1. Eaa a Satani i akaaiteia ai ki te tangata opu manu?

TE TANGATA opu manu e tai ona akakoroanga—kia opu me kore kia tamate i te manu. Penei e au ereere tukeke tana ka taangaanga, mei ta tetai oa pikikaa o Iobu i kite mai. (Iobu 18:8-10) Akapeea te tangata opu manu me arataki i te manu ki roto i tana ereere? Ka akara meitaki aia i te reira. Ka aere te reira kiea? Eaa tana e reka ana? Eaa te ereere ka tano? Kua aite a Satani ki teia tangata opu manu. Te akara meitaki ra aia ia tatou. Ka aere tatou kiea? Eaa ta tatou e reka ana? E oti, tuku aia i tana ereere no te opu ia tatou. Inara, akakite te Pipiria e me opuia tatou, ka rauka rai te ora. Apii katoa mai te reira akapeea tatou me kopae i teia au ereere.

2. Eaa ta Satani nga ereere e taangaanga maata ana?

² Ko te tu parau e te noinoi * te ereere ta Satani i taangaanga maata ana no tetai tauatini ua atu mataiti. Kua aite aia ki te tangata kimi manu te ka arataki i te manu ki roto i te ereere me kore ki roto i te kupenga. (Sala. 91:3) Inara kare tatou e anoanoia kia opuia e Satani. No teaa ra? No te mea te akakite mai nei a Iehova i ta Satani au ravenga e taangaanga ana.​—2 Kori. 2:11.

3. Eaa a Iehova i oronga mai ei te au akaraanga i roto i te Pipiria?

³ Te akamatakite maira a Iehova ia tatou i te kino o te tu parau e te noinoi na te akamaroiroi anga ia tatou kia apii mei tei tupu ki tona au tavini. I roto i teia au akaraanga, ka kite tatou e kua rauka ia Satani i te ereere i te au tavini tukatau  o Iehova. Ko te aiteanga ainei e kare e rauka ia tatou i te kopae i te reira? Kare. Kua oronga mai a Iehova i te au akaraanga i roto i te Pipiria “ei ako mai oki ia tatou.” (1 Kori. 10:11) Ka apii mai tatou mei teia au akaraanga kia rauka ia tatou i te kopae i te au ereere a te Tiaporo.

4. Eaa te ka tupu me e tu parau to tatou?

⁴ Inangaro a Satani kia akatupu tatou i te tu parau tau kore. Kite aia me akatere te tu parau ia tatou, ka aite tatou mei iaia rai e ka ngere tatou i te ora mutu kore. (Mase. 16:18) No reira kua akamatakite mai te apotetoro ko Paulo no tetai tangata e ka “akateiteiia aea aia e te nengonengo, e rokoia iora aia i te akaapa i akaapaiaʼi te diabolo ra.” (1 Timo. 3:6, 7) Ka tupu tera ki tetai ua atu ia tatou, me e tangata ou tatou i roto i te tuatua mou me kore kua tavini ana tatou ia Iehova no tetai tuatau roa.

5. Ia Koheleta 7:16, 20, akapeea tetai tangata me akaari i te tu parau?

⁵ Te tu parau e tu karapii katoa te reira. Te tauta ra a Satani kia akamou tatou ki runga ia tatou uaorai eiaa ki runga ia Iehova, me tupu tikai te manamanata. Ei akaraanga, kua akaapa pikikaaia ana koe? Me kore kua takinokino tau koreia ana koe? Ka inangaro a Satani ia koe kia akaapa ia Iehova me kore toou au taeake. Te inangaro ra te Tiaporo kia manako koe, e ko te ravenga no te akatikatika i te manamanata, ko te rave i taau i manako e eiaa kia aru i ta Iehova aratakianga i roto i tana Tuatua.​—E tatau ia Koheleta 7:16, 20.

6. Eaa taau ka apii mai mei tei tupu ki tetai tuaine i te Netherland?

⁶ Akamanako i tei tupu ki tetai tuaine i te Netherland tei riri i te tu apa o tetai ke. Kua iki aia e kare aia e inangaro i te kapiti akaou kia ratou. Karanga aia, “Kua taitaia au e kare e inangaro i te taui i toku tu. Akakite au ki taku tane kia neke maua ki tetai putuputuanga ke.” E oti kua akara  aia i te JW Broadcasting^® o Mati 2016. Kua oronga mai te reira i te au ravenga akapeea me akono i te au tu apa ua o tetai ke. Akakite te tuaine: “Ka anoanoia au kia akamanako e kia akara meitaki i toku uaorai tarevake, e auraka e tauta i te taui i te tu o te au taeake e te au tuaine. Kua tauturu tera porokaramu iaku kia akamou ki runga ia Iehova e tona tikaanga ngateitei.” Eaa te apiianga? Me tupu tetai manamanata, e akamou ki runga ia Iehova. Pati i tana tauturu kia akara i tetai ke mei tana e kite ra. Te kite ra toou Metua i te rangi i to ratou tarevake; e kua akakore aia i ta ratou ara. Te inangaro ra aia kia pera katoa koe.​—1 Ioa. 4:20.

7. Eaa tei tupu ki te Ariki ko Uzia?

⁷ Kua akakeu te tu ngakau parau i te Ariki ko Uzia o Iuda kia kopae i te ako e kia rave i tana i manako. E tangata karape a Uzia. Kua autu aia i roto i te au tamaki, te au angaanga patu are, e te angaanga tanutanu. “Kua akamanuia maira te Atua i tana ra.” (2 Para. 26:3-7, 10) Inara karanga te Pipiria, “Ketaketa akera ra aia, kua akateiteiia tona ngakau e mate atura.” Kua akaue a Iehova e na te au kau taunga ua e oronga i te atinga kakara i ko i te iero. Inara kua māro te Ariki ko Uzia e kua oronga rai i te atinga kakara. Kare a Iehova i mareka ana e kua tuku aia i te maki repera ki runga i teia tangata ngakau parau. Kua vai teia maki repera ki runga ia Uzia no te katoa anga o tona oraanga.​—2 Para. 26:16-21.

8. Ia 1 Korinetia 4:6, 7, akapeea tatou me kopae i te tu parau?

⁸ Ka ō ainei tatou ki roto i te ereere o te tu parau mei ia Uzia rai? Akamanako i te akaraanga o José. Kua puapingaia aia ei tangata pitiniti e te tavini ra ei tangata pakari. E oronga ana aia i te ako i ko i te au akaputuputuanga e te uruoaanga, e ka pati te au akaaere kotinga kiaia no tetai aratakianga. Karanga aia, “Inara kua irinaki au ki toku uaorai kite karape e kare au i irinaki kia Iehova. Manako mai au e kua ketaketa toku akarongo, e kare au i akarongo ana ki ta Iehova au akamatakiteanga e te ako.” Kua rave a José i te ara kino e kua akaateaia ki vao i te putuputuanga. Te au mataiti i muri mai, kua āriki akaouia mai aia. Karanga aia:  “Kua apii mai a Iehova e kare ko te taoonga te mea puapinga, mari ra kia rave i tana i pati mai.” E akamaara, to tatou au kite karape e te au apainga i roto i te putuputuanga, no ko anake ïa ia Iehova. (E tatau ia 1 Korinetia 4:6, 7.) Me e tu parau to tatou, kare a Iehova e taangaanga ia tatou.

9. Eaa ta te tu noinoi i akakeu ia Satani e Eva kia rave?

⁹ Me akamanako tatou i te tu noinoi, ka maara ia tatou i te tu o Satani. Ei angera na Iehova, papu e maata te apainga meitaki a Satani. Inara e maata atu tana i inangaro. Kua inangaro aia i te akamorianga tei tau anake kia Iehova. Inangaro a Satani kia aite tatou kiaia, no reira ka tauta aia kia akatupu i te tu noinoi ki roto ia tatou. Kua akamata aia i te rave i te reira te tuatua anga aia kia Eva. Kua oronga aroa a Iehova i te au kai memeitaki ravarai na Eva e tana tane​—“te au rakau katoa o te kainga” mari ua e tai. (Gene. 2:16) Noatu rai, kua akavare a Satani ia Eva kia manako e ka anoanoia rai aia kia kai mei te rakau tei tureia. Kare a Eva i mareka ua i tana i rauka; e maata atu tana i inangaro. Kua kite tatou eaa tei tupu i muri mai. Kua ara a Eva e aere ua rai kua mate atu.​—Gene. 3:6, 19.

10. Akapeea te tu noinoi te riro anga ei ereere ki te Ariki ko Davida?

¹⁰ Kua akakeu te tu noinoi i te Ariki ko Davida kia akangaropoina i ta Iehova i oronga kiaia, kapiti mai te apinganui, te turanga teitei, e te autu anga ki tona au enemi. Akakite a Davida no ta te Atua au apinga aroa, “kare ra e tika kia tatau atu i te maata.” (Sala. 40:5) Inara i tetai atianga, kua ngaropoina ia Davida i ta Iehova i oronga kiaia. Kare aia i mareka ua; e maata atu tana i inangaro. Noatu e maata ta Davida vaine, kua akatupu aia i te anoano tika kore no te vaine akaipoipo a tetai tangata ke. Ko Bate-seba taua vaine ra, e ko Uria ngati Heta tana tane. Kua piri ainga atu a Davida kia Bate-seba, e kua nui atu taua vaine ra. Kua akaturi aia, inara tei kino rava atu, kua akanoo aia kia tamateia a Uria! (2 Samu. 11:2-15) Eaa ra a Davida i rave i teia? Kua manako ainei aia e kare a Iehova e kite mai? Noatu kua  tavini tiratiratu aia ia Iehova, kua akatupu aia i te tu noinoi e kua tupu te mamae maata kiaia. Te mea mataora, kua kite a Davida i tona tarevake e kua tataraara. Kua mareka tikai aia e kua akakore a Iehova i tana ara!​—2 Samu. 12:7-13.

11. Ia Ephesia 5:3, 4, eaa te ka tauturu ia tatou kia kopae i te tu noinoi?

¹¹ Eaa ta tatou ka apii mai mei te akaraanga o Davida? Ka rauka ia tatou i te kopae i te tu noinoi me akameitaki tatou ia Iehova no te au mea tana i oronga mai. (E tatau ia Ephesia 5:3, 4.) Kia mareka ua tatou i ta tatou i rauka. E akamaroiroi i te aronga apii Pipiria ou kia akamanako e tai apinga e kia akameitaki ia Iehova no te reira. Me rave aia i teia i te au rā no tetai epetoma, kua pure aia no runga e itu apinga tukeke. (1 Tesa. 5:18) Te rave ra ainei koe i teia? Me akamanako koe i te au mea ta Iehova i rave noou, ka tauturu te reira ia koe kia akaari i te tu akameitaki e te tu mareka ua. E me vai mareka ua koe, ka ngaro ke te tu noinoi.

12. Eaa ta te tu noinoi i akakeu ia Iuda Ikariota kia rave?

¹² Kua akakeu te tu noinoi ia Iuda Ikariota kia rave i tetai kino e kia pikikaa ia Iesu. Inara kare ko tona tu teia i mua ana. (Luka 6:13, 16) Kua iki a Iesu iaia ei apotetoro. E tangata kite e te irinakiia aia, e nana e akono ana i te pute moni. E taangaanga ana a Iesu e te au apotetoro i teia moni i roto i te angaanga tutu aere. Kua aite rai teia ki te moni oronga ua no te angaanga tutu aere i te ao nei. Inara kua akamata a Iuda i te keia i te moni noatu kua akamatakite ua rai a Iesu no runga i te tu noinoi. (Mare. 7:22, 23; Luka 11:39; 12:15) Kua kopae a Iuda i teia au akamatakiteanga.

13. Inaea i kiteaia ai te tu noinoi o Iuda?

¹³ Kua akaari a Iuda i tona tu noinoi i te po i mua ake ka tamateia ai a Iesu. Kua aere a Iesu e tana au pipi, e pera a Maria e Mareta ki te ngutuare o Simona repera. Ia ratou e kaikai ra, kua tu a Maria ki runga e kua riringi i te manongi meitaki e te oko maata ki runga i te mimiti o Iesu. Kua riri tikai a Iuda e tetai pae o te au pipi. Kua manako ratou e e meitaki atu i te taangaanga i teia moni i roto i te angaanga tutu aere. Inara e manako ke to Iuda. E tangata “keia aia,” e kua inangaro aia i te keia i te moni. Kua akakeu te tu noinoi ia Iuda kia pikikaa ia Iesu kia rauka tana moni.​—Ioa. 12:2-6; Mata. 26:6-16; Luka 22:3-6.

14. Akapeea tetai nga tokorua i te taangaanga anga ia Luka 16:13?

¹⁴ Akamaara a Iesu ki tana au pipi i teia tuatua: “Ko kotou nei oki, kare e tika kia akono, i te Atua e te Mamona.” (E tatau ia Luka 16:13.) E tika rai te reira i teia tuatau. Akamanako ana akapeea teia tuatua na Iesu te akakeu anga i tetai nga tokorua i Romania. Kua orongaia tetai ngai angaanga tutaki meitaki na raua i tetai enua ke. Karanga raua, “No ta maua ākā kaiou i ko i te bank, kua manako maua e ko teia angaanga e akameitakianga teia no ko ia Iehova.” Inara, ka tamanamanata teia i ta maua tavini anga ia Iehova. Muri ake i te tatau anga i te atikara “Tamou Marie i te Tu Tiratiratu ma te Ngakau Tavaitai” i roto i Te Punanga Tiaki o Aukute 15, 2008, kua rave raua i tetai ikianga. Karanga raua: “Me ko te akakoroanga e kia rauka maata te moni, te tuku ra maua i to maua pirianga kia Iehova ei tuanga rua. E ka paruparu to maua turanga pae vaerua.” No reira kare  maua i āriki i teia angaanga. Eaa tei tupu? Kua rauka tetai ngai angaanga meitaki na te tane i to raua enua. Karanga te vaine: “Ka tauturu ua rai a Iehova i tona au tavini.” Mataora teia nga tokorua e kua iki raua e ko Iehova to raua Pu, e kare ko te moni.

15. Eaa tatou ka papu ei e ka ora tatou mei ta Satani au ereere?

¹⁵ Eaa ta tatou ka rave me tupu te tu parau e te tu noinoi ki roto ia tatou? Ka rauka ia tatou i te taui! Akakite a Paulo no te aronga “tei riro ei tuikaa” na te Tiaporo, e ka rauka ia ratou i te taui kia ora mei tana ereere. (2 Timo. 2:26) Mei ia Davida rai, kua akarongo aia ki te ako a Natana, kua tataraara no tona tu noinoi, e kua akaketaketa akaou i tona pirianga kia Iehova. E akamaara, e ririnui atu a Iehova ia Satani. No reira me āriki tatou i ta Iehova tauturu, ka ora tatou mei tetai ua atu ereere a te Tiaporo.

16. Eaa te ka tauturu ia tatou kia kopae i te au ereere a Satani?

¹⁶ Ko te tika, e meitaki atu i te kopae takiri i te au ereere a te Tiaporo. Ka rauka anake teia ma te tauturu a te Atua. Inara, auraka e manako e kare teia au tu e tupu kia tatou! No te mea kua tupu ana teia tu parau e te noinoi ki te au tavini tiratiratu o Iehova. No reira, e pure kia Iehova i te au rā ravarai no te tauturu kia kite koe me kua akamata teia au tu viivii i te akaaere i toou manako e taau e rave ra. (Sala. 139:23, 24) Auraka rava e akatika i teia au tu kia akatere ia koe!

17. Eaa te ka tupu ki to tatou enemi, ko te Tiaporo?

¹⁷ E tauatini ua atu mataiti te taangaanga anga a Satani i tana au ereere. Inara, kare e roa atu ana ka opukinaia aia e ka takoreia. (Apo. 20:1-3, 10) Te tapapa nei tatou kia tae mai tera rā. No reira, kia vai matakite ua i ta Satani au ereere. Tauta pakari kia kore te tu parau e te noinoi e akatere ia koe. E kia maroiroi tatou i te “patoi atu i te diabolo, e nana e rere ke atu.”​—Iako. 4:7.