1. Kibila mbi bamfuanikisila Satana banga nlengi wu bibulu?

NLENGI voti nlozi wu bibulu, makani ma mueka to mambanga yandi—ma kubuila voti kuvonda kibulu. Satana mvandi wunsadilanga mintambu miwombo. Nandi kalenda sadila batu bake yitu bafikama, dedi bo kasadila bakundi bayenda kue bomba Yobi. (Yobi 18:8-10) Mbi nlengi kamvanganga muingi kibulu kibakana mu ntambu’andi? Nandi wumfionguninanga theti matedi kibulu beni. Dedi, wuntombanga kuzaba nzila mbi kamviokilanga, mbi kanzolanga kudia ayi ntambu mbi kalenda fika bakinina. Satana mvandi widi buka nlengi wu bibulu wupisuka. Nandi wuntombanga theti kutu zaba buboti. Dedi, kuzaba biuma tuntianga ayi mbi tuntomba mu luzingu. Bosi wuntulanga ntambu wo kazebi ti sa tufika bakana mu khambu zaba. Vayi Kibibila kintuba ti, kheti tube bakana mu ntambu wu Satana, befu tulenda vionuka. Ayi kiawu kitulonga buidi tulenda tinina mintambu mi Satana.

2. Mintambu mbi miodi Satana kanluta sadilanga?

² Lungundayi ayi nzinunu. * midi mintambu Satana kanluta sadilanga beni muingi kubaka bisadi bi Yave. Mu bivevi na bivevi bi mimvu mima vioka, Satana wunsadilanga beni mintambu amiomio ayi wu mibakilanga beni ndandu. Nandi ba kumfuanikisa mvandi buka nlengi wu zinuni wunlekanga mintambu muingi kabaka bu kubuidila zinuni. (Minku. 91:3) Vayi befu tuisi ko kibila ki kubakinina mu kinzimbukulu mu mintambu mi Satana. Kibila mbi? Kibila Yave wutu zabikisa mintambu mioso Satana kansadilanga.—2 Koli. 2:11.

3. Kibila mbi Yave katumina basonika mu Kibibila bifuani bi batu babua mu mintambu mi Satana?

³ Phila yimueka Yave katu luengisilanga mu matedi lungundayi ayi phuila yi kubaka biuma biwombo, yidi mu kutula bifuani biwombo  mu Kibibila bintubila batu babua mu mintambu amiomio. Mu bifuani tuentubila, mona buidi Satana kabuisila bisadi bi Yave baba bayonzuka mu kiphevi. Vayi mawu mansundula ti befu tulendi nunga ko mintambu beni? Ndamba. Kibila Yave wutuma kusonika biawu mu Kibibila muingi ‘kutu lubula.’ (1 Koli. 10:11) Yave zebi ti bo tunlonguka matedi bifuani beni, mawu mankuiza tusadisa kubika bua voti kuvionyuka mu mintambu mi Satana.

4. Mbi lungundayi lulenda kutu tuadisa?

⁴ Satana wuntomba muingi befu tuba lungundayi. Nandi zebi ti befu kubika khadulu ayoyo yitu yala, tunkuiza ba buka nandi ayi kuzimbisa luaku lu kuzinga mvu ka mvu. (Zinga. 16:18) Diawu mvuala Polo katu lubudila mu mambu amama: ‘Lubika ba lungundayi voti lunyemu muingi lubika bua mu nzengulu bazengila Satana.’ (1 Timo. 3:6, 7) Mawu malenda monikina kioso kua kisadi ki Yave, kuba kuandi ti tuidi bamona mu kiedika voti mimvu miwombo tueka mu kusadila Yave.

5. Dedi bummonisina Mpovi 7:16, 20, buidi mutu kalenda monisina lungundayi?

⁵ Lungundayi yidi mbonosono yi buimi. Satana wuntomba ti bo tumviokila mu ziphasi, tuyindulanga to mu befu veka kubika kuandi mu Yave. Dedi, boti babe kuvunina voti babe kuvangila mambu makhambulu masonga, Satana wuntomba muingi ngie wuvana foto kuidi Yave voti kuidi zikhomba. Ayi wuntomba ngie wuyindula ti, phila yi kudedikisila mambu beni yidi mu kunatina mawu mu phil’aku kubika kuandi mu kulandakana zithuadusulu Yave katu vana zidi mu Diambu Diandi.—Tanga Mpovi 7:16, 20.

6. Mbi wulenda longuka mu kifuani ki khomba yi nkieto wunkalanga ku Holanda?

⁶ Tala kifuani ki khomba yimueka wunkalanga ku Holanda wuba mfiti mu kumona zinzimbala zi bankaka. Nandi wubaka makani ma kukhambu bika mambu amomo matatamana kumonika. Diawu khumbu ziwombo kaba belanga mu kiunda va naveka ayi kabasa zabanga ko bu kubaludila mabanza amomo. Nandi wutuba: “Yikamba nnuni’ama muingi tubaluka  kimvuka kinkaka.” Vasa vioka ko thangu yiwombo bo bawu batala video yi JW Broadcasting^® yi Ngonda Yintatu mvu 2016. Ayi video beni yivana zithuadusulu zimboti mu matedi kuvibidila mu zinzimbala zi bankaka. Khomba beni wubue tuba: “Yivisa ti vaba tombulu minu veka kuyifiongunina ayi kukikulula muingi kubalula zinzimbala ziami veka, kubika kuandi kutsikika thalu mu zinzimbala zi zikhomba mu kimvuka. Video ayoyo mvandi yitsadisa kutsikika mayindu mama kuidi Yave ayi mu luyalu luandi.” Mbi ngie wulenda longuka? Bo wumviokila mu mambu ma phila ayoyo, tsikika mayindu maku kuidi Yave. Dinda kuidi Yave muingi ka kusadisa wutadila bankaka mu phila yifuana. Kibila Tat’itu yi diyilu wummonanga zinzimbala zi zikhomba zitu vayi kheti bobo, wuba lemvukilanga. Ayi Nandi wuntomba ngie mvaku wuvanga mawu.—1 Yoa. 4:20.

7. Mambu mbi mamonikina Ntinu Uzia?

⁷ Lungundayi lunata Ntinu Uzia kubayisa malongi ayi kuvangila mambu mu phila yikhambu fuana. Mu lusadusu lu Yave, Uzia wununga kuvanga bisalu biwombo bimboti. Dedi, wununga mimvita miwombo, wutungisa bibuangu biwombo ayi wutuadisa bisalu biwombo bi kuvata. (2 Lusa. 26:3-7, 10) Vayi Kibibila kintuba ti, ‘bo kayiza baka biuma biwombo, nandi wukuna lungundayi mu ntima ayi wukituadisa ziphasi ziwombo.’ Yave wuvana nsiku ti zinganga nzambi bawu to baba nsua wu kuvika malasi ku tempelo. Vayi Ntinu Uzia bo kaba lungundayi ayi kaba tomba kuvanga mambu kakhambu ba nsua, nandi wuvika malasi ku tempelo. Yave kasa kuangalala ko mu mawu ayi wunsinga mu mbela yi buazi. Uzia wutatamana kuba buazi mu luzingu luandi loso.—2 Lusa. 26:16-21.

8. Dedi bummonisina 1 Kolinto 4:6, 7, buidi tulenda tatukila lungundayi?

⁸ Bukiedika ti befu mvitu tulenda bua mu ntambu awowo Uzia kabua? Tala kifuani ki José. Nandi wuba mfumu kisalu ayi wuba nkulutu kimvuka baba kinzikanga beni. Nandi waba vanganga malongi mu zikhutukunu zinneni ayi minkengididi mi bimvuka baba kuendanga kuidi nandi muingi kue dinda malongi. Vayi José wutuba: “Minu yifiatila mu diela diama ayi mu luzabu luama. Yibika kufiatila mu Yave mu kuyindula ti yilenda nunga kuvanga mamoso minu veka, diawu yikhambu bue kuwila malongi ma Yave.” Ya José wubua mu disumu dingolo ayi wuvayikusu. Bo vavioka mimvu miwombo, nandi wuvutuka mu kimvuka ayi wutuba: “Yave wundonga ti biyeku tuntambula, bakana  ko biawu bilutidi nkinza, vayi kuvanga mambu nandi kantomba.” Tutebukanga moyo ti mambu tuzebi kuvanga ayi biyeku tuntambula mu kimvuka, kuidi Yave bimbanga. (Tanga 1 Kolinto 4:6, 7.) Befu kuba lungundayi, Yave kalendi tusadila ko.

9. Mbi phuila yi kubaka biuma biwombo yinata Satana ayi Eva kuvanga?

⁹ Bo tunyindula mu matedi phuila yi kubaka biuma biwombo, ḿba mutu wutheti wunkuizanga va kilunzi kitu widi Satana. Bo kaba mbasi yi Yave, Satana wuba biyeku biwombo, vayi nandi waba tomba kubue tambula diaka binkaka. Nandi waba tomba mbuongimini yo Yave to kafueni tambula. Satana kantomba tuba buka nandi, diawu kantombila muingi tubika kuangalala mu biuma tuidi. Mavanga mandi amomo matona mu thangu kavuna Eva. Yave wuvana kuidi Adami ayi Eva bidia biwombo muingi bayangalala. Nandi wuba kamba ti balenda dia kuawu makundi ma minti mioso, vayi wumueka to balendi dia ko. (Ngene. 2:16) Vayi kheti bobo, Satana wunata Eva kuyindula ti, vaba tombulu nandi kudia dikundi adiodio Yave kayimina. Eva kasa kuangalala ko mu biuma Yave kamvana. Ayi tuzebi mambu mayiza monika Eva wuvukumuka, wubua mu disumu ayi wuyiza fua.—Ngene. 3:6, 19.

10. Buidi phuila yi kutomba biuma biwombo yiyiza bela ntambu kuidi Ntinu Davidi?

¹⁰ Phuila yi kutomba biuma biwombo yinata Ntinu Davidi kuzimbakana biuma Yave kamvana. Dedi kimvuama, kintinu ayi kununga zimbeni ziandi. Davidi wuzaba ti Nzambi, Nandi wumvana diela di kuvangila mambu kaba nunga kuvanga diawu katubila: ‘Diela di Nzambi dilutidi muingi ku ditubila!’ (Minku. 40:5) Vayi buviokila thangu, Davidi wuzimbakana ti Yave Nandi wumvana biuma kaba. Nandi kabasa kuangalalanga ko mu biuma kaba ayi waba tomba diaka binkaka. Kheti wulevula nsiku wu kuba bakieto bawombo, nandi wubue zinina nkazi wungana. Nkieto beni wuba Beta Seba ayi nnuni’andi wuba Ulia. Davidi wubua mu kitsuza na Beta Seba ayi nandi wuyiza ba mu buemba. Ayi Davidi wuvanga mamoso muingi kuvondisa Ulia nnuni Beta Seba! (2 Samu. 11:2-15) Mbi Davidi kaba yindula? Nandi kaba muena ti Yave kabasa monanga ko mambu amomo? Kheti wuba kisadi kikuikama ki Yave, vayi nandi wuyiza bua mu ntambu wu kutomba biuma biwombo ayi mawu mantuadisa beni ziphasi. Vayi buviokila thangu Davidi  wuyiza kikinina ayi wunyongina masumu mandi. Nandi wutonda beni bo Yave kammonisa mamboti bo kabue vutuka kuba nkundi’andi!—2 Samu. 12:7-13.

11. Dedi bummonisina Efeso 5:3, 4, mbi bilenda kutu sadisa tubika bua mu ntambu wu nzinunu?

¹¹ Mbi tulenda longuka mu kifuani ki Davidi? Tulenda longuka ti, tufueti nuana nzingu wu mayindu mambi ayi kutatamana kutondanga mu biuma bioso Yave katuvananga. (Tanga Efeso 5:3, 4.) Tufueti kuangalala mu biuma tuidi. Minlonguki mi Kibibila baba kindisanga batsikika mayindu mu lusakumunu Yave kaba vananga ayi kuntondanga mu mawu. Kadika mutu mu befu na kuvanga mawu kadika kilumbu mu kadika sabala, mansundula ti vankuiza ba sambuadi di mambu tunkuiza tondilanga Yave. (1 Tesa. 5:18) Ngie kuyindula mu mambu moso Yave kama kuvangilanga, mawu mala kusadisa kumvutudilanga matondo. Ayi bo wuntonda yangalala mu biuma widi. Kibila befu kukuangalala mu biuma tuidi, tualasa bika ko khadulu ayoyo muingi yi tuyala.

12. Mbi phuila yi kubaka biuma biwombo yinata Yuda kuvanga?

¹² Phuila yi kutomba biuma biwombo yinata Yuda kuba mvakudi. Vayi buisi ko buawu nandi kabela. (Luka 6:13, 16) Kibila Yesu wunsola muingi kaba wumueka mu bapostolo bandi. Yuda wuba mutu wu lufiatu, kibila nandi waba kiebanga kasu yi zimbongo. Yesu ayi bapostolo, baba sadila zimbongo beni muingi kukieba zitsatu ziaba tombulu mu kisalu ki kusamuna, dedi bo bansadilanga minkhayilu tumvananga bubu. Vayi buviokila thangu, Yuda wutona kukuiba kheti mu zindubu Yesu kaba vananga mu matedi phuila yi kutomba biuma biwombo. (Malako 7:22, 23; Luka 11:39; 12:15) Vayi nandi wubayisa zindubu beni.

13. Thangu mbi Yuda kamonisina ti wuba beni phuila yi kubaka zimbongo?

¹³ Yuda wuluta monisa khadulu ayoyo mu mambu mamonika ava Yesu bamvonda. Yesu na minlandikini miandi kubunda mvandi Malia ayi khomb’andi Malata, baba tumisa kuidi Simoni muingi bedia va kimueka. Mu thangu baba dia, Malia wutelama ayi wudukudila ku ntu Yesu malasi ma thalu. Yuda ayi minlandikini minkaka badasuka beni. Minlandikini minkaka baba yindula khanu basumbisa malasi beni muingi babaka zimbongo zi kudukisila zitsatu zi kisalu ki kusamuna. Vayi Yuda wuba makani mankaka. Bo kaba muivi waba tomba babuela zimbongo mu kasu muingi kabaka bu kuibila. Buviokila thangu, phuila yi kutomba biuma biwombo yinata Yuda kuvakula Yesu mu thalu yi zimbongo baba sumbilanga mvika.—Yoa. 12:2-6, Matai 26:6-16; Luka 22:3-6.

14. Buidi dikanda adiodio basadila dilongi didi mu Luka 16:13?

¹⁴ Yesu wutebula minlandikini miandi moyo mu kuba kamba kiedika akiki: “Lulendi sadila ko Nzambi ayi busina.” (Tanga Luka 16:13.) Ayi mawu makhidi nkinza nate bubu. Tala kifuani ki zikhomba zitu badi bakuela bankalanga ku Romênia. Mambu bamonikina mammonisa kivisa ki mambu Yesu katuba. Mu thangu yikhufi, bawu babaka kisalu ku tsi yinkaka kuidi luzingu lukhambulu beni phasi. Bawu batuba: “Tuba pholo yiwombo yi kufuta ku banco, diawu va thonono tumuena ti kisalu akiokio kiba lusakumunu lu Yave”. Vayi bayindula ti kisalu beni kilenda kuba tula nkaku mu kisalu kiawu kuidi Yave. Ayi bo batanga Kibanga ki Nsungi ki 15 Ngonda Yinana ki mvu 2008, kiba ntu diambu mu mbembu’itu: Tatamana Wukuikama mu Khambu ba Ntima Wuvasuka. Bosi bawu babaka makani: “Boti makani mitu maba ma kubaka zimbongo ziwombo muingi kue sadila ku tsi yinkaka, khanu tusa tula ko Yave va theti mu luzingu luitu.” Tuzaba ti befu kutambula kisalu beni, kifusa kitu kinkuiza dekuka. Mambu mbi mayiza monika? Nnuni wubaka kisalu ku  tsi bakala muingi kudukisa zitsatu ziawu. Ayi nkazi wutuba: “Koko ku Yave, kuisi ko ku khufi muingi kutu sadisa.” Zikhomba aziozio badi beni mayangi kibila basola Yave kaba Mfumu’amu kubika kuandi zimbongo.

15. Kibila mbi tulenda bela lufiatu ti tulenda vionuka mu mintambu mi Satana?

¹⁵ Mbi tufueti vanga befu kubakula ti tube bua mu ntambu wu lungundayi voti wu nzinunu? Befu tulenda vionuka mu mintambu amiomio! Kibila mvuala Polo wutuba: ‘Satana wuba kanga vayi bawu bavionuka mu mintambu.’ (2 Timo. 2:26) Dedi, Davidi wuyuwa tsembulu yi Natani, diawu kanyongina masumu mandi ayi wuvutula kikundi kiandi na Yave. Bika kuzimbakana ti Yave lutidi lulendo kena Satana. Diawu befu kukikinina lusadusu lu Yave, tulenda vionuka mu mioso kuandi mintambu Satana kankubika.

16. Mbi bilenda kutu sadisa muingi tubika bua mu mintambu mi Satana?

¹⁶ Bukiedika, befu tulendi tina ko mintambu mi Satana, vayi tulenda ku mitatuka. Tulenda nungina mawu mu lusadusu lu Yave. Vayi tubika kuyifiatila mu kuyindula ti tulendi bua ko mu mintambu amiomio. Kibila bisadi biwombo bi Yave mvandi babua mu mintambu amiomio mi kuba lungundayi ayi kuzinina. Dinda kuidi Yave kadika kilumbu muingi ka kusadisa wubakula boti zikhadulu aziozio zimbi zidi mu kukonzuka mu ntim’aku muingi zibika tuadisa mayindu maku ayi mavanga maku. (Minku. 139:23, 24) Diawu vanga mamoso wulenda nunga muingi wubika bua mu ntambu wu lungundayi ayi phuila yi kubaka biuma biwombo!

17. Mambu mbi mben’itu Satana kambelama kumonikina?

¹⁷ Mu mimvu miwombo Satana wunsalanga banga nlengi wu bibulu. Vayi thangu yiluelu yisiedi muingi bantula mu buloku ayi bambunga. (Nzai. 20:1-3, 10) Tuidi mu kuvingila beni kilumbu akiokio. Vayi nate kiawu kituka, tufueti ba keba keba mu mintambu mi Satana. Diawu tatamana kuvanga mangolo muingi lungundayi ayi phuila yi kubaka biuma biwombo yibika ku kuyala. Mvandi tatamana “kunuanisa Satana ayi nandi wala kutina.”—Yako. 4:7.