1. Wuarom kjenn wie dän Soton met eenen Jäaja vejlikjen?

EEN Jäaja well daut Tia enne Faul brinjen ooda daut dootmoaken. Hee brukt veleicht veschiedne Schlenjen ooda Faulen, biejlikj soo aus eena von Hiob siene schlajchte Frind daut säd (Hiob 18:8-10). Woo kaun een Jäaja daut Tia enne Faul locken? Hee deit daut beoobachten. Biejlikj, wua daut hanjeit, no waut daut hinjaraun es un woont de baste Faul sennen wudd. De Soton es soo aus een Jäaja. Dee deit ons uk beoobachten. Dee sitt, wua wie hangonen un no waut wie hinjaraun sent. Un dan lajcht dee eene Schlenj un hopt, daut wie doa nenstaupen woaren. Oba de Schreft sajcht, woo wie doafäa oppaussen kjennen, daut wie nich en de Schlenj nenkomen, un daut wie doa rutkomen kjennen, wan wie doa nenjekomen sent.

2. Waut sent twee von dän Soton siene baste Schlenjen?

² Stolt un Bejia * sent twee von dän Soton siene baste Schlenjen. Doamet haft dee aul dusende Joaren fein kunt schaufen. Hee es soo aus een Jäaja, waut de Väajel prooft enne Schlenj to locken ooda dee metem Nat to jriepen (Psa. 91:3). Oba wie brucken dän Soton nich enne Schlenj nenranen. Wuarom nich? Wiels Jehova haft ons openboat, woo de Soton schaufen deit (2. Kor. 2:11).

3. Wuarom rät de Schreft von soone, waut stolt un bejierich worden?

³ Jehova brukt Biespels von siene Deena toom ons wiesen, woo schlajcht daut utkjemt, wan eena stolt ooda bejierich woat. Wie woaren seenen, woo de Soton mau rajcht soone en siene Faul locken kunn, waut Jehova aul lang tru deenden. Bediet daut nu, daut wie uk woaren stolt un bejierich  woaren? Nä. Jehova haft soone Biespels en de Schreft oppschriewen loten, “om ons to woarnen” (1. Kor. 10:11). Hee weet, daut wie von soone Biespels lieren kjennen un doaderch dän Soton siene Faulen utem Stich gonen ooda doa rutkomen, wan wie doa sent nenjeroden.

4. Wuatoo fieet Stolt?

⁴ De Soton well, daut wie stolt woaren. Hee weet, daut wie dan soo woaren aus hee un daut eewje Läwen vespälen (Spr. 16:18). De Apostel Paulus woarnd ons un säd, daut wie nich sullen “stolt . . . [woaren], un doaderch tofaul komen, soo aus de beesa Fient selfst” (1. Tim. 3:6-7). Daut kaun jiedrem eenen von ons passieren, aus wie Jehova noch mol korz deenen ooda aul väle Joaren.

5. Woo es daut no Liera 7:16, 20 no to seenen, daut wäa stolt es?

⁵ Stolte Menschen denkjen bloos aun sikj. De Soton well, daut wie väl dolla aun ons selfst denkjen aus aun Jehova, besonda wan wie Trubbels haben. Haft die biejlikj mol wäa orrajcht beschulcht? Ooda haft die wäa orrajcht behaundelt? De Soton wudd daut jleichen, wan du Jehova ooda diene Gloowesbreeda de Schult jeefst. Un hee well die uk enbillen, daut du selfst dän Trubbel väl bäta leesen kaust, aus wan du die no Jehova siene Aunwiesungen rechst (läs Liera 7:16, 20).

6. Waut kjenn wie von daut lieren, waut eene Sesta von Hollaunt beläwd?

⁶ Räd wie mol von eene Sesta von Hollaunt, waut sikj äwa aundre äare Fäla oajren must. See wort sikj eenich, daut see nich mea met dee toop sennen wull. See sajcht: “Ekj feeld mie sea auleen un ekj kunn miene Meenunk äwa dee nich endren. Ekj säd to mienen Maun, daut wie wudden sellen to eene aundre Vesaumlunk jehieren.” Dan kjikjt see daut Moonatsprogram von Moaz 2016 opp JW Broadcasting^®. En dit Program wia sea feina Rot bennen, waut wees, woo eena met aundre  äare Schwakheiten omgonen sull. De Sesta sajcht wieda: “Ekj wort en, daut ekj deemootich sennen must un no miene Fäla kjikjen, enne Städ proowen de Breeda un Sestren von de Vesaumlunk to endren. Daut Program holp mie, aun Jehova to denkjen, waut daut Rajcht haft to sajen, waut wie doonen sellen.” Waut kjenn wie doavon lieren? Wan du Trubbels hast, dan denkj aun Jehova. Pracha am, daut du äwa aundre soo denkjen kaust, aus hee deit. Dien himlischa Voda sitt dee äare Fäla, oba hee es reed dee to vejäwen. Un hee well, daut du daut uk deist (1. Joh. 4:20).

7. Woo wort de Kjennich Usija, un woo kjeem daut ut?

⁷ De Kjennich Usija von Juda wort stolt, un doawäajen neem hee nich Rot aun un deed waut, wua hee nich daut Rajcht too haud. Hee vestunt sikj met sea väl. Hee jewonn mieremol em Kjrich, bud väl Städa un hilt sea opp de Foarmoabeit. De Schreft sajcht: “De HAR [jeef] am Erfolch” (2. Chr. 26:3-7, 10). “Aus hee oba sea majchtich jeworden wia, deed sien Hoat sikj to sien vedoawen äwahäwen.” Jehova haud ea aul jesajcht, daut bloos de Priesta em Tempel sullen Weiruak vebrennen. Oba de Kjennich Usija kjeem doawäajen em Tempel nenn, om Weiruak to vebrennen. Jehova wort dan sea ontofräd un schluach am met de Leprakrankheit. Hee haud dise Krankheit, bat hee storf (2. Chr. 26:16-21).

8. Woo kjenn wie no 1. Korinta 4:6-7 no doafäa oppaussen, daut wie nich stolt woaren?

⁸ Kjenn wie uk stolt woaren un en eene Schlenj nenjeroden, soo aus Usija? See wie mol, waut José beläwd. Hee wia een sea gooda Jeschaftsmaun un een gooda Eltesta en de Vesaumlunk. Hee hilt Räden opp Kongressen un mau rajcht Kjreisoppsechtasch fruagen am no Rot. Hee sajcht: “Ekj vetrud opp mie selfst un opp miene ieejne Erfoarunk un nich opp Jehova. Ekj docht, daut ekj stoakj wia, un doawäajen horcht ekj nich no Jehova siene Woarnungen un no sienen Rot.” José bejinkj eene schwoare Sind un wort utjeschloten. Een poa Joa trigj kjeem hee wada bie. Nu sajcht hee: “Jehova haft mie jelieet, daut daut nich wichtich es, besondre Oppgowen en de Vesaumlunk to haben, oba no am to horchen.” Well wie emma doaraun denkjen, daut aules, waut wie kjennen, un de Oppgowen,  waut wie en de Vesaumlunk haben, von Jehova komen (läs 1. Korinta 4:6-7). Wan wie stolt sent, sent wie fa Jehova nich daugboa.

9. Waut deed de Soton un uk Eva, wäajen dee bejierich wieren?

⁹ De Soton es daut baste Biespel fa bejierich sennen. Aus dee eent von Jehova siene Enjel wia, haud dee secha väl feine Oppgowen. Oba dee wull mea. Dee wull, daut se am aunbäden, wuafäa bloos Jehova daut Rajcht haud. De Soton well, daut wie soo woaren aus dee un doamet ontofräd sent, waut wie haben. Daut proowd dee aul Eva entobillen. Jehova haud leeftolich doafäa jesorcht, daut Eva un äa Maun äwajenuach scheenet Äten hauden. Dee kunnen “von irjent eenen Boom em Goaden äten”, bloos von eenen nich (1. Mo. 2:16). Oba de Soton proowd doawäajen Eva entobillen, daut see krakjt von disen Boom äten must. Eva wia nich dankboa fa daut, waut see haud – see wull mea. Un wie weeten, woo daut utkjeem. Eva deed sindjen un storf met de Tiet (1. Mo. 3:6, 19).

10. Woo kjeem daut ut, daut de Kjennich David bejierich wia?

¹⁰ Jehova jeef David väl Sachen, biejlikj Rikjtum un daut hee kunn Kjennich sennen un daut hee mieremol em Kjrich jewonn. David wia sea dankboa doafäa, waut Jehova am jeef. Hee säd mau rajcht, daut daut väl mea wia, aus hee “opprieejen kunn” (Psa. 40:6). Oba dan wort hee bejierich un wull mea haben, aus Jehova am jejäft haud. Wan David uk aul miere Frues haud, leet hee oba too, daut hee een orrajchtet Velangen no eene Fru kjrieech, waut aul eenen Maun haud. Dise Fru wia Batseba un äa Maun wia Uria, de Hetita. David wia bejierich un veläwd sikj met Batseba un see wort schwanga. Waut hee deed, wia sea schlajcht, oba hee deed noch waut schlemret. Hee leet Uria dootmoaken! (2. Sam. 11:2-15). Waut haft dee sikj doabie jedocht? Kunn hee sikj nich väastalen, daut Jehova aules seenen kunn? David haud Jehova väle Joaren tru jedeent, oba nu wort hee bejierich un must väl doafäa lieden. Oba met de Tiet stunt hee siene Sind too un haud een Leetsennen. Woo dankboa hee nich wia, daut  hee wada kunn Jehova sien Frint sennen! (2. Sam. 12:7-13).

11. Waut kaun ons no Efeesa 5:3-4 no halpen, daut wie nich bejierich woaren?

¹¹ Waut lieet ons daut, waut David beläwd? Daut lieet ons, daut wie nich brucken jiezich, ooda bejierich woaren, wan wie dankboa bliewen fa daut, waut Jehova ons jejäft haft (läs Efeesa 5:3-4). Wie motten met daut tofräd sennen, waut wie haben. Niee Bibelschiela woat toojerot, daut see Jehova jieda Dach fa eene Sach sellen dankscheen sajen. Wan dee daut doonen, dan haben dee Jehova en eene Wäakj fa säwen Sachen dankscheen jesajcht (1. Tess. 5:18). Doo wie daut biejlikj soo? Wan wie doaräwa nodenkjen, waut Jehova aules fa ons jedonen haft, woa wie dankboa sennen. Un wan wie dankboa sent, dan woa wie tofräd sennen un daut woat ons halpen, nich bejierich to woaren.

12. Waut deed Judas Iskariot, wäajen hee bejierich wia?

¹² Judas Iskariot wort bejierich un deed waut sea schlajchtet un verod Jesus. Oba hee wia ea nich soon schlajchta Mensch (Luk. 6:13; 6:16, JHF). Jesus wäld am aus sienen Apostel ut. Un hee vestunt sikj secha met väl un Jesus veleet sikj opp am un jeef am de Veauntwuatunk äwa de Jeltkauss. Jesus un de Apostel brukten dit Jelt toom daut Prädichtwoakj derchfieren. Daut wia biejlikj soo aus de Gowen vondoag dän Dach toom daut Woakj oppe gaunze Welt unjastetten. Oba met de Tiet funk Judas aun to stälen, wan Jesus uk foaken doafäa jewoarnt haud, nich jiezich, ooda bejierich to woaren (Mar. 7:22-23; Luk. 11:39; 12:15). Oba Judas horcht nich no dise Woarnunk.

13. Wanea wia to seenen, daut Judas bejierich wia?

¹³ Een Stootje ea Jesus dootjemoakt wort, wia to seenen, daut Judas Iskariot bejierich jeworden wia. Jesus un siene Jinja un uk Maria un äare Sesta Marta wieren bie Simon dän Lepra hanjekroacht toom äten. Aus see doa wieren, stunt Maria opp un goot eene diere Eelj, waut sea scheen rikjt, äwa Jesus sienen Kopp. Judas un de aundre Jinja wieren vestalt doaräwa. De Jinja dochten veleicht, daut dit Jelt haud kunt fa dän Deenst jebrukt woaren. Oba bie Judas wia daut aundasch. “Hee wia een Stäla” un wull sikj Jelt ut de Kauss stälen. Lota verod hee Jesus dan, wäajen hee bejierich no Jelt wia (Joh. 12:2-6; Mat. 26:6-16; Luk. 22:3-6).

14. Woo kjeem een Poa Lied daut no, waut et en Lukas 16:13 sajcht?

¹⁴ Jesus säd to siene Nofolja: “Jie kjennen nich Gott un daut Rikjtum tojlikj deenen” (läs Lukas 16:13). Daut es vondoag dän Dach uk noch soo. See wie mol, woo een Poa Lied en Rumänien daut nokjeem, waut Jesus säd. Dee kjrieejen een Aunjebott, en een rikjet Launt to schaufen. See sajen: “Wie hauden eene groote Schult bie de Bank un doawäajen docht wie, daut dit een Säajen von Jehova wia.” Oba doa wia een Trubbel. Dee wudden dan nich mea soo väl Tiet haben, om Jehova to deenen. Nodäm daut see dän Artikjel jeläst hauden “Von Herzen kommende Loyalität bewahren” em Wachtturm vom 15. August 2008, worden see sikj eenich, dise Oabeit auftosajen. See sajen: “Wan wie no een aundret Launt trakjen wudden, om mea Jelt to vedeenen, dan wudd Jehova bie ons nich mea daut ieeschte sennen. Wie wieren ons gaunz secha, daut wie em jeisteljen wudden hinjastalich bliewen.” Waut passieed lota dan? De Maun funk dan eene Oabeit en Rumänien, waut an holp, äare Onkosten to betolen. De Fru sajcht: “Jehova siene Haunt es  kjeenmol too kort.” Dit Poa Lied es sea schaftich, daut see Jehova deenen un nich daut Jelt.

15. Wuarom kjenn wie ons secha sennen, daut wie wada ut dän Soton siene Schlenjen rutkomen kjennen?

¹⁵ Waut kjenn wie doonen, wan wie enwoaren, daut wie stolt ooda bejierich jeworden sent? Wie kjennen ons endren. Paulus säd, daut wie “dän beesen Fient ut de Schlenj komen” kunnen (2. Tim. 2:26). Daut es, waut David deed. Hee horcht no dän strenjen Rot von Natan, haud een Leetsennen äwa siene Sind un muak daut met Jehova wada goot. Wie sellen kjeenmol vejäten, daut Jehova stoakja es aus de Soton. Wan wie Jehova siene Help aunnämen, dan kjenn wie ut dän Soton siene Faulen ooda Schlenjen rutkomen.

16. Waut woat ons halpen, nich en dän Soton siene Schlenjen nentokomen?

¹⁶ Daut es bäta, wan wie goanich en dän Soton siene Faulen ooda Schlenjen nenjeroden, aus daut wie doa rutkomen motten. Wie kjennen daut bloos met Gott siene Help. Wie sellen nienich denkjen, daut wie soo stoakj sent, daut wie kjeenmol stolt ooda bejierich woaren. Wiels daut es mau rajcht soone passieet, waut Jehova aul lang deenden. Soo bäd Jehova om Help, daut du jieda Dach diene Jedanken un diene Woakjen unjasieekjen kaust (Psa. 139:23-24). Doo aules, waut du kaust, om nich stolt ooda bejierich to woaren.

17. Waut woat boolt met dän beesen Fient passieren?

¹⁷ De Soton es aul dusende Joaren soo aus een Jäaja jewast. Boolt woat dee jebungen woaren un met de Tiet venicht (Opb. 20:1-3, 10). Wie sänen ons aul no dän Dach! Oba soo lang, aus daut noch nich bat doa es, pauss fa wieda fa dän Soton siene Schlenjen opp. Schauf sea doaropp, nienich stolt ooda bejierich to woaren. Sie die eenich, dän Rot notokomen: “Stalt junt jäajen dän beesen Fient, dan woat hee von junt veschwinjen” (Jak. 4:7).