LONGO DIA 24
Wajiya Guzoga mu Miheto ya Satana!
‘Zoga mu muheto wa Diabulu.’—2 TIM. 2:26.
LUNGIMBO 36 “Préservons nos cœurs”
NDAGA JIDI MU LONGO EDI *
1. Mukunda natshi ana gufuanesa Satana nu yanga?
YANGA wana khala nu felela dimoshi, gukuata shitu nu guyishiya. Wajiya gukalegela miheto yavula, gifua luholo luayimonesele futa diabola dia Yobo. (Yobo 18:8-10) Metode atshi yanga wana kalegela hagula shitu ikuategene mu muheto wenji? Wana tala shitu yene muabonga. Wana kamba gujiya fundo shitu yene idi muya? Itshi idi guyisuanguluisa? Muheto utshi wabonga gajiya gukalegela ha guyikuata? Satana nji udi gifua yanga. Wana kamba gutujiya muabonga. Wana kamba gujiya fundo tudi muya nu ndaga jidi gutusuanguluisa. Gungima wana guta muheto wunu gajiya gutukuatela muabonga. Uvi, Biblia idi gutuwambela egi gila tuakuategena mu muheto, tuajiya guzoga mu muheto wene. Idi nji gutulongesa luholo mukut’etu agasue tuajiya gulenga miheto yene.
Lulendo nu nzala ya gukhala nu ima ya maluholo agasue, idi miheto mbadi yakola ya Satana (Tala paragrafe 2) *
2. Miheto itshi mbadi yakola Satana wana kalegela?
2 Satana wana kalegela miheto mbadi yakola. Miheto yene idi; lulendo nu nzala ya gukhala nu ima ya maluholo agasue. * Ivo yavula yabalega gale, Satana wakhalele mukalegela miheto eyi muabonga diago. Satana udi gifua muthu wana guta miheto ya tunjila. Muthu muene wana guta miheto nga guhaga wanda ha gukuata tunjila. (Ngi. 91:3) Uvi esue tuajiyilego gukuatewa mu miheto ya Satana. Mukunda natshi? Handaga Yehowa wana gutumonesa ba metode Satana wana kalegela ha gutukuata.—2 Kol. 2:11.
Tuajiya guzula malongo mu ifezegeselo idi mu Biblia inyi idi gututemesa nu idi mumonesa luholo tuajiya gutuna gubua mu miheto ya Diabulu (Tala paragrafe 3) *
3. Mukunda natshi Yehowa watshiginyile egi asonege ifezegeselo iko ya akombeledi enji mu Biblia?
3 Yehowa wana gutulongesa mu njila ya ifezegeselo ya aphangi ha gututemesa ha gutuna gukhala nu lulendo nu nzala ya gukhala nu ima ya maluholo agasue. Tuza mumona egi Satana wana kamba gukuata akombeledi a Yehowa mu miheto, ikhale anyi adi a gukula mu nyuma. Ndaga eyi idi mukotelesa egi esue tuajiyilego gubinga miheto yene ba? Ndo sha. Yehowa watshiginyile egi asonege mu Biblia ifezegeselo ya akombeledi’enji anyi akalegele gubola ‘ha gututemesa.’ (1 Kol. 10:11) Wajiyile egi tuajiya guheta malongo mu ifezegeselo yawo ha gutuna gubua mu miheto ya Diabulu.
LULENDO LUDI MUHETO
Tala paragrafe 4
4. Ndaga itshi yajiya gutubuila gula tudi nu lulendo?
4 Satana wana tshigina egi tubue enya lulendo. Wana jiya egi gula tuakudisa khadilo edi, mbatubua gifua muene nu mbatutotesa luendu lua guheta monyo wa mayilago. (Ish. 16:18) Hene, mupostolo Phaula wazuelele egi: Muthu wajiya ‘gubua muenya lulendo, ngenyi mbaamusophesa gifua luholo asophesele Diabulu.’ (1 Tim. 3:6, 7) Ndaga yene yajiya gubuila muthu wagasue mukatshi dietu, ikhale tudi athu ahe-ahe mu giamatshidia nga tuana kalegela gale Yehowa sendese mualeha.
5. Ha gutadila Mulongeshi 7:16, 20, luholo lutshi muthu wajiya gumonesa egi udi muenya lulendo?
5 Enya lulendo ana kamba phamba gubonga guawo hakhawo. Satana wana tshigina egi tukambe phamba gubonga guetu hakhetu, ha fundo dia gukamba Yehowa tangua tudi mutagana nu malamba. Ha gufezegesa, muthu mumoshi wa gumbidile gale mambo mu ndaga imoshi ba? Nga ndo, agukalegele gale ndaga mu luholo luabola ba? Satana wana tshigina egi tumbile Yehowa nga aphangi etu mambo. Diabulu wana tshigina egi ukalagale ndaga mu luholo luaye hakhaye ha fundo dia gulandula utuameji wa Yehowa udi mu Mbimbi yenji.—Tanga Mulongeshi 7:16, 20.
6. Longo ditshi wajiya guzula mu gifezegeselo gia phangi wa mukhetu wana jinga gu Pays-Bas?
6 Tutadilenu gifezegeselo gia phangi wa mukhetu wana jinga gu Pays-Bas. Phangi muene wakhalele muvua khabu gula muthu wakalagala gubola. Wazudile desizio dia gutuna gubalegesa tangua hamoshi nu athu ene. Udi muzuela egi: “Ngakhalele gudivua hakhami nu ngakhalelego mumona luholo lua gusombegesa matangi’ami. Ngawambelele mulumi’ami egi tudi naye guya mu hungu diko.” Gungima phangi muene wa mukhetu watalele programe ya JW Télédiffusion ya mars 2016. Programe yene yakhalele muzuelela luholo tuajiya gukolesela mu gubola gua athu ako. Udi muzuela egi: “Ngamonele egi ngudi naye gukhala nu khadilo dia gudibulumuisa nu gutangiza gubola ame ngana kalagala, ha fundo dia gutala phamba gubola gua aphangi a mala nu a akhetu mu hungu. Programe yene ya ngukuatesele muavula ha guhaga matangi’ami gudi Yehowa nu mu Ufumu wenji.” Wamona ndaga yabonga ya gutshita ba? Gula udi mutagana nu ndaga ya lamba, haga mutshima waye gudi Yehowa. Mutoge agukuatese ha gutadila athu ako gifua luholo muene wana guatadila. Tata wetu wa mu dilu wana mona gubola guawo, uvi wana khala hehi ha guatotesela. Udi mutshigina egi aye nji ukalagale luholo lumoshi.—1 Yone 4:20.
Tala paragrafe 7
7. Ndaga itshi yabuidile Fumu Oziase?
7 Lulendo luatumile Fumu Oziase wa gu Yuda ha gutuna guvua malongo nu wakalegele ndaga inyi ya mutumiwego ha gukalagala. Oziase wakalegele ndaga jiavula jiabonga. Wabingile ita yavula, watungile membo avula nu wakhalele nji mutshigina midimo ya mahia. Biblia idi muzuela egi: ‘Nzambi wa giamatshidia wa mukuatesele ha gubinga.’ (2 Gudi. 26:3-7, 10) Idi muzuela luko egi: ‘Uvi tangua gabuile nu ngolo jiavula, wabuile muenya lulendo nu watshitshile ndaga yabola.’ Thomo Yehowa wahanele mukhuala egi phamba nganga-nzambi jiakhalele naye guhana uhafu mu tempelo. Uvi, Fumu Oziase wayile muhana uhafu mu tempelo nu lulendo luagasue. Ndaga yene yasuanguluishilego Yehowa, hene wamumbile misongo ya hute mu muila. Oziase wasalele nu hute gumuila uu nu gu gufua guenji.—2 Gudi. 26:16-21.
8. Ha gutadila 1 Kolinto 4:6, 7, itshi yajiya gutukuatesa ha gutuna gukhala nu lulendo?
8 Tuajiya nji gubua enya lulendo nu gukalagala gubola gifua Oziase ba? Tutadilenu gifezegeselo gia phangi José. Wakalegele ndaga jiavula jiabonga nu wakhalele mukulu mu hungu dimoshi. Wakhalele mutshita ba diskur gu ba asamble nu atadi awendji akhalele muza gumutoga malongo. Phangi muene udi muzuela egi: “Uvi, ngakhalele musha mutshima phamba mu ndunge jiami nu mu eksperianse yami. Ngakhalelego mushila Yehowa mutshima. Ngakhalele mutangiza egi ngudi nu ngolo, hene ngakhalelego mutegelela malongo a Yehowa.” Phangi José wakalegele gubola guakoma, gungima amuzolele mu hungu. Gungima dia ivo yavula wavutugile mu hungu. Henyaha udi muzuela egi: “Yehowa wangulongesele egi ishigo nu ndando ha gukamba gukhala nu titre imoshi ngenyi. Uvi, ndaga ya ndando idi, gukalagala ndaga jiana gututoga muene ha gutshita.” Tujimbilago egi ndunge tudi najio nga inemo tudi nayo mu hungu yana katuga gudi Yehowa. (Tanga 1 Kolinto 4:6, 7.) Gula tudi nu lulendo, Yehowa mbaashigo gutuhana inemo mu ulondegi wenji.
NZALA YA GUKHALA NU IMA YA MALUHOLO AGASUE IDI MUHETO
Tala paragrafe 9
9. Nzala ya gukhala nu ima ya maluholo agasue ya tumile Satana nu Eva ha gutshita itshi?
9 Tangua tuana zuelela nzala ya gukhala nu ima ya maluholo agasue, muthu wa thomo wana gutujila mu matangi udi Satana Diabulu. Satana wakhalele naye guheta inemo yavula handaga wakhalele muanjelo wa Yehowa. Uvi watshiginyile gukhala nu ima ya maluholo agasue. Wakhalele mutshigina egi amukombelele gifua luholo ana kombelela Yehowa. Satana watshiginyile gubua gifua Yehowa, hene gakhalelego musuanguluga nu ima gakhalele nayo. Wakalegele ndaga eyi mbala ya thomo tangua gatele maga nu Eva. Yehowa wahanele Eva nu mulumi’enji Adama ima yavula ya gudia. Wawambelele egi: Wajiya gudia gaye “mabundu a mitshi yagasue idi mu dihia.” Uvi ushigo naye gudia mabundu a mutshi umoshi. (Gis. 2:16) Uvi Satana wahuigile Eva ha gudia mabundu a mutshi wunu Yehowa waatunyishile. Eva wasuangulugile nu ndaga jia muwambelele Satana, watshiginyile gukhala nu ima ya maluholo agasue. Tudi mujiya ndaga yabuile gungima. Eva watshitshile gubola, gungima wafuile.—Gis. 3:6, 19.
Tala paragrafe 10
10. Luholo lutshi nzala ya gukhala nu ima ya maluholo agasue yabuile gifua muheto gudi Fumu Davidi?
10 Nzala ya gukhala nu ima ya maluholo agasue ya tumile Fumu Davidi ha gujimbila ima ya muhanele Yehowa. Mukatshi dia ima yene tuajiya gutanga, umonyi, lutumbu nu ngolo jia gubinga mbalagaji jienji. Davidi wasuangulugile nu wazuelele egi ima ya muhuile Yehowa yakhalele ‘yavula diago ha guzuelela!’ (Ngi. 40:5) Uvi gungima wabuile nu nzala ya gukhala nu ima ya maluholo agasue. Wakambele gukhala nu ima yavula gubalega inyi ya muhuile Yehowa. Davidi wakhalele nu akhetu avula, uvi wakudishile nzala jiabola mu mutshima mukunda nu mukaji’a ngane. Mukhetu muene jina dienji Batesheba, mulumi’enji jina dienji Uriya muenya gu Hiti. Davidi wakalegele uthambi nu Batesheba, gungima mukhetu muene wamitshile vumo. Davidi wakalegele ndaga imoshi yabola. Uvi wakalegele ndaga iko yabalega gubola, washiyile Uriya mulumi’a Batesheba. (2 Sam. 11:2-15) Itshi Davidi akhalele mutangiza? Watangijile egi Yehowa wamonelego gubola guakalegele muene ba? Ikhale Davidi wakalegele Yehowa mudimo ivo yavula, wabuile nu nzala ya gukhala nu ima ya maluholo agasue. Nzala yene yamubatele malamba avula. Gungima, Davidi watshiginyile gubola guenji nu wabalumuine mutshima. Wakhalele nu gusuanguluga luholo Yehowa wamutotesele.—2 Sam. 12:7-13.
11. Ha gutadila Efeso 5:3, 4, itshi yajiya gugukuatesa ha gutuna nzala ya gukhala nu ima ya maluholo agasue?
11 Longo ditshi tuazula mu gifezegeselo gia Davidi? Tuamona egi tuajiya gubinga nzala ya gukhala nu ima ya maluholo agasue, gula tudi muhana Yehowa mersi mukunda nu ima yagasue wana gutuhana. (Tanga Efeso 5:3, 4.) Tudi naye gusuanguluga nu ima tudi nayo. Tudi naye guwambela athu tuana longesa Biblia ha gutangiza gima gimoshi giabonga giaahanele Yehowa nu gumuhana mersi mukunda nu ndaga yene. Gula muthu udi mukalagala ndaga eyi lusugu nu lusugu, mbayimonesa egi wana samba mukunda nu ndaga 7 jia gudisha mu phoso imoshi. (1 Tes. 5:18) Aye nji wana tshita ngenyi ba? Gula udi mutangigiza ndaga jiagasue jia gukalegele gale Yehowa, mbayigutuma ha gumuhana mersi. Gula udi gumuhana mersi, mbawusuanguluga nu ima udi nayo. Gula udi mu suanguluga nu ima udi nayo, mbawushigo mukamba gukhala nu ima inyi ushigo nayo.
Tala paragrafe 12
12. Nzala ya gukhala nu ima ya maluholo agasue yatumile Yudasa ha gutshita itshi?
12 Nzala ya gukhala nu ima ya maluholo agasue ya tumile Yudasa Isakaliote ha gukalagala gubola nu ha gudiga Yesu. Thomo Yudasa gakhalelego muthu wabola. (Luka 6:13, 16) Yesu wamutombele ha gukhala mupostolo. Wakhalele gumushila mutshima, hene amuhanele ginemo gia gubamba makuta a mu caisse. Yesu nu apostolo enji akhalele mukalegela makuta ene mukunda nu mudimo wa gulongesa. Makuta ene akhalele gifua misomonyi tuana hana mangino mukunda nu mudimo wana kalegewa ha mavu agasue. Uvi gungima Yudasa wasendesele gukuya, ngatshima wakhalele muvua luholo Yesu wakhalele mutemesa athu ha gutuna gukhala nu nzala ya ima ya maluholo agasue. (Mako 7:22, 23; Luka 11:39; 12:15) Yudasa wabuitshile mutshima mu ndaga jiakhalele muzuela Yesu.
13. Tangua ditshi Yudasa amonesele nzala ya gukhala nu ima ya maluholo agasue?
13 Yudasa wabuile nu nzala ya ima ya maluholo agasue tangua ndaga imoshi yakalegewe gutuama egi Yesu ashiyiwe. Yesu nu apostolo nu Madiya nu phangi’enji wa mukhetu Mata ayile gumbodia Simona munu wakhalele mutamegewa egi muenya hute. Tangua akhalele mudia, Madiya wasendesele gumbila Yesu maji avumba diabonga, maji ene akhalele musumbiwa mu mbongo jiavula. Yudasa nu alandudi ako adisagesele muavula. Alandudi ako atangijile egi gila maji ene asumbishiwa, mbongo jienji jiajiya gukalegewa mukunda nu mudimo wa gulongesa. Uvi Yudasa watangijile luholo luko. Wakhalele “nzangi” nu wakhalele mutshigina gukuya makuta a mu caisse. Gungima, nzala ya gukhala nu ima ya maluholo agasue ya mutumile ha gudiga Yesu mu mbongo jiakhalele musumbiwa muhiga.—Yone 12:2-6; Mat. 26:6-16; Luka 22:3-6.
14. Luholo lutshi phangi mumoshi wa yala nu mukaji’enji akalegele longo didi mu Luka 16:13?
14 Yesu wawambelele alandudi’enji giamatshidia egi gia ndando: ‘Muajiyilego gukhala ahiga a Nzambi nu a Makuta.’ (Tanga Luka 16:13.) Ndaga eyi idi ya giamatshidia. Tutadilenu luholo phangi mumoshi wa yala nu mukaji’enji gu Roumanie akalegele mbimbi eji jia Yesu. Ahetele mudimo mu gifutshi giana khala nu umonyi wavula. Adi muzuela egi: “Tuakhalele nu mikudi yavula gu banke, thomo tuamonele egi mudimo tuahetele udi mvutu gu isambu yetu.” Uvi mudimo wene wakhalele muheto, handaga wakhalele naye guakanga njila ha gukalagala ndaga jiko jia mu nyuma. Tangua aphangi ene atangele Inzo Yaleha ya Mutaledi ya Français ya 15 Aout 2008 yakhalele muzuela egi “Demeurons fidèles, le cœur unifié,” azudile desizio. Adi muzuele egi: “Gula nga tuayile mu gifutshi giko ha gukamba mbongo jiavula, yakhalele naye gukhala lamba ha gukombelela Yehowa. Ngenyi ufuta wetu nu Yehowa wakhalelego naye gukhala nu ndando. Tuakotelesele egi ufuta wetu nu Yehowa wajiya gubola.” Hene atunyile mudimo wene. Ndaga itshi yabuile gungima? Phangi muene wa yala wahetele mudimo mu gifutshi giawo wunu wakhalele guakuatesa ha gutagenesa nzala jiawo. Phangi wa mukhetu udi muzuela egi: “Tangua diagasue Yehowa wanakuatesa akombeledi enji.” Aphangi ene adi nu gusuanguluga luholo ahagele Yehowa ha fundo dia thomo mu monyo wawo, ha fundo dia guhaga mbongo.
LENGA MIHETO YA SATANA
15. Itshi idi gututuma ha guzuela egi ishigo lamba ha gulenga miheto ya Satana?
15 Itshi tudi naye gutshita gila tuakotelesa egi tudi nu lulendo nga nu nzala ya gukhala nu ima ya maluholo agasue? Tudi naye gusombegesa. Phaula wazuelele egi: Athu anyi ‘akuatewe nu monyo mu muheto’ wa Diabulu, ajiya guzoga muheto wene. (2 Tim. 2:26) Ndaga eyi yene Davidi wakalegele. Wategelele malongo amuhanele Natana, wabalumuile mutshima nu wakolesele luko ufuta wenji nu Yehowa. Tujimbilago egi Yehowa udi nu ngolo gubalega Satana. Hene gula tuatshigina ukuateshi wa Yehowa, tuajiya gulenga miheto yana gutuhagela Diabulu.
16. Itshi yajiya gutukuatesa ha gulenga miheto ya Satana?
16 Tudi naye gutshita yagasue hagula tubuigo enya lulendo nu tukhadigo nu nzala ya ima ya maluholo agasue. Mbatubinga ndaga yene phamba mu ukuateshi wa Yehowa. Tushigo naye gusha mutshima gu ngolo jietu. Akombeledi ako a Yehowa a mutangua dikulu abuile enya lulendo nu nzala ya gukhala nu ima maluholo agasue. Hene, toga Yehowa ha gugukuatesa ha gukotelesa gula wana monesa makalegelo awo abola mu luholo luaye lua gutangiza nga lua gukalagala ndaga. (Ngi. 139:23, 24) Kalagala ngolo ha gutuna gubua mueya lulendo nu gutuna nzala ya gukhala nu ima ya maluholo agasue.
17. Gualeha ndo ndaga itshi mbayibuila mbalagaji wetu Diabulu?
17 Ivo yavula yabalega gale, Satana wana khala gifua yanga. Uvi gualeha ndo mbawujitshigiwa shinga nu mbawushiyiwa. (Yat. 20:1-3, 10) Tuana nengenena lusugu luene sendese mualeha. Gutuama egi lusugu luene luze, tutshitenu yagasue ha gutuna gubua mu miheto ya Satana. Kalagala ngolo ha gutuna gukhala nu lulendo nu nzala ya gukhala nu ima ya maluholo agasue. Zulenu desizio dia ‘gukhala mbalagaji jia Diabulu. Ngenyi, muene mbawulenga gualeha nu enue.’—Yak. 4:7.
LUNGIMBO 127 Quel genre de personne je dois être!
^ par. 5 Satana udi gifua yanga. Wana kamba gutukuata mu miheto yenji, ikhale tuana kalegela gale Yehowa sendese mualeha nga ndo. Mu longo edi, tuza mumona luholo Satana wana kalegela lulendo nu nzala ya gukhala nu ima ya maluholo agasue ha gubolesa ufuta wetu nu Nzambi. Tuza muzuelela luko ifezegeselo ya athu akuatewe mu muheto wa Satana wa gukhala nu lulendo nu wa nzala ya gukhala nu ima ya maluholo agasue. Tuza nji mumona luholo tuajiya gulenga miheto yene.
^ par. 2 LUHOLO LUA GUKOTELESA MBIMBI: Longo edi diza muzuelela muavula lulendo, khadilo diana tuma muthu ha gumona egi udi wabalega athu ako nu nzala ya gukhala nu ima ya maluholo agasue, khadilo diene didi ngina ya gukamba gukhala nu mbongo jiavula, lutumbu, gutshita uthambi nu ndaga jiko.
^ par. 53 UKOTELESHI WA IFUANESA: Phangi mumoshi wa yala udi mutuna malongo abonga nu lulendo luagasue. Phangi mumoshi wa mukhetu udi nu ima yavula, uvi muene udi mutshigina gukamba luko ima yavula-vula.
^ par. 55 UKOTELESHI WA IFUANESA: Muanjelo wa Nzambi nu Fumu Oziase abuile nu lulendo. Eva wadile bundu dia mutshi watunyishile Nzambi. Davidi wakalegele uthambi nu Batesheba, Yudasa wabuile nzangi. Mukut’awo agasue akhalele nu nzala ya gukhala nu ima ya maluholo agasue.
