1. Wai na yumi ken tok Satan i olsem man bilong painim abus?

MAN bilong painim abus i tingting strong long winim wanpela mak—em long trapim o kilim i dai animal. Em inap yusim kain kain trap bilong painim abus, olsem Baibel i stori long en. (Jop 18:8-10) Em i save mekim wanem bilong trikim wanpela animal i go insait long trap bilong em? Em i save stadim gut dispela animal. Animal i save go we? Na em i save laikim wanem ol samting? Wanem samting inap trapim em? Satan i olsem man bilong painim abus. Em i save stadim yumi gut. Em i luksave long ol hap yumi go long en na ol samting yumi laikim. Long dispela rot, em i putim trap bilong kisim yumi na yumi no luksave long en. Tasol Baibel i tok sapos Satan i trapim yumi, yumi ken lusim trap bilong em. Baibel i stori tu long hau yumi ken abrusim ol dispela trap.

2. Wanem 2-pela trap bilong Satan i save wok gut long olgeta taim?

² Tupela trap bilong Satan i save wok gut long olgeta taim em pasin antap na gridi pasin. * Inap planti tausen yia, Satan i yusim dispela 2-pela pasin nogut long trapim ol man. Em i olsem man bilong kisim pisin husat i save trapim pisin o trikim pisin i go insait long umben bilong em. (Sng. 91:3) Tasol i no olsem Satan i mas trapim yumi. Wai na yumi tok olsem? Bikos Jehova i kamapim klia long yumi ol trik bilong Satan.—2 Kor. 2:11.

3. Wai na Jehova i larim stori bilong sampela man i gat pasin antap na gridi pasin i stap long Baibel?

³ Long Baibel, Jehova i kamapim stori bilong sampela wokman bilong em long bipo em ol i gat pasin antap na gridi pasin, na stori bilong ol i stap olsem tok lukaut long yumi. Long ol dispela eksampel, yumi bai luksave olsem Satan i bin trapim sampela wokman bilong Jehova em ol i bin mekim wok bilong em inap  longpela taim. Yu ting dispela i makim olsem yumi no inap abrusim pasin antap na gridi pasin? Nogat. Jehova i larim ol dispela eksampel i stap long Baibel olsem “tok lukaut long yumi.” (1 Kor. 10:11) Em i save olsem yumi inap kisim skul long ol dispela eksampel na abrusim o lusim ol trap bilong Satan.

4. Wanem samting inap painim yumi sapos yumi gat pasin antap?

⁴ Satan i laik bai yumi kisim pasin antap. Em i save olsem sapos yumi larim pasin antap i bosim yumi, yumi bai kamap wankain olsem em na yumi no inap kisim laip oltaim. (Prov. 16:18) Olsem na aposel Pol i givim tok lukaut olsem, man inap “kisim pasin antap na kisim wankain kot olsem Devil i bin kisim.” (1 Tim. 3:6, 7) Dispela samting inap painim yumi olgeta, maski yumi nupela long tok i tru o yumi mekim wok bilong Jehova inap planti yia.

5. Olsem Eklisiastis 7:16, 20 i kamapim, man i gat pasin antap i save mekim wanem?

⁵ Ol man i gat pasin antap, ol i save tingim ol yet tasol. Satan i laik kirapim yumi long tingim yumi yet tasol na yumi no ken tingim Jehova, moa yet long taim yumi gat hevi. Olsem wanem? Wanpela i bin sutim tok giaman long yu? O wanpela i mekim pasin i no stret long yu? Satan i laik bai yu sutim tok long Jehova o long kongrigesen. Em i laik bai yu ting olsem wanpela rot tasol bilong stretim dispela hevi em long bihainim laik bilong yu yet na no ken bihainim ol stiatok bilong Jehova long Baibel.—Ritim Eklisiastis 7:16, 20.

6. Yu inap kisim wanem skul long stori bilong wanpela sista long Netelan?

⁶ Skelim stori bilong wanpela sista long Netelan husat i bel kaskas long pasin kranki bilong ol narapela. Em i pilim olsem em i givap pinis long ol. Em i tok: “Mi pilim wanpis tru na mi pilim olsem mi no inap senisim tingting bilong mi. Mi tokim man bilong mi olsem mipela i mas muv i go long narapela kongrigesen.” Tasol bihain dispela sista i watsim JW Broadcasting^® program bilong Mas 2016. Dispela program i kamapim sampela tok long pasin yumi ken mekim taim yumi bel hevi long pasin kranki bilong ol narapela. Sista i tok: “Mi luksave olsem mi mas kisim  pasin daun na tingim ol popaia bilong mi yet, na mi no ken traim long senisim pasin bilong ol bratasista insait long kongrigesen. Dispela program i helpim mi long tingim Jehova na wok bos bilong em olsem nambawan bikpela samting.” Yu luksave long poin? Taim yu bungim wanpela hevi, putim tingting i go long Jehova. Beten na askim em long helpim yu long holim wankain tingting olsem Em i gat long ol narapela. Papa bilong yu long heven i lukim ol popaia bilong ol na em i redi long fogivim ol. Na em i laik bai yu mas mekim wankain pasin.—1 Jon 4:20.

7. Wanem samting i kamap long King Usia?

⁷ Pasin antap i kirapim King Usia bilong Juda long sakim gutpela tok i kam long ol narapela na em i mekim samting em i no gat rait long mekim. Usia i bin mekim planti gutpela wok. Em i bin winim planti woa, na em i wokim planti taun na ol bikpela gaden. “God tru i helpim em na olgeta samting em i mekim i kamap gutpela.” (2 Sto. 26:3-7, 10) Baibel i tok: “Tasol taim em i kamap strong, em i kisim pasin antap na dispela i bagarapim em.” Jehova i bin givim lo olsem ol pris tasol i mas kukim paura bilong smok i gat gutpela smel long tempel. Tasol King Usia i mekim samting em i no gat rait long mekim; em i go insait long tempel na kukim paura bilong smok i gat gutpela smel. Jehova i no amamas, olsem na em i givim sik lepra long dispela man i gat pasin antap. Usia i stap olsem lepraman long laip olgeta bilong em.—2 Sto. 26:16-21.

8. Olsem 1 Korin 4:6, 7 i kamapim, olsem wanem yumi ken abrusim pasin antap?

⁸ Yu ting pasin antap inap trapim yumi olsem i bin kamap long Usia? Skelim stori bilong José. Em i wanpela bisnisman na em i gat planti mani kago na em i mekim wok elda insait long kongrigesen. Em i save mekim ol tok long ol kibung, na sampela taim ol wasman sekit i save askim em long kisim edvais. Em i tok: “Mi trastim save na ekspiriens bilong mi yet, na mi no trastim Jehova. Mi ting olsem mi stap strong, so mi no putim yau long ol tok lukaut bilong Jehova na ol gutpela tok em i givim long mi.” José i mekim wanpela bikpela rong na em i raus long kongrigesen. Sampela yia i go pinis, kongrigesen i kisim em bek. Em i tok: “Jehova i bin skulim mi long wanpela bikpela samting olsem, mi no ken tingim nem mi holim, tasol mi mas mekim ol samting Em i askim mi long mekim.” So yumi mas tingim olsem ol save yumi gat na ol wok insait long kongrigesen yumi mekim, ol i kam long Jehova. (Ritim 1 Korin 4:6, 7.) Sapos yumi gat pasin antap, Jehova i no inap yusim yumi long mekim wok bilong em.

9. Gridi pasin i kirapim Satan na Iv long mekim wanem?

⁹ Gridi pasin em pasin tru bilong Satan. Long bipo, Satan em wanpela gutpela ensel bilong Jehova na em i holim planti gutpela wok. Tasol em i laikim sampela samting moa. Satan i laik bai ol man i mas lotuim em, maski Jehova wanpela tasol i gat dispela rait. Satan i laik yumi kamap wankain olsem em, so em i traim long kirapim yumi long pilim olsem yumi mas kisim sampela samting moa. Fes taim Satan i mekim olsem em taim em i toktok wantaim Iv. Jehova i givim planti kaikai long Iv na Adam na em i tokim ol long kaikai “long olgeta diwai bilong gaden,” tasol wanpela diwai tasol ol i no ken kaikai prut bilong en. (Stt. 2:16) Maski i olsem, Satan i giamanim Iv na mekim em i kisim tingting olsem em i mas kaikai prut bilong diwai tambu. Iv i no amamas long ol samting em i gat pinis; em i laikim sampela samting moa. Yumi save long samting i bin kamap long dispela. Iv i mekim sin na bihain em i dai.—Stt. 3:6, 19.

10. Olsem wanem gridi pasin i bin trapim King Devit?

¹⁰ Gridi pasin i mekim na King Devit i lusim tingting long ol samting Jehova i bin givim long em, olsem mani kago, biknem na namba, na strong long winim planti pait. Devit i amamas long ol presen God i givim long em, na em i tok: “Man! Ol i planti tumas na mi no inap kaunim.” (Sng. 40:5) Tasol long wanpela taim, Devit i lusim tingting long ol samting Jehova i givim long em. Em i no amamas moa long ol dispela samting; em i laikim sampela samting moa. Maski Devit i maritim planti meri, long bel em i wok long mangal long meri bilong narapela man. Dispela meri em Batseba, na man bilong en em Uria bilong lain Hit. Devit i tingim laik bilong em yet na em i slip wantaim Batseba, na Batseba i kisim bel. Devit i mekim pasin adaltri—em pasin i nogut tru—tasol samting i nogut moa, em i stretim rot long kilim i dai Uria! (2 Sml. 11:2-15) Wai stret na Devit i mekim dispela pasin? Em i ting olsem Jehova i no lukim ol dispela samting? Dispela gutpela wokman bilong Jehova i mekim gridi pasin na em i karim bikpela hevi tru long dispela. Tasol bihain Devit i tokaut long rong bilong em na em i tanim bel. Na em i amamas tru olsem Jehova i fogivim em!—2 Sml. 12:7-13.

11. Olsem Efesus 5:3, 4 i kamapim, wanem samting inap helpim yumi long daunim gridi pasin?

¹¹ Yumi kisim wanem skul long stori bilong Devit? Yumi kisim skul olsem yumi ken daunim gridi pasin sapos yumi gat pasin bilong tok  tenkyu long Jehova long olgeta gutpela samting em i givim long yumi. (Ritim Efesus 5:3, 4.) Yumi mas amamas long ol samting yumi gat pinis. Taim yumi stadi wantaim ol nupela Baibel sumatin, yumi ken skulim ol long tingim wanpela gutpela samting Jehova i givim long ol. Sapos wanpela man i mekim olsem long olgeta de inap long wanpela wik, orait long pinis bilong wik, em i beten na tenkim Jehova long 7-pela narapela narapela samting. (1 Tes. 5:18) Yu save mekim olsem? Sapos yu tingim tingim long bel olgeta gutpela samting Jehova i mekim bilong helpim yu, yu bai gat pasin bilong tok tenkyu. Na taim yu gat pasin bilong tok tenkyu, yu bai amamas long ol samting yu gat pinis. Na taim yu amamas long ol samting yu gat pinis, yu no inap i gat gridi pasin.

12. Gridi pasin i kirapim Judas Iskariot long mekim wanem?

¹² Gridi pasin i kirapim Judas long putim Jisas long han bilong ol birua. Pastaim Judas i no gat gridi pasin. (Luk 6:13, 16) Jisas i bin makim em long kamap wanpela aposel. Judas i save mekim gut ol wok na ol narapela i ken trastim em, olsem na Jisas i makim em long lukautim bokis mani. Jisas na ol aposel i save yusim dispela mani long baim ol samting ol i nidim taim ol i raun long mekim wok autim tok. Dispela mani i olsem ol donesen em nau yumi save kisim bilong sapotim wok autim tok long graun olgeta. Tasol bihain long sampela haptaim i lus, Judas i kirap long stil maski Jisas i mekim planti tok lukaut long abrusim gridi pasin. (Mak 7:22, 23; Luk 11:39; 12:15) Judas i no bihainim ol dispela tok lukaut.

13. Gridi pasin bilong Judas i kamap ples klia long wanem taim?

¹³ Gridi pasin bilong Judas i kamap ples klia long wanpela bung bilong kaikai; dispela samting i kamap paslain long ol man i kilim i dai Jisas. Jisas na ol disaipel bilong em, na Maria na sista bilong em Marta, ol i go kaikai long haus bilong lepraman Saimon. Long taim bilong kaikai, Maria i kisim wanpela botol sanda i gat bikpela pe tru na em i kapsaitim dispela sanda long het bilong Jisas. Judas na ol narapela disaipel i no amamas liklik long dispela samting. Ol narapela disaipel i pilim olsem ol inap salim dispela sanda na kisim mani bilong helpim wok autim tok. Tasol Judas i bel hevi bikos em i gat narapela tingting. “Em i stilman,” olsem na em i tingting long stilim mani long bokis mani. Bihain gridi pasin i kirapim Judas long givim Jisas long han bilong ol birua long pe bilong wanpela wokboi nating.—Jon 12:2-6; Mat. 26:6-16; Luk 22:3-6.

14. Tupela marit i mekim wanem bilong bihainim stiatok i stap long Luk 16:13?

¹⁴ Jisas i kirapim ol disaipel bilong em long tingim wanpela bikpela tok: “Yupela i no inap stap wokboi bilong God na Mani wantaim.” (Ritim Luk 16:13.) Dispela tok em i tru yet long nau. Skelim stori bilong tupela marit long Romania em ol i bihainim dispela tok bilong Jisas. Wanpela kampani long wanpela kantri i gat gutpela sindaun i laik givim wok mani long tupela inap sotpela taim. Tupela i tok: “Mipela i mas bekim bikpela dinau long benk, so pastaim mipela i ting dispela wok em wanpela blesing i kam long Jehova.” Tasol i gat wanpela hevi. Sapos ol i kisim dispela wok, ol bai i no gat inap taim long mekim wok bilong Jehova. So tupela i ritim dispela atikol “Stap Gut Long Jehova Wanpela Tasol” long Wastaua bilong Ogas 15, 2008, na dispela i helpim ol long mekim disisen bilong ol. Tupela i tok: “Sapos mipela i laikim planti mani moa na dispela i kirapim mipela long go wok long narapela kantri, i olsem mipela i putim pasin bilong mipela long pas gut wantaim Jehova i stap namba 2. Mipela i luksave olsem mipela i no inap pas gut moa wantaim Jehova.” Olsem na ol i tok nogat long kisim dispela wok. Wanem samting i kamap? Brata i kisim wanpela wok long kantri bilong em yet na mani em i kisim em  inap long baim ol samting ol i nidim. Sista i tok: “Oltaim Jehova i save helpim ol wokman bilong em.” Dispela tupela marit i amamas olsem ol i larim Jehova i stap olsem Bosman bilong ol, na i no mani.

15. Wai na yumi ken save olsem yumi inap sakim ol trap bilong Satan?

¹⁵ Yumi mas mekim wanem sapos yumi luksave olsem yumi gat pasin antap o gridi pasin? Yumi mas lusim ol dispela pasin! Pol i tok ol manmeri em Satan “i bin holimpas ol,” ol i ken lusim trap bilong Satan. (2 Tim. 2:26) Devit i bin mekim olsem. Em i putim yau long tok kaunsel bilong Natan, na em i tanim bel na lusim gridi pasin, na em i stretim bek pasin pren bilong em wantaim Jehova. Oltaim yumi mas tingim olsem Jehova i gat bikpela strong moa winim Satan. Sapos yumi kisim helpim i kam long Jehova, yumi inap sakim ol trap Satan i putim bilong pundaunim yumi.

16. Wanem wanpela rot tasol bilong abrusim ol trap bilong Satan?

¹⁶ I gutpela moa long yumi wok strong long abrusim ol trap bilong Satan, na yumi no ken larim Satan i trapim yumi na bihain yumi traim long lusim trap bilong em. Wanpela rot tasol bilong abrusim ol trap bilong Satan em long kisim helpim i kam long God. Yumi no ken ting olsem yumi stap strong na yumi no inap kisim pasin antap na gridi pasin! Tingim, sampela man husat i bin mekim wok bilong Jehova inap longpela taim, ol i bin mekim pasin antap na gridi pasin. So long olgeta de, beten askim Jehova long helpim yu long luksave sapos dispela 2-pela pasin nogut i wok long stiaim tingting na pasin bilong yu. (Sng. 139:23, 24) Wok strong na no ken larim pasin antap na gridi pasin i trapim yu!

17. Klostu nau wanem samting bai kamap long Satan?

¹⁷ Inap planti tausen yia, Satan i stap olsem man bilong painim abus. Tasol klostu nau ol bai pasim em long sen, na em bai bagarap na pinis olgeta. (Rev. 20:1-3, 10) Yumi laik tru long lukim dispela de i kamap. Tasol paslain long dispela de i kamap, yumi mas was gut long ol trap bilong Satan. Wok strong long sakim pasin antap na gridi pasin na bai ol i no ken bosim yu. Yu mas tingting strong long “sakim Devil, na em bai lusim [yu] na ranawe.”—Jems 4:7.