1. Σόσκε βακεράσα ότι ο Μπενγκ ισί σαρ εκ κυνηγός;

ΕΚ ΚΥΝΗΓΟΣ τθερέλα πι γκοντιάτε τι ασταρέλ ή τι μουνταρέλ εκ ζώος. Μπορεί τι τσσουβέλ σαβέ τι μανγκές παγίδες, σαρ βακερντάς εκ κατά ψεύτικα αμαλά σο τθερέλας ο Ιώβ. (Ιώβ 18:​8-10) Σαρ μπορίνελα εκ κυνηγός τι ασταρέλ πι παγιδάτε εκ ζώος; Σικλιόλα καζόμ πιο μπουτ πράγματα αβέλα-πες οντουλέ ζωόσκε. Κάι τζάλα; Σο μπεϊντίνελα; Καγιά παγίδα ισί η πιο λατσσί λέσκε; Ο Μπενγκ ισί σαρ ανταβά κυνηγός. Σικλιόλα καζόμ πιο μπουτ πράγματα αβέλα-πες αμένγκε. Ντικχέλα κάι τζάσα ντα σο μπεϊντίνασα. Σοράν, τραμπίνελα εκ παγίδα σο πακιάλα ότι κα ασταρέλ-αμέν λάσαρ οτθέ σο να μπεκλεντίνασα-λες. Όμως, η Αγία Γραφή βακερέλα αμένγκε ότι, ατζέ-ντα άμα κα περάς κι παγίδα, μπορίνασα τι νασάς λάταρ. Επίσης, σικλιαρέλα-αμέν σαρ τι αρακχαβάς-αμέν ανταλέ παγιδένταρ.

2. Καλά ισί ντούι κατά πιο λατσσέ παγίδες ι Μπενγκέσκε;

² Ντούι κατά πιο λατσσέ παγίδες ι Μπενγκέσκε ισί τι κερέλ-αμέν τι αβάς μπαρικανέ ή μπίτσαλε γιακχάκε. * Χιλιάδες μπρεσά ακανά, ο Μπενγκ κερντάς μπουτέ τζενέν τι αβέν αντικάς. Ισί σαρ εκ κυνηγός τσιρικλένγκο σο κερέλα εκχέ τσιρικλές τι περέλ λέσκε παγιδάτε ή ασταρέλα-λες διχτύσαρ. (Ψαλμ. 91:3) Όμως, ανταβά να μανγκέλα τι βακερέλ ότι σαρέ κα περάς κο παγίδες κι Μπενγκέσκε. Σόσκε; Επειδή ο Ιεχωβά σικαντάς αμένγκε καλά παγίδες τσσουβέλα ο Μπενγκ.​—2 Κορ. 2:11.

3. Σόσκε ο Ιεχωβά τσσουντάς κι Γραφή παραδείγματα τζενένγκε σο αβιλέ μπαρικανέ ντα μπίτσαλε γιακχάκε;

³ Ο Ιεχωβά σικλιαρέλα-αμέν σαρ μα τι αβάς μπαρικανέ ντα μπίτσαλε γιακχάκε κάνα βακερέλα αμένγκε σο αβιλό-πες μερικέ  τζενέντε σο υπηρετίνενας-λες. Κα ντικχάς σαρ μπορισάλο ο Μπενγκ τι περαβέλ ανταλέ παγιδέντε ατζέ-ντα τζενέν σο υπηρετίνενας μπρεσά ι Ιεχωβάς. Μήπως ανταβά μανγκέλα τι βακερέλ ότι σο-ντα τι αβέλ-πες κα περάς λέσκε παγιδέντε; Νάα. Ο Ιεχωβά τσσουντάς ανταλά παραδείγματα κι Γραφή για «τι προειδοποιήντιβας αμέν». (1 Κορ. 10:​11) Τζανέλα ότι μπορίνασα τι σικλιάς λένταρ ντα αντικάς τι αρακχαβάς-αμέν κατά παγίδες ι Μπενγκέσκε ή τι νασάς λένταρ.

4. Σο μπορεί τι αβέλ-πες άμα ισινάμ μπαρικανέ;

⁴ Ο Μπενγκ μανγκέλα τι αβάς μπαρικανέ. Τζανέλα ότι, άμα κα αβάς μπαρικανέ, κα μοιάζας λέστε ντα να κα τζουβντιάς για πάντα. (Παρ. 16:​18) Οτθάρ, ο απόστολος Παύλος βακερντάς ότι εκ τζενό κα μπορίνελας «τι πφερντιόλ μπαρικανιπέ ντα τι τθερέλ ο αποτέλεσμας σο βακέρντιλο ότι κα τθερέλ ο Μπενγκ». (1 Τιμ. 3:6, 7) Ανταβά κα μπορίνελας τι αβέλ-πες κο κάθε εκ αμένταρ, είτε ισινάμ νεβέ κι αλήθεια είτε υπηρετίνασα ι Ιεχωβάς μπουτ μπρεσά.

5. Σαρ κα μπορίνελας εκ τζενό τι αβέλ μπαρικανό σαρ σικαβένα ο εδάφια Εκκλησιαστής 7:​16, 20;

⁵ Ο τζενέ σο ισί μπαρικανέ ντικχένα σάντε πουμαρό νεαυτός. Ο Μπενγκ κερέλα σο νακχέλα λέσκε βαστένταρ για τι κερέλ-αμέν τι σκεφτίνας αμαρό νεαυτός παρά ι Ιεχωβάς, ντα πιο μπουτ κάνα τθεράσα εκ πρόβλημας. Για παράδειγμας, τσσουντέ τουμένγκε ποτές ο βάρετα εκχέ πραγμάσκε σο να κερντέν; Αδικιντάς-τουμέν ποτές καέκ τζενό; Ο Μπενγκ κα μανγκέλας μπουτ τι ντικχέλ-τουμέν τι χολιάνεν ι Ιεχωβάσκε ή τουμαρέ πφραλένγκε. Ντα μανγκέλα τι αμντίνεν ότι ο μόνος τρόπος για τι λύνεν ο πρόβλημας ισί τι κερέν ο πράγματα αντικάς σαρ μανγκένα τουμέν, όχι σαρ σικαβέλα τουμένγκε ο Ιεχωβά αντράλ πι Λαφίσταρ.​—Διαβάνεν Εκκλησιαστής 7:​16, 20.

6. Σο σικλιόνα οντουλένταρ σο νακχλάς εκ πφεν κι Ολλανδία;

⁶ Ντικχέν σο νακχλάς εκ πφεν κι Ολλανδία σο χολιάνελας μπουτ με το λάθη ι γιαβερένγκε. Να μπορίνελας γιαβέρ τι νταϊντίνελ οντουβά σο αβέλας-πες. Βόι βακερέλα: «Νιωθίναβας ντιπ κορκορί ντα ναστί  συγχωρίναβας οντουλέ πφραλέν. Βακερντόμ μι ρομέσκε ότι έπρεπε τι τζας γιαβερέ κχανγκιριάτε». Σοράν, ντικχλάμ ο JW Broadcasting^® σο νικίστιλο κο Μάρτιος 2016. Οτθέ, ντικχλάμ σο μπορίνασα τι κεράς κάνα κερένα λάθη ο γιαβερά. Η πφεν βακερέλα: «Αγαντόμ ότι έπρεπε τι αβάβ ταπεινή ντα τι σκεφτίναβ ο λάθη σο κεράβα με αντίς τι προσπαθίναβ τι αλλάναβ ι πφραλέν ντα ι πφενίν κι κχανγκιρί. Ο JW Broadcasting^® βοηθιντάς-μαν τι τθεράβ μο γιακχά κο Ιεχωβά ντα κο δικαίωμας σο τθερέλα βοβ τι βακερέλ αμένγκε σο τι κεράς». Σο σικλιόνα ανταλέ πφενιάταρ; Κάνα νακχένα εκ δοκιμασία, μα τσσιναβέν τι τθερέν τουμαρέ γιακχά κο Ιεχωβά. Μολίνεν-λες τι βοηθίνελ-τουμέν τι ντικχέν ι γιαβερέν αντικάς σαρ ντικχέλα-λεν βοβ. Ο Ιεχωβά τουμαρό Ντατ ντικχέλα λένγκε λάθη, αλλά μανγκέλα τι συγχωρίνελ-λεν. Μανγκέλα τουμένταρ-ντα τι κερέν-λες ανταβά.​—1 Ιωάν. 4:20.

7. Σο αβιλό-πες κο βασιλιάς Οζίας;

⁷ Επειδή ο Οζίας σο ισινέ βασιλιάς κο Ιούδας ισινέ μπαρικανό, να ασουντάς ι συμβουλή σο ντινέ-λες ο γιαβερά ντα κερντάς κάτι σο να τθερέλας ο δικαίωμας τι κερέλ. Ο Οζίας τζανέλας τι κερέλ λατσσές μπουτ πράγματα. Νικιντάς μπουτέ τζενγκίντε, κερντάς μπουτ πόλεις ντα τθερέλας μπουτ χωράφια. «Ο αληθινός Ντεβέλ κερντάς τι τζαν λατσσές ο πράγματα λέσκε». (2 Χρον. 26:​3-7, 10) «Όμως, κάνα λιντάς ζορ, λέσκο γκι αβιλό μπαρικανό ντα ανταβά κερντάς-λες καταστροφή», βακερέλα η Γραφή. Ο Ιεχωβά βακερντάς ότι σάντε ο ιερείς μπορίνενας τι πφαμπαρέν θυμίαμας κο ναός. Αλλά ο βασιλιάς Οζίας γκιλό κο ναός ντα πφαμπαρντάς θυμίαμας ενώ να τθερέλας ο δικαίωμας τι κερέλ-λες ανταβά. Ο Ιεχωβά να μπεϊντιντάς-λες ανταβά ντα τιμωριντάς οντουλέ μπαρικανέ τζενές με λέπρα. Ο Οζίας τθερέλας ανταβά νασφαλιπέ μέχρι σο μουλό.​—2 Χρον. 26:​16-21.

8. Σαρ βοηθίνενα-αμέν ο εδάφια 1 Κορινθίους 4:6, 7 μα τι αβάς μπαρικανέ;

⁸ Κα μπορίναας τι αβάς αμέν-ντα μπαρικανέ ντα τι αμαρτίνας σαρ κερντάς ο Οζίας; Ντικχέν σο αβιλό-πες κο Χοσέ. Τθερέλας εκ μπουτ λατσσί μπουτί ντα ισινέ εκ πρεσβύτερος σο σεβάνενας-λες κι κχανγκιρί. Κερέλας ομιλίες κο συνελεύσεις ντα ο επίσκοποι περιοχής μανγκένας λέσκι συμβουλή. Αλλά ο Χοσέ βακερέλα: «Ντάβας μπέσα οντουλέντε σο μπορίναβας τι κεράβ με ντα οντουλέντε σο τζανάβας. Τσσουντόμας κι νάκρη ι Ιεχωβάς. Αμντίναβας ότι ισινόμας ζουρανό, οτθάρ να ασουνάβας ο προειδοποιήσεις ντα ο συμβουλές ι Ιεχωβάσκε». Ο Χοσέ κερντάς  εκ μπαρί αμαρτία ντα χαλάς αποκοπή. Βουρτισάλο κι αλήθεια πριν μπουτ μπρεσά. Ακανά βακερέλα: «Ο Ιεχωβά σικλιαρντάς-μαν ότι ο σημαντικός νανέ τι τθεράς εκ λατσσί θέση αλλά τι κεράς οντουβά σο μανγκέλα αμένταρ βοβ». Τι ντας-αμέν γκοντί ότι σαρέ ο ταλέντα ντα σαρέ ο προνόμια σο τθεράσα κι κχανγκιρί ισί κατά Ιεχωβά. (Διαβάνεν 1 Κορινθίους 4:6, 7) Άμα ισινάμ μπαρικανέ, ο Ιεχωβά να κα χρησιμοποιήνελ-αμέν.

9. Σο κερντάς εμ ο Μπενγκ εμ η Εύα επειδή ισινέ μπίτσαλε γιακχάκε;

⁹ Κάνα σκεφτίνασα ο λάφι μπίτσαλι γιακχ αβέλα αμαρέ γκοντιάτε ο Σατανάς ο Διάβολος. Σαρ άγγελος ι Ιεχωβάσκο, ο Μπενγκ πρέπει τι τθερέλας μπουτ σουκάρ προνόμια. Αλλά μανγκέλας πιο μπουτ προνόμια. Μανγκέλας τι ντεν-λες ι λατρεία σο αξίνελα σάντε ο Ιεχωβά. Ο Μπενγκ μανγκέλα τι αβάς σαρ λέστε, οτθάρ κερέλα σο νακχέλα λέσκε βαστένταρ για τι κερέλ-αμέν τι μανγκάς πιο μπουτ οντουλένταρ σο τθεράσα. Η πρώτη φαρ σο προσπαθιντάς τι κερέλ-λες ανταβά ισινέ κάνα κερντάς λάφι ι Ευάσαρ. Ο Ιεχωβά ντινάς αντράλ πι γκίσταρ κι Εύα ντα λάκε ρομέστε μπερεκέτι χαμπέ​—μπορίνενας τι χαν “σαρέ κατά δέντρα σο ισινέ κο κήπος” εκτός εκχέσταρ. (Γέν. 2:​16) Όμως, ο Μπενγκ χουχαντάς ι Ευά σόσκε κερντάς-λα τι αμντίνελ ότι τθερέλας ανάγκη τι χαλ κατά δέντρος σο βακερντάς λένγκε ο Ιεχωβά μα τι χαν. Η Εύα να εκτιμιντάς οντουλά σο τθερέλας. Μανγκέλας πιο μπουτ. Τζανάσα κάι γκερντάς-λα ανταβά. Η Εύα αμαρτιντάς ντα τελικά μουλί.​—Γέν. 3:6, 19.

10. Σο αβιλό κάνα ο βασιλιάς Δαβίδ αβιλό μπίτσαλε γιακχάκο;

¹⁰ Ο Ιεχωβά ντινάας μπουτ πράγματα κο Δαβίδ. Ισινέ χουλανό, ισινέ βασιλιάς ντα νικιντάας μπουτέ τζενγκίντε. Ο Δαβίδ αγαβέλας ότι σαρέ οντουλά σο ντινάας-λες ο Ντεβέλ “ισινέ αζόμ μπουτ σο ναστί βακερέλας-λεν σαρέ”, ντα ισινέ πφερντό εκτίμηση ανταλέσκε. (Ψαλμ. 40:5) Αλλά εκ φαρ, ο Δαβίδ αβιλό μπίτσαλε γιακχάκο ντα μανγκέλας πιο μπουτ οντουλένταρ σο ντινάας-λες ο Ιεχωβά. Παρόλο σο τθερέλας μπουτέ ρομνίν, αρχισάλο τι μανγκέλ εκχέ γιαβερέσκε ρομνιά. Οντιά τζουβέλ ισινέ η Βηθ-σαβεέ, ντα λάκο ρομ ισινέ ο Ουρίας ο Χετταίος. Ο Δαβίδ σοτάς με τη Βηθ-σαβεέ, ντα βόι ατσσιλί κχαμνί. Να ερεσέλα σο κερντάς ανταβά μπουτ μπέτι πράγμας, κανονιντάς-ντα τι μερέλ ο Ουρίας! (2 Σαμ. 11:​2-15) Σο τθερέλας πι γκοντιάτε ο Δαβίδ;  Αμντίνελας ότι ο Ιεχωβά να ντικχέλας; Παρόλο σο ο Δαβίδ υπηρετίνελας πιστά ι Ιεχωβάς μπουτ μπρεσά, αβιλό μπίτσαλε γιακχάκο ντα ανταβά αντάς λέσκε μπαρέ ταλαιπωρίες. Σοράν όμως ο Δαβίδ αγαντάς πι αμαρτία ντα μετανιωσάλο. Καζόμ χαρούμενος ισινέ σο ο Ιεχωβά συγχωριντάς-λες!​—2 Σαμ. 12:​7-13.

11. Σο κα βοηθίνελ-αμέν μα τι αβάς μπίτσαλε γιακχάκε σαρ βακερένα ο εδάφια Εφεσίους 5:3, 4;

¹¹ Σο σικλιάσα κατά Δαβίδ; Να κα αβάς μπίτσαλε γιακχάκε άμα εκτιμίνασα σαρέ οντουλά σο ντινάς-αμέν ο Ιεχωβά. (Διαβάνεν Εφεσίους 5:3, 4) Πρέπει τι ερεσέν-αμέν οντουλά σο τθεράσα. Κάνα αρχίνασα τι κεράς μελέτη ι τζενέν, κα αβέλας λατσσό τι βακεράς λένγκε τι σκεφτίνεν εκ λατσσό πράγμας σο ντινάς-λεν ο Ιεχωβά ντα τι βακερέν λέσκε ευχαριστώ ανταλέσκε. Άμα εκ τζενό κερέλα-λες ανταβά κάθε ντιβές για εκ εβδομάδα, κα κερέλ προσευχή εφτά διαφορετικέ πραγματένγκε. (1 Θεσ. 5:​18) Κερένα-λες τουμέν ανταβά; Άμα σκεφτίνενα σαρέ οντουλά σο κερντάς ο Ιεχωβά τουμένγκε, ανταβά κα βοηθίνελ-τουμέν τι πφερντιόν εκτίμηση. Κάνα ισινέν πφερντέ εκτίμηση, ερεσένα-τουμέν οντουλά σο τθερένα. Ντα κάνα ερεσένα-τουμέν οντουλά σο τθερένα, να κα αβέν μπίτσαλε γιακχάκε.

12. Σο κερντάς ο Ιούδας ο Ισκαριώτης επειδή αβιλό μπίτσαλε γιακχάκο;

¹² Επειδή ο Ιούδας ο Ισκαριώτης ισινέ μπίτσαλε γιακχάκο, κερντάς εκ μπουτ μπέτι πράγμας ντα προδοντάς ι Ιησούς. Αλλά ο Ιούδας να ισινέ πάντα ασακό τζενό. (Λουκ. 6:​13, 16) Ο Ιησούς τραμπιντάς τι αβέλ λέσκο απόστολος. Αγαβάσα ότι ισινέ εκ τζενό σο ντένας λέσκε μπέσα σόσκε τθερέλας ο κουτίς ι λοβέντζαρ. Ο Ιησούς ντα ο απόστολοι λένας οντουλέ λοβένταρ για τι μπορίνεν τι κερέν πουμαρό έργος. Οντουλά λοβέ ισινέ σαρ ο συνεισφορές σο ντιντιόνα αντιβές ι εργόσκε σο αβέλα-πες σαρό κο ντουνιάς. Αλλά εκ φαρ, ο Ιούδας αρχισάλο τι τσορέλ, παρόλο σο ασουντάας μπουτ φαρ ι Ιησούς τι βακερέλ κο τζενέ μα τι αβέν μπίτσαλε γιακχάκε. (Μάρκ. 7:​22, 23· Λουκ. 11:​39· 12:​15) Ο Ιούδας να ντινάς σημασία οντουλέντε σο βακερέλας ο Ιησούς.

13. Κάνα σικαντάς ο Ιούδας ότι ισινέ μπίτσαλε γιακχάκο;

¹³ Ο Ιούδας σικαντάς ότι ισινέ μπίτσαλε γιακχάκο χάνικ πριν τι μερέλ ο Ιησούς. Ο Ιησούς ντα λέσκε μαθητές, αντρέ ανταλέντε η Μαρία ντα λάκι πφεν η Μάρθα, ισινέ καλεσμέ κο κχερ κι Σιμωνάσκο κι λεπρόσκο. Καζόμ χάνας, η Μαρία ιστίντιλι ντα τσσορντάς κο σορό κι Ιησούσκο εκ λάδι σο κχάντελας μίσκι ντα ισινέ μπουτ πααλίς. Ο Ιούδας ντα ο γιαβερά μαθητές χολιασάλε. Ο γιαβερά μαθητές μπορεί τι πακιάνας ότι ο λοβέ κα αβέλας πιο λατσσό τι τθερέν-λεν ι εργόσκε. Αλλά ο Ιούδας χολιασάλο σόσκε «ισινέ τσορ» ντα μανγκέλας τι τσορέλ λοβέ κατά κουτίς. Ντα επειδή ισινέ μπίτσαλε γιακχάκο, προδοντάς ι Ιησούς λοβένγκε.​—Ιωάν. 12:​2-6· Ματθ. 26:​6-16· Λουκ. 22:​3-6.

14. Σαρ κερντάς εκ αντρόγυνος πουμαρέ ζωγιάτε ι συμβουλή ι εδαφιόσκι Λουκάς 16:13;

¹⁴ Ο Ιησούς αντάς κι γκοντί πι μαθητένγκι ακαγιά σημαντική αλήθεια: «Ναστί αβένα δούλοι ι Ντεβλέσκε ντα ι Λοβένγκε». (Διαβάνεν Λουκάς 16:​13) Ανταβά ισί μπαγιά αμαρέ ντιβεσέντε-ντα. Ντικχέν σαρ εκ αντρόγυνος κι Ρουμανία κερντέ πουμαρέ ζωγιάτε ο λάφια ι Ιησούσκε. Αρακχλέ εκ μπουτί εκχέ χουλανέ τθεμέστε. «Τθεράας τι ποκινάς εκ μπαρό δάνειος, οτθάρ κι αρχή σκεφτιντάμ ότι ανταγιά μπουτί ισινέ ευλογία κατά Ιεχωβά», βακερένα. Όμως, ισινέ εκ πρόβλημας. Άμα κα λένας οντιά μπουτί, κα τθερένας πιο χάνικ σαάτι ι Ιεχωβάσκε. Αφού διαβαντέ ο μάθημας «Να Διατηρείτε Οσιότητα με Ενοποιημένη Καρδιά» κι Σκοπιά 15 Αυγούστου 2008, λιντέ πουμαρί απόφαση. Βον βακερένα: «Άμα μανγκάας τι τζας εκχέ γιαβερέ τθεμέστε για τι νικαβάς πιο μπουτ λοβέ, να κα τσσουβάας αμαρέ ζωγιάτε  ανγκλάλ ι Ιεχωβάς. Ισινάμας σίγουροι ότι αμαρί φιλία ι Ιεχωβάσαρ κα τθερέλας πρόβλημας». Οτθάρ, να γκιλέ οντουλέ μπουτιάτε. Σο αβιλό-πες; Ο ρομ αρακχλάς εκ μπουτί πουμαρέ τθεμέστε ντα νικαβέλας ο λοβέ σο τθερένας ανάγκη. Η ρομνί βακερέλα: «Ο Ιεχωβά πάντα κα βοηθίνελ πι υπηρετόν». Ντα ο ντούι-ντα χαιρίνενα σο αβιλέ δούλοι ι Ιεχωβάσκε ντα όχι ι λοβένγκε.

15. Σόσκε ισινάμ σίγουροι ότι μπορίνασα τι νασάς κατά παγίδες ι Μπενγκέσκε;

¹⁵ Σο αβέλα-πες άμα κα αγαβάς ότι αβιλάμ μπαρικανέ ή μπίτσαλε γιακχάκε; Μπορίνασα τι αλλάνας! Ο Παύλος βακερντάς ότι οντουλά σο «αστάρντιλε τζουβντέ» κατά Μπενγκ μπορίνενα τι νασέν κατά παγίδα. (2 Τιμ. 2:​26) Ανταβά αβιλό-πες κο Δαβίδ. Ασουντάς ι αυστηρή συμβουλή σο ντινάς-λες ο Νάθαν, μετανιωσάλο σο ισινέ μπίτσαλε γιακχάκο ντα αβιλό πάλι λατσσέ αμαλά ι Ιεχωβάσαρ. Ποτές μα μπιστρέν ότι ο Ιεχωβά ισί μπουτ πιο ζουρανό κατά Μπενγκ. Οτθάρ, άμα κα μουκχάς-λες τι βοηθίνελ-αμέν, μπορίνασα τι νασάς καλέ-ντα παγιδάταρ τσσουντάς ο Μπενγκ.

16. Σο κα βοηθίνελ-αμέν τι αρακχαβάς-αμέν κατά παγίδες ι Μπενγκέσκε;

¹⁶ Σίγουρα, ισί πιο λατσσό μα τι περάς ποτές κο παγίδες κι Μπενγκέσκε παρά τι χρειαζίντιβελ τι νασάς λένταρ. Ανταβά αβέλα-πες σάντε ι Ντεβλέσκε βοηθειάσαρ. Αλλά δεν πρέπει τι σκεφτίνας ότι αμέν ισινάμ ζουρανέ ντα να κα περάς ποτές! Ατζέ-ντα πφραλά σο υπηρετίνενα μπρεσά ι Ιεχωβάς αβιλέ μπαρικανέ ή μπίτσαλε γιακχάκε. Οτθάρ, μολίνεν ι Ιεχωβάς κάθε ντιβές τι βοηθίνελ-τουμέν τι ντικχέν σο σκεφτίνενα ντα σο κερένα. (Ψαλμ. 139:​23, 24) Κερέν σο νακχέλα τουμαρέ βαστένταρ για μα τι αβέν μπαρικανέ ή μπίτσαλε γιακχάκε!

17. Σο κα αβέλ-πες ατζεχάνικ κο Μπενγκ σο ισί αμαρό ντουσμάνι;

¹⁷ Χιλιάδες μπρεσά ακανά, ο Μπενγκ ισί ο κυνηγός. Αλλά ατζεχάνικ κα πφαντιόλ ντα κο τέλος κα καταστραφίντιβελ. (Αποκ. 20:​1-3, 10) Μπεσάσα σαρ σαρ τι αβέλ οντουβά ντιβές. Μέχρι τι αβέλ-πες ανταβά, τι αρακχαβέν-τουμέν κατά παγίδες ι Μπενγκέσκε. Κερέν σο νακχέλα τουμαρέ βαστένταρ για μα τι αβέν μπαρικανέ ή μπίτσαλε γιακχάκε. Τι αβέν αποφασισμέ τι «τζαν κόντρα κο Μπενγκ, ντα βοβ κα νασέλ τουμένταρ».​—Ιακ. 4:7.