1. Ngera uchul me ngsebeched lomekesiu er a Satan el mora chad el omedikl a charm?

A CHAD el omedikl a charm a di chimo moktek er ngii, el ngii a mdechemii me a lechub e ngmekodir a charm. Ngua losaod a ta er tirke el mlo mengelaod er a Job, nglocha mo ousbech a kakerous el bedikl. (Job 18:8-10) Ngmekera chad el meduch el omedikl a charm e mekrolii el mora bedeklel? Ngmesuub er a charm. Ngmo er ker? Ngera el tekoi a soal? Ngera kot lungil el bedikl el kirel? A Satan a di ua ngika el chad el omedikl a charm. Ngmesuub er kid. Ngomtab aike el debo er ngii me aike el soad. E seikid e ngrullii a bedeklel el lomdasu el kmo ngmo medeklid. Me nguaisei engdi a Biblia olterekokl er a rengud el kmo a lsekum kede obedikl e ngsebeched el chemiis. Ngdirrek el osisecheklid el mo olechib er kid er aike el bedeklel.

2. Ngera el eru el bedeklel a Satan a kmal oureor?

² A eru er a bedeklel a Satan el kmal oureor a kldidairreng me a ngibeserreng. * Ngmla mo betok el telael el rak el loureor aika el bedeklel a Satan. Ngika di ua chad lomedikl a suebek el charm el omekrael a charm el mora bedikl me a lechub e ngousbech a uuked el omedikl. (Psa. 91:3, NW) Me nguaisei engdi kid a sebeched el diak dobedikl er a Satan. Ngmekera uaisei? E le Jehovah a mla ocholt er kid aike el lousbech a Satan lomedikl er a rechad.​—2 Ko. 2:11.

3. Ngera uchul me a Jehovah a lilecha cheldecheduch er a Biblia el kirir a rechad el mlo kedidai a rengrir me a remlo nguibes a rengrir?

³ A ta er a rolel e a Jehovah olisechakl er a kngtil a kldidairreng me a ngibeserreng a sel louchais er kid a tekoi el dilubech el mora rebebil mesiungel. Me kede mo mesaod er a rebebil mesiungel a Jehovah. Mutebengii el kmo a Satan a mle sebechel  lomedikl er tirka el kmal mle mesisiich a klaumerang er tir. Tia ngbelkul a kmo ngdiak a ta er kid el sebechel el mo mesisiich er a kldidairreng me a ngibeserreng? Ngkmal diak leuaisei. A Jehovah a lilecha ika el cheldecheduch er a Biblia me bo lsebeched el “mela klubeled er ngii.” (1 Ko. 10:11) Ngmedengei el kmo aika sebechel ngosukid el oibngid er a bedeklel a Satan.

4. Ngera sebechel duubech el mei er kid a lsekum e ngmo kedidai a rengud?

⁴ A Satan a kmal soal a lebo lekedidai a rengud. Ngmedengei el kmo sel bo lekedidai a rengud e kede mo uai ngii e mo diak el sebeched el kiei el mo cherechar. (Osi. 16:18) A apostol Paulus a milengelechel el kmo a chad a sebechel el mo ‘kedidai a rengul e mo obals el di ua Diabelong.’ (1 Ti. 3:6, 7) Tia sebechel duubech el mora ngii di el chad. Ngsebechel el duubech el mora chad el dirk mle er a klemerang me a lechub e ngmla mesiou er a Jehovah el betok el rak.

5. El ua losaod a Olisechakl 7:16, 20, ngmekera chad e mo olecholt er a kldidairreng?

⁵ A remekedidai a rengrir el chad a melatk er a di tir. Satan a melasem el meruul er kid el di mo melatk er a di kid e diak dolatk er a Jehovah, tokubets sel bo dechelebangel a ringel. El ua tiang, ngmla ta el motelechakl er a tekoi el dimlak mrellii? Me a lechub e ngdimlak lemelemalt a omeruul leko er kau? A Satan a kmal soal a bo el kesib a rengum er a Jehovah me a rudam er kau. E kmal soal a obo momdasu el kmo a di ta el rolel e ngmesmechokl a lsekum ngdi kau el sumecheklii el diak loeak a ulekrael er a Tekingel a Jehovah.​—Monguiu er a Olisechakl 7:16, 20.

6. Ngera sebechem el suubii er a ta el odos er a Netherlands?

⁶ Molatk er a experience er a ta el odos er a Netherlands el kmal mlo checherd a rengul er a chelitecheterir a rebebil. Ngika ngngileltii el mo diak leteloi er tirka el chad. Ngmelekoi el kmo: “Ak mlo omelechesiu el kmo ngkmal diak a resechelik e dimlak el sebechek el ngodechii a uldesuek el kirir. Ak dilu er a bechik el kmo  ngkiram el melukl el mora ta er a ongdibel.” Me nguaisei, engdi ngmilsa broadcast er a March 2016. Tia el prokuram a milsaod a bebil rolel e ngsebeched el outekangel a meringel el blekerdelir a rebebil. Ngdmu el kmo: “Ak milsa el kmo ngmle kirek el mo ngariou a renguk e mo melatk a cheleuid el omerellek er a bai kulasem el melodech a blekerdelir a rudam me a rudos er a ongdibel. Tia el prokuram a kmal ngilsukak el mo melatk er a Jehovah, e ngii a ngar ngii a llemeltel el ouchais er kid aike el kired el meruul.” Ke mtebengii a belkul tiang? Sel bo mchelebangel a ringel e molatk er a Jehovah. Molengit er ngii me lengesukau el mo omes er a rebebil el uai ngii. A Demam el ngar er a eanged a mes a cheleuid el omerellir engdi ngkongei el ousubes er tir. Ngkmal soal a omoruul er a osisiu el tekoi.​—1 Jn. 4:20.

7. Ngera dilubech el mora King Usia?

⁷ A kldidairreng a rirellii a King Usia er a Juda el mo diak loltirakl a ulekrael e mo meruul er a tekoi el dimlak a llemeltel el mo meruul er ngii. A Usia a riruul a kmal betok el ungil tekoi. Ngmlo mesisiich er a betok el mekemad, milekedechor a betok el mats, e mle betok a sersel. “Dios a ulemekngeltengat er ngii.” (2 Kr. 26:3-7, 10) Me nguaisei a Biblia melekoi el kmo: “E ngdi ser a loleketek a klisichel a Usia e ng mlo kedidai a rengul el mlo uchul a temellel.” A Jehovah a dilu el kmo te di prist a sebecherir melul a ochod er a templo. Engdi Usia mlo soiseb er a templo el mo melul ochod. A Jehovah a kmal dimlak el soal tia el tekoi me ngrirellii el mo chebedes. Ngika di mle chebedes el mora kodellel.​—2 Kr. 26:16-21.

8. Ngmekera e a bo doltirakl er a 1 Korinth 4:6, 7 e ngosukid me ngdiak el bo lekedidai a rengud?

⁸ Kid, ngsebechel mo kedidai a rengud e mo rullii a klengit el ua Usia? Molatk er a José. Ngika kmal mle ungil chad er a siobai. Ngdirrek el mle ta er a remechuodel el rechad er a ongdibel a kmal milengull er ngii. Nguleltobed a cheldecheduch er aike el ta el sils el ongdibel me a meklou el ongdibel, e a rudam el oldingel a ongdibel a uleker er ngii el kirel a ulekrael. Engdi ngmelekoi el kmo: “Ak di mle ultuil er a uldesuek. Ngdimlak kultuil er a Jehovah. A kulemdasu el kmo ak kmal mesisiich, e dimlak kultirakl a uleklatk me a ulekrael er a Jehovah.” A José a rirebet er a oberaod el klengit e milsuld a ngklel. Sesei el rak er a mla me mong e ngliluut el mei er a klemerang. Ngmelekoi el kmo: “A Jehovah a mla osisecheklak el kmo ngdiak el klou a ultutelel a lengar ngii a deruchelled, ngbai sel kot el klou a ultutelel a bo dolengesenges  er ngii.” Lak dobes el kmo a ngii di el duch me a ileakl el techall el dolab er a ongdibel a ngar er a Jehovah el mei. (Monguiu er a 1 Korinth 4:6, 7.) A lsekum e ngkedidai a rengud e a Jehovah a diak el bo lousbech er kid.

9. A ngibeserreng ngera ngrirellii el mora Satan me a Eva?

⁹ Kede locha mo omdasu er a Satan el Diabelong sel dolatk el kirel a ngibeserreng. A Satan a locha mle ta er a anghel el mla er ngii a ileakl el techall el lolab, me nguaisei engdi ngmle soal a lmuut el betok. Ngmle soal a omengull el kirel el di mora Jehovah. A Satan a soal a bo deuai ngii me ngmeruul er kid el mo diak lungil a rengud er aike el ngar ngii er kid. Tia lurruul er ngii el kot el mora Eva. A Jehovah a milsa Eva me a bechil a betok el kall el mle sebechir el mengang. Ngmle sebecherir el menga “redechel a rokui el kerrekar” engdi ngdi mle chimo el kerrekar a dimlak el sebechir el menga er ngii. (Gen. 2:16) Me nguaisei a Satan a chilebeldir a Eva el mo omdasu el kmo ngmle kirel menga er sel blul el kerrekar. A Eva a mlo diak loba omereng el saul el kirel aike el mla er ngii er ngii. Ngmle soal a lmuut el betok. E kid a medengelii a mlo rsel. A Eva rirebet er a klengit e a cherengel a taem e ngmlad.​—Gen. 3:6, 19.

10. A ngibeserreng ngera ngrirellii el mora King David?

¹⁰ A ngibeserreng a rirellii a King David el mo obes aike el bla lebsang a Jehovah. Aika uldimukl er ngii a kerruul ngdirrek a Jehovah a rirellii el mo chetengakl e milsa klisiich er a recherrouel er a mekemad. A David a di mle ngii el dmu el kmo a klengeltengat er a Jehovah a ‘kuk betok er a ikel sebechel el mchais.’ (Psa. 40:5) Engdi ngngar ngii a taem el David a ulebes aike el bla lebsang a Jehovah. Ngmlo diak lungil a rengul er aike el ngar ngii er ngii. Alta ngmle betok a bechil, ngmlo nguibes a rengul er a bechil a ta er a chad. Ngika el redil a mle Bathseba el bechil a Uria el Hitait. A David a mlo obengkel a Bathseba me ngmlo dioll. Me nguaisei, tia diak el sel kot el mekngit el tekoi el lerirellii. A David a uchul me ngmlad a Uria! (2 Sa. 11:2-15) Ngera ngulemdasu a David? Ngika ngulemdasu el kmo a Jehovah a diak el sebechel mes aika el tekoi? Alta David a milsiou er a Jehovah el kemanget el taem engdi ngmlo nguibes a rengul. Tia mlo uchul me ngmlo betok a ringel el mo er ngii. A uriul e a David a uluuchais a kngtil e ulebult. Nglocha kmal mle dmeu a  rengul el lmuut el moba kengei er a Jehovah!​—2 Sa. 12:7-13.

11. A doltirakl er a Efesus 5:3, 4, e ngngera ngosukid me ngdiak bo lengibes a rengud?

¹¹ Ngera kede suubii er a David? Kede suubii el kmo sel doba omereng el saul el kirel aike el bla lebeskid a Jehovah e ngngosukid me ngdiak bo el ngibes a rengud. (Monguiu er a Efesus 5:3, 4.) Ngkirel mo ungil a rengud er aike el ngar ngii er kid. A rebeches el mo mesuub a Biblia a muchelechel el mo melatk er a ta el tekoi el sebechir el mereng a sulel a Jehovah el kirel. A lsekum e ngmeruul er tia el tekoi er a bek el sils e ngbelkul a kmo ngmo meluluuch el kirel a euid el kakerous el tekoi. (1 Th. 5:18) Kau, ke meruul er a osisiu el tekoi? A lsekum ke melebedebek aike el rokui el bla lrruul a Jehovah el kirem e ngngosukau el mo oba omereng el saul. E sel moba omereng el saul e ngmo ungil a rengum er aike el ngar ngii er kau. Sel sekum e ngungil a rengum er aike el ngar ngii er kau e ngdiak bo lengibes a rengum. 

12. A ngibeserreng ngera ngrirellii el mora Judas Iskariot?

¹² A ngibeserreng a rirellii a Judas Iskariot el mo oterur a Jesus. Ngika dimlak leuaisei er a uchelel. (Lk. 6:13, 16) A Jesus a ngileltii el mo ta er a rechapostol er ngii. A Judas a chad el mle sebeched lultuil er ngii e le Jesus a uluumerang er ngii e tiltkii el mo oungerachel er a blil a udoud. Aika el udoud a luluusbech a Jesus me a rechapostol el mesiou er a urerir er a berkel a klumech. Aika ludoud a di uaike el tenget el dousbech el mesiou er a ureor er a berkel a klumech er chelecha el taem. Engdi ngmlo er ngii a taem el Judas a ulemuchel el merechorech aika el udoud, alta ngmle betok el taem lorrenges er a Jesus el mesaod a kngtil a ngibeserreng. (Mk. 7:22, 23; Lk. 11:39; 12:15) Ngika ultngakl aika el uleklatk.

13. Ngoingerang e ngulebeketakl a ngelbesel a rengul a Judas?

¹³ Ngulebeketakl a ngelbesel a rengul a Judas er a tekoi el dilubech er a telkib el taem er uchei er a kodellel a Jesus. A Jesus me a redisaiplo er ngii me a dirrek el Maria me a Martha a mlara blil a Simon el ngike el silecher el chebedes. Sera lomengur e a Maria milekiis e olechubel er a meringel a cheral chilt er a bdelul a Jesus. A Judas me tirke el bebil er a redisaiplo a kmal dimlak el sorir tia el tekoi. Tirke el bebil er a redisaiplo a locha ulemdasu el kmo aika el udoud a mle sebechir el ousbech el kirel a berkel a klumech. Engdi Judas a mle ngodech a moktek er ngii. Ngika mle “merechorech” e mle soal melai aike el udoud el mlara blil a udoud. A uriul e a ngelbesel a rengul a rirellii el mo oterur a Jesus el kirel a cheral a sibai.​—Jn. 12:2-6; Mt. 26:6-16; Lk. 22:3-6.

14. Te milekera ta el obekel e oltirakl er a ulekrael er a Lukas 16:13?

¹⁴ A Jesus a ulemeklatk er a redisaiplo er ngii er tia el klemerang: “Ng diak el sebechiu el dul mesiou er a Dios ma udoud.” (Monguiu er a Lukas 16:13.) Tia kmal dirk klemerang. Molatk er a rolel e a ta el obekel er a Romania a milechei aika el tekingel a Jesus me ngomekrael er tir. Ngmlo er tir a techall el mo oureor el telkib el taem er a beluu el klou a udoud er ngii. Te melekoi el kmo: “Ngmla er ngii a klou el loan er kemam er a bank el dirk ki mulengkad er ngii me a ki ulemdasu el kmo tia el ureor a klengeltengat el mlara Jehovah.” Me nguaisei engdi ngmla er ngii a kngtil. A lsekum te kongei er tia el ureor e ngmo kesai a temir el meruul er a omesiungir el mora Jehovah. Te milenguiu er a suobel el ngar er A Ongkerongel er a August 1, 2008 el dai er ngii a kmo, “Molemolem er a Blakerreng el Oba Rengum el Rokir.” Te melekoi el kmo: “A lsekum a moktek er kemam a melukl el mora ta er a beluu el mo  mesuk er a lmuut el klou el udoud, e ngbelkul a kmo deleuill er kemam me a Jehovah a diak el kot el klou a ultutelel tekoi er a chelsel a klengar er kemam. Ngmle ulterekokl a rengmam el kmo aki molukl e aki mo mechitechut er a tekoi er a klereng.” Me te dimlak el kengei el mo nguu tia el ureor. Me ngngera dilubech? Ngike el bechiil el sechal a miltik er a ureor er a belurir el mle sebechel mesterir aike el lousbech. A bechil a melekoi el kmo: “Ngkmal diak lekedeb a chimal a Jehovah.” Tirka el obekel a kmal dmeu a rengrir le te ngileltii a Jehovah el mo Mastang er tir el diak el ludoud.

15. Ngera uchul me ngsebechel mo ulterekokl a rengud el kmo ngsebeched el mo mesisiich a lsekum e kede mla obedikl?

¹⁵ E a lsekum e ke mtebengii el kmo ngmla mo kedidai a rengum me a lechub e nguibes a rengum? Ngdirk sebechem el mo mesisiich er ngii. A apostol Paulus a dilu el kmo tirke el “mla mudechem” er a bedeklel a Satan a dirk sebechir el chemiis. (2 Ti. 2:26, BT) Tiakid a lerirellii a David. Ngulerrenges a omesmechokl er a Nathan, ulebult er a ngelbesel a rengul, e silmechii a deleuill er ngii me a Jehovah. Lak mobes el kmo, a Jehovah a lmuut el mesisiich er a Satan. Me a lsekum ke kongei er a ngelsuil, e ngsebechem el mo mesisiich er a ngii di el bedeklel a Satan.

16. Ngera mo ngosukid el oibngid er a bedeklel a Satan?

¹⁶ Me nguaisei engdi ngbai lmuut el ungil a doibngid er a bedeklel a Satan. Tia di sebechel meketmokl loeak a ngelsuil a Dios. Me nguaisei engdi ngkmal diak el kired el mo omdasu el kmo kede mesisiich er a klemerang. Te ngar ngii a remeketeketang el mesiungel a Jehovah el mla mo mechitechut er a kldidairreng me a ngibeserreng. Me molengit er a Jehovah er a bek el sils me lengesukau el merriter a uldesuem me a blekerdelem. (Psa. 139:23, 24) Lak bechei aika el tekoi me bo luchul e bo mechitechut!

17. Ngera di kmedung el mo duubech el mora Diabelong?

¹⁷ Ngmla mo betok el telael el rak el omedikl er a rechad a Satan. Engdi ngdi kmedung e ngmo mechesimer e mo nguemed. (Och. 20:1-3, 10) Kede kmal lomes el beduluchei el kirel tia el taem. Me dolemolem el klekar me lak dobedikl er a Satan. Bo leblak a rengud el oureor el mo mesisiich er a kldidairreng me a ngibeserreng. Mrellii er a rengum el ‘momtok er a Diabelong, me bo lechiis er kau.’​—Jak. 4:7.