1. Parché che podemo dir che Sàtana l’è come un cassador?

UN CASSADOR el vol ciapar o copar una bèstia. Un dei falsi amighi de Giò el ga dito che un cassador el pol doperar arquante tràpole par esser bon de far questo. (Giò 18:8-10) Cossa che el cassador el fà par ciapar una bèstia? Lu el pensa in quel che la bèstia la fà. Par esémpio: ‘Ndove che la va? Cossa che la ghe piase? Quala che saria la meio tràpola par ciaparla?’ Sàtana el fà compagno con noantri. Lu el ne stùdia, el vede ndove ndemo e cossa che ne piase. Alora, el mete una tràpola e el speta che caschemo. Ma, la Bìblia la dise come nò cascar e che, se semo cascadi, podemo scampar dele so tràpole.

2. Che due tràpole Sàtana el dopera tanto?

² Fà miliari de ani che Sàtana el dopera due tràpole: el orgòlio e la voia de gaver sempre de pi. * Lu l’è come un cassador che el mete qualcossa par una bèstia cascar nte una tràpola o una rede (Sal. 91:3) Ma Geovà el ne ga belche parlà sora le tràpole che Sàtana el dopera. Cossita, semo boni de nò cascar nele so tràpole. — 2 Cor. 2:11.

3. Parché che Geovà el ga assà el esémpio de arquante persone nela Bìblia?

³ Geovà el ne dise cossa far par nò cascar nele tràpole del orgòlio e de voler sempre de pi. Par esémpio, lu el ne insegna par meso dei esempi che ghen’è nela Bìblia. In questo stùdio, ndaremo veder arquanti de questi esempi. Vederemo che anca servi fedeli de Geovà i ze cascadi nele tràpole de Sàtana. Ma questo no vol dir che anca noantri ndaremo cascar, parché Geovà el ga assà questi esempi nela Bìblia par insegnarne. (1 Cor. 10:11) Questi esempi i pol giutarne a mai cascar o a scampar via dele tràpole de Sàtana.

4. Cossa che sucederà se deventemo orgoliosi?

⁴ Sàtana el vol che deventemo orgoliosi parché, se questo sucede, saremo come lu e no ndaremo viver par sempre. (Pro. 16:18) L’è par quela che el apòstolo Paolo el ga dito che ghen’è el perìcolo de restar massa orgoliosi e ricever el medèsimo giulgamento che Sàtana. (1 Tim. 3:6, 7) Questo pol suceder con tute le persone, no importa se fà poco o tanto che le serve a Geovà.

5. De acordo con Eclesiasti 7:16, 20, come una persona la mostra orgòlio?

⁵ Le persone che le ze orgoliose le pensa sol in lore stesse. Sàtana el vol che pensemo sol in noantri stessi. Par esémpio, quando infrontemo un problema, lu el vol che pensemo in noantri invesse de pensar in Geovà. Qualchedun el ga belche dito che te ghè fato una roba che no te gavei fato? O qualchedun el te ga belche tratà de maniera ingiusta? Sàtana el vol tanto che te dae la colpa a Geovà o ai to fradei. Lu el vol che te pensi che far le robe dela to maniera l’è meio che ndar drio ai consili che ghen’è nela Bìblia. — Ledi Eclesiasti 7:16, * 20. *

6. Cossa gheto imparà col esémpio dela sorela dela Olanda?

⁶ Varda cossa che ga sucedesto con una sorela dela Olanda. Ela la ze restada inrabiada par causa dei sbali dei so fradei e no la volea pi restar insieme con lori. La sorela la ga dito: “Mi me sentia tanto sola e no era bona de perdonarli. Mi go anca dito al me omo che gavarìssino de cambiar de congregassion.” Alora, la ga vardà el Broadcasting de marso de 2016 che el parlea cossa far se restemo inrabiadi par causa dei sbali dei altri. Anca la ga dito: “Mi go capio che mi gavea de esser ùmile. Invesse de voler che i fradei e le sorele i cambiesse, mi gavea de esser pi atenta ai me sbali. El Broadcasting el me ga giutà a pensar de pi in Geovà e nela so autorità.” Alora, cossa che podemo imparar? Quando  infrontemo qualche dificoltà, ghemo de pensar in Geovà. Ghemo de domandar che el ne giute a veder i altri come lu li vede. Geovà el vede i sbali de tuti, e anca cossita li perdona. Lu el vol che femo compagno. — 1 Gio. 4:20.

7. Cossa che ga sucedesto col rè Uzia?

⁷ El rè de Giudà, Uzia, el gavea tante abilità, el ga vinsesto arquante guere, ga fato su tante cità e el gavea tante colònie. El vero Dio el fea che lu el ndesse ben. (2 Cró. 26:3-7, 10) Ma la Bìblia anca la dise che, dopo che l’è deventà forte, el so cuor l’è deventà orgolioso par la so pròpia rovina. Alora, lu no’l ga acetà consili e el ga fato una roba che no’l gavea el dirito de far. Geovà el gavea dito che sol i sasserdoti i podea brusar insenso nel témpio. Ma Uzia el ga pensà che el gavea questo dirito, e l’è ndato rento el témpio e el ga brusà insenso. Geovà no ghe ga piasesto de questo e el ga fato Uzia gaver lepra fin morir. — 2 Cró. 26:16-21.

8. De acordo con 1 Corinti 4:6, 7, cossa che pol giutarne a no deventar orgoliosi?

⁸ Sarà che anca noantri podemo cascar nela tràpola del orgòlio come Uzia? Varda quel che ga sucedesto con José. Lu l’era un empresàrio che el fea tanti negossi e tuti i lo rispetea come ansiano. Lu el fea bei discorsi nele assemblee e congressi e anca superintendenti i ghe domandea consili. Ma José el ga dito: “Mi go assà Geovà de banda parché me fidea massa nele me abilità e nela me speriensa. Mi pensea che ero un bravo ansiano e che no gavea bisogno de consili.” José el ga fato un pecato pròpio bruto e l’è stà desassossià. Pochi ani indrio, l’è tornà a servir a Geovà. Lu el ga dito: “Geovà el me ga insegnà che la roba pi importante no l’è quel che femo nela so organisassion, ma se obedimo a quel che lu el ne domanda.” Ghemo de ricordarse che le nostre abilità o el laoro che femo nela organisassion l’è stà Geovà che el ne ga dato. (Ledi 1 Corinti 4:6, 7. *) Se semo orgoliosi, Geovà mai el ndarà doperarne.

9. Cossa che Sàtana e Eva i ga fato parché i volea sempre de pi?

⁹ Quando pensemo sora voler sempre de pi, pol esser che suito se ricordemo de Sàtana, el  Diaol. Lu l’era un àngelo de Geovà, e fursi el gavea tanti laori importanti par far. Ma lu no l’era contento con quel che el gavea. Lu el volea la adorassion che sol Geovà el mèrita. Ancoi, lu el vol che anca noantri no semo mai contenti con gnente. La prima volta che el ga doperà questa tràpola la ze stata quando el ga parlà con Eva. Geovà el gavea dito a Adon e Eva che i podea magnar de tute le piante del giardin, sol de una pianta che nò. (Gén. 2:16) Ma, Sàtana el ga fato che Eva la credesse che la gavea de magnar del fruto che no la podea mia. No la era contenta con quel che la gavea. E savemo che, par causa de questo, Eva la ga desobedio e la ze morta. — Gén. 3:6, 19.

10. Come che Davi l’è cascà nela tràpola de voler sempre de pi?

¹⁰ Geovà el gavea dato tante robe a Davi. Par esémpio, lu l’era sior, l’era una persona importante e el gavea vinsesto tante guere. Davi el savea che Geovà el ghe gavea dato tante robe che no l’era gnanca bon de parlar sora tute. (Sal. 40:5) Ma, dopo de un tempo, el se ga desmentegà de quel che Geovà el ghe gavea dato. Lu no l’era pi contento con quel che el gavea e el volea ancora de pi. Anca che Davi el gavesse tante done, el ga scominsià a voler la dona de nantro omo. Questa dona la era Bate-Seba e so omo l’era Uria, el itita. Davi el ga scominsià a pensar sol in lu stesso. Alora, lu el ga bio relassion sessuai con Bate-Seba, e la ze restada gràvida. Dopo de quel bruto pecato, Davi el ga mandà copar Uria. (2 Sam. 11:2-15) Cossa che Davi el ga pensà de far una bruta roba come queste? Sarà che el pensea che Geovà no l’era drio vederlo? Davi no l’era contento con quel che el gavea e l’era drio pensar sol in lu stesso. Par causa de questo, ghe ga sucedesto brute robe. Ma Davi el ga parlà del so sbàlio, el se ga ciamà gramo e Geovà lo ga perdonà. L’è sicuro che Davi el ga ringràssia tanto a Geovà par causa de questo! — 2 Sam. 12:7-13.

11. De acordo con Efesi 5:3, 4, cossa che ndarà giutarne a nò cascar nela tràpola de voler sempre de pi?

¹¹ Cossa che imparemo del esémpio de Davi? Imparemo che, se semo grati a Geovà par causa dele robe che ghemo, no ndaremo cascar nela tràpola de voler sempre de pi. (Ledi Efesi 5:3, 4. *) Ghemo de esser contenti con quel che ghemo. Fursi ghemo belche dito a un studiante dela Bìblia par pensar sora le  benedission che Geovà el ghe dà tuti giorni e che el ga de ringrassiarlo. Se lu el fà questo, nte una stimana, lu el va ringrassiar a Geovà sete robe difarente. (1 Tes. 5:18) Cossa che te pensi de far compagno? Pensa in quel che Geovà el fà par ti. Questo ndarà giutarte a esser pi grato. Cossita, te sarè contento con quel che te ghè e no te ndarè cascar nela tràpola de voler sempre de pi.

12. Cossa che Giuda el ga fato parché el volea sempre de pi?

¹² Giuda el ga tradio a Gesù parché no l’era contento con quel che el gavea. Ma quando Gesù lo ga scoliesto come apòstolo, lu no l’era cossita. (Luc. 6:13, 16) Giuda l’era una persona bona che le persone le podea fidarse. L’era Giuda che el tendea dele contribussion che Gesù e i apòstoli i doperea nel laoro de predicassion. I soldi che ghen’era nela casseta de contribussion i era doperadi dela medèsima maniera che i soldi i ze doperadi ancoi. Ma dopo de un tempo, lu el ga scominsià a ciavar soldi de quela casseta. Lu el ga fato questo anca che Gesù el gàpia parlà tante volte sora la tràpola de voler sempre de pi. (Mar. 7:22, 23; Luc. 11:39; 12:15) Ma Giuda no’l ga metesto in pràtica questi consili.

13. Come che savemo che Giuda el volea sempre de pi?

¹³ Savemo che Giuda l’è pròpio cascà nela tràpola de voler sempre de pi par causa de quel che el ga fato vanti de Gesù esser morto. Gesù, i so dissìpoli, la so mare, Marta e Maria i ze stati convidadi par ndar ala casa de Simon, el leproso. Quando lori i era drio magnar, Maria la se ga levà su e la ga metesto un òio profumà che el costea tanto par sora dela testa de Gesù. Giuda e i altri dissìpoli i ze restadi tanto cativi. I dissìpoli i ga pensà che i podaria doperar quei soldi nela predicassion. Ma come Giuda l’era un ladro, el volea ciavar i soldi dela casseta. E, come el volea sempre de pi, el ga tradio a Gesù par causa de poche monede. — Gioani 12:2-6; Mat. 26:6-16; Luc. 22:3-6.

14. Come un casal el ga metesto in pràtica el testo de Luca 16:13?

¹⁴ Gesù el ga ricordà ai so dissìpoli una roba tanto importante: “No podé laorar come schiavi par Dio e par le Richesse.” (Ledi Luca 16:13. *) Queste parole le ze tanto importante anca par noantri. Varda come un casal dela Roménia el ga metesto in pràtica quel che Gesù el ga dito. Lori i ze stati convidadi par laorar nte un paese che i podea guadagnar de pi. Lori i ga dito: “Noantri gavéino ciapà imprèstio nel banco, alora gavéino un grando dèbito. Noantri ghemo pensà che quel laoro l’era una benedission de Geovà.” Ma, se i acetesse el laoro no i saria boni de seitar a far quel che i fea par Geovà. Alora, i ga ledesto un artìcolo che el parlea sora seitar a esser leal a Geovà e a servirlo de tuto el cuor, nela Sentinela de 15 de agosto de 2008. Lori i ga dito: “Se ndéssino laorar in nantro paese par causa de soldi, Geovà el saria in secondo posto. Èrino sicuri che questo ndaria intrigar la nostra amicìssia con Geovà.” Alora, i ga dessidio nò cambiarse. Cossa che ga sucedesto? El omo el ga catà un laoro nel so paese che el ciaparia i soldi che i gavea de bisogno. La sposa la ga dito: “Geovà sempre el giuta i so servi.” Lori i ze tanto contenti parché i ga dessidio servir a Geovà e no ai soldi.

15. Parché che podemo esser sicuri che podemo ndar fora dele tràpole de Sàtana?

¹⁵ E se semo belche cascadi nele tràpole del orgòlio o de voler sempre de pi? Noantri ancora podemo ndar fora dela tràpola. Paolo el ga dito che quei che i era cascadi nela tràpola del Diaol i podaria far questo. (2 Tim. 2:26) L’è stà questo che ga sucedesto con Davi quando Natan el ghe ga dito che lu l’era drio far una roba sbaliada. Davi el se ga ciamà gramo e l’è tornà a gaver la amicìssia con Geovà. Mai ghemo de desmentegarse che Geovà l’è pi forte che Sàtana. Alora, se acetemo che Geovà el ne giute, saremo boni de scampar via de qualche tràpola de Sàtana.

16. Cossa che ndarà giutarne a nò cascar nele tràpole de Sàtana?

¹⁶ L’è bon saver che podemo ndar fora dele tràpole del orgòlio e de voler sempre de pi. Ma l’è meio ancora se gnanca no caschemo in queste tràpole. Sol saremo boni de far questo col aiuto de Geovà. Ghemo de star atenti par no pensar che mai ndaremo cascar in queste tràpole, parché anca servi fedeli de Geovà i ze cascadi. Alora, ghemo de domandar a Geovà tuti i giorni che el ne giute a capir se qualche roba che pensemo o femo mostra che ghemo orgòlio o che volemo sempre de pi. (Sal. 139:23, 24) Sfòrsate par mai cascar nele tràpole del orgòlio e de voler sempre de pi.

17. Cossa che ndarà suceder con Sàtana?

¹⁷ Romai fà miliari de ani che Sàtana l’è drio meter tràpole par le persone come un cassador el fà. Ma, presto lu el sarà metesto in preson e el sarà destruto. (Apo. 20:1-3, 10) L’è sicuro che te sì pròpio premoso che questo suceda! Alora, stà atento par no cascar nele tràpole de Sàtana. Sfòrsate tanto par no deventar una persona orgoliosa o che la vol sempre de pi. Métete contra el Diaol, e lu el scamparà via de ti. — Tiago 4:7.