1. Manino Satana ro azo ampitovizy amy mpamandriky?

RAIKY avao ty raha an-tsaini-mpamandriky voro na mpihaza biby an’ala any rey: Hahafaty na hahazo ani-raha fandrihiny iny. Mety hampiasa fandriky sankarazany ie. Miresaky sisany amy fandriky reo mihintsy aza ty Baiboly. (Joba 18:8-10) Akory ty ataony lafa mamandriky? Dinihiny soa raha fandrihiny iny. Aia ty lalany? Ino ty raha teateany? Ino ty fandriky mety hahazoa azy? Manahaky ani-zay mihintsy ty ataoni-Satana. Dinihiny soa tsika. Henteany ze ombantsika noho ty raha teateantsika. Bakeo asiany fandriky hitany hoe mety hahazoany antsika amy zay. Mety ho tampoky antsika raha zay. Fe mivola ty Baiboly hoe mbo afaky miala tsika ndre voafandrikiny. Atorony koa hoe ino ty azontsika atao mba tsy ho voafandriky mihintsy tsika.

2. Ino ty fandriky roe tena ahazoani-Satana olo?

² Fandriky roe retoa ty tena ahazoani-Satana olo: Ataony ze hahavy antsika hanambony tena noho tsy ho mety afa-po. * Fa an’arivony tao ty nampiasany ani-toetsy raty reo. Manahaky mpamandri-boro io ty ataony. Verevereny voro iny soa ho latsaky anaty fandriky ao na hamonjy ani-haratony iny. (Sal. 91:3) Fe tsy voatery ho azoni-Satana ho zay tsika. Manino tsika ro mivola ani-zay? Satria fa natoroni-Jehovah antsika ty tetiky fampiasani-Satana.​—2 Kor. 2:11.

3. Nanino ro nampanoratini-Jehovah amy Baiboly ao ty tantaran’olo sisany?

 ³ Mampiasa tantara tena nisy Jehovah mba hampianara antsika hoe manimba ty fanambonian-tena noho ty faniria tafahoatsy. Handiniky ohatsy vitsivitsy mikasiky ani-zay tsika. Nisy olo sisany, ohatsy, nivoafitakini-Satana ndre fa nanompo ani-Jehovah fa ela aza. Midika va zay hoe tsy maintsy ho voafitaky koa tsika? Tsy zay mihintsy. Nampanoratini-Jehovah amy Baiboly ao tantara reo mba “ho fampitandrema ho antsika.” (1 Kor. 10:11) Hainy fa hanampy antsika hahay raha reo hoe akory ty hialà laha voafandrikini-Satana na ino ty hatao mba tsy ho voafandrikiny mihintsy.

4. Manday mana aia ty fanambonian-tena?

⁴ Teani-Satana hanambony tena tsika. Hainy fa laha mirengirengy tsika le lasa hanahaky azy ka tsy hahazo fiaina zisiky farany. (Ohab. 16:18) Zay nahavy ani-apostoly Paoly nampitandrina hoe mety hirengirengy ty olo raiky ka hahazo azy koa ty raha hahazo ty Devoly. (1 Tim. 3:6, 7) Mety ho azoni-zay iaby tsika ndre vo tsiela ty nanompoantsika ani-Jehovah ndre fa ela.

5. Laha hentea ty Mpitoriteny 7:16, 20, ino ty mety hampiseho hoe manambony tena ty olo raiky?

⁵ Tea tena ty olo manambony tena. Ataoni-Satana ze hahavy antsika ho tea tena ka hieritseritsy ty vatantsika avao fa tsy hieritseritsy ani-Jehovah, sirtò lafa misy problemo. Fa nisy fotoa va, ohatsy, iha nasaran’olo nanao raha tsy nataonao? Na nisy olo nanao ty tsy rariny taminao? Teani-Satana iha laha meloky amy Jehovah na amy fandaminany. Nainany aza iha hieritseritsy hoe ze mety aminao avao ro tokony hatao lafa mandamy ani-problemo iny, fa tsy mila ty tari-dalani-Jehovah amy Safàny ao.​—Vakio Mpitoriteny 7:16, 20.

6. Ino ty azonao ianara baka amy tantarani-ranabavy baka a Holandy any io?

⁶ Diniho moa ty tantarani-ranabavy a Holandy any toy. Nisy olo nanao raha halany le naleony tsy niarakaraky tamin’olo rey sasy. Hoy ty asany: “Le tsy nana nama aho fe tsy nivitako koa ty nanenga ty hadisoan-drozy. Nivola  tamy valiko iaby aho hoe ndao tsika hifindra fiangona.” Tafarani-zay ie nanenty ty Tele JW Marsa 2016. Nisy soso-kevitsy vitsivitsy niresahini-fandahara io hoe akory ty atao lafa misy olo manao raha halanao. Nivola ranabavy iny hoe: “Hitako hoe tena nila niambany aho. Tsy ranadahy noho rahavavy rey ro mila miova fa amiko mihintsy ro misy raha tsy mety ka mila areny. Nihitako tamy fandahara iny hoe Jehovah ro tokony hifantohako sady mana zo ie hivola amintsika ze tokony hataontsika.” Azonao va ty teany hiavia? Lafa iha mana problemo, le eritsereto Jehovah. Misolohoa aminy soa iha hampeany ka hanahaky ty fahitany an’olo reo ty fahitanao an-drozy. Hitani-Babanao an-danitsy any iny ty hadisoan-drozy, fe parè ie hanenga ani-raha rey. Teany hanao ho zay koa iha.​—1 Jaona 4:20.

7. Ino ty raha nahazo ani-Ozia Mpanjaka?

⁷ Nirengirengy Ozia Mpanjaka ka lasa tsy nijanjy torohevitsy sady nanao raha tsy nahazoany alala. Nahavita raha soa maro aloha Ozia. Nandresy ie matetiky saky nialy. Nananga tanam-be maro koa ie sady nana tanim-boly maro. “Nataoni-azy Ndranahary marina iny nahavano ie.” (2 Tan. 26:3-7, 10) Fe mivola ty Baiboly hoe: “Laha vo nahery ie, le nirengirengy ty fony ka nanday fahavoaza ho ahi-ty vatany.” Fa nivola Jehovah hoe tsy misy mahazo manolotsy emboky manitsy amy tempoly ao laha tsy mpisoro avao. Tsy nahazo nanolotsy emboky manitsy tao zany Ozia Mpanjaka. Fe le mbo nientinenty ie nanao raha tsy nahazoany alala io. Tsy niteani-Jehovah raha zay ka nataony boka Ozia satria nibohaboha. Niboka avao ie zisiky nahafaty azy.​—2 Tan. 26:16-21.

8. Manino ro hanampy antsika tsy hanambony tena ty 1 Korintianina 4:6, 7?

⁸ Mety hanambony tena koa va tsika ka hanao fahotà manahaky nataoni-Ozia iny? Henteo moa tantarani-José toy. Soa asa ie. Anti-panahy koa ie sady tena teani-mpiara-manompo. Mpanao lahateny ie matetiky lafa fivoriambe rey, le mila torohevitsy aminy ndre ty mpiandraikitsini-faritsy. Fe nieky ho zao ie: “Natokisako marè ty fahaizako noho ty traikefako. Tsy niantehitsy tamy Jehovah mihintsy aho. Fa matanjaky aho hoasako ka tsy nijanjy ty torohevitsini-Jehovah noho ty fampitandremany.” Nanjary nanao fahotà bevata José le nivoaroaky. Nimpoly tamy Jehovah ndraiky  ie tao maromaro tafara atoy. Zao amy zay ty nivolaniny: “Natoroni-Jehovah ahy hoe tsy de tombontsoa azontsika rey loatsy ro tena vatan-draha, fa ty fanaovantsika ty raha ampanaovini-Jehovah.” Soa ho tiarontsika fa ndre ino ino ty raha haintsika, ndre ino ino tombontsoantsika amy fiangona eo, le baka amy Jehovah iaby. (Vakio 1 Korintianina 4:6, 7.) Tsy hampiasa antsika mihintsy Jehovah laha tsika manambony tena.

9. Nahavy ani-Satana noho Eva hanao ino ty faniria tsy mety afa-po?

⁹ Ia ty avy an-tsainao voalohany laha vo miresaky hoe tsy mety afa-po? Satana vasa. Nianjelini-Jehovah ie ka mety nana tombontsoa maro. Fe tsy niampy azy raha zay. Teany laha ie ro ivavaha, kanefa Jehovah raiky avao ro maeva ani-zay. Teani-Satana hanahaky azy koa tsika ka ataony ze hahavy antsika tsy ho mety afa-po amy ze raha ananantsika. Tamy Eva ty nanombohany azy. Fa nataoni-Jehovah ze hahafa-po ani-Eva morovaly. Nameany ho hanin-drozy “ze lanin-drozy tamy voani-hazo tanaty zariday” tao fa raiky avao ro niraràny hoe tsy azo hany. (Gen. 2:16) Fe nataoni-Satana ze hahavy ani-Eva haniry hihina tamy voani-hazo tsy azo hany iny. Tsy niafa-po tamy ty raha fa nananany Eva fa mbo nila hafa koa. Haintsika hoe nanao akory ty vokany. Nanjary mpanota ie le nimaty tafara atoy.​—Gen. 3:6, 19.

10. Manino ro azo volany hoe fandriky ho ani-Davida Mpanjaka ty faniria tsy mety afa-po?

¹⁰ Maro ty raha nameani-Jehovah ani-Davida Mpanjaka. Maro, ohatsy, ty fahavalo niresiny, sady nanan-kanana noho nalaza koa ie. Haini-Davida soa ty hamaroani-raha nameani-Jehovah azy ka nivola mihintsy ie hoe: “Maro marè raha rey ka tsy voaisakiko.” (Sal. 40:5) Fe nanjary nana faniria tsy mety afa-po ie, ka mbo nila raha hafa ankoatsini-raha nameani-Jehovah azy rey. Nanambaly maro Davida, fe le mbo naniry valin’olo koa. Fa hainy amin’io hoe halani-Jehovah raha zay. Fe nitea tena ie ka nalany avao Batseba valini-Oria Hetita, le nanaovany firaisa, bakeo nibevoka. Nijangajanga Davida. Fa raty raha nataony zay, fe le mbo nitovonany fahotà bevata hafa koa. Nataony ze hahafaty ani-Oria! (2 Sam. 11:2-15) Ino zany ty tan-tsaini-Davida tao? Mety nieritseritsy va ie hoe tsy hitani-Jehovah raha nataony iny? Ndre fa nanompo ani-Jehovah fa ela aza Davida le nanjary tsy  nety afa-po ka nibaby ty vokany. Soa avao ie tafara atoy fa nieky ty hadisoany ka nibebaky. Le nisaotsaotsy ani-Jehovah ie satria nanenga ty hadisoany Jehovah!​—2 Sam. 12:7-13.

11. Laha hentea ty Efesianina 5:3, 4, ino ty hanampy antsika tsy hana faniria tsy mety afa-po?

¹¹ Ino ty ianarantsika baka amy tantarani-Davida iny? Hitantsika baka amin’iny hoe tsy hana faniria tsy mety afa-po tsika laha misaotsy ani-Jehovah avao amy ze kila raha ameany. (Vakio Efesianina 5:3, 4.) Tokony ho afa-po amy ze ananantsika tsika. Lafa tsika mampianatsy Baiboly rey, le mety hampirisihintsika mpianatsy iny mba hieritseritsy raha raiky nameani-Jehovah azy, bakeo hisaotsy ani-Jehovah amy raha iny. Laha manao ani-zay sanandro ty olo raiky, le midika zay hoe nisy raha fito samby hafa nisaorany ani-Jehovah tanatini-herinandro. (1 Tes. 5:18) Mba manao ho zay koa va iha? Laha iha mieritseritsy ty raha iaby nataoni-Jehovah ho anao le ho voatosiky hisaotsy azy. Lafa iha koa misaotsy azy le ho afa-po amy ty raha anananao. Lafa afa-po amy zay iha le tsy haniry raha hafa tsy anananao.

12. Lasa nanao ino Jodasy Iskariota lafa nana faniria tsy mety afa-po?

¹² Tsy nimety afa-po Jodasy Iskariota ka nanao raha tena raty sady namadiky ani-Jesosy. Tsy nanao ho zay tse ie tamy voalohany. (Lioka 6:13, 16) Nifilini-Jesosy ho apostoly ie. Tena natoky azy Jesosy kanao ie ro nataony mpitanjaky drala. Drala taminy any reo ro nampiasani-Jesosy noho apostoly rey tamy ze raha nilan-drozy tamy fanompoa. Manahaky fanomeza amy boaty ho ani-asa maneran-tany rey ie laha henanizao. Fe lafa nandeha ty fotoa, nanomboky nangalatsy Jodasy, kanefa fa imaro ie naharè ani-Jesosy nampitandrina olo mba tsy hana faniria tsy mety afa-po. (Mar. 7:22, 23; Lioka 11:39; 12:15) Tsy nidareany fampitandrema rey.

13. Nombia ty nahità hoe tena tsy nety afa-po vatany Jodasy?

¹³ Vomaiky nihita hoe tsy nety afa-po vatany Jodasy taloha kelikelini-hamonoa ani-Jesosy. Nivahiny tamy Simona boka tao Jesosy noho mpianatsiny rey tamy zay, le teo koa Maria noho Marta rahavaviny. Amy rozy mihina iny, nitsanga Maria le nilinany menaky manitsy ty lohani-Jesosy. Drala be vilini-menaky io. Nitseriky biby Jodasy noho mpianatsy sisany rey. Mety nieritseritsy mpianatsy rey hoe tokony mba nampiasà tamy fanompoa drala iny. Fe hafa mihintsy ty ahini-Jodasy. “Mpangalatsy” ie ka niteany laha nampiliry amy boaty fanajaria drala ao raha iny soa misy hangalariny. Vomaiky nanjeky avao ty faniriani-Jodasy ka namadiky ani-Jesosy mihintsy ie tafara atoy mba hahazoany drala.​—Jaona 12:2-6; Mat. 26:6-16; Lioka 22:3-6.

14. Ino ty nataoni-mpivaly toy mba hanorihan-drozy ty raha volanini-Lioka 16:13?

¹⁴ Nampitiarovini-Jesosy ty mpanori-dia azy hoe: “Tsy mahay manompo a Ndranahary noho ty Hanana nareo.” (Vakio Lioka 16:13.) Marina avao raha zay ndre henanizao. Henteo moa fa nanoriky ani-safàni-Jesosy io mpivaly a Romanỳ any toy. Namea asa amy tany mandroso zay rozy. Tsy maharitsy asa io fe be karama. Nivola rozy hoe: “Nananani-banky trosa be zahay. Nieritseritsy amy zay zahay tamy voalohany hoe fitahiani-Jehovah toy.” Fe laha maneky ani-asa iny rozy le tsy ho afaky hanompo ani-Jehovah loatsy. Nivakin-drozy ty Tilikambo Fiambena 15 Oòh 2008, amy lahatsoratsy manday lohateny hoe “Ka Mivaliky fa Manompoa amy ty Fonao Iaby”, bakeo rozy nandramby fanapahan-kevitsy. Hoy ty asan-drozy hoe: “Laha hila drala ro handehananay an-dafy any, kanefa hahasarotsy ty fanompoanay ani-Jehovah raha zay, dikani-zay tsy ty fifandrambesanay amy Jehovah ro tena vatan-draha  aminay. Hainay soa fa tsy hanjary ty fifandrambesanay amy Jehovah lafa any.” Tsy neken-drozy asa iny. Ka nanao akory amy zay rozy? Nahita asa ahazoany drala ampy tamin-drozy eny avao lahilahy iny. Nivola ampela iny hoe: “Tsy boribory mihintsy ty tanani-Jehovah.” Falifaly rozy morovaly satria Jehovah ro nataon-drozy Tompo fa tsy drala.

15. Manino tsika ro afaky matoky hoe afaky miala avao ndre ino ino fandriky ataoni-Satana?

¹⁵ Manao akory laha hitanao hoe fa manomboky manambony tena iha na tsy mety afa-po? Mbo afaky miova iha! Nivola Paoly hoe mbo afaky miala ty olo raiky ndre fa ‘nivoasambotsini-Devoly.’ (2 Tim. 2:26) Ho zay mihintsy ty nataoni-Davida. Nijanjy ie ndre naharary azy anatsini-Natana iny. Nibebaky ie le nialany faniria ratiny iny, farany ie nisoa filongoa tamy Jehovah ndraiky. Ka halino mihintsy toy: Jehovah mbo mahery mandilatsy ani-Satana. Ka laha tsika maneky hampeani-Jehovah, le afaky miala avao ndre ino ino fandriky ataoni-Devoly.

16. Ino ty hanampy antsika tsy ho voafandrikini-Satana?

¹⁶ Aleo aloha tsy voafandrikini-Satana mihintsy tozay voafandriky vo miala. Tsy mora raha zay, fe ho vitantsika avao lafa manampy antsika Jehovah. Fe tsy tokony hieritseritsy mihintsy tsika hoe fa matanjaky ka tsy ho voafandriky mihintsy! Ndre ty olo fa nanompo ani-Jehovah fa ela aza mbo nisy lasa nanambony tena na tsy nety afa-po. Mivavaha amy Jehovah avao zany sanandro, soa iha hampeany handiniky ty raha eritseretinao noho ty raha ataonao. (Sal. 139:23, 24) Ka engà hamahatsy aminao ao mihintsy toetsy raty reo!

17. Hanao akory Devoly fahavalontsika iny tsy ho ela?

¹⁷ Fa an’arivony tao zay ty naha mpihaza ani-Satana. Fe fa sisa kely le hogadrà ie bakeo hovonoa. (Apok. 20:1-3, 10) Fa tsy linintsika ty hiaviani-fotoa zay. Fe zisiky hiaviani-zay tse, miambena soa tsy no ho voafandrikini-Satana. Miezaha mafy mba tsy hanjary hanambony tena na hanjary tsy mety afa-po. Miezaha ho tapa-kevitsy hanaraky ani-Safàni-Baiboly toy: “Tohero ty Devoly, le hilay anareo ie.”​—Jak. 4:7.