1. ¿Ima nishwantaj Diablupita y uywacunata charej runacunapitapis?

CAZADORCUNAGA wanuchinanpämi uywacunata ashin. Öraga trampacunawanrämi chaytaga rurapäcun, unaycho caypitapis parlamorgan lutanpa parlaj Jobpa jucnin caj amigun (Job 18:8-10). Trampancunaman ishquichinanpäga ricapärinraj: imata ruran, imata micun, ima manchachishgantapis. Chaycunata Satanaspis ruran: ricaraycanmi ima ruraycashganchita, ima cushichimashganchitapis. Nircur ilajpita trampancunata churapämanchi. Chayno carga Diospa Palabranmi yanaparcamäshun. Jina mayganlamanpis ishquishgana carga yanapämäshunmi.

2. ¿Maygan trampacunataj Satanaspäga ali caycan?

² Imaycanopapis alitucurga y quiquilanchipaj imatapis munarga Diablupa trampancunami caycan. * Unaypitana chaywanga achca runacunata ishquichishga. Pishgucunata trampacunawan wanuchejnomi payga caycan (Jer. 5:26). Musyanchimi trampancuna maygan maygan cashganta, Jehovami Palabrancho musyachimanchi (2 Cor. 2:11).

3. ¿Imanirtaj Jehovaga wilapämanchi unay runacuna ima trampacunaman ishquishganta?

³ ¿Imataj Jehová nimanchi alitucoj mana canapaj y quiquinchilaman mana yarparäcunapaj? Payga Palabranchomi escribichimushga waquincunapita yachacunapaj. Cananpis yachacuycäshun imanotaj Satanasga Jehovapa nawpancho ali caycajcunatapis ishquichishga. ¿Chauras niycanchi Diablupita gueshpicunapäga sasa cashganta? Manami. Jehovaga unay pasashganta wilapämanchi canan wichan tantiaj runa canapaj (1 Cor. 10:11). Jina Diosninchega musyanmi imacunataj yanapämäshun Diablupa maquinman mana chayanapaj.

4. ¿Imamantaj chayachimashwan pasaypa alitucurga?

⁴ Diabluga imaycanopapis alitucunanchitami munan. Chayno runaman ticrarga trampanmanmi ishquiycashwan, mana wanuypa cawacunanchitapis ograrishwanmi (Prov. 16:18). Chaymi Pabluga rasunpa cajta parlar nergan “yachaj-tucorga Satanás castigasha cashannömi [...] canga” (1 Tim. 3:6, 7). ¡Pajta mayganchipis Diablo munashganta rurarishwan!

5. Eclesiastés 7:16, 20 textucuna nishganno, ¿ima nishwantaj alitucojcunapita?

⁵ Alitucojcunaga quiquilancuna más ali cashganta yarpan. Chaychi Satanasga problemacunapa pasaptinchi Diosta gongaycur noganchicunalaman yarparänanchita munan. Ichanga imaylapis waquincuna tumpamashcanchi o mana alitapis ruraycamashcanchi. ‘Chayga caycan Diospa y hermanöcunapa culpanraycurmi’ niptinchega Diabluga cushicurcunmanmi. Jina ‘munashgäta rurashaj’ ninanchitami payga munaycan, imaypis munangachu Palabranwan Diosninchi pushamänanchita (leiriy Eclesiastés 7:16, 20).

6. ¿Imatataj yachacunchi parlashganchi panipita?

⁶ Juc panipita parlarcushun. Payga alapash rabiacoj waquin hermanucuna pantarishganlapita. Paycunawan juntacaytapis munargannachu. Paymi cayno wilacun: “Japalämi ricacorgä. Hermanucunapäga tucuytami yarpachacurgä. Runätapis nergä juc congregaciunpa aywacärinäpaj”. Chaylachoshi paninchega marzo quilla, 2016 JW Broadcasting^® programata ricaycurgan, chaycho  yargamurgan waquincunawan imano ali goyänapaj. Chaypita panilanchi cayno nin: “Tantiarirgämi quiquëraj imano cambianäpaj, hermanucunapa pantashganlanman mana yarparänäpaj. Ricashgäpis tantiachimargan Jehová imano cashganman y payla Diosninchi cashganman yarpachacunäpaj”. Noganchipis imaycapa pasarga ama Taytalanchi Jehovata gongaycushunchu, ruwacushun ali nawilanchiwan hermanunchicunata ricänapaj. Pipis pantaptenga Jehovaga perdunaycunmi, paynola rurananchita payga shuyaran (1 Juan 4:20).

7. ¿Imataj pasargan Uzías reywan?

⁷ Pasaypa alitucurmi rey Uziasga, juc cuticho ichiclapis casucurganchu. Payga ali calpalanwanmi imatapis ruraycoj: guerrachopis caycar, imatapis sharcachinanpaj captin o chacrachopis arur. “Tsayno kawaptinmi lapanchöpis Tayta Dios yanaparqan” (2 Crón. 26:3-7, 10). Pero Bibliaga caytana nircur wilacun: “Ray car yachacarcurnaga ollgoj ricacuran. Chayno cashanmi mana alliman chayachiran”. Jehovaga sacerdoticunala templucho inciensuta rupachinanpaj mandacurgan. Uziasga mana casucushpanmi chayta ruraycurgan. Chaynami leprawan Tayta Jehová castigargan, chayno gueshyaycarla wanurganpis (2 Crón. 26:16-21).

8. ¿Imano runa canapätaj tantiachimanchi 1 Corintios 4:6, 7 textucuna?

⁸ ¿Noganchipis Uzías reynochuraj ogulloso cashpanchi juchaman ishquircushwan? Mä parlarcushun José wawguipita. Negociunshi ali cargan y congregaciuncho ancianuno ali ricashgash cargan. Asambleacunachopis shumajshi discursaramoj y congregaciuncunata watucaj wawguicunatapis yanaparcojshi. Pero ima pasashganta cayno wilacun: “Ali tantiaj y yachaj cashgäman yarparmi Jehovaman yaracuycargänachu; ‘imapis pasamangachu’ nirmi Jehová pushamänantapis munargänachu”. Josega juchatami ruraycurgan y congregaciunpitapis gargushga cargan. Chaypitaga payga yapaymi Diosta sirvir galaycurgan, cayno nin: “Jehovaga imapitapis masga casucoj cananchilatami munan. Chaytami yachacurgä”. Ali yanapacoj carpis, congregaciuncho carguyoj carpis, lapantapis Diospitami chasquishcanchi (leiriy 1 Corintios 4:6, 7). Alitucoj runa carga Jehovaga manami pushamäshunchu.

9. ¿Imatataj rurapäcurgan Satanaspis Evapis quiquilancunaman yarpar?

⁹ Unaypitana quiquilanpaj imatapis munajga Satanasmi caycan. Jehovapa contrancho manaraj ticrarga, cargucunata chasquirchi lapanta casucoj. Chaylawanga manami cushishgaga caycarganchu, paytapis waquincuna adurananta munargan. Cananpis paynola cananchipaj trampacunata churapämashwan, mastaraj imatapis ashichimashwan. ¿Manachu unaycho payga Evatapis ishquichergan? Awmi. Ishcantapis cuyashpanmi Jehová nergan imaycatapis chay huertacho micacärinanpaj, ichanga juc arbol-lapita mana yatapänanpaj nergan (Gén. 2:16). Chaynami Satanasga Evata chay michashgan yörapa wayuyninta munapächergan, chayta ricar fiyupa munapargan. Chaycho ricacämurgan, Evaga mastaraj munashganta. Nircurga, Biblia nishgannomi juchata rurashganpita wanupäcurgan (Gén. 3:6, 19).

10. ¿Imanotaj rey David juc trampaman ishquiycurgan?

¹⁰ Rey Davidpita canan parlarcushun. Jehovaga imaycacunatami payta gorgan, guerrachopis ganacherganmi. Davidga agradecicurganmi mana yarpashganpitapis imaycata chasquishganpita (Sal. 40:5). Tiempuwan chay lapanta David gongaycur codicioso runaman ticracurirgan. Achca warmiyojna caycarpis juc runapa warminta munapargan, Jehovapaj mana ali chayga cargan. Chay warmipa jutin Bat-Seba cargan, runanpana Urías. Quiquilanman yarparmi Bat-Seba warmiwan punucuycorgan y runantapis nircur wanuycachergan (2 Sam. 11:2-15). Imaman yarpar-raj chayta rurargan. Jehovaga lapantami ricaycargan. Unaypitana Diosta sirvishga carpis ilajpita pasaypa mana alita ruraycurgan, rurashganraycurga nacashgarämi. Tiempuwanga juchancunapita arrepenticur Jehovata ruwacurgan, chayga alimi cargan. ¡Imanoraj agradecicuycurgan Jehová perdunaycushganpita! (2 Sam. 12:7-13).

11. Efesios 5:3, 4 texto nishganno, ¿imatataj rurashwan quiquilanchipaj imatapis mana ashinapaj?

¹¹ ¿Imatataj yachacunchi David imapa  pasashganpita? Jehová goycalämashganchicunalawan imaypis cushishga caycäshun (leiriy Efesios 5:3, 4). Quiquilanchicunaman yarpar imatapis ashirga mana alicunamanmi chayashun. Bibliapita yachacuycajcunataga yarpächishwanmi cawaynincunacho ima alicunata chasquishganta y chaycunaraycur Jehovata agradecicärinanpaj. Waran waran jucpita jucpita Diosta agradecicurga juc semanachoga ganchis cutinachi imaycapita agradecicushga canga (1 Tes. 5:18). Noganchipis chayta rurarga, manami gongashunchu noganchiraycur Diosninchi ima aycata rurashganta, y chasquishganchilawan cushishga caycäshun. Ima trampapis yurimuptenga ishquishunnachu.

12. ¿Imatataj Judas Iscariote rurargan?

¹² Canan Judas Iscariotipita parlarcushun. Ali cacuycashganpitami payga traidor runaman ticracurergan (Luc. 6:13, 16). Nawpalachoga quiquin Jesusmi acraycurgan gatejnin cananpaj. Jesusga yaracurganmi payman. Tesorero cananpaj cargutapis chasquirganmi, chay guellayga imaycapäpis carganchi, canan wichan Diospita yachachicunapaj ruracashganno. Jesusga cutin cutin parlapargan imaycata ashir mana cacärinanpaj (Mar. 7:22, 23; Luc. 11:39; 12:15). Judas ichanga casucurganchu, chaypitana suwacur galaycurgan.

13. ¿Imaytaj alapa codicioso Judas cashgan ricacämurgan?

¹³ Juc cutichomi alapa codicioso Judas cashgan ricacämurgan. Chayga cargan leproso Simón runapa wasinchomi. Cay wasiyoj runaga Jesustawan gatejnicunatami nergan wasinman micoj shapäcamunanpaj; chaychopis caycarganshi Martawan María. Micupacuycashganchoshi Mariaga Jesuspa umanman chaniyoj aceitita garpupargan. Chayta ricarshi Judaswan waquincunapis piñacärirgan. Discipuluncunaga ninacurganshi wacchacunaraycur ranticunapaj cajta perdichicaycashganta. Judas ichanga rabiacurgan suwacoj cashganraycur, cajapitapis mayna pacapaylapa guellayta jorgoj. ¿Imamantaj lapan apargan? Quimsa chunca (30) guellayraycurla Jesusta traiciunargan (Juan 12:2-6; Mat. 26:6-16; Luc. 22:3-6).

14. ¿Imanotaj Lucas 16:13 texto wilacushganta juc matrimonio chasquicurgan?

¹⁴ Caytami Jesús nergan discipuluncuna yarpänanpaj: “Rïcu kanalaykipaq yarpachakurqa Tayta Diosta sirviyta mana kamäpakunkitsu” (leiriy Lucas 16:13). Nishganga cananpis yanapämanchimi. Rumania naciuncho cawaj juc matrimoniupita parlarcushun, paytash nipäcurgan juc trabajucho mastaraj ganananpaj. Paycuna cayno nin: “Bancupa achca guellaywan jagan carcaycargä. Chaynami nipäcurgä ‘chay aruyga Jehovapa bendiciunninmi’”. Pero chay trabajuta chasquiptenga Jehovata sirvinanpaj mananami camäpacunmannachu cargan. ¿Imata rurapäcurgan? 2008 wata, La Atalaya, 15 de agosto quillapita “Mantengámonos leales con un corazón unificado” nishganta leipäcurgan imata rurapäcunanpaj. Cayno nipäcun: “Más guellayta tarinäraycur juc marcapa aywacäriptëga, cawaynëcunacho Jehová Dios manachi nawpacho caycanmanchu cargan. Chayta rurarga Jehovata sirvishgäcunapis walcayanmanchi cargan”. Paycunaga maypapis aywarganchu, marcanlachomi juc trabajutapis tariycurgan. Warmin cayno nin: “Jehovaga manami imaypis micuynajta jaguimanchichu”. Cananga ishcancuna cushi cushila Jehovata sirvircaycan.

15. ¿Diablupa maquinpita gueshpicuyta puedishwanchuraj?

¹⁵ Nishganchinopis imapitapis alitucurga, quiquilanchipaj imatapis munarga Diablupa trampancunami caycan, y chaycunaman ishquishgana carga ¿imatataj rurashwan? Pabluga wilacurganmi Diablupa maquinpita gueshpinapaj quiquinchipita cashganta (2 Tim. 2:26). Chaytami rey Davidpis rurargan: codicioso runa cashganpita profeta Natán anyapaptenga chasquicurmi arrepenticurgan. Pipitapis Jehovalami lapanta Puedej, chayta ama gongashunchu. Calpalanta ruwacurga Diablupa maygan trampanmanpis manami ishquishunchu.

16. ¿Imacunata rurartaj Diablupa trampanman ishquishunchu?

¹⁶ Imano captinpis yarpaylapis manami yarpashwanchu Diablupa maquinman chayanapaj y nircur-raj gueshpicunapaj. Imay horapis riccha ricchalami caycänanchi, Diosmi yanapamäshun. ‘Imapis pasamangachu’ nir purishwanchu; unayna Diosta sirvejcunapis alitucurmi galaycärishga y codicioso runaman ticrapäcushga. Noganchicunaga waran waranmi Diosta ruwacuycashwan ima mana alilapis shongunchiman mana yaycunanpaj o yaycushgana carga calpachacur jorgurinapaj (Sal. 139:23, 24). Calpachacuycäshun Diablupa contrancho imaypis caycänapaj.

17. ¿Imatataj Diosninchi ruramunga Diabluwan?

¹⁷ Unaypitana Satanasga maychicaj runacunata lutanpa apashga. Diosninchega mayna wilacush imano payta ilacächinanpaj (Apoc. 20:1-3, 10). ¡Chay junajga chayamungami! Chaycamaga mayaj mayajla puriycäshun, pajta imalamanpis ishquirishwan. Calpachacushun alitucoj runaman mana ticranapaj, quiquilanchiman mana yarparäcunapäpis. Mana gongaypa cayta casucushun: “Dyablu juchata rurachiyta munashuptiquega ama cäsuychu. Chauraga aywacongami” (Sant. 4:7).