1. Habwaki nitusobora kulengesaniza Sitaani n’omuhiigi?

OMUHIIGI agonza kukwata rundi kwita ekisoro. Nasobora kukozesa emitego erukwahukana nk’oku omu h’abanywani ba Yobu ayayefoire ngu aizire kumuhuumuza yagambire. (Yob. 18:8-10) Omuhiigi nasobora kuleetera ata ekisoro kugwa omu mutego gwe? Abanza kumanya kurungi ebirukukwata ha kisoro eki. Kikira kugenda nkaha? Kigonza ki? Mutego ki omurungi ogw’arakozesa? Sitaani ali nk’omuhiigi ogu. Abanza kutwegaho. Ayetegereza nambere tugenda hamu n’ebitugonza. Hanyuma atutega omutego ogw’arukunihira ngu nigwija kutukwata tutakimanyire. Baitu Baibuli n’etugumya ngu kakuba atukwata, nituba nitukyasobora kuruga omu mutego gwe. Kandi etwegesa n’omulingo tusobora kwerinda kukwatwa emitego ye.

2. Mitego ki ebiri ey’ekyakizireyo kukorra Sitaani?

² Emyehembo hamu n’omururu eri mitego ebiri ey’ekyakizireyo kukorra Sitaani. * Kumara enkumi n’enkumi y’emyaka, Sitaani aikaire n’akozesa emiringo enu embi. Ali nk’omuhiigi w’ebinyonyi ow’abisikiiriza biije omu mutego gwe rundi omu kitimba. (Zab. 91:3) Baitu nitusobora kwerinda Sitaani kutukwata. Habwaki? Habwokuba Yahwe atwolekere emitego Sitaani ey’akozesa.​—2 Kol. 2:11.

3. Habwaki Yahwe yataire omu Baibuli ebyokurorraho eby’abantu abamu ab’emyehembo hamu n’ab’omururu?

³ Omulingo gumu Yahwe ogw’akozesa kutwoleka akabi akali omu myehembo hamu n’omururu nugwo ogw’okutwekambisa kwegera ha byokurorraho eby’abaheereza be abaakara. Nitwija n’okurora omulingo Sitaani yasoboire kukwata abamu h’abaheereza ba Yahwe abakaba bamuheriize kumara akasumi kaingi. Hati, eki nikimanyisa ngu titurukusobora kwerinda emyehembo  hamu n’omururu? Nangwa. Yahwe akateeka ebyokurorraho binu omu Baibuli “obwokutuhabura itwe.” (1 Kol. 10:11) Akimanyire ngu nitusobora kwegera ha byokurorraho binu, omulingo tusobora kwerinda rundi kuruga omu mitego ya Sitaani.

4. Kiki ekirugamu obutufooka ab’emyehembo?

⁴ Sitaani nagonza tufooke ab’emyehembo. Akimanyire ngu kakuba twikiriza kufooka ab’emyehembo nitwija kufooka nka uwe kandi tufeerwe obwomeezi obutahwaho. (Nfu. 16:18) Nahabweki, omukwenda Paulo akahabura ati omuntu nasobora “okwehemba nokugwa omu musango gwa Setani.” (1 Tim. 3:6, 7) Eki nikisobora kuhikaho buli omu wena haliitwe n’obukiraaba ngu tuli bahyaka omu mananu rundi tumazire akasumi kaingi nituheereza Yahwe.

5. Nk’oku kyolekerwe omu Omugambizi 7:16, 20, omuntu nasobora kwoleka ata emyehembo?

⁵ Abantu ab’emyehembo begonza bonka. Obuturukuba twine ebizibu, Sitaani alengaho kutuleetera kwegonza itwenka, kandi n’okwetekerezaaho ekihunguraine kukira kutekerezaaho Yahwe. Ekyokurorraho, bakuhangiriire? Rundi bakutwaize omu mulingo ogutali gw’obwinganiza? Sitaani nagonza obihirirwe Yahwe rundi ekitebe kye. Kandi Sitaani nagonza otekereze ngu omulingo gwonka ogw’okumaraho ekizibu eki, nugwo ogw’okukora iwe eky’orukutekereza ngu kihikire omu kiikaro eky’okuhondera oburagirizi Yahwe obw’arukutuha omu Kigambo kye.​—Soma Omugambizi 7:16, 20.

6. Kiki eky’osobora kwega omu kyokurorraho ekya munyaanya itwe kuruga omu Netherlands?

⁶ Tekerezaaho ekyokurorraho kya munyaanya itwe kuruga omu Netherlands ay’akwatiirwe abandi ekiniga habw’ensobi zaabo. Akacwamu ngu enyikara egi akaba atakyasobora kugigumira. Munyaanya itwe onu nagamba ati: “Nkehurra nyine amasu kandi nkehurra ngu nkaba ntasobora kubaganyira. Nkagambira iba nyowe tufuruke tugende omu kitebe ekindi.” Hanyuma akarora puroguraamu eya JW Broadcasting^® eya Maaci 2016. Puroguraamu enu ekaba n’eha amagezi ha mulingo tusobora kukwatamu obutahikirra obw’abantu abandi. Munyaanya itwe onu nagamba: “Nkakyetegereza  ngu nkaba nyine kwebundaaza kandi n’okutekerezaaho ensobi ezange, omu kiikaro eky’okulengaho kuhindura ab’oruganda na banyaanya itwe omu kitebe. Puroguraamu enu ekankonyera kuteeka omutima hali Yahwe kandi n’okukimanya ngu nuwe asemeriire kutugambira eky’okukora.” Ensonga nogirora? Obw’otunga ekizibu, omutima ikara ogutaire hali Yahwe. Mwesengereze akukonyere kurora abandi nk’oku uwe abarora. So ow’omu iguru arora ensobi zaabo baitu aikiriza kubaganyira. Naiwe n’agonza nukwo okole oti.​—1 Yoh. 4:20.

7. Kiki eky’ahikire hali Omukama Uziya?

⁷ Emyehembo ekaleetera Omukama Uziya owa Yuda kwanga kuhuliiriza obuhabuzi kandi n’okwetumiisiriza. Uziya akakora ebintu bingi kurungi. Akasinga obulemu bwingi, yayombeka embuga nyingi, kandi akaba aine emisiri nyingi. “Ruhanga yamuhaga omugisa.” (2 Byom. 26:3-7, 10) Baitu Baibuli n’egamba eti: “Obuyafookere ow’amaani, akatunga emyehembo omu mutima gwe ekyamurugiiremu ebizibu.” Yahwe akaba aragiire ngu banyakatagara bonka nubo bakaba basemeriire kuhayo emyamirro ha yekaru. Baitu Uziya aketumiisiriza yagenda omu yekaru kuhayo emyamirro. Yahwe eki kitamusemeze kandi yateera omusaija onu ow’emyehembo ebigenge. Uziya akasigara ali mugenge obwomeezi bwe bwona.​—2 Byom. 26:16-21, NW.

8. Kusigikirra ha 1 Abakolinso 4:6, 7, nitusobora tuta kwerinda kufooka ab’emyehembo?

⁸ Nikisoboka naitwe kufooka ab’emyehembo kandi tukasiisa nk’Omukama Uziya? Ego, tekerezaaho ekyokurorraho kya José. Akaba aine bizineesi ey’erukukurakurana kurungi kandi akaba ali mugurusi w’ekitebe ayateekwamuga ekitiinisa. Yahaga embazo ha nsorrokano enkooto ez’ekiro kimu hamu n’ez’ebiro bisatu kandi n’abaroleerezi b’ebicweka bamwehanuzaahoga. Nagamba ati: “Baitu nkesiga amagezi hamu n’obukugu bwange. Yahwe nkamuteeka ha rubaju. Nkateekereza ngu ndi w’amaani nahabweki ntahuliirize okuhaburwa hamu n’okuhanwa kwa Yahwe.” José akakora ekibi eky’amaani kandi yabingwa omu kitebe. Emyaka nyingi enyuma akagaruka omu kitebe. Hati nagamba ati: “Yahwe anyegeseze ngu tikiri kikuru kuba n’obujunanizibwa, baitu ekikuru kiri kukora Yahwe eby’aturagira.” Leka twijuke ngu ebintu byona ebitukora, rundi obujunanizibwa obututunga omu kitebe, biruga hali Yahwe. (Soma 1 Abakolinso 4:6, 7.) Obuturaaba twine emyehembo, Yahwe tarukwija kutukozesa.

9. Omururu gukaleetera Sitaani na Hawa kukora ki?

⁹ Obutubazaaho omururu, kyanguhire kutekerezaaho Sitaani. Nk’omu ha bamalaika ba Yahwe, Sitaani nateekwa kuba akaba aine obujunanizibwa bwingi kandi oburungi. Baitu akaba nagonza ebirukukiraho. Akaba nagonza kuramibwa ekintu ekisemeriire Yahwe wenka. Sitaani nagonza tufooke nka uwe, nahabweki atuleetera kwehurra ngu ebintu ebitwine tibirukutumara. Omurundi ogw’okubanza obuyalengereho kukora kinu, nubwo obuyabalize na Hawa. Yahwe habw’okugonza, akaba ahaire Hawa hamu na iba ebyokulya ebirukumara. Baali basemeriire kulya “ha muti gwona ogwomu rugonjo” oihireho gumu gwonka. (Kub. 2:16) Baitu nabwo, Sitaani akabiihabiiha Hawa yamuleetera kutekereza ngu akaba nayetaaga kulya na ha muti ogubaatangirwe. Hawa akalemwa kumarwa eby’akaba aine, akaba nagonza ebirukukiraho. Tumanyire biki eby’arugiremu. Hawa akasiisa kandi hanyuma yafa.​—Kub. 3:6, 19.

10. Kiki eky’abaireho, Omukama Daudi obuyafookere ow’omururu?

¹⁰ Omururu gukaleetera Omukama Daudi kwebwa Yahwe eby’akaba amuhaire, otwaliiremu itungo, kuranganwa, hamu n’okusingura abanyanzigwa be baingi. Daudi habw’okusiima akakyetegereza ngu ebisembo bya Ruhanga “tibyakusoboire okubarwa!” (Zab. 40:5) Baitu haroho akasumi Daudi obuyayeberwe Yahwe eby’akaba amuhaire. Akaba atakyamarwa eby’akaba aine; akaba nagonza ebirukukiraho. N’obukiraaba ngu Daudi akaba aine abakazi baingi, akaikiriza okwegomba okubi okwokuba na mukabandi kukura omu mutima gwe. Omukazi ogu akaba nuwe Basiseba, kandi iba akaba nuwe Uliya Omuhiti. Daudi habw’okwegonza wenka, akaterana na Basiseba kandi yatwara enda. Daudi ekiyakozere kikaba kibi muno, baitu hanyuma akakora n’ekibi ekindi ekirukukiraho. Daudi akakora n’entekaniza ey’okwita Uliya! (2 Sam. 11:2-15) Manya Daudi akaba n’atekereza ki? Boojo akatekereza ngu Yahwe akaba atarukurora eby’arukukora? Nobukiraaba ngu Daudi akaba aheeriize Yahwe kumara akasumi kaingi, akafooka w’omururu kandi kinu kyamurugiramu okubonabona kwingi. Baitu ekirungi, obwire bukahika, Daudi yaikiriza ensobi ye kandi yayegarukamu. Akasiima muno Yahwe habw’okumuganyira!​—2 Sam. 12:7-13.

11. Kusigikirra ha Abefeso 5:3, 4, kiki ekisobora kutukonyera kurwanisa omururu?

¹¹ Kiki ekiturukwega omu kyokurorraho kya  Daudi? Nitwega ngu nitusobora kurwanisa omururu kakuba twikara nitusiima Yahwe habw’ebintu byona eby’atuhaire. (Soma Abefeso 5:3, 4.) Tusemeriire kumarwa ebintu ebitwine. Obututandika kwegesa abantu Baibuli, nitusobora kubegesa kutekerezaaho ekintu kimu ekirungi Yahwe eky’abahaire kandi n’okukimusiimira. Kakuba omuntu akora eki buli kiro kumara wiiki, nikimanyisa ngu asabireho ebintu musanju ebirukwahukana. (1 Bas. 5:18) Naiwe okora ekintu nikyo kimu? Obw’orayecumitirizaaho ebintu byona Yahwe eby’akukoliire, nikiija kukuleetera kuba muntu arukusiima. Obworafooka omuntu arukusiima, noija kumarwa eby’oine. Kandi obworamarwa eby’oine, torukwija kufooka w’omururu.

12. Omururu gukaleetera Yuda Isikalyota kukora ki?

¹² Omururu gukaleetera Yuda Isikalyota kufooka muntu mubi muno kandi n’okugobeza Yesu. Ha kubanza akaba atali mubi. (Luk. 6:13, 16) Yesu akamukoma kuba omu h’abakwenda be. Yuda akaba ali muntu ow’obujunanizibwa kandi Yesu yamwesigaga. Enu niyo ensonga habwaki yakomerwe kurolerra akasanduuko ka sente. Yesu hamu n’abakwenda bakozesaaga sente ezi kusasurra ebyetaago byabo omu mulimo ogw’okutebeza. Sente ezi zaali nizisisana na sente ezihebwayo kusagika omulimo ogw’ensi yoona kasumi kanu. Baitu hanyuma y’akasumi, Yuda akatandika kwiba n’obukiraaba ngu yaikaraga n’ahurra Yesu n’ahabura abantu kwerinda omururu. (Mar. 7:22, 23; Luk. 11:39; 12:15) Yuda atatekeho omutima okuhabura oku.

13. Nidi Yuda obuyayolekere ngu akaba afookere w’omururu?

¹³ Yuda akooleka nk’oku akaba afookere w’omururu, Yesu obwakaba ali haihi kwitwa. Yesu hamu n’abegeswa be, otwaliiremu Malyamu na Maliza baali babungiire omusaija omugenge ayayetwaga Simoni. Obu bakaba nibalya ekiihuro, Malyamu akaimuka yaseesa amagita agarukuboya kurungi kandi aga sente nyingi ha mutwe gwa Yesu. Yuda hamu n’abegeswa abandi bakabihirwa muno. Abegeswa abandi nibasobora kuba bayehuliire ngu sente ezi zakukozesiibwe kukora ekintu ekindi eky’omugaso omu buheereza. Baitu Yuda we, akaba aine ekigendererwa kye ekindi. “Akabali musuma,” kandi akaba n’agonza kwiba sente kuruga omu kasanduuko. Hanyuma, omururu gukaleetera Yuda kugobeza Yesu ha muhendo ogubaguraga omwiru.​—Yoh. 12:2-6; Mat. 26:6-16; Luk. 22:3-6.

14. Kiki ow’oruganda na mukazi we ekibakozere habw’okworobera obuhabuzi obuli omu Luka 16:13?

¹⁴ Yesu akaijukya abahondezi be amananu ganu: “Timurukusora okukorra Ruhanga [n’itungo].” (Soma Luka 16:13.) N’omu kasumi kanu, ebigambo ebi bikyali by’amananu. Ekyokurorraho, wetegereze omulingo ow’oruganda na mukazi we omu Romania baataire omu nkora ebigambo bya Yesu. Bakaheebwa omulimo ogw’akaire kake omu ihanga erikurakuraine kukira ery’abo. Nibagamba ngu: “Tukaba twine looni ey’amaani omu bbanka, nahabweki ha kubanza tukatekereza ngu omulimo gunu mugisa kuruga hali Yahwe. Baitu hakaba haroho akatego. Kakuba baikiriize omulimo ogu, bakaba nibaija kutunga obwire buke muno obw’okuheereza Yahwe. Hanyuma y’okusoma ekicweka omu Watchtower eya Agusto 15, 2008 ekiine omutwe “Linda Obwesigwa Oine Omutima Oguteraniziibwe Hamu” bakakora encwamu. Bakagamba ngu: “Kakuba ekigendererwa kyaitu ekikuru eky’okugenda omu ihanga erindi kyali eky’okukora sente nyingi, kyakumanyisize ngu enkoragana yaitu na Yahwe tugitaire omu kiikaro kyakabiri. Tukaba nitukigumya ngu enkoragana yaitu na Yahwe ekaba negenda kusisikara.” Nahabweki bakanga kugenda. Kiki eky’abaireho? Ow’oruganda akasobora kutunga omu mulimo omu ihanga ly’abo ogw’abakonyire kutunga ebyetaago byabo. Mukazi we nagamba ati: “Yahwe naija kwikara nakonyera  abaheereza be.” Ow’oruganda na mukazi we banu baine okusemererwa kwingi habwokuba bakafoora Yahwe Mukama wabo hatali sente.

15. Habwaki nitukigumya ngu nikisoboka kuruga omu mitego ya Sitaani?

¹⁵ Kiki ekitusemeriire kukora kakuba tukyetegereza ngu tufookere ab’emyehembo rundi ab’omururu? Nitusobora kukora empindahinduka! Paulo akagamba ngu abo Sitaani “abakwasire bali bomeezi” nibasobora kuruga omu mutego gwe. (2 Tim. 2:26, NW) Kinu nikyo kyahikire hali Daudi, akahuliiriza okuhanwa okw’amaani okwa Nasani, yayegarukamu habw’omururu gwe kandi yagarraho enkoragana ye na Yahwe. Oikale n’okiijuka ngu Yahwe w’amaani kukira Sitaani. Nahabweki kakuba twikiriza obukonyezi bwa Yahwe, nitusobora kuruga omu mutego gwona ogwa Sitaani.

16. Kiki ekiratukonyera kwerinda emitego ya Sitaani?

¹⁶ Kyakubaire kirungi twerindire kimu emitego ya Sitaani omu kiikaro ky’okugirugamu hanyuma y’okugigwamu. Eki nitusobora kukikora habw’obukonyezi bwa Ruhanga bwonka. Baitu titusemeriire kutekeereza ngu tuli b’amaani muno kandi ngu titusobora kufooka ab’emyehembo rundi ab’omururu. N’abaheereza ba Yahwe abakaba bamazire akasumi kaingi nibamuheereza nabo bakafooka ab’emyehembo rundi ab’omururu. Nahabweki, emiringo enu embi obweraaba etandikire kusiisa entekereza n’ebikorwa byawe, wesengereze Yahwe butoosa kukukonyera. (Zab. 139:23, 24) Wekambe muno kutafooka w’emyehembo rundi ow’omururu!

17. Omu kasumi akatali kahara, kiki ekirahika ha munyanzigwa waitu Sitaani?

¹⁷ Kumara enkumi n’enkumi z’emyaka, Sitaani aikaire ali muhiigi, baitu omu kasumi akatali kahara naija kukwatwa kandi hanyuma ahwerekerezebwe. (Kus. 20:1-3, 10) Tulindiriire ekiro eki n’ekihika kingi, baitu akasumi ako katakahikire ikara oli bulindaara nukwo otagwa omu mitego ya Sitaani. Wekambe muno kutafooka w‘emyehembo rundi ow’omururu. Cweramu kimu ‘kurwana na Setani, kandi ali kwiruka.’​—Yak. 4:7.