1. Маин Шайтан пӧйшурасьлы кельше?

 ПӦЙШУРАСЬЛЭН ужпумез — пӧйшурез кутыны яке виыны. Со понна со пӧртэм сьӧлтэтъёсты уже кутэ. Куд-огъёсыз сярысь Библиын но гожтэмын (Иов 18:8—10). Нош мар каре пӧйшурась, пӧйшур сьӧлтэтэ мед сюроз шуыса? Со солэсь сямъёссэ эскере, тодыны турттэ, кытын со улэ но кыӵе сиён солы кельшоз. Шайтан но озьы ик лэсьтэ. Со милемыз эскере. Со саклыксэ висъя, кытчы ми ветлӥськомы, мар милемлы тунсыко потэ. Шайтан пуктэ сыӵе сьӧлтэтъёсты, кудъёсаз, солэн малпамезъя, ми малпамтэ шорысь сюрыны быгатомы. Озьы ке но Библия милемыз оскытэ: Шайтан милемыз кутӥз ке но, ми солэсь мозмытскыны быгатомы. Со сяна, Библия возьматэ, Шайтанлэн сьӧлтэтъёсызлэсь ми палэнскыны но быгатӥськомы шуыса.

2. Кыӵе кык сямъёс Шайтанлэн тужгес но яратоно сьӧлтэтъёсыз пӧлы пыро?

² Шайтанлэн тужгес но яратоно сьӧлтэтъёсыз пӧлысь кыкез — вылтӥяськон но тырмостэм сямъёс b. Кӧня ке сюрс аръёс ӵоже ини Шайтан та урод сямъёсты уже кутэ. Тылобурдо кутылӥсь сямен, Шайтан адямиосты та сьӧлтэтъёсы кыске (Иер. 5:26). Но та уг возьматы, ми солэн сьӧлтэтъёсаз одно ик сюромы шуыса. Малы? Малы ке шуоно Иегова милемлы валэктэ, кыӵе амалъёсты Шайтан уже кутэ (2 Кор. 2:11).

3. Малы Иегова сюлмаськиз, Библиын вылтӥяськись но тырмостэм сямо адямиос сярысь гожтэмын мед луоз шуыса?

 ³ Вылтӥяськон но тырмостэм сямъёслэсь алон понна, Иегова милесьтым мылкыдмес ӝутэ малпаськыны сыӵе адямиос сярысь, кудъёсызлэн таӵе сямъёссы вал. Учыръёсысь, кудъёссэ ми та статьяын эскеромы, адӟиське, Шайтан аслаз сьӧлтэтъёсаз кутыны быгатӥз соосты но, кинъёс кема дыр ӵоже Иеговалы ужазы-тыршизы. Возьматэ-а со, ми Шайтанлэн сьӧлтэтъёсызлэсь палэнскыны ум быгатэ шуыса? Уг, уг возьматы. Иегова сюлмаськиз, сыӵе адямиослэн учыръёссы Библиын «асьмелы... алон понна гожтэмын» мед луозы шуыса (1 Кор. 10:11). Инмар тодэ, ми шонер йылпумъянъёс лэсьтомы но Шайтанлэн сьӧлтэтъёсызлэсь палэнскыны яке отысь мозмытскыны быгатомы шуыса.

4. Кытчы вуттэ вылтӥяськон?

⁴ Шайтанлэн потэ, ми вылтӥяськисесь мед луомы шуыса. Со тодэ: ми вылтӥяськыны кутскимы ке, соку со кадь луомы но пырак улыны луонлыкез ыштомы (Мад. 16:18). Апостол Павел христианъёсты алӥз, соослы, кинъёс вылтӥяськыны кутскозы, Шайтанлы кадь ик приговор ялэмын луоз шуыса (1 Тим. 3:6, 7). Таӵе сьӧлтэтэ ми пӧлысь котькудӥз сюрыны быгатэ: соос но, кинъёс алигес зэмлыкен тодматскизы, озьы ик соос но, кинъёс трос аръёс ӵоже Иеговалы ужало-тыршо ини.

5. Екклесиастын 7:16, 20 верамъя, кызьы ассэ возе вылтӥяськись адями?

⁵ Вылтӥяськись адями ассэ гинэ яратэ. Шайтанлэн потэ, ми асьмелы гинэ саклык мед висъяломы, нош Иеговалы медам висъялэ шуыса, тужгес но соку, куке шуг-секытъёсын пумиськиськомы. Шуом, тӥледыз шонертэм янгыше уськытӥзы яке тӥ шонерлыктэм ужен пумиськиды. Мар тӥ кароды? Шайтан шумпотоз, та учырын тӥ Иеговаез яке солэсь организацизэ янгыше уськытӥды ке. Шайтанлэн потэ, тӥ мед малпалоды, та шуг-секытэз сэрттыны-пертчыны тӥ асьтэос гинэ быгатоды, нош Иеговалэн кивалтэтэз, кудӥз солэн Кылаз гожтэмын, тӥледлы уз юртты шуыса. (Лыдӟе Екклесиастэз 7:16, 20.)

6. Малы ми дышетскыны быгатӥськомы Нидерландыысь одӥг сузэрлэсь?

 ⁶ Эскеромы Нидерланды шаерысь одӥг сузэрлэсь учырзэ. Со йыркуръяське вал мукет адямиослэн тырмымтэоссы понна. Одӥг пол со малпаз, мае ке но воштыны кулэ шуыса. Со вера: «Мон шӧдӥ, мон воксё огнам шуыса. Мыным туж секыт вал аслэсьтым шӧдонъёсме вормыны. Соин ик мон картэлы верай, милемлы мукет кенеше выжоно шуыса». Собере со учкиз интернет-телевидениысьтымы 2016-тӥ арын южтолэзь понна поттэм программаез. Отын сётӥськизы визь-кенешъёс со сярысь, кызьы асьмеды возёно, куке мукетъёсызлэсь тырмымтэоссэс адӟиськомы. Сузэр азьланьтэ: «Мон валай: кенешысь вын-агайёсты но сузэр-апайёсты воштыны тыршем интые, мыным зӥбыт-востэм луоно но аслэсьтым янгышъёсме адӟыны тыршоно. Та юрттӥз мыным нырысь ик Иегова сярысь но солэн кивалтэтэз сярысь малпаськыны». Малы милемыз дышетыны быгатэ та учыр? Милемлы кинэн ке тупаса улыны секыт ке, Иеговалы вазиськоно но солэсь сюлворыса юрттэт куроно мукетъёсыз шоры со кадь учкыны. Инмысь Атаймы адямиослэсь янгышъёссэс адӟе ке но, со соосты простить карыны дась. Инмар возьма, ми но асьмеды озьы ик возёмы шуыса (1 Иоанн 4:20).

7. Мар луиз Озия эксэен?

⁷ Иудеяысь Озия эксэй вылтӥяськеменыз сэрен визь-кенешез палэнтӥз но ас вылаз оскиськиз. Озия умой кивалтӥсь вал. Со туж быгатыса ожъёсты но пуктӥськон ужъёсты нуиз, пудо вордӥз но музъем вылын ужаз. Библиын гожтэмын: «Инмар солы юрттылӥз» (2 Пар. 26:3—7, 10). Но собере вераське: «Кужмо луэм бераз со вылтӥяськыны кутскиз но, со сое быронэ нуиз». Озия эксэй лэсьтӥз сое, мае солы лэсьтыны уг яра вал. Со Иеговалэн храмаз курбон сётон ӝӧк вылын фимиамез ӵындытыны турттӥз, нош Законъя сое лэсьтыны священникъёслэн гинэ правозы вал. Иегова Озияез вылтӥяськемез понна кыл кутытоно луиз: Озиялэн «кулытозяз гижлочерез ӧз быры» (2 Пар. 26:16—21).

8. Кызьы кылъёс, кудъёсыз гожтэмын 1 Коринфъёслы 4:6, 7, юрттозы милемлы вылтӥяськонлэсь палэнскыны?

⁸ Озия сямен, быгатӥськомы-а ми но вылтӥяськон сьӧлтэтэ сюрыны? Эскеромы Хосе агайлэсь учырзэ. Со ужбергатӥсь вал — солэн ужъёсыз умой мынӥзы. Кенешын со тӧро луыса ужаз-тыршиз, вын-агайёс но сузэр-апайёс сое гажазы. Хосе конгрессъёсын речьёс  вералляз, нош ёросэз чакласьёс пӧртэм юанъёс пумысен соин кенешо вал. Хосе вера: «Мон ас вылам но быгатонлыкъёсы вылэ гинэ оскиськыны кутски, нош Иеговалы оскиськемысь дугдӥ. Мон малпай: монэн ноку номыр уз луы. Соин ик Иеговалэсь алэмзэ лыдэ басьтэмысь дугдӥ». Хосе секыт сьӧлык лэсьтӥз, со кенешысь но поттэмын вал. Кӧня ке ар талэсь азьло со Иеговаен кусыпъёссэ тупатӥз. Тани кыӵе йылпумъян со лэсьтэ: «Иегова мыным возьматӥз: нырысь ик солэсь кылзӥськоно, нош кыӵе инты басьтэммы валтӥсез уг луы». Ойдолэ ум вунэтэ: быгатонлыкъёсмы яке кенешын дано ужъёсмы — Иеговалэсь. (Лыдӟе 1 Коринфъёслы 4:6, 7.) Нош вылтӥяськись адямиос Иеговалы нокыӵе пайда вайыны уг быгато.

9. Кытчы вуттӥз тырмостэм сям Шайтанэз но Еваез?

⁹ Тырмостэм сям сярысь малпаку, Шайтан тодэ лыктэ. Иеговалэн кылчинэз луыса, солэн трос дано ужъёсыз вал, но солы со ӧз тырмы. Шайтанлэн потӥз, мукетъёсыз солы мед йыбыртъялозы шуыса. Нош адямиос Иеговалы гинэ йыбыртъяны кулэ. Шайтанлэн потэ, ми со кадесь мед луомы шуыса. Солэн потэ, ми мед малпаломы, со, мармы милям вань, тырмыт ӧвӧл шуыса. Ӵапак таӵе ик амалэз со уже кутӥз, Еваен вераськыкуз. Кызьы ми тодӥськомы, Иегова Еваез но солэсь картсэ паймымон чебер садын улыны интыяз, кытын соослэн тырмыт сиёнзы вал. Соос «вань писпуослэсь емышсэс» сиыны быгатӥзы, но одӥг гинэ писпулэсь емышсэ сиыны уг яра вал (Ул.-выл. 2:16). Озьы ке но Шайтан Еваез пӧяз но вераз, шудо луон понна, солы ӵапак со писпулэсь емышсэ сиыны кулэ шуыса. Ева малпаз, солы зэм но мар ке но уг тырмы шуыса. Кытчы со вуттӥз, ваньмы ми умой тодӥськомы: Ева сьӧлыказ но берлогес кулӥз (Ул.-выл. 3:6, 19).

10. Кызьы Давид эксэй тырмостэм сямлы сётскиз?

¹⁰ Давид эксэй но тырмостэм сямлы сётскиз. Иегова солы туж троссэ сётӥз: узырлык, тодмо луон, ожмаськонъёсын вормонъёс. Давид Иеговалэн та кузьымъёсыз понна туж тау кариз. Соос сярысь со вераз: «Соос лыдъянлэн сьӧраз потэмын» (Пс. 39:6). Нош кыӵе ке но дыре Давид ваньмыз таиз сярысь вунэтӥз но малпаз, солы эшшо но тросгес кулэ шуыса. Солэн кышноосыз вал ке но, со малпаз Вирсавияез, бызем кышномуртэз, аслыз карыны. Давид соин ӵош изиз но, Вирсавия секытэн луиз. Но азон-калгон сьӧлыке пырем  сяна, Давид лэсьтӥз озьы, Вирсавиялэсь картсэ, Урияез, мед виёзы шуыса (2 Экс. 11:2—15). Мар сярысь малпаз Давид? Малпаз-а со, Иегова номыре уг адӟы шуыса? Давид трос аръёс ӵоже Иеговалы ужаз-тыршиз ке но, со тырмостэм сямлы сётскиз но трос шуг-секытъёсын пумиськиз. Шумпотыса вераны луэ, дыр ортчыса, Давид янгышсэ валаз но ӧпкелиз. Давид Иеговалы туж тау кариз сое простить каремез понна! (2 Экс. 12:7—13).

11. Мар юрттоз милемлы тырмостэм сямлы сётскытэк улыны, Ефесъёслы 5:3, 4 лыдэ басьтоно ке?

¹¹ Малы дышетэ милемыз Давидлэн учырез? Ми Иеговалы тау кариськомы ке ваньмыз понна, мае со милемлы лэсьтэ, ми тырмостэм сямлы ум сётске. (Лыдӟе Ефесъёслы 5:3, 4.) Милемлы шумпотоно солы, мармы милям вань. Соослэсь, кинъёс Библиез дышето, ми мылкыдзэс ӝутӥськомы малпаськыны, мар Иегова соос понна лэсьтӥз, но со понна тау карыны. Дышетскись котькуд нунал тау карыса вӧсяськиз ке, соку арня куспын со Иеговаен сизьым пӧртэм темаосъя вераськоз (1 Фес. 5:18). Нош тӥ асьтэос озьы лэсьтӥськоды-а? Тӥ малпаськиды ке со сярысь, мар Иегова тӥ понна лэсьтэ, со юрттоз тӥледлы тау карисесь луыны. Тау карон мылкыдды вань ке, соку тӥ шумпотоды солы, марды тӥляд вань. Нош та юрттоз тырмостэм сямлы сётскытэк улыны.

12. Кытчы вуттӥз тырмостэм сям Искариот Иудаез?

¹² Искариот Иуда, тырмостэм сямо луэменыз, урод уж лэсьтӥз — со Иисусэз вузаз (Лука 6:13, 16). Нырысь Иуда урод адями ӧй вал. Иисус сое бырйиз, со апостол мед луоз шуыса. Иуда оскиськымон но быгатӥсь адями вал, дыр. Соин ик солы коньдонэн ящикез но оскизы. Та коньдонэз Иисус но апостолъёс кутӥзы, тодытон ужез азьланьтон понна. Туннэ та коньдонэз ми нимасалмы дунневыл ужлы ас мылкыд каремъя сётэм коньдон шуыса. Иисус трос пол алӥз ке но, кытчы вуттыны быгатэ тырмостэм сям, Иуда кыӵе ке но дыре пичиен-пичиен лушкаськыны кутскиз (Марк 7:22, 23; Лука 11:39; 12:15). Со Иисуслэсь валамон алэмзэ лыдэ ӧз басьты.

13. Кыӵе учырын тужгес но умой адӟиськиз Иудалэн тырмостэм сямо луэмез?

¹³ Иудалэн тырмостэм сямо луэмез тужгес но умой адӟиськиз Иисуслэн кулон азязгес. Иисус но солэн дышетскисьёсыз, кудъёсыз пӧлын Мария но Марфа вал, сиськизы Симонлэн коркаяз, кудӥз азьвыл гижлочерен висиз. Со ӝытэ Мария дуно миро вӧез басьтӥз но сое Иисуслэн йыр вылаз кисьтӥз. Тае адӟыса, Иудалэн но мукет дышетскисьёслэн вожзы потӥз. Дышетскисьёс малпазы, та вӧез вузаны но берыктэм коньдонэз куанеръёслы сётъяны луысал шуыса. Нош Иудалэн мукет муген вожез потӥз. Со лушкаськись вал — солэн та коньдонэз лушкамез потэ вал. Берлогес тырмостэм сямо Иуда Иисусэз куамын азвесь коньдонэн вузаз. Ӵапак сомында сёто вал одӥг ляльчи понна (Матф. 26:6—16; Лука 22:3—6; Иоанн 12:2—6).

14. Кызьы одӥг кузпалъёс уже кутӥзы кылъёсты, кудъёсыз гожтэмын Лукалэсь 16:13?

¹⁴ Тани кызьы Иисус вераз одӥгез валтӥсь зэмлык сярысь: «Уд быгатӥське Инмарлы но, маммоналы [узырлыклы-байлыклы] но огдыре служить карыны». (Лыдӟе Лукалэсь 16:13.) Та кылъёс туннэ но пайда вайыны быгато. Тани кызьы та кылъёсты уже кутӥзы Румыниысь кузпалъёс, куке соослы узыргес шаерын огдырлы уж ӵектӥзы. Соос верало: «Милемлы банклы трос коньдон тыроно вал. Нырысь ми малпамы, та уж — Иеговалэн бакель каремез шуыса». Но зэмзэ вераса, со озьы ӧй вал, малы ке шуоно та уж люкетысал соослы Иеговалы ужаны-тыршыны. Визьмо ужпум кутыны соослы юрттӥз 2008-тӥ арын 15-тӥ гудырикошкон понна поттэм «Возьмаськон башняысь» «Пусть твоё сердце будет полностью предано Иегове» статья. Кузпалъёс азьланьто: «Ми мукет шаере тросгес коньдон  поттон понна кошкысалмы ке, соку возьматысалмы, Иегова улонамы кыкетӥ интыын шуыса. Соку Инмарен кусыпъёсмы лябӟысалзы». Соин ик кузпалъёс та ӵектонэз палэнтӥзы. Мар луиз собере? Картэз Румыниысь шедьтӥз уж, кудаз улон понна тырмыт коньдон тыризы. Кышноез вера: «Иегова милемыз ноку но уг кельты». Та кузпалъёс шумпото, Иеговаез нырысетӥ интые пуктӥзы шуыса, нош коньдонэз ӧз.

15. Малы ми оскиськомы, Шайтанлэн сьӧлтэтъёсызлэсь мозмытскыны луэ шуыса?

¹⁵ Нош мар кароно, ми вылтӥяськон яке тырмостэм луон сьӧлтэтъёсы сюримы ке? Ми соослэсь мозмытскыны быгатӥськомы! Павел валэктӥз, соос, кинъёс Шайтанлэн сьӧлтэтаз сюризы, солэсь мозмытскыны быгато шуыса (2 Тим. 2:26). Озьы вал Давидэн но. Куке Нафан солэсь сьӧлыксэ шараяз, Давид тырмостэм сямо луэмзэ валаз но Иеговаен кусыпъёссэ тупатӥз. Ойдолэ ноку но ум вунэтэ: Иегова Шайтанлэсь кужмогес. Озьыен, Иеговалэн юрттэменыз, ми быгатомы мозмытскыны котькыӵе сьӧлтэтлэсь, кудзэ Шайтан сюрес выламы пуктэ.

16. Мар юрттоз милемлы Шайтанлэн сьӧлтэтъёсызлэсь палэнскыны?

¹⁶ Зэм но, Шайтанлэн сьӧлтэтъёсызлэсь мозмытскыны тыршем интые, умойгес луысал соослэсь палэнскыны. Сое лэсьтыны луэ Инмарлэн юрттэменыз гинэ. Уг яра малпаны, вылтӥяськись яке тырмостэм сямо ми ноку ум луэ шуыса! Таӵе сьӧлтэтъёсы сюризы соос но, кинъёс трос аръёс ӵоже Иеговалы ужазы-тыршизы. Соин ик котькуд нунал Иеговалы ӟырдыт вӧсяське но куре тӥледлы юрттыны малпанъёстэс но ужъёстэс эскерыны (Пс. 138:23, 24). Ноку но эн сётске вылтӥяськись но тырмостэм сямо луонлы!

17. Мар ӝоген луоз Шайтанэн, асьмелэн тушмонэнымы?

¹⁷ Кӧня ке сюрс аръёс ӵоже Шайтан сьӧлтэтъёс пуктылэ. Но ӝоген со ачиз кутэмын, жильыямын но быдтэмын луоз (Усьт. 20:1—3, 10). Ми туж возьмаськомы со нуналэз. Нош со вуытозь, ойдолэ тодамы возёмы сьӧлтэтъёсты, кудъёссэ Шайтан уже кутэ. Эн сётске вылтӥяськись яке тырмостэм сямо луонлы. Шайтанлы «пумит султэ — соку со тӥ дорысь бызьыса кошкоз» (Иак. 4:7).