1. Јеһова сиздән өтрү нәләр едиб?

ЈЕҺОВАНЫН ШАҺИДИ неҹә олмусунуз? Илк өнҹә, мүждәни ешитмисиниз. Ола билсин, буну сизә валидејнләриниз, иш вә ја синиф јолдашыныз данышыб, јахуд ев-ев хидмәт заманы сизә тәблиғ едибләр (Марк 13:10). Сонра кимсә чохлу вахт вә ҝүҹ сәрф едәрәк сизинлә Мүгәддәс Китаб дәрси кечиб. Бу вахт әрзиндә Јеһоваја севҝиниз јаранды вә Онун да сизи севдијини өјрәндиниз. Јеһова сизи һәгигәтә ҹәлб етди, инди Исанын шаҝирди олдуғунуз үчүн әбәди јашамаг имканыныз вар (Јәһ. 6:44). Шүбһәсиз, миннәтдарсыныз ки, Јеһова кимисә сизә һәгигәти өјрәтмәјә јөнәлдиб вә сизи Өз хидмәтчиси һесаб едир.

2. Бу мәгаләдә нә һагда данышаҹағыг?

² Артыг һәгигәти билдијимиз үчүн һәјата апаран јолда башгаларынын да бизимлә бирҝә аддымламасына көмәк едә биләрик. Амма бизим бир чәтинлијимиз ола биләр. Ола билсин, раһат шәкилдә ев-ев тәблиғ едирик, амма дәрс кечмәји тәклиф етмәјә вә ја дәрс кечмәјә чәтинлик чәкирик. Бу мәгаләдә ҝәтирилән мәсләһәтләрин бизә көмәји дәјәҹәк. Өјрәнәҹәјик ки, шаҝирд һазырламаг ишинә бизи нә тәшвиг едир вә буна мане олан чәтинликләри неҹә аша биләрик. Әввәла, ҝәлин ҝөрәк нә үчүн биз тәкҹә мүждәчи јох, һәм дә мүәллим олмалыјыг.

3. Биз нәјә ҝөрә тәблиғ едирик?

³ Иса јер үзүндә оланда давамчыларына ики һиссәдән ибарәт тапшырыг вермишди. Биринҹиси, онлара Аллаһын Падшаһлығы һаггында мүждәни тәблиғ етмәји бујурмушду вә бунун јолуну  өјрәтмишди (Мәт. 10:7; Лука 8:1). Мәсәлән, баша салмышды ки, инсанлар хош хәбәрә гулаг асанда неҹә даврансынлар, гулаг асмајанда нә етсинләр (Лука 9:2—5). Һәмчинин Иса демишди ки, давамчылары «халгларын һамысына шәһадәт» едәҹәкләр (Мәт. 24:14; Һәв. 1:8). Бу пејғәмбәрлик сөзләри илә онларын ҝөрәҹәји ишин мигјасыны ҝөстәрмишди. Инсанларын мүнасибәтиндән асылы олмајараг, давамчылары Аллаһын Падшаһлығы вә онун ҝөрәҹәји ишләр барәдә данышмалы идиләр.

4. Мәтта 28:18—20 ајәләринә әсасән, Падшаһлыг һаггындакы мүждәни тәблиғ етмәклә јанашы, нә етмәлијик?

⁴ Исанын вердији тапшырығын икинҹи һиссәсинә нә дахил иди? Инсанлара онун әмр етдији һәр шејә риајәт етмәји өјрәтмәк. Бәс бәзиләринин иддиа етдији кими, Исанын тәблиғ етмәк вә өјрәтмәк тапшырығы јалныз биринҹи әсрдәки мәсиһиләрә аиддир? Хејр. Иса гејд етмишди ки, бу ваҹиб иш «бу дөврүн јекунуна кими», јәни бизим дөврүмүзә гәдәр давам едәҹәк. (Мәтта 28:18—20 ајәләрини охујун.) Ҝөрүнүр, о, бу тапшырығы беш јүздән чох шаҝирдинә ҝөрүнән заман вермишди (1 Кор. 15:6). Сонралар исә Јәһјаја вердији вәһјдә ачыг шәкилдә билдирмишди ки, бүтүн давамчыларынын инсанлара Јеһова һагда өјрәтмәсини истәјир (Вәһј 22:17).

5. 1 Коринфлиләрә 3:6—9 ајәләриндә һәвари Булус тәблиғ вә тәлим ишинин әлагәсини неҹә ҝөстәрмишди?

⁵ Һәвари Булус шаҝирд һазырламаг ишини әкинчилик ишинә бәнзәдәрәк ҝөстәрмишди ки, тохуму әкмәк кифајәт дејил. О, коринфлиләрә демишди: «Мән әкдим, Аполлос сулады... Сиз исә Аллаһын беҹәрдији зәми»синиз. (1 Коринфлиләрә 3:6—9 ајәләрини охујун.) Аллаһын зәмисиндә бизим ишимиз тәкҹә тохум сәпмәк дејил, биз һәмчинин ону суламалыјыг вә мүнтәзәм олараг мәһсулун инкишафыны јохламалыјыг (Јәһ. 4:35). Ејни заманда баша дүшүрүк ки, тохуму бөјүдән Аллаһдыр.

6. Бир мүәллим кими өһдәмизә нә дүшүр?

⁶ Биз «әбәди һәјата апаран јолда јеримәјә мејли» оланлары ахтарырыг (Һәв. 13:48). Һәмин инсанлара Јеһованын хидмәтчиси олмаға көмәк етмәк үчүн Мүгәддәс Китабдан өјрәндикләрини 1) баша дүшмәјә, 2) гәбул етмәјә вә 3) тәтбиг етмәјә көмәк етмәлијик (Јәһ. 17:3; Кол. 2:6, 7; 1 Салон. 2:13). Шаҝирдләр јығынҹаға ҝәләндә һамымызын онлара көмәк етмәк имканы јараныр. Неҹә? Биз онлара мәһәббәт ҝөстәрмәклә вә хош гаршыламагла ҝөзәл нүмунә гоја биләрик (Јәһ. 13:35). Бәзән тәблиғчи шаҝирдин ҝүҹлү истеһкама бәнзәр инанҹлардан вә әмәлләрдән әл чәкмәсинә көмәк етмәк үчүн чохлу ҝүҹ вә вахт сәрф етмәли олур (2 Кор. 10:4, 5). Шаҝирдә бу аддымлары атмасына вә нәтиҹәдә вәфтизә јарарлы олмасына көмәк етмәк үчүн ајлар лазым ҝәлә биләр. Амма бунун үчүн зәһмәт чәкмәјә дәјәр.

7. Бизи тәблиғ етмәјә вә шаҝирд һазырламаға нә тәшвиг едир?

⁷ Нәјә ҝөрә биз тәблиғ едирик вә шаҝирд һазырлајырыг? Әввәла, она ҝөрә ки, биз Јеһованы севирик. Тәблиғ етмәк вә шаҝирд һазырламаг ишиндә әлимиздән ҝәләни едәндә Јеһованы севдијимизи ҝөстәририк (1 Јәһ. 5:3). Бир дүшүнүн: сиз артыг Јеһоваја севҝидән ирәли ҝәләрәк ев-ев тәблиғ едирсиниз. Мәҝәр бу әмрә әмәл етмәк асан иди? Јәгин ки, јох. Сөзсүз, илк гапыны дөјәндә һәјәҹан кечирмишдиниз. Амма билирдиниз ки, бу, Исанын бујурдуғу ишдир, буна ҝөрә  дә онун әмринә әмәл етмишдиниз. Ола билсин, вахт кечдикҹә тәблиғ етмәк сизин үчүн даһа асан олду. Бәс шаҝирд һазырламаг иши барәдә нә демәк олар? Бу һагда дүшүнәндә һәјәҹан кечирирсиниз? Бәлкә дә. Амма Мүгәддәс Китаб дәрси тәклиф етмәк үчүн Јеһоваја дуа едиб ҹәсарәт истәсәниз, О сизә көмәк едәҹәк.

8. Марк 6:34 ајәсинә әсасән, инсанлары өјрәтмәјә бизи башга нә тәшвиг едир?

⁸ Икинҹиси, инсанлара мәһәббәт бизи онлара һәгигәти өјрәтмәјә тәшвиг едир. Бир дәфә Иса вә шаҝирдләри чох тәблиғ етдикләринә ҝөрә тагәтдән дүшмүшдүләр. Онлар динҹәлмәк үчүн бир јерә чәкилмәк истәјирдиләр. Лакин бөјүк бир издиһам онлары тапды. Исанын онлара јазығы ҝәлди вә «онлара чох шеј өјрәтмәјә башлады». (Марк 6:34 ајәсини охујун.) Јорғун олса да, һәмин ҝүн онлара әлиндән ҝәлән көмәји ҝөстәрди. Нәјә ҝөрә? Иса өзүнү һәмин инсанларын јеринә гојду. Ҝөрдү ки, онлар әзаб чәкир, үмидә еһтијаҹлары вар, буна ҝөрә онлара көмәк етмәк истәди. Бу ҝүн дә инсанлар ејни вәзијјәтдәдир. Онларын кәнардан неҹә ҝөрүндүјүнә алданмајын. Онлар чобансыз гојун кими азыб галыблар, көмәксиздирләр. Һәвари Булус бу ҹүр инсанларын үмидсиз вә Аллаһсыз јашадығыны демишди (Ефес. 2:12). Онлар мәһвә апаран јолдадырлар! (Мәт. 7:13). Әразимиздәки инсанларын вәзијјәти барәдә дүшүнәндә мәһәббәт вә шәфгәт бизи онлара көмәк етмәјә тәшвиг едир. Онлара көмәк етмәјин ән јахшы јолу Мүгәддәс Китаб дәрси кечмәји тәклиф етмәкдир.

9. Филиппилиләрә 2:13 ајәсинә әсасән, Јеһова сизә неҹә көмәк едә биләр?

⁹ Амма бәзән биз Мүгәддәс Китаб дәрси тәклиф етмәјә тәрәддүд едирик. Чүнки шаҝирдлә дәрси кечмәк, буна әввәлҹәдән һазырлашмаг үчүн чохлу вахт лазымдыр. Әҝәр сизә мане олан будурса, һиссләринизи Јеһова илә бөлүшүн. Ондан көмәк истәјин ки, шаҝирд тапмаг вә дәрс кечмәк үчүн сизин үрәјиниздә истәк ојатсын. (Филиппилиләрә 2:13 ајәсини охујун.) Һәвари Јәһја әминликлә демишди ки, Аллаһ Онун ирадәсинә мәгбул олан дуалары ҹавабсыз гојмур (1 Јәһ. 5:14, 15). Буна ҝөрә дә архајын ола биләрсиниз ки, Јеһова үрәјиниздә шаҝирд һазырламаг истәјинин јаранмасына көмәк едәҹәк.

10, 11. Бәзи тәблиғчиләрдә һансы дүшүнҹә ола биләр?

¹⁰ Биз шаҝирд һазырламаг тапшырығына ҹидди јанашырыг. Амма мүәјјән чәтинликләрә ҝөрә бу ишдә там иштирак едә билмирик. Ҝәлин ҝөрәк һансы чәтинликләримиз ола биләр вә онлары неҹә аша биләрик.

¹¹ Вәзијјәтимизин јол вермәдијини дүшүнүрүк. Мәсәлән, бәзи тәблиғчиләр јаша долублар вә ја сәһһәтләри зәифдир. Әҝәр сизин дә бу ҹүр чәтинлијиниз варса, COVID-19 пандемијасы заманы өјрәндијимиз бир шеј һагда дүшүнә биләрсиниз. Биз ҝөрдүк ки, електрон ҹиһазлар васитәсилә дә кејфијјәтли Мүгәддәс Китаб дәрсләри кечмәк олар! Беләликлә, евдә отура-отура кимәсә Мүгәддәс Китаб дәрси кечмәјә башлаја биләрсиниз. Бунун бир үстүнлүјү дә вар. Бәзи инсанлар Мүгәддәс Китабы өјрәнмәк истәјәрди, амма баҹы-гардашларын адәтән тәблиғә ајырдығы вахт онлар үчүн мүнасиб олмур. Ола билсин, онларын сүбһ тездән вә ја ахшамлар вахтлары вар. Сиз бу вахтларда кимәсә дәрс кечә биләрсиниз? Иса Никодемлә ҝеҹә вахты  сөһбәт етмишди, Никодемә бу вахт әл верирди (Јәһ. 3:1, 2).

12. Јахшы дәрс кечә биләҹәјимизә әминлијимизи нә артыра биләр?

¹² Мүгәддәс Китаб дәрси кечмәјә баҹарығымызын олмадығыны һесаб едирик. Бизә елә ҝәлә биләр ки, киминләсә Мүгәддәс Китаб дәрси кечмәк үчүн билијимиз вә мүәллимлик габилијјәтимиз һәлә кифајәт гәдәр дејил. Әҝәр белә дүшүнүрсүнүзсә, ҝәлин әминлијинизи артыраҹаг үч амили нәзәрдән кечирәк. Биринҹиси, Јеһова сизи башгаларыны өјрәтмәк үчүн јарарлы һесаб едир (2 Кор. 3:5). Икинҹиси, «ҝөјдә вә јердә бүтүн һакимијјәт» саһиби олан Иса сизә өјрәтмәк сәлаһијјәти вериб, демәли, сизин бунун өһдәсиндән ҝәләҹәјинизә инаныр (Мәт. 28:18). Үчүнҹүсү, Јеһова вә баҹы-гардашлар сизә көмәк едәҹәк. Јеһова Исаја нә һагда данышмағы, нә демәји өјрәтмишди, сизә дә өјрәдәҹәк (Јәһ. 8:28; 12:49). Үстәлик, сиз тәблиғ групу нәзарәтчиниздән, тәҹрүбәли өнҹүл вә ја тәблиғчидән хаһиш едә биләрсиниз ки, сизә Мүгәддәс Китаб дәрсинә башламағын вә давам етдирмәјин јолуну өјрәтсинләр. Өзүнүзә әминлији артырмағын бир јолу да бу тәблиғчиләрлә онларын кечирдији Мүгәддәс Китаб дәрсиндә иштирак етмәкдир.

13. Нәјә ҝөрә фәргли үсулларла тәлим вермәјә ујғунлашмалыјыг?

¹³ Јени үсуллардан вә вәсаитләрдән истифадә етмәк чәтин ҝәлир. Инди Мүгәддәс Китаб дәрсини фәргли үсулла кечирик. Әсас дәрс вәсаитимиз олан «Әбәди хошбәхт һәјат!» китабы елә тәртиб олунуб ки, әввәлкиндән фәргли тәрздә һазырлашмаг вә фәргли тәрздә дәрс кечмәк лазымдыр. Инди даһа аз абзас охујуруг вә шаҝирдлә даһа чох сөһбәт едирик. Дәрс заманы сајтымыздакы вә «JW Library^®» тәтбигиндәки видеолардан вә диҝәр материаллардан даһа чох истифадә едирик. Әҝәр бу вәсаитләрдән истифадә етмәји баҹармырсынызса, кимдәнсә көмәк истәјә биләрсиниз. Инсан һәр шеји вәрдиш етдији кими етмәји хошлајыр. Нәјисә фәргли тәрздә етмәјә өјрәшмәк чәтин ола биләр. Јеһованын вә баҹы-гардашларын көмәји илә асанлыгла өјрәшәҹәксиниз вә дәрс кечмәкдән даһа чох зөвг алаҹагсыныз. Бир өнҹүлүн дә дедији кими, «бу јени үсулла дәрс кечмәкдән һәм шаҝирд ләззәт алыр, һәм дә мүәллим».

14. Инсанлар бизи динләмирсә, нәји унутмамалыјыг вә 1 Коринфлиләрә 3:6, 7 ајәләри бизи неҹә руһландырыр?

¹⁴ Јашадығымыз әразидә киминләсә Мүгәддәс Китаб дәрсинә башламаг чәтиндир. Ола билсин, инсанлар хош хәбәрә лагејд јанашыр вә ја бизә гаршы чыхыр. Белә әразидә тәблиғ едириксә, инсанларын бизи динләјәҹәјинә үмидимизи итирмәмәјә бизә нә көмәк едә биләр? Унутмајын ки, бу гејри-стабил дүнјада инсанын вәзијјәти ани шәкилдә дәјишә биләр вә мүждәјә мараг ҝөстәрмәјән инсан Аллаһа еһтијаҹ дујдуғуну дәрк едә биләр (Мәт. 5:3). Әввәлләр нәшрләримизи ҝөтүрмәк истәмәјәнләр сонралар Мүгәддәс Китаб дәрсинә башлајыблар. Һәмчинин билирик ки, Јеһова бичин Саһибидир (Мәт. 9:38). О истәјир ки, биз әкин вә суварма иши илә мәшғул олмаға давам едәк. Мәһсулу бөјүтмәк исә Онун ишидир (1 Кор. 3:6, 7). Әҝәр һал-һазырда һеч кимә дәрс кечмирсинизсә, унутмајын ки, Јеһова әлдә етдијимиз нәтиҹәләрә јох, чалышганлығымыза мүкафат верир. Буну билмәк бизи руһландырыр! *

15. Кимсә Мүгәддәс Китабы өјрәнмәјә разылашанда вә өјрәндикләринә әмәл едәндә Јеһова һансы һиссләри кечирир?

¹⁵ Кимсә һәгигәти гәбул едәндә вә өјрәндијини башгаларына данышанда Јеһова чох севинир (Мәс. 23:15, 16). Тәсәввүр етмәк олар, һал-һазыркы фәалијјәтимизи ҝөрәндә Јеһова нә гәдәр фәрәһ дујур! Мәсәлән, 2020-ҹи хидмәт или әрзиндә глобал пандемија олса да, 7 705 765 нәфәрлә Мүгәддәс Китаб дәрси кечирилиб, 241 994 нәфәр исә өзүнү Аллаһа һәср едәрәк вәфтиз олунуб. Јеһованын бу јени хидмәтчиләри дә башгаларына дәрс кечәҹәк вә даһа чох шаҝирд һазырланаҹаг (Лука 6:40). Сөзсүз ки, шаҝирд һазырламаг ишиндә иштирак етмәклә Јеһованын гәлбини севиндиририк.

16. Гаршымыза һансы мәгсәди гојсаг, јахшы олар?

¹⁶ Шаҝирд һазырламаг иши чәтин ишдир. Амма Јеһованын көмәји илә биз бу ишдә иштирак едиб, инсанлара Јеһованы севмәјә көмәк едә биләрик. Гаршыныза һеч олмаса бир нәфәрә Мүгәддәс Китаб дәрси кечмәји мәгсәд гоја биләрсиниз? Јаранан һәр фүрсәтдә гаршылашдығыныз инсанлара Мүгәддәс Китабы өјрәнмәји тәклиф един. Бунун неҹә ҝөзәл нәтиҹә вердијини өзүнүз ҝөрәҹәксиниз. Әмин ола биләрик ки, Јеһова зәһмәтимизи јердә гојмајаҹаг.

17. Шаҝирд һазырламаг бизә һансы һиссләри бәхш едәҹәк?

¹⁷ Һәгигәти тәблиғ етмәк вә өјрәтмәк бизим үчүн бөјүк шәрәфдир! Бу иш бизи сөзүн әсл мәнасында хошбәхт едир. Һәвари Булус Салоникидә бир чох инсана Мәсиһин шаҝирди олмаға көмәк етмишди. О өз һиссләрини белә ифадә едир: «Ағамыз Исанын һүзуру заманы, онун гаршысында бизим үмидимиз, севинҹимиз, фәхр таҹымыз сиз дејилсинизми? Бәли, бизим шәрәфимиз дә, севинҹимиз дә сизсиниз» (1 Салон. 2:19, 20; Һәв. 17:1—4). Бу ҝүн дә чохлары ејни һиссләри кечирир. Стефани адлы баҹы әри илә бирликдә чох адама вәфтизә доғру ирәлиләмәјә көмәк едиб. О дејир: «Кимәсә өзүнү Јеһоваја һәср етмәјә көмәк етмәк инсана әвәзолунмаз севинҹ ҝәтирир!»