NGANI JAKULIJIGANYA 24
Yili Yakomboleka Kuŵambala Yitega ya Satana
“Tachikulupuka mu [yitega ya] Satana.”—2 TIM. 2:26.
NYIMBO NA. 36 Tukusawuteteya Mtima Wetu
YACHITULIJIGANYE *
1. Ligongo chichi Satana mpaka tumlandanye ni mundu jwakusakula yinyama?
JWAKUSAKULA akusakola chakulinga chakuti akamule kapena kuwulaga chinyama chakusakulacho. Jwalakwe akusakamulichisya masengo yitega yejinji. Chimo mwa yitegayi ni chiŵachisasile achimjakwe Yobu. (Yob 18:8-10) Ana jwakusakula akusatenda uli kuti atanjisye kapena kutega yinyama? Akusalolaga mwayikwendela yinyamayo. Akusaliwusyasoni kuti, ‘Ana yinyamayi yikusanonyela kwawula kwapi? Ana yikusanonyela kutenda chichi? Ana ngamulichisye masengo chitega chapi kuti nayikamule yinyamayi?’ Mwelemu ni mwakusatendelasoni Satana. Jwalakwe akusamanyilila mwatukusatendela yindu, kwatukusanonyela kwawula soni yakusangalasya yatukusayinonyela. Kaneko akusasosa chitega champaka atuteje nacho mwangamanyilila. Nambope Baibulo jikusatusalila kuti yili yakomboleka kulikulupula naga tutanjile. Jikusatisoni yili yakomboleka kuyiŵambala yitegayi.
Satana akwasokonasya ŵandu ŵajinji ni ndamo ja kunyada soni kutunduka (Alole ndime 2) *
2. Ana ni yitega yiŵili yapi yakusayikamulichisya masengo mnope Satana?
2 Yitega yakusayikamulichisya masengo mnope Satana yili kunyada soni kutunduka. * Kwa yaka yejinji Satana aŵele ali mkukamulichisya masengo yitega yeleyi. Jwalakwe ali mpela mundu jwele akusakula yijuni kuti yikatanjile mu lwawu. (Sal. 91:3) Nambo m’weji ngatukusosekwa kukunda kuti Satana atukamule. Yili myoyo ligongo lyakuti Yehofa akusatusalila matala gakusakamulichisya masengo Satana.—2 Akoli. 2:11.
Mpaka tulijiganye yejinji pa yisyasyo yine ya m’Baibulo yampaka yitukamuchisye kuŵambala yitega yine ya Satana (Alole ndime 3) *
3. Ligongo chichi Yehofa jwakundile kuti yisyasyo yine ya ŵandu ŵaŵaliji ŵakunyada soni ŵakutunduka yilembedwe m’Baibulo?
3 Yehofa akusatusalila kogoya kwa kunyada soni kutunduka kupitila mu yisyasyo ya ŵandu ŵane ŵaŵakwete ndamosi. Chitukambilane yatesile Satana pakwatega ŵandu ŵane ŵatumichile Yehofa kwandaŵi jelewu. Nambotu yeleyi ngayikugopolela kuti nganiyiŵa yikomboleche kuŵambala ndamo ja kunyada soni kutunduka. Yehofa ŵakundile kuti yisyasyo ya ŵandu ŵaŵaliji ŵakunyada soni kutunduka, yilembedwe m’Baibulo kuti “yitukalamusye uwe.” (1 Akoli. 10:11) Yehofa akusamanyilila kuti mpaka tulijiganye kanekakwe pa yisyasyo yeleyi kuti tuŵambale yitega ya Satana.
KUNYADA
Alole ndime 4
4. Ana mpaka chitutendechele chichi naga tuli ŵakunyada?
4 Satana akusasakaga kuti tutande kola kamtima ka kunyada. Akusamanyilila kuti patutandite kunyada nikuti chitulandane ni jwalakwejo, yampaka yitulepelekasye kupata umi wangamala. (Mis. 16:18) Ndumetume Paulo jwasasile kuti mundu jwakulikwesya mpaka ‘apochele chilango mpela chiŵapochele’ Satana. (1 Tim. 3:6, 7) Yeleyi mpaka yimtendechele mundu jwalijose, mwangasamala kandu kuti aŵele ali mkutumichila Yehofa kwa yaka yejinji.
5. Ana pa Jwakulalichila 7:16, 20, pakulosya kuti mundu mpaka alosye chamtuli kuti ali jwakunyada?
5 Mundu jwakunyada akusaŵa jwakulinonyela. Satana akusasaka kuti tuliganichisyeje jika mmalo mwakuganichisya ya Yehofa, mnomnope patusimene ni yakusawusya. Mwachisyasyo, ana mundu jwine ŵalambuchisye wawojo kuti atesile yineyakwe, kapena mwine kwatendela yindu yangali chilungamo? Satana akusaŵa jwakusangalala pakwawona wawojo ali mkumtumbilila Yehofa kapena abale ni alongo ligongo lya yindu yayikwatendechelayi. Satana akusasaka kuti payitutendechele yineyakwe tugambeje kwendela nganisyo syetu mmalo mwakukuya yakusasala Yehofa panganijo.—Aŵalanje Jwakulalichila 7:16, 20.
6. Ana tukulijiganya chichi pa chisyasyo cha mlongo jwa ku Netherlands?
6 Aganichisye yaŵasimene nayo mlongo jwine jwa ku Netherlands, juŵakuŵele ni muŵatendelaga yindu ŵane. Jwalakwe jwaganisisye kuti ngakusosekwa kwamba kuyisechelela yayikutendekwayi. Ni jwatite, “Nalipikanaga kuti ndili jikajikape, nambo nganisakaga kwakululuchila jemanjaji.” Jwasasilesoni kuti, “Nasalile ŵamkwangu kuti tugambe kusama mumpingomu tujawule kwine.” Kaneko mlongoju jwalolelele JW Broadcasting® ja Malichi 2016. Pulogalamuji jasasile yindu yine yampaka tutende ŵandu ŵane patulemwechesye. Mlongoju jwasasile kuti, “Nayiweni kuti ngusosekwa kulinandiya ni kuganichisyaga yindu yangangusatenda chenene, mmalo mwakuchenga kaganisye ka abale ni alongo mumpingo. Pologalamu ja Broadcasting jeleji jangamuchisye kuti nganichisyeje mnope ya Yehofa soni ulamusi wakwe.” Pelepatu tukulijiganya kuti patusimene ni yakulingwa tuganichisyeje mnope ya Yehofa. Tumŵendeje Yehofa kuti twawoneje ŵane mpela mwakusiŵawonela jwalakwejo. Yehofa akusamanyililaga yakulemwa ya achimjetuwo, nambo akusiŵakululuchilaga. Myoyo Yehofa akusasaka kuti twakululuchilejesoni ŵane.—1 Yoh. 4:20.
Alole ndime 7
7. Ana Mwenye Usiya chamtendechele chichi?
7 Kunyada kwamtendekasisye Mwenye Usiya jwa ku Yuda kuti akane chamuko. Jwalakwe jwawinile ngondo syejinji, kutaŵa misinda soni jwakwete migunda jejinji. “AMBUJE” ŵampele upile jwalakwe. (2 Mbi. 26:3-7, 10) Baibulo jikusasala kuti ‘Usiya ŵatandite kulinonyela ligongo lya machili gaŵakwete, yiyamtendekasisye kuti alepele.’ Yehofa ŵaliji ali alamwile kala kuti ŵakutaga mbopesi ni ŵakuŵajilwa kupeleka mbopesi kunyumba ja kulambilila. Nambo ligongo lya kulinonyela Mwenye Usiya ŵajinjile mnyumba jakulambilila ni kupeleka mbopesi. Yeleyi nganiyimsangalasya Yehofa, mwamti ŵamtendekasisye Usiya kulwala ulwele wa matana kwa umi wakwe wosope.—2 Mbi. 26:16-21.
8. Mwakamulana ni 1 Akolinto 4:6, 7, ana mpaka tuŵambale chamtuli ndamo ja kunyada?
8 Ana kunyada mpaka kututendekasye kutenda yindu mpela muŵatendele Mwenye Usiya? Aganichisye yaŵasimene nayo José. Jwalakwe jwatendaga bisinesi jijamjendelaga chenene soni ŵaliji jwamkulungwa jwa mumpingo jwele ŵandu ŵamchimbichisyaga. Jwakolaga upile wakuŵecheta ngani pamisongano jamwana atamosesoni jekulungwa. Mwamti ŵakulolela madela ŵaŵendaga lunda kwa jwalakwe pandaŵi jakusaka malangiso ganegakwe. Nambo José jwatite, “Nalidalilaga mnope soni kuliwona kuti ndili jwakumanyilila yejinji. Yeleyi yandendekasyaga kuti ngamdalilaga Yehofa. Nalipikanaga kuti ndili jwakulimba mwausimu mwamti nalesile kupikana malangiso ga Yehofa.” Kaneko José jwatesile ulemwa wekulungwa soni ŵamtyosisye mumpingo. Panyuma pakumwuchisya mumpingo, jwalakwe jwatite, “Yehofa anjiganyisye kuti chakusosekwa mnope ngaŵa udindo, nambo kutenda chilichose chatuŵendile jwalakwe kuti tutende.” Kwende wosope tukumbuchileje kuti yindu yiliyose yatukusakombola kutenda soni utumiki watukusatenda mumpingo, Yehofa ni jwakusapeleka yeleyi. (Aŵalanje 1 Akolinto 4:6, 7.) Naga tuli ŵakunyada Yehofa nganaŵa atukamulichisye masengo.
KUTUNDUKA
Alole ndime 9
9. Ana kutunduka kwamtendekasisye Satana soni Hawa kutenda chichi?
9 Patugambile kupikana maloŵe gakuti kutunduka, tukusakumbuchila chitema ya Satana. Pakuŵa Satana pandanda ŵaliji lilayika lya Yehofa, komboleka kuti jwakwete maudindo gambone gejinji. Nambopetu jwasakaga yine yejinji. Jwasakaga kuti ŵandu amlambileje jwalakwe mmalo mwakumlambila Yehofa. Satana akusasaka kuti tutendeje yindu mpela jwalakwe mwamti akusalingalinga kututendekasya kuti tukajikutilaga ni yindu yatukwete. Jwatandite kulosya kuti akwete nganisyo syelesi pandaŵi jiŵaŵechetanaga ni Hawa. Yehofa ŵampele Adamu ni Hawa yakulya yejinji. Paja ŵasalile kuti ‘alyeje yisogosi ya chitela chilichose chichaliji mumgunda’ kulekapo chitela chimo. (Gen. 2:16) Satana ŵamtendekasisye Hawa ganisya kuti akusosekwa kulyasoni yisogosi ya m’chitela chiŵalekasisye Mlungu. Myoyo Hawa jwalepele kwikutila ni yindu yiŵakwete. Tukumanyilila mwajamalile nganiji kuti Hawa jwalemwisye soni kaneko jwawile.—Gen. 3:6, 19.
Alole ndime 10
10. Ana kutunduka kwamtendekasisye Mwenye Daudi kutenda chichi?
10 Kutunduka kwamtendekasisyesoni Mwenye Daudi kuliŵalila kuti Yehofa ŵamkamuchisye mwakumpa chipanje, kuŵa jwakumanyika soni kumkamuchisya kuti ŵapunde achimmagongo ŵajinji pangondo. Jwayamichilaga yeleyi soni jwasasile kuti yindu yosope yapochele kwa Yehofa yili ‘yangaŵalanjika.’ (Sal. 40:5) Nambo lisiku line Daudi jwaliŵalile yindu yosope yaŵampele Yehofayi. Atamose kuti jwakwete achakongwe ŵajinji, jwalakwe ŵamkumbile jwamkongwe jwasyene. Jwamkongweju ŵaliji Betiseba soni ŵamkwakwe ŵaliji Uliya jwamtundu wa Chihiti. Nambo ligongo lyakulinonyela, Daudi jwagonile ni Betiseba mwamti ŵampele msigo. Jwatesilesoni chindu chine chakusakala mnope mpela kuti kutenda chikululu kula nganikukwanila. Jwalakwe ŵamwuleje Uliya. (2 Sam. 11:2-15) Ana jwaganisyaga chichi pakutenda yosopeyi? Daudi jwaganisyaga kuti Yehofa ngakulola yajwatendagayi. Atamose kuti jwalakwe jwatumichile Yehofa kwandaŵi jelewu, nambope jwatandite kutunduka soni jwasimene ni yakusawusya. Nambo yakusangalasya ni yakuti Daudi jwajitichisye kulemwa kwakwe ni kuleka ndamo syakusakala. Jwasangalele kuti jwaŵelesoni paunasi ni Yehofa.—2 Sam. 12:7-13.
11. Mwakamulana ni lilemba lya Aefeso 5:3, 4, ana chichi champaka chitukamuchisye kumalana ni ndamo ja kutunduka?
11 Chisyasyo cha Daudi chikutujiganya kuti mpaka tumalane ni ndamo ja kutunduka naga tukupitilisya kuyamichila yindu yosope yatupele Yehofa. (Aŵalanje Aefeso 5:3, 4.) Myoyo tujikutileje ni yindu yatukwete. Naga pana jwakumjiganya Baibulo, amsalileje kuti aganichisye ya chindu atamose chimpepe chakuchiwona kuti Yehofa amkamuchisye. Naga jwalakwe akutenda yeleyi lisiku lililyose nikuti pa wiki jimo yichiŵa kuti apopesile kwa Yehofa kwa maulendo 7, ali mkusala yindu yakulekanganalekangana. (1 Ates. 5:18) Ana wawojo akusatendaga yeleyi? Kuganichisya yindu yiŵatendele Yehofa, kuchakamuchisya kuti aŵeje ŵakuyamichila. Pakuyamichila ni pakusaŵasoni ŵakwikutila ni yindu yakwete. Nambosoni kwikutila ni yakwete kuchakamuchisya kuti akaŵa ŵakutunduka.
Alole ndime 12
12. Ana kutunduka kwamtendekasisye Yudasi kutenda chichi?
12 Kutunduka kwamtendekasisye Yudasi kuti ampeleche Yesu. Nambotu pandanda Yudasi jwaliji mundu jwambone. (Luk. 6:13, 16) Tukuŵecheta yeleyi ligongo lyakuti Yesu ali amsagwile Yudasi kuŵa jwakulijiganya jwakwe, jwalakwe ŵaliji jwakulupichika soni kudalilichika. Mwamti ŵasagulidwesoni kuti asunjeje libokosi lya mbiya. Yesu ni ŵakulijiganya ŵakwe ŵakamulichisya masengo mbiyasi pakusumila yindu yakwakamuchisya pamasengo gakulalichila. Mbiya syelesi syaliji mpela syatukusapeleka masiku agano kuti sikamuchisye pamasengo ga pachilambo chosope. Nambope Yudasi jwatandite kwiŵa mbiyasi atamose kuti Yesu ŵaliji ali asasile kala kusakala kwa ndamo ja kutunduka. (Maliko 7:22, 23; Luk. 11:39; 12:15) Yudasi nganayikosya yaŵechete Yesuyo.
13. Ana kutunduka kwa Yudasi kwawonechele pandaŵi japi?
13 Kutunduka kwa Yudasi kwawonechele pandaŵi jele Yesu ŵaliji ali asigele panandi kuwulajidwa. Yesu ni ŵakulijiganya ŵakwe pampepe ni Maliya soni Malita ŵapite kunyumba ja Simoni juŵalwalaga matana. Ali kweleko pandaŵi jiŵalyaga yakulya, Maliya ŵajigele libotolo lya mauta gakununjila soni gakudula mnope nikutanda kumtaga Yesu mumtwe. Yudasi ni ŵakulijiganya ŵane ali ayiweni yeleyi ŵatumbile mnope. Komboleka kuti ŵakulijiganya ŵane ŵa Yesu ŵaganisyaga kuti bola akasumisye mautago, mbiya syakwesyo kuti sikamuchisye pamasengo gakulalichila. Nambo Yudasi jwakwete nganisyo syakulekangana ni syelesi, jwalakwe jwaliji jwawiyi. Jwasakaga kuti jujiŵe mbiyasyo pasiponyedwe m’libokosimo. Nambo pakuŵa jwaliji jwakutunduka, ŵampeleche Yesu pamtengo wakuchipa mnope.—Yoh. 12:2-6; Mat. 26:6-16; Luk. 22:3-6.
14. Ana liŵasa line lyakamulichisye masengo chamtuli maloŵe ga pa Luka 16:13?
14 Yesu ŵakumbwisye ŵakulijiganya ŵakwe usyesyene wakusosekwa mnope wakuti, “Ngaŵa mkupakombola kutumichila Mlungu ni chipanje ndaŵi jimpepe.” (Aŵalanje Luka 16:13.) Maloŵega gali gasyesyene. Aganichisye yalyatesile liŵasa line lya ku Romania pakukuya maloŵe gaŵechete Yesuga. Jemanjaji ŵakwete upile wakuti alembedwe masengo m’chilambo chine chakusichila. Jemanjaji ŵatite, “Twakwete ngongole ja mbiya syejinji syatwasosekwaga kupeleka ku banki. Myoyo, kupata masengo mpela gelega twayiweni kuti uli upile wakutyochela kwa Yehofa.” Nambo papali chakusawusya chine. Jemanjaji akajitichisye masengoga ni kuti akalepelaga kupata ndaŵi jakwanila ja kumtumichila Yehofa. Nambo kaneko ŵaŵalasile ngani jakuti “Khalani Okhulupirika ndi Mtima Wonse,” mu Sanja ja Mlonda ja Ogasiti 15, 2008. Jemanjaji ŵatite, “Twayiweni kuti naga tukusagula kwawula ku chilambo chine kuti tukakamuleje masengo pakusaka kupata mbiya syejinji, nikuti unasi wetu ni Yehofa chiwukaŵeje pamalo gaŵili.” Myoyo, ŵakanile masengoga. Jwamlume jwamliŵasali jwapatile masengo m’chilambo chiŵatamaga pecho gagakamuchisyaga kuti apateje yakusosechela. Nombe jwamkongwejo jwatite, “Yehofa akusaŵa jwakoseka kutukamuchisya ndaŵi jilijose.” Apano liŵasali lili lyakusangalala mnope ligongo lya kukuwona kutumichila Yehofa kuŵa kwakusosekwa mnope kupunda mbiya.
AŴAMBALEJE YITEGA YA SATANA
15. Ana ni chichi champaka chitutendekasye kusimichisya kuti mpaka tukulupuche ku yitega ya Satana?
15 Ana mpaka tutende uli naga tukuyiwona kuti tutandite kunyada soni kutunduka? Tukusosekwa kuchenga mwachitema. Paulo jwasasile kuti ŵandu ‘ŵakamulidwe’ ni Satana yili yakomboleka kukulupuka ku chitegacho. (2 Tim. 2:26) Ni muyaŵelelesoni ni Daudi. Jwapochele chamuko kutyochela kwa Natani, jwalesile ndamo jakwe ja kutunduka soni jwatesile yakuti aŵesoni paunasi ni Yehofa. Tukaliŵalila kuti Yehofa ali jwamachili mnope kumpunda Satana. Myoyo naga tukwitichisya chikamuchisyo cha Yehofa mpaka tuŵambale chitega chilichose chatuŵichile Satana kuti atutanjisye.
16. Ana chichi champaka chitukamuchisye kuŵambala yitega ya Satana?
16 Atamose kuti yili yakomboleka kukulupuka ku yitega ya Satana, nambope tukusosekwa kuŵambalaga chilepe mkanituŵe kutanjila. Yeleyi mpaka yikomboleche ni chikamuchisyo cha Mlungupe basi. Nambo tukalipikanaga kuti ngatuŵa tutandite kunyada kapena kuŵa ŵakutunduka. Ligongo atamose ŵandu ŵane ŵatumichile Yehofa kwandaŵi jelewu, atanjile mu chitega chelechi cha kunyada kapena kutunduka. Myoyo amŵendeje Yehofa lisiku lililyose kuti ŵakamuchisye kumanyilila naga kaganisye soni katende kawo ka yindu kakulosya kuti akwete ndamo syelesi. (Sal. 139:23, 24) Akakunda kuti ndamo syelesi sitamilichiche mumtima mwawo.
17. Ana pachangakaŵapa chichimtendechele chichi mmagongo jwetu Satana?
17 Kwa yaka yejinji Satana aŵele ali mkwendajenda kupita m’chisakula ŵandu. Nambo pachangakaŵapa chataŵidwe soni konanjidwa. (Chiw. 20:1-3, 10) Tukwembecheya mwachidwi ndaŵi jeleji. Myoyo patukwembecheyapa kwende tuŵe mesope kuti tukatanjila mu yitega ya Satana. Akusosekwa kulimbichila mnope kuti ndamo ja kunyada kapena kutunduka jikatamilichika mumtima mwawo. Nambosoni aŵe ŵakusimichisya ‘kumkana Satana, nipo tachatila.’—Yak. 4:7.
NYIMBO NA. 127 Mtundu wa Mundu Jwangusaka Mbe
^ ndime 5 Satana ali mpela mundu jwakusamanyilila chenene masengo gakusakula yinyama. Jwalakwe akusatenda yakomboleka kuti atukamule mwangasamala kandu ya ulewu wandaŵi jatuŵele tuli mkutumichila Yehofa. Munganiji chitukambilane yakusatenda Satana pakamulichisya masengo ndamo ja kunyada soni kutunduka pakusaka kututendekasya kuti tukaŵa paunasi ni Yehofa. Chitulole yisyasyo ya ŵandu ŵane ŵaŵaliji ŵakunyada ni kutunduka, soni yampaka tutende kuti tuŵambale ndamo syelesi.
^ ndime 2 NGOPOLELO JA MALOŴEGA: Nganiji jikusala mnope ya ndamo ja kunyada, kwakuli kulipikana kuti uli ŵakusosekwa mnope kwapunda ŵane. Jikulondesyasoni ya ndamo ja kutunduka, kwakuli ungajikutila kapena kukumbila mnope yindu mpela mbiya, udindo, mteto wakugonana soni yine.
^ ndime 53 KULONDESYA YIWULILI: M’bale akukana kupochela malangiso gampaka gamkamuchisye. Mlongo jwele akwete kala yindu yejinji akusachililasoni kusuma yine.
^ ndime 55 KULONDESYA YIWULILI: Kunyada kwamsokonasisye Mwenye Usiya soni lilayika line lya Mlungu. Kutunduka kwamtendekasisye Hawa kuti alye chisogosi cha m’chitela chiŵalekasisye Mlungu. Kutunduka kwamtendekasisye Daudi kuti atende chikululu ni Betiseba, soni kwamtendekasisye Yudasi kuti ajiŵeje mbiya.
