1. ¿Diabloca shuj cazaj runahuanca imapitaj igual can?

CAZAJ runaca animalitocunata huañuchingapaj o japingapajca chꞌican chꞌican trampacunatami churan (Job 18:8-10). Chaipajca animalitocuna maipi purijta, maipi micujtami ricun. Chashnami menos pensado animalitocunataca trampapi urmachin. Chashnallatajmi Diablopish Diosta sirvijcunataca trampapi urmachisha nin. Paica ñucanchij imata munashcata, imata rurashcatami alli ricun. Shinami ñucanchijtaca menos pensado trampapi urmachi tucun. Pero Bibliapica cai trampacunapi ama urmangapaj imata rurana cashcata, chai trampacunapi urmashpapish chaimanta caruyangapaj imata rurana cashcatami yachachin.

2. ¿Diabloca huaranga huaranga huatacunataca ima ishqui trampacunatataj churashca?

² Ima shinami shuj runaca pajarocunata japingapaj umashpa trampacunapi urmachin. Chashnallatajmi Diablopish Diosta sirvijcunataca umashpa trampacunapi urmachisha nin (Jeremías 5:26). Por ejemplo, huaranga huaranga huatacunatami gentecuna jatun tucuchun, shujtajcunapajta munachun trampacunapi urmachishca. * Pero Diosta sirvijcuna chai trampacunapi ama urmachunca Jehová Diosca Diablopaj trampacuna imacuna cashcatami yachachin (2 Corintios 2:11).

3. ¿Imamantataj Bibliapi tiyaj ejemplocunamanta yachana canchij?

 ³ Ñaupa punllapi Diosta sirvij huaquin runacunaca jatun tucushcamanta, shujtajcunapajta munashcamantami juchapi urmarcacuna. Ñucanchijpish chai trampacunapi ama urmachunmi Jehová Diosca Bibliapi paicunapaj ejemplocunamanta yachachin (1 Corintios 10:11). Diabloca experienciata charij Diosta sirvijcunatami trampapi urmachishca. Pero chaica mana nisha ninchu ñucanchijtapish trampapi urmachinata. Bibliapi tiyaj ejemplocunamanta yachashpami Diablopaj trampacunapica mana urmashun.

4. ¿Jatun tucushpaca imataj tucushun?

⁴ Diabloca pai laya jatun tucushpa huiñai causaita charinata chꞌingachichunmi munan (Proverbios 16:18). Chaimantami apóstol Pabloca: ‘Ñataj jatun tucushpa, Diablo urmashca shina urmanguichijman’ nishpa advirtirca (1 Timoteo 3:6, 7). Achca huatata o ashalla huatacunata Jehová Diosta sirvicushpapish jatun tucunamantami cuidarina canchij.

5. Eclesiastés 7:16, 20-pi nishca shinaca ¿jatun tucushca gentecunaca ima shinataj comportarin?

⁵ Diabloca gentecuna ima problemacunata charishpa paicunallapi yuyashpa jatun tucuchunmi munan. Por ejemplo, pi ñucanchijta yangamanta juchachijpi, mana alli tratajpica Diabloca huauqui panicunata, Jehová Diosta culpachunmi munan. Ashtahuancarin ima problemata allichingapajca Yaya Diospaj mandashcacunata cazunapaj randica ñucanchijllapi confiachunmi munan (Eclesiastés 7:16, 20-ta liyipai).

6. ¿Cai parrafopi parlashca panimantaca imatataj yachanchij?

⁶ Shuj panica huauqui panicunapaj pandarishcallata ricushpami paicunahuanca pꞌiñarij carca. Paica: “Huauqui panicunahuan pꞌiñarishca cashcamantami ñucalla sintirij carcani. Chaimantami ñuca cusataca shujtaj congregacionman rishun nircani” ninmi. Cai panica marzo de 2016-pi llujshishca JW Broadcastingtami ricurca. Chai programapica shujtajcunapaj pandarishcacunallata ama ricuchunmi yachachirca. Cai panica: “Ñucaca cai programata ricushpaca humilde cana cashcatami cuentata curcani. Turi ñañacuna ima laya cajpipish ñucapish juchayuj cashcatami intindircani. Shinallataj turi ñañacuna pandarijpipish Jehová Diospaj ayudata mashcana cashcata, paillata jatunyachina cashcatami cuentata curcani” ninmi. Maipica maijan huauqui panicunahuanmi ima problemata charishun. Pero paicunaman cꞌuyaita ricuchingapaj, paicunata perdonangapajca Jehová Diostami ayudahuai nishpa mañana canchij. Yayitu Diosca huauqui panicuna pandarijpipish cꞌuyaihuanmi perdonan (1 Juan 4:20).

7. ¿Rey Uziasca jatun tucushcamantaca imataj tucurca?

⁷ Rey Uziasca alli yuyayuj runami carca. Chaimantami Jehová Dios paita bendiciajpi achca macanacuicunapi mishaj carca. Jatun torrecunata shayachij carca. Achca chagracunata charij carca (2 Crónicas 26:3-7, 10). Pero paica jatun tucushpami llaquipi urmarca. Jehová Diosca templopi sacerdotecunalla inciensota rupachichunmi saquij carca. Pero rey Uziasca jatun tucushcamantami chai inciensota rupachisha nirca. Chaimi Jehová Diosca achcata pꞌiñarishpa paitaca lepra ungüihuan castigarca. Chai punllamanta huichimanmi Uziasca lepra ungüihuan causarca (2 Crónicas 26:16-21).

8. 1 Corintios 4:6, 7-pi nishca shinaca ¿ama jatun tucungapajca imatataj rurana canchij?

⁸ Ñucanchijpish rey Uzías shina jatun tucushpa jatun juchapi ama urmangapajmi cuidarina canchij. Huauqui Josehuan ima tucushcata ricushun. Paica alli trabajota charij, congregacionpipish rijsishca ancianomi carca. Jatun tandanacuicunapipish alaja conferenciatami cuj carca. Shinallataj superintendente de circuito huauquicunapish paitami ayudachun mañajcuna carca. Huauqui Joseca: “Ñuca ima rurai tucushcapi, ñuca experienciallapimi confiarcani. Jehová Dios ñucata consejajpi, advirtijpipish paitaca ladomanmi saquircani” ninmi. Chaimantami Joseca jatun juchapi urmashpa congregacionmanta llujchishca tucurca. Huaquin huatacuna huashaca cutinmi paica testigo de Jehová tucurca. Paica: “Ima responsabilidadta charishpapish mana jatun tucunachu canchij. Jehová Diosca humildadhuanmi tucuipi paita cazuchun munan” ninmi. Ñucanchijpish  Jehová Diospaj ayudallahuan ima responsabilidadta pajtachi tucushcata, imata rurai tucushcatami yuyarina canchij (1 Corintios 4:6, 7-ta liyipai). Ñucanchij jatun tucushca cajpica Jehová Diosca pai mingashcacunata pajtachichunca mana saquingachu.

9. ¿Diablopish, Evapish ashtahuan charinata munashcamantaca imatataj rurarcacuna?

⁹ Diabloca Jehová Diospaj manaraj contra tucushpaca shuj angelmi carca. De seguro Jehová Diosca paimanca huaquin responsabilidadcunata pajtachichunmi mingarca. Pero Diabloca jatun tucushcamantami Jehová Diosta adoranapaj randica paita adorachun munarca. Diabloca ñucanchijpish imalla charishcacunahuan cushilla canapaj randica ashtahuan shujtaj cosascunata mashcachunmi munan. Evapi yuyashunchij. Jehová Diosca Evata, paipaj cusata cꞌuyashcamantami paraisopi tucui laya yuracunamanta micuchun saquirca. Pero shuj yuramanta ama micuchunmi mandarca (Génesis 2:16). Chaimi Diabloca Evataca Dios ama micuchun nishca yuramanta micuna munaita charichun pandachirca. Evaca chai yuramanta micushpami Jehová Dios tucuita cujpipish chaicunamanta mana agradicishcata ricuchirca. Qꞌuipaca paica juchayuj tucushpami huañurca (Génesis 3:6, 19).

10. ¿Davidca shujtajcunapajta munashpaca imatataj rurarca?

¹⁰ Rey Davidpi yuyashun. Jehová Diosca Davidmanca achca cosascunata, autoridadtami curca. Shinallataj contracunata mishachunpishmi ayudarca. Chaimantami Davidca Jehová Diosta agradicishpaca: ‘Pai tucuita cushcacunataca mana yupai tucunichu’ nirca (Salmo 40:5). Pero qꞌuipaca Davidca shujtajcunapajta munashcamantami Dios imalla cushcacunataca cungarishpa ladoman saquirca. Paica achca huarmicunata charishpapish shuj cazada huarmitami munai callarirca. Cai huarmica Uriaspaj huarmi Betsabemi carca. Davidca paillapi yuyashpami Betsabé huarmihuan huainayarca. Qꞌuipaca Betsabeca chichumi saquirirca. Chaita yachaj chayashpami Davidca Uriasta huañuchichun mandarca (2 Samuel 11:2-15). ¿Chaita ruracushpaca Davidca imapishi yuyacushcanga? ¿“Jehová  Diosca ñucataca mana ricucunchu” nishpachu yuyashcanga? Paica achca huatacunata Jehová Diosta sirvicushpapish shujtajcunapajta munashcamantami llaquipi urmarca. Pero asha tiempo qꞌuipaca Davidca juchamanta arrepintirishpami Jehová Diosman huillarca. Jehová Dios paita perdonajpica agradecidomi sintirirca (2 Samuel 12:7-13).

11. Efesios 5:3, 4-pi nishca shinaca ¿shujtajcunapajta ama munangapajca imatataj rurana canchij?

¹¹ ¿Davidmantaca imatataj yachanchij? Shujtajcunapajta mana munangapajca Dios cushcacunahuanmi agradecidos cana canchij (Efesios 5:3, 4-ta liyipai). Caipi yuyashun. Ñucanchij yachacujcunamanca cada punllami Dios cushca bendicioncunapi yuyashpa agradicichun yachachinchij. Chashna yachachijpica yachacujcunaca cada semanapimi Yayitu Diostaca chꞌican chꞌican bendicioncunamanta agradicingacuna (1 Tesalonicenses 5:18). Ñucanchijcarin Dios cushca bendicioncunapi yuyashpami agradecidos, cushilla cana canchij. Chashnami shujtajcunapajta munana trampapi mana urmashun.

12. ¿Judasca shujtajcunapajta munashcamantaca imatataj rurarca?

¹² Cunanca Judas Iscariotepi yuyashun. Paica callaripica alli runami carca (Lucas 6:13, 16). Chaimi Jesusca paitaca apostolcunapurapi cachun agllarca. Shinallataj Jesusca paipi confiashcamantami predicangapaj cullquita huaquichina cajata cuidachun mingarca. Chai cullquica cunan punllacunapi muyundij Allpapi predicanata apoyangapaj cushca cullqui layami cashcanga. Jesusca achca cutinmi paita catijcunataca: ‘Quiquinpajlla charinata ama munanguichij’ nishpa advirtishca carca (Marcos 7:22, 23; Lucas 11:39; 12:15). Pero Judasca Jesús nishcata mana uyashpami shuhuai callarirca.

13. ¿Judasca ima horataj shujtajcunapajta munashcata ricuchirca?

¹³ Shuj punllaca Simón shuti runaca paipaj huasipi carangapajmi Jesusta, Jesuspaj discipulocunata, Mariata, Martata invitashca carca. Ña micucun horasmi Mariaca jatarishpa Jesuspaj uma jahuapica mishquijllaman ashnacuj valishca aceiteta tallirca. Chaita ricushpami Judas, caishuj apostolcunaca pꞌiñarircacuna. Caishuj apostolcunaca tal vez cai aceiteta cꞌatushpaca huillangapajmi ashtahuan cullquita charishun nishpami yuyashcangacuna. Pero Judasca chai cullquita shuhuasha nishcamantami pꞌiñarirca. Qꞌuipacarin Judasca cullqui raicullami Jesusta traicionarca (Juan 12:2-6; Mateo 26:6-16; Lucas 22:3-6).

14. ¿Lucas 16:13-pi nishcacunataca shuj cusa huarmica ima shinataj pajtachircacuna?

¹⁴ Jesusca paita catijcunataca: ‘Taita Diospajpish, charijyangapajpish ishquindijtaca mana rurai tucunguichijchu’ nircami (Lucas 16:13-ta liyipai). Rumania llajtamanta shuj cusa huarmi cai shimicunata ima shina pajtachishcata ricushun. Paicunataca shujtaj llajtapi shuj alli trabajota charichunmi cayarcacuna. Paicunaca: “Bancopi shuj deudata charishcamantami cai trabajoca Diospaj bendicionmi can nishpa yuyarcanchij” ninmi. Pero chai trabajota chasquishca cashpaca Jehová Diosta sirvingapajca tiempota mana charinmancunachu carca. Pero paicunaca 15 de agosto de 2008-pi llujshishca La Atalaya revistapi “Mantengámonos leales con un corazón unificado” nishca yachaita liyishpami chai trabajota agllanata ña mana decidircacuna. Paicunaca: “Ashtahuan cullquita ganangapajlla shujtaj llajtapi trabajanaman rishca cashpaca Jehová Diostaca ña mana punta lugarpi churanchijmanchu carca. Diosmantapishmi caruyanchijman carca” nircami. Qꞌuipaca  huauquica paipaj propio llajtallapitajmi familiata mantiningapaj shuj trabajota japirca. Paipaj huarmica: ‘Jehová Diosca ñucanchijtaca siempremi ayudan. Ñuca cusahuan Jehová Diosta punta lugarpi churashcamantami ishquindij cushilla sintirinchij’ ninmi.

15. ¿Imamantataj Diablopaj trampacunamanta caruyai tucushcataca seguros canchij?

¹⁵ Jatun tucushca cashpa, shujtajcunapajta munashca cashpaca chaicunamantami caruyai tucunchij (2 Timoteo 2:26). Davidca Natán corregijpica arrepintirircami. Chashnami Jehová Dioshuanca cutin alli apanacui callarirca. Jehová Diosca Diablota yallimi poderta charin. Chaimanta Diospaj ayudata chasquishpaca Diablopaj trampapi urmashca cashpapish chaicunamantami caruyai tucunchij.

16. ¿Diablopaj trampapi ama urmangapajca imatataj rurana canchij?

¹⁶ Diablopaj trampapi ama urmangapaj callarimanta esforzarishunchij. Jehová Diospaj ayudahuanca cai trampacunapi mana urmashunchu. Pero ñucanchijllapi ama confiashunchij. Achca huatata Diosta sirvijcunapish jatun tucushcamanta, shujtajcunapajta munashcamantami Diablopaj trampapi urmashcacuna. Ama chai yuyaita charingapajmi Jehová Diostaca tucui punllacuna mañana canchij. Chaita rurashpaca jatunyana munaimanta, shujtajcunapajta charina munaimantami caruyashun (Salmo 139:23, 24).

17. ¿Shamuj punllacunapica Diablohuanca imataj tucunga?

¹⁷ Diabloca huaranga huaranga huatacunatami shuj cazaj runa shina gentecunataca paipaj trampapi urmachishpa caticun. Pero ñallami paica huichcashca canga. Qꞌuipacarin tucuchishcami canga (Apocalipsis 20:1-3, 10). Chai punlla chayachunmi cushilla shuyanchij. Pero chai punlla chayangacamaca ama jatun tucungapaj, shujtajcunapajta ama munangapaj cuidarishunchij. Santiago 4:7-pica: “Diablotaca ama ricunachichijchu. Chashna rurajpica paica miticungallami” ninmi.