, bakugambireho ebitahikire? Nari otwariziibwe omu muringo gutari gw’oburingaaniza? Sitaane naashemererwa kureeba noocwera Yehova orubanja nari ab’eishe-emwe. Kandi Omuregi naayenda oteekateekye ngu ekirikubaasa kukuhwera kyonka n’okukora ebintu omu muringo ogwawe, omu mwanya gw’okukuratira obuhabuzi obu Yehova arikutuha omu Kigambo kye.​—Shoma Omubuurizi 7:16, 20.

6. Nitwegyera ki ahari munyaanyazi-itwe omuri Netherlands?

⁶ Teekateeka ahari munyaanyazi-itwe omuri Netherlands owaagizire ekiniga ahabw’obutahikiirira bw’abandi. Akateekateeka ngu tarikubaasa kwemera embeera egyo. “Nkahurira  nyine eihamba ntarikubaasa kuhindura oku ndikwehurira,” nikwo arikugira. “Nkagambira ibanyi ngu tufuruke tuze omu kibiina ekindi.” Kwonka munyaanyazi-itwe ogwo akareeba JW Broadcasting^® eya Maaci 2016. Ekaba erimu obuhabuzi obumwe oburikukwata aha kwemera obutahikiirira bw’abandi. Munyaanyazi-itwe naagira ati: “Nkareeba ngu nyine kuba ow’amazima kandi omucureezi nkamanya ngu naanye ninkora enshobe, omu mwanya gw’okuteeraho kuhindura abandi omu kibiina. Puroguraamu egyo ekampwera kuta omutima ahari Yehova n’obushoboorozi bwe.” Nooreeba enshonga? Waaba noogyezibwa, guma otaire omutima ahari Yehova. Mweshengyereze kukuhwera kureeba abandi nk’oku arikubareeba. Sho ow’omu iguru naareeba enshobe zaabo, kwonka naaba ayeteekateekire kubasaasira. Naayenda ngu naiwe okore otyo.​—1 Yoh. 4:20.

7. Niki ekyabaire aha Mugabe Uziya?

⁷ Omwetunguuro gukareetera Omugabe Uziya owa Yuda kwanga kuhanwa n’okugira omweragiiro. Uziya akaba ari omushaija omukozi. Akaba ari omusinguzi omu by’amahe, omu kwombeka, n’omu by’obuhingi. “Ruhanga akamuha omugisha.” (2 Bus. 26:3-7, 10) “Kwonka ku yaaherize kuhama, yaagira amaryo gaamwita,” Baibuli nikwo erikugira. Yehova akaba yaagizire ngu abanyamurwa bonka nibo baine kwoterera obubaane omu hekalu. Kwonka Omugabe Uziya akeeragiira yaaza omu hekalu yaayoterera obubaane. Yehova tarashemereirwe kandi akareetera Uziya kurwara ebibembe. Akaguma aine ebibembe kuhitsya obu yaafa.​—2 Bus. 26:16-21.

8. Kuhikaana na 1 Abakorinso 4:6, 7, nitubaasa kwetantara tuta omwetunguuro?

⁸ Mbwenu shi omwetunguuro nigubaasa kutureetera kugwa omu mutego nk’ogu Uziya yaagwiremu? Yetegyereze ekyahikire ahari José. Akaba ari omusinguzi omu by’obushuubuzi, kandi ari omureeberezi orikuheebwa ekitiinisa. Akaba naaha embazo aha nteerane empango, kandi abareeberezi abarikutaayaayira ebibiina bakaba nibakira kumwebuuzaho. “Kwonka nkesiga okubaasa kwangye n’okumanya kwangye,” nikwo arikugira. “Yehova nkamuta aha rubaju. Nkaba ninteekateeka ngu mpami, n’ahabw’ekyo nkanga kuhurira okurabura kwa Yehova n’obuhabuzi bwe.” José akakora ekibi ky’amaani kandi yaabingwa omu kibiina. Emyaka mingi ehingwire akagarurwa  omu kibiina. Hati naagira ati: “Yehova anyegyeise ngu ekintu kikuru, ti kugira ekitiinisa, kureka okukora ebi arikutushaba kukora.” Ka tugume nitwijuka ngu etalanta ezi twine n’obujunaanizibwa obu twine omu kibiina, nibiruga ahari Yehova. (Shoma 1 Abakorinso 4:6, 7.) Twaba twine omwetunguuro, Yehova tarikwija kutukoresa.

9. Omururu gukareetera Sitaane na Haawa kukora ki?

⁹ Twateekateeka aha mururu, obundi Sitaane Omuregi niwe arikubanza kutwija omu biteekateeko. Obu yaabaire akiri omwe ahari baamaraika ba Ruhanga abeesigwa, aine kuba yaabaire aine obujunaanizibwa bwingi. Kwonka akaba naayenda oburikukiraho. Akaba naayenda okuramibwa okushemereire kuheebwa Yehova wenka. Sitaane naayenda ngu tube nkawe, n’ahabw’ekyo naateeraho kutureetera kutamarwa n’ebi twine. Akabanza kukora eki obu yaagamba na Haawa. Yehova akaba ahaire Haawa na iba eby’okurya bingi ebirikubahaazya, ahakuba akabaikiriza kurya “omuti gwona ogw’omu kibanja” kureka gumwe gwonka. (Kut. 2:16) Kwonka, Sitaane akabeiha Haawa yaateekateeka ngu aine kurya aha muti ogu baabaire bazibiirwe. Haawa taramazirwe n’ebi yaabaire aine, kureka akaba naayenda ebirikukiraho. Nitumanya ekyarugiremu. Haawa akakora ekibi kandi akaija yaafa.​—Kut. 3:6, 19.

10. Omururu gukasingura guta Omugabe Daudi?

¹⁰ Omururu gukareetera Omugabe Daudi kwebwa ebi Yehova yaabaire amuhaire, nk’obugaiga, okurangaanwa, n’okusingura abazigu be baingi. Daudi akeetegyereza ngu ebiconco bya Ruhanga “ni bingi, tibirikubaasa kubarwa!” (Zab. 40:5) Kwonka rimwe, Daudi akeebwa ebi Yehova yaabaire amuhaire. Akaba atakiine kumarwa, akaba naayenda bingi. N’obu Daudi araabe yaabaire aine abakazi baingi, akaikiriza ebyetengo bibi by’okwegomba muka bandi kuza omu mutima gwe. Omukazi ogwo akaba ari Batisheba, kandi iba akaba ari Uriya Omuhiiti. Omururu gukamureetera kushambana na Batisheba, kandi yaamutweka. Taramazirwe n’ekibi ky’obushambani, kureka akakora n’orukwe rw’okwita Uriya! (2 Sam. 11:2-15) Akaba naateekateeka ki? Mbwenu shi akaijuka ngu Yehova naabaasa kumureeba? Omuheereza wa Yehova ogwo owaabaire ari omwesigwa akagwa omu mutego gw’omururu mubi kyamurugiramu akabi.  Kwonka ekirikushemeza, bwanyima Daudi akaikiriza enshobe ye kandi yaayeteisa. Ka yaashemereirwe munonga kugaruka kusiimwa Yehova!​—2 Sam. 12:7-13.

11. Kurugiirira aha Abaefeso 5:3, 4, niki ekirikubaasa kutuhwera kusingura omururu?

¹¹ Nitwegyera ki ahari Daudi? Nitwega ngu nitubaasa kusingura omururu twaguma nitusiima ebi Yehova atuhaire. (Shoma Abaefeso 5:3, 4.) Twine kumarwa n’ebi twine. Abeegi ba Baibuli abasya nibahigwa kuteekateeka aha mugisha gumwe reero bagusiimire Yehova. Omuntu yaakora atyo buri izooba kumara saabiiti emwe, nikiba nikimanyisa ngu naija kushaba aha bikwatiraine n’ebintu mushanju by’omutaano. (1 Tes. 5:18) Naiwe nookora otyo? Waateekateeka ahari byona ebi Yehova akukoreire, nikiija kukuhwera kumusiima. Kandi waaba noosiima, nootunga okumarwa. Waagira okumarwa, omururu nigukwata akacuro.

12. Omururu gukareetera Yuda Iskaryota kukora ki?

¹² Omururu gukareetera Yuda Iskaryota kuba endeebya rwata. Kwonka tikwo yaatandikire atyo. (Luk. 6:13, 16) Yesu akamutoorana kuba entumwa. Omu kubanza Yesu ashemeire kuba yaabaire naayesiga Yuda, ahakuba niwe yaabaire naabiika akabokusi k’esente. Yesu n’entumwa ze bakaba nibakoresa esente ezo ahabw’enshohoza y’omurimo gwabo gw’okubuurira. Nitubaasa kugira ngu zikaba ziri nk’esente ezirikuheebwayo obunaku obu kureeberera omurimo gw’okubuurira omu nsi yoona. Kwonka bwanyima, Yuda akatandika kwiba, n’obu araabe yaabaire naakira kuhurira Yesu naarabura aha kugira omururu. (Mak. 7:22, 23; Luk. 11:39; 12:15) Yuda akeehuzya okurabura okwo.

13. Omururu gwa Yuda gukareebeka ryari butunu?

¹³ Omururu gwa Yuda gukareebeka gye Yesu ari haihi kwitwa. Yesu n’abeegi be, otwariiremu Mariamu na munyaanya Mariza, bakaba bataayaayire owa Simooni omubembe. Ku baabaire nibarya, Mariamu yaimuka yaashuka amajuta g’ebeeyi kandi ag’omugaju aha mutwe gwa Yesu. Eki kikakora kubi Yuda n’abeegi ba Yesu abandi. Abeegi abandi nibabaasa kuba baateekateekire ngu esente ezo zaaba nizibaasa kuhwera omu buheereza bwabo. Kwonka we Yuda akaba aine ekigyendererwa ky’omutaano. “Akaba ari omushuma,” kandi akaba naayenda kwiba esente ezo omu kabokusi. Bwanyima, omururu gukareetera Yuda kurya orukwe omuri Yesu barikumuha esente ezaabaire nizigura omuhuuku omwe.​—Yoh. 12:2-6; Mat. 26:6-16; Luk. 22:3-6.

14. Omushaija n’omukazi we bakagyendera bata aha buhabuzi oburi omuri Luka 16:13?

¹⁴ Yesu akaijutsya abakuratsi be amazima makuru aga: “Timurikubaasa kuheereza Ruhanga na Mamona” nari eby’obugaiga. (Shoma Luka 16:13.) Na hati eki kihikire. Yetegyereze oku omushaija n’omukazi we omuri Romania baagyendeire aha bigambo bya Yesu. Bakaheebwa omurimo gw’obwire bukye omu ihanga rimwe erigaiga. “Tukaba twine eibanja rya banka rihango ery’okushashura, n’ahabw’ekyo omu kubanza tukateekateeka ngu ogu n’omugisha kuruga ahari Yehova,” nikwo barikugira. Kwonka, hakaba hariho omutego. Omurimo gukaba nigwija kuteganisa entebeekanisa yaabo y’okuheereza Yehova. Bwanyima y’okushoma ekicweka “Guma Ori Omwesigwa n’Omutima Oguteerainwe Hamwe” omu Watchtower eya Agusto 15, 2008, bakacwamu. Bakagira bati: “Okukora esente nyingi kyaba nikyo kigyendererwa kyaitu ky’okukorera omu ihanga erindi, nikimanyisa ngu turiyo nituta omukago gwaitu na Yehova omu mwanya gwa kabiri. Tukaba nituhamiza kimwe ngu nituza kufa omu by’omwoyo.” N’ahabw’ekyo bakacwamu kutaikiriza omurimo ogwo. Hakabaho  ki? Omushaija akatunga omurimo ogurikubabaasisa kwebaisaho omu ihanga ryabo. Omukazi we naagira ati: “Omukono gwa Yehova tigukabaga mugufu.” Abakundaine aba bashemereirwe ahabw’okugira ngu bakahindura Yehova Mukama waabo beitu zitari sente.

15. Ahabw’enki nituhamya ngu nitubaasa kutoroka omu mitego ya Sitaane?

¹⁵ Kandi shi ku twakushanga ngu tugwire omu mutego gw’omwetunguuro nari omururu? Nitubaasa kutoroka tugurugyemu! Paulo akagira ngu abo abari “omu mutego gwa Sitaane” nibabaasa kugurugamu. (2 Tim. 2:26) Eki nikyo Daudi yaakozire, akaikiriza okuhana kwa Nasani, yaayeteisa omururu gwe, kandi yaateereza omukago gwe na Yehova. Guma noijuka ngu Yehova naakiriza kimwe Sitaane amaani. N’ahabw’ekyo twaikiriza obuhwezi bwa Yehova, nitubaasa kutoroka turugye omu mutego ogu Omuregi ategire.

16. Niki ekiraatuhwere kwetantara emitego ya Sitaane?

¹⁶ Kwonka omu mwanya gw’okugira ngu tubanze tugwe omu mitego ya Sitaane reero tubone kugitorokamu, ni kirungi kugyetantarira kimwe. Eki nitubaasa kukikora turikuhwerwa Ruhanga. Kwonka titwine kuhugaho! Nangwa n’abamazire obwire buraingwa barikuheereza Yehova bagizire omwetunguuro n’omururu. N’ahabw’ekyo yeshengyereze Yehova buri izooba kukuhwera kumanya emitwarize mibi egyo yaaba etandikire kushiisha emiteekateekyere yaawe n’ebikorwa byawe. (Zab. 139:23, 24) Toshemereire kwikiriza bikakubaho akaramata!

17. Juba niki ekirikwija kuhika aha muzigu waitu, Omuregi?

¹⁷ Kumara enkumi n’enkumi z’emyaka, Sitaane niwe atwire ari omuhiigi. Kwonka juba nawe naija kuhiigwa akomwe reero aije acwekyerezibwe. (Kush. 20:1-3, 10) Twiniire eizooba eryo ekihika. Kwonka ritakahikire, guma nooreeba oyetantare emitego ya Sitaane. Kora n’amaani kutagira omwetunguuro n’omururu. Mariirira ‘kurwanisa Sitaane, naija kuhunga.’​—Yak. 4:7.