1. Nkaambo nzi Saatani ncotukonzya kumukozyanisya kumuvwimi?

MUVWIMI ujisi mbaakani yomwe, nkokuti kujata naa kujaya munyama. Ulakonzya kubelesya tukole twiindene-indene, mbubonya mbwaakaamba umwi wabasikuumbulizya Jobu bakubeja. (Job. 18:8-10) Mbuti muvwimi mbwakonzya koongelezya munyama kutegwa acegwe? Ulaiya kujatikizya munyama ooyo. Nkuukuli nkwayandisya kuunka? Ino ncinzi ncayandisya? Nkakole nzi kakonzya kubeleka kabotu? Saatani uli mbuli muvwimi ooyo. Ulatwiiya. Ulabikkila maano nkotuunka alimwi azintu nzyotuyandisisya. Mpoonya ulateya kakole nkabona kuti kalakonzya kutuca cakutayeeyela. Nokuba boobo, Bbaibbele litusyomezya kuti, ikuti naa twacegwa inga twacikonzya kuzwa. Alimwi lilatuyiisya mbotukonzya kutweeleba tukole ooto.

2. Ino ntukole nzi ntwabelesya kapati Saatani?

² Tukole ntwabelesya kapati Saatani, nkulisumpula alimwi abulyato. * Kwamyaka minji, Saatani wazwidilila mukubelesya tukole ootu tutali kabotu. Uli mbuti sikuteya tuyuni uutoongelezya kuti tunjile mukakole naa kutuca mulunsabwe. (Int. 91:3) Pele tatweelede kucegwa a Saatani. Nkaambo nzi? Akaambo kakuti Jehova wakatuyubunwida nzila zyabucenjezu nzyabelesya Saatani.—2Kor. 2:11.

3. Nkaambo nzi Jehova ncaakabikkilizya zikozyanyo zimwi mu Bbaibbele?

³ Nzila imwi Jehova mbwatucenjezya kujatikizya kulisumpula alimwi abulyato, nkwiinda mukutukulwaizya kwiiya kuzintu izyakacitikila  bamwi mubuumi. Amubikkile maano kuzikozyanyo nzyotutiilange-lange izitondezya kuti Saatani wakacikonzya koongelezya nobaba babelesi ba Jehova basimide. Sena eeci caamba kuti tacikonzyeki kweeleba kulisumpula alimwi abulyato? Peepe. Jehova wakazibikkilizya zikozyanyo eezyi mu Bbaibbele kutegwa ‘atucenjezye swebo.’ (1Kor. 10:11) Ulizyi kuti tulakonzya kwiiya kuzikozyanyo eezyi zitucenjezya alimwi akweeleba naa kuzwa mutukole twa Diabolosi.

4. Ncinzi cikonzya kutucitikila ikuti naa twatalika kulisumpula?

⁴ Saatani uyanda kuti tube amuuya wakulisumpula. Ulizyi kuti, ikuti naa twatalika kulisumpula, tuyooba mbuli nguwe akusweekelwa coolwe cakupona kukabe kutamani. (Tus. 16:18) Aboobo mwaapostolo Paulo wakacenjezya kuti, muntu inga “walitukumuna akubetekwa mbubonya mbuli Diabolosi.” (1Tim. 3:6, 7) Eeci cilakonzya kucitika kuli umwi aumwi wesu, tacikwe makani naa tuli bapya mukasimpe naa twamubelekela Jehova kwamyaka minji.

5. Kweelana alugwalo lwa Mukambausi 7:16, 20, mbuti muntu mbwakonzya kutondezya kulisumpula?

⁵ Kulisumpula ninzila imwi yakuliyanda. Saatani ulasoleka kutupa kuliyanda, kulibikkila maano lwesu kwiinda Jehova, ikapati ciindi notujisi mapenzi. Mucikozyanyo, sena kuli nomwakatamikizyigwa kaambo? Naa sena kuli nomwakacitilwa cakutalulama? Saatani ulakonzya kukkomana kumubona kamupa Jehova mulandu naa bakwesu. Alimwi Diabolosi uyanda kumupa kuyeeya kuti nzila ilikke yakumana mapenzi, nkucita zintu munzila njomuyanda ikutali kutobela busolozi mbwamupa Jehova kwiinda mu Jwi lyakwe.—Amubale Mukambausi 7:16, 20.

6. Ncinzi ncomukonzya kwiiya kucintu cakamucitikila mucizyi umwi ku Netherlands?

⁶ Amubone icakamucitikila mucizyi umwi kucisi ca Netherlands, ooyo iwakanyema kapati akaambo kakutalondoka kwabamwi. Tanaakacili kuyanda kuzumanana kuyanzana abantu bali boobo. Mucizyi ooyu wakati: “Ndakalimvwa kulendelelwa kapati alimwi tiindakali kukonzya kucinca mbondakali kulimvwa. Ndakaambila  balumi bangu kuti tweelede kulongela kumbungano iimbi.” Mpoonya wakeelela pulogilamu ya JW Broadcasting^® yamwezi wa March 2016. Pulogilamu eeyi yakapa nzila mbotukonzya kweendelezya kutalondoka kwabamwi. Mucizyi wakati: “Ndakabona kuti ndakeelede kulicesya alimwi akuyeeya kujatikizya kulubizya kwangu muciindi cakusola kubacinca bakwesu abacizyi mumbungano. Pulogilamu eeyi yakandigwasya kubikkila maano kuli Jehova abweendelezi bwakwe.” Sena mwakabona kaambo? Ciindi nomujisi mapenzi, amubikkile maano kuli Jehova. Amumulombe kuti amugwasye kubona bamwi mbuli mbwabona walo. Uso wanu wakujulu ulakubona kulubizya kwabo; pele ulilibambilide kubalekelela. Uyanda kuti andinywe kamucita mbubwenya.—1Joh. 4:20.

7. Ncinzi cakamucitikila Mwami Uziya?

⁷ Kulisumpula kwakapa Mwami Uziya wa Juda kukaka lulayo alimwi akucita cintu ncaatakeelede. Uziya wakacita zintu zinji zibotu. Wakazwidilila munkondo, mumilimo yakuyaka alimwi amubulimi. “Leza mwini-mwini wakapa kuti azwidilile.” (2Mak. 26:3-7, 10) Bbaibbele lyaamba kuti: “Nokuba boobo, mbwaakabeda buyo anguzu, moyo wakwe wakalisumpula akulinyonyoona.” Jehova wakapede mulawo wakuti balikke bapaizi mbabeelede kuumpa tununkilizyo mutempele. Pele Mwami Uziya cakulisumpula wakanjila mutempele kutegwa aumpe tununkilizyo. Jehova tanaakakkomana, aboobo wakapa kuti mwaalumi ooyo iwakali kulisumpula abe acinsenda. Uziya wakazumanana kali sicinsenda kusikila buzuba naakafwa.—2Mak. 26:16-21.

8. Kweelana alugwalo lwa 1 Bakorinto 4:6, 7, mbuti mbotukonzya kukweeleba kulisumpula?

⁸ Sena kulisumpula kulakonzya kutupa kucegwa mukakole mbuli mbwaakacegwa Uziya? Amubone cikozyanyo caba José. Bakali basimakwebo ibasumpukide alimwi bakali kubeleka kabali mwaalu uulemekwa kapati mumbungano. Bakali kupa makani kumuswaangano wabbazu awacooko, alimwi balangizi bamabazu bakali kulomba lulayo kulimbabo. Ba José bakati: “Ndakali kusyoma nguzu zyangu alimwi aluzyibo. Jehova ndakamubikka ambali. Ndakali kuyeeya kuti ndili muyumu, aboobo tiindakakuswiilila kucenjezya kwa Jehova alimwi alulayo lwakwe.” Ba José bakacita cibi cipati, aboobo bakagusyigwa mumbungano. Nokwakainda myaka minji, bakapilusyigwa mumbungano. Lino bakaamba kuti: “Jehova wandiyiisya kuti cintu ciyandika kapati, takuli kuba  azina lyabulemu pe, pele nkucita ncatwaambila kuti tucite.” Aboobo atuyeeye kuti kufwumbwa cipego ncotujisi alimwi amikuli iili yoonse njotupegwa mumbungano, zizwa kuli Jehova. (Amubale 1 Bakorinto 4:6, 7.) Ikuti katulisumpula, Jehova takatubelesyi pe.

9. Ino Saatani a Eva bakacita nzi akaambo kabulyato?

⁹ Ciindi notuyeeya kujatikizya bulyato, cakutadooneka Saatani Diabolosi nguuboola mumizeezo. Mbwaanga wakali umwi wabangelo ba Jehova, Saatani weelede kuti wakajisi mikuli minji mibotu. Pele wakacili kuyanda iimbi. Wakali kuyanda bukombi ibweelede buyo kupegwa kuli Jehova. Saatani uyanda kuti tube mbuli nguwe, aboobo ulasoleka kutupa kulimvwa kutakkutila azintu nzyotujisi. Kusoleka kuli boobu kwakatalika ciindi naakabandika a Eva. Caluyando, Jehova wakapa Eva amulumaakwe zyakulya zinji, nkokuti “kuzisamu zyoonse izili mumuunda” kunze buyo lyacisamu comwe. (Matl. 2:16) Nokuba boobo, Saatani wakamucenga Eva akumupa kutalika kuyeeya kuti wakeelede kulya akucisamu comwe icakakasyidwe. Eva tanaakakkutila azintu nzyaakajisi; wakacili kuyanda zimbi. Aboobo tulizyi cakatobela. Wakazundwa acibi mpoonya mukuya kwaciindi wakafwa.—Matl. 3:6, 19.

10. Mbuti bulyato mbobwakamubeda kakole Mwami Davida?

¹⁰ Bulyato bwakapa Mwami Davida kuluba zintu nzyaakamupede Jehova, nkokuti lubono, mpuwo alimwi akucikonzya kuzunda basinkondonyina banji. Cakulumba Davida wakabona kuti zipego zya Leza zyakali ‘zinji kapati cakuti tiicakali kukonzyeka kuzibandauka zyoonse!’ (Int. 40:5) Pele aciindi cimwi, Davida wakaziluba zintu nzyaakamupede Jehova. Wakacileka kukkutila; wakacili kuyanda zimbi zinji. Nokuba kuti Davida wakajisi bamakaintu banji, wakalekela kulombozya kubyaabi kujatikizya mukamuntu kukomena mumoyo wakwe. Mukaintu ooyo wakali Bati-seba, mulumaakwe wakali Uriya muna Heti. Cabulyato Davida wakoonana a Bati-seba, mpoonya Bati-seba wakamita. Ncaakacita Davida cakabija kapati, pele wakacita cibyaabi kwiinda waawo. Davida wakabikka bubambe bwakuti Uriya ajaigwe! (2Sam. 11:2-15) Ncinzi ncaakali kuyeeya Davida? Sena wakali kuyeeya kuti Jehova takonzyi kubona? Muntu ooyu iwakali mubelesi wa Jehova uusyomeka wakazundwa abulyato, aboobo eeci cakamuletela mapenzi  manji kapati. Pele cikkomanisya ncakuti, mukuya kwaciindi Davida wakakuzumina kulubizya kwakwe aboobo wakeempwa. Eelo kaka wakalumba kapati kuti Jehova wakatalika kumukkomanina alimwi!—2Sam. 12:7-13.

11. Kweelana alugwalo lwa Baefeso 5:3, 4, ncinzi cikonzya kutugwasya kubuzunda bulyato?

¹¹ Ncinzi ncotwiiya kucikozyanyo ca Davida? Twiiya kuti tulakonzya kubuzunda bulyato ikuti naa twazumanana kulumba kuzintu zyoonse nzyaakatupa Jehova. (Amubale Baefeso 5:3, 4.) Tweelede kukkutila azintu nzyotujisi. Basikwiiya Bbaibbele bapya bakulwaizyigwa kuyeeya cilongezyo comwe cigaminide akumulumba Jehova kujatikizya cilongezyo eeco. Ikuti muntu wacita oobu abuzuba kwansondo yoonse, nkokuti uyoopailila zintu zili ciloba ziindene-indene. (1Tes. 5:18) Sena mulacita cintu cikozyenye aceeci? Ikuti kamuzinzibala kuyeeya zintu zyoonse nzyaakamucitila Jehova, ciyoomugwasya kuba muntu uulumba. Mpoonya ikuti kamulumba, muyookkutila. Ciindi nomukkutila, tamukonzyi kuba balyato.

12. Ncinzi ncaakacita Judasi akaambo kabulyato?

¹² Akaambo kakuti Judasi Isikariote wakaba mulyato, wakacita cintu cibyaabi kapati akwaaba Jesu. Pele Judasi kumatalikilo tanaakali muntu mubyaabi. (Lk. 6:13, 16) Jesu wakamusala kuba mwaapostolo. Cakutadooneka wakali kusyomeka, nkaambo ngonguwe iwakali kulanganya kabbokesi kamali. Jesu abaapostolo bakwe bakali kwaabelesya mali aayo kutegwa balanganye nzyobakali kuyandika mumulimo wakukambauka. Munzila imwi, akali mbuli mali aasangwa kumulimo wanyika yoonse mazuba aano. Pele aciindi cimwi, Judasi wakatalika kubba nokuba kuti wakamvwa Jesu cakwiinduluka-induluka kacenjezya kujatikizya bulyato naa busyaacivwulemwangu. (Mk. 7:22, 23; Lk. 11:39; 12:15) Judasi wakakuunduluzya kucenjezya ooko.

13. Ndiilili bulyato bwa Judasi nobwakalibonya antangalala?

¹³ Bulyato bwa Judasi bwakalibonya antangalala mubukkale bwakacitika kakusyeede ciindi cisyoonto kuti Jesu ajaigwe. Jesu abasikwiiya bakwe, kubikkilizya a Mariya alimwi a Marta mucizyi wakwe, bakatambwa kuli Simoni sicinsenda. Ciindi nobakali kulya, Mariya wakanyamuka akutila mafwuta aanunkilila aadula kapati amutwe wa Jesu. Judasi abasikwiiya bamwi bakanyema kapati. Basikwiiya bamwi bakalimvwa kuti mali aayo akali kukonzya kubelesyegwa kabotu mumulimo wakukambauka. Pele Judasi wakajisi makanze aayindene. “Wakali mubbi,” aboobo wakali kuyanda kwaabba mali aayo mukabbokesi. Kumbele, bulyato bwakamupa kwaaba Jesu akumusambala muulo wamuzike.—Joh. 12:2-6; Mt. 26:6-16; Lk. 22:3-6.

14. Mbuti banabukwetene bamwi mbobakatobela lulayo lujanika kulugwalo lwa Luka 16:13?

¹⁴ Jesu wakabayeezya basikumutobela kujatikizya kasimpe aaka kayandika kapati: “Tamukonzyi kuba bazike ba Leza aba Lubono.” (Amubale Luka 16:13.) Kaambo aaka kacili kamasimpe. Amubone banabukwetene bamwi ku Romania mbobakaatobela majwi aa Jesu aaya. Bakapegwa mulimo kucisi cimwi cisumpukide kapati. Mboobu mbobakaamba: “Twakajisi cikwelete cipati cakubbadela kubbanki, aboobo kumatalikilo twakali kuyeeya kuti mulimo ooyu cakali cilongezyo kuzwa kuli Jehova.” Nokuba boobo, kuli penzi lyakaliko. Mulimo ooyu wakali kuyoonyonganya mulimo wabo kuli Jehova. Nobakamana kubala cibalo cakuti, “Amuzumanane Kusyomeka Amoyo Omwe” mu Ngazi Yamulindizi yamu August 15, 2008, bakasala cakucita. Bakati: “Ikuti naa kujana mali manji ngamakanze aakuyoobelekela kucisi cimbi, nkokuti caamba kuti cilongwe cesu a Jehova twacibikka mubusena bwabili. Twakali masimpe kuti cilongwe cesu a Jehova cakali kuyoonyongana.” Aboobo bakaukaka mulimo.  Ncinzi cakacitika? Mulumi wakajana mulimo mucisi cokwabo iwakali kukonzya kubapa nzyobakali kuyandika. Mukaintu wakati: “Janza lya Jehova talili lifwaafwi.” Banabukwetene aaba balikkomene kuti bakasala Jehova kuba Simalelaabo muciindi calubono.

15. Nkaambo nzi ncotuli masimpe kuti cilakonzyeka kuzwa mutukole twa Saatani?

¹⁵ Ncinzi ncotweelede kucita kuti naa twabona kuti twatalika kulisumpula naa kuba balyato? Tulakonzya kucinca! Paulo wakaamba kuti aabo ‘ibakajatwa kabalanga’ a Diabolosi balakonzya kuzwa mukakole. (2Tim. 2:26) Eeci ncicakacitika kuli Davida. Wakalutobela lulayo lwa Natani lulaanguzu kapati, wakeempwa akucileka kuba mulyato alimwi wakaciyumya cilongwe cakwe a Jehova. Mutalubi kuti Jehova ulaanguzu kapati kwiinda Saatani. Aboobo ikuti twalutambula lugwasyo lwa Jehova, tulakonzya kuzwa mukakole kali koonse nkaakateya Diabolosi.

16. Ncinzi ciyootugwasya kututantamuka tukole twa Saatani?

¹⁶ Bwini mbwakuti, muciindi cakuzwa buyo mutukole twa Saatani, tweelede kututantamukila limwi buya. Tulakonzya kucita boobu lilikke notugwasyigwa a Leza. Pele tatweelede kuliiba! Nobaba babelesi ba Jehova ibamubelekela kwamyaka minji balatalika kulisumpula naa kuba balyato. Aboobo amumulombe Jehova buzuba abuzuba kutegwa amugwasye kubona naa bube bubyaabi oobo bwakatalika kunyonganya mizeezo yanu alimwi azintu nzyomucita. (Int. 139:23, 24) Mutabulekeli kumweendelezya pe!

17. Ncinzi ciyoomucitikila lino-lino sinkondoma, Diabolosi?

¹⁷ Kwamyaka minji, Saatani wali muvwimi. Pele lino-lino uyakwaangwa alimwi akunyonyoonwa mukuya kwaciindi. (Ciy. 20:1-3, 10) Eelo kaka tulabulangila buzuba oobo! Kabutanasika buzuba oobo, amuzumanane kupakamana kutukole twa Saatani. Amubeleke canguzu kutegwa mutazumizyi kulisumpula naa bulyato kumweendelezya. Aboobo aabe makanze aanu ‘kumukazya Diabolosi eelyo uyoomutija.’—Jak. 4:7.