1. Mɛni nɛ Yehowa pee kɛ ha mo?

MƐNI blɔ nɔ o gu kɛ ba pee Yehowa Odasefo no? Eko ɔ, o nu “sane kpakpa” a kɛ gu o fɔli, nihi nɛ o kɛ mɛ tsuɔ ní loo nihi nɛ o kɛ mɛ yaa sukuu ɔ a nɔ. Aloo kɛ gu wehi a mi fiɛɛmi ní tsumi ɔ nɔ. (Maak. 13:10) Lɔ ɔ se ɔ, nɔ ko kɛ mo ba kase Baiblo ɔ, nɛ enɛ ɔ he be babauu kɛ mɔde bɔmi. Benɛ ní kasemi ɔ ngɛ nɔ yae ɔ, o ba ná suɔmi kɛ ha Yehowa, nɛ o ba na hu kaa e suɔ mo. Yehowa gbla mo kɛ ba anɔkuale ɔ mi, nɛ amlɔ nɛ ɔ, o ba pee Yesu Kristo kaselɔ, nɛ o ngɛ hɛ nɔ kami kaa o ma ná neneene wami hwɔɔ se. (Yoh. 6:44) O bua jɔ wawɛɛ kaa Yehowa wo nɔ ko he wami nɛ e kɛ mo ba kase Baiblo ɔ, nɛ Yehowa kplɛɛ o nɔ kaa e sɔmɔli ɔmɛ a kpɛti nɔ kake.

2. Mɛni he nɛ wa ma susu ngɛ ní kasemi nɛ ɔ mi?

² Amlɔ nɛ ɔ nɛ wa ba na anɔkuale ɔ, wɔ hu wa ná he blɔ kaa wa maa ye bua ni kpahi nɛ a piɛɛ wa he kɛ nyɛɛ wami blɔ ɔ nɔ. Eko ɔ, wa bua jɔ wehi a mi fiɛɛmi ɔ he, se e he ma nyɛ maa wa ha wɔ kaa wa ma bi nɔ ko kaa e maa suɔ nɛ waa kɛ lɛ nɛ kase Baiblo ɔ aloo waa kɛ nɔ ko nɛ pee Baiblo mi ní kasemi. Anɛ jã ji bɔ nɛ o nuɔ he lo? Ke jã a, lɛɛ o maa na ní komɛ ngɛ ní kasemi nɛ ɔ mi nɛ maa ye bua mo. Wa ma susu níhi nɛ woɔ wɔ he wami nɛ wa peeɔ nihi kaseli ɔ a he. Jehanɛ hu ɔ, wa maa na blɔ nɔ nɛ wa maa gu kɛ da nyagbahi nɛ ma nyɛ ma ha nɛ e ye ha wɔ kaa waa kɛ nihi maa kase Baiblo ɔ a nya. Kekleekle ɔ, nyɛ ha nɛ waa hyɛ nɔ́ he je nɛ e sa nɛ waa fiɛɛ sane kpakpa a nɛ waa tsɔɔ nihi ní hulɔ.

3. Mɛni he je nɛ wa fiɛɛɔ?

³ Benɛ Yesu ngɛ zugba a nɔ ɔ, e fã e se nyɛɛli ɔmɛ kaa a pee  ní enyɔ komɛ. Kekleekle ɔ, e de mɛ ke a fiɛɛ sane kpakpa a nɛ kɔɔ Matsɛ Yemi ɔ he ɔ, nɛ e tsɔɔ mɛ bɔ nɛ a pee lɛ ha. (Mat. 10:7; Luka 8:1) Kaa nɔ hyɛmi nɔ́ ɔ, Yesu de e kaseli ɔmɛ nɔ́ nɛ a pee ke nihi bu Matsɛ Yemi sɛ gbi ɔ tue loo a bui tue. (Luka 9:2-5) Jehanɛ hu ɔ, e tsɔɔ kaa e kaseli ɔmɛ maa fiɛɛ kɛ ha nihi fuu ngɛ he slɔɔtohi. E de mɛ ke, a “maa ye je ma amɛ tsuo odase.” (Mat. 24:14; Níts. 1:8) Ngɛ bɔ nɛ nihi maa pee a ní ha ngɛ fiɛɛmi ní tsumi ɔ he tsuo se ɔ, kaseli ɔmɛ maa ya nɔ nɛ a maa fiɛɛ Matsɛ Yemi ɔ he sane kpakpa a kɛ nɔ́ nɛ Matsɛ Yemi ɔ ma ba tsu.

4. Ngɛ Mateo 28:18-20 ɔ nya a, mɛni e sa nɛ waa pee kɛ piɛɛ Matsɛ Yemi ɔ he sɛ gbi ɔ nɛ wa ngɛ fiɛɛe ɔ he?

⁴ Mɛni ji nɔ́ enyɔne nɛ Yesu fã e kaseli ɔmɛ kaa a pee? E de e kaseli ɔmɛ ke a tsɔɔ nihi nɛ a ye níhi tsuo nɛ e fã mɛ ɔ a nɔ. Eko ɔ, ni komɛ ma susu kaa Kristofohi nɛ a hi si ngɛ kaseli ɔmɛ a be ɔ mi ɔ pɛ nɛ Yesu fã mɛ kaa a fiɛɛ nɛ a tsɔɔ nihi ní. Se anɛ e ji anɔkuale lo? Dɛbi. Yesu tsɔɔ kaa a ma tsu ní tsumi nɛ e he hia nɛ ɔ hluu “kɛ yaa si níhi a blɔ nya tomi ɔ nyagbe be ɔ.” (Kane Mateo 28:18-20.) Eko ɔ, Yesu kɛ fami nɛ ɔ ha benɛ e je e he kpo kɛ tsɔɔ kaseli nɛ a he hiɛ pe 500 ɔ. (1 Kor. 15:6) Jehanɛ hu ɔ, ngɛ nina nɛ e je kpo kɛ tsɔɔ Yohane ɔ mi ɔ, Yesu tsɔɔ heii kaa e sa nɛ e kaseli tsuo nɛ a ye bua ni kpahi nɛ a kase Yehowa he ní.​—Kpoj. 22:17.

5. Mɛni nɔ́ he tomi nɔ́ nɛ Paulo kɛ tsu ní ngɛ 1 Korinto Bi 3:6-9 ɔ nɛ tsɔɔ tsakpa nɛ ngɛ fiɛɛmi kɛ ní tsɔɔmi a kpɛti?

⁵ Bɔfo Paulo ngɔ kaselɔ peemi ní tsumi ɔ kɛ to ngmɔ peemi he, nɛ e tsɔɔ kaa e biɔ babauu pe ní dumi pɛ. E de Korinto bi ɔmɛ ke: “I du, Apolo pue nɔ nyu . . . Nyɛ ji Mawu ngmɔ nɛ́ a ngɛ mi ní tsue.” (Kane 1 Korinto Bi 3:6-9.) Wa ji nihi nɛ a ngɛ ní tsue ngɛ “Mawu ngmɔ” mi. Enɛ ɔ he ɔ, wa duɔ wu ɔ ke wa fiɛɛ, nɛ wa pueɔ nɔ nyu ke wa tsɔɔ nihi ní. (Yoh. 4:35) Se wa le kaa Mawu nɛ haa nɛ wu ɔ waa, nɛ tsɔɔ kaa lɛ nɛ e gblaa nihi kɛ baa e ngɔ.

6. Ke wa ngɛ nihi ní tsɔɔe ɔ, mɛni nɛ e sa nɛ waa ye bua mɛ nɛ a pee?

⁶ Wa ngɛ nihi nɛ a “ngɛ su kpakpa nɛ ma ha nɛ a ná neneene wami ɔ” a se blɔ hlae. (Níts. 13:48) Loko nimli nɛ ɔmɛ ma ba pee kaseli ɔ, e sa nɛ waa ye bua mɛ nɛ (1) a nu nɔ́ nɛ a ngɛ kasee ngɛ Baiblo ɔ mi ɔ sisi, (2) a kplɛɛ nɔ, kɛ (3) a kɛ tsu ní ngɛ a si himi mi. (Yoh. 17:3; Kol. 2:6, 7; 1 Tɛs. 2:13) Nihi tsuo nɛ a ngɛ asafo ɔ mi ɔ ma nyɛ maa ye bua Baiblo kaseli kɛ gu suɔmi kpo nɛ a ma je kɛ tsɔɔ ni he nɛ ɔmɛ kɛ a he nɛ a ma nya ke a ba asafo mi kpe ɔ nɔ. (Yoh. 13:35) Eko ɔ, e he maa hia nɛ nɔ nɛ e ngɛ ní kasemi ɔ nɔ hyɛe ɔ nɛ e ná be fuu kɛ ha Baiblo kaselɔ ɔ nɛ e ye bua lɛ nɛ e ngmɛɛ ní komɛ nɛ e heɔ yeɔ nɛ a “du si wawɛɛ” ngɛ e mi ɔ a he, loo e ye bua lɛ nɛ e kpa ní peepee komɛ. (2 Kor. 10:4, 5) Eko ɔ, e ma he nyɔhiɔhi fuu loko wa ma nyɛ maa ye bua nɔ ko nɛ e pee tsakemi nɛ ɔmɛ ngɛ e si himi mi konɛ e he nɛ su kɛ ha baptisimi. Se tsakemi nɛ ɔmɛ nɛ e maa pee ɔ he hia wawɛɛ.

7. Mɛni nɛ woɔ wɔ he wami nɛ wa ngɔɔ wa he kɛ woɔ fiɛɛmi kɛ kaselɔ peemi ní tsumi ɔ mi?

⁷ Mɛni he je nɛ wa fiɛɛɔ kɛ haa nihi nɛ wa tsɔɔ mɛ ní konɛ a ba pee kaseli ɔ? Kekleekle ɔ, wa peeɔ jã ejakaa wa suɔ Yehowa. Ke o pee nɔ́ fɛɛ nɔ́ nɛ o ma nyɛ kɛ ye fami nɛ ji kaa waa fiɛɛ nɛ waa pee nihi kaseli ɔ nɔ ɔ, o ngɛ tsɔɔe kaa o suɔ Mawu. (1 Yoh. 5:3) Mo susu he nɛ o hyɛ: Suɔmi nɛ o ngɛ kɛ ha Yehowa a lɛ ha nɛ o fiɛɛɔ kɛ haa nihi ngɛ wehi a mi ɔ nɛ. Anɛ jã peemi ngɛ gbɔjɔɔ lo? Eko ɔ, e be gbɔjɔɔ. Kekleekle be nɛ o fiɛɛ ha nɔ ko ngɛ e we mi ɔ, anɛ o tsui po lo? Atsinyɛ jemi ko be he kaa o tsui po! Se o le kaa ní tsumi nɛ ɔ nɛ Yesu suɔ  nɛ o tsu, nɛ o ye jamɛ a fami ɔ nɔ. Nɛ eko ɔ, nɛ be pue mi nɛ ɔ, e he wɛ ha mo kaa o kɛ o he maa wo fiɛɛmi ní tsumi ɔ mi. Nɛ Baiblo mi ní kasemi peemi hu nɛɛ? Anɛ lɔ ɔ hu haa nɛ o tsui poɔ lo? Eko ɔ. Se ke o sɔle kɛ bi Yehowa kaa e ye bua mo nɛ o ye o gbeye yemi ɔ nɔ, nɛ́ e ha nɛ o ná kã nɛ o kɛ pee Baiblo mi ní kasemi ɔ, Yehowa ma nyɛ maa ye bua mo konɛ o nyɛ nɛ o pee nihi kaseli.

8. Ngɛ Maako 6:34 ɔ nya a, mɛni nɔ́ kpa ko hu nɛ maa ye bua wɔ nɛ waa tsɔɔ nihi ní?

⁸ Enyɔne, suɔmi nɛ wa ngɛ kɛ ha nihi ɔ lɛ woɔ wɔ he wami nɛ wa tsɔɔ mɛ anɔkuale ɔ. Kaa nɔ hyɛmi nɔ́ ɔ, ligbi ko ɔ, Yesu kɛ e kaseli ɔmɛ ya fiɛɛ wawɛɛ ngɛ he ko nɛ pɔtɔ a he. A suɔ nɛ a jɔɔ a he ngɛ he ko, se asafo kuu ko na mɛ. Ni ɔmɛ a he pee Yesu mɔbɔ, lɔ ɔ he ɔ, e bɔni mɛ “níhi fuu” tsɔɔmi. (Kane Maako 6:34.) E ngɛ mi kaa pɔtɔ lɛ mohu lɛɛ, se e tsu ní wawɛɛ. Mɛni he je? Yesu ngɔ e he kɛ wo ni ɔmɛ a si fɔfɔɛ ɔ mi. E suɔ nɛ e ye bua mɛ, ejakaa e na kaa a ngɛ nɔ́ nae nɛ a hia hɛ kɛ nɔ fɔmi. Mwɔnɛ ɔ hu ɔ, e ngɛ kaa nɔ́ nɛ nihi ngɛ bua jɔmi nɛ a ngɛ manye yee ngɛ si himi mi, se a ngɛ nyagbahi, nɛ a hia hɛ kɛ nɔ fɔmi. A ngɛ kaa jijɔhi nɛ a laa nɛ a be nɔ hyɛlɔ. Bɔfo Paulo kale nimli nɛ ɔmɛ kaa nihi nɛ a li Mawu nɛ a be hɛ kɛ nɔ fɔmi ko. (Efe. 2:12) A ngɛ “blɔ nɛ e . . . kɛ nɔ yaa hɛ mi kpatami mi” ɔ nɔ nyɛɛe! (Mat. 7:13) Ke wa susu bɔ nɛ e he hia kaa nihi nɛ a ngɛ wa zugba kpɔ ɔ mi ɔ nɛ a le Mawu ɔ he ɔ, suɔmi kɛ mi mi sami maa wo wɔ he wami nɛ waa ye bua mɛ. Blɔ nɛ hi nɛ wa ma nyɛ maa gu nɔ kɛ ye bua mɛ ji kaa waa kɛ mɛ maa kase Baiblo ɔ.

9. Kaa bɔ nɛ Filipi Bi 2:13 ɔ de ɔ, mɛni blɔ nɔ Yehowa ma nyɛ maa ye bua mo ngɛ?

⁹ Eko ɔ, benɛ o ba le kaa Baiblo mi ní kasemi kɛ o he nɛ o ma dla kɛ ha ní kasemi ɔ ngɔɔ be fuu ɔ, o to tsle bɔɔ. Ke jã ji sane ɔ, mo de Yehowa bɔ nɛ o ngɛ he nue ha. Bi lɛ nɛ e ye bua mo nɛ o ná suɔmi ɔ nɛ o kɛ hla nɔ ko nɛ o kɛ lɛ nɛ je Baiblo ɔ kasemi sisi. (Kane Filipi Bi 2:13.) Bɔfo Yohane ha nɛ wa le kaa ke wa bi Yehowa nɔ́ ko nɛ e kɛ e suɔmi nya ní kɔ ɔ, e maa pee ha wɔ. (1 Yoh. 5:14, 15) Enɛ ɔ he ɔ, o ma nyɛ ma ná nɔ mi mami kaa Yehowa maa ye bua mo nɛ o ná suɔmi ɔ kaa o kɛ o he maa wo kaselɔ peemi ní tsumi ɔ mi.

10-11. Mɛni ní komɛ nɛ eko ɔ, a be hae nɛ waa kɛ nɔ ko nɛ je Baiblo mi ní kasemi sisi?

¹⁰ Wa le bɔ nɛ kaselɔ peemi ní tsumi ɔ he hia ha, se e he ma nyɛ maa wa kaa wa maa pee babauu kaa bɔ nɛ wa ngɛ hlae nɛ waa pee ɔ. Nyɛ ha nɛ wa susu nyagba nɛ ɔmɛ ekomɛ a he, kɛ nɔ́ nɛ wa ma nyɛ maa pee kɛ tsu a he ní.

¹¹ Eko ɔ, wa si fɔfɔɛ be wɔ blɔ ngmɛe nɛ waa pee babauu. Kaa nɔ hyɛmi nɔ́ ɔ, fiɛɛli komɛ ngɛ nɛ a wa ngɛ jeha mi loo hiɔ ngɛ a nya gbae. Jã ji o si fɔfɔɛ ɔ lo? Ke jã a, lɛɛ ha nɛ waa hyɛ nɔ́ kake nɛ wa kase ngɛ COVID-19 be nɛ ɔ mi. Wa ba na kaa wa ma nyɛ maa pee Baiblo mi ní kasemi nɛ nu tso kɛ gu fon loo kɔmpiuta blɔ nɔ tomi kpahi a nɔ! Lɔ ɔ, o ma nyɛ maa hi o we mi nɛ o kɛ nɔ ko nɛ kase Baiblo ɔ. Se se nami kpa ko hu ngɛ. Ni komɛ suɔ nɛ a kase Baiblo ɔ, se behi fuu ɔ, wa nyɛmimɛ a nine sui a nɔ ngɛ behi nɛ a kɛ yaa fiɛɛmi ɔ mi. Eko ɔ, mɔtu mla loo nyɔ mi nɛ wa nine maa su a nɔ. Anɛ o kɛ nɔ ko ma nyɛ maa kase ní ngɛ jamɛ a be ɔmɛ a mi lo? Yesu tsɔɔ Nikodemo ní nyɔ mi, ejakaa lɔ ɔ ji be nɛ e maa da Nikodemo.​—Yoh. 3:1, 2.

12. Mɛni níhi nɛ haa nɛ wa náa nɔ mi mami kaa wa ma nyɛ maa pee tsɔɔli kpakpa?

¹² Eko ɔ, wa susuɔ kaa wa be nyɛe nɛ waa kɛ nɔ ko nɛ kase Baiblo ɔ. Eko ɔ, wa susu kaa wa hia nile fuu loo ní tsɔɔmi he ga lemi fuu loko waa kɛ nɔ ko ma nyɛ maa kase Baiblo ɔ. Ke jã  nɛ o nuɔ he ɔ, lɛɛ mo susu níhi etɛ nɛ ma ha nɛ o ná nɔ mi mami kaa o ma nyɛ nɛ o kɛ nɔ ko nɛ je Baiblo mi ní kasemi sisi ɔ a he nɛ o hyɛ. Kekleekle ɔ, Yehowa naa mo kaa o he su nɛ o ma nyɛ maa tsɔɔ ni kpahi ní. (2 Kor. 3:5) Enyɔne, Yesu nɛ “a ngɔ he blɔhi tsuo nɛ ngɛ hiɔwe kɛ zugba a nɔ ɔ kɛ ha” lɛ ɔ lɛ fã mo kaa o tsɔɔ nihi ní. (Mat. 28:18) Etɛne, ha nɛ ni kpahi nɛ a ye bua mo. Níhi nɛ Yesu Tsɛ ɔ tsɔɔ lɛ ɔ nɛ ye bua lɛ. Mo hu ni kpahi ma nyɛ maa ye bua mo. (Yoh. 8:28; 12:49) Jehanɛ hu ɔ, o ma nyɛ ma bi o fiɛɛmi yami kuu nɔ hyɛlɔ ɔ, blɔ gbalɔ ko nɛ e nane pi si, loo fiɛɛlɔ ko nɛ e ngɛ níhi a si kpami nɛ e ye bua mo kɛ je Baiblo mi ní kasemi sisi nɛ e ye bua mo nɛ o tsa nɔ. Blɔ kake nɛ o ma nyɛ maa gu nɔ kɛ pee tsɔɔlɔ kpakpa ji kaa o maa piɛɛ fiɛɛli nɛ ɔmɛ a he ke a kɛ nɔ ko ngɛ Baiblo ɔ kasee.

13. Mɛni he je nɛ e he hia kaa waa gu blɔ slɔɔtohi a nɔ kɛ tsɔɔ ní ɔ?

¹³ Eko ɔ, e he maa wa ha wɔ kaa wa maa gu blɔ ehehi a nɔ kɛ fiɛɛ loo waa kɛ ga dade ehehi ma tsu ní. Blɔ nɔ nɛ wa guɔ kɛ peeɔ Baiblo mi ní kasemi ɔ tsake amlɔ nɛ ɔ. Womi titli nɛ waa kɛ peeɔ Baiblo mi ní kasemi nɛ ji O Ma Nyɛ Ma Ná Bua Jɔmi Kɛ Ya Neneene! ɔ biɔ nɛ o dla o he saminya. Blɔ nɔ nɛ wa guɔ kɛ hyɛɛ ní kasemi ɔ nɔ ɔ hu je ekpa ngɛ blɔ nɔ nɛ wa guɔ kɛ peeɔ daa a he. Wa kaneɔ kukuhi bɔɔ ko pɛ, nɛ wa náa be nɛ waa kɛ Baiblo kaselɔ ɔ sɛɛɔ ní fuu. Ke wa ngɛ ní tsɔɔe ɔ, waa kɛ videohi kɛ ní komɛ kaa JW Library^® ɔ tsuɔ ní. Ke o li bɔ nɛ a kɛ ní nɛ ɔmɛ tsuɔ ní ha a, o kɛ nɔ ko nɛ e le bɔ nɛ a kɛ tsuɔ ní ha a nɛ sɛɛ ní, nɛ e maa ye bua mo. Behi fuu ɔ, wa suɔ nɛ waa pee níhi ngɛ blɔ nɛ maa da wɔ nɔ. Jehanɛ hu ɔ, e he wa ha wɔ kaa wa maa pee níhi ngɛ blɔ ehe nɔ loo waa kɛ ní hehi ma tsu ní. Se ngɛ Yehowa kɛ ni kpahi a yemi kɛ buami nya a, wa ma nyɛ maa pee jã, nɛ wa bua maa jɔ kaa waa kɛ nihi maa kase Baiblo ɔ. Kaa bɔ nɛ blɔ gbalɔ ko de ɔ, ke Baiblo tsɔɔlɔ ko kɛ nɔ ko kase ní ngɛ blɔ nɛ ɔ nɔ ɔ, “mɛ tsuo a bua maa jɔ.”

14. Ke nihi nɛ a ngɛ wa zugba kpɔ ɔ mi ɔ bui wa sɛ gbi ɔ tue ɔ, mɛni e sa nɛ wa kai, nɛ kɛ 1 Korinto Bi 3:6, 7 ɔ woɔ wɔ he wami ha kɛɛ?

¹⁴ Eko ɔ, e he wa ha wɔ kaa waa kɛ nihi maa je Baiblo mi ní kasemi sisi ngɛ wa zugba kpɔ ɔ mi. Ni komɛ a bua jɔɛ wa sɛ gbi ɔ he, nɛ a teɔ si kɛ woɔ wɔ po. Mɛni maa ye bua wɔ nɛ wa ná juɛmi nɛ da ke wa ngɛ zugba kpɔ nɛ a bui sɛ gbi ɔ tue ngɛ mi ɔ mi? Mo kai kaa nihi a si fɔfɔɛ ma nyɛ ma tsake ngɛ je yaya nɛ ɔ mi. Nihi nɛ be ko nɛ be ɔ a bua jɔɛ wa sɛ gbi ɔ he ɔ ma nyɛ ma ba yɔse kaa e he hia nɛ a le Mawu. (Mat. 5:3) Ni komɛ nɛ a bua jɔɛ wa womi ɔmɛ a he be ko nɛ be ɔ ba kplɛɛ Baiblo mi ní kasemi nɔ. Wa le hu kaa Yehowa ji Nyɔmtsɛ nɛ hyɛɛ ní kpami ní tsumi ɔ nɔ. (Mat. 9:38) E suɔ nɛ waa ya nɔ nɛ wa du ní nɛ wa pue nɔ nyu, se lɛ nɛ e ma ha nɛ e wa. (1 Kor. 3:6, 7) Ke wa nyɛ we nɛ waa kɛ nɔ ko nɛ kase Baiblo ɔ amlɔ nɛ ɔ po ɔ, nyɛ ha nɛ wa kai kaa Yehowa jɔɔ wɔ ngɛ mɔde nɛ wa bɔɔ kaa wa maa ye bua nihi ɔ he, se pi nihi abɔ nɛ waa kɛ mɛ kaseɔ ní ɔ. Hyɛ bɔ nɛ enɛ ɔ woɔ wa bua ha! *

15. Kɛ Yehowa nuɔ he ha kɛɛ ke nɔ ko kplɛɛ nɔ kaa a kɛ lɛ nɛ kase Baiblo ɔ nɛ e kɛ nɔ́ nɛ e ngɛ kasee ɔ ngɛ ní tsue?

¹⁵ Yehowa bua jɔɔ ke nɔ ko kplɛɛ Baiblo mi anɔkuale ɔ nɔ, nɛ e de ni kpahi níhi nɛ e ngɛ kasee ɔ. (Abɛ 23:15, 16) Ke Yehowa na bɔ nɛ e we bi ngɛ fiɛɛe nɛ a ngɛ nihi ní tsɔɔe ha mwɔnɛ ɔ, e bua jɔɔ wawɛɛ! Kaa nɔ hyɛmi nɔ́ ɔ, ngɛ hiɔ nɛ gbɛ fia je ɔ mi ngɛ jeha 2020 sɔmɔmi jeha a mi tsuo se ɔ, wa pee Baiblo mi ní  kasemi 7,705,765 nɛ nihi 241,994 jɔɔ a wami nɔ ha Yehowa nɛ a ha nɛ a baptisi mɛ. Kaseli ehe nɛ ɔmɛ hu kɛ ni kpahi maa kase Baiblo ɔ nɛ a maa pee nihi fuu kaseli. (Luka 6:40) Wa ma nyɛ ma de kɛ nɔ mi mami kaa ke waa kɛ wa he wo kaselɔ peemi ní tsumi ɔ mi ɔ, Yehowa bua jɔɔ.

16. Mɛni ji oti ko nɛ sa nɛ waa kɛ ma nyɛ maa ma wa hɛ mi?

¹⁶ Kaselɔ peemi ní tsumi ɔ be gbɔjɔɔ, se ngɛ Yehowa yemi kɛ buami nya a, wa ma nyɛ maa tsɔɔ ni kpahi ní nɛ a ba suɔ wa hiɔwe Tsɛ ɔ. Anɛ waa kɛ ma nyɛ maa pee oti ngɛ wa si himi mi kaa waa kɛ nɔ kake maa je Baiblo mi ní kasemi sisi lo? Ke waa kɛ he blɔ fɛɛ he blɔ nɛ wa ma ná a bi nihi nɛ waa kɛ kpeɔ ɔ kaa a maa suɔ nɛ a kɛ wɔ nɛ kase Baiblo ɔ, nɔ́ nɛ ma nyɛ maa je mi kɛ ba a maa pee wɔ nyakpɛ. Wa ma nyɛ ma ná nɔ mi mami kaa Yehowa maa jɔɔ wa mɔde bɔmi ɔ nɔ.

17. Kɛ wa maa nu he ha kɛɛ ke wa nyɛ nɛ waa kɛ nɔ ko kase Baiblo ɔ?

¹⁷ E ji he blɔ ngua nɛ wa ná kaa wa maa fiɛɛ nɛ waa tsɔɔ nihi anɔkuale ɔ! Ní tsumi nɛ ɔ haa nɛ wa bua jɔɔ nitsɛ. Bɔfo Paulo nɛ e ye bua nihi fuu ngɛ Tɛsalonika nɛ a ba pee kaseli ɔ tsɔɔ bɔ nɛ e nu he ha, nɛ e de ke: “Mɛni ji wa hɛ kɛ nɔ fɔmi aloo wa bua jɔmi aloo wa fĩami jlasi ngɛ wa Nyɔmtsɛ Yesu hɛ mi ngɛ e bami ɔ mi ɔ? Ngɛ anɔkuale mi ɔ, anɛ pi nyɛ lo? Niinɛ, nyɛ ji wa hɛ mi nyami kɛ bua jɔmi.” (1 Tɛs. 2:19, 20; Níts. 17:1-4) Nihi fuu nuɔ he jã mwɔnɛ ɔ. Nyɛmiyo ko nɛ a tsɛɛ lɛ ke Stéphanie nɛ e kɛ e huno ye bua nihi fuu nɛ a ya a hɛ mi kɛ su baptisimi he ɔ de ke: “Nɔ́ ko be nɛ haa nɔ bua jɔmi kaa o maa ye bua nihi nɛ a jɔɔ a he nɔ kɛ ha Yehowa.”