1. Seexaanaa nuuni shankkanchchaara geeddarissiyoy aybissee?

SHANKKANCHCHAY doˈaa oyqqanawu woy woranawu koyees. Iyyooba minttettiyaaba milatiya worddo asatuppe issoy yootidoogaa mala dumma dumma pireta I goˈettana danddayees. (Iyy. 18:8-10) SHankkanchchay doˈay piriyan gelanaadan waati cimmana danddayii? I he doˈaabaa loytti xannaˈees. I biyoosaa, I dosiyoobaa, A oyqqanawu ayba piriyaa goˈettanaakko xannaˈees. Seexaanay he shankkanchchaa mala. I nubaa xannaˈees. Nuuni biyoosaanne nu dosiyoobaa I akeekees. Yaatidi nuuni qoppennan nuna oyqqana giidi I qoppiyo piriyaa doorees. Gidoppe attin, nuuni oyqqettikkokka, kessi ekkana danddayiyoogaa Geeshsha Maxaafay yootees. He ubba piretuppe nuuni waani naagettanaakkokka tamaarissees.

2. Seexaanaa piretuppe waannatiya naaˈˈati awugeetee?

² Seexaanaa piretuppe waannatiya naaˈˈati Otoruwaanne yaariyaa. * SHaˈan qoodettiya layttawu, Seexaanay ha iita eeshshata loytti goˈettiis. Seexaanay kafuwaa piriyan woy gitiyan oyqqanawu cimmiyoobaa wottiya shankkanchcha mala. (Maz. 91:3) SHin nuuni Seexaanan oyqettana koshshenna. Aybissi? Seexaanay asaa oyqqanawu goˈettiyoobaa Yihooway nuussi qonccissido gishshataassa.—2 Qor. 2:11.

3. Otorettidanne yaaretida asatubaa Geeshsha Maxaafan Yihooway xaafissidoy aybissee?

³ Yihooway ba ashkkaratuppe amaridaageetu bolli gakkidabaa nuussi yootiyoogan otoroynne yaaree keehi qohiyaaba gidiyoogaa nuna tamaarissees; hegaa gishshawu hegaa mala balabaa oottennaadan naagettana danddayoos. Yihoowayyo daro layttaa haggaazida amaridaageeta Seexaanay waati cimmidaakko  nuuni beˈana. Hegaa giyoogee otorettiyoogaappenne yaaretiyoogaappe nuuni naagettana danddayokko giyoogee? CHii. Yihooway nuna “seeranau” he taariketa Geeshsha Maxaafan xaafissiis. (1 Qor. 10:11) Nuuni Dabloosa piretuppe waani naagettanaakko woy kessi ekkanaakko he taariketuppe tamaarana danddayiyoogaa I erees.

4. Nuuni otorettikko, nuna aybi gakkana danddayii?

⁴ Seexaanay nuuni otorettanaadan koyees. I nuuni otorettikko, A mala gidanaagaanne merinaa deˈuwaa demmennaagaa erees. (Lee. 16:18) Hegaa gishshawu, kiitettida PHawuloosi issi uri “otoruwan sugettidi, xalahe halaqai Xoossaa pirddan kunddidoogaadan kunddenna mala” yootiis. (1 Xim. 3:6, 7) Nuuni tumaa mati eridaageeta woy daro layttawu Yihoowawu haggaaziiddi takkidaageeta gidin, nuuppe oonakka hegaa malabay gakkana danddayees.

5. Eranchchaa 7:16, 20y yootiyoogaadan, issi uri waani otorettana danddayii?

⁵ Otorettiya asay ba xallaa siiqees. Nuna metoy gakkiyo wode, nuuni Yihoowabaa qoppiyoogaappe aaruwan nubaa qoppanaadan oottanawu Seexaanay malees. Leemisuwawu, nena asi wordduwan mooti erii? Woy qassi nena issi uri naaqqi erii? Neeni Yihoowa bolli woy ne ishanttu bolli hanqqettiyoogaa beˈiyoogan Seexaanay ufayttees. Neeni Yihooway ba Qaalaa baggaara immiyo kaaletuwaa kaalliyoogaappe ne koyiyo oge xallan metuwaa giigissana gaada qoppanaadan Dabloosi koyees.—Eranchchaa 7:16, 20 nabbaba.

6. Nezerlandden deˈiya michchiyo gakkidabaappe ay tamaarana danddayay?

⁶ Harati oottiyo balabay O yiilloyido gishshawu eta bolli hanqqettida, Nezerlandden deˈiya michchiyo gakkidabaa qoppa. A hegaa mala asaara wodiyaa aattennan agganawu kuuyaasu. A hagaadan gaasu: “Taani keehi boorasays, qassi he ishanttanne michchontta xeelliyaagan ta qofaa laammabeykke. Nuuni hara gubaaˈiyaa laammana koshshees gaada ta azinawu yootaas.” Hegaappe simmin, Laappune 2016 JW Brodkastingiyaa A beˈaasu. Haratu mooruwaa waati danddayanaakko he prograamee  amarida qofaa yootees. He michchiyaa hagaadan gaasu: “Gubaaˈiyan deˈiya ishanttanne michchontta laammanawu maliyoogaappe tana ziqqi oottananne ta mooruwaa qoppana koshshiyoogaa akeekaas. He prograamee taani Yihoowanne A maataa qoppanaadan maaddiis.” A yootidobaappe ay tamaarana danddayay? Nena paacee gakkiyo wode, ubbatoo Yihoowabaa qoppa. Neeni harata aagaadan xeellana mala I nena maaddanaadan woossa. Saluwan deˈiya ne Aaway eta balaa akeekees, shin I etawu ba dosan atto gees. I neenikka hegaadan oottanaadan koyees.—1 Yoh. 4:20.

7. Kawuwaa Ooziyaana bolli aybi gakkidee?

⁷ Yihudaa Kawoy Ooziyaani otorettido gishshawu, harati zoriyoobaa siyennan ixxiis; yaatidi baassi imettibeennabaa oottiis. Ooziyaani keehi gooba asa. I daro olan xooniis, daro katamata keexxiis, qassi awu daro goshsha gadee deˈees. “Xoossai a anjjiis.” (2 Odi. 26:3-7, 10) ‘SHin Ooziyaani minnido wode otorettidoogaanne otoroy A kunddettawu kaalettidoogaa’ Geeshsha Maxaafay yootees. Qeesetu xallay beeta maqidasiyan ixaanaa cuwayana koshshiyoogaa Yihooway kaseesappe azazi wottiis. SHin Kawoy Ooziyaani otorettidi ixaanaa cuwayanawu beeta maqidasiyaa geliis. Yihooway ufayttibeenna gishshawu he otoranchcha bitaniyaa goga harggee oyqqanaadan oottiis. Ooziyaani hayqqana gakkanaashin goga harggiyaara deˈiis.—2 Odi. 26:16-21.

8. Koyro Qoronttoosa 4:6, 7y yootiyoogaadan, otorettiyoogaappe waani naagettana danddayiyoo?

⁸ Nuuni Ooziyaanaagaadan otorettananne nagaraa oottana danddayiyoo? Hoozeya hanotaa qoppa. I gubaaˈe cima gididi haggaaziya gooba zalˈˈanchcha. I gita shiiqotun haasayata kase haasayeesinne woradaa xomoosiyaageeti zoriyaa A oychchoosona. I hagaadan giis: “SHin taani tawu deˈiya eraaninne meeziyan ammanettaas. Taani Yihoowan ammanettabeykke. Taani tana mino gaada qoppido gishshawu, Yihoowa seeraanne zoriyaa siyennan ixxaas.” Hoozeyi wolqqaama nagaraa oottidi bohettiis. Amarida layttappe guyyiyan, I simmiis. I haˈˈi hagaadan gees: “Keehi koshshiyaabay nuussi maatay deˈiyoogaa gidennan, nuuni oottanaadan Yihooway koyiyoobaa oottiyoogaa gidiyoogaa I tana tamaarissiis.” Nuuyyo deˈiya eraynne nuuni gubaaˈiyan oottiyo oosoy Yihooway immidoba gidiyoogaa hassayiyaageeta gidoos. (1 Qoronttoosa 4:6, 7 nabbaba.) Nuuni otorettikko, Yihooway nuna goˈettenna.

9. Yaaretiyoogee Seexaanaynne Hewaana waananaadan oottidee?

⁹ Yaaretiyoogaabaa nuuni qoppiyo wode, Seexaanaa Dabloosa hassayennan waayi aggana. Seexaanay Yihoowa kiitanchchatuppe issuwaa gidiyo gishshawu, awu daro gita maatay deˈennan aggenna. SHin I hegaappe aarobaa koyiis. Yihoowa xallawu bessiya goynuwaa I koyiis. Seexaanay nuuni ba mala gidanaadan koyiyo gishshawu, nuuyyo deˈiyaabaappe aarobaa nu koyanaadan oottanawu malees. I hegaadan oottanawu koyro malidoy Hewaaniira haasayido wodiyaana. Hewaananne I keettaaway issi mittaa teeraa xallaa aggidi “Gannatiyaa mittaa teeraa ubbaappe” maanaadan gidi palahiya qumaa Yihooway siiquwan etawu immiis. (Doo. 2:16) SHin, Hewaana mooppite giido miitta teeraa maana koshshiyaabadan qoppana mala oottiyoogan Seexaanay O cimmiis. Hewaana bawu deˈiyaaban ufayttabeenna gishshawu, harabaa koyaasu. Hegaappe simmin hanidabaa nuuni eroos. Hewaana nagaraa oottada wurssettan hayqqaasu.—Doo. 3:6, 19.

10. Yaaretiyoogee Kawuwaa Daawitawu waani pire gididee?

¹⁰ Yaaretiyoogee Kawuwaa Daawiti aquwaa, hayttatiyoogaanne ba morkketa darota xoonidoogaa gujjin, Yihooway awu immidobaa doganaadan oottiis. Daawiti Xoossay immido imotay ‘yootin wurennaba’ giidi nashshiis. (Maz. 40:5) Gidoppe attin, Daawiti Yihooway awu immidobaa issi wode dogiis. I yaaretido gishshawu aarobaa koyiis. Daawitawu daro machchoti deˈikkonne, I hara asa machchiyo amottiyoogaa doommiis. He maccaasee sunttay Berssaabo, qassi I keettaaway Hiitiyaa Ooriyoona. Daawiti yaaretidi Berssaabiira mattumaa gayttin A shahaaraasu. Daawiti oottidobay keehi iitaba, shin hegaappekka aadhdhiya hara keehi iitabaa oottiis. I Ooriyoona worissiis! (2 Sam. 11:2-15) Daawiti ay qoppidee? I Yihooway hegaa beˈana danddayennabadan qoppidee? Daawiti Yihoowawu daro layttaa haggaazikkonne, I yaaretidoogee A bolli daro waaye gakkanaadan oottiis. SHin guyyeppe Daawiti ba nagaraa ammanidi he nagaraappe simmidoogee ufayssiyaaba. Yihooway ayyo atto giido gishshawu I ay keena ufayttideeshsha!—2 Sam. 12:7-13.

11. Efisoona 5:3, 4y yootiyoogaadan, yaaretiyoogaa eqettanawu nuna aybi maaddana danddayii?

¹¹ Daawita hanotaappe ay tamaarana danddayiyoo? Yihooway nuuyyo immido ubbabaa  gishshawu nuuni galatiyaaba gidikko, yaariyaa eqettana danddayiyoogaa tamaaroos. (Efisoona 5:3, 4 nabbaba.) Nuuni nuussi deˈiyaaban ufayttidi deˈana bessees. Nuuni asaa Geeshsha Maxaafaa xannaˈissiyoogaa doommiyo wode, Yihooway etawu immido issi loˈˈobaa eti qoppanaadaaninne hegaa gishshawu Yihoowa galatanaadan eta tamaarissana danddayoos. Issi uri saaminttan ubba galla hegaadan oottikko, I laappunbbaa xeelliyaagan woossiis giyoogaa. (1 Tas. 5:18) Neenikka hegaadan oottay? Yihooway neeyyo oottido ubbabaa neeni wotta dentta qoppiyoogee galatanaadan nena maaddana. Neeni galatiyaagaa gidikko, neeyyo deˈiyaaban ufayttada deˈana. Neeni neeyyo deˈiyaaban ufayttada deˈikko, yaaretakka.

12. Asqqorootu Yihuday yaaretido gishshawu waatidee?

¹² Asqqorootu Yihuday yaaretiyaagaa gidido gishshawu, keehi iitabaa oottiisinne Yesuusa aattidi immiis. SHin Yihuday kase ubbatoo iita asa gidenna. (Luq. 6:13, 16) Kiitettidaagaa gidanaadan Yesuusi A dooriis. Yesuusi A ammanettiyo gishshawu, miishshaa saaxiniyaa oyqqiyo aawatettaa awu immiis. Yesuusinne kiitettidaageeti sabbakanawu biyo wode banttawu koshshiyaabawu he miishshaa goˈettidosona. Hegee ha wodiyan kumetta saˈan oottiyoobawu miishshaa immiyoogaa mala. SHin asay yaaretennaadan Yesuusi darotoo yootidoogaa Yihuday siyidaba gidikkonne, guyyeppe wuuqqiyoogaa doommiis. (Mar. 7:22, 23; Luq. 11:39; 12:15) Yihuday he zoriyaa kaallibeenna.

13. Yihuday yaaretiyaagaa gidiyoogaa bessidoy awudee?

¹³ Yesuusi hayqqanaappe guuttaa kasetidi Yihuday yaaretiyaagaa gidiyoogaa bessiis. Mayraamonne I michchiyo Martto gujjin, Yesuusinne A kaalliyaageeti inchchirichchay oyqqido Simoona son imatuwaa shoobettidosona. Qumaa miishin, Mayraama denddada daro miishshan bayzettiya geeshsha shittuwaa Yesuusa huuphiyan tigaasu. Hegan Yihudaynne Yesuusa kaalliya harati keehi hanqqettidosona. Yesuusa kaalliya harati he miishshaa haggaazuwawu goˈettiyaakko loˈˈo giidi qoppennan waayi aggana. SHin Yihuday hanqqettido gaasoy dummatees. I “kaiso” gidiyo gishshawu saaxiniyaappe miishshaa wuuqqana koyiis. Qassi Yihuday yaaretiyaagaa gidido gishshawu, miishshaa ekkanawu giidi Yesuusa aatti immiis.—Yoh. 12:2-6; Maa. 26:6-16; Luq. 22:3-6.

14. Luqaasa 16:13n odettidabaa issi azinaynne machchiyaa waatidi oosuwan peeshshidonaa?

¹⁴ Yesuusi bana kaalliyaageeta “Xoossaassinne miishshaassi haarettanau danddayekketa” giidi tuma gididabaa yootiis. (Luqaasa 16:13 nabbaba.) Hegee ha wodiyankka tuma. Leemisuwawu, Rumeeniyaa giyo biittan deˈiya issi azinaynne machchiyaa Yesuusi yootidobaa oosuwan waati peeshshidaakko beˈa. Eti keehi dure biittan amarida wodiyawu oottanaadan shoobettidosona. Eti hagaadan giidosona: “Nuuni bankke keettawu qanxxiyo keehi daro acoy deˈiyo gishshawu, he oosoy Yihoowappe demmido anjjo giidi koyro heeran qoppida.” SHin pire gidana danddayiyaabay deˈees. Eti he oosuwaa oottanawu eeno giikko, Yihoowawu haggaazanawu daro wode demmokkona. Naase 15, 2008 Wochchiyo Keelan, (Amaarattuwaa) “Issi Wozanan Ammanettidi Gencciyoogaa” giya huuphe yohuwaa nabbabi simmidi kuuyidosona. Eti hagaadan giidosona: “Nuuni hara biittan oottanawu koyiyoy daro miishshaa demmanaassa gidikko, Yihoowaara dabbotido dabbotaa kaseyokko. Nuuni ayyaanaaban qohettanaagaa akeekida.” Yaatiyo gishshawu eti he shoobiyaa ekkennan ixxidosona. Yaatin aybi hanidee? Azinay banttawu koshshiyaabawu gidiya miishshaa demissiya oosuwaa ba biittan demmiis. Maccaasiyaa hagaadan gaasu: “Yihooway ba ashkkarata awudekka maaddana danddayees.” Ha azinaynne machchiyaa miishshaa gidennan, Yihoowa banttassi Goda oottidoogan ufayttidosona.

15. Seexaanay wottiyo piretuppe nuuni kessi ekkanaagaa ammanettana danddayiyoy aybissee?

¹⁵ Nuuni otorettiyoogaa woy yaaretiyoogaa akeekikko waatana koshshii? Nuuni laamettana koshshees! Paxa deˈiiddi Dabloosan ‘oyqqettidaageeti’ kessi ekkana danddayiyoogaa PHawuloosi yootiis. (2 Xim. 2:26) Daawita hegaa malabay gakkiis. Naataani mintti zorido zoriyaa siyidi I yaaretiyoogaa aggiis, qassi Yihoowaara dabbotido ba dabbotaa zaarettidi minttiis. Yihooway Seexaanaappe keehi aadhdhiyoogaa mule dogoppa. Yaatiyo gishshawu, nuuni Yihoowa maaduwaa ekkikko, Dabloosi wottiyo piriyaappe woy gitiyaappe kessi ekkana danddayoos.

16. Seexaanay wottiyo piretuppe naagettanaadan nuna aybi maaddanee?

¹⁶ Aybanne otorettennan woy yaaretennan aggiyoogee loˈˈo. Nuuni yaatana danddayiyoy Xoossay maaddiyo wode xallaana. SHin nuuni aybanne otorettokko woy yaaretokko giidi qoppana koshshenna! Yihoowayyo daro wodiyawu haggaazidaageetikka otorettiyaageeta woy yaaretiyaageeta gidana danddayoosona. Yaatiyo gishshawu, ne qoppiyoobaanne oottiyoobaa qoranaadan maaddana mala ubba gallassi Yihoowa woossa. (Maz. 139:23, 24) Otorettennan woy yaaretennan agganawu neeyyo danddayettida ubbabaa oottanawu baaxeta!

17. Nu morkkee Dabloosi mata wode waananee?

¹⁷ SHaˈan qoodettiya layttawu, Seexaanay shankkatiiddi takkiis. SHin I mata wode qashettana, yaatidi wurssettan xayana. (Ajj. 20:1-3, 10) He gallassaa nuuni yeemuwan naagoos. He wodee gakkanaashin, Seexaanaa piretuppe naagettada deˈa. Otorettennan woy yaaretennan agganawu baaxeta. Neeni ‘xalahe halaqaa teqqikko, I neeppe baqatana.’—Yaaq. 4:7.