1. Sostar daisaras te phenas că o Satan silo sar iech vânătoro?

SEA so camel iech vânătoro si te astarel hai te mudarel ieche animalos. Caște cherel cadaia vo folosisarel mai but athaimata, cadea sar sicavel vi i Biblia. (Iov 18:8-10) Tha sar daștil iech vânătoro te țârdel ieche animalos ande pesco athaimos? Vo dichel sar phiravel-pe o animalo: cai jial, so placial-les hai ca ce athaimos ci ajucărelas-pe. O Satan silo sar cado vânătoro. Vo dichel sar phiravas-ame, cai jias hai so placial-ame. Pala codoia șiol amenghe iech athaimos hai camel te peras ande leste bi te ajucăras-ame. Cu sea cadala, i Biblia phenel că dacă peras ande iech athaimos le Satanosco daisaras te încleas anda leste. Mai but, sicavel-ame de mai anglal sar te ne peras ande lesche athaimata.

2. Save si dui andal mai lașe athaimata le Satanosche?

² Dui andal mai lașe athaimata le Satanosche si o baricanimos hai o hașvalimos. * De mii bărșa o Satan folosil-pe mișto cadale buchiandar nasul. Vo si sar iech vânătoro ciricleango, cai țârdel le ciriclean ande iech athaimos sau astarel-le ande iech plasa. (Ps. 91:3) Cu sea cadala, daisaras te ne peras andal athaimata le Satanosche anda codoia că o Iehova sicadea amenghe so cherel vo caște astarel le manușen. (2 Cor. 2:11)

3. Sostar șiutea o Iehova anumime exemplea andi Biblia?

³ Iech modo prin savo o Iehova phenel amenghe de mai anglal o pericolo le baricanimasco hai le hașvanimasco si le experiențea prin save nachle unii anda lesche slujitori. Andel exemplea cai va avena te dichas-le, sicavel-pe claro că o  Satan daisardea te astarel ando athaimos vi le slujitoren le Iehovasche cai sas zurale. Însemnol cadaia că ci daisaras te na peras ande lesche athaimata? Nici. O Iehova șiutea cadal exemplea andi Biblia „ca ame te daisaras te las sama”. (1 Cor. 10:11) Vo jianel că cadala va ajutina-ame te na peras ande le athaimata le Diavolosche sau sicavel amenghe sar te încleas anda lende.

4. So daștil te întâmplol-pe amența dacă sam baricane?

⁴ O Satan camel te avas baricane. Vo jianel că dacă mechas-ame astarde le baricanimastar va avela te arăsas sar vo, hai va hasaraia i viața veșnico. (Prov. 16:18) Anda codoia, o apostolo Pavel phendea că iech manuș daștilas „te puchiarel-pe barimastar hai te primisarel sa codoi condamnarea cai primisardea-la o Diavolo”. (1 Tim. 3:6, 7) Cadaia daștil te întâmplol-pe fiesavesche anda amende indiferento că sam neve ando ciacimos sau că slujisaras le Iehovasche de mai but bărșa.

5. Cadea sar phenel-pe ando Eclesiasto 7:16, 20, sar daștilas iech manuș te sicavel baricanimos?

⁵ Iech manuș baricano silo egoisto. O Satan camel te avas egoiști hai te gândisaras-ame mai but amende sar co Iehova, vi mai but cana nachas prin zumaimata. Sar exemplo, sanas doșardo pe neciacimaste sau phirade-pe tusa ande iech modo neciacio? Ande cadal situații, le Satanos placialas-les but te doșares le Iehovas sau che phralen. Mai but, o Diavolo camel te pachias că i soluția si te cheres so tu cames na so phenel tuche o Iehova ande lesco Cuvânto. (Citisar Eclesiasto 7:16, 20.)

6. So daisaras te sichioas anda experiența iecha pheiachi andal Thema de Telal?

⁶ Te dichas i experiența iecha pheiachi andal Thema de Telal, cai sas-li zurales holiardi cana dichelas le imperfecțiuni chichiva phralenghe. I phei chiar phendea că ci mai daștil te beșel ande iech than cadale phralența. Voi phendea: „Simțosardem-ma zurales corcori hai ci daisardem te nachav părdal le sentimentea cai sas-ma. Anda codoia, phendem mânre rromesche că  trebulas te jias ande aver congregația”. Pala codoia, i phei dichlea i emisiunea anda martia 2016 pa JW Broadcasting^®, ande savi sas-le sicade chichiva sugestii anda sar daștil te nachel părdal averenghe imperfecțiuni. I phei phenel: „Hachiardem că trebulas te dichav pherdi sinceritatea hai umilința mânre greșeli, na te încercosarav te paruvav mânre phralen hai pheian andai congregația. O programo ajutisardea-ma te gândisarav-ma mai but co Iehova hai ca leschi suveranitatea”. So sichioas catar? Cana nachas prin zumaimata si importanto te gândisaras-ame co Iehova. Te mangas le Iehovas te ajutil-ame te dichas averen cadea sar dichel-le amaro Dad cerisco. Chiar cana dichel lenghe greșeli, vo camel te iertil-le hai ajucărel sa codoi buchi vi amendar. (1 Ioan 4:20)

7. So întâmplosardea-pe le regeia Ozia?

⁷ Puchiardo barimastar, o Ozia, o rege anda i Iuda, ci ascultisardea averenghe sfaturi hai cărdea so ci sas lesche dino. O Ozia sas iech murș cai jianelas te cherel mișto but buchia. Vo sas-lo zuralo ande but războaia, vazdea but forurea hai bariardea but i agricultura. „O ciacio Del cărdea te jial lesche mișto.” (2 Cron. 26:3-7, 10) „Tha cana arăslea zuralo lesco ilo pherdilea-pe barimastar caring leschi distrugerea.” O Iehova phendea că numai le rașaien sas-le o drepto te anen tămâia ando templo. Tha o rege Ozia, puchiardo barimastar, gălea andre ando templo caște anel tămâia. Cadaia sas zurales nasul andel iacha le Iehovasche hai cărdea te avel-les lepra. O Ozia sas iech leproso sea peschi viața. (2 Cron. 26:16-21)

8. Cadea sar phenel-pe ando 1 Corinteni 4:6, 7, sar daisaras te na peras ando athaimos le baricanimasco?

⁸ Daisaras vi ame te peras ando athaimos le baricanimasco cadea sar o Ozia? Te dichas o exemplo ieche phralesco José. Vo sas iech baro manuș de afaceri hai iech lașio phuro de congregație. Încărelas teme ca le congresea, hai le supraveghetori de circumscripție manghenas lesco sfato. O José phenel: „Începosardem te pachiav-ma zurales ande mande hai ande mânri experiența. Ci mai șiutem mânro pachiamos ando Iehova. Pachiaiem că som zuralo, cadea că ci mai ascultisardem so phenelas manghe o Iehova”. O José cărdea iech baro păcato hai sas-lo excludime. Vo sas-lo primime parpale acana chichiva bărș. O José phenel: „O Iehova sicadea-ma  că i mai importanto buchi na-i te avel-ame iech titlo, tha te cheras so manghel amendar vo”. Te na bâstras că le talentea cai si ame hai le privilegii cai primisaras-le andi congregația aven catar o Iehova. (Citisar 1 Corinteni 4:6, 7.) Dacă sam baricane o Iehova ci va folosila-ame.

9. So cărde o Satan hai i Eva anda codoia că sas-le hașvale?

⁹ Cana phenas hașvalimos, daștil-pe, că gândisaras-ame co Satan. Vo sas iech andal îngeri le Iehovasche hai sas-les but bare privilegii. Cu sea cadala, vo ci sas-lo mulțumime lența. O Satan camlea ca lesche te anel-pe i închinarea cai numai le Iehovasche trebul dini. Anda codoia că camel te avas sar vo, camel te cherel-ame te avas nemulțumime soia si ame. I iechto cai vo athadea ande cado felo sas i Eva. Ande peschi bari iubirea o Iehova dea la Eva hai le Adamos but hai lașio hamos. Von daștinas te han „anda orisavo cașt andai bar”, numai anda iech corcoro nici. (Gen. 2:16) Cu sea cadala, o Satan athadea la Eva caște pachial că trebulas te hal vi anda codo cașt. Voi ci sas mulțumime soia sas-la, camlea mai but, tha jianas mișto so întâmplosardea-pe mai dur. I Eva păcătuisardea hai ji la urmă, mulea. (Gen. 3:6, 19)

10. Sar pelea o rege David ando athaimos le hașvalimasco?

¹⁰ O rege David primisardea but binecuvântări catar o Iehova, sar avelas barvalimos, gloria hai but victorii. O David sas-lo recunoscătorii le Iehovasche anda so dea-les hai phendea că sas-le ‘prea but caște daștil te phenel-le’. (Ps. 40:5) Tha, pala iech timpo o hașvalimos cărdea le Davidos te na mai avel mulțumime soia dea-les o Iehova, camlea mai but. Chiar cana sas-le mai but rromnia, o David mechlea ca ande lesco ilo te cărdiol-pe iech camnimos nepotrivime anda avereschi rromni. Cadai juvli sas i Bat-Șeba, i rromni le Urieschi, o hetito. O David gândisardea-pe numai peste hai cărdea adultero la Bat-Șebaia hai voi așilea phari. Pala codoia, o David cărdea iech păcato vi mai baro, șiutea te avel mudardo o Urie. (2 Sam. 11:2-15) So întâmplosardea-pe le Davidoia? Gândisardea-pe că o Iehova ci dichelas-les? Chiar cana slujisardea loialo le Iehovasche but bărșa vo pelea ando athaimos le hașvalimasco hai o prețo cai pochindea-les sas zurales cuci. Tha ce mișto,  că o David phendea o păcato cai cărdea-les hai falea-les nasul anda so cărdea. Chichi de recunoscătorii sas-lo vo cana sas-les pale i aprobarea le Iehovaschi! (2 Sam. 12:7-13)

11. Cadea sar phenel-pe ando Efeseni 5:3, 4, so daștil te ajutil-ame te na peras ando athaimos le hașvalimasco?

¹¹ Anda o exemplo le Davidosco sichioas că daisaras te na peras ando athaimos le hașvalimasco cana sam recunoscători anda sea so dea-ame o Iehova. (Citisar Efeseni 5:3, 4.) Trebul te avas mulțumime soia si ame. Codola cai studiin i Biblia sile zuriarde te gândin-pe ca iech buchi anda savi sile recunoscători le Iehovasche hai te mulțumin lesche. Dacă iech manuș cherel cadai buchi ande fiesavo ghies pala iech curco, vo rughisardea-pe anda efta buchia. (1 Tes. 5:18) Cheres vi tu sa cadea? Cana meditosares ca sea so cărdea o Iehova anda tute va ajutila-tu te aves recunoscătorii. Hai cana san recunoscătorii, san vi mulțumime. Cana san mulțumime, o hașvalimos ci daștil te astarel-tu.

12. So cărdea o Iuda Iscariot anda codoia că sas-lo hașvalo?

¹² O hașvalimos cărdea anda o Iuda iech baro trădătoro. Tha mai anglal vo ci sas-lo cadea. (Luca 6:13, 16) O Isus alosardea-les sar lesco discipolo. Vo sas iech manuș goghiaver hai demno pachiamasco cadea că sas lesche dini i cutia le lovența. O Isus hai lesche apostoli folosinas cadal love caște pochinen le cheltuieli anda i lucrarea de predicare. Daisaras te phenas că cadal love sas sar le donații cai si dine aghies anda i lucrarea mondialo. Tha pala iech timpo, o Iuda începosardea te ciorel andal love, chiar cana așundea butivar le Isusos cana delas duma anda o athaimos le hașvalimasco. (Mar. 7:22, 23; Luca 11:39; 12:15) O Iuda ci încărdea conto anda so phendea o Isus.

13. Cana dichilea-pe vi mai mișto o hașvalimos le Iudasco?

¹³ O hașvalimos le Iudasco dichlea-pe vi mai mișto țâra timpoia angla so te merel o Isus. O Isus hai lesche discipoli mașcar save sas vi i Maria hai lachi phei, i Marta, sas-le acharde te han ando chăr le Simonosco, o leproso. Ando timpo so hanas, i Maria uștilea hai șiordea uleio parfumato po șăro le Isusosco, uleio cai sas zurales cuci. O Iuda hai le coaver discipoli holiarde-pe zurales. Daștil-pe că le discipoli gândisarenas-pe că le love daisardeas te aven folosime mai mișto caște ajutin codolen ciore tha o Iuda camlea aver vareso. Vo sas iech cior hai camlea te ciorel love andai cutia. Mai târzio, o hașvalimos cărdea le Iudas te bichinel le Isusos ando prețo ieche sclavosco. (Ioan 12:2-6; Mat. 26:6-16; Luca 22:3-6)

14. Sar aplichisardea iech familia le cuvintea le Isusosche cai arachas-le ando Luca 16:13?

¹⁴ O Isus andea amintea pesche continuatorenghe iech baro ciacimos: „Ci daștin te aven sclavi le Devlesche hai le Barvalimasche”. (Citisar Luca 16:13.) Cadaia si ciaces vi aghies. Te dichas sar aplichisardea iech familia anda România le cuvintea le Isusosche. Sas lenghe dini iech buchi pe iech țâra timpo ande iech them mai barvalo. Von phenen: „Sas ame bare camimata ca banca hai anda codoia co începuto pachiaiam că cadai buchi sas iech binecuvântarea catar o Iehova, tha cado sas iech athaimos”. Dacă avileas te jian ca codoi buchi așileas-le țâra timpo caște slujin le Iehovasche. Pala soste citisarde o articolo „Așen loiali ieche saste ileia”, anda O Turno de Veghe anda 15 augusto 2008, hachiarde so trebulas te cheren. Von phenen: „Dacă găleamas ande iech them străino numai caște cheras love ci mai șiuteamas  amari relația le Iehovaia po iechto than. Pachiaiam zurales că amari spiritualitatea ci mai avileas zurali”. Cadea că, alosarde te na jian. O phral arachlea pesche iech buchi ande pesco them cai ajutisardea-le te pochinen penghe cheltuieli. I phei phenel: „O vast le Iehovasco ci silo niciechdata prea harno”. Cadai familia sili bucurime anda codoia că alosarde ca o Iehova te avel lengo Stăpâno, na le love.

15. Catar jianas că daisaras te scăpisaras andal athaimata le Satanosche?

¹⁵ Tha so daisaras te cheras dacă peleam ando athaimos le baricanimasco hai le hașvalimasco? Sam siguri că daisaras te încleas anda leste. O Pavel phendea că codola cai ‘sile astarde de jiuvinde’ catar o Diavolo daștin te scăpin anda o athaimos. (2 Tim. 2:26) Cadea sas vi le Davidoia. Vo acceptisardea i mustrarea catar o Natan, falea-les nasul anda so cărdea hai cărdea eforturi caște zuriarel pale pesco amalimos le Iehovaia. Te na bâstras niciechdata că o Iehova silo mai zuralo sar o Satan! Cadea că, cana acceptisaras o ajutorii le Iehovasco daisaras te încleas anda orisavo athaimos cai șiol-les amenghe o Diavolo.

16. So ajutil-ame te na peras andel athaimata le Satanosche?

¹⁶ Si ciaces, si mai mișto te na peras andel athaimata le Satanosche sar te trebul te încleas anda lende. Daisaras te cheras cadaia numai le ajutoroia le Iehovasco. Sa cadea, ci trebul te pachias-ame prea but ande amende. Chiar vi unii manușa cai slujisarde but timpo le Iehovasche cărdile baricane sau hașvale. Anda codoia, te rughisaras ande fiesavo ghies le Iehovas te ajutil-ame te hachiaras dacă cadal trăsături nasul începosarde te dichion-pe ando modo sar gândisaras hai ande so cheras. (Ps. 139:23, 24) Te na mechas-ame niciechdata astarde ande lengo athaimos!

17. So va întâmplola-pe na pa but timpo amare dușmanoia, o Diavolo?

¹⁷ De mii bărșa o Satan silo iech vânătoro ratavalo. Tha, na pa but timpo, vo va avela phanglo hai, ji la urmă, distrugime. (Rev. 20:1-3, 10) Abia ajucăras codo ghies. Ji atunci te las sama ca le athaimata le Satanosche. Te das sea amari zor te na mechas-ame astarde catar o baricanimos sau o hașvalimos hai te avas hotărâme ‘te așias contra le Diavolosche hai vo va nașela amendar’. (Iac. 4:7)