1. Сайтани цауӕйнони хӕццӕ рабарӕн цӕмӕн ес?

ЦАУӔЙНОН цауӕни ку рацӕуй, уӕд аллихузи скъӕппӕгутӕ февӕруй, цӕмӕй ӕ амӕттаги ниййахӕсса кенӕ ба ’й рамара. Цӕхуӕн скъӕппӕгутӕ февӕруй, уой туххӕй ма Библий дӕр финст ес (Иов 18:8–10). Фал ин кутемӕй рауайуй ӕ амӕттаги скъӕппӕгмӕ басайун? Фиццаг бал ӕй базонуй, ӕхе куд фӕддаруй, кӕмити фӕууй ӕма ’й цӕмӕй ес расайӕн, уой. Сайтан дӕр гъе уотӕ архайуй. Фиццаг бал лӕмбунӕг фӕккӕсуй, кӕми фӕууӕн ӕма нӕ зӕрдӕмӕ ци цӕуй, уомӕ. Уой фӕсте ба нин скъӕппӕгутӕ райвӕруй. Ӕ зӕрдтӕй си, лӕдӕргӕ дӕр ӕй нӕ бакӕндзиан, уотемӕй бахаудзиан. Фал Библи куд зӕгъуй, уомӕ гӕсгӕ нӕ бон ӕй Сайтани скъӕппӕгутӕй нӕхе багъӕуай кӕнун, ку си бахауӕн, уӕдта си нӕхе исуӕгъдӕ кӕнун.

2. Сайтан адӕни зӕрдити цӕхуӕн дууӕ менеуӕги ӕркосун кӕнуй?

² Сайтан арӕхдӕр кӕмӕй фӕппайда кӕнуй, еци скъӕппӕгутӕ ӕнцӕ сӕрбӕрзонддзийнадӕ ӕма зудӕ *. Мингай ӕнзти дӕргъи ин уайуй, еци лӕгъуз менеугутӕ адӕни зӕрдити ӕркосун кӕнун. Цъеуахӕссӕги хузӕн сӕ е скъӕппӕгмӕ басайуй (Пс. 91:3). Фал е уобӕл дзорӕг нӕй, ӕма си фӕййервӕзӕн нӕййес. Цӕмӕн? Уомӕн ӕма нин Йеговӕ ӕргом кӕнуй, Сайтан куд архайуй, уой (2 Кор. 2:11).

3. Йеговӕ Библий цӕмӕн ниффинсун кодта сӕрбӕрзонд ӕма зудӕгӕнагӕ адӕни хабӕрттӕ?

³ Сӕрбӕрзонд ун ӕма зудӕ кӕнун куд лӕгъуз ӕй, уой цӕмӕй балӕдӕрӕн, уой туххӕй нӕ Йеговӕ разӕнгард кӕнуй, уӕхӕн адӕни хабӕрттӕбӕл расагъӕс кӕнун. Аци статьяй ци хабӕрттӕмӕ ӕркӕсдзиан, уонӕй бӕрӕг ӕй, Сайтани бон ке ӕй, Йеговӕн берӕ ӕнзти дӕргъи ка лӕггадӕ кӕнуй, уони  дӕр басайун. Фал цума е уобӕл дзорӕг ӕй, ӕма Сайтани скъӕппӕгутӕй фӕййервӕзӕн нӕййес? Нӕ, уомӕн ӕма Йеговӕ батухстӕй, цӕмӕй сӕ хабӕрттӕ Библий финст ӕрцудайуонцӕ, ӕма си «нӕхецӕн зунд райсӕн» (1 Кор. 10:11). Е ӕй зонуй, уой фӕрци нӕхе Сайтани скъӕппӕгутӕй ке багъӕуай кӕндзиан, ку си бахауӕн, удта си нӕхе ке исуӕгъдӕ кӕндзиан.

4. Сӕрбӕрзонд ку уӕн, уӕд нӕ ци хезуй?

⁴ Сайтани фӕндуй, цӕмӕй сӕрбӕрзонд исуӕн. Зонуй ӕй, еци менеуӕг нӕ зӕрди едӕгтӕ ку рауадза, уӕд ӕхе хузӕн ке исуодзиан ӕма ӕносон цардӕй ке фенӕхай уодзиан (Ӕмб. 16:18). Апостол Павел киристӕнтти фӕдзахста, сӕрбӕрзонд ку уонцӕ, уӕд Сайтанӕн ци тӕрхон хаст ӕрцудӕй, уони дӕр еци тӕрхон ке баййафдзӕй (1 Тим. 3:6, 7). Павели дзурдтӕ ни алкӕмӕдӕр хаунцӕ, донаргъуд ӕрӕги ка райста ӕма Йеговӕн рагӕй ка лӕггадӕ кӕнуй, уонӕмӕ дӕр.

5. Екклесиасти 7:16, 20 куд финст ӕй, уомӕ гӕсгӕ адӕймаг сӕрбӕрзонд ке ӕй, е цӕмӕй бӕрӕг фӕууй?

⁵ Сӕрбӕрзонд адӕймаг ӕрмӕстдӕр ӕхе сагъӕс фӕккӕнуй. Ӕма Сайтани дӕр фӕндуй, цӕмӕй фиццагидӕр нӕхебӕл сагъӕс кӕнӕн, Йеговӕбӕл нӕ, фал, уӕлдайдӕр ба ести зинтӕбӕл ку исӕмбӕлӕн, уӕд. Зӕгъӕн, ӕмбурди дӕ ӕнӕфудӕй бафхуардтонцӕ. Куд бакӕндзӕнӕ? Сайтан хъӕбӕр цийнӕ кӕндзӕй, Йеговӕмӕ ӕма ин ӕ организацимӕ мӕстгун кӕнун ку райдайай. Уой фӕндуй, цӕмӕй гъуддаг дӕхе къохтӕмӕ райсай ӕма дӕхемӕ куд растдӕр кӕсуй, уотӕ бакӕнай, Йеговӕ куд зӕгъуй, уотӕ нӕ, фал. (Бакӕсӕ Екклесиаст 7:16, 20.)

6. Нидерландтӕй еу хуӕри хабарӕй цӕбӕл ахур кӕнӕн?

⁶ Нидерландтӕй еу хуӕрӕ ӕмбурди хуӕртӕ ӕма ӕнсувӕрти рӕдудтитӕмӕ хъӕбӕр фӕммӕстгун кӕнидӕ. Еу рӕстӕги син ӕ бон бухсун нӕбал адтӕй. Хуӕрӕ зӕгъуй: «Хъӕбӕр истухстӕн ӕма мӕ сӕрихецауӕн загътон, цӕмӕй ӕндӕр ӕмбурдмӕ рахизтайанӕ». Фал удта еци хуӕрӕ бакастӕй нӕ  интернет-телеуинунади 2016 анзи мартъий программӕмӕ. Уоми дзурд цудӕй, иннети рӕдудтитӕмӕ цӕхуӕн цӕстӕй кӕсун гъӕуй, уобӕл. Хуӕрӕ зӕгъуй: «Ба ’й лӕдӕрдтӕн, мӕхуӕдӕг дӕр арӕх ке рӕдуйун ӕма мӕ мӕхемӕ кӕсун ке гъӕуй, хуӕртӕ ӕма ӕнсувӕртӕмӕ нӕ, фал. Еци программи фӕрци исахур дӕн фиццагидӕр Йеговӕбӕл ӕма ӕ хецаудзийнадӕбӕл сагъӕс кӕнун, мӕхебӕл нӕ, фал». Аци хабарӕй цӕбӕл ахур кӕнӕн? Еске хӕццӕ ку нӕ федауӕн, уӕд гъӕуама Йеговӕй ӕнхус корӕн, цӕмӕй нӕ бон уа иннетӕмӕ уой цӕстӕй кӕсун. Нӕ уӕларвон Фидӕ син сӕ рӕдудтитӕ уинуй, фал син хатир кӕнуй ӕма ’й фӕндуй, цӕмӕй мах дӕр уотӕ кӕнӕн (1 Иоан. 4:20).

7. Паддзах Озибӕл ци ’рцудӕй?

⁷ Паддзах Ози ӕ сӕрбӕрзонддзийнади туххӕй унаффӕмӕ нӕ байгъуста ӕма имӕ ка нӕ хаудтӕй, уӕхӕн гъуддаг ӕхемӕ райста. Ӕной Озийӕн берӕ бантӕстӕй. Паддзах ку адтӕй, уӕд берӕ тугъдтитӕ рамулдта, берӕ горӕттӕ исаразта, удта имӕ берӕ фонс ӕма зӕнхитӕ адтӕй. Библи куд зӕгъуй, уомӕ гӕсгӕ ин «ӕцӕг Хуцау арфӕ кодта» (2 Анз. 26:3–7, 10). Фал ма си финст ӕй: «Хъаурӕгин ку иссӕй, уӕд ӕ зӕрдӕ исхъал ӕй, ӕма ӕхе бабун кодта». Паддзах Ози ковӕндонӕмӕ бацудӕй, цӕмӕй бодӕсодзӕн нивондхӕссӕнбӕл бодӕ иссугътайдӕ. Еци барӕ ба ӕрмӕстдӕр саугинтӕн адтӕй. Ози уӕхӕн миуӕ ке бакодта, уой туххӕй имӕ Йегови маст иссугъдӕй ӕма ибӕл хъотур бафтудта, гъема «ӕ мӕлӕти уӕнгӕ дӕр адтӕй хъотургин» (2 Анз. 26:16–21).

8. 1 Коринфӕгтӕмӕ 4:6, 7 финст дзурдтӕ нин куд банхус кӕндзӕнцӕ нӕхе сӕрбӕрзонддзийнадӕй гъӕуай кӕнун?

⁸ Паддзах Ози ци скъӕппӕги бахаудтӕй, махӕн ба уомӕй тӕссаг нӕй? Ӕркӕсӕн ӕнсувӕр Хосей хабармӕ. Хосейӕн хуарз куст адтӕй, удта ӕмбурди дӕр хестӕр нӕлгоймагӕй лӕггадӕ кодта ӕма ’й хуӕртӕ ма ӕнсувӕртӕ нимадтонцӕ. Конгрессти дӕр ин радзубандитӕ уидӕ, районон цӕстӕдаргутӕ дӕр ма ӕ хӕццӕ аллихузи гъуддӕгти фӕдбӕл унаффӕ кодтонцӕ. Хосе зӕгъуй: «Мӕ зӕрдӕ мӕхебӕл дарун райдӕдтон, Йеговӕбӕл нӕ, фал. Уотӕ мӕмӕ кастӕй, ӕма мӕбӕл неци ӕрцӕудзӕй ӕма Йегови унаффитӕмӕ дӕр нӕбал игъустон». Гъема Хосе уӕззау тӕрегъӕд искодта ӕма ма ’й ӕмбурдӕй дӕр рацох кодтонцӕ. Фал цалдӕр анзей размӕ ба нӕуӕгӕй ӕнсувӕр иссӕй. Хосе зӕгъуй: «Йеговӕ мин бавдиста, сӕйрагдӕр ке  ӕй, е ци зӕгъуй, уомӕ игъосун, цӕйбӕрцӕ нин ӕнтӕсуй, е нӕ, фал». Гъӕйдӕ мадта макӕд иронх кӕнӕн, ӕмбурди нин цидӕриддӕр ихӕстӕ ес, етӕ Йеговӕй ке ’нцӕ. (Бакӕсӕ 1 Коринфӕгтӕмӕ 4:6, 7.) Сӕрбӕрзонд ку уӕн, уӕдта ни Йеговӕн неци пайда уодзӕй.

9. Сайтан ӕма Евӕ зудӕ ке кодтонцӕ, е сӕ цӕмӕ ӕркодта?

⁹ Зудӕгӕнагӕ ка адтӕй, уобӕл ку фӕссагъӕс кӕнӕн, уӕд, ӕвӕдзи, фиццагидӕр Сайтан ӕрӕфтуйуй нӕ зӕрди. Сайтан ку нӕма иссӕй, уӕд ин берӕ кадгин ихӕстӕ адтӕй, фал ӕй никки фулдӕр гъудӕй. Уотӕ ’й фӕндадтӕй, цӕмӕй уомӕн лӕггадӕ кодтайуонцӕ, ӕма уотемӕй Йегови бунатмӕ багъавта. Сайтан уобӕл архайуй, цӕмӕй мах дӕр, ци нӕмӕ ес, уой фагӕбӕл ма нимайӕн. Евӕ дӕр еци скъӕппӕги бахаудтӕй. Куд ӕй зонӕн, уотемӕй Йеговӕ Адам ӕма Еви дзенети ӕрцӕрун кодта, ӕма си хуӕруйнаг фӕндон адтӕй. Сӕ бон адтӕй алли бӕласӕй дӕр хуӕрун, цӕйбӕрцӕ сӕ гъудӕй, уойбӕрцӕ (Райд. 2:16). Фал Сайтан ба Еви цӕсти гъуддаг гъе уотӕ разилдта, цума еци бӕласи рӕзӕй ку нӕ бахуӕра, уӕд ӕцӕг амондгун некӕд уодзӕй. Гъема ибӕл Евӕ дӕр баууӕндтӕй. Ӕма е цӕмӕ ӕркодта, уой хъӕбӕр хуарз зонӕн – тӕрегъӕд искодта ӕма фӕстагмӕ рамардӕй (Райд. 3:6, 19).

10. Давид зудӕ кӕнун ке райдӕдта, е ӕй цӕмӕ ӕркодта?

¹⁰ Еу рӕстӕг паддзах Давид дӕр, ци имӕ адтӕй, уой фагӕбӕл нӕбал нимадта. Йеговӕ ин равардта гъӕздугдзийнадӕ, кадгин ном ӕма ин е знӕгти дӕр ӕ къохмӕ раттидӕ. Еци хуарздзийнӕдти туххӕй Давид Йеговӕй хъӕбӕр боз адтӕй, ӕма ма уотӕ дӕр загъта: «Уойбӕрцӕ ’нцӕ, ӕма сӕ мӕ бон банимайун не ’суодзӕй» (Пс. 40:5). Фал си еу афони еци хуарздзийнӕдтӕ феронх ӕнцӕ ӕма ’й никки фулдӕр ӕргъудӕй. Кӕд ин цалдӕр уоси адтӕй, уӕддӕр лӕгмӕцуд силгоймагмӕ мондаг кӕнун райдӕдта. Е ӕй тӕрегъӕдмӕ ӕркодта ӕма Вирсави бауӕззау ӕй. Фал Давид уобӕл не ’рлӕудтӕй. Ӕ лӕги дӕр ма ин рамарун кодта! (2 Сам. 11:2–15). Цума Давид цӕбӕл сагъӕс кодта? Уотӕ имӕ кастӕй, ӕма ’й Йеговӕ нӕ уинуй? Кӕд Йеговӕн еузӕрдонӕй берӕ ӕнзтӕ фӕллӕггадӕ кодта, уӕддӕр еу афони зудӕ кӕнун райдӕдта ӕма уой туххӕй берӕ гъезӕмӕрттӕ бавзурста. Фал Давид ӕрфӕсмон кодта. Ӕма ин  Йеговӕ ке ниххатир кодта, уой туххӕй си хъӕбӕр боз адтӕй (2 Сам. 12:7–13).

11. Ефесӕгтӕмӕ 5:3, 4 куд финст ӕй, уомӕ гӕсгӕ нин ци банхус кӕндзӕй, цӕмӕй зудӕгӕнагӕ ма исуӕн?

¹¹ Давиди хабарӕй цӕбӕл ахур кӕнӕн? Йеговӕ нин ци хуарздзийнӕдтӕ искодта, уой туххӕй боз ку уӕн, уӕд зудӕгӕнагӕ некӕд исуодзиан. (Бакӕсӕ Ефесӕгтӕмӕ 5:3, 4.) Гъӕуама, ци нӕмӕ ес, уой фагӕбӕл нимайӕн. Библи ке хӕццӕ ахур кӕнӕн, уони дӕр фӕрразӕнгард кӕнӕн, цӕмӕй сагъӕс кӕнонцӕ, Йеговӕ син алли бон дӕр ци хуарздзийнадӕ искӕнуй, уобӕл. Уотемӕй син алли къуӕре дӕр уодзӕй, Йеговӕн цӕй туххӕй райарфӕ кӕнонцӕ, авд уӕхӕн гъуддаги (1 Фес. 5:18). Нӕхуӕдтӕ дӕр ку сагъӕс кӕнӕн, Йеговӕ нин ци хуарздзийнӕдтӕ искодта, уобӕл, уӕд си алкӕддӕр боз уодзиан. Боззӕрдӕ ку уӕн, уӕдта нӕмӕ ци ес, уой фагӕбӕл нимайдзиан. Ци нӕмӕ ес, уой фагӕбӕл ку нимайӕн, уӕдта зудӕгӕнагӕ некӕд исуодзиан.

12. Иудӕ зудӕгӕнагӕ ке иссӕй, е ӕй цӕмӕ ӕркодта?

¹² Зудӕгӕнагӕ ма иссӕй Иудӕ Искариот дӕр. Йесо Киристей дӕр знӕгтӕн уой туххӕй рауӕйӕ кодта. Фиццаг Иудӕ хуарз адӕймаг адтӕй, ӕндӕра ’й Йесо ӕ апостолӕй нӕ равзурстайдӕ (Лук. 6:13, 16). Ӕвӕдзи, сӕрӕн ӕма ӕууӕнкгун лӕг адтӕй. Йесо ӕма ӕ апостолтӕ игъосун кӕнгӕй сӕ хӕрзтӕ кӕмӕй ӕхгӕдтонцӕ, еци ӕхца дӕр ма ин ӕ бӕрагӕ бакодтонцӕ. Абони еци ӕхца исхудтайанӕ нисайнӕгтӕ ӕгасдуйнеуон гъуддагӕн. Фал еу кӕцидӕр рӕстӕг Иудӕ еци ӕхцатӕй давун райдӕдта. Уотемӕй ба Йесо ӕ ахуркӕнуйнӕгтӕн еу ӕма дууӕ хатти нӕ загъта, зудӕ кӕнун куд тӕссаг ӕй, уой (Мар. 7:22, 23; Лук. 11:39; 12:15). Фал Иудӕ еци дзурдтӕ нецӕмӕ ӕрдардта.

13. Иудӕ цӕхуӕн зудӕгӕнагӕ адтӕй, е кӕд рабӕрӕг ӕй?

¹³ Иудӕ цӕхуӕн зудӕгӕнагӕ адтӕй, е рабӕрӕг ӕй Киристей мӕлӕти размӕ. Йесо ӕ ахуркӕнуйнӕгти, удта Марийӕ ӕма ӕ хуӕрӕ Марфи хӕццӕ иуазӕгуати ӕрбацудӕй, хъотурӕй ке исдзӕбӕх кодта, еци Симони хӕдзарӕмӕ. Еци изӕр Марийӕ хъазар хуӕрздӕф сойнӕ райста ӕма ’й Йесой сӕрбӕл уадзун райдӕдта. Иудӕ ӕма иннӕ ахуркӕнуйнӕгтӕ уой ку фӕууидтонцӕ, уӕд рамӕстгун ӕнцӕ. Еци сойнӕ рауӕйӕ кӕнун ӕма ӕхца мӕгуртӕбӕл райуарун сӕмӕ растдӕр кастӕй. Фал Иудӕмӕ мӕгурти мӕтӕ н’ адтӕй. Уой еци ӕхца радавун фӕндадтӕй. Минкъий фӕстӕдӕр ба Иудӕ Йесой рауӕйӕ кодта ӕртин ӕвзестӕ ӕхцабӕл – еу цагъари аргъӕй (Иоан. 12:2–6; Матф. 26:6–16; Лук. 22:3–6).

14. Еу лӕг ӕма уосӕ Лукай 16:13 финст дзурдтӕй сӕ царди куд испайда кодтонцӕ?

¹⁴ Йесо ӕ ахуркӕнуйнӕгтӕн загъта: «Уӕ бон нӕй, цӕмӕй Хуцауи цагъартӕ дӕр уайтӕ ӕма Гъӕздугдзийнади цагъартӕ дӕр». (Бакӕсӕ Лукай 16:13.) Аци дзурдтӕ абони махмӕ дӕр хаунцӕ. Румынийӕй еу лӕг ӕма уосӕ Йесой фӕдзӕхстмӕ байгъустонцӕ, ӕндӕр бӕсти син хуӕздӕр куст ку лӕвардтонцӕ, уӕд. Етӕ зӕгъунцӕ: «Банккӕй хъӕбӕр устур ихӕс дардтан, ӕма нӕмӕ уотӕ фӕккастӕй, ӕма еци куст ӕй дзуапп нӕ кувдтитӕбӕл». Фал е фиццаг бакастӕй зиндтӕй, уотӕ. Еци кустмӕ ку рацудайуонцӕ, уӕд син Хуцауи гъуддӕгтӕн рӕстӕг нӕбал изадайдӕ. Раст унаффӕ рахӕссунмӕ син банхус кодта 2008 анзи 15 августи «Гъӕуайгӕнӕн мӕсуг»-и статья «Дӕ зӕрдӕ ӕгасӕйдӕр Йеговӕбӕл дарӕ» (урус.). Сӕ дзурдтӕбӕл ма бафтудтонцӕ: «Ӕндӕр бӕстӕмӕ фулдӕр ӕхца бакосуни туххӕй ку рандӕ адтайанӕ, уӕд е уобӕл дзорӕг адтайдӕ, ӕма Йегови дуккаг бунати ниввардтан. Ӕма си еу афон раидард адтайанӕ». Уомӕ гӕсгӕ еци кустбӕл нӕ исарази ’нцӕ. Цума уой фӕсте ба ци бацӕнцӕ? Ӕнсувӕр Румыний  иссирдта, хуарз кӕми фистонцӕ, уӕхӕн куст. Хуӕрӕ ба зӕгъуй: «Йегови къох цубур нӕй». Еци лӕг ӕма уосӕ цийнӕ кӕнунцӕ, ӕхцай фӕдбӕл ке нӕ рацудӕнцӕ, уобӕл.

15. Сайтани скъӕппӕгутӕй фӕййервӕзӕн ке ес, уой кӕцӕй зонӕн?

¹⁵ Фал Сайтани скъӕппӕги ку бахауӕн, ӕма сӕрбӕрзонд кенӕ зудӕгӕнагӕ ку исуӕн, уӕддӕр си нӕ бон ӕй нӕхе исуӕгъдӕ кӕнун. Павел дӕр финста, Сайтани скъӕппӕги «уодӕгасӕй» ка бахаудтӕй, уонӕн сӕ бон ке ӕй исуӕгъдӕ ун (2 Тим. 2:26). Давиди хабар дӕр уотӕ адтӕй. Нафан ин ӕ рӕдудмӕ ку байамудта, уӕд ӕрфӕсмон кодта ӕма нӕуӕгӕй ӕхе Йеговӕбӕл бӕттун райдӕдта. Гъӕйдӕ мадта алкӕддӕр нӕ зӕрдӕбӕл дарӕн, Йеговӕ Сайтанӕй берӕ хъаурӕгиндӕр ке ӕй. Ӕма ин е ’нхусбӕл ку арази кӕнӕн, уӕд цийфӕнди скъӕппӕги ку бахауӕн, уӕддӕр си исуӕгъдӕ уодзиан.

16. Сайтани скъӕппӕгутӕй нӕхе цӕй фӕрци багъӕуай кӕндзиан?

¹⁶ Кӕд нӕ бон ӕй Сайтани скъӕппӕгутӕй нӕхе исуӕгъдӕ кӕнун, уӕддӕр хуӕздӕр уайдӕ, еци скъӕппӕгути ма бахаун. Е ба нин ӕрмӕстдӕр Хуцауи фӕрци рауайдзӕй. Раст н’ адтайдӕ уотӕ сагъӕс кӕнун, ӕма дӕуӕн тӕссаг нӕй сӕрбӕрзонд кенӕ зудӕгӕнагӕ ке исуодзӕнӕ, уомӕй. Йеговӕн берӕ ӕнзтӕ ка лӕггадӕ кодта, етӕ дӕр бахауиуонцӕ еци скъӕппӕгути. Мадта алли бон дӕр Йеговӕмӕ ковӕ, цӕмӕй ӕй ести, уӕд фӕууинай, еци лӕгъуз менеугутӕ дӕ сагъӕстӕбӕл ӕма дӕ гъуддӕгтӕбӕл бӕрӕг кӕнун ке райдӕдтонцӕ, уой (Пс. 139:23, 24). Мадта макӕд бауадзӕ, цӕмӕй сӕрбӕрзонд ӕма зудӕгӕнагӕ исуай!

17. Тагъд Сайтанбӕл ци ӕрцӕудзӕй?

¹⁷ Мингай ӕнзти дӕргъи Сайтан адӕнбӕл цауӕн кӕнуй, фал тагъд рӕстӕги ба амӕттаги бунати ӕхуӕдӕг уодзӕй ӕма исӕфт ӕрцӕудзӕй (Рарг. 20:1–3, 10). Еци бонмӕ ци хъӕбӕр ӕнгъӕлмӕ кӕсӕн! Фал нӕ уӕдмӕти ба иронх кӕнун нӕ гъӕуй, Сайтан цӕхуӕн скъӕппӕгутӕ ӕвӕруй, уони. Мадта сӕрбӕрзонд макӕд исуо, удта дӕмӕ ци ес, уой фагӕбӕл нимайӕ. Сайтани нихмӕ федар лӕууӕ ӕма ди «раледздзӕй» (Иак. 4:7).