1. Dikon nos por kompará Satanas ku un yagdó?

E ÚNIKO kos ku un yagdó tin den su kabes ta pa kue òf mata su proi. Pa logra esaki, e ta usa vários tipo di trampa, manera esnan ku Yòb su amigu falsu a menshoná. (Yòb 18:8-10) Kiko un yagdó ta hasi pa kue un bestia den trampa? E ta tuma tur su tempu pa opservá e bestia. Unda e bestia ta bai? Kiko e ta gusta? Kua trampa lo ta fásil pa e kai aden? Satanas ta hasi meskos. E ta tuma su tempu pa opservá nos. E ta wak unda nos ta bai i kiko nos ta gusta. Djei e ta arma un trampa sperando ku nos lo kai aden sin ku nos a ripará. Pero, Beibel ta siña nos kon nos por evitá di kai den e trampanan ei. Anto si akaso nos kai den nan, e ta bisa ku nos por skapa.

2. Kua ta e dos trampanan ku Satanas tin mas éksito kuné?

² Dos di e trampanan ku Satanas tin mas éksito kuné ta orguyo i golosidat. * E tin míles di aña ta usa nan ku bon resultado. E ta manera un yagdó di para ku ta buska pa kue su proi den trampa òf nèt. (Sal. 91:3) Pero nos no tin nodi di kai den trampa di Satanas, pasobra Yehova a mustra nos kiko Satanas ta usa pa kue hende den trampa.—2 Kor. 2:11.

3. Dikon den Beibel tin algun ehèmpel di hende ku a kai den e trampa di orguyo i di golosidat?

³ Yehova ta siña nos kon pa evitá di kai den e trampa di  orguyo i di golosidat. Un manera ku e ta hasi esei ta di bisa nos kiko a pasa ku algun di su sirbidónan. Nos lo mira ku apesar ku e sirbidónan ei tabatin hopi tempu ta sirbi Yehova, tòg nan a kai den trampa di Satanas. Esaki ke men ku ni maske kiko nos hasi nos tambe lo kai den su trampa? Nò. Yehova a laga skirbi e ehèmpelnan ei den Beibel “komo spièrtamentu pa nos.” (1 Kor. 10:11) E sa ku for di nan nos por siña kon pa evitá di kai den Satanas su trampa. I si nos a kai mes, kon pa skapa for di nan.

4. Kiko lo pasa ku nos si nos ta orguyoso?

⁴ Satanas ke pa nos bira orguyoso pasobra e sa ku esei lo pone nos bira meskos kuné i nos lo pèrdè bida eterno. (Pro. 16:18) P’esei, Apòstel Pablo a spièrta ku si un hende bira orguyoso, lo e “risibí e mesun huisio ku Diabel a risibí.” (1 Tim. 3:6, 7) Esei por pasa ku nos sea ku nos tin hopi tempu òf tiki tempu ta sirbi Yehova.

5. Segun Eklesiástes 7:16 i 20, kiko un hende orguyoso lo hasi?

⁵ Hende orguyoso ta egoista. Satanas ke pa nos ta egoista. P’esei e ta purba di pone nos pensa mas riba nos mes ku riba Yehova, foral ora nos tin problema. Por ehèmpel, un hende a yega di akusá bo di un kos ku bo no a hasi òf a trata bo na un manera inhustu? Satanas lo keda kontentu si bo tira falta riba Yehova òf bo rumannan. E ke pa bo kere ku e úniko manera pa solushoná e problema ta di hasi kos na bo manera i no sigui e guia ku Yehova ta duna den su Palabra.—Lesa Eklesiástes 7:16, 20.

6. Kiko bo por siña for di un ruman na Hulanda?

⁶ Laga nos wak loke a pasa ku un ruman muhé na Hulanda, kende tabata laga e fayonan di otro rumannan traha riba su nèrvio. El a yega na un punto ku e no tabata por mas. El a bisa: “Mi  tabata sinti mi mi so, i mi no por a pordoná e rumannan. M’a bisa mi kasá ku nos tin ku bai un otro kongregashon.” Ma, e ruman muhé a wak e JW Broadcasting^® di mart 2016 ku a duna algun sugerensia kon pa trata ku fayonan di otro. El a konta: “M’a mira ku mi mester ta humilde i wak mi mes fayonan en bes di wak esnan di e rumannan. E Broadcasting akí a yuda mi kòrda ku Yehova i su soberania ta e kos di mas importante.” Pues, kiko nos tin ku hasi? Ora bo tin problema, keda pensa riba Yehova. Rog’é yuda bo mira bo rumannan manera e ta mira nan. E ta mira nan fayonan, pero tòg e ta dispuesto pa pordoná nan. Anto e ke pa bo hasi meskos.—1 Huan 4:20.

7. Kiko a pasa ku Rei Uzias?

⁷ Rei Uzias di Huda a laga orguyo strob’é di aseptá e spièrtamentu ku otronan a dun’é, i el a hasi algu ku e no tabatin derecho di hasi. E tabata un hende ku a logra hopi kos. El a gana hopi guera, konstruí hopi stat i e tabatin hopi kunuku. De echo, Beibel mes ta bisa ku “Dios a hasié prosperá.” (2 Kró. 26:3-7, 10) “Ma ora ku el a bira fuerte, su kurason a bira asina orguyoso ku el a aktua korumpí.” Yehova a bisa bon kla ku ta e saserdotenan so tabatin derecho di ofresé sensia den e tèmpel. Apesar di esei, tòg Rei Uzias a bai den e tèmpel i a bai kima sensia. Yehova no a keda kontentu ku loke e rei orguyoso ei a hasi i p’esei el a dal e ku lepra. Anto Uzias a keda un leproso pa restu di su bida.—2 Kró. 26:16-21.

8. Kon 1 Korintionan 4:6 i 7 lo yuda nos pa no kai den e trampa di orguyo?

⁸ Bo ta kere ku nos tambe por kai den e trampa di orguyo meskos ku Uzias? Wak loke a pasa ku José. E tabatin un negoshi ku tabata bai bon, i e tabata un ansiano ku tabata duna diskurso na asamblea, kongreso i te asta sirkuito tabata pidié pa konseho. El a rekonosé: “M’a stòp di konfia den Yehova. M’a kuminsá konfia den mi mes abilidat i eksperensia. M’a pensa ku mi tabata fuerte, pues m’a kuminsá ignorá Yehova su spièrtamentu i konsehonan.” José a kometé  un piká grave i a ser ekspulsá. Un par di aña pasá el a ser restorá. El a bisa: “Yehova a siña mi ku loke ta importante ta pa hasi loke e ta pidi nos hasi, no nos privilegionan.” Loke semper nos tin ku kòrda ta ku ta Yehova ta duna nos kualke abilidat ku nos tin òf kualke privilegio ku nos haña den kongregashon. (Lesa 1 Korintionan 4:6, 7.) Si nos ta orguyoso, Yehova lo no usa nos.

9. Ki efekto golosidat tabatin riba tantu Satanas komo riba Eva?

⁹ Asina bo tende golosidat, Satanas ta bini na bo mente. Tempu e tabata un angel di Yehova, lo e tabatin hopi privilegio. Pero e tabata ke mas. E tabata ke e adorashon ku ta Yehova so meresé. Satanas ke pa nos bira meskos kuné. Ta p’esei e ke laga nos sinti ku loke nos tin no ta sufisiente i ku nos mester di mas. E promé biaha ku el a purba esei tabata ku Eva. Yehova a perkurá sufisiente kuminda pa Eva i su esposo. Nan por a kome di “tur palu di e hòfi” ku eksepshon di un. (Gén. 2:16) Asina mes, Satanas a logra konvensé Eva ku e mester a kome di esun palu ei ku tabata prohibí. Eva no tabata satisfecho ku loke e tabatin, e tabata ke mas. Nos tur sa loke a sosodé despues. Eva a peka i a muri.—Gén. 3:6, 19.

10. Kon Rei David a kai den e trampa di golosidat?

¹⁰ Yehova a duna Rei David hopi kos: rikesa, prominensia i viktoria den hopi bataya. David mes a rekonosé ku tur e bon kosnan ku Dios a dun’é tabata “muchu hopi pa konta.” (Sal. 40:5) Pero dado momento, David a laga golosidat pon’é lubidá tur loke Yehova a dun’é. E tabata ke mas. Aunke e tabatin vários esposa, el a kuminsá deseá esposa di un otro hòmber: Bètsabé, esposa di Urías, e heteo. David tabata egoista, el a drumi ku Bètsabé i a sak’é na estado. Anto riba dje, David a sòru pa Urías ser matá! (2 Sam. 11:2-15) Kon bini David a hasi tur e kosnan ei? Ta pensa el a pensa ku Yehova no tabata mir’é? Aunke David a sirbi Yehova pa hopi tempu, el a laga golosidat domin’é i a sufri hopi pa esei. Ku  tempu David a atmití ku el a faya i a arepentí. Sin duda, el a keda masha kontentu ku Yehova a pordon’é.—2 Sam. 12:7-13.

11. Segun Efesionan 5:3 i 4, kiko lo yuda nos pa no kai den e trampa di golosidat?

¹¹ Kiko nos por siña for di loke a pasa ku David? Si nos no ke kai den e trampa di golosidat, nos mester keda kontentu ku tur e kosnan ku Dios a duna nos. (Lesa Efesionan 5:3, 4.) Ora nos kuminsá studia Beibel ku un hende, nos ta konseh’é pa tur dia e pensa riba algu ku e ke yama Yehova danki p’e. I si e hasi esei pa un siman largu, lo e yama Yehova danki pa shete diferente kos. (1 Tes. 5:18) Pero, abo mes ta hasi esei? Si bo meditá riba tur e kosnan ku Yehova a hasi pa bo, lo bo ta gradisidu. Anto ora bo ta gradisidu, bo ta kontentu ku loke bo tin. Anto ora bo ta kontentu ku loke bo tin, lo bo no kai den e trampa di golosidat.

12. Ki efekto golosidat tabatin riba Hudas Iskariot?

¹² Hudas Iskariot a kai den e trampa di golosidat i a bira un traidor. Tempu ku Hesus a skoh’é komo apòstel e no tabata asina. (Luk. 6:13, 16) Sin duda, Hesus tabata konfi’é ya ku Hudas tabata esun enkargá ku e kaha di plaka. Hesus i e apòstelnan tabata usa e sèn pa kubri nan gastunan den e trabou di prediká. E plaka tabata manera kontribushon pa e obra mundial. Apesar ku Hudas a tende Hesus bisa e hendenan vários biaha pa tene kuidou ku golosidat, el a ignorá tur e spièrtamentunan ei i a kuminsá kue plaka for di e kaha.—Mar. 7:22, 23; Luk. 11:39; 12:15.

13. Na ki momento Hudas su golosidat a sali na kla?

¹³ Hudas su golosidat a sali na kla un poko promé ku Hesus a muri. Simon e leproso a invitá Hesus i su disipelnan i tambe Maria i su ruman muhé, Marta, na su kas pa kome algu. Durante e komementu ei, Maria a lanta i a basha un zeta perfumá masha kostoso riba Hesus su kabes. Hudas i e otro disipelnan a rabia masha hopi mes. E otro disipelnan a pensa ku lo tabata mihó pa usa e sèn ei pa yuda esnan den nesesidat. Pero, Hudas a rabia pa un otro motibu. E “tabata un ladron” i tabata ke hòrta e sèn for di e kaha. Anto despues, Hudas su golosidat a pone ku el a traishoná Hesus. El a bend’é pa 30 moneda di plata; preis di un katibu.—Huan 12:2-6; Mat. 26:6-16; Luk. 22:3-6.

14. Kon un pareha a apliká Lukas 16:13?

¹⁴ Wak kiko Hesus a kòrda su siguidónan: “Boso no por ta esklabo di Dios i di Rikesa.” (Lesa Lukas 16:13.) I te ainda esei ta bèrdat. Por ehèmpel, wak kon un pareha na Rumania a apliká loke Hesus a bisa ora nan tabatin e posibilidat di bai traha na un pais hopi riku. Nan a bisa: “Nos tabatin un debe hopi grandi na banko, pues na promé instante nos a pensa ku e trabou akí tabata un bendishon di Yehova.” Pero, tabatin un trampa. E trabou lo a stroba nan ku nan sirbishi na Yehova. Despues ku nan a lesa e artíkulo “Mantené Lealtat ku un Kurason Kompleto” den E Toren di Vigilansia di 1 di ougùstùs 2008, nan a tuma nan desishon. Nan a konta: “Si nos lo a muda pa un otro pais pa gana mas plaka, nos lo tabata poniendo nos amistat  ku Yehova na di dos lugá.” Pues, nan a nenga e trabou. Kiko a pasa despues? E esposo a haña un trabou na su mes pais i nan por a kubri tur nan gastunan. E esposa a bisa: “Yehova su man nunka ta kòrtiku.” E pareha akí ta kontentu ku nan a hasi Yehova nan Doño, i no plaka.

15. Kon nos sa ku nos por skapa for di e trampanan di Satanas?

¹⁵ Kiko awor si nos a ripará ku nos a kai den e trampa di orguyo i di golosidat? Pablo a bisa ku si Diabel gara un hende, e por skapa for di e trampa. (2 Tim. 2:26) Esei ta loke a pasa ku David, el a skucha Natan su konseho, a arepentí i a drecha su amistat ku Yehova. Loke nunka nos no tin ku lubidá ta ku Yehova ta mas poderoso ku Satanas. Pues, sin importá ki trampa Diabel pone pa nos, nos por skapa ku Yehova su yudansa.

16. Kiko nos tin ku hasi pa no kai den e trampa di orguyo i di golosidat?

¹⁶ Ta klaru ku ta mihó pa nos no kai mes den e trampa di orguyo i di golosidat. Pero, nos tin mester di Yehova su yudansa. Nunka nos mester kere ku nos lo no kai den Satanas su trampa. Pasobra asta hende ku a sirbi Yehova pa hopi tempu a kai den e trampanan ei. P’esei, roga Yehova tur dia pa yuda bo mira si tin algu robes den loke bo ta pensa i hasi. (Sal. 139:23, 24) Hasi bo bèst pa nunka kai den e trampa di orguyo i di golosidat.

17. Kiko lo pasa un bes akí ku e yagdó, Satanas?

¹⁷ Aunke Satanas tin míles di aña ta yag, un bes akí lo e ser mará i, ku tempu, destruí. (Rev. 20:1-3, 10) Nos tin masha gana pa e dia ei yega pa kaba. Pero mientrastantu, keda alerta pa e trampanan di Satanas. Lucha pa bo no kai den e trampa di orguyo i di golosidat. P’esei, laga nos tur ta determiná pa “oponé Diabel, i lo e hui” for di nos.—Sant. 4:7.