1. Иегова слерге нени эткен?

СЕН канайып Иегованыҥ Керечизи болуп калгаҥ? Сеге Агару Бичиктеги сӱӱнчилӱ јарды ада-энеҥ, школдо кожо ӱренип турган бала эмезе кожо иштеп турган кижи, ол эмезе айылдар сайын јарлап јӱрген Иегованыҥ Керечилери куучындаган болор (Марк 13:10). Оноҥ та кем де ӧйин ле ийде-кӱчин берип, слерле Агару Бичик ӱренген. Ӱренип турала, слер Иегованы сӱӱп баштаганаар, ол до слерди сӱӱп турган деп оҥдоп алганаар. Иегова слерди бойына јууктадып аларда, слер Иисустыҥ ӱренчиги болуп калганаар. Анайып, слерде ӱргӱлјиге јӱретен арга ачылган (Иоанн 6:44). Оныҥ учун Иеговага слерле Агару Бичик ӱрензин деп та кемди де кӱӱнзеткенине ле слерге оныҥ ишчизи болуп калатан арга бергенине быйанду болбойоор.

2. Бу јӧрмӧлдӧ нени шӱӱжерис?

² Бис чындыкты билип, ӱргӱлји јӱрӱмге апарып јаткан јолло барып јадыс. Иегова биске улусты бу јолго туруп алзын деп болужатан јаан учурлу иш берген. Кезик јарчылар айылдар сайын јарлаарга јалтанбай јат, је Агару Бичикле ӱредӱ ӧткӱрерге коркыгылайт. Слер де коркып турган болзоор, бу јӧрмӧлдӧҥ тузалу јӧптӧр табар болороор. Бу јӧрмӧлдӧ бисти ӱренчиктер белетейтен ишке туружарга не кӱӱнзедип турганын шӱӱжип ийерис. Анайда ок кезик јарчылар Агару Бичикле ӱредӱ ӧткӱрерге нениҥ учун коркып турганын ла олорго коркыбаска не болужарын билип аларыс. Је озо баштап, биске нениҥ учун јӱк ле јарчылар эмес, је ӱредӱчилер де болор керек деп кӧрӱп ийектер.

3. Бис нениҥ учун јарлайдыс?

³ Иисус јерде болордо, ӱренчиктерине эки јакылта берген. Баштапкызында, Иисус олорды Каандык керегинде јарлазын деп айдып, мыны канайып эдерин кӧргӱзип берген (Матф. 10:7; Лука 8:1). Је кезик улус бу јарды укпас деп айткан (Лука 9:2—5). Анайда ок бу јар бастыра јерле јарлалар ла оны ончо албатылар угар деп айдып салган (Матф. 24:14; Ап. ижи 1:8). Оныҥ учун ӱренчиктер Каандык ла оныҥ алкыштары керегинде улус уксын да, укпазын да куучындаар учурлу болгон.

4. Матфей 28:18—20-ле болзо, јарлаар иштеҥ ӧскӧ бис база нени эдер учурлу?

⁴ Экинчизинде, Иисус ӱренчиктерин улусты оныҥ јакаруларын бӱдӱрерге ӱретсин деген. Кезик улус Иисустыҥ јакарузы јӱк ле баштапкы чактыҥ ӱренчиктерине берилген деп сананат. Је Иисустыҥ айтканыла јарлайтан ла ӱренчиктер белетейтен иш бӱгӱнги кӱнге јетире — «чак тӱгенгенче» ӧдӧр. (Матфей 28:18—20 кычырыгар.) Бу јакылтаны Иисус «бир уунда беш јӱстеҥ ажыра карындаштарга кӧрӱн[ерде]» берген болор (1 Кор. 15:6). Анайда ок Ачылта деп бичикте улуска Иегова керегинде билерге, Иисустыҥ ончо ӱренчиктери болужар деп айдылат (Ачыл. 22:17).

5. 1 Коринфтегилерге 3:6—9-та јарлаар ла ӱренчиктер белетеер иштиҥ колбузын кӧргӱзерге, Павел кандый тем тузаланган?

⁵ Апостол Павел ӱренчиктер белетеер ишти аш ӧскӱрериле тӱҥдештирген. Бу тем биске јӱк ле ӱрендер таштаар керек деп кӧргӱспей јат. Павел бойын ла Аполлосты јалаҥда иштеп турган ишчилерге тӱҥейлеп, мынайып бичиген: «Мен тарыдым [отургыстым], Аполлос сугарды», је Коринфтеги улусты ӱрендеп салган «Кудайдыҥ кыразы» деп айткан. (1 Коринфтегилерге 3:6—9 кычырыгар.) Бис Кудайла кожо иштеп јарлап турзаас, јӱк ӱрендеер таштап јадыс, а ӱредӱлер ӧткӱрип турзаас, бу ӱрендерди сугарып јадыс (Иоанн 4:35). Је ӱренди Кудай ӧскӱрет, нениҥ учун дезе улусты шак ла Кудай бойына јууктадып јат.

6. Улусты чындыкка ӱредип тура, бис олорго неде болужар учурлу?

⁶ Бис чыннаҥ ла ӱргӱлји јӱрӱм аларга турган улусты бедирейдис (Ап. ижи 13:48). Кижи Христостыҥ ӱренчиги болуп калзын деп, биске ого Агару Бичиктеҥ алган билгирлерди 1) оҥдоп, 2) алынып, 3) јӱрӱмде тузаланзын деп болужар керек (Иоанн 17:3; Кол. 2:6, 7; 1 Фес. 2:13). Јуунныҥ кажы ла кижизи ого кӧгӱс јанынаҥ ӧзӧргӧ болужар аргалу. Темдектезе, бис ӱренип турган улусты јуунныҥ туштажуларына келзе, јылу уткыйдыс. Анайда ок сӱӱшти кӧргӱзеринде олорго тем болодыс (Иоанн 13:35). Биске кижи јаман кылык-јаҥынаҥ ла јастыра кӧрӱминеҥ айрылзын деп, кӧп ӧй лӧ ийде-кӱч берер керек болот (2 Кор. 10:4, 5). Оныҥ учун кижи сууга чӧҥӱрилзин деп, кӧп айлар керек болордоҥ айабас. Је мынайып албаданганыс бир де калас болбос!

7. Бис недеҥ улам јарлайдыс ла ӱренчиктер белетеер иште туружадыс?

⁷ Јарлаар ишке ле ӱренчиктер белетеер ишке туружарга слерди не кӱӱнзедет? Баштапкызында, Иеговага сӱӱш. Слер јарлазын ла ӱренчиктер белетезин деген јакаруны акту кӱӱнеердеҥ бӱдӱрип турзаар, Кудайды сӱӱп турганаарды кӧргӱзедеер (1 Иоанн 5:3). Сананып ийзеер де,  айылдар сайын јарлаарга слерди Иеговага сӱӱш кӱӱнзеткен. Баштап тарый слер ӧкпӧӧргӧн болороор, је андый да болзо, бу јакаруны Иисус берген деп оҥдойло, јарлап баштаганаар. Је бир канча ӧйдӧҥ јарлаарга слерге бир эмеш јеҥил боло берген. Агару Бичикле ӱредӱ ӧткӱрерге коркып турган болзоор, нени эдер? Ӧйинеҥ ӧткӱре ӧкпӧӧрбӧскӧ лӧ Агару Бичикле ӱредӱ баштаарга, Иегованаҥ болуш сурагар. Иегова слерге ӱренчиктер белетеер ишке эрчимдӱ туружарга кӱӱнзей берзин деп болужар.

8. Марк 6:34-лӧ болзо, бис база недеҥ улам улусты чындыкка ӱредедис?

⁸ Экинчизинде, бис улусты сӱӱп јадыс. Иисусла, оныҥ ӱренчиктериле болгон учуралды эске алып ийектер. Олор кере тӱжине јарлап, тыҥ арып калала, амырап алар деп сананган. Је амыраар јерге келерде, олорды ал-камык улус сакып јаткан. Иисус улусты кӧрӧлӧ, ичи ачып, «олорды кӧпкӧ ӱредип» баштаган. (Марк 6:34 кычырыгар.) Иисустыҥ мынайып эткенинеҥ бойын килебей турганы кӧрӱнген. Иисус бойын улустыҥ ордына тургускан. Олордыҥ кыйын-шыразын ла ижемји јок болгонын кӧрӱп, олорго болужарга кӱӱнзеген. Бӱгӱнги кӱнде улус андый ла айалгада. Олор ырысту, јакшы јӱргилейт деп билдирердеҥ айабас. Је чынынча болзо, олор кӱдӱчи јок койлордый. Павелдиҥ айтканыла, олордо ижемји де, Кудай да јок (Еф. 2:12). Бу улус ӧлӱмге апарып јаткан јолло барат! (Матф. 7:13). Оныҥ учун улусты килеп, олорго сӱӱжигерди канайып кӧргӱзерин сананыгар. Ол тушта улуска болужарга кӱӱнзей береригер. А улуска болужатан аргалардыҥ эҥ јакшызы — олорло Агару Бичикле ӱредӱ баштаары.

9. Филиппыдагыларга 2:13-ле болзо, Иегова биске канайып болужар аргалу?

⁹ Агару Бичикле ӱредӱ баштаарга коркып турган болороор. Не дезе ого белетенерге ле оны ӧткӱрерге кӧп ӧй керек болуп јат. Бу айалгада нени эдерге јараар? Иеговага сезимдереерди куучындагар. Ол слерге Агару Бичикле ӱредӱ табып, оны ӧткӱрерге кӱӱн берзин деп, болуш сурагар. (Филиппыдагыларга 2:13 кычырыгар.) Агару Бичик бисти Иегованыҥ табы аайынча сурап турзаас, ол бисти угат деп бӱдӱмјилейт (1 Иоанн 5:14, 15). Оныҥ учун Иегова слерге ӱренчиктер белетеер ишке туружатан кӱӱнди берер деп, бир де алаҥзыбагар.

10, 11. Кезик ака-эјелерди ӱредӱлер ӧткӱрерге не токтодып јат?

¹⁰ Улусты Агару Бичиктеги чындыкка ӱредери — јаан учурлу иш. Је кезик кӱчтердеҥ улам бу ишти бойыстыҥ кӱӱнзегенис аайынча эдип болбойдыс. Бу кандый кӱчтер ле олорды ӧдӧргӧ нени эдер керек деп кӧрӱп ийектер.

¹¹ Тегин эмес айалгалар. Кезик ака-эјелердиҥ јаажы јаанап калган эмезе су-кадыгы уйан. Слер мындый айалгада болзогор, COVID-19 деп пандемияныҥ ӧйинде неге ӱренип алганаарды сананып ийзеер. Темдектезе, Агару Бичикле ӱредӱлерди телефон эмезе ӧскӧ дӧ электронный эдимдер ажыра ӧткӱрерге јараар деп билип алдыс. Айдарда, ӱредӱлерди айылдаҥ чыкпай ла јадып ӧткӱретен арга бар эмтир. Анайда ок база јакшы немеге ӱренип алганыс: кезик улус Агару Бичикти ӱренерге де турган болзо, је бистиҥ јарлап турган ӧйис олорго келишпей јат. Кезик улуска эртен тура эмезе орой эҥирде эптӱ болот.  Оныҥ учун бойоордыҥ ӧйӧӧрди олордыҥ айалгазына келиштирип болороор бо? Темдектезе, Иисус Никодимди тӱнде ӱредип туратан, нениҥ учун дезе бу ӧйдӧ ого эптӱ болгон (Иоанн 3:1, 2).

12. Улусты ӱредип болбозыгар деп сананбаска слерге не болужар?

¹² Улусты ӱредип болбозыгар деп сананып турганаар. Кезик ака-эјелер улусты ӱредердеҥ озо бойлорына кӧп немени билер керек ле јаан ченемелдӱ болор керек деп санангылайт. Слер мынайып сананып турган болзогор, слерге мындый јаан учурлу ӱч шӱӱлте болужар. Баштапкызында, Иегова бойы слерди улусты ӱредер аргалу деп кӧрӧт (2 Кор. 3:5). Экинчизинде, улусты ӱредетен јаҥды слерге Иисус берген. Нениҥ учун дезе Иисуска «теҥери ле јерде ончо јаҥ... берилген» (Матф. 28:18). Ӱчинчизинде, улусты ӱредерге слерге Иегова ла ака-эјелер болужар. Иегова Иисусты нени айдарын, улусты неге ӱредерин јартаган. Ол бисти де анайып ӱредип јат (Иоанн 8:28; 12:49). Анайда ок јарлаар иштиҥ бӧлӱгиниҥ аксагалын, ченемелдӱ јарчыны эмезе пионерди слерге Агару Бичикле ӱредӱ баштаарга эмезе ӱредӱ ӧткӱрерге болужып берзин деп сураарга јараар. Андый ака-эјелер слерди бойыныҥ ӱредӱлерине кычырып турза, слердиҥ ченемелеер јаанаар.

13. Биске неге ӱренер керек?

¹³ Јаҥы эп-аргалар ла јепселдер. Агару Бичикле ӱредӱ ӧткӱретен эп-арга солынып калган. Эмди ӱредӱ ӧткӱретен тӧс бичигис — «Јажын-чакка ырысту јӱригер!» деген бичик. Бу бичикле ӱредӱге белетенери ле ӧткӱрери чек башка болуп калган. Эмди ӱредӱниҥ ӧйинде кӧп ӧй абзацтарды кычырарына эмес, је теманы шӱӱжерине барат. Ӱредӱниҥ ӧйинде видеолор, сайттагы материалдарды ла JW Library^® деп приложениени кӧптӧдӧ тузаланадыс. Мындый јепселдерле эм тура тузаланып билбес болзогор, ака-эјелердеҥ болуш сурагар. Јаҥы эп-аргага ӱренижерге баштап тарый јеҥил эмес болот. Је Иегованыҥ ла ака-эјелердиҥ болужыла ӱредӱ ӧткӱретен мындый аргага слер ӱрениже беререер. Кийнинде ол слерге јарай да берер. Бир пионердиҥ айтканыла, мындый јаҥы эп-арганаҥ «ӱредӱчи де, ӱренчик те сӱӱнчи алат».

14. Бистиҥ јердеги улус сӱӱнчилӱ јарды угарга кӱӱнзебей турган болзо, нени ундыбас керек ле 1 Коринфтегилерге 3:6, 7-де кандый јаан учурлу шӱӱлте бар?

¹⁴ Улустыҥ јарды угарга кӱӱнзебей турганы. Слердиҥ јердеги улус јарды угарга кӱӱнзебей турган эмезе удурлажып та турган болор. Мындый айалгада чын кӧрӱмдӱ болорго не болужар? Ундыбагар, бу телекейде ончо неме, ол тоодо улустыҥ айалгазы да, капшай солынып јат. Алдында сӱӱнчилӱ јарды угарга кӱӱнзебеген улус эмди угардаҥ да айабас (Матф. 5:3). Ол эмезе алдында бистиҥ бичиктерди албай туратан улус эмди Агару Бичикле ӱредӱге јӧпсинет. Анайда ок бис Иегованы кыраныҥ Бийи деп билерис (Матф. 9:38). Бис чындыктыҥ ӱренин отургызып, сугарып јадыс, је ӧскӱрип турганы Кудай болот (1 Кор. 3:6, 7). Эм тура бисте Агару Бичикле ӱредӱ јок болор. Иегова бисти једимис учун эмес, је албаданып иштенип турганыс учун кайралдап турган деген шӱӱлте бисти сӱреен токунадып јат! *

15. Кижи чындыкты алынып, ол аайынча јӱрӱп турза, Иегова нени сезет?

¹⁵ Кижи чындыкты алынып, оны улуска куучындап турза, Иегова тыҥ сӱӱнип јат (Укаа 23:15, 16). Бӱгӱнги кӱнде эрчимдӱ иштенип турган албатызын кӧрӧргӧ ого кандый јакшы! Темдектезе, 2020 јылда пандемияныҥ ӧйинде Иегованыҥ Керечилери 7 705 765 ӱредӱ ӧткӱрген, анайып 241 994 кижи Иеговага учурланып, сууга чӧҥӱрилген. Бу ака-эјелер дезе Агару Бичикле база ӱредӱ ӧткӱрип, јаҥы ӱренчиктер белетеер (Лука 6:40). Бис ӱренчиктер белетеер иште туружып турганысла Иегованы чыннаҥ ла сӱӱндирип јадыс.

16. Бистерге кандый амаду тургузарга јараар?

¹⁶ Кижиге Иегованы сӱӱрге ле Христостыҥ ӱренчиги болуп каларга болужатаны јеҥил иш эмес, је теҥеридеги Адабыс бисти болужы јок артыргыспас. Оныҥ учун бир де ӱредӱ табып алатан амаду не тургуспас? Кандый ла айалгада кемле-кемле ӱредӱ баштаарга албаданганыс кандый једим экелерин билбей де јадыс. Бу учун Иегова слерди алаҥзу јогынаҥ кайралдаар!

17. Агару Бичикле ӱредӱ ӧткӱрзеес, бисте кандый сезимдер болор?

¹⁷ Јарлаар ла ӱренчиктер белетеер иш бистерге јаан кӱндӱ болуп јат! Бу иш бисти чыннаҥ ла ырысту эдет! Фессалоникада кӧп улуска Христостыҥ ӱренчиги болорго болушкан апостол Павел сӱӱнчизин кӧргӱзерге, мындый сӧстӧр бичиген: «Иисус Христос Кайраканыс алдында ижемјибис кем, сӱӱнчибис кем, мактанып турган кайралыс кем болды? Оныҥ келгенинде слер эмес бедигер? Эйе, слер бистиҥ магыбыс ла сӱӱнчибис» (1 Фес. 2:19, 20; Ап. ижи 17:1—4). Кӧп ака-эјелер бу сӧстӧрлӧ јӧпсинер болор. Бу керегинде ӧбӧӧниле кожо кӧп улуска Иисустыҥ ӱренчиги болорго болушкан Стефани эје айдат: «Кижиге јӱрӱмин Иеговага учурлаарга болушканыс эҥ јаан сӱӱнчи болуп јат».