1. Ngei Sathani eciezaniswa ne muvhimisi?

MUVHIMISI wese uno cinangwa cimwe basi—kubata kana kuuraya cinyama caanoda. Kuti azviite, iyena ungaseenzesa mirau yakasiyana-siyana yakaita hingana ye madzishamwari ekunyepa a Djobo. (Djo. 18:8-10) Muvhimisi unoitei kuti aunzise cinyama pa mirau yake? Iyena unofunda mushobo we cinyama cakhona. Cinoenda kupi? Cinodei? Ndaizocibata kudini cisikakariri? Sathani wakaitawo hingana muvhimisi. Sathani unotifunda. Iyena unoona katinoenda uye zvatinoda. Hino, iyena unokanda murau ecikarira kuti ucatibata paya patisikakariri. Kunyazi zvakadaro, Bhaibheri rinotigondesa kuti, kunyazi tikabathwa nge mirau ya Sathani, tingakwanisa kupukunyuka. Kusiya izvona, Bhaibheri rinotifundisawo zvatingaita kuti tisabathwe nge mirau iyona.

2. Mirau ipi miiri inoseenzeswa ndi Sathani?

² Sathani unoseenzesa mirau miiri inobudirira: Kudzikudza uye makaro. * Sathani waano makore akawanda eciseenzesa mirau iyona. Iyena wakaita hingana mutei we shiri unokweera shiri kuti iende pa mirau kana kuti mukati me mambure. (Pis. 91:3) Asi isusu atidikani kubathwa ndi Sathani. Ngei? Ngekuti Djehovha wakatipangidza mirau inoseenzeswa ndi Sathani.—2Ako. 2:11.

3. Ngei Djehovha wakakanda mu Bhaibheri miezaniso yakaitika mu upenyu?

³ Djehovha unotifundisa kuti tisawire mu murau we kudzikudza uye we makaro. Umwe mushobo waanozviita nge wekuseenzesa miezaniso yakaitika mu upenyu. Mu fundo ino, ticaona miezaniso dzimweni. Imwimwi mucakwanisa kuona kuti Sathani wakakwanisa kutobata anhu aiseenzera Djehovha ke makore akawanda. Izvi zvirikuda kubhuya kuti atibetseri here? Haiwa.  Djehovha wakakanda miezaniso idzi mu Bhaibheri kuti “dzitingwadze.” (1Ako. 10:11) Iyena unoziya kuti miezaniso idzi dzingatibetsera kuti titize kana kuti tisawire mu mirau ya Dhiyabhorosi.

4. Cinyi cingaitika kana tikadzikudza?

⁴ Sathani unoda maningi kuti tinyanye kudzikudza. Iyena unoziya kuti kana tikasiya kuti kudzikudza kugare matiri, isusu ticagara hingana iyena uye toruza mukana wekurarama upenyu usikaperi. (Zvie. 16:18) Ndiyo ndaa, muphostori Pauro wakati kuno ngozi yekuti munhu ‘akurirhwe ngekudzikudza uye owira mu mutongo wakaezana na Dhiyabhorosi.’ (1Ti. 3:6, 7) Izvi zvingaitika ku umwe na umwe wedu, kunyazi taano makore akawanda teciseenzera Djehovha kana kuti haiwa.

5. Maererano na Muparidzi 7:16, 20, munhu ungadzikudza kudini?

⁵ Kudzikudza mushobo wekudzida. Uye Sathani unoedza kuticinja kuti tigare anhu anonyanya kudzida kudarika Djehovha, kunyanya patinosongana ne zvinetso. Nge muezaniso, makambopumhwa ciro camusikazi kuita here? Kana kuti makambobatwa zvisina unatsi here? Sathani waizopfara kumuona mecipumha Djehovha kana hama dzenyu. Uye Dhiyabhorosi unoda kuti muite zviro zvakamunakira pano kupurutana nhumgamiriro dza Djehovha pamwepo ne Soko rake.—Erengai Muparidzi 7:16, 20.

6. Mafundei ne muezaniso we hanzvadzi imweni ye ku Holanda?

⁶ Onai zvakaitika ne hanzvadzi imweni ku Holanda. Iyona yakashatirhwa nge zvishaishi zve hama dze mu ungano. Hino, iyena wakasanangura kusama kushamwaridzana nawo. Iyona inoti: “Inini ndaizwa ndiri ndega uye ndainga ndisikakwanisi kucinja muitiro wangu. Uye ndakatobvunza mwamuna wangu kuti ticinje ungano.” Hino, ndakaona JW Broadcasting^® ra Mauwe ra 2016. Broadcasting iri, rakapa mazano okuti ndingagarisana kudini nokusama kukwana ke amweni. Hanzvadzi iyona yakati: “Ndakawona kuti ndaidikana kugara munhu unodzidodosa, pane kugara  ndecicinja hama mu ungano, ndaidikana kunyasa kuona zvishaishi zvangu. Urongwa we Broadcasting wakandibetsera kurangarira nge zva Djehovha uye ne ucangamire wake.” Mazwisisa fundo here? Pamunosongana no cinetso, ringirai kuna Djehovha. Kumbirai kuti iyena amubetse kuona amweni hingana maonero aanowaita. Ari kudenga, Djehovha unokwanisa kuona zvishaishi zve anhu ese, kunyazi zvakadaro, wakagadzirira kuwarekerera. Uye iyena unoda kui imwimwi muitewo zvimwezvo.—1Ju. 4:20.

7. Cinyi cakaitika na Mambo Uziya?

⁷ Nge ndaa yekudzikudza, Mambo Uziya we ku Djudha aazi kupurutana mazano uye wakaita ciro caainga asina citenderhwa cekuzviita. Uziya wainga ari munhu uno ungwaru. Iyena waiwina mu hondo, mu mabasa e zvekuwaka uye mu basa rezvekurima. “Mwari we cokwadi wakaita kuti abudirire.” (2 Mak. 26:3-7, 10) Asi Bhaibheri rinoti: “Paakandotanga kugara ne simba, mwoyo wake wakadzikudza zvikamuita kuti adziparadze.” Djehovha wainga akatoreketa kare mu mutemo kuti apristi ndiwona basi aidikana kupisira rusenzi mu tempro. Asi Mambo Uziya waidziona hingana wainga ano citenderhwa ici, wakapinda mu tempru uye wakapisira ruseenzi. Djehovha wakatsamwira mwanarume uu waidzikudza uye wakamufura nge mapere. Uziya wakarumbwa ano mapere ke upenyu wake wese.—2 Mak. 26:16-21.

8. Maererano na 1 Akorinti 4:6, 7, cinyi cingatibetsera kuti tisadzikudze?

⁸ Kodi kudzikudza kungatiitirawo murau hingana zvakaitika na Uziya here? Onai muezaniso wa Zuzee. Iyena wainga ano bhizi raibudirira, uye waiseenza hingana mukuru we ungano. Iyena waiita mharidzo mumagungano uye waitopsvakiwa no muonereri we nharunda kuti amukumbire mazano. Asi Zuzee wakatendera kuti: “Inini ndainyanya kudzigonda maningi uye ndakasiya kugonda Djehovha. Ndaidziwona hingana ndakabamba uye ndainga ndisikapurutani nhungamiriro uye mazano a Djehovha,” Zuzee wakaita cishaishi cakakura uye wakadzingwa. Iyena wakahwirinzwa mu makore manganani akadarika. Nyamasi uno, Zuzee unoti: “Djehovha wakandifundisa kuti cinokosha akureremedzwapi, asi kuita zvatinokumbirhwa na Djehovha.” Atidikani kukanganwa kuti, tese isusu pano zvatinokwanisa kuita uye makomborero atinawo zvipo zva Djehovha.  (Erengai 1 Akorinti 4:6, 7.) Kana tikadzikudza, Djehovha aazombotiseenzesi.

9. Makaro akandunda Sathani na Evha kuti aitei?

⁹ Patinorangarira nge zve makaro, pamweni tinoedzurira nge zva Sathani Dhiabhorosi. Pamweni, iyena wainga ano ubaba wakakura. Kana tikada kuona, iyena wainga ari ngirozi ya Djehovha. Asi Sathani waida zvakawanda kudarika apona. Iyena waida kunamatwa kunodikana kuizirhwa Djehovha basi. Sathani unoda kuti tigare hingana iyena, hino iyena unoedza kuita kuti isusu tione hingana kuti zviro zvatinazvo azvitikwaniri. Iyena wakatanga kuseenzesa murau uu paakareketa na Evha. Djehovha wainga akapasa Evha no mwamuna wake zvekurhya zvakawanda uye zvinonaka. Awona aikwanisa kurhya—“micero ye miti yese” Kusiya umwe basi. (Ge. 2:16) Kunyazi zvakadaro, Sathani wakakwanisa kuita kuti Evha atendere kurhya mucero umwe basi waainga asikadikani kurhya. Evha aazi kukoshesa zvaainga aanazvo, iyena waidazve kudarika apona. Uye isusu tinozviziya kuti zvakazogumira papi. Evha wakaita citema uye pakupedzesera wakafa.—Ge. 3:6, 19.

10. Mambo Dhavhidhi wakawira kudini pa murau we makaro?

¹⁰ Nge ndaa ye makaro, Mambo Dhavhidhi wakakanganwa zvese zvaainga apaswa: upfumi, mbiri uye kukunda mu hondo dzakawanda na Djehovha. Dhavhidhi waiziya kuti makomborero a Mwari ainga “asikaerengeki” uye waitenda ndizvona. (Pis. 40:5) Asi pa nguwa dzimweni, Dhavhidhi wakakanganwa zvaainga apaswa ndi Djehovha. Iyena wainga asikacapfari ndizvo, uye waida zvakawanda kudarika apona. Kunyazi wainga no akadzi amweni, Dhavhidhi wakatanga kugara no cido cakashata mu mwoyo make cekuda mukadzi we munhu umweni. Mwanakadzi wakhona waizwi Bate-Seba uye mwamuna wakhona wainga ari Uriya mu Hitita. Ecindundwa nge kunyanya kudzida, Dhavhidhi wakaita uhure na Bate-Seba uye iyena wakabata pa muiri. Pakutunhudzira pa citema cekuita uhure, Dhavhidhi wakapsvaka mazano e kuuraya Uriya! (2Sa. 11:2-15) Dhavhidhi waimborangarirei? Iyena waiona hingana kuti Djehovha wainga asikazvioni here? Museenzi uya wakagondeka wa Djehovha, wakawira mu makaro nokudzida uye zvakamunetsera maningi. Asi zvinopfadza kuti Dhavhidhi wakapupura  citema caakaita uye wakacinyuka. Iyena wakatenda maningi nge kurekererhwa kaakaizwa na Djehovha!—2Sa. 12:7-13.

11. Maererano na Aefeso 5:3, 4, cinyi cicatibetsera kuti tisabatwe ne mirau ye makaro?

¹¹ Tafundei pa muezaniso wa Dhavhidhi? Kuti tisawire pa murau we makaro, tinodikana kurumbwa tecitenda Djehovha nge zvese zvaakatipasa. (Erengai Aefeso 5:3, 4.) Tinodikana kupfara nge zvese zvatinazvo. Patinotanga kuitisa fundo ye Bhaibheri, kajinji tinokohomedzesa mufundi kuti arangarire nge zve cikomborero caanonga atambira kubva kuna Djehovha uye atende Djehovha ndizvona. Mufundi paanoita izvona pa sumana, iyena unonga akwanisa kunamata nge zve zviro zvinomwe zvakasiyana. (1Ate. 5:18) Madini kuitawo zvimwezvo? Kurangarira zvese zvamunoizirhwa na Djehovha, zvicamubetsera kuti murumbwe mecitenda. Kana mukatenda, mucapfara nge zvamunazvo. Uye kana mukapfara nge zvamunazvo, amuzobatwi nge mirau ye makaro.

12. Makaro akaita kuti Djudha Iskarioti aitei?

¹² Makaro akaita kuti Djudha Iskarioti agare mupanduki. Asi andizvopi zvaainga ari mukutanga. (Ru. 6:13, 16) Djesu wainga akatomusanangura kuti agare umwe we aphostori. Djudha wainga ari munhu wakakwaniriswa uye wakagondeka, zvikaita kuti iyena agare mucengeti we bhokisi re mare. Djesu no aphostori aiseenzesa mareyo kuti akwanisi kuiseenzesa pa basa rawo rekuparidzira. Zvezvirokwazvo, mare yainga iri mucibhokisi icona, yainga yakaita hingana mupiro unoizwa nyamasi kuitira kuriritira basa ro mu nyika yese. Asi pa nguwa imweni, Djudha wakatanga kuba mareyo, kunyazi Djesu ainga areketa kakawanda nge zve ngozi ye makaro. (Mk. 7:22, 23; Ru. 11:39; 12:15) Djudha aazi kubata nge nyara mbiri masoko a Djesu.

13. Makaro a Djudha akazobuda rini pamhene?

¹³ Makaro a Djudha akabuda pamhene panguwa imweni Djesu asati afa. Djesu ne afundi ake, kutobatanidzawo Mariya uye no hanzvadzi yake Marita ainga apikwa kuti aende ku nyumba ka Simão, mwanarume wainga no mapere. Paainga ecirhya, Mariya wakamuka odururura mafuta anonuhwirira uye anodhura maningi mu musoro wa Djesu. Djudha no afundi amweni akatsamwa maningi nazvo. Pamweni afundi amweni, aiona kuti mare iyona yaikwanisa kuseenzeswa zvakanaka mu basa rekuparidzira. Asi Djudha, wainga ano cinangwa cakasiyana. Iyena “wainga ari mbavha,” uye waida kuba mare mu cibhokisi. Nokuhamba ke nguwa ecindundhwa nge makaro, Djudha wakatengesa Djesu nge mutengo we museenzi.—Ju. 12:2-6; Mt. 26:6-16; Ru. 22:3-6.

14. Kazado ii yakaseenzesa kudini zano riri pana Ruka 16:13?

¹⁴ Djesu wakaedzurira ateeri ake cokwadi cinokosha cekuti: “Amungakwanisi kuseenzera Mwari uye no upfumi.” (Erengai Ruka 16:13.) Cokwadi ici acizi kucinja. Onai kuti kazado imweni ye Romênia yakaseenzesa kudini zano ra Djesu. Awona akapikwa kuti aende koseenza basa ke cinguwa cidoko ku nyika yakabudirira. Awona anoti: “Isusu tainga tino magaa ataidikana kuhwirinzira bhanku, mukutanga taiona hingana kuti basa iri rainga riri cikomborero ca Djehovha. Asi painga pano cineso, basa iri raizowapingaidza pa basa rawo kuna Djehovha. Hino kazado ii yakaerenga musoro waiti: “Isa Mwoyo Wako Pachinhu Chimwe Chete Kuti Urambe Wakavimbika” uri mu Murindiri wa 15 ya Katutu ya 2008, (mu ciShona), izvi zvakaabetsera kusanangura zvekuita. Kazado ii inoti: “Kudai cinangwa cedu ce koseenza ku nyika imweni cainga ciri cokuda kuwina mare yakawanda, izvona zvaizopangidza kuti ukama wedu na Djehovha, wainga uri pa mbuto yocipiri.  Isusu tainga tino rugondo rekuti kunamata kedu kaizopingaidzika.” Hino awona akaramba basero. Cinyi cakazoitika? Mwamuna wakazogumira basa raimupasa mare yaaida mu nyika yakemo kamare. Mukadzi wake unoti: “Nyara ya Djehovha aimbozi kudodoka.” Kazado ii iri kupfara nge kusanangura Djehovha haiwa mare kuiita Tenzi.

15. Ngei tecigonda kuti tingapukunyuka pa mirau ya Sathani?

¹⁵ Kana tikaona kuti tasungwa nge mirau ya Sathani ye kudzikudza uye makaro? Tingakwanisa kupukunyuka! Pauro wakati aya “anobathwa” ndi Dhiyabhorosi anokwanisa kupukunyuka pa mirau yake. (2Ti. 2:26) Ndizvona zvakaitika na Dhavhidhi. Iyena wakazwa paakasumururhwa ndi Natanieri, wakacunyuka pa makaro aainga anawo uye wakahwirirazve kugara no ukama wake na Djehovha. Musambokanganwe kuti Djehovha anosimba kudarika Sathani. Hino, kana tikatendera rubetso ra Djehovha, tingakwanisa kupukunyuka pa murau upi hawo watingakhandirhwa na Sathani.

16. Cinyi cicatibetsera kuti tisawire mu mirau ya Sathani?

¹⁶ Tinodikana kurhwisa kuti tisawire pa mirau ya Sathani. Ticazvikwanisa no rubetso ra Djehovha. Asi atidikani kusenga nyara! Kunyazi anhu akatoseenzera Djehovha ke makore akawanda, akazoguma pakugara anhu anodzikudza uye ano makaro. Ndiyo ndaa, deketerai kuna Djehovha mazuwa ese mecikumbira kuti amubetsere kuona kuti marangariro enyu uye zviito zvenyu zvinondundhwa nge zviro izvi zvakashata here. (Pis. 139:23, 24) Musambotendere kuti kudzikudza uye makaro amusunge!

17. Cinyi cicaitika no muzondi wedu Dhiyabhorosi?

¹⁷ Kaakuita makore akawanda Sathani eciita hingana muvhimisi. Asi nokukasika, iyena ucasungwa uye pakupedzesera ucaparadzwa. (Zva. 20:1-3, 10) Tiri kuetsera nguwa ii no mupfaro. Dakara zuwa irona, garai makangwarira kuti musawire mu mirau ya Sathani. Itai ne pamunokwanisa napo kuti musawire pa mirau yekudzikudza uye makaro. Rumbwai makashinga “pakurhwisana na Dhiyabhorosi uye iyena ucamutiza.”—Tg. 4:7.