1. Kungani singafananisa Sathane nemtingeli?

UMUNTFU lotingelako unemgomo munye—kubamba silwane nobe kusibulala. Angasebentisa titsiyo nobe tingibe letehlukahlukene, njengobe kwaphawula lomunye webangani baJobe lababi lebebatsi bayamdvudvuta. (Jobe 18:8-10) Yini lona lotingelako layentako kuze lesilwane siye lapho kunelugibe khona? Uyasinakisisa. Uyanaka kutsi siya kuphi, sitsandza ini nekutsi angasebentisa luphi lugibe. Sathane ufana nalomtingeli. Uyasinaka. Unaka kutsi sentani, nekutsi sitsandza ini. Ngemuva kwaloko ubese usibekela lugibe lanelitsemba lekutsi lutasibamba singakanaki. Nobe kunjalo, liBhayibheli lisitjela kutsi nakwenteka sibanjwa, singakhona kuphunyula. Lisifundzisa nangaloko lesingakwenta kuze singabanjwa.

2. Ngutiphi titsiyo taSathane letimbili letiphumelela kakhulu?

² Titsiyo taSathane letimbili letiphumelela kakhulu kutigcabha nekuba bukhali. * Sekuphele tinkhulungwane teminyaka Sathane aphumelela nakasebentisa letitsiyo. Ufana nemuntfu locipha tinyoni asebentisa sitsiyo nobe linethi. (Hla. 91:3) Kodvwa singasindza futsi singabanjwa nguSathane. Kungani? Ngobe Jehova usivetele emachinga lawasebentisako.—2 Khor. 2:11.

3. Kungani Jehova aciniseka kutsi letinye tibonelo tiyabhalwa eBhayibhelini?

³ Lenye indlela Jehova layisebentisako kuze asecwayise ngekutigcabha  nebukhali, kusikhutsata kutsi sifundze kulokwenteka kulabanye. Sitawubona kutsi Sathane wakhona njani kubabekela lugibe labanye lebesebakhonte Jehova sikhatsi lesidze. Loko kusho kutsi angeke yini sikhone kubalekela kutigcabha nebukhali? Cha. Jehova waciniseka kutsi letibonelo tiyabhalwa eBhayibhelini kuze tibe “secwayiso kitsi.” (1 Khor. 10:11) Uyati kutsi singafundza kuto, nekutsi singatibalekela njani tingibe taDeveli.

4. Yini lengenteka kitsi nangabe sitigcabha?

⁴ Sathane ufuna kutsi sitigcabhe. Uyati kutsi nangabe sitigcabha sitawufanana naye, futsi singakutfoli kuphila lokuphakadze. (Taga 16:18) Ngako umphostoli Pawula wecwayisa kutsi kungenteka umuntfu “agcwale umgcabho bese utfola sehlulelo lesatfolwa nguDeveli.” (1 Thim. 3:6, 7) Loko kungenteka kunobe ngubani kitsi, ngisho nobe sisandza kucala kukhonta Jehova nobe sesimkhonte iminyaka leminyenti.

5. Ngekusho kweMshumayeli 7:16, 20, umuntfu angakhombisa njani kutsi uyatigcabha?

⁵ Umuntfu lotigcabhako uticabangela yena. Sathane wetama kusenta kutsi siticabangele tsine kunekucabanga ngaJehova, ikakhulukati nangabe sinetinkinga. Nasi sibonelo, uke wasolwa yini ngentfo longakayenti? Uke waphatfwa yini kabi? Sathane angajabula kukubona usola Jehova nobe bazalwane bakho. Develi ufuna ucabange kutsi indlela yekucatulula lenkinga kutsi wente tintfo ngendlela yakho kunekulandzela sicondziso Jehova lakuniketa sona eVini lakhe.—Fundza Umshumayeli 7:16, 20.

6. Yini loyifundza kulokwenteka kulomunye dzadze waseNetherlands?

⁶ Cabanga ngalokwenteka kulomunye dzadze waseNetherlands lowatfukutseliswa ngemaphutsa alabanye. Bekangasafuni kuba nalabazalwane labamtfukutselisa. Utsi: “Benginesitunge futsi bengingakhoni kubacolela. Ngatjela umyeni wami kutsi sitfutsele kulelinye libandla.” Ngako wabese  ubukela uMsakato we-JW waMarch 2016. Loluhlelo belukhuluma ngalongakwenta kuze ubeketelele emaphutsa alabanye. Lodzadze utsi: “Ngabona kutsi bekudzingeka ngitfobeke futsi ngicabange ngemaphutsa ami kunekwetama kushintja bazalwane nabodzadze ebandleni. Loluhlelo lwangisita kutsi nginake Jehova neligunya lanalo.” Uyalitfola yini liphuzu? Nawunenkinga, hlale ucabanga ngaJehova. Mcele akusite utsatse labanye ngendlela labatsatsa ngayo. Babe wakho losezulwini uyawabona emaphutsa abo; kodvwa uyabacolela. Ufuna nawe wente lokufanako.—1 Joh. 4:20.

7. Yini leyenteka eNkhosini Uziya?

⁷ Kutigcabha kwenta iNkhosi Uziya yakaJuda kutsi ingasilaleli seluleko futsi yente intfo lebekungakafaneli iyente. Uziya bekayindvodza lekahle. Wancoba etimphini letinyenti, wakha emadolobha lamanyenti futsi bekanemasimu lamanyenti. “Nkulunkulu weliciniso wamenta waphumelela.” (2 Khr. 26:3-7, 10) LiBhayibheli litsi: “Nome kunjalo, ngekushesha nje nasekanemandla wase uyatiphakamisa futsi loko kwamletsela inhlekelele.” Jehova bekatsite baphristi kuphela lebebavumeleke kushisa imphepho ethempelini. Kodvwa iNkhosi Uziya yenta intfo lebekungakafaneli iyente, yaya ethempelini yafike yashisa imphepho. Loko akuzange kumjabulise Jehova, ngako washaya lendvodza letigcabhako ngesifo sebulephelo. Uziya waba nebulephelo kwaze kwaba lilanga lafa ngalo.—2 Khr. 26:16-21.

8. Umbhalo wa-1 KubaseKhorinte 4:6, 7, ungasisita njani kutsi sigweme kutigcabha?

⁸ Kungenteka yini sibanjwe lugibe lwekutigcabha njenga-Uziya futsi sone? Cabanga ngalokwenteka kuJosé. Bekangusomabhizinisi lophumelelako futsi bekangulomdzala welibandla lohlonishwako. Bekabeka tinkhulumo emihlanganweni yesigodzi neyesifundza, futsi babonisi betigodzi bebacela kuye teluleko. Utsi: “Bengetsembele emakhonweni ami futsi ngitetsemba mine. Bengingasetsembeli kuJehova. Bengicabanga kutsi nginemandla ngako angizange ngilalele ngesikhatsi Jehova angecwayisa futsi angeluleka.” José wenta sono lesikhulu futsi wayekeliswa kuba nguFakazi. Eminyakeni lembalwa leyendlulile, waphindze waba nguFakazi. Nyalo utsi: “Jehova ungifundzisile kutsi emalungelo awakabaluleki, kodvwa lokubalulekile kutsi sente loko lacela kutsi sikwente.” Kufanele  sikhumbule kutsi emakhono lesinawo kanye nemalungelo lesinawo ebandleni sikunikwe nguJehova. (Fundza 1 KubaseKhorinte 4:6, 7.) Nangabe sitigcabha, Jehova angeke asisebentise.

9. Kuba bukhali kwabangela Sathane na-Eva kutsi benteni?

⁹ Nasicabanga ngekuba bukhali, sikhumbula Sathane Develi. Njengobe bekayingilosi yaJehova, kungenteka bekanemalungelo lamanyenti lamahle. Kodvwa bekafuna lamanye. Bekafuna kukhontwa, lokuyintfo lefanele Jehova kuphela. Sathane ufuna sifane naye, ngako wetama kusenta singenetiswa tintfo lesinato. Loko wakwenta kwekucala ngesikhatsi akhuluma na-Eva. Ngelutsandvo, Jehova bekanikete Eva nemyeni wakhe tintfo letinyenti lebebangatidla, bebangadla “titselo tato tonkhe tihlahla letisensimini” ngaphandle kwasinye. (Gen. 2:16) Nanobe kunjalo, Sathane wakhohlisa Eva ngekumenta acabange kutsi bekufanele adle sitselo salesihlahla lebekutsiwe bangasidli. Eva akazange enetiswe ngulebekanako; bekafuna lokwengetiwe. Siyati kutsi kwabese kwentekani emvakwaloko. Eva wenta sono, wagcine afile.—Gen. 3:6, 19.

10. Kwentekani ngesikhatsi iNkhosi Davide iba bukhali?

¹⁰ Bukhali benta iNkhosi Davide yakhohlwa ngako konkhe Jehova lebekayinike kona, lokufaka ekhatsi umcebo, ludvumo nekuncoba titsa tayo letinyenti. Davide wavuma kutsi tipho lebekatiphiwe nguNkulunkulu ‘betitinyenti kakhulu kutsi angatibala!’ (Hla. 40:5) Kodvwa ngalesinye sikhatsi, wakukhohlwa konkhe loko Jehova bekamnikete kona. Bekangasenetiseki; bekafuna lokunyenti. Nanobe Davide bekanebafati labanyenti, kodvwa wavumela sifiso lesibi ngemfati walenye indvodza sakheka enhlitiyweni yakhe. Lomfati bekunguBhatisheba, indvodza yakhe kungu-Uriya umHethi. Davide walala naBhatisheba futsi wakhulelwa. Loko Davide lakwenta bekukubi, kodvwa wenta intfo lembi kakhulu ngobe wahlela kutsi Uriya abulawe! (2 Sam. 11:2-15) Bekacabangani Davide? Bekacabanga kutsi Jehova angeke yini abone? Nanobe bekakhonte Jehova sikhatsi lesidze, waba bukhali futsi loko kwambangela kuhlupheka lokukhulu. Kodvwa lokuhle kutsi ngekuhamba kwesikhatsi, wasivuma sono  sakhe futsi waphendvuka. Wajabula kakhulu ngekutsi Jehova wamcolela!—2 Sam. 12:7-13.

11. Ngekusho kwembhalo waKubase-Efesu 5:3, 4, yini lengasisita kutsi silwisane nekuba bukhali?

¹¹ Yini lesiyifundzako kulokwenteka kuDavide? Sifundza kutsi singalwisana nekuba bukhali nasihlale sibonga ngako konkhe Jehova lasiphe kona. (Fundza Kubase-Efesu 5:3, 4.) Kufanele senetiswe ngulesinako. Nasicala kufundza liBhayibheli nebantfu, singabafundzisa kutsi bacabange ngalokutsite Jehova labaphe kona futsi babonge ngako. Nangabe umuntfu akwenta loko onkhe malanga, kutawusho kutsi nakuphela liviki utawube sekathantaze ngetintfo letingu-7. (1 Thes. 5:18) Wena uyakwenta yini loko? Nangabe uzindla ngato tonkhe tintfo Jehova lakwentele tona, loko kutakusita kutsi ube ngumuntfu lobongako. Nawubonga uyenetiseka ngalonako. Nawenetiseka angeke ube bukhali.

12. Yini Judasi Skariyothi layenta ngenca yekuba bukhali?

¹² Kuba bukhali kwenta Judasi Skariyothi wenta intfo lembi kakhulu futsi watsengisa Jesu. Ekucaleni bekakahle. (Luk. 6:13, 16) Jesu wamkhetsa kutsi abe ngumphostoli wakhe. Bekametsemba ngobe belihlala kuye libhokisi lemali. Jesu nebaphostoli bakhe bebasebentisa lemali kuze banakekele tidzingo tabo nabenta umsebenti wekushumayela. Lemali beyifana nemnikelo lowentelwa umsebenti wemhlaba wonkhe. Kodvwa ngekuhamba kwesikhatsi, Judasi wacala kuyeba nanobe bekamuve emahlandla lamanyenti Jesu ecwayisa ngekuba bukhali. (Mak. 7:22, 23; Luk. 11:39; 12:15) Judasi akazange atinake letecwayiso.

13. Judasi wakhombisa nini kutsi sewucale kuba bukhali?

¹³ Judasi wakhombisa kutsi sewucale kuba bukhali ngaphambi nje kwekutsi Jesu abulawe. Jesu nebafundzi bakhe, kanye naMariya naMata bebavakashele Simoni lowake waba nebulephelo. Batsi basadla, Mariya wasukuma watsela emafutsa lanemakha enhloko yaJesu futsi lebekadule kakhulu. Judasi kanye nalabanye bafundzi batfukutsela kakhulu. Kungenteka lalabanye bafundzi bebabona ngatsi lemali beyingasetjentiswa nabenta umsebenti wekushumayela. Kodvwa sizatfu saJudasi sekutfukutsela besehlukile kunesabo. “Bekalisela,” futsi bekafuna kweba lemali kulelibhokisi. Ngenca yekutsi besekabukhali, ngekuhamba kwesikhatsi watsengisa Jesu ngemali lebeyingatsenga sigcili.—Joh. 12:2-6; Mat. 26:6-16; Luk. 22:3-6.

14. Yini leyentiwa ngulabanye labashadene ngenca yekulalela seluleko lesikuLukha 16:13?

¹⁴ Jesu wakhumbuta balandzeli bakhe liciniso lelibalulekile lelitsi: “Ngeke nikhonte Nkulunkulu niphindze nikhonte umcebo.” (Fundza Lukha 16:13.) Lamavi solo aliciniso. Cabanga ngendlela labanye labashadene baseRomania labawasebentisa ngayo lamavi aJesu. Batfola umsebenti wesikhashana kulelinye live lelinjinge kakhulu. Batsi: “Besikweleta libhange imali lenyenti, ngako ekucaleni besicabanga kutsi lomsebenti usibusiso lesivela kuJehova.” Kodvwa bekunelugibe. Lomsebenti bewutabenta babe nesikhatsi lesincane sekukhonta Jehova. Ngemuva kwekufundza sihloko lesitsi “Londoloza Ubuqotho Ngenhliziyo Enobunye,” ku-Sicongosekulindza sa-August 15, 2008, lesitfolakala ngesiZulu, babese benta sincumo. Batsi: “Nangabe sitfutsela kulelinye live kuze nje sibe nemali lenyenti, sitawube singabenti bute kucala buhlobo betfu naJehova. Besiciniseka kutsi buhlobo betfu naJehova bebutawulimala.” Ngako bawala lomsebenti. Kwabese kwentekani? Lendvodza yatfola umsebenti eveni  labo futsi bebatawukhona kunakekela tidzingo tabo. Lomfati utsi: “Sandla saJehova asisifisha.” Lomndeni uyajabula ngobe wakhetsa kukhonta Jehova hhayi imali.

15. Kungani singaciniseka kutsi singaphunyula etingibeni taSathane?

¹⁵ Yini lokufanele siyente nasibona shengatsi sesiyatigcabha nobe sesibukhali? Singashintja! Pawula watsi labo ‘lababanjwe nguDeveli baphila’ basengaphunyula elugibeni lwakhe. (2 Thim. 2:26) Davide wasilalela seluleko lesinemandla saNathani, wayekela kuba bukhali futsi walungisa buhlobo bakhe naJehova. Ungacali ukhohlwe kutsi Jehova unemandla kunaSathane. Ngako nasivuma kusitwa nguJehova, singaphunyula kunobe nguluphi lugibe lwaDeveli.

16. Yini letasisita kutsi sigweme tingibe taSathane?

¹⁶ Kunekutsi siphunyule etingibeni taSathane, kufanele sitibalekele ngalokuphelele. Loko singakwenta kuphela nasisitwa nguNkulunkulu. Kodvwa akukafaneli sicabange kutsi angeke sitigcabhe nobe sibe bukhali! Kutigcabha nobe kuba bukhali kutibambile ngisho netinceku taJehova lebesetimkhonte sikhatsi lesidze. Ngako thantaza kuJehova onkhe malanga, umcele akusite uhlolisise imicabango yakho netento takho. (Hla. 139:23, 24) Yenta konkhe lokusemandleni akho kuze ungatigcabhi nobe ube bukhali!

17. Yini letakwenteka ngekushesha kuDeveli, lositsa setfu?

¹⁷ Sekuphele tinkhulungwane teminyaka Sathane atingela. Ngekushesha, utawuboshwa futsi ekugcineni abhujiswe. (Semb. 20:1-3, 10) Silibuke ngalabovu lelo langa. Kuze kube ngulelo langa, hlale utigadzile titsiyo taSathane. Yenta konkhe lokusemandleni akho kuze ungatigcabhi nobe ube bukhali. Timisele ‘kumelana naDeveli futsi utakubalekela.’—Jak. 4:7.