1. Bwakinyi atupwandjikisha Satana na mpibwe?

MPIBWE ekalaa na kepatshila kamune​—kukwata sunga kwipa nyema. Nka bu bibadi bileshe umune a ku ba kuuku be bubi ba Yobo, mpibwe afubishaa miteo ilekene. (Yob. 18:8-10) Mpibwe akakilaa nyema ku muteo waye naminyi? Alongaa yawa nyema. Ende kunyi? Akuminaa kudya kinyi? Muteo kinyi washa kutundula asuka? Satana enka bu uno mpibwe? Etulongaa. Alaminaa kw’atwende na kyatudi bafule. Akupu, ate muteo wakulupila’shi atukwatshika. Anka, Bible etushinkamisha’shi, su twakwatshika, twi kuposoka. Na etulongyesha bya kudimukila ino miteo.

2. Miteo kinyi ikata ayifubishaa Satana?

² Miteo ibidi ikata ya Satana nyi kwitatula na lwabi. * Satana mumone’shi ino miteo i buwa mwanda mupwe kwiyifubisha munda mwa bipwa binunu. Enka bu mpibwe a tonyi etukakila mu muteo sunga mu bukondja. (Mis. 91:3) Anka, t’abitungu’shi tukwatshibwe na Satana. Bwakinyi? Mwanda Yehowa mwitufumbwile mayele aafubishaa Satana.​—2 Kod. 2:11.

3. Bwakinyi Yehowa mufundjishe bingi bilesheho mu Bible?

³ Umune wa ku mishindo awitudimusha Yehowa pabitale kwitatula na lwabi, pa kwitulongyesha kibadi kikitshikile bangi bafubi baye. Atukyebe kumona’shi, Satana badi mpa na mukwate bangi bafubi ba Yehowa banyingye mu ino miteo. Bino abilesha’shi ta twi kukambila kwitatula na lwabi?  Nya. Yehowa mufundjishe bino bileshesho mu Bible bwa “kwitudimusha.” (1 Kod. 10:11, EEM) Auku’shi, twi kulongyela ku bileshesho abitudimusha na kudimukila sunga kuposoka mu miteo ya Diabulu.

4. Kwitatula akufikishaa ku kinyi?

⁴ Satana akumina’shi, twikale na kwitatula. Auku’shi su twekala na kwitatula, atufiki nkabu’ye na t’atupete muwa wa ikalaika. (Nki. 16:18) Nyi bwakinyi, Mpoolo mutumibwa badi mudimushe’shi, muntu mulombene ‘kwitatula, [na kupona mu] ku pîshîbwa bu bipîshîbwe Diabulu.’ (1 Tim. 3:6, 7, EEM) Bino bi kukitshikila oso a kwatudi, sunga twekala bapya mu bya binyibinyi, sunga twekala bapwe kufubila Yehowa munda mwa bipwa bi bungi.

5. Nka bu byabebilesha mu Mulungudi 7:16, 20, mushindo kinyi ulombene muntu kulesha kwitatula?

⁵ Bantu basha kwitatula, mbefule nkabo banabene. Satana akumina’shi twifule nkatwe banabene, kushi kufula Yehowa, bikishekishe nsaa yatudi mu nkalakashi. Bu kileshesho, mbakudimbile myanda su? Sunga’shi, mbakukitshine myanda na kukutwa kwa kululama su? Satana akumina’shi ofitshile Yehowa nsungu na bakwenu bena Kidishitu. Na Diabulu akumina’shi twipwile myanda atwe banabene, kushi kulonda bukunkushi abwitupa Yehowa ku bukwashi bw’Eyi dyaye.​—Badika Mulungudi 7:16, 20.

6. Bolongyela kinyi kwi mukwetu mukashi a mu Pays-Bas?

⁶ Tala kileshesho kya mukwetu mukashi mushale mu Pays-Bas, badi mufitshile bangi munda mwanda wa bilubilo byabo. Batshile kitshibilo kya kupela kukisha nabo nsaa. Amba’shi: “Nadi nepusha bupenka, anka ntshinadi mushintule mweneno ande pabibatale. Nalungwile mulume ande bwa’shi tushintule kakongye.” Anka, uno mukwetu batadile Televizion a JW a mweshi wa 3/2016. Yawa programe badi muleshe myanda ilombene kukwasha bwa kumona bya kukila na bilubilo bya bangi. Mukwetu mukashi amba’shi: “Namwene’shi, abitungu ngikale mwiyishe  na kutundula bilubilo byande, pamutwe pa kutompa kushintula bakwetu balume na bakashi mu kakongye. Programe badi munkwashe bwa kutula binangu kwi Yehowa na ku matalwa aye a kukunkusha.” Bomono dilongyesha dipanka su? Nsaa yodi na mwanda, tungunuka na kunangushena pabitale Yehowa. Mwisendele bwa’shi akukwashe omone bangi mu mushindo w’ebamonaa. Nshobe e mwiyilu amonaa milwisho yabo; anka akuminaa kwibafwila lusa. Akumina’shi nobe namu okite nka byabya.​—1 Yo. 4:20.

7. Nkinyi kibadi kikitshikile Mfumu Ozyase?

⁷ Kwitatula kubadi kutakule Mfumu Ozyase a mu Yuda bwa kupela elango na kukita kintu kyashibadi na matalwa a kukita. Ozyase badi mukite myanda i bungi i buwa. Badi mutshokole ngoshi i bungi, mmwibakye mpata i bungi na badi na mafuba e bungi. “Efile Mukulu badi amuîshîsha myanda kumpala.” (2 Mya. 26:3-7, 10, EEM) Bible amba’shi: ‘Pabashindamêne bufumu bwê, babangile kwinêmeka [kwitatula]. Kwakwa kwinêmeka [kwitatula] kwakamufisha pe bubi.’ Yehowa badi mupwe kulesha’shi nka penda ba tshite-mwakwidi, nyi ba kulambula musengo wa kabanda. Anka, Mfumu Ozyase bakitshine kintu kyashibadi na matalwa a kukita, p’aye nkwenda ku ntempelo bwa kulambula musengo wa kabanda. Bino ta bibadi basankishe Yehowa, nyi bwakinyi badi mumwele nsudi. Ozyase badi mushale na nsudi mpa na ku lufu lwaye.​—2 Mya. 26:16-21.

8. Kukokyela elango di mu 1 Bena-Kodinda 4:6, 7, akwitukwasha bwa kupela kwitatula naminyi?

⁸ Twi kupona mu muteo wa kwitatula bu bibadi bi mupone Mfumu Ozyase su? Tala kileshesho kya José. Badi nsunga mukata na badi mukulu mu kakongye. Badi akitshi miisambo ku bikongeno, na bakunkushi ba bifunda abadi abamutekye malango. Anka, amba’shi: “Nadi mukulupile mu ngobesha yande na mu kiukilo kyande. Ntshinadi dingi mukulupile Yehowa. Nadi napwandjikisha’shi ne munyingye, nyi bwakinyi tshinadi natemesha kudimushwa na malango a Yehowa.” José badi mukite mulwisho ukata na abo nkumutusha mu kakongye. Kunyima kwa bipwa bi bungi, abadi bamwalushe. Binobino amba’shi: “Yehowa mundongyeshe’shi, ki na muulo nta ngobesha sunga bushito bwatudi nabo nya, anka nkukita ky’etutekye.” Tutentekyesheyi’shi,  ngobesha yoso yatudi nayo sunga bushito boso bwatupete mu kakongye, Yehowa nyi etupeyaa. (Badika 1 Bena-Kodinda 4:6, 7.) Su twekala na kwitatula, Yehowa ta kufuba netu nya.

9. Lwabi lubadi lutakule Satana na Eva bwa kukita kinyi?

⁹ P’atunangushena pabitale lwabi, musango umune Satana Diabulu etufwila mu binangu. Bu bibadi mwikeyilu a Yehowa, Satana badi na mashito e buwa. Anka, badi akumina kupeta bikile paapa. Badi akumina lulangwilo lukumbanyine nka penda Yehowa. Satana akumina’shi tumwifwane, nyi bwakinyi atompo kwitutakula bwa’shi tatusankanga na byatudi nabyo. Badi mubangye kwibikita na Eva. Na kifulo kyoso, Yehowa badi mupe Eva na mulum’aye byakudya bi buwa bi bungi​—“kudya bikuba byoso bya mitshi yoso i mwifuba” kukatusha umune. (Kib. 2:16) Anka, Satana badi mudimbe Eva pa kumutakula mu kunangushena’shi, abitungu nkadye bikuba bya mutshi wabadi bebapeleshe. Pamutwe pa kunangushena pa bibabadi nabyo; Eva badi akumina kupeta bi bungi. Atuku kibakitshikile kunyima. Eva bakitshine mulwisho na kunyima bafwile.​—Kib. 3:6, 19.

10. Nkinyi kibadi kikitshikile Davide pabafikile na lwabi?

¹⁰ Lwabi lubadi lutakule Mfumu Davide bwadya kwilwa bintu bibadi Yehowa mumupe, bu bupeta, bufumu na ngobesha ya kutshimuna beshikwayi baye. Davide badi mushingule’shi, bya buntu by’Efile Mukulu “mbikile bungi, tabii kubadikwa.” (Mis. 40:5) Anka, Davide badi mupete lwabi na aye nkulakila bintu bi bungi. Sunga bibadi Davide na bakashi be bungi, badi mulakile mukashi abene. Yawa mukashi badi Betesabee, na mulum’aye badi Uriya mwina Hitite. Davide badi mutambukye lusandji na Betesabee, na aye nkwimita. Kibakitshine Davide kibadi bubi, anka bakitshine kingi kikile bubi, batshile mpángo ya kwipayisha Uriya! (2 Sam. 11:2-15) Davide badi apwandjikisha kinyi? Badi apwandjikisha’shi Yehowa t’amumono su? Sunga bibadi Davide mufubile Yehowa munda mwa mafuku e bungi, bekele na lwabi na bino nkumufwishila makyenga e bungi. Mwanda wi buwa, badi mutonde mulwisho waye na aye nkwilanga kwishimba. Badi na muloo p’aye kukuminyibwa dingi na Yehowa!​—2 Sam. 12:7-13.

11. Muyile Bena-Efeso 5:3, 4, nkinyi kilombene kwitukwasha bwa kukambila lwabi?

 ¹¹ Nkinyi ky’atulongyela ku kileshesho kya Davide? Kileshesho kyaye akitulongyesha’shi, twi kukambila lwabi su twina lutumbu bwa byoso abitukitshina Yehowa. (Badika Bena-Efeso 5:3, 4.) Abitungu tusankye na byatudi nabyo. Nsaa y’atulongo Bible na bantu, abitungu twibalongyeshe bwabadya kunangushena pa kintu kimune ki buwa kibape Yehowa, na kumutumbula bwa kyanka. Su muntu akita bino efuku dyoso munda mwa lubingo, abilesha’shi bantumbula Yehowa bwa bintu musambo bilekene. (1 Tes. 5:18) Okitaa bino su? Su onangushena ku byoso bikukitshine Yehowa, abikukwasha bwa kwikala na lutumbu. Na nsaa yodi na lutumbu, osanka na kyodi nakyo. Nsaa y’osanka na kyodi nakyo, lwabi alukutwa mbalo mwishimba dyobe.

12. Lwabi lubadi lutakula Yudase mu kukita kinyi?

¹² Lwabi lubadi lutakule Yudase Isakaryiote bwadya kupana Yesu. Ku mbangilo, ta badi bino nya. (Luk. 6:13, 16) Yesu badi mumusangule bu mutumibwa. Abimweka patoka’shi, Yudase badi na ngobesha na badi muntu akukulupilwa mwanda abadi bamupe bushito bwa kulama makuta. Yesu na batumibwa abadi abafubisha ano makuta bwa kulombasha nkalo yabo mu mudimo wa bulungudi. Ano makuta abadi nka bu bya buntu by’atutushaa bwa mudimo wa mu nsenga ishima lelo uno. Kunyima kwa mafuku, babangile kwiba sunga bibadi mupushe Yesu adimusha bantu pabitale lwabi. (Mak. 7:22, 23; Luk. 11:39; 12:15) Yudase badi mukutwe kukokyela kuno kudimushwa.

13. Nsaa kinyi ibadi lwabi lwa Yudase lumwekye patoka?

¹³ Lwabi lwa Yudase lubadi lumwekye patoka, mafuku apela kumpala kwa’shi bayipe Yesu. Yesu na balongi baye, mpa na Mariya na mukwabo Maata, abadi bebetamine kwi Simone sha nsudi. Nsaa ibabadi abadi, Mariya bebwele na apongolwela Yesu mwimu wa malashi mmutwe, ubadi muulo ukile. Bino tabibadi bisankishe Yudase na bangi balongi. Bangi balongi abadi pangi bamone’shi, bi buwa kufubisha aa makuta mu mudimo wa bulungudi. Anka, Yudase badi mufite munda bwa kangi kabingilo. “Badi ngifi,” badi akyebe kwiba aa makuta mu kashete. Kunyima, lwabi lubadi lutakule Yudase bwadya kupana Yesu ku muulo wa mpika.​—Yo. 12:2-6; Mat. 26:6-16; Luk. 22:3-6.

14. Nkinyi kibadi kikite ungi mulume na mukashi pabo kulonda elango di mu Luka 16:13?

¹⁴ Yesu badi mutentekyeshe balongi baye bino bya binyibinyi bi na muulo: “Tanwibalombeene kufubila Efile Mukulu na [kufubila] mapeta.” (Badika Luka 16:13.) Bino, mbya binyi mpa na lelo uno. Tala bibadi ano mayi a Yesu na bukitshishi kwi ungi mulume na mukashi ba mu Roumanie. Abadi bebatekye bwa nkafuba munda wa mafuku mu dingi eumbo dyende nkumo. Abamba’shi: “Tubadi nebasa dikata dya kufuta banke, nyi bwakinyi tubamwene’shi, Yehowa nyi betwelela mwabi.” Anka, pabadi muteo. Mudimo ubadya kwibata nsaa i bungi yabadya kukisha mu kufubila Yehowa. Kunyima kwabo kubadika mwisambo wi mu Kitenta kya Mulami kya 15/8/2008 awamba’shi: “Demeurons fidèles, le cœur unifié,” abatshile kitshibilo. Abamba’shi: “Su kupeta makuta e bungi mu dingi eumbo nyi kubadi na muulo, tubadya kutula Yehowa pa mbalo ya kabidi mu muwa wetu. Tubadi bashinkamishe’shi kipwano kyetu na Yehowa akilwila.” Nyi bwakinyi abadi bapele wawa mudimo. Kinyi kibadi kikitshikye? Mulume badi mupeta mudimo mwiumbo dyabo ubadi aulombasha nkalo yabo. Mukashi amba’shi: “Eyasa  dya Yehowa ta ndipi.” Uno mulume na mukashi be na muloo mwanda mbekashe Yehowa bu Mfumu abo pe makuta.

15. Bwakinyi atushinkamisha’shi twi balombene kuposoka mu miteo ya Satana?

¹⁵ Nkinyi akitungu’shi tukite su tubapono mu muteo wa kwitatula na sunga wa lwabi? Nkwi muposoka! Mpoolo bakwile’shi baba boso babadi ‘bakwate’ kwi Diabulu, mbalombene kuposoka mu muteo. (2 Tim. 2:26, EEM) Nyi bibadi bikitshikile Davide. Batemeshe elango di bukopo dibadi dimupe Natanaele, aye nkuleka lwabi na akupu aye nkulumbula kipwano kyaye na Yehowa. Toyilwanga’shi, Yehowa e bukome kukila Satana. Byabya, su twa kumina bukwashi bwa Yehowa, twi balombene kuposoka mu muteo oso wa Satana.

16. Nkinyi akitukwasha bwa kudimukila miteo ya Satana?

¹⁶ Pa mutwe pa kupona mu miteo ya Satana bwa kwi mu posoka, abitungu twiyidimukile. Twi kwibikita nka penda ku bukwashi bw’Efile Mukulu. Anka, t’abitungu tunangushene’shi, atwe ta twi balombene kwitatula sunga kwikala na lwabi. Mpa na bantu bafubile Yehowa munda mwa bipwa bi bungi, mbafikye mu kwitatula sunga kwikala na lwabi. Byabya, esendele Yehowa bwa’shi akukwashe otundule nyikashi i bubi nsaa yayibanga kwikala na bukitshi bwi bubi mu ngyelelo obe a binangu, na bikitshino byobe. (Mis. 139:23, 24) Kita mobe moso bwa’shi twetatulanga sunga kwikala na lwabi!

17. Nkinyi akikitshikila binobino mwishikwanyi etu, Diabulu?

¹⁷ Satana mpibwe takudi bipwa binunu. Binobino, abamwanya nkano na akupu abakamubutula. (Kibaf. 20:1-3, 10) Tukwete kutengyela dyadya efuku. Anka binobino, shala mudimukile miteo ya Satana. Kita mobe moso bwa’shi toponanga mu muteo wa kwitatula sunga wa lwabi. Twateyi kitshibilo kya ku ‘kandamena Diabulu na aketusuku.’​—Shak. 4:7, Esambi dipya 2015.