1. Sathane o fana kharini ni musoti?

MUSOTI o vbweta gu mola mwendro gu songa girengo. Uye a nga thumisa milaphwi nyo hambanehambane kha nga edzi yi ganedego khidzo pari nyo vivbedwe khu monyo ya Joba. (Joba 18:8-10) Ginani egi musoti a girago gasi gu ndrindredzeya girengo naphwini waye? Uye o zama gu gi khedziseya gwadi, a wona omu gi hongolago, ati esi gi si golago, a bwe a wona edzi a nga girago khidzo gasi gu gi mana na gi pfhade. Sathane a ngu fana ni musoti yoyu. Uye a gu hi khedziseya gwadi, a wona omu hi hongolago, a bwe ati esi hi si golago. Uye a gu hatha naphwi na gu tumba gu khuye a na hi mola na hi pfhade. Bhibhiliya ya gu hi tumbisa gu khiyo ambari ha gu modwa khu moyo nya milaphwi ya Sathane hi nga si kodza gu vbuluga. Gu diga isoso, iyo yi ngu hi hevbudza edzi hi nga potsago khidzo milaphwi ya Sathane.

2. Khu yevbini milaphwi mivili eyi Sathane a yi thumisago ngudzu?

² Gu na ni milaphwi mivili eyi Sathane a yi thumisago ngudzu, gudzikhusedza ni gu mba eneledwa khesi u gu naso. * Sathane na ni myaga nya yingi na gu thumisa milaphwi yeyi ni gu a ngu dugeleya. Uye o fana ni musoti nya sinyoni oyu a ndrindredzeyago sinyoni omu nya naphwi waye mwendro omu nya redhi. (Ndzi. 91:3) Ganiolu, ethu kha hi vbweti gu modwa khu Sathane. Khu ginani? Kholu Jehovha hi yeyedzide milaphwi eyi Sathane a yi thumisago. — 2 Kor. 2:11.

3. Khu ginani Jehovha a nga theya omu nya Bhibhiliya siyeyedzo nya vathu va nga thegeya omu nya naphwi nya gudzikhusedze ni gu mba eneledwa khesi va gu naso?

 ³ Jehovha a ngu hi hevbudza esi hi nga girago gasi hi si thegeyi naphwini nya gu dzi khusedze ni gu mba eneledwa khesi hi gu naso. Uye a gu gira isoso, khu gu hi embeya esi si dugeledego simbe sithumi saye gasi gu anethu hi si thegeyi omu nya milaphwi yayimweyo. Hi na wona edzi Sathane a si kodzidego khidzo gu thumisa milaphwi yaye avba ga vathu va nga ba va thumeya Jehovha khu myaga nya yingi. Ina isoso, so thula gu khiso hi mwalo makodzelo nyo potse naphwi nya gudzikhusedze ni gu mba eneledwa khesi hi gu naso? Ahihi. Kholu Jehovha giride gu siyeyedzo sesi si manega omu nya Bhibhiliya gasi khala “gitiviso ga ethu.” (1 Kor. 10:11) Uye a ngu dziti gu khuye siyeyedzo sesi si nga hi phasa gu vbuluga ambari kamo gu mba thegeya omu nya milaphwi ya Sathane.

4. Ginani gi na dugeleyago ha gu dzi khusedza?

⁴ Sathane o vbweta gu khuye hi khala vathu nya gudzikhusedze. Uye a ngu dziti gu khuye ha gu dzi khusedza hi na fana naye hi bwe hi luza lithomo nyo vbanye kala gupindruga. (Mav. 16:18) Pawulo hi gengedzide gu khuye muthu a gu dzi khusedza “a gu thega gighohoni gya Sathane.” (1 Thim. 3:6, 7) Isoso si nga girega ga moyo ni moyo wathu gani hi vaphya lisineni, gani gale na hi thumeya Jehovha.

5. Guya khu Muhevbudzi 7:16, 20, muthu a nga yeyedza gu khuye a ngu dzi khusedza khu ndziya muni?

⁵ Gudzikhusedza sa gu fana ni gu gundreya. Sathane a gu zama gu hi gira hi vega gupima ga ethu vamune guvbindra Jehovha, ngudzungudzu ha gu ba hi tshangana ni sigaradzo. Khu giyeyedzo, ina u di nga singedzwa gilo nyo khaguri? Mwendro, ina u di nga pharwa khu ndziya nya mba yadi? Sathane a di hadzi tsaka a gu gu wona na wu rwega nandru Jehovha mwendro vandriyathu. Sathane a gu vbweta gu khuye u pimisa gu khuwe gasi gu lulamisa sigaradzo sago, u yede gu thumisa mawonelo yago nasiri sileletelo sa Jehovha si gomogo omu nya Lito laye. — Leri Muhevbudzi 7:16, 20.

6. Ginani u gi hevbudego ga giyeyedzo gya ndriyathu moyo nya nyamayi wa Holanda?

⁶ Wona esi si dugeledego ndriyathu moyo nya nyamayi wa Holanda. Uye gorogide khu kotani nya sihoso sa vandriyathu libandlani. Uye a di hunga  gu khuye kha vbweti gu ganeya gambe ni vandriyathu vale. Uye wari khuye: “Eni nyi di gupwa wutundzu nigu nyi di si kodzi gu va divaleya. Nyi di embeya mwama wangu kheni hongole hi vbindrugedza libandla.” Khavbovbo, Ndriyathu yoyu nya nyamayi a di sistiri JW Broadcasting^® nya Março nya 2016. Iyo yi ningide mawonelo nyo khaguri maningano ni edzi hi yedego gu wona khidzo sihoso sa vambe. Uye wari khuye: “Nyi wonide gu kheni nyi di yede gu vega gupima avba nya sihoso sangu, nyi dzi nogisa, vbavbandze nyo zame gu vbindrugedza vandriyangu. Broadcasting yi nyi phaside gu vega gupima avba ga Jehovha ni wufumu waye.” U gi wonide egi u nga gi hevbulago? Wa gu ba u emisana ni sigaradzo, vega gupima avba ga Jehovha. Mu lombe gasi a gu phasa gu wona vandriyathu kha nga edzi a va wonago khidzo. Papayi wago wa ndzadzini a gu si wona sihoso sawe nigu a gu vbweta gu va divaleya, nigu uye o vbweta gu khuye u gira sasimweso. — 1 Joh. 4:20.

7. Ginani gi dugeledego Pfhumu Uziya?

⁷ Gudzikhusedza gu giride Pfhumu Uziya wa Judha a si dzumeyi wusingalagadzi wa vambe a bwe a gira silo nya gu a di si yeli gu gira. Uziya a diri ni silo nya singi nya sadi. Uye a di gu pala omu nya dzinyimbi, a di vbahide madhoropa nya mangi nigu a diri ni mathembwe nya mangi. ‘Pfhumu Nungungulu a di gu mu kategisa.’ (2 Dzik. 26:3-7, 10) Ganiolu, Bhibhiliya yari khiyo: “Aholu avbo a nga wona nya gukhuye a na ni tshivba, monyo waye wu di dzi khusedza wu gira matshandza.” Jehovha a di si vegide guagani omu nya nayo gu khuye Vaprista basi va nga ba va yede gu vbisa libani Tempeleni. Ganiolu, khu gu dzi khusedza, Pfhumu Uziya a di beya tempeleni a vbisa libani. Jehovha kha tsakiswa khu mwama wule nya gu dzi khusedze nigu a di mu dwadzisa khu sokono. Uziya simamide gu dwala khu sokono kala a yafa. — 2 Dzik. 26:16-21.

8. Guya khu 1 Vakorinto 4:6, 7, ginani gi na hi phasago gu mba dzi khusedza?

⁸ Ina gudzikhusedza gu nga khala naphwi gwathu kha nga esi si nga dugeleye Uziya? Wona giyeyedzo gya Josè. Uye a diri Empresàrio a nga ba a dugeleya ngudzu nigu a diri lidhota li nga ba li ningwa githawo khu vatshavbo. Uye a di gu vega dziganelo omu nya mitshangano nya mighanga ni dzikongresu nigu ambari muwoneleyi nya gipandre a di gu mu vbwetedzeya gasi gu lomba wusingalagadzi. Ambari ulolo, Josè wari khuye: “Eni nyi di gu tumba ngudzu guti gwangu ni makodzelo nyi nga ba nyi ri nawo. Nyi di si tumbi Jehovha, nyi di gu dzipwa na nyi tiyide khu kharato, nyi di si engisi sigengedzo ni wusingalagadzi wa Jehovha.” Josè a di gira gighoho nya gikhongolo a duswa libandlani. Hwane nya myaga nyo khaguri uye a di wuyela libandlani. Muhuno Josè wari khuye: “Jehovha nyi hevbudzide gu khuye nya lisima kha ndri gu manega  ni ndruma, ganiolu gu gira esi uye a hi lombago.” Gwadi gu dundruga gu khethu makodzelo hi gu nawo ni malungelo siningwa si tago khiyo ga Jehovha. (Leri 1 Vakorinto 4:6, 7.) Ha gu dzi khusedza, Jehovha gima kha na nga hi thumisa.

9. Gu mba eneledwa khesi u gu naso gu kutside Adhamu ni Evha gu gira ginani?

⁹ Ha gu pimisa khu muthu nya gu mba eneledwa khesi a gu naso ha gu dundruga Sathane Dhiyabhulosi. Adzina saye uye a diri ni malungelo nya mangi nya lisima kholu a diri mweyo nya dzingilozi dza Jehovha. Ambari ulolo, uye a di vbweta silo nya singi. Uye a di gu vbweta gu khozedwa ogu basi gu lumbago Jehovha. Sathane a gu vbweta gu khuye hi fana naye, khu kharato o zama gu hi gira hi dzipwa na hi si eneledwi khesi hi gu naso. Tepo nyo pheye a nga thumisa naphwi wowu, khu tepo a nga kanganyisa Evha. Jehovha a di ningide Evha ni mwama waye silo nya singi nyo hodze. Avo va di tshulegide gu hodza mihandro yatshavbo ya thembweni, ganiolu mihandro nya simbo moyo basi va nga ba va himbedzedwe gu hodza. (Gen. 2:16) Ambari ulolo, Sathane si kodzide gu senga Evha a pimisa gu khuye a di yede gu hodza mihandro nya simbo wule a nga ba a sa yela gu hodza. Evha kha ninga lisima esi a nga ba a ri naso; a di gu vbweta nya singi. Ethu hi ngu wuti handro wu residwego khu isoso. Evha a di ghoha, khu gu hegisa afa.— Gen. 3:6, 19.

10. Dhavhidhe thegede kharini omu nya naphwi nyo mba eneledwa khesi a gu naso?

¹⁰ Gu mba eneledwa khesi hi gu naso gu giride Pfhumu Dhavhidhe a divaledwa khu satshavbo esi Jehovha a nga ba a mu ningide, nya nga dzithomba, ndruma ni gu pala dzinyimbitunu. Dhavhidhe a di gu dziti gu khuye siningwa sa Nungungulu si “tade ngudzu nyamba kodza ni gu sayedwa” nigu uye a di gu bonga ngudzu khu isoso. (Ndzi. 40:5) Ganiolu, ga tepo nyo khaguri Dhavhidhe divade satshavbo esi Jehovha a nga ba a mu ningide. Uye kha nga ba a eneledwa gambe khesi a nga ba ari naso. A di gu vbweta nya singi. Ambari olu a nga ba ari ni vagadzi nya vangi, Dhavhidhe a di pheya gu dogoreya ngadza vane. Nyamayi yoyu a diri Bheti-Sebha nigu mwama waye gu diri Uriya, Muhiti. Dhavhidhe a di hengeya malawu ni Bheti-Sebha nigu Bheti-Sebha a di khura mimba. Esi Dhavhidhe a giridego si di vivbide ngudzu, ganiolu giride gambe gimbe gilo nyo vivbe. Uye a di gira gu Uriya a songwa. (2 Sam. 11:2-15) Dhavhidhe a di gu pimisa ginani? Ina a di gu pimisa gu khuye Jehovha kha mu woni? Ambari olu Dhavhidhe a nga ba a thumeya Jehovha khu myaga nya yingi, uye thegede omu nya naphwi nyo mba eneledwa khesi  a gu naso a bwe a dzi vangeya sigaradzo. Ganiolu, egi gi tsakisago khu gu Dhavhidhe dzumede sighoho saye a bwe a dzi laya. Nya mba kanakana uye bongide ngudzu khu ba a divaledwe khu Jehovha.— 2 Sam. 12:7-13.

11. Guya khu Vaefeso 5:3, 4, ginani gi na hi phasago gu mba thegeya naphwini nyo mba eneledwa khesi hi gu naso?

¹¹ Ginani hi gi hevbulago khu giyeyedzo gya Dhavhidhe? Gasi hi si thegeyi naphwini nyo mba eneledwa khesi hi gu naso, hi yede gu bonga Jehovha khu satshavbo a hi ningidego. (Leri Vaefeso 5:3, 4.) Hi yede gu tsaka khesi hi gu naso. Tepo u pheyago gu hevbula Bhibhiliya ni muthu, adzina hi nga mu kutsa gu dundrugeya khesi Jehovha a mu giredego a bwe a mu bonga khu isoso. Gihevbuli gya gu gira isoso khu semana mweyo yi na vbeya na gi si kodzide gu gombeya khu 7 silo nyo hambane. (1 Tes. 5:18) Wa gu si wona kharini gu gira nuwe sasimweso? Gu dundrugeya khesi Jehovha a gu gireyago si na gu phasa gu bonga tepo yatshavbo. Wa gu ba u bonga u na tsaka khesi u gu naso. Wa gu ba u tsaka khesi u gu naso, khu na nga thegeya omu nya naphwi nyo mba eneledwa khesi u gu naso.

12. Gu mba eneledwa khesi hi gu naso gu giride Judha Sikarioti a gira ginani?

¹² Khu kotani nya gu mba eneledwa khesi a gu naso, Judha Sikarioti, giride silo nyo vivbe ngudzu a bwe a ningeya Jesu ga valala. Uye gupheyani a diri muthu nya wadi. (Luka 6:13, 16) Jesu a di mu hathide gasi gu khala mupostoli waye. So wonega gu khatshi Judha a diri muthu nyo tumbege, khu kharato a di emisidwe gasi gu khathaleya dzitsapawu. Jesu ni vapostoli vaye va di gu thumisa dzitsapawu dzedzi gasi gu khathaleya esi va nga ba va si vbweta thumoni nyo tshumayele. Khu ndziya nyo khaguri, dzitsapawu dzedzi dzi ngu fana ni mihengo hi girago muhuno gasi gu phasedzeya thumo nya mafu yatshavbo. Ganiolu, Judha ga tepo nyo khaguri a di pheya guba dzitsapawu dzile, ambari olu a nga ba a pwide Jesu na gu ganeya gunganigungani khu naphwi nya gu mba eneledwa khesi muthu a gu naso. (Marko 7:22, 23; Luka 11:39; 12:15) Judha kha theya kota khu sigengedzo soso.

13. Lini avba Judha a nga yeyedza gu khuye a di si eneledwi khesi a nga ba ari naso?

¹³ Judha yeyedzide gu khuye kha eneledwi khesi a gu naso gitepwana hwane Jesu na si gufi. Jesu ni vapostoli vaye gu pata ni Mariya ni ndriyaye Marta va di konvhidharidwe gaya ga Simoni, a nga ba a ranwa pwani nya sokono. Tepo va nga ba va hodza, Mariya a di khuga a dzega mafura nyo nungeye nyo dhure ngudzu a theya hungoni ga Jesu. Judha ni vambe vapostoli va di goroga khu isoso. Vambe vapizane a dzina va pimiside gu khavo va di hadzi thumisa dzitsapawu dzile thumoni wawe nyo tshumayele, ganiolu Judha a diri ni mawonelo nyo hambane. Uye ‘a diri mbafa.’ Khu kharato a di gu vbweta guba dzitsapawu dza kaxani. Khu kotani nya gu mba eneledwa khesi a gu naso, Judha a di ningeya Jesu khu tengo wu nga ba wu renga gumbi. — Joh. 12:2-6; Mat. 26:6-16; Luka 22:3-6.

14. Patwa moyo wu thumiside kharini wusingalagadzi wu gomogo omu ga Luka 16:13?

¹⁴ Jesu dundrugiside vapizane vaye gu khuye: “Kha mu dzi kodzi gu thumela Nungungulu ni dzitsapawu.” (Leri Luka 16:13.) Isoso lisine furi. Wona edzi patwa moyo wu vbanyago Romenia wu nga thumisa khidzo wusingalagadzi wowu. Uwo wu hakhide konvhite nya guya thume khu gitepwana ga limbe litigo omu wu nga hadzi mana dzitsapawu nya dzingi. Avo vari khavo: “Hi diri ni mangava nya mangi bhanku ma nga ba ma lomba gu livbwa. Khu kharato, tepo hi nga mana thumo wowu hi di pimisa gu khethu makategwa ma tago khiyo ga Jehovha.” Ganiolu, gu diri ni gigaradzo. Thumo wowu wu di hadzi va beya tepo nya yingi va nga hadzi yi thumisa thumoni wa Jehovha. Patwa wowu wu di leri ndrima yi gu na ni hungo nya mahungu wu gu khuwo “Mantenha a lealdade com um coração unificado” yi gomogo avba nya Mukhedziseyi nya 15 nya Janeiro nya 2008 khu Giputukezi. Isoso si va phaside gu hunga gu gira gilogyo. Avo vari khavo: “Abari gu gighelo gi nga hadzi hi gira hi hongola ga limbe litigo gu diri gu mana dzitsapawu nya dzingi, si di hadzi yeyedza gu khiso wupari wathu ni Jehovha wu diri mwalo lisima womini gwathu. Hi di gu tiyisega gu khethu hi hadzi vega  wupari wathu ni Jehovha mhangoni.” Khu kharato, avo kha va dzumeya thumo wule. Ginani gi giregidego? Mwama manide thumo tigoni gwaye wu nga ba wu hakhisa dzitsapawu va nga ba va dzi vbweta. Mwangadzi wakona wari khuye: “Jehovha tepo yatshavbo a na phasa sithumi saye.” Patwa wowu wu tsakide ngudzu khu ba wu hathide gu thumeya Jehovha na siri gu thangisa dzithomba.

15. Khu ginani hi nga tiyisegago gu khethu si ngu kodzega gu vbuluga ga milaphwi ya Sathane?

¹⁵ Ginani hi yedego gu gira ha gu tugula gu khethu hi thegede omu nya naphwi nya gu dzi khusedze ni gu mba eneledwa khesi hi gu naso? Hi nga si kodza gu vbindrugedza. Pawulo ganede gu khuye ava va “hungidwego khuwo” va nga si kodza gu vbuluga. (2 Thim. 2:26) Khiso si dugeledego Pfhumu Dhavhidhe. Uye engiside wusingalagadzi a ningidwego khu Natane, a diga makolo a nga ba ari nawo a bwe a wusedza wupari waye ni Jehovha. U nga divali gu khuwe Jehovha na ni tshivba ngudzu guvbindra Sathane. Ha gu dzumeya giphaso gya Jehovha hi na si kodza gu vbuluga ga yatshavbo milaphwi ya Sathane.

16. Ginani gi na hi phasago gasi hi si thegeyi omu nya milaphwi ya Sathane?

¹⁶ Khu lisine hi yede gu dzi garadza gasi hi si thegeyi omu nya naphwi nya gu dzi khusedze ni gu mba eneledwa khesi hi gu naso. Hi na si kodza basi gu gira isoso ha gu phaswa khu Jehovha. Ganiolu kha hi yeli gu pimisa gu khethu gima kha hi na nga thegeya omu nya naphwi nya gu dzi khusedze ni gu mba eneledwa khesi hi gu naso. Ambari vathu va nga ba va thumeya Jehovha khu myaga nya yingi va thegede omu nya naphwi nya gu dzi khusedze ni gu mba eneledwa khesi va gu naso. Khu kharato, gombeya ga Jehovha tshigu ni tshigu gasi a gu phasa gu gevisisa mapimo yago ni mithumo yago. (Ndzi. 139:23, 24) Gira satshavbo u si kodzago gasi u si thegeyi omu nya naphwi nya gu dzi khusedze ni gu mba eneledwa khesi hi gu naso.

17. Ginani gi na dugeleyago nala wathu Dhiyabhulosi?

¹⁷ Gu ngu vbindra mazanazana myaga Sathane na gu thuma kha nga musoti. Nugunugu Sathane a na khotedwa, khu gu landreya a fuviswa. (Gutu. 20:1-3, 10) Hi li virede litshigu leli khu maho nyo fuviye. Na li si gu vbohi litshigu leli, dzi woneye gasi u si thegeyi omu nya milaphwi ya Sathane. Dzi garadze gasi u si thegeyi omu nya naphwi nya gu dzi khusedze ni gu mba eneledwa khesi u gu naso. Dzi emiseye gu “wugela Sathane, uye a na tutuma.” — Jak. 4:7.