1. ¿Xiñee zeeda gaca Binidxabaʼ casi ti hombre ni rinaazeʼ maniʼ?

NI RACALAʼDXIʼ ti binni ni rié guuzeʼ maniʼ nga guuti o guinaazeʼ ti maniʼ interu nabani. Para ganda gúnibe ni la? riquiiñebe trampa, casi ca ni bizeeteʼ tobi de ca ni ná xhamigu Job (Job 18:8-10). ¿Ximodo runi hombre riʼ para guiaba maniʼ ca lu trampa stiʼ yaʼ? Rundaachibe laame para gúʼyabe pa ladu rieme, xi riuuláʼdxime ne xi zanda guchibi laame. Ngaca nga runi Binidxabaʼ né laanu, rundaachibe laanu para gánnabe xi rúninu ne xi riuuláʼdxinu gúninu ne ora cadi cabézanu ni la? riguíxhebe ti trampa laanu. Peru Biblia rabi laanu xi naquiiñeʼ gúninu para cadi guiábanu lu trampa stiʼ Binidxabaʼ ne pa guiábanu lúcani la? laaca rábini laanu xi naquiiñeʼ gúninu para guireʼnu de lu ni.

2. ¿Xi chupa trampa jma riquiiñeʼ Binidxabaʼ?

² Chupa de ca trampa ni jma riquiiñeʼ Binidxabaʼ nga, gucaabe binni gaca orgulloso ne guyubi gapa jma. * Maʼ stale iza de riquiiñebe ca trampa riʼ, ne stale tu huayaba lúcani. Zeeda gaca Binidxabaʼ casi tuuxa ni rinaaze maniʼ ni ripapa ni riquiiñeʼ stale cosa para gusaba ca manihuiiniʼ lu trampa stiʼ (Sal. 91:3). Peru qué zanda diʼ quiteʼ Binidxabaʼ laanu, purtiʼ cayabi Jehová laanu gunáʼ nga ca trampa ni riquiiñebe (2 Cor. 2:11).

3. ¿Xiñee bidii Jehová lugar guicá lu Biblia ni bizaaca ca binni ni guca orgulloso ne ca ni gucuá ique gapa jma?

³ ¿Ximodo riguixhená Jehová laanu para cadi gácanu binni orgulloso ne cadi guicá íquenu gápanu jma yaʼ? Rúnibe ni  ra bidiibe lugar guicá lu Biblia ni bizaacaʼ ca xpínnibe dxiqué ti zacá guizíʼdinu de laacani. Lu ca ejemplu ni chiguidúʼyanu nagasi, zadúʼyanu ximodo gudxite Binidxabaʼ caadxi de ca xpinni Jehová ni napa experiencia. Peru ¿ñee riníʼ nga zaguítebe laanu la? Coʼ. Gudixhe Jehová guicá ca relatu riʼ ndaaniʼ Biblia, para quixhená ca ni laanu (1 Cor. 10:11). Nanna Jehová zanda guizíʼdinu de ca relatu riʼ ti cadi guiábanu lu ca trampa stiʼ Binidxabaʼ.

4. ¿Xi zanda guizaacanu pa gácanu binni orgulloso?

⁴ Racalaʼdxiʼ Binidxabaʼ gácanu binni orgulloso. Purtiʼ nánnabe pa gácanu binni orgulloso, zácanu casi laabe ne zunítinu guendanabani ni qué zaluxe (Prov. 16:18). Nga runi, gudixhená apóstol Pablo laanu ora guníʼ pa gácanu binni orgulloso zacaanu «condena ni gucuaa Binidxabaʼ» (1 Tim. 3:6, 7). Guiranu zanda gueeda guiábanu lu trampa stiʼ Binidxabaʼ neca huaxiéʼ tiempu zinenu de cayúninu ni ná Jehová o maʼ zinenu stale iza.

5. Casi ná Eclesiastés 7:16, 20, ¿xi runi ti binni orgulloso?

⁵ Ti binni orgulloso ruyubi puru si para laa. Racalaʼdxiʼ Binidxabaʼ guiníʼ íquenu stúbinu zanda gúninu intiica cosa sin gacané Jehová laanu, jmaruʼ si ora nápanu guendanagana. Guzéʼtenu ti ejemplu, ¿ñee huagaanicabe donda íquenu pur ti cosa ni cadi laanu bíninu la? ¿Ñee huayúnicabe laanu ti cosa ni cadi jneza la? Ñuulaʼdxiʼ Binidxabaʼ nugáʼninu donda ique Jehová ne ca hermanu stinu. Ne laaca racaláʼdxibe guiníʼ íquenu zanda gúninu intiica cosa modo racaláʼdxinu lugar de chinándanu ca conseju stiʼ Jehová ni zeeda lu Stiidxaʼ (biindaʼ Eclesiastés 7:16, 20).

6. ¿Xi rizíʼdinu de ni bizaaca ti hermana?

⁶ Guidúʼyanu ni bizaaca ti hermana, guca nagana para laabe guni huantarbe modo naca ca hermanu. Dede yendá ora maʼ qué ninabe nidxaagabe laacaʼ. Sicaríʼ guniʼbe: «Bineʼ sentir nuaaʼ stubeʼ,  ne guca nagana para naa guidxaagaʼ ca hermanu. Ngue runi gudxeʼ xheelaʼ guidxaʼdu de congregación». Peru biiyaʼ hermana riʼ programa JW Broadcasting^® ni biree lu beeu marzo de 2016 ra cayete caadxi conseju para ganda guni huantarnu modo naca xcaadxi. Sicaríʼ guníʼ hermana que: «Bieneʼ naquiiñeʼ gacaʼ humilde ne gudieeʼ cuenta paraa ngue cuchee lugar de guicá iqueʼ guchaa modo naca ca hermanu. Gucané programa que naa jma guicá iqueʼ modo naca Jehová ne modo runi mandar». Nga runi, ora nápanu guendanagana cadi guiaandaʼ laanu modo naca Jehová, guinábanu laabe gacanebe laanu guidúʼyanu ca hermanu stinu modo ruuyabe laacaʼ. Nanna Bixhózenu ni nuu guibáʼ ruchee ca hermanu stinu, peru runi perdonar laacabe, ne laaca ngaca racaláʼdxibe gúninu (1 Juan 4:20).

7. ¿Xi bizaaca rey Uzías?

⁷ Guca Uzías, rey stiʼ Judá, ti binni orgulloso, qué niná nucaadiaga conseju ni bidiicabe laa ne biʼniʼ xiixa ni cadi naquiiñeʼ ñuni. Jneza biree ca cosa ni bíʼnibe, biʼniʼ ganarbe stale guerra, bicuibe stale guidxi ne bíʼnibe stale dxiiñaʼ layú. Gucané Dios laabe para guiree ca cosa ni bíʼnibe jneza (2 Crón. 26:3-7, 10). Peru Biblia ná ti tiempu despué, gúcabe ti binni orgulloso ne biyúbibe guendananá stibe. Maca guníʼ Jehová ca sacerdote si nga zanda guzaaquicaʼ inciensu ndaaniʼ templu, peru cumu orgulloso rey Uzías, gucalaʼdxiʼ ñúnini laa, ngue runi biʼniʼ huará Jehová laabe de lepra. Gupa Uzías lepra biaʼ dxi bibani (2 Crón. 26:16-21).

8. ¿Ximodo racané 1 Corintios 4:6, 7 laanu cadi gácanu ti binni orgulloso?

⁸ ¿Ñee laaca zanda guiábanu lu trampa stiʼ Binidxabaʼ, gácanu binni orgulloso ne gúninu ti cosa malu casi biʼniʼ rey Uzías la? Guidúʼyanu ni bizaaca José. Galán rié ni laabe lu negocio stibe ne nácabe ancianu de congregación ni runi respetar ca hermanu. Rudiibe discursu ra asamblea, ne laabe nga rinabadiidxaʼ ca superintendente de circuito xiixa. Sicaríʼ guniʼbe: «Bineʼ cré nannaʼ stale, napaʼ experiencia ne qué nuyubeʼ ñacané Jehová naa. Guníʼ iqueʼ naguidxi nuu fe stinneʼ, ngue runi qué nulabeʼ ca conseju ni zeeda de Jehová ni bidiicabe naa». Biʼniʼ cometer José ti pecadu grave ne guca expulsar. Caadxi iza despué biguétabe  ndaaniʼ xquidxi Jehová. Sicaríʼ guniʼbe: «Maʼ bisiidiʼ Jehová naa, ni jma risaca nga gúninu ni rinábabe laanu, ne cadi privilegiu ni nápanu ndaaniʼ congregación». Cadi guiaandaʼ laanu, pa randa rúninu xiixa ne pa nápanu xiixa privilegiu ndaaniʼ congregación, de Dios nga zeedacani (biindaʼ 1 Corintios 4:6, 7). Pa nácanu binni orgulloso qué zaquiiñeʼ Jehová laanu.

9. ¿Xi biʼniʼ Binidxabaʼ ne Eva purtiʼ biyúbicaʼ gápacaʼ jma?

⁹ Ora guzéʼtenu de ti binni ni ruyubi gapa jma, zándaca guietenaláʼdxinu de Binidxabaʼ. Dxi gúcabe tobi de ca ángel stiʼ Jehová, gúpabe stale privilegiu galán, peru gucaláʼdxirube gápabe jma. Guyuube ñuni adorar binni laabe ne cadi Jehová. Laaca racalaʼdxiʼ Binidxabaʼ gácanu casi laa, ne cadi chuʼnu nayecheʼ né biaʼ nápanu. Eva nga primé binni bicaabe laa guiníʼ ique zacá. Cumu nadxii Jehová Adán ne Eva gudxi laacabe zanda gócabe de guiráʼ cuananaxhi stiʼ ca yaga ni nuu ndaaniʼ jardín que dede ra guidxá ndaanicaʼ ne gudxi laacabe tobi si cadi gócabe (Gén. 2:16). Peru bisiguii Binidxabaʼ Eva ra bicaa laabe guiníʼ íquebe caquiiñeʼ gobe cuananaxhi ni gudxi Dios laacabe cadi gócabe. Qué ñuu Eva nayecheʼ né biaʼ napa ne biyubi gapa jma. Ngue runi bichee ne ra gudiʼdiʼ tiempu guti (Gén. 3:6, 19).

10. ¿Ximodo beeda gaca rey David ti hombre ni ruyubi gapa jma?

¹⁰ Guzéʼtenu ni bizaaca rey David. Bidii Jehová laabe stale cosa, bueltu, gúcabe ti binni risaca ne biʼniʼ ganarbe stale guerra. Bidii David xquixe peʼ Dios pur guiráʼ ni napa ne guníʼ bidii Dios laa jma de biaʼ ni caquiiñeʼ (Sal. 40:5). Peru ti biaje gucalaʼdxiʼ David gapa jma ne bisiaandaʼ guiráʼ ni bidii Jehová laa. Neca nápabe stale xheelabe bíʼnibe ti cosa ni nanalaʼdxiʼ Jehová, biʼniʼ desearbe xheelaʼ sti hombre. Bat-Seba láʼ gunaa que, xheelabe láʼ Urías, ti hitita. Biʼniʼ cometer David adulteriu né Bat-Seba ne guca xiiñiʼ. Peru cadi ngasi laaca biyúbibe modo gatiʼ Urías (2 Sam. 11:2-15). ¿Xi caníʼ ique David ora biʼniʼ ndiʼ pue? ¿Ñee qué niníʼ íquebe pa cayuuyaʼ Jehová laabe la? Despué de stale iza de bíʼnibe ni ná Jehová, biyúbibe para laasibe ne naná modo gudíxhebe ni. Ra gudiʼdiʼ tiempu guníʼ David xi  pecadu biʼniʼ ne guca arrepentir. ¡Nánnanu guizáʼ bidiibe xquixe peʼ Jehová pur biʼniʼ perdonar laabe! (2 Sam. 12:7-13).

11. Casi ná Efesios 5:3, 4, ¿xi naquiiñeʼ gúninu para cadi gácanu ti binni ni ruyubi gapa jma?

¹¹ ¿Xi rizíʼdinu de ni bizaaca David? Ni rizíʼdinu nga naquiiñeʼ gudiʼnu xquixe peʼ Jehová pur guiráʼ ni maʼ bidii laanu ti zacá cadi guyúbinu gápanu jma (biindaʼ Efesios 5:3, 4). Naquiiñeʼ chuʼnu nayecheʼ né ni nápanu, pa gusíʼdinu ca estudiante stinu guiníʼ íquecaʼ xiixa cosa galán biʼniʼ Jehová pur laacaʼ ne gudiicaʼ xquixe peʼ laabe guiráʼ dxi la? biaʼ si ra guizaa ti semana, zuzeetecabe gadxe cosa ni biʼniʼ Jehová pur laacabe lu ca oración ni gúnicabe (1 Tes. 5:18). ¿Ñee ngaca rúninu la? Pa guiníʼ íquenu xi guiráʼ maʼ biʼniʼ Jehová pur laanu zudiʼnu xquixe peʼ laa ne ziuʼnu nayecheʼ né biaʼ nápanu ne óraque qué zácanu ti binni ni ruyubi gapa jma.

12. ¿Xi biʼniʼ Judas Iscariote purtiʼ gucalaʼdxiʼ gapa jma?

¹² Guzéʼtenu de Judas Iscariote. Nánnanu gúcabe ti traidor, peru cadi maca ti binni malu Judas (Luc. 6:13, 16). Cadi guiaandaʼ laanu gulí Jesús laabe para gácabe tobi de ca apóstol stiʼ. Gupa Jesús confianza Judas nga runi gulí laabe para gápabe caja ra riaapaʼ bueltu ni riquiiñeʼ para predicación. Zanda guininu zeeda gaca bueltu que casi ca donación ni rudiʼnu tiempu riʼ para obra mundial. Maca gudxi Jesús ca xpinni gápacaʼ cuidadu cadi gácacaʼ binni ni riuulaʼdxiʼ gapa jma (Mar. 7:22, 23; Luc. 11:39; 12:15). Peru qué nulabi Judas conseju bidii Jesús laa, ngue runi despué bizulú gulaʼnaʼ.

13. ¿Ximodo bisihuinni Judas naca ti binni ni ruyubi gapa jma?

¹³ Ante gatiʼ Jesús bisihuinni Judas naca ti binni ni ruyubi gapa jma. Ti biaje biʼniʼ invitar Simón, ni gupa lepra, Jesús, ca discípulo stiʼ, María ne benda, Marta, ra lidxi. Laga cayócabe gueta, biasa María ne bindaateʼ ti aceite rindáʼ naxhi ni guizáʼ caru ique Jesús. Bidxiichi Judas ne xcaadxi discípulo xiñee biʼniʼ María ndiʼ. Zándaca guníʼ ique ca discípulo que ñanda niquiiñeʼ bueltu saca aceite que lu xhiiñaʼ Dios. Peru cadi pur ngue bidxiichi Judas, «sínuque purtiʼ gubaanaʼ» laa ne racalaʼdxiʼ cuanaʼ bueltu que. Ti tiempu despué pur naca Judas ti binni ni ruyubi gapa jma, biʼniʼ traicionar Jesús ne bitoo laabe biaʼ ridoo ti esclavu (Juan 12:2-6; Mat. 26:6-16; Luc. 22:3-6).

14. ¿Ximodo yenanda ti guendaxheelaʼ conseju ni zeeda lu evangeliu stiʼ Lucas 16:13?

¹⁴ Sicaríʼ gudxi Jesús ca xpinni: «Qué zanda gácatu esclavu stiʼ Dios ne laaca gácatu esclavu stiʼ Bidxichi» (biindaʼ Lucas 16:13). Dxandíʼ ni ná ca diidxaʼ riʼ. Guidúʼyanu ximodo yenanda ti guendaxheelaʼ de Rumania ca diidxaʼ ni guníʼ Jesús riʼ. Biʼniʼ ofrecércabe laacaʼ ti dxiiñaʼ pur ti tiempu, peru napa xidé chécabe sti guidxi ra jma ricu binni. Sicaríʼ guníʼcabe: «Cumu nuzáʼbidu stale bueltu bancu la? nacubi gá que guníʼ íquedu ti ndaayaʼ stiʼ Jehová ngue dxiiñaʼ cayuni ofrecércabe laadu». Peru pa guicaacabe dxiiñaʼ que la? maʼ qué zápacabe tiempu para gúnicabe xhiiñaʼ Jehová. Despué de biindacabe artículo ni láʼ «Guzúʼbanu stiidxaʼ Jiobá de guidubi ladxidoʼno» ni biree lu Torre stiʼ ni rapa 15 de agosto de 2008 gucuaacabe ti decisión. Sicaríʼ guníʼcabe: «Pa nigúnidu dxiiñaʼ sti guidxi para guni ganardu jma bueltu la? maʼ qué ñúnidu ni ná Jehová primé lu xquendanabánidu, ne bidiʼdu cuenta zándaca guixéledu de Jehová». Ngue runi maʼ qué niná ca hermanu riʼ nicaacaʼ dxiiñaʼ que. ¿Xi bizaacaʼ despué yaʼ? Bidxela hermanu riʼ dxiiñaʼ ndaaniʼ  xquidxi ne gucaneni laacaʼ gápacaʼ ni iquiiñecaʼ. Sicaríʼ guníʼ hermana que: «Qué rusaana Jehová de gacané ca xpinni». Nabani guendaxheelaʼ riʼ nayecheʼ purtiʼ Jehová nga xpixuaanacaʼ ne cadi bueltu.

15. ¿Xiñee nanna dxíchinu zanda guireʼnu de lu ca trampa stiʼ Binidxabaʼ?

¹⁵ ¿Laga pa maʼ biábanu lu ca trampa stiʼ Binidxabaʼ ne maʼ nácanu ti binni orgulloso o ti binni ni ruyubi gapa jma yaʼ? ¿Xi zanda gúninu? Apóstol Pablo guníʼ ca ni maʼ biaba lu trampa stiʼ Binidxabaʼ zanda guireecaʼ de luni (2 Tim. 2:26). Nga peʼ nga ni bizaacaʼ David, bicaadiágabe Natán dxi guluu jneza laabe, guca arrepentirbe ne bíʼnibe stipa gaca xhamígube Jehová sti biaje. Cadi guiaandaʼ laanu jma nadipaʼ Jehová que Binidxabaʼ. Pa gudiʼnu lugar gacané Jehová laanu, zanda guireʼnu de lu ca trampa stiʼ Binidxabaʼ.

16. ¿Xi zacané laanu para cadi guiábanu lu ca trampa stiʼ Binidxabaʼ?

¹⁶ Lugar de guireʼnu de lu ca trampa stiʼ Binidxabaʼ la? jma galán gúninu stipa cadi lica guiábanu lúcani. Zanda gacané Dios laanu para gúninu ni bizéʼtenu riʼ. Peru cadi naquiiñeʼ guiníʼ íquenu qué lica ziábanu lu ca trampa stiʼ Binidxabaʼ. Dede ca xpinni Jehová ni maʼ ziné stale iza de cayuni ni nabe rácacaʼ binni orgulloso ne ni ruyubi gapa jma. Nga runi, guinábanu Jehová guiráʼ dxi gacané laanu guidúʼyanu pa maʼ cuzulú caníʼ íquenu o maʼ rúninu modo runi ca binni orgulloso ne ca ni ruyubi gapa jma (Sal. 139:23, 24). Qué chuʼ dxi guiábanu lu ca trampa stiʼ Binidxabaʼ.

17. ¿Xi zazaaca Binidxabaʼ maʼ cadi candaa?

¹⁷ Maʼ stale iza nga de cusaba Binidxabaʼ binni lu ca trampa stiʼ, peru maʼ cadi candaa zaliibibe ne despué zanitilube (Apoc. 20:1-3, 10). ¡Guizáʼ maʼ racaláʼdxinu guedandá dxi ca! Peru laga cabézanu gaca ni bizéʼtenu riʼ chuʼnu cuidadu cadi guiábanu lu ca trampa stibe. Gúninu stipa cadi gácanu binni orgulloso ne ni ruyubi gapa jma. Quixhe íquenu chinándanu conseju riʼ: «Lagucaalú Binidxabaʼ, ne laa zaxeleʼ de laatu» (Sant. 4:7).