XCHANOBIL 24
Xuʼ xijatavutik lokʼel li ta spetsʼ Satanase
«[Jatavkutik] lokʼel li ta spetsʼ Diabloe» (2 TIM. 2:26).
KʼEJOJ 36 Jchabi li koʼntontike
LI KʼUSI TA JCHANTIKE *
1. ¿Kʼuxi xkoʼolaj-o ta jun jnutsol li Satanase?
LI KʼUSI oy ta yoʼonton jun jnutsole jaʼ ti stsak jkotuk chonbolome o ti smile. Sventa spas yuʼun taje, tstunes ep ta tos petsʼetik, jech kʼuchaʼal laj yal li jun yamigo Job ta alele (Job 18:8-10). ¿Kʼuxi tsloʼla li jkot chonbolom sventa stsʼuj li ta petsʼe? Baʼyel tskʼel butik ta xanav, kʼusi lek chaʼi xchiʼuk bakʼin xuʼ chʼayal yoʼonton tsta. Jaʼ jech tspas li Satanas eke. Yuʼun baʼyel tskʼel kʼusitik ta jpastik, butik chijbat xchiʼuk kʼusitik ta jkʼupintik. Vaʼun, jaʼo tsyakutik kʼalal chʼayal koʼontontike. Pe li Vivliae chalbutik kʼusi skʼan jpastik sventa mu xijtsʼuj li ta spetsʼtake xchiʼuk chalbutik kʼusi xuʼ jpastik mi tsʼujemutik xae.
Li petsʼetik ti lek tunem yuʼun Satanase jaʼ li toybaile xchiʼuk li pichʼ oʼontonale. (Kʼelo parafo 2). *
2. ¿Kʼusi jaʼ li chaʼtos spetsʼtak Satanas ti lek tunem talel yuʼune?
2 Li spetsʼtak Satanas ti lek tunem talel yuʼun ta epal jabile jaʼ li toybail xchiʼuk li pichʼ oʼontonale. * Xkoʼolaj kʼuchaʼal jun jyakmut ti tsloʼla li kʼusi tskʼan tsyake (Sal. 91:3). Pe mu xijlaj ta loʼlael, yuʼun li Jeovae yalojbutik li kʼusitik tstunesane (2 Kor. 2:11).
Li loʼiletik chal ta Vivliae tskoltautik yoʼ mu xijtsʼuj li ta spetsʼ Satanase o sventa xuʼ xijatavutik lokʼel. (Kʼelo parafo 3). *
3. ¿Kʼu yuʼun laj yakʼ ta tsʼibael Jeova ta Vivlia ti oy buchʼutik lik stoy sbaik xchiʼuk ti oy kʼusi la xpichʼ oʼontaike?
3 Li Jeovae chalbutik ti toj xibal sba li toybail xchiʼuk li pichʼ oʼontonale. Jaʼ yuʼun, chalbutik li kʼusi kʼot ta stojolal junantik yajtuneltak sventa mu jechuk jpastik eke. Te chkakʼtik venta ti lajik ta loʼlael yuʼun Satanas li buchʼutik jal xa tunemik tal ta stojolal Jeovae. ¿Mi jaʼ skʼan xal ti jech chijlaj ta loʼlael eke? Moʼoj. Li Jeovae laj yakʼ ta tsʼibael ta Vivlia «sventa jpʼijubtasobiltik» (1 Kor. 10:11). Snaʼoj ti oy kʼusi xuʼ jchantik li ta loʼiletik taje, vaʼun jaʼ jech muʼyuk chijtsʼuj li ta spetsʼ Diabloe o ti xijatavutik lokʼele.
LI TOYBAILE
Kʼelo parafo 4
4. ¿Kʼusi xuʼ xkʼot ta jtojolaltik mi lik jtoy jbatike?
4 Li Satanase tskʼan ti xlik jtoy jbatike. Yuʼun snaʼoj ti mi jech la jpastike xijkoʼolaj kʼuchaʼal li stuke xchiʼuk muʼyuk xa ta jtatik li kuxlejal sbatel osile (Prov. 16:18). Jaʼ yuʼun, li Pabloe xi tspʼijubtas mi oy buchʼu lik stoy sbae: «[Chichʼ] chapanel jech kʼuchaʼal laj yichʼ chapanel li Diabloe» (1 Tim. 3:6, 7). Taje xuʼ jech chkʼot ta jtojolaltik jkotoltik, mu ventauk mi jal xa kocheltik ta mantal o muʼyuk to.
5. Jech kʼuchaʼal chal Eklesiastes 7:16 xchiʼuk 20, ¿kʼu yelan xvinaj li buchʼu tstoy sbae?
5 Li buchʼu tstoy sbae jaʼ noʼox tspas li kʼusi lek chaʼi stuke. Li Satanase tskʼan ti jaʼuk jpastik li kʼusi lek chkaʼi jtuktike, maʼuk li kʼusi tsnop Jeovae, mas to jech tskʼan ta jnoptik kʼalal oy jvokoltike. Jech kʼuchaʼal liʼe, ¿mi oy buchʼu sjutoj jmultik? ¿Mi oy kʼusi chopol kichʼojtik pasbel? Li Satanase tskʼan ti jaʼuk xkakʼbetik smulin Jeova o li kermanotaktike. Jech xtok, tskʼan tstikʼ ta jnopbentik ti jaʼ noʼox xchapaj-o jvokoltik mi la jpastik li kʼusi lek chkaʼitike, ti maʼuk ta jsaʼtik li beiltaseletik chakʼ Jeova ta Vivliae (kʼelo Eklesiastes 7:16, 20).
6. ¿Kʼusi chakʼ jchantik li kʼusi kʼot ta stojolal li ermana ti te nakal ta Países Bajos?
6 Jkʼeltik kʼusi kʼot ta stojolal jun ermana ti te nakal ta Países Bajos ti chopol tajek chil li kʼusi mu lekuk tspas li ermanoetike. Ta tsʼakale, solel mu xa skʼan xchiʼinan. Xi chale: «Jtuk tajek chkaʼi jba. Jaʼ noʼox ta jkʼelbe spaltail li ermanoetike. Jaʼ yuʼun, laj kalbe jmalal ti akʼo jel jtsobobbailkutike». Vaʼun, la skʼel li programa ta JW Broadcasting® ta marso ta 2016 ti te chal kʼusi xuʼ jpastik mi chopol chkiltik li kʼusi mu lekuk tspas yantike. Xi to chal li ermanae: «Laj kaʼibe smelolal ti skʼan bikʼit chkakʼ jbae xchiʼuk ti oy onoʼox jpaltail eke, maʼuk ti xkakʼ persa jelbe stalelal li ermanoetike. Li videoe la skoltaun sventa jechuk jnop kʼuchaʼal li Jeovae xchiʼuk ti jaʼ oy sderecho sventa xal li kʼusi skʼan jpastike». ¿Kʼusi chakʼ jchantik taje? Kʼalal oy jvokoltike, jkʼanbetik koltael Jeova sventa jechuk xkiltik li ermanoetik jech kʼuchaʼal chil stuke. Li Jtotik ta vinajele yilojbe li spaltailike, pe chakʼanan ta perton xchiʼuk tskʼan ti jechuk jpastik eke (1 Juan 4:20).
Kʼelo parafo 7
7. ¿Kʼusi kʼot ta stojolal li ajvalil Usiase?
7 Li ajvalil ta Juda ti Usias sbie lik spʼaj tukʼibtasel kʼalal lik stoy sbae xchiʼuk lik spas li kʼusi maʼuk oy ta sba spasele. Lek xuʼ yuʼun li Usiase. Yuʼun la xchapan soltaroetik sventa xbatik ta paskʼop, oy kʼusitik la svaʼan xchiʼuk la xchapan abtelaletik sventa tsʼunolajel ta osiltik. «Ep kʼusitik akʼbat yuʼun li melel Diose» (2 Kron. 26:3-7, 10). Pe li Vivliae chal ti «kʼalal la stsak lek yipe, lik stoy sba ti jaʼ noʼox la sta-o svokole». Li Jeovae yaloj ti jaʼ noʼox xuʼ x-och xchikʼik pom ta templo li paleetike, pe jaʼ jech la spas li jtoyba ajvalil Usias eke. Jaʼ yuʼun, li Jeovae laj yak’be svokol ta lepra. Li Usiase jech-o ip ta lepra jaʼ to ti kʼuxi chame (2 Kron. 26:16-21).
8. ¿Kʼuxi tskoltautik 1 Korintios 4:6 xchiʼuk 7 sventa mu jtoy jbatike?
8 ¿Mi xuʼ van jech chlik jtoy jbatik kʼuchaʼal li Usiase xchiʼuk ti jpas jmultike? Jkʼeltik li kʼusi kʼot ta stojolal Jose ti toj lek chbat yuʼun li kʼusi tspas ta yabtele, jaʼ jun mol ta tsobobbail ti lek tsakbil ta ventae, chetʼes mantaletik ta asamblea xchiʼuk oy kʼusitik chjakʼbat yuʼun li jkʼelvanejetik ta sirkuitoe. Pe xi chal ta jamale: «Jaʼ la jpat koʼonton li ta jpʼijil jtuke xchiʼuk li kʼusitik jchanoj tale, jaʼ muʼyuk la jtsak ta venta li Jeovae. La jnop ti lek tsotsun ta mantale, jaʼ yuʼun muʼyuk la jtsak ta mukʼ li pʼijubtaseletik xchiʼuk li tojobtaseletik laj yakʼbun Jeovae». Tsots la spas smul li Josee xchiʼuk laj yichʼ lokʼesel ta tsobobbail. Pe oy xa ta sjayibaluk jabil sut tal ta mantal. Xi chale: «Li Jeovae laj yakʼbun kil ti jaʼ mas tsots skʼoplal ti jpastik li kʼusi tskʼanbutike, maʼuk li kʼusi xijtojob spasele». Mu me xchʼay ta joltik ti jaʼ yakʼoj jpʼijiltik li Jeovae xchiʼuk li matanaletik yakʼojbutik ta tsobobbaile (kʼelo 1 Korintios 4:6, 7). Pe mi jtoybautike, muʼyuk me tstunesutik li Jeovae.
LI PICHʼ OʼONTONALE
Kʼelo parafo 9
9. ¿Kʼusi la spas Satanas xchiʼuk Eva ta skoj ti oy kʼusi la xpichʼ oʼontaike?
9 Jaʼ van chtal ta joltik Satanas kʼalal chkalbetik skʼoplal li pichʼ oʼontonale. Kʼalal jaʼ toʼox jun yaj-anjel Jeovae, ep kʼusitik la skʼupin spasel. Pe mu baluk laj yaʼi taje, yuʼun tskʼan ti jechuk xichʼ ichʼel ta mukʼ kʼuchaʼal li Jeovae. Li Satanase tskʼan ti jechuk jtalelaltik eke, jaʼ yuʼun oy kʼusitik tspas sventa mu junuk koʼontontik yuʼun li kʼusitik oy kuʼuntike. Jaʼ jech la spas ta stojolal li Evae. Albatik yuʼun Jeova ti xuʼ sloʼik skotol li sat teʼetik te ta nichimaltike, jaʼ noʼox jpets teʼ ti mu xuʼ slobeik sate (Jen. 2:16). Pe li Satanase la sloʼla li Evae xchiʼuk laj yakʼbe xchʼun ti akʼo sloʼ li sat teʼ ti mu stakʼ slajesike. Li Evae muʼyuk tsots skʼoplal laj yil li kʼusi oy yuʼune. Jaʼ yuʼun, la spas li kʼusi toj chopole xchiʼuk ta mas tsʼakale cham (Jen. 3:6, 19).
Kʼelo parafo 10
10. ¿Kʼusi kʼot ta pasel kʼalal oy kʼusi lik xpichʼ oʼonta li ajvalil Davide?
10 Kalbetik skʼoplal li ajvalil Davide. Ep kʼusitik akʼbat yuʼun li Jeovae, jech kʼuchaʼal skʼulejal, lek laj yichʼ ojtikinel xchiʼuk la stsal epal yajkontratak. Li Davide la stojbe ta vokol li Diose xchiʼuk laj yal ti mu xlaj ta chapel yuʼun ti kʼusitik akʼbateme (Sal. 40:5). Pe ta tsʼakale, oy kʼusi lik xpichʼ oʼonta li Davide xchiʼuk chʼay xaʼi li kʼusi akʼbatem yuʼun Jeovae. Akʼo mi ep xa ox yajniltak, lek laj yilbe yajnil yan vinik, taje tsatsal mulil chil li Jeovae. Li antse Bat-Seba sbi xchiʼuk li smalale jaʼ sbi Urias ti jaʼ j-et vinike. Li Davide jaʼ noʼox la snop li kʼusi tskʼan stuke, la xchiʼin ta vayel li Bat-Sebae xchiʼuk la xchiʼin yol yuʼun. Pe maʼuk noʼox, yuʼun laj yal mantal sventa xichʼ milel li Uriase (2 Sam. 11:2-15). ¿Mi laj van snop ti muʼyuk yiloj Jeova li kʼusi tspase? Akʼo mi jal xa ox tukʼ tunem tal ta stojolal Jeova, jaʼ bat ta yoʼonton li kʼusi tskʼan stuke xchiʼuk li kʼusi la xpichʼ oʼontae, vaʼun tsots la snuptan-o svokol. Pe ta mas tsʼakale, laj yal ta jamal li smule xchiʼuk la sutes yoʼonton. ¡La stojbe tajek ta vokol Jeova ti akʼat ta pertone! (2 Sam. 12:7-13).
11. Jech kʼuchaʼal chal Efesios 5:3 xchiʼuk 4, ¿kʼusi xuʼ skoltautik sventa mu kʼusi jpichʼ oʼontatike?
11 ¿Kʼusi chakʼ jchantik li kʼusi kʼot ta stojolal Davide? Jaʼ ti skʼan jtojbetik-o ta vokol Jeova li kʼusitik yakʼojbutik sventa muʼyuk kʼusi jpichʼ oʼontatike (kʼelo Efesios 5:3, 4). Skʼan ti xijmuyubajuk noʼox ta sventa li kʼusitik oy kuʼuntike. Li buchʼutik ta jchanubtastik ta Vivliae chkalbetik ti akʼo snopbeik skʼoplal li kʼusitik lek oy yuʼunike, vaʼun ti stojbeik ta vokol li Jeovae. Mi jech tspasik jujun kʼakʼale, oy me vuktos kʼusitik tstojbeik ta vokol Jeova li ta jun xemanae (1 Tes. 5:18). ¿Mi ta jnopbetik skʼoplal ek li kʼusi spasoj Jeova ta jtojolaltike? Mi jech la jpastike, mas me chlokʼ ta koʼontontik stojbel ta vokol xchiʼuk xijmuyubaj noʼox ta sventa li kʼusi oy kuʼuntike. Vaʼun, muʼyuk kʼusi ta jpichʼ oʼontatik.
Kʼelo parafo 12
12. ¿Kʼusi la spas Judas Iskariote ta skoj ti oy kʼusi la xpichʼ oʼontae?
12 Jaʼ xa kalbetik skʼoplal li Judas Iskariotee. Toj echʼ noʼox chopol ti kʼu yelan laj yakʼ ta kʼabal li Jesuse, pe maʼuk toʼox jech stalelal (Luk. 6:13, 16). ¿Kʼu yuʼun ti jech chkaltike? Yuʼun li Jesuse la stʼuj sventa xkʼot ta yajtakbol. Jech xtok, spatoj yoʼonton ta stojolal, yuʼun laj yakʼbe sbain snakʼel li takʼin ti tstunesik sventa cholmantale. Li takʼin taje xkoʼolaj kʼuchaʼal li matanal takʼin chichʼ akʼel avi sventa li abtelal ta spʼejel balumile. Ep ta velta albatik yuʼun Jesus ti skʼel sbaik sventa muʼyukuk kʼusi xpichʼ oʼontaike (Mar. 7:22, 23; Luk. 11:39; 12:15). Pe muʼyuk la stsak ta venta li Judase, yuʼun ta tsʼakale lik elkʼajuk.
13. ¿Bakʼin vinaj ti chpichʼ oʼonta takʼin li Judase?
13 Kʼalal jutuk xa ox skʼan xichʼ milel li Jesuse, vinaj ti chpichʼ oʼonta takʼin li Judase. Li Simon ti ip toʼox ta leprae la stak ta ikʼel ta sna li Jesus xchiʼuk yajchankʼoptake, ti te oyik li Maria xchiʼuk li xvix Martae. Kʼalal jaʼo chveʼike, li Mariae lik smalbe ta sjol Jesus jun muil aseite ti toyol tajek stojole. Li jchankʼopetike chopol laj yilik ti jech la spase, yuʼun laj van snopik ti jaʼuk lek ti yichʼuk tunesel sventa cholmantal li takʼine. Pe li Judase ilin, «yuʼun jaʼ jun j-elekʼ» ti tskʼan chelkʼan li takʼin te skʼejojik ta kaxae. Ta tsʼakal xtoke, la xchon batel Jesus ta skoj ti la xpichʼ oʼonta takʼine (Juan 12:2-6; Mat. 26:6-16; Luk. 22:3-6).
14. ¿Kʼuxi laj yakʼ ta xkuxlejalik jun nupultsʼakal li kʼusi chal ta Lukas 16:13?
14 Li Jesuse xi la svulesbe ta sjol li yajchankʼoptake: «Mu me xuʼ xatunik ta smoso Dios xchiʼuk ta smoso Kʼulejal» (kʼelo Lukas 16:13). Taje muʼyuk jelem-o. Jkʼeltik kʼuxi laj yakʼ ta xkuxlejalik jun nupultsʼakal ta Rumania li kʼusi laj yal Jesuse. Jun veltae, albatik abtel ta jun lum ti bu oy mas stakʼinike. Xi chalike: «Ta skoj ti ep toʼox kilkutik ta vankoe, la jnopkutik ti jaʼ sbendision Jeova ti jech laj kichʼkutik albel abtele». Pe mi la xchʼamike, muʼyuk xa mas yorail yuʼunik sventa xtunik ta stojolal Jeova. Jaʼ yuʼun, oy kʼusi kʼot ta nopel yuʼunik kʼalal laj xa ox xchanik li mantal ti xi sbie: «Tukʼuk xchiʼuk junuk koʼonton chkakʼ jbatik» ti lokʼ li ta revista Li Jkʼel-osil ta toyol ta 15 yuʼun agosto ta 2008. Xi to chalike: «Mi ta skoj noʼox pas kanal takʼin ti chibatkutik ta naklej ta yan lume, jaʼ xa chkom ta patil kuʼunkutik li Jeovae. Jnaʼojkutik ti xuʼ xilubtsajkutik-o ta mantale». Jaʼ yuʼun, muʼyuk la xchʼamik li abtelale. Ta tsʼakale, li ermanoe la sta yabtel te noʼox ta slumal ti xtoj-o li kʼusitik chtun yuʼunike. Xi chal li ermanae: «Ta onoʼox xkoltavan li Jeovae». Xmuyubajik tajek xchaʼvoʼalik ti jaʼ chtunik ta stojolal Jeovae xchiʼuk ti mu jaʼuk mosoinatik yuʼun li kʼulejale.
MU ME XIJTSʼUJ LI TA SPETSʼ SATANASE
15. ¿Kʼu yuʼun xuʼ xijatavutik lokʼel li ta spetsʼ Satanase?
15 ¿Ati mi laj kakʼtik venta ti lik xa jtoy jbatik o ti oy kʼusi yakal ta jpichʼ oʼontatike? ¿Mi xuʼ to jel jtalelaltik? Xuʼ, yuʼun li Pabloe laj yal ti xuʼ xijatavutik lokʼel li ta spetsʼtak Satanase (2 Tim. 2:26). Jaʼ jech la spas li Davide: kʼalal albat mantal yuʼun li Natane, la sutes yoʼonton xchiʼuk lek laj yil sba xchiʼuk Jeova yan velta. Teuk ta joltik ti jaʼ mas tsots sjuʼel li Jeova kʼuchaʼal li Satanase, jaʼ yuʼun xuʼ skoltautik lokʼel li ta spetsʼ Satanase.
16. ¿Kʼusi xuʼ jpastik sventa mu syakutik li Satanase?
16 Jaʼ onoʼox mas lek ti mu xkakʼ jbatik ta yakel yuʼun li Satanase. Tspas me kuʼuntik mi tskoltautik li Diose. Pe skʼan ti mu jpat koʼontontik ta jtojolal jtuktike, yuʼun junantik ermanoetik ti jal xa yochelik ta mantale lik stoy sbaik xchiʼuk oy kʼusi lik xpichʼ oʼontaik. Jaʼ yuʼun, jkʼanbetik koltael Jeova jujun kʼakʼal sventa xakʼ kiltik mi jaʼ xa jech jtalelaltik ek (Sal. 139:23, 24). Kakʼtik persa sventa mu syakutik li Satanase.
17. ¿Kʼusi poʼot xa chkʼot ta stojolal li Satanase?
17 Ta smilal xa noʼox jabil yakal chyakvan talel li Satanase. Pe poʼot xa chichʼ chukel xchiʼuk ta xichʼ lajesel ta j-echʼel (Apok. 20:1-3, 10). ¡Ta jkʼantik xa tajek ti xkʼot ta pasel taje! Pe yoʼ to mu xkʼot ta pasele, kichʼ jpʼijiltik sventa mu xijtsʼuj li ta spetsʼtake. Kakʼtik persa sventa mu xlik jtoy jbatik xchiʼuk ti mu kʼusi jpichʼ oʼontatike. Kakʼ ta jkuxlejaltik li tojobtasel liʼe: «Kontrainik li Diabloe, vaʼun chjatav lokʼel ta atojolalik» (Sant. 4:7).
KʼEJOJ 127 Ti kʼu yelan skʼan jtalelale
^ par. 5 Li Satanase xkoʼolaj kʼuchaʼal jun jnutsol ti snaʼ lek kʼu yelan tsyakutike, mu ventauk kʼu xa sjalil yakal chijtun ta stojolal Jeova. Li ta xchanobil liʼe, ta jkʼeltik kʼu yelan tstikʼ ta koʼontontik li toybail xchiʼuk li pichʼ oʼontonal sventa mu xa lekuk xkil jbatik xchiʼuk li Jeovae. Jech noxtok, ta jkʼeltik kʼuxi tsʼujik ta spetsʼ Satanas junantik krixchanoetik xchiʼuk ta jkʼeltik kʼusi xuʼ jpastik sventa mu jechuk xkʼot ta jtojolaltik.
^ par. 2 LIʼE TSOTS SKʼOPLAL: Li toybail chalbe skʼoplal li xchanobil liʼe jaʼ kʼalal ta jnoptik ti jaʼ mas tsots jkʼoplaltik kʼuchaʼal yantike; xchiʼuk li pichʼ oʼontonale jaʼ kʼalal ta jkʼantik tajek li takʼine, li chiʼinejbail ta vayele, ti xkichʼtikuk ojtikinele xchiʼuk yan kʼusitik ti muʼyuk leke.
^ par. 53 LI KʼUSI XVINAJ TA LOKʼOLETIKE: Jun ermano mu skʼan tojobtasel ta skoj ti tstoy sbae. Jun ermana oy to kʼusitik tskʼan tsman akʼo mi ep xa kʼusitik smanoj.
^ par. 55 LI KʼUSI XVINAJ TA LOKʼOLETIKE: Lik stoy sba li jun yaj-anjel Dios xchiʼuk li ajvalil Usiase. Ta skoj ti oy kʼusi lik xpichʼ oʼontaike, li Evae la slajes jpʼej sat teʼ ti albil mu xuʼ sloʼike, li Davide mulivaj xchiʼuk Bat-Seba xchiʼuk li Judase laj yelkʼan takʼin.
