1. Why nao iumi savve sei Satan hem olsem man for hunting?

MAN wea hunting laek for trapim or killim dae wanfala animal. Bible storyim olketa difren kaen trap wea man for hunting savve iusim. (Job 18:8-10) Hao nao man for hunting savve trapim wanfala animal? Firstaem hem mas studyim datfala animal, olsem wea hem go, kaikai wea hem laekem, and then bae hem iusim kaen trap wea savve kasholem datfala animal. Satan hem olsem datfala man for hunting. Hem studyim iumi, olsem hem lukluk lo wea iumi go and wanem iumi interest lo hem. Then Satan iusim trap wea hem hope bae kasholem iumi. Sapos iumi insaed lo wanfala trap blo Satan finis, Bible storyim wanem iumi savve duim for aot from datfala trap. Bible talem iumi tu hao for stap klia lo olketa trap blo Satan.

2. Wanem nao tufala trap blo Satan wea staka pipol foldaon lo hem?

² Satan laekem iumi for foldaon lo trap for praod or greedy. * Satan iusim tufala trap hia for staka thousand year, and staka pipol foldaon lo datwan. Satan hem duim samting olsem man wea switim bird or iusim net for kasholem hem. (Sams 91:3) Bat Jehovah no laekem iumi for foldaon lo olketa trap blo Satan, so hem helpem iumi for luksavve lo olketa trap hia.—2 Cor. 2:11.

3. Why nao Jehovah laekem olketa story abaotem pipol wea praod or greedy for stap lo Bible?

³ Jehovah laekem iumi for lanem samting from samfala lo Bible wea praod or greedy, mekem iumi no duim sem samting. Samfala story hia showimaot Satan iusim olketa samting hia for trapim samfala wea worshipim Jehovah for longtaem finis. Waswe, datwan minim iumi no wei nao?  Nomoa, Jehovah mek sure olketa story hia stap lo Bible for “warnim iumi.” (1 Cor. 10:11) Olketa story hia savve helpem iumi for no foldaon lo olketa trap blo Satan.

4. Wanem nogud samting nao man wea praod bae kasem?

⁴ Satan laekem iumi for praod. Hem savve sapos iumi praod bae iumi no kasem laef olowe. (Provebs 16:18) Dastawe Paul sei samwan wea “kamap praod [bae] kasem sem judgment wea Devil hem kasem.” (1 Tim. 3:6, 7) Paul talem disfala warning bikos nomata iumi niu lo truth or worshipim Jehovah for staka year finis maet iumi kamap praod.

5. Olsem Eklesiastes 7:16, 20 talem, hao nao maet samwan showimaot hem praod?

⁵ Pipol wea praod tingim olketa seleva nomoa. Taem iumi feisim olketa hard samting, Satan savve mekius lo datwan for mekem iumi tingim iumiseleva and no tingim Jehovah. Olsem example, sapos samwan accusim iumi lo samting wea iumi no duim, or treatim iumi nogud, Satan laekem iumi for blamem Jehovah or organization blo hem. Satan laekem iumi for followim tingting blo iumiseleva lo hao for stretem hard samting wea iumi kasem, and no followim direction blo Jehovah lo Bible.—Readim Eklesiastes 7:16, 20.

6. Wanem nao iumi lanem from experience blo wanfala sista lo Holland?

⁶ Tingim experience blo wanfala sista lo Holland wea savve feel nogud lo wik point blo olketa brata and sista. Datwan mekem hem les for spendem taem witim olketa. Hem sei: “Mi feel lonely bikos mi no laekem olketa brata and sista hia. So mi talem hasband blo mi for mitufala mas joinim nara kongregeson.” Then sista lukluk lo March 2016 JW Broadcasting^® program. Hem storyim samfala idea lo hao for deal witim wik point blo narawan. Sista hia sei: “Datfala Broadcasting  program helpem mi for luksavve mi tu savve duim mistek, and no tingse olketa brata and sista shud change for fitim tingting blo mi. Datfala program helpem mi for tingim wanem Jehovah laekem mi for duim.” Wanem nao iumi lanem from story blo sista hia? Taem iumi kasem hard samting olsem, tingim wanem Jehovah laekem. Talem hem iumi laek for garem sem tingting olsem hem abaotem olketa brata and sista. Jehovah lukim mistek blo olketa, bat hem forgivim olketa, and hem laekem iumi for duim sem samting.—1 John 4:20.

7. Wanem nao happen lo King Uzziah?

⁷ From King Uzziah blo Judah hem praod hem no laek followim kaonsel, and hem duim samting wea hem no fit for duim. Uzziah savve tumas lo staka samting, olsem hem savve hao for winim olketa war, wakem olketa building, and hem garem staka planteison. Bible sei, “[Jehovah] hemi gohed fo blesim hem.” (Mektu Kronikols 26:3-7, 10) Bat Bible showimaot from King Uzziah duim evri samting hia datwan mekem hem praod tumas, gogo hem kasem nogud samting. King Uzziah go insaed lo temple for bonem incense nomata Jehovah markem olketa priest nomoa for bonem incense lo temple. From datwan Jehovah no hapi lo Uzziah and panisim hem witim leprosy gogo kasem taem hem dae.—Mektu Kronikols 26:16-21.

8. Hao nao toktok blo 1 Corinth 4:6, 7 savve helpem iumi for no praod?

⁸ Waswe, iumi savve foldaon lo trap for praod olsem Uzziah? Tingim wanem hem happen lo José. Hem bisnisman and elder lo kongregeson, hem givim olketa tok lo olketa assembly and convention, and olketa circuit overseer savve askem hem hao for duim samfala samting. José sei: “Mi start for depend lo savve blo miseleva and no depend lo Jehovah. From mi strongfala Christian, mi tingse olketa warning and kaonsel from Bible no fitim mi.” Gogo José duim bigfala sin and hem disfellowship. No longtaem go nomoa hem reinstate. Hem sei: “Jehovah helpem mi for luksavve hem important for duim wanem Jehovah laekem winim for garem bignem.” Hem gud for tingim  savve wea iumi garem and eni privilege wea iumi kasem lo kongregeson hem kam from Jehovah. (Readim 1 Corinth 4:6, 7.) Sapos iumi praod, Jehovah bae no iusim iumi lo organization blo hem.

9. Wanem nao kamaot from Satan hem greedy, and waswe lo Eve?

⁹ Satan hem barava greedy. Taem hem angel blo Jehovah yet hem kasem samfala privilege, bat hem laekem nara samting tu. Hem laekem pipol for worshipim hem, nomata Jehovah nomoa fit for kasem datwan. Satan laekem iumi for greedy tu, so hem trae for mekem iumi for no satisfae lo wanem iumi garem. Eve hem first wan wea Satan trapim witim diskaen tingting. Jehovah givim Adam and Eve staka naes kaikai for enjoyim. Hem sei tufala savve kaikaim frut from evri tree lo garden, bat wanfala tree nomoa hem tambuim. (Jenesis 2:16) Nomata olsem, Satan trikim Eve and mekem hem no satisfae lo wanem Jehovah givim hem, so Eve disaed for kaikaim datfala frut wea Jehovah tambuim. Nogud samting kamaot from datwan. Eve hem sin and gogo hem dae.—Jenesis 3:6, 19.

10. Hao nao gogo King David foldaon lo trap for greedy?

¹⁰ Narawan wea kamap greedy hem King David. Jehovah givim David staka samting, olsem riches, hem mekem David kamap king, and hem helpem David for winim olketa enemy. David tinghae lo wanem Jehovah duim for hem and hem sei olketa samting hia “barava plande tumas.” (Sams 40:5) Bat gogo David no satisfae lo wanem Jehovah givim and hem laekem samfala samting moa. Nomata David garem staka waef finis, hem kavetem waef blo Uriah, Bath-sheba. David durong witim Bath-sheba and hem kamap babule. Then David duim samting wea nogud winim datwan. Hem mekem plan for olketa killim dae Uriah. (Mektu Samuel 11:2-15) Nomata David faithful lo Jehovah for staka year finis, hem foldaon lo trap for greedy and hem kasem nogud samting from datwan. Bat David luksavve hem duim sin and repent from datwan. Hem hapi nao Jehovah forgivim hem!—Mektu Samuel 12:7-13.

11. Olsem Ephesus 5:3, 4 storyim, wanem nao savve helpem iumi for no foldaon lo trap for greedy?

 ¹¹ Samting wea happen lo David helpem iumi for lanem hao sapos iumi tinghae lo olketa samting wea Jehovah givim lo iumi, bae iumi no kamap greedy. (Readim Ephesus 5:3, 4.) Hem important for satisfae lo wanem iumi garem. Iumi savve teachim Bible study for tingim gud samting Jehovah duim for hem and for talem thankiu lo Jehovah for datwan. Sapos hem duim datwan each day, lo end lo week hem bae storyim finis sevenfala samting lo Jehovah. (1 Thess. 5:18) Iumi savve traem datfala idea tu. Taem iumi ting raonem olketa samting wea Jehovah duim for iumi, hem bae helpem iumi for tinghae lo olketa samting hia. And taem iumi tinghae lo wanem iumi garem, bae iumi satisfae. Then taem iumi satisfae, bae iumi no laek for kasem staka samting moa.

12. From Judas Iscariot hem greedy, wanem nao hem duim?

¹² From Judas Iscariot hem greedy, hem givim Jesus go lo olketa enemy. Bat firstaem Judas no kaen man olsem. (Luke 6:13, 16) Jesus chusim hem for wanfala aposol blo hem and Jesus trustim hem for lukaftarem selen blo olketa wea stap lo wanfala box. Jesus and olketa aposol iusim selen hia for eni samting olketa needim for duim preaching waka. Maet iumi sei hem olsem olketa donation for waka raonem world distaem. Gogo Judas start for stealim selen blo olketa, nomata staka taem Jesus warnim olketa for no greedy. (Mark 7:22, 23; Luke 11:39; 12:15) Judas nating followim olketa warning hia.

13. Wanem nao happen wea showimaot Judas hem greedy?

¹³ Samting wea happen no longtaem bifor Jesus dae showimaot Judas hem greedy. Jesus, Mary, Martha, and samfala nara disaepol go for kaikai lo haos blo Simon. Taem olketa kaikai, Mary kapsaetem oil wea expensive lo hed blo Jesus. Datwan mekem Judas and olketa nara disaepol for feel nogud. Olketa nara disaepol no hapi bikos olketa tingse sapos Mary no peim datfala oil, bae olketa savve iusim selen hia for sapotim preaching waka. Bat Judas no hapi bikos hem “man for steal” and hem savve sapos selen hia stap lo box wea hem lukaftarem, bae hem tekem for hemseleva. Bihaen datwan, from Judas greedy, hem givim Jesus lo olketa enemy for price blo wanfala slave.—John 12:2-6; Matt. 26:6-16; Luke 22:3-6.

14. Hao nao wanfala hasband and waef followim toktok lo Luke 16:13?

¹⁴ Jesus sei lo olketa follower blo hem: “Iufala no savve worshipim God and long semtaem busy for kasem staka selen.” (Readim Luke 16:13.) Datwan fitim iumi distaem tu. Tingim example blo hasband and waef lo Romania wea luksavve datfala toktok hem tru. Tufala garem chance for go lo wanfala rich kantri for duim waka for lelebet taem. Tufala sei: “Mitufala garem bigfala kaon lo bank, so firstaem mitufala tingse datfala waka hem blessing from Jehovah.” Bat tufala luksavve sapos tufala duim datfala waka, bae tufala busy tumas. Then tufala readim article lo Wastaoa blo August 15, 2008 wea garem title “Faithful Long God Long Full Heart Bilong Iu.” Tufala sei: “Datfala article helpem mitufala for luksavve reason mitufala laek duim datfala waka hem for kasem big selen. And mitufala luksavve waka hia bae mekem mifala no garem taem for duim olketa spiritual samting, and datwan  bae affectim hao mitufala fren witim Jehovah.” So tufala no acceptim datfala waka. Bihaen datwan, hasband garem waka lo kantri blo tufala mekem tufala kasem wanem tufala needim. Waef sei: “Mitufala thankiu lo Jehovah for helpem mitufala.” Tufala hapi from tufala tingim Jehovah winim for kasem staka selen.

15. Wanem nao bae helpem iumi for aot from trap blo Satan?

¹⁵ Sapos iumi luksavve iumi foldaon lo trap for praod or greedy, wanem nao iumi shud duim? Paul sei olketa wea Devil “kasholem olketa” savve aot from datfala trap. (2 Tim. 2:26) Datwan nao samting wea David duim. Hem followim kaonsel blo profet Nathan, hem repent, and hem fren bak moa witim Jehovah. Hem important for luksavve Jehovah nao strong winim Satan. So depend lo Jehovah for helpem iumi mekem iumi aot from trap blo Satan.

16. Wanem nao savve helpem iumi for stap klia lo olketa trap blo Satan?

¹⁶ Iumi no laek for Satan kasholem iumi, so iumi shud stap klia lo olketa trap blo hem. Bat iumi mas luksavve iumi needim help blo Jehovah. Nomata olketa wea worshipim Jehovah for longfala taem finis, samfala kamap praod or greedy. So evritaem askem Jehovah for helpem iumi luksavve sapos iumi start for kamap praod or greedy. (Sams 139:23, 24) Waka hard for no kamap praod or greedy!

17. Wanem nao bae klosap happen lo Satan?

¹⁷ For staka thousand year finis Satan trae for trapim pipol blo God. Bat klosap nao Jesus bae kasholem hem, and gogo bae Jesus finisim hem. (Rev. 20:1-3, 10) Iumi luk forward lo datwan! Bat distaem iumi mas stap klia lo olketa trap blo Satan. Traem best for no kamap praod or greedy. Disaed strong for “againstim Devil mekem hem ranawe from iufala.”—Jas. 4:7.