1. ¿Andichisï uaa terukutantani Satanasini imani jingoni enga animalichani jámajka jupiajka?

IMA enga animalichani jupiani jámajka, uékasïndi uándikuni o jupikani animalini ma ka para ísï úni mámaru járhati trampechani úraasïndi, komu ima járhati enga Jobueri amigu arhikata ma uandaapka (Job 18:8-10). ¿Ka ambe úsïni paraka animali ma tramparhu niáraaka? Exesïndi nani enga ísï jámajka, ambe enga tsitijka, ambe enga uaaka úrani para jupikani. Satanasi májkueni úsïndi juchantsïni jingoni. Exesïndi nani engachi ísï jámajka, ambe engachi tsitijka ka tátsekuajtsïni imani trampa jatsikuchisïndi engachi jucha no erokuarhini jarhajka. Joperujtsïni Biblia arhisïndi ambe engachi uaaka úni parachi kéndikukuarhini imeeri tramparhu. Ka engajtsïni niáraska jupikani, néna engachi uaaka uéntani tramparhu.

2. ¿Nákiskiksï tsimani trampecha enga Satanasi sánderu úraajka?

² Tsimani trampecha engaksï kánikua marhuajka Satanasini desde iónisï, jindeestiksï enga nema niárajka kʼéramakuarhini ka enga jukari uékajka jatsini ambe ma. * Ima ísïisti eska ima enga pájaruechani trampechani jatsikukuajka (Sal. 91:3). Joperuchi no jatsiska para jurajkutakuarheni parajtsïni Noambakiti támisï jánhastani imani ambe jingoni enga úrajka, jimbokajtsïni Tata Diosï Jeoba aianguskia ambe enga úrajka (2 Kor. 2:11).

3. ¿Andisï Tata Diosï Jeoba karakata jurajku Bibliarhu imeecheri ejemplu engaksï kʼéramakuarhipka ka engaksï jukari uékapka jatsini ambe ma?

³ Tata Diosï Jeobajtsïni jorhendasïndi eska kánikua no sési jarhaska kʼéramakuarhini ka jukari uékani jatsini ambe, jimbosï karakata jurajkuti ambe engaksï no sési úpka máru imeeri marhuaricha ka parachi jucha no májkueni úni. Ini ejempluecha jingoni, exeakachi eska Satanasi úspka jupiani, asta imani Tata Diosï Jeobaeri marhuarichani engaksï ióni páani japkia marhuakuni. ¿Arhikuekasïni  i ambe eskachi juchajtu niáraaka ísï úni? Nómbe. Tata Diosï Jeoba karakata jurajkuasti Bibliarhu ini ejempluechani “parajtsïni arhistachini” (1 Kor. 10:11). Mítesti eskachi uaaka jorhenguarhini ini ejempluecheri parachi no niárani Satanasiri trampecharhu o parachi úni uéntani.

4. ¿Ambechi uaa úkuarhinchani engachi kʼéramakuarhiska?

⁴ Satanasi uékasïndi eskachi kʼéramakuarhiaka, jimboka míteska eska engachi sánderu ísï jámaaka ísïiuakachi eska ima ka nóchi uaaka irekani para méntkisï (Prov. 16:18). Jimbosï Pablu uandapti eska enga nema niáraska kʼéramakuarhini májkueni ‘jusgarinhaati eska Noambakiti’ (1 Tim. 3:6, 7). Ka iáminduechachi uaaka niárani ísï jámani, no arhiparini na engachi xáni ióni páani jauakia marhuakuni Tata Diosï Jeobani.

5. Eska na arhijka Eclesiastés 7:16, 20, ¿néna xarhatasïndi kʼuiripu ma eska kʼéramakuarhisïnga?

⁵ Kʼuiripu ma enga kʼéramakuarhijka imajku pendienti pákuarhisïndi. Satanasi jánguarhintasïndi parachi juchajku pendienti pákuarhini ka no Tata Diosï Jeobani, sánderia jiáni engachi uandanhiatechani jatsiajka. Pori ejemplu, ¿ménisïchi kulparinhaski ambe ma jimbo engachi jucha no úka? ¿Nóchi jurhimbikua jingoni kánhaski? Satanasi kánikua tsípepirindi engachi Tata Diosï Jeobani jingoni ikiapiringa o juchaari erachicha jingoni. Ístu uékasïndi eskachi eratseaka eska sánderu sési jauaka ísï sési peentani uandanhiatechani na engachi jucha sánderu sési exeaka ka no ísï eskajtsïni Tata Diosï Jeoba na arhijka imeeri Karakatarhu (arhinta je Eclesiastés 7:16, 20).

6. ¿Ambejtsïni jorhendasïni pirenchiri eksperiensia?

⁶ Ju je exeni pirenchiri eksperiensia ma enga no sáni tsitienga ambe engaksï máteru erachicha no sési ueenga ka asta niáraspti nóteru uékania imeecha jingoni jarhani. Ima uandantasïndi: “Jandiajkuni pʼikuarherasïrenga ka no úsïrenga tekaakuantani ambe engaksï ueenga erachicha. Ísï jimbo, arhispka juchiiti acheeti eskachi mótsipiringa máteru kúnguarhikuarhu”. Joperu tátsekua exespti programani JW Broadcasting^®, enga marsuni 2016 jimbo uéraka, enga uandeenga néna tekaakuantani máteruechani engaksï no iámu ambe sési újka. Pirenchi uandantasïndi: “Kurhanguspka eskani enbesi de mójtakuani uékani erachichani, jatsispka parani kaxumbitini  ka jiókuarhini eskani jíjtuni ménisï no sési ambe úsïnga. Programarini jarhuataspti parani sánderu exeni ambe enga Tata Diosï Jeoba uéjka ka ístu eska sánderu jukaparhakueska imeeri juramukua”. Jiájkani, ¿ambechi jorhenguarhisïni? Engachi jatsiaka uandanhiata ma, ju je no mirikurhini Tata Diosï Jeobani ka kurhakuni eskajtsïni jarhuataaka ísï exeani erachichani eska ima na exeajka. Tata Diosï Jeoba exesïndi ambe engaksï imeecha no sési újka, joperu puákuantasïndi ka ima uékasïndi eskachi juchajtu májkueni uaaka (1 Juanu 4:20).

7. ¿Ambe úkuarhinchaspi rei Usíasi?

⁷ Judá anapu rei Usíasi niáraspti kʼéramakuarhini enga no jiókuarhipka ambe engaksï máteruecha arhipka ka niáraspti úni ambe ma enga no sésikua jatsipka. Usíasi uánikua ambe sési úspti, andaaspti uánikua guerrechani, úspti eskaksï japiringa máteru iretecha ka ístu uánikua animalichani jatsiaspti. “Tata Diosï jurhimbiti úspti eska sési nikupiringa” (2 Crón. 26:3-7, 10). Joperu Biblia uandasïndi, eska enga na uinhapikua jatsipkia, imeeri mintsitani niáraspka xáni kʼéramakuarhini enga jamberi no sési ambe úkuarhinchapka. Tata Diosï Jeoba uandaspti eskaksï saserdotichajkusï úpiringa kéjtsïtani insiensu templurhu. Jimboka xáni kʼéramakurhisïreenga, rei Usíasi insiensu uékasïrendi kéjtsïtani templurhu, ambe ma enga no sésikua jatsipka. Indeni ambe jimbo, Tata Diosï Jeoba úspti eska lepra pʼamenchapiringa. Ka ima méntkisï lepra pʼamenchaspti astaka uarhipka (2 Crón. 26:16-21).

8. ¿Nénajtsïni jarhuatasïni 1 Korintu 4:6, 7, parachi no niárani kʼéramakuarhini?

⁸ ¿Juchajtuchi uaa kʼéramakuarhini ka ísï no sési ambe niátani eska rei Usíasi? Ju je exeni Joséri ejemplu. Kánikua sési nikusïrendi imeeri negosiuecharhu ka ambakiti orhejtsïkuti máespti. Nitamataraasïreendi arhijtsïkperatechani kʼéri tánguarhikuecharhu ka sirkuitueri orhejtsïkutichaksï imani kurhamarhisïrendi ambe ma. Joperu ima uandasïndi: “Mintsinharhikuarhisïreenga imani ambe jimbo engani jorhenapka úni ka na engani xáni ióni páani japkia marhuani. Nóteruni mintsikasïreengia Tata Diosï Jeobani. Eratsesïreenga eskani úpiringa jandiajku orhepani uérani, ísï jimbo nóteruni kurhajchaaspkia Tata Diosï Jeobaeri konsejuechani”. José niáraspti kʼéri pekadu ma úni ka petanhantaspti kúnguarhikuarhu. Ka nótki xáni ióniisti enga ménderu Jeobaeri testiguekia. Ima uandasïndi: “Tata Diosï Jeobarini jorhendasti eska sánderu jukaparhakueska úni ambe engajtsïni ima arhijka ka no pribilejiu ma”. Ju je méntkisï miáni eska iámindu ambe engachi jorhenaka úni ka iámindu ánchikuarhita engachi kúnguarhikuarhu  jatsika, Tata Diosïni jimboeska (arhinta je 1 Korintu 4:6, 7). Joperu engachi kʼéramakuarhiaka, Tata Diosï Jeobajtsïni no úraati parachi marhuakuni.

9. Jimbokaksï sánderu uékasïrenga jatsini ambe ma, ¿ambeksï úspti Satanasi ka ístu Eba?

⁹ Engachi íri ambe uandajka, jamberichi Satanasini eratsejka. Enga ima Tata Diosï Jeobaeri ánjeli máepka, seguru eska ambakiti ánchikuarhitechani jatsiapka. Joperu ima sánderu ambe uékasïrendi. Uékasïreendi eska ima kómarhinhapiringa, ambe ma enga Tata Diosï Jeobajku jukanchaka. Satanasi uékasïndi eskachi ísïiuaka eska ima, jimbosï jánguarhintajti parachi jucha no tsípini jarhani imani ambe jingoni engachi jatsika. Ka primeru xanhari enga i ambe úpka, Ebani úraspti. Tata Diosï Jeoba uékperakua jingoni arhispti Ebani ka imeeri uámbani eskaksï úpiringa arhani iámindu anhatapuecheri frutani engaksï jardinirhu japka astakaksï na uiniarhapiringa, joperu eskaksï máechakueri no úpiringa arhani (Gén. 2:16). Joperu Satanasi enganiarispti Ebani ka eratsetaraspti eska úpiringa arhani imani frutani engaksï no sésikua jatsipka para arhani. Eba no agradeserispti ima ambe enga jatsipka: sánderu ambe uékasïreendi. Ka míteskachia ambe enga úkuarhipka. Eba pekarispti ka tiempu jingoni uarhisti (Gén. 3:6, 19).

10. ¿Néna ueenaspi rei Dabidi sánderu uékani jatsini ambe ma?

¹⁰ Ju je exeni ambe enga úkuarhinchapka rei Dabidi. Tata Diosï Jeoba uánikua ambe íntskuspti, jatsikuarhekua ambe, eskaksï uánikua kʼuiripuecha mítepiringa ka úspti eska andaapiringa imeeri enemiguechani. Dabidi kánikua agradesidu jarhaspti iámindu ambe jimbo ka uandaspti eska no méni úpiringa kʼamarani uandantani na enga xáni kánikua ambe íntskupka Tata Diosï (Sal. 40:5). Joperu ma xanhari, Dabidi niáraspti sánderu ambe uékani jatsini ka mirikurhispti ambe enga xáni Tata Diosï Jeoba íntskupka. Nájkiruka uánikua témbechani jatsiapka, ima ueenaspti tsitini máteru acheetiri témbani, ambe ma enga Tata Diosï Jeoba no jaiapanhentajka. Uarhiiti arhinhasïreendi Bat-Seba ka imeeri uámba Uríasi enga itita máepka. Dabidi, sánderu ambe uékasïrendi, ka ístu jándikua ambe niátaspti Bat-Sebani jingoni ka ima embarasada pakaraspti. Joperu sánderu no sési ambe niátaspti, Dabidi úspti eskaksï uándikupiringa Uríasini (2 Sam. 11:2-15). ¿Ambe eratseni japi? ¿Eratsepi eska Tata Diosï Jeoba no exexapka? Nájkiruka Dabidi xáni ióni páani japkia marhuakuni Tata Diosï  Jeobani, jukari uékaspti jatsini ambe ma ka inde ambe úspti eska kánikua no sési nikupiringa. Joperu tátsekua, Dabidi uandantaspti ambe enga no sési niátapka ka móantaspti. ¡Ka kánikua agradesidu jarhaspti enga Tata Diosï Jeoba puákuntapka! (2 Sam. 12:7-13).

11. Eska na arhijka Efesu 5:3, 4, ¿ambejtsïni jarhuataa parachi no jukari uékani jatsini ambe ma?

¹¹ ¿Ambechi jorhenguarhisïni rei Dabidiri ambe? Eska ambe engajtsïni jarhuataaka no jukari uékani jatsini ambe ma, jindeeska méntkisï agradesidu jarhani iámindu ambe jimbo engajtsïni Tata Diosï Jeoba íntskujka (arhinta je Efesu 5:3, 4). Jatsiskachi para tsípini jarhani imani ambe jingoni engachi jatsika. Juchachi jorhendaasïnga juchaari Biblieri jorhenguarhirichani paraksï eratsentani ambakiti ambe engaksï nitamakuarhika ka tátsekua agradeserikuni Tata Diosï Jeobani indeni ambe jimbo. Engaksï ísï úska pauani pauani, ma semana jimboksï, siete amberi agradeserikuati Tata Diosïni (1 Tes. 5:18). ¿Juchajtuchi májkueni úsïni? Engachi eratsentaska iámindu ambe enga Tata Diosï Jeoba úkia juchantsïni jimbo sánderuchi agradesidueuaka ka tsípinchi jauaka imani ambe jingoni engachi jatsikuarheka. Ka ísïchi no niáraaka tramparhu enga jindeeka jukari uékani jatsini ambe ma.

12. Jimboka uékasïreenga sánderu ambe jatsini, ¿ambe úspi Judasï Iskariote?

¹² Iásïchi Judasï Iskariotiri ambe uandani jauaka. Ima niáraspti jukari uékani jatsini ambe ka jimbosï traisionaripti Jesúsini. Joperu ima orheta, no xásï kʼuiripu máespti (Luk. 6:13, 16). Jimbosï Jesúsi erakupti paraka ima jindeepiringa imeeri apostuli ma. Ka xarharasïndi eska mintsikasïreenga jimboka imani patsarasïreenga sentabu enga aianhpikuarhu úrakuarhienga. Inde sentabu ísïispti eska iásï anapu donasionicha enga úrakuarhejka para interu parhakpinirhu ánchikuarhita úkuarhini. Jesúsi someni arhiasptia eskaksï jingontku jámapiringa paraksï no jukari uékani jatsini ambe ma (Mar. 7:22, 23; Luk. 11:39; 12:15). Joperu Judasï no kurhajchaspti ka ísï tátsekua ueenaspti sïpani.

13. ¿Káni ueenaspi xarhatani Judasï eska jukari uékasïrenga jatsini ambe ma?

¹³ Ante de Jesúsi uarhini, Judasï xarhatasptia eska uékasïrenga sánderu ambe jatsini. Simoni enga lepra pʼamenchapka, pʼímarhispti imeo Jesúsini ka imeeri chúxapatichani ka ístuksï jima jarhaspti Maríani ka imeeri ermana jémbani Marta. Engaksï na tʼireni japkia María jauaraspti ka atajtsïkuspti Jesúsini aseiti ma enga kánikua jukaparhapka. Judasï ka máteru Jesúsiri chúxapatichaksï ikiaspti. Jamberiksï Jesúsiri chúxapaticha eratsepti eska inde sentabu úpiringa úrakuarheni para aianhpikua. Joperu Judasï máteru ambe jimbosï ikiani japti: ima sïpatspeni jámasïreendi ka ima uékasïrendi sentabu sïpani. Ísï no ióni jimbo, Judasï traisionarispti Jesúsini, xáni sentabu jimbo na enga xáni jukaparhapka jántspiri ma jimboka ima uékasïreenga sánderu ambe jatsini (Juanu 12:2-6; Mat. 26:6-16; Luk. 22:3-6).

14. ¿Néna ísï úspi temungurhiri ma ambe enga uandajka Lukasʌ 16:13?

¹⁴ Jesúsi miátaantaspti imeeri chúxapatichani arini jukaparhakua ambe: “Nójtsï uaaka marhuakuni Diosïni ka ístu jatsikuarhekuani” (arhinta je Lukasʌ 16:13). Ju je exeni na engaksï Rumania anapu temungurhiri ma úpka ambe enga Jesúsi uandapka, jiáni engaksï ánchikuarhita ma aiaminhapka máteru paisirhu enga sánderu jatsikuarhenhaka, uandantasïndiksï: “Jatsispkachi para kánikua sentabu maiampini bankurhu. Ísï jimbo, ísïchi exespka eska í ánchikuarhita Tata Diosï Jeobaeri kóntperata máespka”. Joperu jarhaspti ambe ma: ánchikuarhita úpirindi eskaksï nóteru xáni tiempu jatsipiringia para Tata Diosï Jeobani marhuakuni. Tátsekuaksï exespti ambe engaksï úpiringa úni engaksï arhintapka ini jorhenguarhikuani “Mantengámonos leales con un corazón unificado”, enga uéraka rebistarhu La Atalaya 15 de agostu 2008 jimbo. Imeechaksï uandantasïndi: “Engachi mótsïpiringa máteru paisirhu nomasi parachi sánderu  sentabu andani, nóteruchi úpiringia sési marhuakuni Tata Diosï Jeobani, seguruchi jarhaspka eska i ambe úpiringa eskachi nóteru sési pájperapiringia imani jingoni”. Ísï jimbo, nóksï jiókuarhispti indeni ánchikuarhitani. Tátsekua erachi exentaspti ánchikuarhita ma imani paisirhu engaksï irekani japka paraksï úni nitamakuarhini. Pirenchi uandasïndi: “Tata Diosï Jeoba méntkisï jarhuataasïndi imeeri marhuarichani”. Tsimarhanksï kánikua tsípixati enga imeecheri patroni jindeeka Jeoba ka no sentabu.

15. ¿Andichisï seguru jaki eskachi uaaka uéntani Satanasiri trampecharhu?

¹⁵ ¿Ka engachi kuenta íntskukuarheskia eskachi kʼéramakuarhisïnga o jukari uékani jatsini ambe ma? ¿Uaachi sïpakuarhini? Jo, jimboka Pablu uandaspka eska imeecha engaksï jupikanhajka Noambakitiri tramparhu uaakaksï uéntani tramparhu (2 Tim. 2:26). Inde ambesï úpti Dabidi: kurhajchaspti Natani enga jurhimberantapka ka móantaspti enga ísï no sési niátapka ka úspti ménderu sési pájperantani Tata Diosï Jeoba jingoni. Nóchi méni mirikurhiaka eska Tata Diosï Jeoba sánderu uinhapitiska eska Satanasi. Engachi jurajkuska eskajtsïni jarhuataaka uaakachi kéndikukuarhini náki uéjki tramparhu engajtsïni Noambakiti jatsikuchiaka.

16. ¿Ambejtsïni jarhuataa no niárani Satanasiri trampecharhu?

¹⁶ Ísïisti, sánderu sésisti engachi no niáraaka Satanasiri trampecharhu eska uéntani. Ka i ambe solu Tata Diosï Jeobaeri jarhuajperata jingonchi uaaka ísï úni. Ísï jimbo, ju je no eratseni eskachi no méni niáraaka ísï úkuarhinchani. Astaksï Tata Diosï Jeobaeri marhuaricha engaksï ióni páani japkia marhuakuani niárasptiksï kʼéramakuarhini oksï sánderu uékaspti jatsini ambe ma. Ísï jimbo, ju je pauani pauani kómarhini Tata Diosï Jeobani parakajtsïni jarhuataaka exeni sinchi ueenaskia ísï eratseni ka jámani (Sal. 139:23, 24). Ju je jánguarhintani parachi no méni niárani Satanasiri trampecharhu.

17. ¿Ambe úkuarhinchaa no ióni jimbo Noambakiti, enga jindeeka juchaari enemigu?

¹⁷ Desde iónisï, Satanasi uékasïndi jupikaani kʼuiripuechani. Joperu no ióni jimbo ima jupikanhaati ka tátsekua kʼamajkunhani (Jaŋ. 20:1-3, 10). ¡Uékaxakachia eska niáraakia inde jurhiatikua! Enga jamberi inde jurhiatikua niáraaka ju je jingontku jarhani parachi no niárani imeeri trampecharhu. Jánguarhintaakachi xáni eskachi xáni uaaka parachi no niárani kʼéramakuarhini o jukari uékani jatsini ambe ma. Ju je jánguarhintani úni eska na arhijka i konseju: “Asï jiókuarhi je Noambakitini ka ísïksïni ima kéndikuchiati” (Sant. 4:7).