1. Mang fan nrayog ni ngad taareb rogonnaged Satan ngak be’ ni ma mokol gamanman?

BE’ NI ma mokol gamanman e n’en ma nameg e nge kol reb e gamanman nge fek ni kab fos ara nge li’ nge yim’. Boor mit e wup ni ma fanay ni bod rogon ni yog bagayad fapi pumoon ni ur dake yad e fager rok Job. (Job 18:8-10) Ere uw rogon nra waliy reb e gamanman nga lan e wup rok? Ma par nga i fal’eg i yaliy fare gamanman ko gin be yan riy, nge n’en baadag ni ma rin’, nge re miti wup nib mom nra aw ngay. Satan e bod be’ ni ma mokol gamanman. Ma par nga i fal’eg i yaliydad ko gin gad ma yan ngay nge n’en gad baadag ni ngaud rin’ed. Ngemu’ me mel’eg ban’en ni nge mang wup rok ni ngad awgad ngay u ba ngiyal’ ndarud lemnaged. Yugu aram rogon, ma be yog e Bible ni faanra kad awgad ko wup rok Satan ma ka rayog ni ngad thaygad riy. Machane ku be yog rogon ndab da awgad ko pi wup nem.

2. Mang l’agruw e ban ni ma fanay Satan nrib ga’ angin?

² Tolangan’ nge chogow e l’agruw mit e ban ni ma fanay Satan nrib ga’ angin. * Ke yan bokum biyu’ e duw ni ma fanay Satan e gal ban ney. Satan e bod rogon be’ ni ma mokol arche’ ni ma waliyrad nga lan e wup rok fa kolrad ko nug. Machane rayog ni nge dab da awgad ko wup rok Satan. Mang fan? Ya ke gagiyelnag Jehovah e pi ban rok.​—2 Kor. 2:11.

3. Mang fan ni ke tay Jehovah murung’agen boch e girdi’ nga lan e Bible ni bay ba ngiyal’ ni tolangan’rad mu kur chogownaged boch ban’en?

³ Ma pi’ Jehovah e athamgil nga lanin’dad ni ngad filed e n’en ke buch rok boch e tapigpig rok ya nge yag nda nanged riy’en e tolangan’ nge chogow. Gad ra weliy rogon ni ke yag rok Satan ni nge bannag boch e tapigpig rok Jehovah ni ke n’uw nap’an ni  kar pigpiggad ngak. Ere gur, re n’ey e be yip’ fan ndabiyog ni ngad siyeged e tolangan’ nge chogow? Danga’. Ke tay Jehovah e pi n’ey nga Bible ya nge “mang ba ning chilen ngodad.” (1 Kor. 10:11) Manang nrayog ni ngad filed ban’en riy ma gad nang rogon ni ngad thaygad ko pi wup rok Moonyan’.

4. Mang e rayog ni nge buch rodad ni faanra tolangan’dad?

⁴ Baadag Satan ni nge tolangan’dad. Manang ni faanra tolangan’dad, ma ra taareb rogodad ngak me mul e athap ko yafos ni manemus u pa’dad. (Prov. 16:18) Aram fan ni yog apostal Paul nrayog ni nge uf be’ me “turguy Got e gechig rok ni bod ni rin’ ngak fare moonyan’.” (1 Tim. 3:6, 7) Demtrug ko kafin da uned ko tin riyul’ ara ke yoor e duw ni kad pigpiggad ngak Jehovah, ma rayog ni nge buch e re n’ey rodad.

5. Uw rogon nrayog ni nge tolangan’ be’ nrogon ni be yog e Eklesiastes 7:16, 20?

⁵ Be’ nib tolangan’ e goo ir e ma lemnag ir. Ba ga’ nnap’an nra yib e magawon ngodad, ma ma guy Satan rogon ni ngad pared ni goo gadad e gad be lemnagdad ko bin ni ngad lemnaged Jehovah. Bay be’ ni ke t’ar e thin nga dakenam, fa? Gur, ke rin’ be’ ban’en ngom nde mat’aw? Baadag Satan ni nge guy ni kam damumuw ngak Jehovah ara pi walagem. Baadag ni ngam lemnag ni rogon nrayog ni ngam pithig e magawon rom e aram e ngam rin’ e n’en ni ga baadag ko bin ni ngam fol ko fonow rok Jehovah ni be pi’ ngom u daken e Thin rok.​—Mu beeg e Eklesiastes 7:16, 20.

6. Mang e rayog ni ngam fil ko n’en ni buch rok reb e walag nib pin u Netherlands?

⁶ Am lemnag e n’en ni buch rok reb e walag nib pin u Netherlands ni damumuw ni bochan boch ban’en ni ma rin’ boch e walag ndabun. Ere dabuy ni nga i chag ngorad. I yog ni gaar: “Gu par ndakuriy be’ ni gu be chag ngak ma dabug ni nggu n’ag fan e kireb rorad. Ere gog ko pumoon rog ni nggu warow nga yugu reb e ulung nib thil.” Machane nga tomuren me yaliy fare JW Broadcasting^® ko March 2016. Re broadcast nem e ni weliy riy rogon ni ngad feked owchedad u boch ban’en ni ma rin’ pi walagdad ndubdad. I yog e re walag nem ni gaar:  “Gu nang nib t’uf ni nggu sobut’nag lanin’ug nggu lemnag e tirog e oloboch ko bin ni ngguy rogon ni nggu thilyeg e pi walag u lan e ulung. I ayuwegeg e re broadcast nem ni nggu lemnag Jehovah nge rogon ni ir e bay mat’awun ni nge yog e n’en ngad rin’ed.” Ere mang e gad be fil ko re n’ey? Nap’an ni ga ra mada’nag e magawon, mag lemnag Jehovah. Mu wenig ngak ni nge ayuwegem ngaum lemnag yugu boch e girdi’ ni bod rogon ni ma lemnagrad. Ma guy e Chitamangidad ni bay u tharmiy e oloboch rorad mab m’agan’ ngay ni nge n’ag fan. Ku aray e n’en ni baadag ni ngam rin’.​—1 John 4:20.

7. Mang e buch rok Uzziah ni Pilung?

⁷ Tolangan’ e k’aring Uzziah ni Pilung nu Judah ni nge siyeg e fonow ni kan pi’ ngak me rin’ ban’en ndariy mat’awun ni nge rin’. Boor ban’en ni yag ni nge rin’ Uzziah. Boor e mahl ni gel riy, ma boor e mach ni ubung, maku boor yungi milay’ ni i ngongliy. I “fal’eg Got waathan” nga i par nib fel’ rogon. (2 Kron. 26:3-7, 10, BT) Machane be gaar e Bible: “Nap’an ni par Uzziah ni Pilung ni ke gel gelngin me tolangan’, ma aram tapgin me mul pa’ ko pilung.” I yog Jehovah u m’on riy ni yigoo pi prist e rayog ni ngar urfiyed e incense u tempel. Machane me yan Uzziah ni Pilung nga lan e tempel nge urfiy e incense ni ban’en ndariy mat’awun ni nge rin’. De m’agan’ Jehovah ko n’en ni rin’, ma aram me n’igin ni nge yib e daraw ngak. I par Uzziah nib daraw u n’umngin nap’an e yafos rok.​—2 Kron. 26:16-21, BT.

8. Uw rogon ni ngad siyeged e tolangan’ nrogon nib puluw ko 1 Korinth 4:6, 7?

⁸ Gur, rayog ni nge k’aringdad e tolangan’ ni ngad denengad ni bod e n’en ni buch rok Uzziah? Am lemnag e n’en ni buch rok José. Ir be’ ni bay e siyobay rok maku ir reb e piilal u lan e ulung. Ma pi’ boch e welthin u nap’an e assembly nge convention, maku ma yan e pi walag ni ma lekag e ulung ngak ngaur fithed laniyan’ u boch ban’en. I yog ni gaar: “Ug taga’ ko tin rayog rog nge pi n’en ni gu manang ma da ug taga’ ngak Jehovah. Gu lemnag ni gub gel ko tirok Got ban’en, ere da gu motoyil ko ginang nge fonow ni pi’ Jehovah ngog.” Ere rin’ José reb e denen nib ubchiya’ min tharbog ko ulung. Ka fini yan in e duw ni ke sul ko ulung. I gaar: “Ke fil Jehovah ngog ni gathi maruwel ni gad be rin’ u lan e ulung e ir e ba ga’ fan, ya kab ga’ fan ni ngad rin’ed e n’en ni baadag ni ngad rin’ed.” Ere dab da paged talin ni gubin e salap ni bay rodad nge maruwel ni kan pi’ ngodad u  lan e ulung ma gubin ni ke yib rok Jehovah. (Mu beeg e 1 Korinth 4:6, 7.) Ra ba tolangan’dad ma dabi fanaydad Jehovah.

9. Mang e buch rok Satan nge Efa ni bochan e chogow?

⁹ Nap’an ni gad ra lemnag murung’agen e chogow, ma dabisiy ni Satan ni Moonyan’ e ir e ra yib ngan’dad. Immoy ni ir reb e engel rok Jehovah, ere dabisiy ni boor e tow’ath ni immoy rok. Machane baadag ni ngki yoor boch. Baadag ni ngan liyor ngak ni bod rogon ni yibe liyor ngak Jehovah. Baadag Satan ni ngad boded, ere ma guy rogon ni nge dabki fel’ u wan’dad e tin bay rodad. Yay nsom’on ni guy rogon ni nge rin’ e re n’ey e nap’an ni non ngak Efa. Boor ken e gek’iy ni tay Jehovah u lan e ‘gi woldug nem’ nrayog ni nge kay Efa nge figirngin wom’engin, ma kemus ni taab ken e nog ngorow ndab ra kew wom’engin. (Gen. 2:16) Yugu aram rogon, me bannag Satan Efa nge lemnag nib t’uf ni nge kay wom’engin e re ke gek’iy nem ni ka nog ngorow ndab ra kew. De fel’ u wan’ Efa e tin bay rok ya baadag ni ngki yoor boch. Ma gad manang ni wenegan ni yib riy e denen Efa, me munmun me yim’.​—Gen. 3:6, 19.

10. Mang e buch u nap’an ni chogownag David ni Pilung ban’en ni nge yag ngak?

¹⁰ Chogow e k’aring David ni Pilung ni nge pagtalin e pi n’en ke pi’ Jehovah ngak nib muun ngay e flaab rok, nge buguwan, nge pi toogor rok ni i gel ngorad. I yog David nib “pire’” e pi tow’ath nem ni ke pi’ Got ngak. (Ps. 40:5) Machane bay ba ngiyal’ ni taw ngay, me pagtalin e n’en ke pi’ Jehovah ngak. Daki fel’ u wan’ e tin bay rok ya baadag ni ngki yoor boch. Yugu aram rogon ni boor e ppin rok, machane miki adag leengin yugu reb e pumoon. Re ppin nem e Bath-sheba ni Uriah figirngin ni be’ nib Hittite. Bochan ni goo ir e be lemnag ir, ma aram mar parew Bath-sheba ma nga tomuren me diyen. Rib kireb e n’en ni rin’ David. Machane n’en ni rin’ nri kub gel e kireb riy e yan u thaan ni ngan li’ Uriah nge yim’! (2 Sam. 11:2-15) Gur, mang e i lemnag David? Gur, i lemnag ndabiyog ni nge guy Jehovah e n’en be rin’? Yugu aram rogon ni ke n’uw nap’an ni ke pigpig ngak Jehovah, machane me yan i taw nga ba ngiyal’ me chogownag ban’en nde milfan ngak ma rib gel e gafgow ni yib riy ngak. Boch nga tomuren me wenignag e kireb rok me kalngan’. Ere ba mudugil ni felfelan’ u nap’an ni n’ag Jehovah fan e kireb rok!​—2 Sam. 12:7-13.

11. Uw rogon ni ngad gelgad ko chogow nrogon ni bay ko Efesus 5:3, 4?

 ¹¹ Mang e gad be fil ko n’en ni buch rok David? Gad be fil riy ni faanra i par nib ga’ fan u wan’dad urngin ban’en ni ke pi’ Jehovah ngodad, ma aram e rayog ni ngad gelgad ko chogow. (Mu beeg e Efesus 5:3, 4.) Thingari fel’ u wan’dad e tin bay rodad. Nap’an ni gad ra tabab i fil e Bible ko girdi’, ma sana gad ma yog ngorad ni ngar lemnaged ban’en nib manigil ni ke pi’ Jehovah ngorad mar pininged e magar riy ngak. Faanra rin’ be’ e re n’ey ni gubin e rran u lan reb e wik, ma ra yan i m’ay reb e wik ma medlip ban’en ni ke yibilay murung’agen. (1 Thess. 5:18) Ga ma rin’ ban’en ni aray rogon, fa? Faanra um fal’eg i lemnag urngin ban’en ni ke rin’ Jehovah ni fan ngom, ma ra ayuwegem ni ngaum pining e magar ngak. Ma faanra um pining e magar, ma aram e ra fel’ u wan’um e tin bay rom. Ma faanra ba fel’ u wan’um e tin bay rom, ma aram e dab mu chogownag ban’en ndariy rom.

12. Mang e rin’ Judas Iskariot ni bochan e chogow?

¹² Chogow e aram e n’en ni k’aring Judas Iskariot ni nge yognag Jesus. Som’on e gathi ir be’ ni aram rogon. (Luke 6:13, 16) Ya mel’eg Jesus ni nge mang reb e apostal rok. Dabisiy ni i pagan’ Jesus ngak ni bochan e ir e ni tay ni nge milfan tafen e salpiy ngak. Aram e re salpiy ni i fanay Jesus nge pi apostal ni fan ko tin nib t’uf rorad u nap’an ni yad be machib. Ere pi salpiy nem e bod rogon fapi salpiy ni ayuw ni gad ma pi’ e ngiyal’ ney ni fan ko maruwel ni gad be rin’ u ga’ngin yang e fayleng. Machane yan i taw nga ba ngiyal’, ma aram me tabab Judas ni nga i iring fapi salpiy ni yugu aram rogon ni yugu ma rung’ag ni ma yog Jesus nib kireb e chogow. (Mark 7:22, 23; Luke 11:39; 12:15) De fol Judas ko ginang ni i pi’ Jesus.

13. Mingiyal’ e m’ug u rarogon Judas ni be chogownag e salpiy?

¹³ De n’uw nap’an u m’on ni ngan li’ Jesus nge yim’, me m’ug e re n’ey u rarogon Judas. Ngiyal’ nem e ke yan Jesus, nge pi gachalpen, nge Maria, nge Martha ni walagen ko abich nga tafen Simon ni be’ nib daraw. Nap’an ni yad be abich, me sak’iy Maria nge puog ba florida nib tolang puluwon nga daken lolugen Jesus. Ere ri damumuw Judas nge tin ka bay i gachalpen Jesus. Sana lemnag e tin ka bay i gachalpen Jesus nrayog ni ngan fanay e re salpiy nem nga boch ban’en ni fan ko machib. Machane Judas e ba thil e n’en be lemnag. “Ir be’ nib moro’ro’,” ma baadag ni nge iring e salpiy u lan fare tafen e salpiy. Ma bochan chogowen e salpiy, ma aram me yognag Jesus.​—John 12:2-6; Matt. 26:6-16; Luke 22:3-6.

14. Uw rogon ni fol ba wu’ i mabgol ko fare fonow ni bay ko Luke 16:13?

¹⁴ Baaray ba fonow ni pi’ Jesus ngak pi gachalpen ni gaar: “Dabiyog ni ngam manged tapigpig rok Got ma ki gimed e tapigpig rok e salpiy.” (Mu beeg e Luke 16:13.) Kab riyul’ e re thin ney. Am lemnag rogon ni fol ba wu’ i mabgol u Romania ko re thin ney ni yog Jesus. Ni ognag reb e maruwel ngorow u reb e nam nib fel’ rogon e par riy. Rognew ni lungurow: “Bay e salpiy nib ga’ ni kug loannagew nib t’uf ni nggu thangew. Ere som’on e gu lemnagew nre maruwel ney e tow’ath ni ke pi’ Jehovah ngomow.” Machane bay e magawon ko re n’ey ya faan yow ra un ko re maruwel ney, ma ra lich e tayim ni fan ko pigpig rorow ngak Jehovah. Tomuren nra beegew fare article ni bay ko Fare Wulyang Ntagil’ E Damit ko August 1, 2008 ni kenggin e “Mpired Ni Gimed Ba Yul’yul’ U Polo’ I Gum’irchamed,” ma aram mar dugliyew e n’en ni ngar rin’ew. I lungurow: “Faanra fan ni nggu wan gu parew nga yugu reb e nam e bochan ni nge yoor e salpiy romow, ma aram e tha’ u thilmad Jehovah e gathi aram e n’en nib ga’ fan u wan’mow. Gamow manang nra magawon e tha’ u thilmad Jehovah.” Ere ra siyegew  e re maruwel nem. Ere mang e buch? I pirieg fare pumoon reb e maruwel ko nam rorow nib gaman puluwon riy ni ngar yognagew e tin nib t’uf rorow. I gaar leengin: “Gubin ngiyal’ nra ayuweg Jehovah e pi tapigpig rok.” Ba felfelan’ e re wu’ i mabgol ney ni kar tew Jehovah ni ir e Masta rorow ma gathi salpiy.

15. Mang fan nib pagan’dad nrayog ni ngad thaygad ko pi wup rok Satan?

¹⁵ Mang e susun ni ngad rin’ed ni faanra gad be guy ni ke tolangan’dad ara gad be chogownag boch ban’en? Rayog ni ngad thilyeged rarogodad! I yog Paul ni piin “ke kolrad” Moonyan’ e rayog ni ngar milgad nga orel ko wup rok. (2 Tim. 2:26) Aram e n’en ni buch rok David. I fol ko fonow ni pi’ Nathan ngak, me kalngan’, miki guy rogon ni nge fel’ e tha’ u thilrow Jehovah bayay. Dab mu pagtalin nib gel Jehovah ngak Satan. Ere faan gad ra pag Jehovah ni nge ayuwegdad, ma aram e rayog ni ngad thaygad ko pi wup rok Moonyan’.

16. Mang e ra ayuwegdad ni ngad siyeged e pi wup rok Satan?

¹⁶ Ere ba fel’ ni ngad guyed rogon ndab da awgad ko gal wup rok Satan ney, ko bin ngad awgad ngay mfin da guyed rogon ni ngad thaygad riy. Rayog ni ngad rin’ed e re n’ey u daken e ayuw rok Got. Machane dab da lemnaged ni gad ba gel ndabiyog ni nge tolangan’dad ara ud chogowgad! Mus ko pi tapigpig rok Jehovah ni ke n’uw nap’an ni kar pigpiggad ngak ni ke buch e re n’ey rorad. Ere mmeybil ngak Jehovah ni gubin e rran ni nge ayuwegem ni ngam fal’eg i yaliy rogon e lem nge ngongol rom. (Ps. 139:23, 24) Mu athamgil u rogon nrayog rom ni nge dabi tolangan’um ara um chogownag boch ban’en!

17. Mang e bayi buch rok Moonyan’ ndab ki n’uw nap’an?

¹⁷ Ke yan bokum biyu’ e duw ni ke par Satan ni bod be’ ni ma mokol gamanman. Machane dabki n’uw nap’an ma bay ni kol me tomur riy min thang. (Rev. 20:1-3, 10) Gad be athapeg ni nge taw ko re rran nem. Machane chiney ndawori taw ko ngiyal’ nem e ngaum kol ayuw ko pi wup rok Satan. Mu athamgil u rogon nrayog rom ni nge dabi tolangan’um ara um chogownag boch ban’en. Mag dugliy u wan’um ni ngam ‘togopluw ngak fare moonyan’, me mil rom.’​—Jas. 4:7.