1. Bulya gurhi rhwakashushanya Shetani n’omuhivi?

OMUHIGO omuhivi ajira guba muguma gone: kugwarha erhi kuniga ensimba ali ahiva. Anakolesa mirhego minji ly’arhuluba ensimba, nk’oku muguma wa balya bacishomagya mpu balirhuliriza Ayubu aderhaga. (Ayu. 18:8-10) Gurhi omuhivi ajira ly’ensimba egwarhwa n’omurhego anarhegaga? Anarhangicifunza binji kuli eyo nsimba. Anamanyirire ngahi ekaja? Bici esima? Na gurhi akayigwarha buzira kumanya? Shetani ashushanyizibwe n’oyo muhivi wa ntyo. Anakacifunza binji kuli rhwe. Anakalola ngahi rhwaja na bici rhusima. Na buzinda anarhege omurhego alangalire oku gwanarhugwarha buzira kumanya. Cikone Ebibliya erhubwizire n’obwalagale oku erhi rhwakagwarhwa omu murhego gwage, byanacihashikana rhugurhengemo. Na kandi erhuyigirizize gurhi rhwakayakamwo emirhego yoshi ya Shetani.

2. Mirhego ibirhi mikulu ehi Shetani alugikolesa?

² Obucibone n’irala ly’okuba na binji * yo mirhego ibirhi mikulu Shetani alugikolesa. Hakola hali myaka minji Shetani ali akolesa ezo ngeso mbi, anabwine oku bantu banji banagwarhwe mw’ezo ngeso. Kw’ayorha nka muntu oli warhega orhunyunyi, anaje arhuhugûla lyo rhuja oku mwiguli erhi oku bukila arhezire. (Enna. 91:3) Cikone rhurhashinganini rhugwarhwe omu murhego gwa Shetani. Bulya gurhi? Bulya Yehova arhufulûlire obwengehushu Shetani akolesa.​—2 Kr. 2:11.

3. Bulya gurhi Yehova ayandikisagya nyiganyo nguma na nguma omu Bibliya?

³ Enjira nguma Yehova arhurhondamwo oku rhuyake obucibone n’irala ly’okuba na binji kuba kurhuyigiriza kugerera enyiganyo z’okunali z’ebyahikire abandi bantu. Enyiganyo rhwaganirira zarhuyereka oku ciru Shetani ahikire aha agwarha abakozi ba Yehova bakuzire kiroho omu mirhego yage. K’oko kuli kuderha oku  birhakahashikana okuyaka eyo mirhego? Nanga ciru n’ehitya. Yehova ayandikisize ezo nyiganyo omu Bibliya lyo ‘zikârhurhonda.’ (1 Kr. 10:11, Mashi Bible) Amanyire oku ezo nyiganyo z’okurhurhonda zanarhuyigiriza bintu binji na ntyo rhwanayaka okugwarhwa omu mirhego ya Ibilisi.

4. Ngahi obucibone buheka omuntu?

⁴ Shetani aba alonzize rhube n’obucibone burhalusire olugero. Ayishi oku erhi rhwakacilekerera rhurhegekwe n’obucibone burhalusire olugero, rhwanaba akage na ntyo rhwanayishibula obuzine bw’ensiku n’amango. (Mig. 16:18) Oko ko kwarhumaga Paolo arhurhonda, oku omuntu anajamw’ “obucibone na ntyo atwirwe olubanja luli nk’olu Ibilisi atwiragwa.” (1 Tm. 3:6, 7, NWT) Oko kwanahikira ngasi muguma wirhu, rhube rhuciri bahyahya omu okuli erhi rhube rhukola rhugwerhe myaka minji rhuli rhwakolera Yehova.

5. Nk’oku biyerekinwe omu lwandiko lwa Omuhanûzi 7:16, 20, gurhi omuntu akayerekanamwo oku ali wa bucibone?

⁵ Obucibone ko bunaba nka kucizigira wenene. Shetani analonze rhube bakucizigira rhwenene omu kusegeza obwenge bwirhu oku bunguke bwirhu rhwenene kulusha okubusegezako Yehova, ci bwenene amango rhuli omu mazibu ly’alonza rhujire ntyo. Kwa lwiganyo, ka bakola bakushobesire ebi orhajijire? K’okola ojirirwe okurhashinganini? Shetani anasima ohikire aha wagaya Yehova erhi bene winyu. Na kandi Ibilisi analonza orhanye oku ly’okubûla ebintu, oshinganine ojire ebintu nk’oku onalonzize ahali hw’okukulikira obulongozi Yehova ahanyîre omu Kanwa kage.​—Osome Omuhanûzi 7:16, 20.

6. Bici wakaciyigiriza kugerera olwiganyo lwa mwali wirhu muguma olama omu Pays-Bas?

⁶ Rhuganirire olwiganyo lwa mwali wirhu muguma olama omu Pays-Bas, wahikiraga aha agayisibwa n’amagosa g’abandi. Ahiga oku arhakacihash’ilembera okukageza akasanzi haguma n’abandi bantu. Adesire ntya: “Nakaciyumva ndi kahumba bwenene, ntakanacihashir’ishanja entanya zani. Nabwira ibaniè oku rhuhamire omu cindi-cindi cigamba.” Buzinda alola eprograme ya JW Télédiffusion y’omwezi gwa 3, 2016. Eyo programe yaliyerekine gurhi omuntu akalemberamwo amagosa  g’abandi. Oyo mwali wirhu acibiriderha ntya: “Nabona oku nshinganine mbe mwirhohye na ntanye oku magosa gani ahali hw’okulonza mpu nshanje bene wirhu na bali birhu b’omu cigamba. Eyo programe yantabala nasegeza obwenge bwani kuli Yehova n’ehaki yage y’okurhambula.” Ka hali ebi ociyigirizize kugerera olo lwiganyo? Amango oli omu mazibu, okasegeza obwenge bwawe kuli Yehova. Omushenge okurhabale okabona abandi nk’oku ababona. Sho w’omu mpingu anabone amagosa gabo, cikone anabe mubidu okubababalira. Ntyo kw’alonzize nawe okajira.​—1 Yn. 4:20.

7. Bici byahikire Mwami Uziya?

⁷ Obucibone bwarhuma Mwami Uziya w’e Yuda abula kuyumvirhiza amahano, na ntyo ajira ebintu n’obuhalanjisi. Mwami Uziya ali ntwali ya mulume. Akagilwa amavita anagahime, akagihikiriza mikolo minji y’obubasi, n’ey’obuhinzi. “Nyamuzinda amuha okuyololoka.” (2 Nga. 26:3-7, 10) Ebibliya edesire oku “erhi aba akola agwerhe misi minji ntyo, omurhima gwage gwarhangira okulengerera n’okubiha” n’okwo kwo kwamuyisire. Embere z’aho Yehova ali amarhegeka oku bakuhani bone bashinganine okuyokera obukû omu hekalu. Cikone Mwami Uziya n’obuhalanjisi bwage aja omu hekalu mpu naye ayoce obukû. Yehova arhashagalukiraga eco cijiro n’oko kwarhuma amuhâna omu kumuhirak’olushomyo. Mwami Uziya abera ali mushomyo kuhika olusiku l’okufâ kwage.​—2 Nga. 26:16-21.

8. Nk’oku biyerekinwe omu 1 Abakorinti 4:6, 7, gurhi rhwakayakamwo okuhikira aha rhwaba n’obucibone?

⁸ K’obucibone bwanarhuhira omu murhego guli nk’ogu Uziya ajagamo? Rhuganirire olwiganyo lwa José. Ali murhunzi mukulu anali mugula wakagikengwa bwenene omu cigamba. Akagigeza ehotuba oku ntimanano nkulu, ciru n’abangalizi b’omuzunguko bakagimuhûna amahano. Adesire ntya: “Cikone nakalangalira obuhashe bwani n’okucibona oku nkola njira bulenga bunji. Ntacikagilangalira Yehova. Nakarhanya oku mba ntwali, na ntyo ntalagiriri oku mahano n’oku burhonde bwa Yehova.” José ajira ecaha cizibu n’oko kwarhuma atengwa. Erhi hagera myaka minji, acibigalukira Yehova. Adesire ntya: “Yehova anyigirizize oku arhali okuba n’omukolo gwago-gwago omu cigamba ko kantu k’obulagirire, cikone okujira ebi arhuhunyîre ko kantu k’obulagirire.” Ngasi mango rhukakengera oku Yehova warhuhaga buhashe bulebe erhi omukolo gwago-gwago rhwakaba rhugwerhe omu cigamba. (Osome 1 Abakorinti 4:6, 7.) Erhi rhwakaba n’obucibone, Yehova arhakarhukolesa ciru n’ehitya.

9. Bici irala ly’okuba na binji lyarhumire Shetani na Eva bajira?

⁹ Erhi rhurhanya okubiyerekire irala ly’okuba na binji, ho n’aho rhunakengere Shetani Ibilisi. Nka muguma w’omu ba malahika ba Yehova, Shetani agwerhe mikolo minji minja na yago-yago. Cikone alonza abe na binji kulusha. Alonza oku bakamuha enterekêro n’obu Yehova yene oyishinganine. Shetani aba alonzize rhube akage, ly’arhujira ntyo anakalonza rhurharhimukagwa n’ebi rhugwerhe. Obo bwengehushu b’okujira ntyo aburhondezagya amango aganîraga na Eva. Obuzigire bwa Yehova bwamushumya ahe Eva n’iba biryo binji na byakuyigusa by’omu “mirhi y’obusâni yoshi,” cikone abahanza oku barhalyaga oku malehe ga murhi muguma gone. (Murh. 2:16) Cikone, Shetani arheba Eva omu kumujira arhondere arhanya oku alilagirire kw’ogo murhi muguma gwalihanzibwe. Eva abula kurhimukwa n’ebi agwerhe; alonza okuba na binji kulusha. Rhweshi rhumanyire okujira ntyo ngahi kwamuhesire. Eva ahikira aha ajira ecaha na buzinda afâ.​—Murh. 3:6, 19.

10. Gurhi irala ly’okuba na binji lyahikiremwo aha lyaba murhego kuli Mwami Daudi?

¹⁰ Irala ly’okuba na binji lyarhuma Mwami Daudi ayibagira ebi Yehova ali amamuha; nk’obuhirhi, okumanyikana, n’okuhima bashombanyi bage banji. Daudi alimanyire n’obwalagale oku engalo za Nnamahanga ziba “nyinji bwenene zirhakahashiganirwa!” (Enna. 40:5, NWT) Cikone kasanzi kaguma, Daudi ahikira aha ayibagira ebi Yehova amuhâga byoshi. Arhacirhimukagwa n’ebi agwerhe; alonza okuba na binji kulusha. Ciru akaba Daudi agwerhe bakazi banji, aleka omurhima gwage gwajamw’irala lirhalusire olugero lugenda mukabene. Oyo mukazi ye wali Betisheba, muka Uriya w’omu bûko bw’Abahiti. Okucizigira yenene kwashumya Daudi ajire obugonyi na Betisheba, anahikira aha aba izimi. Eco cijiro Daudi ajiraga cali cibi cikone acibiyushûla kw’ecindi; arheganya oku Uriya ayishiyirhwamo! (2 Sam. 11:2-15.) Gurhi Daudi akagirhanya? K’akagirhanya oku Yehova arhamubwine? Oyu mukozi mwishwekerezi wa Yehova ayemera irala ly’okuba na binji n’okucizigira yenene bimuje omu murhima gwage, na ntyo byamulerhera nyamanja. Akantu kw’okushagalula, kuli kubona oku enyuma z’aho, Daudi ayemera amagosa gage anaciyunjuza. Ashagaluka bwenene okucibiyemerwa na Yehova!​—2 Sam. 12:7-13.

11. Nk’oku biyerekinwe omu lwandiko lwa Abefezi 5:3, 4, bici byakarhurhabala rhulwise irala ly’okuba na binji?

 ¹¹ Bici rhuciyigirizize kugerera olwiganyo lwa Daudi? Lurhuyigirizize oku rhwanalwisa irala ly’okuba na binji erhi rhwakakavuga Yehova omunkwa kw’ebi arhuhîre. (Osome Abefezi 5:3, 4.) Rhushinganine rhukarhimukwa n’ebi rhugwerhe. Rhukahâ abanafunzi bahyahya b’Ebibliya omurhima bakarhanya oku mugisho Yehova amakabaha na ntyo bakamuvuga omunkwa enyanya z’omugisho akaba abahîre. Erhi omuntu akakajira ntyo ngasi lusiku, enyuma z’omugobe anaba erhi ashenzire Yehova okubiyerekire bintu nda biri lubero. (1 Ts. 5:18) K’onajire akantu kali nk’ako? Erhi wakakarhanya kw’ebi Yehova amakakujirira, oko kwanakurhabala obe wakuvuga omunkwa. N’amango oli wakuvuga omunkwa, wanakarhimukwa n’ebi ogwerhe. N’erhi wakaba wakurhimukwa, irala ly’okuba na binji lirhakacikujamwo.

12. Bici irala ly’okuba na binji lyarhumire Yuda Iskarioti ajira?

¹² Irala ly’okuba na binji lyarhuma Yuda Iskarioti aba mulenzi nkununu. Arhali ntyo kw’aliyosire aha murhondêro. (Lk. 6:13, 16) Yezu acishogaga ye nka ntumwa yage. Yuda agwerhe obuhashe anali wakulangalirwa, co carhumaga bamuha omukolo gw’okubika enshoho bakagibikiramw’ensaranga. Yezu n’entumwa, bakagikolesa ezo nsaranga lyo bahikiriza amalagirire gabo g’omu mukolo gw’amahubiri. Rhwanaderha oku ezo nsaranga ko zali nka bula burhabale rhuhâna ene lugenda omukolo gw’omw’igulu lyoshi. Cikone mango maguma, Yuda arhondera azimba ciru akaba akagiyumva Yezu ali arhonda abantu ngasi mango okubiyerekire irala ly’okuba na binji. (Mk. 7:22, 23; Lk. 11:39; 12:15) Yuda arhakulikiraga obo burhonde.

13. Mangaci irala lya Yuda ly’okuba na binji lyarhondera okubonekana?

¹³ Irala lya Yuda ly’okuba na bintu binji lyarhondera okubonekana hisanzi hisungunu embere bayirhe Yezu. Yezu n’abanafunzi bage, na Mariya na Marta, bali balalike omu mwa Simoni mushumyo. Erhi bali oku cîbo, Mariya ayimuka abulagira okw’irhwe lya Yezu amavurha g’amalashi ga ngulo ndarhi bwenene. Yuda n’abandi banafunzi bagaya bwenene. Nkaba abandi banafunzi bakarhanya oku kwakabire kwinja bakolese ezo nsaranga zagulaga ago mavurha omu mukolo gw’amahubiri. Cikone arhali ntyo ko Yuda yehe akagirhanya. “Câli cishambo,” ananalilonzize azimbe oku nsaranga zâli omu nshoho. Enyuma z’aho, irala ly’okuba na binji lyashumya Yuda alenganya Yezu na ntyo bamuha ensaranga ziri nk’ezi bakagigula omujà.​—Yn. 12:2-6; Mt. 26:6-16; Lk. 22:3-6.

14. Gurhi mulume muguma na mukage bakolesizemwo ihano liri omu lwandiko lwa Luka 16:13?

¹⁴ Yezu akengeza entumwa zage oku okuli kw’omusingi kudesire ntya: “Murhankahash’ikolera Nyamuzinda n’ebirugu.” (Osome Luka 16:13.) Ezo nderho ziciri z’okuli kuhika ene. Rhulole gurhi mwene wirhu muguma na mukage balama e Roumanie bakolesize ezo nderho za Yezu. Babaha akazi karhali k’ensiku zoshi omu cihugo cilengerire kulusha eco balilamiremo. Badesire ntya: “Rhwagwerhe ensaranga z’omukopo z’oku banki, erhi barhubwira ntyo, rhwarhanya oku ogo guli mugisho gwarhenga emwa Yehova.” Cikone, aho hali omurhego. Ako kazi kakarhumire barhacigendekera babà n’akasanzi kw’okujira omukolo gwa Yehova. Bahiga ebi bajira enyuma z’okusoma ecigabi calidesire “Dumisha Ushikamanifu Ukiwa na Moyo Kamili” cali omu Ilabiro ly’Akalalizi ly’omu nsiku 15/08/2008 (omu Ciswahiri cʼe Kenya). Badesire ntya: “Erhi akaba okuba na nsaranga nyinji ko kantu kakarhushumize rhujikolera omu cindi cihugo, oko kwali kwarhuma rhwahira obwîra bwirhu haguma na Yehova oku nafasi ya kabirhi omu kalamo kirhu. Rhwayemera n’obwalagale oku oko kwakahizire ehali yirhu y’ekiroho omu mazibu.” Na ntyo balahira ako kazi. Gurhi byabire enyuma z’aho? Oyo mwene wirhu apata akazi k’omu cihugo cabo kakagihikiriza amalagirire  gabo. Mukage adesire ntya: “Okuboko kwa Yehova kurhaba kofi.” Oyo mwene wirhu na mukage bashagalusire bwenene okubona bacishozire Yehova nka Nnawabo ahali hw’okucishoga ensaranga.

15. Bulya gurhi rhwakayemera n’obwalagale oku byanahashikana okurhenga omu mirhego ya Shetani?

¹⁵ Bici rhushinganine rhujire erhi rhwakabona oku rhwagwasirwe omu murhego g’obucibone erhi omu gw’irala ly’okuba na binji? Rhwanarhengamw’ogo murhego! Paolo adesire oku balya ‘bagwasirwe mpira’ na Ibilisi banacirhenga omu murhego gwage. (2 Tm. 2:26, NWT) Daudi ayumvirhiza amahano makali Natani amuhâga, aciyunjuza lugenda irala agwerhe ly’okuba na binji, anacibiba n’obwîra bwa hofi-hofi haguma na Yehova. Orhakagiyibagira oku Yehova ajira misi minji kukusha Shetani. Co cirhumire erhi rhwakayemera oburhabale bwa Yehova, rhwanahash’irhenga omu ngasi mirhego yoshi ya Ibilisi.

16. Bici byakarhurhabala lyo rhuyaka emirhego ya Shetani?

¹⁶ Ahali hw’okukahikira aha rhwarhenga omu mirhego ya Shetani, rhushinganine rhukayiyake loshi-loshi. Rhwanahash’ijira ntyo kugerera oburhabale bwa Nnamahanga. Cikone rhurhashinganini rhukarhanya mpu rhuli ntwali rhurhakaja omu murhego g’obucibone erhi gw’irala ly’okuba na binji! Ciru n’abakozi bishwekerezi ba Yehova bahikire aha baba n’obucibone n’irala ly’okuba na binji. Co cirhumire, okashenga Yehova ngasi lusiku akurhabale ly’omanya erhi ago morhere mabi gakola gali gashumya entanya n’ebijiro byawe. (Enna. 139:23, 24) Orhayemeraga ciru n’ehitya warhegekwa n’ago morhere!

17. Bici byahikira omushombanyi wirhu Ibilisi hano hofi-hofi?

¹⁷ Hakola hali myaka minji Shetani ali ahiva. Cikone hano hofi-hofi ashwekwa na buzinda asherezibwe. (Maf. 20:1-3, 10) Rhuli rhwalindirira oku olo lusiku lwahika. Omu kulindirira oku olo lusiku lwahika, ogendekere wahugûkwa bwinja emirhego ya Shetani. Ojire okwawe koshi ly’obucibone n’irala ly’okuba na binji birhakurhegekaga. Ohige okugendekera ‘kwalwisa Shetani, wabona oku akuyakira kuli.’​—Yk. 4:7.